KWA HABARI ZA MICHEZO NA BURUDANI WASILIANA NASI KWA NAMBA 0719-153800 AU 0788-455808 AU EMAIL rashidzahor67@gmail.com '

Tuesday, September 19, 2017

NAIBU WAZIRI WA MICHEZO AIPONGEZA TFF



Na Benedict Liwenga-WHUSM.

Naibu Waziri wa Habari, Utamaduni, Sanaa na Michezo, Anastazia Wambura amelipongeza Shirikisho la Mpira wa Miguu Tanzania (TFF) kwa ufanisi wao wa kazi huku akiwataka kufanya kazi kwa ukaribu na Serikali ya Awamu ya Tano ili kuleta maendeleo katika soka.
 

Wambura ameyasema hayo leo Jijini Dar es Salaam wakati alipotembelea ofisi za Shirikisho hilo ili kujua namna wanavyotekeleza majukumu yao ikiwemo changamoto za shirikisho pamoja na maendeleo ya soka nchini.

Akiongea na Viongozi mbalimbali na wadau wa soka katika ziara yake hiyo, amesema kwamba anaridhishwa na kazi wanazofanya TFF na amewapongeza kwa kupata uongozi mpya wa Shirikiho hilo na kuwasisitizia kujenga mahusiano ya karibu na wadau wa soka ikiwemo kuwajengea uwezo vijana ili kukuza vipaji vyao na hatimaye kuleta heshima kwa Taifa.

“TFF hongereni kwa kazi kubwa na nzuri mnayoifanya, hakika mnajitahidi sana lakini niwaombeni muzidi kushirikiana na Serikali katika kuhakikisha kwamba tunapata maendeleo mazuri katika soka, hivyo ni vema mkawa mnajenga mawasiliano na Viongozi wa Serikali mara kwa mara ili na sisi tupate kujua mambo yanayofanyika”, alisema Mhe. Wambura.

Sambamba na hilo, Naibu Waziri Wambura amesisitiza juu ya suala la ugawaji wa vifaa vya michezo ikiwemo mipira ya kuchezea katika maeneo mbalimbali nchini huku akisema kuwa, ugawaji huo uwe wa uwiano sawa ili pasitokee eneo moja likawa linakosa vifaa hivyo kwakuwa vijana wote ni Watanzania na wana haki sawa ya kushiriki katika michezo.

Kwa upande wake, Naibu Katibu Mkuu wa Shirikisho hilo, Bw. Kidao Wilfred amesema kwamba, TFF imejitahidi kuwasaida vijana mbalimbali wakiwemo Serengeti Boys kwa kuwapatia vitendea kazi na amepokea ushauri wa Naibu Waziri wa kuendelea kujenga uhusiano wa karibu na Serikali ili kukuza soka nchini.

“TFF tumekuwa tukiwaandaa vijana mbalimbali ili kuweza kuwapata wenye vipaji vizuri na tumepanga kuwa vijana hawa waweze kupatiwa shule ambapo watakuwa wanajifunza masuala mazima ya soka na nikieleze tu Mheshimiwakwamba ushauri wako wa kujenga ushirikiano na Serikali tumeupokea na tunaufanyia kazi”, alisema Wilfred.

Monday, September 18, 2017

SIMBA YAIBAMIZA MWADUI MABAO 3-0



Mshambuliaji wa kimataifa kutoka Uganda Emmanuel Okwi ameendelea kuweka rekodi yake baada ya kufunga magoli mawili wakati Simba ikiilaza Mwadui FC jumla ya magoli 3-0 Mchezo uliochezwa kwenye uwanja wa Uhuru maarufu kama Shamba la bibi jijini Dar es salaam.

Okwi amecheza mechi mbili akiwa na Simba na tayari amefikisha jumla ya magoli 6 baada ya ufunguzi kufunga magoli 4 wakati Simba ilipoidungua Ruvu Shooting jumla ya magoli 7-0 yaani wiki.
 

Okwi alianza kuwanyanyua mashabiki wa Simba dakika ya saba baada ya kupokea pokwiasi toka kwa winga Shiza Kichuya na kupiga shuti la mita 20 na kumuacha hoi Golikipa wa Mwadui,Arnold Massawe ambaye alionekana kutokuwa makini mara nyingi alikuwa anatoka toka golini.
 

Mwadui pamoja na kumiliki vizuri mpira walipopata nafasi, lakini hawakuwa na mipango kabisa ya kuipenya ngome imara ya Simba chini ya mabeki wa timu za taifa za Uganda na Tanzania, Juuko Murshid na Salim Mbonde hadi mapumziko Simba walikuwa mbele kwa goli 1-0.
 

Kipindi cha pili nyota ya Simba iliendelea kung’ara na dakika ya 67, Okwi tena akawainua vitini mashabiki wa Wekundu wa Msimbazi kwa kufunga la pili kwa shuti la umbali wa mita zisizopungua 20 baada ya pasi ya beki Mohammed Hussein ‘Tshabalala’.
 

Mashabiki wa Simba walizomea mabadiliko yaliyofanywa na kocha Mcamroon, Joseph Marius Omog mara mbili kwanza akimtoa Mghana Nicholaus Gyan na kumuingiza Mwinyi Kazimoto dakika ya 61 na baadaye akimtoa Kichuya na kumuingiza Mrundi, Laudit Mavugo dakika ya 65 wakionekana kabisa kutaka mshambuliaji John Bocco ndiye atolewe.
 

Bocco akawaonyesha mashabiki wa Simba kwamba Omog alikuwa sahihi katika mabadiliko yake kwa kufunga bao la tatu dakika ya 72 kwa shuti la umbali wa mita 20 na zaidi pia.
 

Baada ya kucheza mechi tatu wakiwa jijini Dar es salaam wekundu wa Msimbazi Simba  watasafri kwenda kanda ya Ziwa ambapo watacheza mechi mbili ya kwanza watacheza kwenye uwanja wa CCM Kirumba na wenyeji timu ya Mbao FC na baadaye wakwenda mkoani Shinyanga kucheza na Stand United.

YANGA YABANWA MBAVU NA MAJIMAJI


Mabingwa watetezi wa Ligi Kuu ya Vodacom Tanzania timu ya Yanga wameshindwa kutamba kwenye uwanja wa Maji Maji Mjini Songea baada ya kulazimishwa sare ya kufungana bao 1-1 na wenyeji wana rizombe MajiMaji.

Mpira ulianza kwa kasi huku Yanga wakionekana kulishambulia lango la MajiMaji kama washambuliaji akina Ngoma,Ajib pamoja na Chirwa wangekuwa makini wangetoka kipindi cha pili na bao hadi mapumziko timu zote zilikwenda sare ya bila kufungana.

Kipindi cha pili kilianza kwa timu zote kufanya mabadiliko na MajiMaji waliongeza umakini na kulishambulia lango la Yanga kama Nyuki na kunako dakika ya 54 Mshambuliaji wa zamani wa Mbeya City Peter Mapunda aliwanyanyua mashabiki wa Maji Maji baada ya kufunga goli safi kwa kumzidi maaarifa beki kisiki wa Yanga Kelvin Yondani.

Kuingia kwa bao hili liliwachanga Mabingwa hao watetezi na kuanza kuliandama lango la Maji Maji dakika ya 81 Mshambuliaji wa Kimataifa Donald Dombo Ngoma aliisawazishia bao Yanga kwa kichwa akipokea krosi ya Obrey Chirwa na kumuacha Mlinda Mlango wa Zamani wa Simba,Andrew Ntalla akiruka bila majibu.

