SKENDO LA PAPIC

WAKATI hali ikiwa si shwari ndani ya klabu ya Yanga, imebainika kuwa, wachezaji wengi wa timu hiyo hawana mikataba inayoeleweka kutokana na kuchakachuliwa na baadhi ya viongozi.
Habari za uhakika kutoka ndani ya Yanga zimeeleza kuwa, wachezaji pekee wenye mikataba ya uhakika hawazidi watano na kuongeza kuwa, wengine mikataba yao ni hewa.
Kwa mujibu wa habari hizo, kufuatia kubainika kwa uchakachuaji huo, mfadhili mkuu wa Yanga, Yusuf Manji ameuagiza uongozi wa klabu hiyo kukusanya mikataba yote ya wachezaji kwa ajili ya kuhakikiwa.
Uamuzi wa Manji kukusanya mikataba hiyo umekuja siku chache baada ya kukutana na wachezaji wote wa timu hiyo katika kikao kilichofanyika Jumatatu iliyopita, makao makuu ya klabu hiyo mitaa ya Twiga na Jangwani, Dar es Salaam. Manji alikutana na wachezaji hao kwa lengo la kusikiliza madai yao ya pesa za usajili na malipo mengine kulingana na mikataba yao. Aliutaka uongozi uwe umemaliza kazi ya kukusanya mikataba hiyo jana.
Katika kikao hicho, baadhi ya wachezaji walimweleza Manji kuwa, hawajalipwa pesa zao za usajili, kauli iliyomshtua mfadhili huyo kwa vile alishawapatia viongozi fedha zote.
Wachezaji wengine walimweleza mfadhili huyo kuwa, wamekuwa wakilazimika kuwalipa baadhi ya viongozi sehemu ya malipo yao kama fadhila kutokana na kufanikisha usajili wao.
Mbali na hilo, wachezaji wengine walimweleza Manji kuwa, wamekuwa wakiishi kwa hofu kutokana na baadhi ya viongozi kujenga chuki dhidi yao kwa kukataa kuwapa chochote.
Miongoni mwa wachezaji wanaodaiwa kuonja machungu ya viongozi hao ni pamoja na viungo Athumani Idd 'Chuji' na Ernest Boakye, ambaye aliwahi kutimuliwa katika kambi huko Tanga baada ya kudai anaumwa tumbo.
Wachezaji wengine, ambao pia inadaiwa wamekumbana na adha hiyo ni Mohamed Mbegu, ambaye naye aliwahi kusimamishwa kwa muda kwa tuhuma za utovu wa nidhamu. Wengine ni Fred Mbuna na Chacha Marwa, ambao wamekuwa hawapati namba kwenye kikosi cha kwanza cha timu hiyo.
Uchunguzi wa Burudani umebaini kuwa, baadhi ya viongozi wa Yanga walikuwa wakiingia mikataba kinyemela na wachezaji wa timu hiyo na kuwaandikia kiasi kikubwa cha malipo, lakini fedha walizokuwa wakiwapatia zilikuwa kiduchu.
Chanzo cha habari kutoka ndani ya Yanga kimeeleza kuwa, kufuatia Manji kubaini kuwepo kwa mikataba hewa ya wachezaji, baadhi ya watendaji wakuu wa klabu hiyo wameamua kujiuzulu.
Miongoni mwa viongozi waliojiuzulu ni Katibu Mkuu, Lawrence Mwalusako, Meneja wa timu, Emmanuel Mpangala na Kocha Mkuu, Kostadin Papic.
Alipoulizwa jana kuhusu tuhuma za matumizi mabaya ya pesa na uchakachuaji wa mikataba ya wachezaji, Mwenyekiti wa Yanga, Llyod Nchunga alisema wameshaanza kufanya uchunguzi, ambao ndio utakaobaini iwapo ni kweli au la.
Nchunga alisema ukaguzi wa hesabu ndio utakotoa majibu iwapo viongozi waliojiuzulu wanahusika na tuhuma hizo ili hatua za kisheria ziweze kuchukuliwa dhidi yao.
Hata hivyo, Nchunga alimtetea Mwalusako kwa kusema hahusiki na tuhuma hizo na kusisitiza kuwa, kujiuzulu kwake kumetokana na matatizo ya kiafya kama taarifa yake kwa vyombo vya habari ilivyoeleza.
Kuhusu Papic, Nchunga alisema kocha huyo ameamua kujiuzulu baada ya kukataa kufanya kazi na Fred Minziro, ambaye ameteuliwa kuwa kocha msaidizi wa timu hiyo.
“Kwa vile hakutaka kufanyakazi na msaidizi wake, hakukuwa na sababu ya yeye (Papic), kubaki kwa sababu Yanga si ya mtu mmoja na ni lazima benchi la ufundi kama linamahitaji, lifanyiwe kazi,”alisema.
Kwa upande wake, Mwalusako alisisitiza kuwa, sababu alizozitoa kuhusu uamuzi wake wa kujiuzulu ni sahihi na hazina shaka na kuongeza kuwa, yupo tayari kuchunguzwa. Mpangala hakuweza kupatikana.