Dakika ya 84 Yanga walipata pigo baada ya winga wao hatari , Emmanuel Martin aliumia na kukimbizwa hospitali  baada ya kugongana na mchezaji wa Maji Maji, Marcel Kaheza.

Hadi Mwamuzi anamaliza Mpira timu zote zimeweza kugawana pointi moja moja na kwa matokeo hayo Yanga wamefikisha alama tano wakiwa wamecheza mechi tatu na wanatarajia kurudi jijini Dar es salaam baada ya kucheza mechi mbili ugenini na watakuja kuvaana na timu ya Mtibwa Sugar ya Morogoro kwenye uwanja wa Uhuru.

Monday, September 11, 2017

YANGA YAZINDUKIA NJOMBE




Mabingwa Watetezi Wa Ligi Kuu Vodacom Tanzania bara baada ya kuibuka na ushindi wa 1-0 dhidi ya wenyeji Njombe Mji ,Mchezo uliopigwa katika uwanja wa Saba Saba uliopo Mjini Njombe.

Mshambuliaji hatari wa Zamani wa Simba,Ibrahim Ajibu Migomba aliwanyanyua mashabiki wa Yanga baada ya kufunga goli maridadi kunako dakika ya 16 kwa shuti la Faulo ambalo sawa na umbali wa mita 30 lililoenda moja kwa moja na kumuacha Mlinda Mlango wa Njombe Mji hana la kufanya.

Huu ni ushindi wa kwanza kwa George Lwandamina msimu mpya wa Ligi baada ya mchezo wa kwanza kulazimishwa sare ya kufungana goli 1-1 dhidi ya Lipuli Fc mchezo ambao ulipigwa uwanja wa Uhuru jijini Dar es salaam.

Yanga waliongeza kasi ya mashambulizi baada ya bao hilo, lakini hawakuwa na bahati ya kufunga zaidi kutokana na kushindwa kutumia vizuri nafasi walizotengeneza.
 
Yanga  walitawala vizuri mchezo kipindi chote cha kwanza na wangeweza kuvuna mabao zaidi kama wangekuwa makini katika utumiaji wa nafasi ambazo walizipata
 
Kipindi cha pili kilibadilika kidogo na vijana wa Hassan Banyai wakaanza kuwavimbia mabingwa watetezi wa Ligi Kuu walio chini ya kocha Mzambia, George Lwandamina.
 
Sifa zimuendee kipa Mcameroon wa Yanga, Youthe Rostand aliyeokoa michomo mingi ya hatari kipindi hicho cha pili na kuinusuru timu yake kufungwa.
 
Katika kipindi hicho, beki wa Njombe Mji, Remmy Mbuligwe alikimbizwa hospitali baada ya kuumia kufuatia kugongana na beki wa Yanga Juma Abdul.

Awali ya hapo, Yanga nayo ilipata pigo baada ya kiungo wake Mzimbabwe, Thabani Kamusoko kuumia na kushindwa kuendelea na mchezo, nafasi yake ikichukuliwa na Raphael Daudi dakika ya 49.   
 
Katika mechi nyingine za leo; Lipuli FC imeilaza 1- 0 Stand United, Mbeya City imefungwa nyumbani 1-0 na Ndanda FC, Singida United imeifunga 2-1 Mbao FC, Kagera Sugar imelazimishwa sare ya 1-1 Ruvu Shooting, Mtibwa Sugar imeshinda 1-0 dhidi ya FC Mwadui.

Kikosi cha Njombe Mji kilikuwa; David Kisu, Agaton Mapunda, Remmy Mbuligwe, Laban Kamboole, Peter Mwangosi, Joshua John, Awadh Salum, Hassan Kapalata/Behewa Sembwana dk80, Notikeli Masasi, Ditrim Nchimbi na David Nakpa/Raphael Siame dk47.

Yanga SC; Youthe Rostand, Juma Abdul, Gardiel Michael, Andrew Vincent, Kevin Yondan, Papy Kabamba Tshishimbi, Juma Mahadhi, Thabani Kamusoko/Raphael Daudi dk49, Donald Ngoma/Obrey Chirwa dk56, Ibrahim Hajib na Emmanuel Martin/Yussuf Mhilu dk70.

SIMBA, AZAM HAKUNA MBABE


KLABU Bingwa ya Afrika Mashariki na Kati, Azam FC, imetoka sare ya bila kufungana dhidi ya Simba katika mchezo wa Ligi Kuu ya Vodacom Tanzania Bara (VPL) uliofanyika Uwanja wa Azam Complex, Chamazi, Dar es Salaam.

Huo ni mchezo wa kwanza wa kihistoria kwa timu hiyo kuweza kucheza katika uwanja wake wa nyumbani dhidi ya Simba, ambao ulitawaliwa kwa ubabe kwa pande zote mbili huku Refari akionesha kadi za njano kama jungu.

Ulikuwa ni mchezo wa kugawana vipindi, ambapo Azam FC ilionekana kutawala kipindi cha pili huku wapinzani wao wakitawala kipindi cha kwanza na pande zote zikikosa mabao.

Winga wa Azam FC, Enock Atta, alipiga shuti la umbali dakika ya 18 lilidakwa na kipa wa timu hiyo, Aishi Manula, ambaye alikuwa akirejea kwa mara ya kwanza Azam Complex tokea asajiliwe na Simba msimu huu akitokea kwa mabongwa hao,

Wachezaji wengine waliokuwa wakirejea ndani ya viunga hivyo, ni gwiji wa Azam FC John Bocco ‘Adebayor’ na Erasto Nyoni, waliosajiliwa pia wakitokea kwa mabingwa hao wa Afrika Mashariki na Kati.

Dakika ya 33 Atta alimsetia pasi nzuri Yahaya Mohammed, alliyeingia na mpira huo ndani ya eneo la 18 lakini shuti alilopiga lilitoka sentimita chache ya lango na kuufanya mchezo huo kumaliza kipindi cha kwanza kwa suluhu hiyo.

Mabadiliko yaliyofanywa na benchi la ufundi la Azam FC ya kumuingiza kiungo Frank Domayo na kupumzishwa Atta yaliiongezea ubora timu hiyo kwenye eneo la kiungo hali iliyowafanya kutawala mchezo huo.

Dakika ya 63 Azam FC ilipata pigo baada ya beki wake wa kulia, Daniel Amoah, kuumia na nafasi yake kuchukuliwa na Ramadhan Singano ‘Messi’, mabadiliko hayo yalimlazimu nahodha Himid Mao, kuhamia beki wa kulia  na eneo la kiungo kubakia Stephan Kingue, Domayo na Salum Abubakar ‘Sure Boy’.

Dakika 10 za mwisho za mchezo huo, Yahaya Mohammed na Sure Boy, almanusura waipatie mabao Azam FC, lakini shuti alilopiga kiungo huyo lilitoka sm chache ya lango na kichwa alichopiga Yahaya kiliweza kudakwa na kipa.

Sare hiyo inaifanya Azam FC kupata pointi moja na kufikisha jumla ya pointi nne ikisogea hadi nafasi ya tatu kwenye msimamo wa ligi hiyo sawa na Tanzania Prisons na Simba zilizokuwa juu yake kwa tofauti ya mabao ya kufunga na kufungwa.

Mara baada ya mchezo huo, kikosi cha Azam FC kitapumzika kesho Jumapili kabla ya kurejea mazoezini Jumatatu jioni tayari kabisa kujiandaa na mtanange ujao dhidi ya Kagera Sugar, utakaofanyika Uwanja wa Azam Complex Septemba 15 saa 1.00 usiku.

JEFF AKABIDHIWA UKURUGENZI SIKINDE



UONGOZI wa bendi ya muziki wa dansi ya Mlimani Park Orchestra (Sikinde), umemteua mwanamuziki mkongwe na mpiga drums nguli nchini, Habibu Abbas 'Jeff' kuwa mkurugenzi wa bendi.

Uteuzi huo umelenga kuuimarisha uongozi wa bendi, hasa katika masuala ya udhibiti wa mapato na matumizi ya fedha na nidhamu kwa wanamuziki.

Mmoja wa viongozi waandamizi wa bendi hiyo, Hassan Bitchuka, alisema jana kuwa, uteuzi huo ulifanywa wakati bendi hiyo ilipokuwa ziarani nchini Kenya, mwezi uliopita.

"Katika bendi yetu kumekuwa na matatizo makubwa ya utovu wa nidhamu kwa wanamuziki, hivyo tumemteua Jeff kuwa mkurugenzi kwa lengo la kudhibiti vitendo hivyo," alisema mwanamuziki huyo mkongwe.

"Baadhi yetu sisi ni wapole na huwa tuna huruma sana linapokuja suala la kumchukulia hatua mwanamuziki anayeonyesha vitendo vya utovu wa nidhamu mara kwa mara. Lakini sasa tunaamini Jeff ataimudu kazi hiyo kwa sababu hana woga,"aliongeza.

Kwa mujibu wa Bitchuka, hiyo ndio itakayokuwa kazi na majukumu ya Jeff na kwamba shughuli za viongozi wengine zitaendelea kama kawaida.

Mbali na Jeff, viongozi wengine wa Mlimani Park kwa sasa ni Abdalla Hemba, ambaye ni kiongozi mkuu na Mjusi Shemboza, ambaye ni katibu wa bendi. Bitchuka ni kiongozi mwandamizi.

Akizungumzia uteuzi huo, Jeff alisema ameupokea kwa mikono miwili na atashirikiana na viongozi wenzake kuhakikisha kuwa, bendi hiyo inapata mafanikio makubwa zaidi.

"Ni kweli nimeteuliwa kuwa mkurugenzi wa bendi, nitakayeshughulikia nidhamu na kusimamia mapato na matumizi na mikataba yote itakayoingiwa na bendi,"alisema Jeff.

Hii ni mara ya pili kwa Jeff kuteuliwa kwenye uongozi wa bendi hiyo. Katika uongozi uliopita, Jeff alikuwa kiongozi mkuu huku Hamisi Milambo akiwa katibu wa bendi na Ramadhani Mapesa akiwa mtunza hazina.

WITNESS: NAJIVUNIA NA KUUTHAMINI UTANZANIA WANGU






MSHINDI wa taji la Miss Garden Route 2017/2018, lililoshindaniwa nchini Afrika Kusini, Witness Kavumo, amesema anaona fahari na kujivunia kuwa Mtanzania na pia kuonyesha uzalendo kwa nchi yake.

Amesema licha ya kukabiliwa na changamoto nyingi kwa muda wote aliokuwa akisoma Afrika Kusini, ikiwemo ubaguzi wa rangi, amekuwa akikabiliana nazo kwa kujivunia rangi yake na utaifa wake.

Witness (21), amesema katika shindano hilo lililoandaliwa na Kampuni ya The Role Models Foundation, ikishirikiana na Gemini Modelling Agency', alikuwa mshiriki pekee mweusi. Shindano hilo liliwashirikisha mabinti 600 katika hatua za awali.

Amesema baada ya mchujo wa awali, alikuwa miongoni mwa warembo 12, waliotinga fainali na hatimaye kuibuka mshindi, ambapo alizawadiwa Randi 4,000 za Afrika Kusini, sawa na sh. 640,000.

Shindano hilo, ambalo washiriki wengi walikuwa wazungu, lilifanyika Mei 6, mwaka huu, katika mji wa George, Afrika Kusini.

Akizungumza na waandishi wa habari mjini Dodoma, hivi karibuni, Witness alisema alikwenda Afrika Kusini kwa ajili ya masomo, lakini alipenda kutumia muda wake wa ziada kujihusisha na masuala ya urembo.

Binti huyo mzaliwa wa mkoa wa Arusha, amesema washindani katika hatua ya mwisho waliwapa wakati mgumu majaji kutokana na kuwa na mvuto na uchangamfu, lakini hatimaye aliibuka mshindi.

Licha ya kuwa ugenini, Witness anasema alishiriki katika shindano hilo akijitambulisha kuwa ni Mtanzania na baada ya kushinda, ameamua kuja kujitambulisha katika Wizara ya Habari, Sanaa, Utamaduni na Michezo ili serikali imtambue.

"Nilikutana na vikwazo vingi, ikiwemo ubaguzi wa rangi na kukosa ushirikiano hata kwa Watanzania wenzangu, lakini nilikabiliana navyo na hatimaye nikaibuka mshindi," amesema binti huyo anayezungumza kwa kujiamini.

Amewataka wanawake wenzake kusimama imara, kujiamini na kukabiliana na vikwazo vyote wanavyokumbana navyo katika maisha, bila kujali wapo nyumbani au ugenini kwa sababu hakuna linaloshindikana.

"Nauthamini na kujivunia utanzania wangu ndio sababu nilifanikiwa kushinda," amesema binti huyo.

Witness amesema anawashukuru wazazi wake kwa kumuunga mkono na kumpa moyo wa kushiriki kwenye mashindano mbalimbali ya urembo, yakiwemo ya vyuo vikuu mkoani Arusha, ambapo aliibuka mshindi akiwa na umri wa miaka 18.

Kutokana na kuibuka mshindi wa shindano la Miss Garden Route, Witness amepata mkataba wa kufanyakazi za urembo chini ya udhamini wa kampuni za The Role Models Foundation na Gemini Modelling Agency.

Witness anasema japokuwa zawadi aliyopata kwa kushinda shindano hilo ni ndogo, lakini anajisikia faraja kupata mkataba wa udhamini wa kufanyakazi ya urembo na kampuni hizo mbili za Afrika Kusini.

Akizungumzia ushindi wa binti huyo, Naibu Waziri wa Habari, Utamaduni, Sanaa na Michezo, Anastazia Wambura, amewataka vijana nchini kutumia muda vizuri na mazingira yanayowazunguka ili kufikia azma ya malengo waliyojiwekea katika kujiletea maendeleo yao na taifa kwa ujumla.

Naibu Waziri Anastazia alitoa kauli hiyo alipokuwa akimpongeza Witness, ambaye pia alitambulishwa kwa wabunge, katika moja ya vikao vya bunge vinavyoendelea mjini Dodoma.

“Ni dhahiri umetumia ujuzi, ubunifu, sanaa, imani, bidii, desturi, maadili na sheria, ambavyo umevipata  kutoka kwa familia, jamii ya Kitanzania na pia kwa jamii ya watu wa  Afrika Kusini,” amesema Anastazia.

“Vijana wa Kitanzania, Witness  amewaonesha njia, mjenge utamaduni wa kupambana na mazingira ili kufikia azma mnazojiwekea,” amesisitiza Naibu Waziri.