Z'bar kupata uanachama FIFA 2012

SERIKALI ya Mapinduzi ya Zanzibar (SMZ) imesema Zanzibar itakuwa mwanachama kamili wa Shirikisho la Soka Duniani (FIFA) ifikapo mwaka 2012.
Hayo yalisemwa na Waziri wa Habari, Utamaduni, Utalii na Michezo, Abdillahi Jihadi Hassan wakati akijibu swali na nyongeza la Mwakilishi wa Kiwani, Hijja Hassan Hijja aliyetaka kujua mchakato wa Zanzibar kuwa mwanachama wa FIFA utakamilika lini. Jihadi alisema mchakato huo unakwenda vizuri na tayari FIFA imeshaanza kuonyesha dalili za kuikubalia Zanzibar kuwa mwanachama.
Alisema mchakato huo unatarajiwa kukamilika rasmi ifikapo mwaka 2012 wakati wa mkutano mkuu wa FIFA, unaotarajiwa kufanyika mjini Zurich, Uswisi. “Nataka kuwaambia wajumbe kwamba, yapo matumaini makubwa ya Zanzibar kukubaliwa kuwa mwanachama wa (FIFA). Mchakato huu unakwenda vizuri na mkutano wa mwaka 2012 ndio utakaotoa idhini ya maombi yetu,”alisema. Zanzibar imekuwa katika mikakati na juhudi za kuomba uanachama wa FIFA tangu mwaka 2002, ambapo Serikali ya Jamhuri ya Muungano imetoa baraka zote. Katika kutoa baraka hizo, Shirikisho la Soka Tanzania (TFF) limekuwa likikisaidia Chama cha Soka cha Zanzibar (ZFA) kwa hali na mali ili kiweze kupata uanachama huo.
Zanzibar inataka kuwa mwanachama wa FIFA ili iweze kufaidika na misaada mbalimbali inayotolewa na shirikisho hilo, ikiwemo ya fedha na kiufundi na pia kupatiwa wataalamu wa kukuza mchezo wa soka.

TINO: Filamu ya Shoga itatikisa

MTUNZI na mwigizaji mkuu wa filamu inayozungumzia tabia na vitendo vya ushoga, Hisani Muya amesema tayari kazi ya kuitayarisha imeshakamilika na inatarajiwa kuingizwa sokoni wakati wowote.
Muya, maarufu zaidi kwa jina la Tino alisema wiki hii mjini Dar es Salaam kuwa, filamu hiyo ilichelewa kuingizwa sokoni kutokana na kazi ya kuihariri kufanywa kwa umakini zaidi.
Tino alisema, awali filamu hiyo ilipewa jina la Painfull, lakini wameamua kulibadili, ambapo sasa itajulikana kwa jina la Shoga.
Mwigizaji huyo mwenye mvuto alisema kwa sasa yupo kwenye maandalizi ya mwisho kwa ajili ya uzinduzi wa filamu hiyo, ambao alitamba kuwa utakuwa wa aina yake.
Alisema ameamua kuandaa uzinduzi wa filamu hiyo kwa lengo la kuitangaza zaidi ili ujumbe wake uweze kuifikia jamii kiurahisi.
“Ni kweli tangu nilipoingia kwenye gemu, sijawahi kufanya uzinduzi wa filamu, lakini kumbuka mambo yanakwenda yakibadilika kila siku na tunataka kuwa kama wenzetu waliotangulia,” alisema.
Akifafanua kuhusu uamuzi wake wa kucheza filamu hiyo kama shoga, Tino alisema haoni kama kuna tatizo kwa vile hiyo si tabia yake bali amejaribi kuvaa uhusika huo kwa lengo la kufikisha ujumbe kwa jamii.
Alisema filamu hiyo ni tofauti sana na zingine alizowahi kuzitayarisha kutokana na maudhui na ujumbe wake ndio sababu imezua utata kwa jamii inayomzunguka na watu wake wa karibu.
“Utata ninaouzungumzia hapa ni kama lilivyo jina lenyewe. Kwa mara ya kwanza Tino aliyezoeleka katika filamu za mapenzi anaigiza kama shoga badala ya filamu za malavidavi,”alisema mcheza filamu huyo huku akitabasamu.
Tino alisema hastushwi na hisia zilizoanza kujengeka kwa baadhi ya watu wanaodhani yeye ni shoga kwa sababu msanii anaweza kucheza nafasi yoyote anayopangwa.
“Wengi tayari wameshaanza kuhisi hii ni tabia yangu, lakini ukweli hii ni sanaa tu, haina maana kwamba ukiigiza kama shoga basi hiyo ndiyo tabia yako. Kwangu mimi hii si changamoto tu bali ni matatizo,”alisema.
Kijana huyo mtanashati alisema haoni iwapo filamu hiyo itamletea matatizo kwa waumini wenzake wa dini ya kiislamu kwa sababu alichokifanya ni kukemea tabi hiyo.
Alisema dini zote mbili, ya kiislamu na kikristo haziruhusu vitendo hivyo na kwamba katika filamu hiyo amejaribu kukemea tabia hiyo na kuonyesha madhara yake. Tino alisema haamini iwapo filamu yake hiyo inaweza kuchochea na kuhalalisha vitendo vya kishoga hadharani ama kuwakera viongozi wa dini hizo mbili kubwa nchini.
“Katika filamu hii, mimi nimeonyesha athari za ushoga, kwa ujumla ni kwamba shoga huyo katika filamu yangu anapata maambukizi ya ukimwi, lakini vilevile mkewe baada ya kugundua, anaamua kumuua kwa hiyo kupitia filamu hii, tumeona madhara ya ushoga,”alisema.
Kwa mujibu wa Tino, uzinduzi wa filamu hiyo umepangwa kufanyika Februari 4, 2011 katika ukumbi wa Travertine uliopo Magomeni, Dar es Salaam. Alisema uzinduzi huo utapambwa kwa burudani kutoka kwa wasanii mbalimbali, likiwemo kundi la Mapacha Watatu.
Tino ameitaka jamii kuwa makini na vitendo vya ushoga kwa sababu vipo, lakini baadhi ya watu wanavifumbia macho na hawatakiKuvizungumza kwa kuvionea aibu.