Aidha, amesema mrembo huyo ameonyesha uzalendo kwa nchi yake, kwa kuamua kwenda Dodoma na kutoa taarifa ya mafanikio yake kama Mtanzania, kutokana na ushindi alioupata katika mashindano hayo ya ubunifu.

Amesema hatua hiyo inaonyesha kuwa Witness ameumeuthamini Utanzania wake na kuonyesha kujali kutumia muda wa ziada katika masuala ya fani ya urembo licha ya kwamba, jukumu lake la msingi nchini humo ni masomo.

Naibu Waziri amesema fani ya ubunifu na mitindo inatambulisha utamaduni, kuongeza kipato, kuinua uchumi na kukuza utalii kwa kuongeza juhudi, maarifa na kufanyakazi kwa bidii, hatua ambayo inaleta matokeo mazuri yenye tija.

Amemshauri Witness, kutumia bidhaa zenye asili ya Tanzania katika fani yake ili kuzitangaza katika soko la ndani na la nje, kuvutia utalii, kuingiza kipato na  kukuza uchumi katika ngazi zote za mnyororo wa thamani katika sekta ya ubunifu wa mavazi na mitindo, kwake yeye binafsi na kwa Taifa.

Friday, September 8, 2017

TFF YATANGAZA KAMATI YA TUZO



Rais wa Shirikisho la Mpira wa Miguu Tanzania (TFF), Wallace Karia ameunda Kamati ya Tuzo za Ligi Kuu ya Vodacom  Tanzania Bara msimu wa 2017/18.

Kamati hiyo itaongozwa na Mwenyekiti Ahmed Mgoyi wakati Makamu Mwenyekiti ni Almas Kasongo ilihali  Amiri Mhando ameteuliwa kuwa Katibu wa kamati hiyo ya tuzo.

Mhando ni Mhariri wa Gazeti la Spotileo linalotolewa na Kampuni ya Magazeti ya Serikali - Tanzania Standard Newspaper (TSN).

Wajumbe ambao wameteuliwa ni Ibrahim Kaude; Mkuu wa Kitengo cha Michezo katika Kampuni ya Azam Media, Patrick Kahemele na Kocha mkongwe wa soka, Kenny ‘Mzazi’ Mwaisabula.

Kadhaika Mhariri Mtendaji wa Kampuni ya Uchapishaji ya Global (Global Publisher inayochapisha magazeti kadhaa likiwamo Championi), Saleh Ally; Mtangazaji mahiri wa michezo kutoka Kituo cha Redio cha EFM, Ibrahim Masoud na Mtangazaji wa Vipindi katika Kituo cha Radio ya Watu, Fatma Likwata.

Pia wamo Mwandishi Mwandamizi wa Michezo wa Gazeti la Mwanaspoti linalochapishwa na Kampuni ya Mwananchi Communication (MCL), Gift Macha; Katibu Mkuu wa Chama cha Wachezaji wa Mpira wa Miguu, Said George na Mhariri wa Michezo wa Gazeti la HabariLeo linalotolewa na TSN, Zena Chande.

TAARIFA KUHUSU WA WAAMUZI TANZANIA


Kamati ya Utendaji ya Chama cha Waamuzi wa Mpira wa Miguu Tanzania (FRAT) ilikuwa na kikao chake cha kwanza kilichofanyika Julai 6, 2017 hapa jijini Dar es Salaam.
 
Mambo muhimu yafuatayo yalitolewa uamuzi.


1. Kumpongeza Rais wa Shirikisho la Mpira wa Miguu Tanzania, Bw. Wallace Karia na Makamu wa Rais, Bw. Michael Wambura pamoja na Wajumbe wote wa Kamati ya Utendaji ya TFF kwa kuchaguliwa kwao.


2. Tumesimamisha kozi zote kwa waamuzi wapya kuanzia Septemba 7, mwaka huu. Mitihani iliyokwishafanywa kabla ya Septemba 7, mwaka huu ni halali na itumwe kwa Katibu Mkuu wa FRAT - Taifa mara moja ikiambatanishwa na ada zake.


3. Makatibu wote wa FRAT - Mkoa kwa mikoa yote ya Tanzania Bara wakumbushwe majukumu yao kwani inaonekana ni kama wamepitiwa ikiwa ni pamoja na kutuma kwa Katibu Mkuu FRAT - Taifa orodha ya waamuzi wote wa madaraja yote walio hai kwa kuchezesha na walio hai kiuanachama.


4. Tumekumbusha waamuzi kuwa na darasa la mara moja kwa wiki lijulikanalo kama ‘Sunday Class’ madarasa hayo yawe kila Makao Makuu ya Mkoa na Makao Makuu ya Wilaya.


5. Tumekubaliana uchaguzi mdogo ufanyike wakati wa mapumziko ya ligi ya wiki mbili za mwezi Januari. Tayari tumewasiliana na na Kamati ya Uchaguzi.


6. Kuwaleta pamoja waamuzi (wanachama) wote nchini bila kujali umri.


7. Kuendelea kuzalisha waamuzi wapya toka kwenye shule za sekondari, vyuo na nje ya shule za sekondari na vyuo kwa wenye sifa.


8. Kuboresha mafunzo na upandaji wa madaraja kwa waamuzi wenye madaraja.


9. Kukemea na Kupambana na rushwa kwa waamuzi hadharani kwa kushirikiana na TFF na Takukuru.


10. Kutetea kwa nguvu zote haki za waamuzi.


11. Kuboresha mawasiliano kwa ngazi zote na kwa mwanachama ye yote.


12. FRAT kiwe chama cha mfano kwa wanachama wake kwa kuwa na maadili mema, yanayompendeza Mungu.


13. Misingi kumi ya “FIFA FAIR PLAY” ni msingi wa maendeleo ya mwamuzi.


14. Wote kwa pamoja tukatae rushwa na tuiangamize rushwa kwa maendeleo ya mpira wetu.

SIMBA, AZAM KUONYESHANA UBABE LEO, PAMBANO KUANZA SAA 10 JIONI


Shirikisho la Mpira wa Miguu Tanzania (TFF), limefanya mabadiliko kidogo ya muda wa kuanza mchezo wa Ligi Kuu ya Vodacom Tanzania Bara, kati ya Azam FC na Simba SC.
 
Mchezo huo utafanyika kesho Jumamosi Septemba 9, 2017 kwenye Uwanja wa Azam ulioko Chamazi, nje kidogo ya jiji la Dar es Salam kama ulivyopangwa awali.


Kuhusu muda, mchezo huo ulipangwa ufanyike kuanzia saa 1.00 usiku, lakini sasa utaanza saa 10.00 jioni - uamuzi uliofanyika baada ya kupokea ushauri kutoka Kamati ya Ulinzi na Usalama ya Mkoa wa Dar es Salaam, chini ya Mwenyekiti wake, Mkuu wa Mkoa wa Dar es Salaam, Mhe. Paul Makonda.


Mbali ya mchezo huo, mechi nyingine ya kesho Jumamosi Septemba 9, mwaka huu  itakuwa ni kati ya Tanzania Prisons na Majimaji ya Songea uliopangwa kufanyika Uwanja wa Sokoine jijini Mbeya.


Mechi nyingine za Ligi Kuu ya Vodacom, zitakuwa Jumapili Septemba 10, mwaka huu ambako Njombe Mji FC na Young Africans SC zitacheza Uwanja wa Sabasaba mjini Makambako wakati Mtibwa Sugar FC na Mwadui FC ya Shinyanga kwenye Uwanja wa Manungu mkoani Morogoro.