MWALUSAKO: Kuongoza Yanga matatizo

SWALI: Pole na matatizo ya kuumwa. Hivi ni kweli kwamba hiyo ndiyo sababu hasa iliyokufanya uamue kujiuzulu uongozi wa Yanga?
JIBU: Ukweli ni kwamba mimi ninaumwa. Nimekuwa nikisumbuliwa kwa muda mrefu la tatizo la moyo, ugonjwa ambao nimegundua unaweza kufupisha maisha yangu.
Tatizo hilo limetokana na kutumia kwangu muda mwingi kufanyakazi bila ya kupumzika, hali ambayo wakati mwingine imekuwa ikiniweka kwenye wakati mgumu.
Unajua ukiwa kiongozi wa klabu kubwa kama Yanga, hasa katika nafasi ya utendaji niliyokuwa nikiitumikia mimi, unakuwa ukipigiwa simu mara kwa mara za kutakiwa kutatua tatizo hili na lile. Hali hii ilikuwa ikisababisha wakati mwingine napitisha hata muda wa kunywa dawa zangu nah ii ni hatari.
Licha ya tatizo hilo, nilijitahidi kufanyakazi zangu kwa ufanisi, lakini wapo baadhi ya wanachama au watu binafsi waliokuwa wakiniona sifanyi lolote.
SWALI: Kwanini unasema hivyo? Au kuna shinikizo umelipata kutoka kwa mfadhili mkuu wa Yanga, Yusuf Manji?
JIBU: Hapana, Manji hajanipa shiniko lolote kuhusu kujizulu, isipokuwa nimeamua kukaa pembeni ili niweze kujiuguza.
Pamoja na hilo, bado nina kila sababu ya kukaa pembeni kwani nimegundua wapo watu walikuwa wananiandama kwa sababu mbalimbali.
Pale Yanga wapo baadhi ya wanachama wakitaka jambo lao, ambalo pengine linahitaji maamuzi ya pamoja, na ukimweleza mtu asubiri na kisha likakataliwa, tayari mtu huyo atakuchukia.
Lakini ukweli ni kwamba yapo mambo mengi, ambayo kwa asilimia kubwa yamechangia mimi kufikia uamuzi huu ili kukwepa kujiumiza.
SWALI: Tangu ulipoteuliwa kuwa katibu mkuu wa Yanga, nini hasa kilitokea kukukera na pengine kuchangia kwa kiasi kikubwa wewe kujiuzulu katika wadhifa huo mbali ya ugonjwa?
JIBU: Kwa kweli nimekuwa nikichukizwa na baadhi ya watu, ambao wanaeneza chokochoko ndani ya Yanga. Watu hawa wamekuwa wakichonganisha watu, hasa viongozi na kufikia hatua ya kuigawa klabu kitu, ambacho ni kibaya.
Pia nimekuwa nikikerwa sana na tabia ya uzushi wa mambo na wakati mwingine watu kufikia hatua ya kuchafuana.
Wapo baadhi ya watu au wanachama walioeneza uvumi kwamba mimi na viongozi wenzangu tumekula pesa nyingi za Yanga kitu, ambacho si kweli kwani mambo yote yapo wazi.
SWALI: Je, upo tayari kushirikiana na wakaguzi wa hesabu ili kuchunguza mapato na matumizi ya klabu ya Yanga kwa kipindi chote cha uongozi wako?
JIBU: Nipo tayari kushirikiana na watu hao ili niweze kuweka wazi mambo kwani tabia ya kuchafuana si nzuri na jambo hilo ni miongoni mwa mambo yaliyosababisha nijiondoe ndani ya uongozi wa Yanga. SWALI: Mwishoni mwa wiki hii Yanga itacheza na timu ya Dedebit ya Ethiopia katika mechi ya awali ya michuano ya Kombe la Shirikisho. Je, huoni kama kujiuzulu kwako kunaweza kuwachanganya wachezaji kwa kukosa huduma yako?
JIBU: Sidhani kama hilo linaweza kutokea. Wapo watendaji wengine, ambao naamini watafanyakazi zangu kwa ufanisi. Lakini binafsi nitaendelea kushirikiana na uongozi kwa vile mimi ni mwanachama wa Yanga.
Lakini nitafanya hivyo kama afya yangu itaniruhusu kwenda kufanya kazi za klabu iwapo nitahitajika. Kikubwa nawaomba wachezaji wa Yanga wajitume zaidi ili kuhakikisha wanashinda mchezo huo.
Pia nawaomba viongozi, wanachama na wapenzi wa Yanga tuwaunge mkono wachezaji wetu kwa kuwashangilia kwa nguvu ili waweze kushinda mchezo huo.
SWALI: Hivi sasa umeshajiondoa katika uongozi wa klabu ya Yanga, nini matarajio yako kwa siku zijazo?
JIBU: Natarajia kuendelea na kazi yangu niliyokuwa nikiifanya kabla ya kujiunga na Yanga huku nikiangalia afya yangu kwa ukaribu zaidi ili niweze kupona kabisa.
Naamini naweza kurejea kazini siku zijazo kwa ajili ya kujitafutia riziki, lakini nitaendelea kuwepo Yanga na milango ipo wazi wakati wowote kwa viongozi iwapo watanihitaji kuwapa ushirikiano kama hali yangu itakuwa nzuri kiafya.

ASHA APATA TIMU UTURUKI

MCHEZAJI Asha Mohamed wa Mburahati Queens na timu ya soka ya taifa ya wanawake, Twiga Stars hivi karibuni alisajiliwa na klabu ya Atasehir Belediyespor ya Uturuki kwa ajili ya kucheza soka ya kulipwa nchini humo. Asha amesajiliwa na timu hiyo baada ya kufuzu majaribiona vipimo vya afya. Pichani, Asha akiwa katika matukio tofauti ndani ya majengo ya klabu hiyo iliyopo mjini Istanbul.

OMOTOLA ATIMIZA AHADI YAKE

MCHEZA Filamu na mwanamuziki nyota wa Nigeria, Omotola Jalade hivi karibuni alitimiza ahadi ya kuwasaidia watoto yatima na wenye matatizo baada ya kutembelea nyumba ya Heart of Gold Hospices iliyopo Isolo, Lagos. Katika ziara yake hiyo ya siku mbili, Omotola alipata nafasi ya kucheza na watoto hao, kuelezwa matatizo yao na kupiga nao picha ya pamoja.

OMOTOLA JALADE NA WANAWE!

HUWEZI kuamini! Mwigizaji nyota wa Nigeria, Omotola Jalade (katikati) akiwa na watoto wake wanne pamoja na mwigizaji mwenzake nyota wa nchi hiyo, Genevieve Nnaji (wa pili kushoto) wakati wa sherehe za kutoa tuzo za MAMA'S zilizofanyika hivi karibuni nchini humo.

Msimbazi wamnasa Mcameroon

KLABU ya Simba imefanikiwa kukinasa kifaa kipya kutoka Cameroon, ambacho itakitumia katika mashindano ya soka ya klabu bingwa Afrika yanayotarajiwa kuanza mwishoni mwa mwezi huu.
Habari kutoka ndani ya Simba zimemtaja mchezaji huyo kuwa ni Cosmas Ekeh, anayecheza nafasi ya kiungo na ushambuliaji kutoka klabu ya Metro Security, inayocheza ligi daraja la kwanza nchini humo.
Kwa mujibu wa habari hizo, Ekeh alitua nchini mwishoni mwa wiki iliyopita na kupewa mkataba mnono, lakini uongozi wa Simba umekataa kuuweka hadharani.
Akizungumzia ujio wa mchezaji huyo, Kocha Mkuu wa Simba, Patrick Phiri alisema amefurahi kupata mchezaji mwenye sifa zinazokubalika ndani na nje ya uwanja.
Phiri alisema kwa kipindi alichokaa na mchezaji huyo, amebaini kuwa, kiwango chake kipo juu na anaweza kuisaidia timu yake katika michuano hiyo.
Kocha huyo kutoka Zambia alisema, iwapo Ekeh atafanya vizuri katika michuano hiyo, huenda akasajiliwa na Simba katika msimu ujao wa ligi kuu ya Tanzania Bara.
Ekeh anatarajiwa kuanza kuonyesha cheche zake leo wakati Simba itakapomenyana na Atletico Paranaense ya Brazil katika mechi ya kirafiki ya kimataifa, itakayochezwa kwenye Uwanja wa Taifa, Dar es Salaam.
Naye Ekeh alisema amekuja nchini kucheza soka na kuisaidia Simba ili iweze kufanya vizuri katika mashindano hayo makubwa ya ngazi ya klabu barani Afrika.
Ekeh alisema tayari ameshatia saini mkataba wa kuichezea timu hiyo, lakini hakuwa tayari kuuweka wazi kwa madai kuwa, hiyo ni siri yake na uongozi wa klabu.
Simba inatarajiwa kukata utepe wa michuano ya Afrika kwa kumenyana na Elam ya Comoro. Iwapo itashinda, itakutana na TP Mazembe ya Jamhuri ya Kidemokrasi ya Congo katika raundi ya kwanza.