Kadhalika Lipuli FC itacheza na Stand United FC Uwanja wa Samora mjini Iringa wakati Singida United itacheza na Mbao kwenye Uwanja wa Jamhuri mjini Dodoma.


Pia Kagera Sugar itacheza na Ruvu Shooting kwenye Uwanja wa Kaitaba mjini Bukoba huku Mbaya City ikiwa wenyeji wa Ndanda ya Mtwara kwenye Uwanja wa Sokoine mjini Mbeya.

Shirikisho la Mpira wa Miguu Tanzania linapenda kuwatangazia wananchi kuwa viingilio katika mchezo wa Ligi Kuu ya Vodacom Tanzania Bara kati ya Azam na Simba.

Viingilio vitakuwa shilingi elfu kumi (Sh 10,000) kwa Jukwaa Kuu ambalo lina uwezo wa kubeba mashabiki 1,000 tu walioketi, wakati mzunguko (popular) kiingilio kitakuwa ni shilingi elfu saba tu (Sh 7,000).

Shirikisho la Mpira wa Miguu Tanzania linapenda kuwatangazia wanafamilia ya mpira wa miguu kukata tiketi kuanzia leo Jumatano Septemba 6, mwaka huu ili kujiepusha na usumbufu wa aina yoyote.

Kadhalika tunapenda kuwatangazia wananchi kwamba kwa ye yote ambaye hana tiketi ni vema wasiende uwanjani kwani ujio wake hautakuwa na tafasiri nyingine zaidi ya kuonekana kuwa ni mleta fujo.

Vyombo vya usalama vitakuwa makini kudhibniti kila aina ya vurugu uwanjani hapo hasa ikizingatiwa kuwa mchezo huo utafanyika wakati jua limezama.

WALIOPITISHWA KUWANIA UONGOZI BODI YA LIGI WATAJWA


Kamati ya Uchaguzi ya Shirikisho la Mpira wa Miguu Tanzania (TFF), imepitisha majina ya wagombea wafuatao kuwania uongozi katika  nafasi mbalimbali katika uchaguzi wa Kamati ya Uongozi wa Bodi ya Ligi Kuu.

Majina hayo yamepitishwa mara baada ya kuwafanyia usaili uliofanyika Jumapili Septemba 3, mwaka huu kwenye Ukumbi wa TFF, Dar es Salaam. Uchaguzi Mkuu wa Kamati ya Uongozi wa Bodi ya Ligi utafanyika Oktoba 15, mwaka huu.

Kwa mujibu wa ratiba ya uchaguzi inayotokana na kanuni za uchaguzi za TFF, majina hayo yanapaswa kutangazwa sasa.

Waliopita na majina yao kutangazwa ni Clement Sanga na Hamad Yahya wanaowania uenyekiti wakati Shani Christoms amepitishwa kuwania nafasi ya Makamu Mwenyekiti.

Wanaowania nafasi ya ujumbe wako Hamisi Madaki na Ramadhani Mahano. Hawa wamepitishwa kuwania nafasi hizo kutoka Klabu za Ligi Kuu ya Vodacom Tanzania Bara.

Pia wamo Almasi Kasongo ambaye anawania nafasi hiyo  kupitia Klabu za Ligi Daraja la Kwanza wakati Edgar Chibura anawania nafasi ya ujumbe kupitia Klabu za Ligi Daraja la Pili. James Bwire yeye hakupitishwa kwa sababu hakufika kwenye usaili.

LIGI NDOGO YA WANAWAKE KUANZA KARIBUNI


Shirikisho la Mpira wa Miguu Tanzania (TFF), limeagiza Makatibu wa Vyama vya Mikoa kutuma haraka majina ya timu mabingwa wa mikoa wa soka la wanawake wa msimu wa 2016/17.

Viongozi wa mikoa wamekumbushwa kutuma timu ili kufanya maandilizi ya haraka ya Ligi Ndogo itakayofanyika Septemba 22 hadi 29, mwaka huu.

Ligi Hiyo ndogo inachezwa kutafuta timu mbili zitakazopanda daraja kucheza Ligi Kuu soka ya wanawake msimu wa 2017/2018.

Huu ni msimu wa pili wa ligi ya wanawake kwani msimu uliopita, timu shiriki zilikuwa 12 na Mlandizi Queens ya Pwani iliibuka bingwa wa kwanza katika historia ya soka hapa nchini.

Mara baada ya kumalizika kwa Ligi Ndogo, TFF itaanza taratibu za kupanga kuanza kwa Ligi Kuu kwani wakati huo tayari tutafahamu timu ambazo zimepanda. Ligi Ndogo haitahusisha timu ambazo zimecheza Ligi Kuu msimu wa 2016/17.

Monday, September 4, 2017

TAIFA STARS YAICHAPA BOTSWANA MABAO 2-0, MSUVA APIGA ZOTE MBILI



MABAO mawili ya winga mpya wa klabu ya Difaa Hassan El- Jadida yameipa Tanzania ushindi wa 2-0 dhidi ya Botswana katika mchezo wa kirafiki wa kimataifa jioni ya leo Uwanja wa Uhuru, Dar es Salaam.
Msuva aliyejiunga na timu ya Ligi Kuu ya Morocco mwezi uliopita leo alikuwa mwiba kwa safu ya ulinzi ya The Zebras na amefunga bao moja kila kipindi mbele ya Waziri wa Habari, Utamaduni, Sanaa na Michezo, Dk. Harrison Mwakyembe.
Katika mchezo huo uliochezeshwa na refa Elly Sasii aliyesaidiwa na Soud Lila na Frank wote wa Tanzania, hadi mapumziko Taifa Stars walikuwa mbele kwa bao 1-0.
Simon Msuva alipokea pasi ndefu ya kiungo Hamisi Abdallah wa Sony Sugar ya Kenya, akaikontroo vizuri  na kumpasia kiungo wa Simba, Muzamil Yassin kabla ya kuiombea mbele na kuingia nayo kwenye boksi kwa kasi na kufumua shuti kali lililompita kama upepo kipa wa The Zebras, Mwambule Masule dakika ya sita.
Katika kipindi hicho, ilishuhudiwa Taifa Stars wakicheza vizuri zaidi na kutengeneza nafasi chache za kufunga, ambazo hata hivyo walimudu kuitumia vizuri moja tu kupata bao.
Mashambulizi ya Taifa Stars leo ambayo katika benchi la Ufundi imeongezewa nguvu na mchezaji wa zamani, Amy Ninje aliyecheza hadi Uingereza Ligi za Madaraja ya chini na kocha wa zamani wa Azam, Dennis Kitambi ambaye kwa sasa anafundisha AFC Leopards ya Kenya.
The Zebras nao hawakuwa wanyonge kabisa uwanjani, kwani walipeleka mashambulizi langoni mwa Taifa Stars na kukaribia kufunga mara mbili kama su uhodari wa kipa wa Simba, Aishi Salum Manula.
Kipindi cha pili, Zebras walirudi kwa nguvu na kuanza kusukuma mashambulizi mfululizo langoni mwa Taifa Stars, lakini safu ya ulinzi ikiongozwa na mkongwe Kevin Yondan ilikuwa imara kudhibiti hatari zote.
Hatimaye Msuva akawainua tena vitini mashabiki wa nyumbani kwa kufunga bao la pili dakika ya 63 baada ya kugongeana vizuri na winga wa Simba SC, Shiza Ramadhani Kichuya.
Nahodha, Mbwana Samatta anayechezea KRC Genk ya Ubelgiji alicheza vizuri pamoja na kudhibitiwa vikali na akakaribia kufunga mara mbili – unaweza kusema bahati haikuwa ya kwake leo.
Kiungo wa Tenerife ya Hispania, Farid Mussa na mshambuliaji wa Dhofar ya Oman wote waliingia kipindi cha pili na wakacheza vizuri sawa na chipukizi, Emmanuel Martin wa Yanga aliyempokea Msuva.
Kikosi cha Tanzania kilikuwa; Aishi Manula, Erasto Nyoni, Gardiel Michael, Abdi Banda, Kevin Yondan, Himid Mao, Simon Msuva/Emmanuel Martin dk82, Hamisi Abdallah/Said Ndemla dk80, Muzamil Yassin/Raphael Daudi dk57, Mbwana Samatta/Elias Maguri dk82 na Shiza Kichuya/Farid Mussa dk66.
Botswana; Mwambule Masule, Mosha Gaolaolwe/Jackson Lesole dk74, Edwin Olerile/Tmisang Orebonye7 dk4, Simisami Mathumo, Lopang Mogise, Alphonce Modisaotsile, Maano Ditshupo/Katlego Masole dk70, Gift Moyo, Segolame Boy, Kabelo Seakanyeng na Ontireste Ramatlhakwana.
IMETOLEWA KUTOKA BLOGU YA BIN ZUBEIRY