Yanga ubabe mtupu

HAKUNA kinachoeleweka! Ndivyo unavyoweza kuuelezea mgogoro uliozuka sasa kati ya uongozi wa klabu ya Yanga na viongozi wa matawi ya klabu hiyo ya mjini Dar es Salaam.
Wakati viongozi wa matawi wameitisha mkutano leo kwa lengo la kujadili masuala mbalimbali yanayoihusu Yanga, Mwenyekiti wa klabu hiyo, Llyod Nchunga ametangaza kutoutambua na kuupiga marufuku.
Katika taarifa yake kwa vyombo vya habari juzi, Nchunga alisema ameupiga marufuku mkutano huo kwa sababu unaweza kuchafua hali ya hewa ndani ya Yanga.
Lakini Mwenyekiti wa matawi ya klabu hiyo, Mohamed Msumi aliwaambia waandishi wa habari mjini Dar es Salaam jana kuwa, lazima mkutano huo ufanyike kama ulivyopangwa.
Nchunga alisema mkutano huo hauna madhara kwa uongozi kwa vile lengo lao ni kujadili matatizo yaliyopo ndani ya Yanga na kuyatafutia ufumbuzi.
Alizitaja ajenda zinazotarajiwa kujadiliwa kwenye mkutano huo kuwa ni hali ya kutokuelewana kati ya Nchunga na makamu wake, Davis Mosha pamoja na uteuzi wa Mbunge wa Temekem, Abbas Mtemvu (CCM), kuwa mdhamini wa klabu.
Ajenda nyingine ni matumizi ya sh. milioni 200 zilizotolewa na mfadhili mkuu wa klabu hiyo, Yusuf Manji kwa ajili ya usajili wa wachezaji Davis Mwape na Juma Sefu wakati wa usajili wa dirisha dogo.
Msumi alisema mkutano huo ni haki ya wanachama na hauna lengo la kuupinga uongozi uliopo madarakani, hivyo Nchunga hapaswi kuuhofia kwa sababu lengo lao ni kuweka mambo sawa.
Mgogoro kati ya uongozi na wanachama ulizuka siku chache baada ya Yanga kuchapwa mabao 2-0 na Simba katika mechi ya fainali ya michuano ya Kombe la Mapinduzi, iliyochezwa wiki iliyopita kwenye Uwanja wa Amaan, Zanzibar.
Mapema jana asubuhi, mfadhili mkuu wa klabu hiyo, Yusuf Manji aliwaita wazee wa klabu hiyo ofisini kwake barabara ya Nyerere, Dar es Salaam kwa ajili ya kuteta nao ili kuweka mambo sawa.
Haikuweza kufahamika mara moja kilichojadiliwa katika kikao hicho, lakini kuna habari kuwa, Manji amewasihi wazee hao watulize mzuka ili kuepuka kuiingiza klabu kwenye mgogoro mpya.

SIMBA HAOOO BRAZIL

MABINGWA wa soka wa Tanzania Bara, Simba wamepewa ahadi ya kukwea pipa kwenda Brazil iwapo wataishinda Atletico Paranaense ya nchini humo.
Simba na Atletico, inayoundwa na wachezaji wengi wadogo kiumri, zinatarajiwa kumenyana leo katika mechi ya kirafiki ya kimataifa, itakayochezwa kwenye Uwanja wa Taifa, Dar es Salaam.
Mwenyeji wa Wabrazil hao, Fatma Al-Kharoos aliwaambia waandishi wa habari juzi kuwa, ataipeleka Simba nchini Brazil kwa ajili ya mechi ya marudiano kati ya timu hizo mbili iwapo tu itashinda leo.
Katika mechi yake ya kwanza iliyochezwa juzi kwenye uwanja huo, Atletico iliichapa Yanga mabao 3-2.
“Napenda kuiona Simba ikiifunga na Atletico na iwapo itafanya hivyo, nitaipeleka Brazil kwa ajili ya mchezo wa marudiano,”alisema Rahma.
Mwanamama huyo pia amewapa ofa mashabiki wa soka wa Dar es Salaam kushuhudia mechi hiyo bure ili waweze kupata uhondo kutoka kwa timu hizo mbili.
Katika mechi hiyo, Simba itamkosa mshambuliaji wake nyota, Emmanuel Okwi, ambaye amerejea kwao Uganda kwa ajili ya kupatiwa matibabu ya mguu.
Okwi aliumia wakati Simba ilipomenyana na Ocean View katika mechi ya nusu fainali ya Kombe la Mapinduzi, iliyochezwa wiki iliyopita mjini Zanzibar.
Hata hivyo, Simba huenda ikawachezesha wachezaji Juma Kaseja, Juma Nyoso, Kelvin Yondani, Jabir Azizi na Abdalla Shiboli waliokuwa na kikosi cha Taifa Stars nchini Misri. Timu hiyo ilirejea nchini juzi usiku.
Mchezo huo ni wa pili wa kimataifa kwa Simba ndani ya wiki moja. Mwishoni mwa wiki iliyopita, Simba ilichapwa mabao 2-1 na ZESCO ya Zambia katika mechi iliyochezwa kwenye Uwanja wa Uhuru.

HUENDI POPOTE!

Mchezaji Omega Seme (kushoto) wa Yanga akimtoka Bruno Costa (chini) wa Atletico ya Brazil wakati timu hizo zilipomenyana juzi katika mechi ya kirafiki ya kimaraifa iliyochezwa kwenye Uwanja wa Taifa, Dar es Salaam. Atletico ilishinda mabao 3-2. (Picha na Bashir Nkoromo).

KIPA Juma Kaseja (kulia) na mchezaji mwenzake wa timu ya taifa, Taifa Stars wakiwasili kwenye Uwanja wa Ndege wa Kimataifa wa Mwalimu Julius Nyerere, Dar es Salaam juzi usiku wakitokea Misri, ambako timu hiyo ilikwenda kushiriki katika michuano ya Kombe la Mto Nile. (Picha na Khamis Hamad).

MZEE YUSUF ALAZWA HOSPITALI

Mwimbaji nyota wa nyimbo za muziki wa taarab na Mkurugenzi wa kikundi cha Jahazi, Mzee Yusuf amelazwa kwenye hospitali ya Dokta Bakhe iliyopo Kibaha mkoani Pwani baada ya kufanyiwa operesheni ya mguu. Habari kutoka kwa watu wa karibu na mwimbaji huyo zimeeleza kuwa, Mzee alilazwa kwenye hospitali hiyo tangu mwishoni mwa wiki iliyopita, lakini hali yake inaendelea vizuri. Pichani, Mzee akijuliwa hali na mkewe, Leila Rashid, ambaye pia ni mwimbaji wa kikundi hicho. (Picha kwa hisani ya tovuti ya Dida).

Papic: Nipo tayari kwa lolote

KOCHA Mkuu wa timu ya soka ya Yanga, Kostadin Papic amesema yupo tayari kwa lolote, kufuatia timu hiyo kufanya vibaya katika michuano mbalimbali.
Akizungumza mjini Dar es Salaam juzi, Papic alisema kufanya vibaya kwa Yanga katika mechi mbalimbali kumechangiwa na sababu zilizo nje ya uwezo wake.
Kauli hiyo ya Papic ilikuja saa chache baada ya Yanga kuchapwa mabao 3-2 na Atletico Paranaense ya Brazil katika mechi ya kirafiki ya kimataifa, iliyochezwa kwenye Uwanja wa Taifa, Dar es Salaam.
Alizitaja baadhi ya sababu hizo kuwa ni pamoja na mwingiliano wa mashindano mbalimbali, unaotokana na Shirikisho la Soka Tanzania (TFF) kutokuwa na kalenda ya uhakika.
"Hebu fikiri, Yanga inashiriki michuano ya Kombe la Shirikisho,tumepanga programu zetu, mara yanazuka mashindano ya Kombe la Mto Nile, wachezaji wangu muhimu wanakwenda Misri,"alisema kocha huyo kutoka Serbia.
Alisema mwingiliano huo wa mashindano umesababisha programu yake ya mazoezi kuvurugika na mambo mengi kwenda kinyume na alivyoyapanga.
Papic pia aliushutumu uongozi wa Yanga kwa kushindwa kukamilisha uhamisho wa mchezaji Kenneth Asamoah, kitendo ambacho alidai kuwa kimemkera na kumvurugia mipango yake.
Mserbia huyo alikwenda mbali zaidi kwa kusema, baadhi ya wakati amekuwa akishindwa kutekeleza majukumu yake kutokana na wachezaji wengi pamoja na yeye binafsi kushindwa kulipwa haki zao kwa wakati mwafaka.
Kocha huyo, aliyelipwa mshahara wake wa mwezi uliopita mwanzoni mwa wiki hii alisema, kasoro hizo zimechangia kuwafanya wachezaji wacheze chini ya kiwango na timu kuvurunda.
“kutokana na sababu hizo na zinginezo, nipo tayari kwa lolote kutokana na timu kufanya vibaya,”alisema.
Papic pia alisema hana taarifa kuhusu kuteuliwa kwa Fred Felix Minziro kuwa msaidizi wake, lakini alisisitiza, yupo tayari kufanyanaye kazi pamoja.

G-Nako aamua kutoka kivyake

MSANII George Nako wa kundi la Twenty Eleven lenye maskani yake mkoani Arusha, ameamua kurekodi singo yake inayojulikana kwa jina la ‘Oooh’.
George, ambaye pia anajulikana kwa majina ya G-Nako, The Finest of AR na Mr. Swagnificent amerekodi singo hiyo kwa kushirikiana na msanii Jade.
Msanii huyo mwenye sura na umbo lenye mvuto amesema, singo yake hiyo ni utambulisho wa albamu yake ya kwanza inayotarajiwa kutoka hivi karibuni ikiwa na nyimbo nane.
"Nakuja na albamu yangu itakayokuwa na nyimbo nane, tano nimekwishazitengeneza na nyingine tatu ziko jikoni zinapikwa, zikiwa tayari naingiza albamu sokoni," alisema.
Hata hivyo, G-Nako alisema maandalizi ya albamu yake hiyo hayawezi kuathiri kazi za kundi lake, ambalo linatesa vikali kimuziki ndani ya jiji la A-Town.
"Nipo kazini kotekote. Nikiwa na kundi langu nakamua mpaka mwisho na nikiwa solo, mwendo ni huo huo. Mashabiki wangu na wa kundi wanalijua hilo," alisema G-Nako.
Msanii huyo alisema, iwapo atatokea mtu na kumuuliza anunue albamu ipi, kati ya ile ya kwake na ya kundi iwapo zitaingizwa sokoni pamoja, alisema: " Ukimpenda G-Nako, utawapenda Nako2Nako Soldiers, hivyo hapo itabidi tu ununue albamu zote ili ufaidi," alisema.
Kwa mujibu wa G-Nako, amerekodi kibao cha Oooh katika studio za Sababisha Records chini ya watayarishaji muziki, B. Hits na Panchi Latino.

Genevieve akana kuwa mja mzito

LAGOS, Nigeria
MWIGIZAJI nyota wa kike wa Nigeria, Genevieve Nnaji amekanusha madai kuwa, ana uja uzito wa mwanamuziki nguli wan chi hiyo, D’Banji.
Genevieve, ambaye amecheza filamu zaidi ya 200 za Kinigeria, alisema wiki hii kuwa, japokuwa uvumi huo ni taarifa za heri, lakini hauna ukweli wowote.
“Sitaki kumvunjia mtu heshima kwa kusema uongo, lakini ukweli ni kwamba hakuna cha kujibu kuhusu hilo,”alisema mwigizaji huyo mwenye mvuto.
Alikuwa akijibu swali aliloulizwa na mwandishi mmoja wa gazeti la The Sun la Nigeria iwapo ni kweli ana uja uzito wa mwanamuziki huyo.
“Nimesikia uzushi mwingi kuhusu mimi, lakini angalau safari hii ni habari nzuri, japokuwa hazina ukweli,”alisema.
Hata hivyo, Genevieve alikiri kuwa ni kweli ana uhusiano wa kimapenzi na mwanamuziki huyo machachari wa Afrika Magharibi.
Alisisitiza kuwa, iwapo habari hizo ni za kweli, hilo litabainika kadri miezi inavyosonga mbele kwa sababu mimba huwa haijifichi.