BODI YA WADHAMINI TFF YAKUTANA NA UONGOZI MPYA



Bodi ya Wadhamini wa Shirikisho la Mpira wa Miguu Tanzania, imekutana na viongozi wakuu wa Shirikisho katika Ukumbi wa mikutano wa Hoteli ya Sea Scape, Kunduchi, Dar es Salaam.

Bodi hiyo imekutana na uongozi wakuu wa TFF jana Septemba 2, mwaka huu kwa mara ya kwanza tangu ithibitishwe na Mkutano Mkuu wa TFF.

Madhumuni ya Bodi hiyo kukutana na viongozi wa TFF  - Rais Wallace Karia; Makamu wa Rais, Michael Wambura na Kaimu Katibu Mkuu, Kidao Wilfred ni kufahamiana.

Kwa upande wa Bodi walikuwa Mhe. Mohammed Abdulaziz, Mhe. Balozi Dk. Ramadhani Dau, Mhe. Abdallah Bulembo na Mhe. Stephen Mashishanga. Mjumbe Dk. Joel Bendera hakuhudhuria kwa udhuru.

Kadhalika Bodi hiyo kwa mujibu wa katiba ya TFF, walipata nafasi ya kuchagua Mwenyekiti wa Bodi ambako Mhe. Mohammed Abdulaziz alichaguliwa kushika wadhifa huo. Mhe. Abdulaziz alikuwa Mlezi wa timu ya Daraja la Kwanza ya Kariakoo ya Lindi

Kwa niaba ya Wajumbe wa Bodi, Mwenyekiti wa Bodi hiyo, Mhe. Mohammed Abdulaziz ambaye ni Mbunge wa zamani wa Jimbo la Lindi Mjini, aliupongeza uongozi mpya wa TFF ulioingia madarakani Agosti 12, mwaka huu akisema: “Mmeanza vizuri.”

Kadhalika Mwenyekiti ambaye alipata kuwa Mkuu wa Mikoa ya Tabora, Tanga na Iringa kwa nyakati tofauti , aliahidi ushirikiano kwa uongozi wa TFF ambako kwa upande wa TFF, Rais Karia alipokea pongezi hizo na baraka tele za kuanza vema na ushirikiano.

Mhe. Balozi Dk. Dau - alikuwa Mkurugenzi wa Mfuko wa Taifa wa Hifadhi ya Jamii (NSSF), ni mwanafamilia ya mpira wa miguu aliyejitolea hata kwa nguvu zake binafsi kusaka vipaji vya mpira wa miguu kwa vijana.

Mhe. Joel Bendera ni Mkuu wa Mkoa wa Manyara. Ni Kocha wa zamani wa timu ya Tanzania ‘Taifa Stars’ aliyekuwa na mchango mkubwa kuifikisha kucheza fainali za Kombe la Mataifa Huru ya Afrika (CAN 1980) sasa michuano hiyo inafamika kwa jina la AFCON. Fainali za mwaka 1980 zilifanyika Lagos, Nigeria.

Mhe. Stephen Mashishanga ni Mkuu wa zamani wa Morogoro mwenye historia nzuri ya unafamilia wa mpira wa miguu akitoa mchango mkubwa katika maendeleo tangu alipokuwa kiongozi hadi sasa. Pia alipata kuwa Mlezi wa timu ya Milambo ya Tabora iliyoshiriki Ligi Kuu Bara.

Mhe. Abdallah Bulembo ni Mbunge wa Bunge la Jamhuri ya Muungano wa Tanzania ambaye pia ni Mwenyekiti wa Jumuiya ya Wazazi Tanzania ya Chama Cha Mapinduzi (CCM), aliyepata kuwa Makamu Mwenyekiti wa kilichokuwa Chama cha Mpira wa Miguu Tanzania (FAT).

Thursday, August 31, 2017

MAYANGA AMWONGEZA EMMANUEL MARTIN KIKOSI CHA TAIFA STARS



Kocha Mkuu wa timu ya Mpira wa Miguu ya Tanzania ‘Taifa Stars’, Salum Mayanga amemwongeza Kiugo wa Young Africans, Emmanuel Martin kwenye kikosi chake kinachojindaa kucheza na Botswana Jumamosi Septemba 2, mwaka huu.

Mchezo huo wa kirafiki wa kimataifa utakaofanyika kwenye Uwanja wa Uhuru, Dar es Salaam chini ya utaratibu wa kalenda ya Shirikisho la Kimataifa la Mpira wa Miguu (FIFA).

Emmanuel Martin anatarajiwa kujiunga na kambi ya Taifa Stars mara moja leo Agosti 30, mwaka huu na kuanza na mazoezi na wenzake yatakayofanyika jioni kwenye Uwanja wa Uhuru, Dar es Salaam.

Emmanuel Martin ameongezwa na Mayanga baada ya mawasiliano kuonesha kwamba huenda akawakosa nyota wa kimataifa Simon Msuva kutoka Difaa El Jadidah ya Morocco na Orgenes Mollel wa FC Famalicao ya Ureno.

Taarifa kutoka Morocco inaonesha kwamba Msuva ana kibali cha muda cha kuingia na kutoka Morocco ‘visa’ ambacho kinamnyima haki ya kutoka na kuingia Morocco mara kwa mara.

Kuna juhudi zinafanywa na timu yake kadhalika Shirikisho la Mpira wa Miguu la Morocco kumfanikishia kupata kibali cha muda mrefu ili iwe rahisi kwa mchezaji kutoka na kuingia kama anahitaji katika timu ya taifa.

Kuhusu Mollel taratibu za ruhusa za kimataifa zinafanyiwa kazi kwa mujibu wa sheria za nchi ya Ureno ambako anacheza soka la kulipwa.

Nyota wengine wote wameripoti Taifa Stars wakiwamo wale wa kutoka nje ya mipaka ya Tanzania kama vile Mbwana Samatta (KRC Genk/Ubelgiji), Elias Maguli (Dhofar FC/Oman), Abdi Banda (Baroka FC/Afrika Kusini), Hamis Abdallah (Sony Sugar/Kenya) wakati Farid Mussa wa CD Tenerif ya Hispania anatarajiwa kutua leo.