Aki, Ukwa sasa kutengeneza filamu zao

LAGOS, Nigeria
BAADA ya kutamba kwa miaka mingi katika fani ya uigizaji filamu, Osita Iheme (Aki) na Chinedu Ikedieze (Ukwa) wameamua kutayarisha filamu zao wenyewe.
Aki na Ukwa walielezea mikakati yao hiyo wiki hii katika mahojiano maalum na mtandao wa Nigeria Films.
Mbali na kutengeneza filamu zao wenyewe, waigizaji hao wafupi na wenye vichekesho vya kuvunja mbavu, pia walikanusha madai kuwa hawaelewani na wana mpango wa kutengana.
Aki alisema si kweli kwamba wameamua kila mmoja kufanyakazi kivyake ndio sababu wameamua kushirikiana na kuandaa filamu zao wenyewe.
Kwa mujibu wa Aki, hawana haraka katika kuandaa filamu zao, lakini wanatarajia kuanza mpango huo mwaka huu. Alisema wataandaa filamu hizo kupitia kampuni yao ya APEN- (Aki and Pawpaw Entertainment Nigeria).
Naye Ukwa alisisitiza kuwa, bado wapo pamoja na anaamini vitu vyao vitaanza kuonekana hivi karibuni. Alisema kilichopangwa na Mungu hakuna anayeweza kukipangua.
“Sisi tumeunganishwa na Mungu,”alisema Ukwa na kudokeza kuwa, wanavyo pia vipaji vya uimbaji, lakini hakutaka kuzungumzia zaidi suala hilo.
Waliwataja waigizaji wenzao wanaowavutia na kufurahia kufanyanao kazi pamoja kuwa ni Rita Dominic, Nkem Owoh, John Okafor, Ini Edo, Sam Loco-Efe na Genevieve Nnaji.

Jordan atengana rasmi na mumewe

LONDON, England
BAADA ya kuwepo kwa wiki kadhaa za tetesi na uvumi, hatimaye mwigizaji na mwanamitindo nyota wa Uingereza, Katie Price ‘Jordan’ ametangaza kutengana na mumewe Alex Reid.
Jordan (32) ametangaza kutengana na mumewe miezi 11 tangu walipofunga ndoa na kuishi kama mume na mke.
Mama huyo wa watoto watatu alitoa taarifa hiyo juzi jioni baada ya Reid (35) kupigwa picha akionekana anahama kutoka nyumbani kwao eneo la Surrey na kurejea kwa wazazi wake eneo la Hampshire.
Jordan alikiri kuwa, ndoa yao ilikumbwa na matatizo mengi katika miezi michache iliyopita, ikiwa ni pamoja na msuguano kati yake na Reid kuhusu kuzaa naye mtoto. Kutengana kwa wanandoa hao kumekuja wiki chache baada ya kuvinjari kwa siri kwenye kisiwa kimoja kilichopo bahari ya Hindi kwa ajili ya mapumziko.
Mara baada ya kurejea England, Jordan aliwaeleza wasomaji wa mtandao wake kuwa, taarifa kuhusu ndoa yake kukumbwa na matatizo zilikuwa za kweli.
Katika taarifa yake, Jordan alimshutumu mumewe kwa kuwa na mabadiliko makubwa tofauti na alivyokuwa wakati alipojitosa kimapenzi kwake.
Jordan na Reid walianza kuwa na uhusiano wa kimapenzi Julai, 2009, ikiwa ni wiki nane baada ya mwanamama huyo kutengana na mumewe wa kwanza, Peter Andre. Wakati huo, Reid alikuwa mmoja wa waigizaji nyota wa filamu.
Kwa mujibu wa Jordan, walipanga kutoa taarifa ya pamoja kuhusu kutengana kwao mwishoni mwa wiki iliyopita, lakini alilazimika kusubiri baada ya kushawishiwa na mumewe, aliyetaka apewe muda wa kufikiria.
Lakini baada ya Reid kupigwa picha akiwa anamfundisha mtoto wa Jordan kupigana kwenye gym, mwanamama huyo aliamua kubadili mawazo.
Jordan amemshutumu Reid kwa kuvitumia vyombo vya habari kupata umaarufu kwa kumpiga picha kadhaa akiwa na mtoto wake Junior na pia kuchapisha habari kuhusu ndoa yao.
Alisema Reid anafahamu wazi kwamba hakuwa akitaka habari zinazohusu watoto wake zichapishwe hadharani kwa vile wanaweza kuathirika kisaikolojia.
Kwa upande wake, Reid alisema amekuwa akimuunga mkono Jordan katika uamuzi wake wa kuwaepusha wanawe na mapaparazi, lakini alishangaa kuona picha yake akiwa na Jordan imeuzwa kwenye chombo kimoja cha habari.
Alisisitiza kuwa, bado ataendelea kuvaa pete ya harusi kati yake na Jordan na pia kuipigania ndoa yake. Wanandoa hao walikutana kwa mara ya kwanza kwenye sherehe ya mwanamuziki Michelle Heaton kutimiza miaka 30 iliyofanyika Julai 19, 2009 kabla ya kufunga ndoa mwaka uliofuata.

Ndlovu kuishtaki Yanga CAF

BEKI wa zamani wa Yanga, Wisdom Ndlovu amesema atawasilisha malalamiko yake kwa Shirikisho la Soka Afrika (CAF) ili kuishinikiza klabu hiyo imlipe haki zake.
Akizungumza kwa njia ya simu kutoka Malawi jana, Ndlovu alisema hakubaliani na uamuzi wa Kamati ya Maadili na Hadhi za Wachezaji ya TFF ya kuishinikiza Yanga imlipe haki zake mchezaji Ally Msigwa pekee.
Ndlovu, Msigwa, John Njoroge pamoja na kipa Steven Marashi ni miongoni mwa wachezaji wanne waliowasilisha malalamiko yao kwa kamati hiyo wakiitaka Yanga iwalipe haki zao baada ya kukatisha mikataba yao.
Hata hivyo, TFF imeitaka Yanga imlipe Msigwa sh. milioni saba, ikiwa ni malipo ya miezi 36 yaliyokuwa yamebaki kwenye mkataba wake, lakini imetupilia mbali malalamiko ya wachezaji wengine watatu kwa madai kuwa walishindwa kuhudhuria vikao mara mbili.
Katibu Mkuu wa TFF, Angetile Osiah alisema juzi kuwa, Ndlovu, Njoroge na Marashi suala lao limeondolewa kwenye kamati hiyo kwa sababu hiyo.
Kufuatia uamuzi wa kamati hiyo, TFF imeizuia Yanga kusajili mchezaji yoyote mpya au kuuza mchezaji msimu wa 2011/2012 hadi itakapomlipa Msigwa haki zake.
“Mimi kwa sasa nipo Malawi, lakini nasikitika kusema kwamba sikuwahi kuitwa kujieleza na kamati hiyo, hivyo nitakuja Tanzania kufuatilia haki zangu,”alisema Ndlovu.
Alisema iwapo Yanga itaendelea kumpiga chenga, atawasilisha malalamiko yake CAF ili imsaidie kupata haki zake.
Naye kipa Marashi amesema hakuwahi kuitwa na kamati hiyo kwa ajili ya kujieleza na kuwasilisha vielelezo kuhusu malalamiko yake dhidi ya Yanga.
Marashi alisema mjini Dar es Salaam jana kuwa, hakuna kiongozi yeyote wa TFF aliyewahi kuwasiliana naye kuhusu suala hilo, hivyo hakubaliani na uamuzi wa kuyatupa malalamiko yake.
“Hadi naondoka Tanzania kwenda Botswana, sikuwahi kupigiwa simu na kiongozi yeyote wa TFF kwa ajili ya kuitwa kwenye kikao,”alisema kipa huyo. Kikao hicho kilifanyika Desemba 30 mwaka jana na Januari 7 mwaka huu.

Babi atema cheche Vietnam

KIUNGO wa zamani wa klabu ya Yanga, anayecheza soka ya kulipwa klabu ya Dong An ya Vietnam, Abdi Kassim 'Babi' amesema ameanza mazoezi rasmi na kikosi hicho kwa ajili ya kujiandaa na mechi za ligi.
Akizungumza kwa njia ya simu kutoka Vietnam jana, Kassim alisema amepokewa vizuri na uongozi pamoja na wachezaji wa klabu hiyo na matarajio yake ni kucheza soka ya kiwango cha juu kwa lengo la kupeperusha vyema bendera ya Tanzania kimataifa.
Nahodha huyo wa timu ya taifa ya Zanzibar, Zanzibar Heroes alisema anaamini katika wa soka, hakuna linaloshindikana iwapo mchezaji ataamua kufuata misingi ya uchezaji na kuongeza kuwa, amekwenda Vietnam kucheza mpira akiwa na matarajio ya kwenda Ulaya.
Kassim amewataka wachezaji wanaocheza soka ya ridhaa nchini, kuongeza kasi na kuweka malengo ya kucheza soka nje ya nchi. Lakini ameonya kuwa, jitihada hizo zitafanikiwa iwapo wadau wa soka, vyama vya soka na viongozi wa klabu watakuwa mstari wa mbele kutaka kuinua kiwango cha mchezo huo.
"Kwa ufupi nimeshaanza kuzoea maisha mapya. Kama unavyofahamu, nipo ugenini. Napenda kutoa changamoto kwa wachezaji wenzangu niliowaacha nyumbani, kucheza kwa bidii na malengo yao yawe kucheza soka ya kulipwa nje," alisema mchezaji huyo.
Kiungo huyo anayetumia zaidi mguu wa kushoto, alisema anashukuru ameondoka akiwa na baraka za viongozi wa klabu ya Yanga, ambayo aliitumikia kwa moyo wote tangu alipojiunga nayo akitokea Mtibwa Sugar. Kassim alikuwa nahodha msaidizi wa Yanga akimsaidia Fredi Mbuna.
Klabu ya Don An, ilimsajili Kassim kwa kitita cha dola 40,000 (sh. milioni 60). Mbali ya kuitumikia Zanzibar, kiungo huyo alikuwa mchezaji wa timu ya taifa, Taifa Stars. Alijiunga na Mtibwa mwaka 2003 kabla ya kutua Yanga msimu wa 2006.