Wengine ambao wako kambini Hoteli ya Sea Scape iliyoko Kunduchi, Dar es Salaam ni makipa Aishi Manula (Simba SC), Mwadini Ally (Azam FC) na Ramadhani Kabwili (Young Africans).

Pia wamo Walinzi ni Gadiel Michael (Young Africans), Boniphas Maganga (Mbao FC), Kelvin Yondani (Young Africans), Salim Mbonde (Simba SC) na Erasto Nyoni (Simba SC).

Viungo ni Himid Mao – Nahodha Msaidizi (Azam FC), Mzamiru Yassin (Simba SC), Said Ndemla (Simba SC), Shiza Kichuya (Simba SC), wakati Washambuliaji ni Raphael Daud (Young Africans) na Kelvin Sabato (Azam FC).

Benchi la Ufundi la Mayanga linaundwa na yeye mwenyewe ambaye ni Kocha Mkuu, Fulgence Novatus (Kocha Msaidizi), Patrick Mwangata (Kocha wa Makipa), Danny Msangi (Meneja), Dkt. Richard Yomba (Daktari wa timu), Dkt. Gilbert Kigadye (Daktari wa Viungo) na Ally Ruvu (Mtunza Vifaa).

KESI YA AVEVA, KABURU YAZIDI KUPIGWA KALENDA



UPANDE wa Jamhuri katika kesi inayowakabili   Rais wa Klabu ya Simba, Evans Aveva na makamu wake, Godfrey Nyange 'Kaburu' umedai unaendelea na uchunguzi wa nyaraka zilizokusanywa ambazo zimepelekwa kwa mtaalamu wa maandishi.

Wakili wa Serikali, Esterzia Wilson alidai hayo jama katika Mahakama ya Hakimu Mkazi Kisutu, mbele ya Hakimu Mkazi Mwandamizi, Victoria Nongwa.

Esterzia alidai hayo wakati shauri hilo lilipopelekwa kwa kutajwa ambapo aliieleza mahakama kuwa bado wanaendelea na uchunguzi wa nyaraka mbalimbali zilizokusanywa ambazo zimepelekwa kwa mtaalamu wa maandishi, hivyo wanasubiria ripoti.

Kutokana na hilo, Esterzia aliomba shauri hilo liahirishwe hadi tarehe nyingine kwa kutajwa. Hakimu Victoria aliuhimiza upande wa jamhuri kujitahidi ili ripoti hiyo itoke mapema na kesi iweze kuendelea.

Shauri hilo liliahirishwa hadi Septemba 8, mwaka huu, kwa kutajwa na washitakiwa walirudishwa mahabusu kwa kuwa miongoni mwa mashitaka yanayowakabili ni ya kutakatisha fedha ambayo hayana dhamana kwa mujibu wa sheria.

Kwa mujibu wa hati ya mashitaka, viongozi hao wa klabu ya Simba, wanakabiliwa na mashitaka matano ya kughushi, kuwasilisha nyaraka ya uongo na kutakatisha fedha Dola za Marekani (USD) 300,000.

Washitakiwa hao   walikula njama ya kughushi fomu ya maombi ya kuhamisha fedha ya Machi 15,2016 wakionesha Klabu ya Simba inalipa mkopo wa  USD 300,000 kwa Evans Aveva wakati si kweli.

Aveva anadaiwa  Machi 15,2016, katika benki ya CRDB tawi la Azikiwe Ilala, huku akijua   alitoa nyaraka za uongo ambayo ni fomu ya maombi ya kuhamisha fedha ya Machi 15,2016 wakati akijua ni kosa.

Aveva na Nyange wanadaiwa tarehe tofauti  kati ya Machi 15 na Juni 29,2016, mkoani Dar es Salaam, kwa pamoja walikula njama ya kutakatisha fedha kwa kupata USD 300,000, wakati wakijua ni zao la uhalifu.

Aveva anadaiwa  Machi 15,2016, katika benki ya Baclays, Mikocheni alijipatia USD 300,000 wakati akijua zimetokana na kughushi.

Nyange anadaiwa Machi 15,2016, katika benki ya Baclays tawi la Mikocheni alimsaidia Aveva kujipatia USD 300,000, wakati akijua fedha hizo zimetokana na kughushi.

Wednesday, August 30, 2017

KAMATI YA NIDHAMU TFF KUKUTANA LEO


Kamati ya Nidhamu ya Shirikisho la Mpira wa Miguu Tanzania (TFF), chini ya Mwenyekiti wake Tarimba Abbas, kinatarajiwa kuketi kesho Jumatato Agosti 30, mwaka huu.

Kamati hiyo itakuwa na ajenda kadhaa ikiwamo ya mashauri yanayohusu wachezaji mbalimbali, viongozi na klabu.

Shauri mojawapo linahusu ripoti ya Mechi namba 236 ya Ligi Kuu ya Vodacom uliokutanisha timu za Mbao FC na Yanga uliofanyika Uwanja wa CCM Kirumba, Mwanza. Yanga ikipoteza kwa bao 1-0.

Mara baada ya mchezo huo, Kamati ya 72 ya Bodi ya Ligi ilipitia matukio mbalimbali na kufikia uamuzi wa kuwasimamisha wachezaji Deus Kaseke, Simon Msuva na Obrey Chirwa wa Yanga kucheza mechi za Ligi Kuu.

Walisimamishwa wakisubiri suala lao la kumsukuma na kumwangusha Mwamuzi Ludovic Charles kusikilizwa na kutolewa uamuzi na Kamati ya Nidhamu ya Shirikisho la Mpira wa Miguu Tanzania (TFF).

Wachezaji hao walidaiwa kufanya kitendo hicho katika mechi hiyo dhidi ya Mbao FC iliyofanyika Mei 20, 2017 kwenye Uwanja wa CCM Kirumba jijni Mwanza. Uamuzi wa Kamati ya Saa 72 ulizingatia Kanuni ya 9(5) ya Ligi Kuu.

Mwamuzi Ludovic Charles amepewa onyo kali kwa kutodhibiti vizuri mchezo. Uamuzi dhidi yake ni kwa mujibu w Kanuni ya 38(5) ya Ligi Kuu kuhusu Udhibiti wa Waamuzi.

KIKAO CHA KAMATI YA TIBA KUFANYIKA LEO


Mwenyekiti wa Kamati ya Tiba ya Shirikisho la Mpira wa Miguu Tanzania (TFF), Dkt. Paul Marealle ameitisha kikao cha Kamati ya Tiba kitakachofanyika kesho Jumatano Agosti 30, mwaka huu kuanzia saa 4:00 asubuhi.

Kikao hicho kitakachofanyika Ukumbi wa Ofisi za Makao Makuu TFF, yaliyoko Uwanja wa Kumbukumbu ya Uwanja wa Karume, Ilala jijini Dar es Salaam kitarejea shughuli zake kwa mujibu wa Katiba ya TFF sambamba na Kanuni zinazoongoza mashindano mbalimbali ya TFF.

Katika kikao hicho, pia kamati itapitia fomu za afya za utimamu wa mwili za wachezaji wote wa Ligi Kuu ya Vodacom Tanzania Bara (VPL); Ligi Daraja la Kwanza (FDL) na Ligi Daraja la Pili (SDL).

Miongoni mwa majukumu ya kamati hiyo ni kupitisha wachezaji wanaopaswa kucheza/kushiriki katika ligi baada ya kujirisha juu ya utimamu wa mwili wa wachezaji kwa michuano tajwa hapo juu.

WANANE WAPITISHWA KUWANIA UONGOZI BODI YA LIGI


Kamati ya Uchaguzi ya Shirikisho la Mpira wa Miguu Tanzania (TFF), imetangaza majina manane ya wagombea ambao yamepita katika mchujo wa awali kuwania nafasi mbalimbali katika Kamati ya Uongozi (Management Committee) ya Bodi ya Ligi Kuu Tanzania Bara.

Waliopitishwa ni kuwania uenyekiti wa Management Committee ni Clement Sanga na Ahmed Yahya wakati Shan Crysostoms ameiptishwa kuwania nafasi ya makamu mwenyekiti.

Kwa mujibu wa kamati hiyo, Ramadhan Mahano na Hamisi Madaki wamepitishwa kuwania nafasi ya Ujumbe wakitokea klabu za Ligi Kuu ya Vodacom Tanzania Bara.

James Bwire na Almas Kasongo wamepitishwa kuwania Ujumbe wakitokea klabu za Ligi Daraja la Kwanza. Brown Ernest hakupitishwa kwa sababu hakuthibitishwa na klabu yake.

Edga Chubura amepitishwa kuwania ujumbe akitokea klabu za Ligi Ligi Daraja la Pili.

Wagombea kwa mujibu wa kanuni za uendeshaji wa Bodi ya Ligi Kuu ni marais au wenyeviti wa klabu husika. Wagombea wanatakiwa kuwa wenyeviti au Marais wa klabu husika.

Nafasi ya Mwenyekiti na Makamu Mwenyekiti wa Bodi ya Ligi Kuu Tanzania inagombewa na klabu za Ligi Kuu pekee.

Uchaguzi huo wa kamati hiyo utafanyika Jumapili Oktoba 15, 2017 jijini Dar es Salaam na unaendeshwa kwa mujibu wa kanuni za Uchaguzi za TFF toleo la 2013.

TAIFA STARS YAANZA MAZOEZI


Timu ya Mpira wa Miguu ya Tanzania ‘Taifa Stars’, imeanza kujifua leo asubuhi kwenye Uwanja wa Uhuru, Dar es Salaam.

Wachezaji wote kutoka klabu za Tanzania wamefika kadhalika baadhi kutoka nje ya mipaka ya Tanzania kama vile Nahodha Mbwana Samatta na Elias Maguli. Mazoezi hayo yataendelea kila siku hadi Ijumaa wiki hii.

Kikosi hicho kinachofanya mazoezi chini ya Kocha Mkuu, Salum Shabani Mayanga kinajindaa kucheza na Botswana katika mchezo wa kirafiki wa kimataifa chini ya utaratibu wa kalenda ya Shirikisho la Kimataifa la Mpira wa Miguu (FIFA).

Wiki ya FIFA kwa mechi za kimataifa inatarajiwa kuanza Jumatatu Agosti 28 hadi Septemba 5, mwaka huu ambako Tanzania imekubaliana kucheza Botswana kwenye Uwanja wa Uhuru jijini Dar es Salaam Jumamosi ya Septemba 2, 2017.

Katika kikosi hicho cha wachezaji 21, Kocha Mayanga amemwita upya Mlinzi wa Young Africans, Kelvin Yondani huku nyota kutoka nje ya mipaka ya Tanzania wakiwa ni saba.

Kikosi hicho kinachopiga kambi hoteli ya Sea Scape iliyoko Kunduchi, Dar es Salaam kina makipa Aishi Manula (Simba SC), Mwadini Ally (Azam FC) na Ramadhani Kabwili (Young Africans).

Walinzi ni Gadiel Michael (Young Africans), Boniphas Maganga (Mbao FC), Abdi Banda (Baroka FC/Afrika Kusini), Kelvin Yondani (Young Africans), Salim Mbonde (Simba SC) na Erasto Nyoni (Simba SC).

Viungo ni Himid Mao - Nahodha Msaidizi (Azam FC), Hamis Abdallah (Sony Sugar/Kenya), Mzamiru Yassin (Simba SC), Said Ndemla (Simba SC), Saimon Msuva (Difaa El Jadidah/Morocco), Shiza Kichuya (Simba SC), Farid Mussa (CD Tenerif/Hispania) na Orgenes Mollel (FC Famalicao/Ureno).

Washambuliaji ni Raphael Daud (Young Africans), Kelvin Sabato (Azam FC), Mbwana Samatta (KRC Genk/Ubelgiji) na Elias Maguli (Dhofar FC/Oman).

Benchi la Ufundi la Mayanga linaundwa na yeye mwenyewe ambaye ni Kocha Mkuu, Fulgence Novatus (Kocha Msaidizi), Patrick Mwangata (Kocha wa Makipa), Danny Msangi (Meneja), Dkt. Richard Yomba (Daktari wa timu), Dkt. Gilbert Kigadye (Daktari wa Viungo) na Ally Ruvu (Mtunza Vifaa).

Monday, August 28, 2017

SIMBA, AZAM SASA KUKIPIGA SEPTEMBA 6


Bodi ya Ligi (TPLB) ya Shirikisho la Mpira wa Miguu Tanzania (TFF), limefanya mabadiliko kidogo katika michezo ya Ligi Kuu ya Vodacom Tanzania Bara kama ifuatavyo.
 

Michezo ambayo imefanyiwa mabadiliko ni kati ya Tanzania Prisons na Majimaji ya Songea; Azam FC na Simba, Njombe Mji na  Young Africans; Mtibwa Sugar na Mwadui FC ambayo sasa itachezwa Septemba 6, 2017.

Pia tarehe hiyo ya Septemba 6, mwaka huu kutakuwa na mechi kati ya Lipuli na Stand United; Singida United na Mbao; Kagera Sugar na Ruvu Shooting wakati Mbeya City na Ndanda FC .


Michezo mingine ambayo imesogezwa hadi Septemba 11, 2017 ni kati ya Azam na Kagera Sugar wakati Mbao na Tanzania Prisons utachezwa Septemba 21, mwaka huu.


Kadhalika mechi nyingine zitachezwa Oktoba 11, mwaka huu ni kati ya Mbao na Azam FC; Kagera Sugar na Mwadui; Mbeya City na Ruvu Shooting; Ndanda na Singida United.

Tarehe hiyo pia Oktoba 11, mwaka huu kutakuwa na mchezo kati ya Njombe Mji na Simba; Mtibwa na Tanzania Prisons; Lipuli na Majimaji wakati Stand United na Young Africans watacheza Oktoba 12, mwaka huu.

Novemba 15, 2017 Mbao itacheza na Young Africans; Kagera na Mbeya City; Stand United na Azam; Mwadui na Ruvu Shooting; Singida na Njombe Mji; Lipuli na Tanzania Prisons; Mtibwa Sugar na Majimaji wakati Novemba 16, Ndanda itacheza na Simba.

YANGA YABANWA MBAVU NA LIPULI


MABINGWA watetezi wa ligi kuu ya Tanzania Bara, Yanga jana waliianza vibaya ligi hiyo baada ya kulazimishwa sareya bao 1-1 na Lipuli.

Katika mechi hiyo iliyochezwa kwenye Uwanja wa Uhuru, Dar es Salaam, Lipuli inayofundishwa na mchezaji wa zamani wa Simba, Selemani Matola, ilikuwa ya kwanza kupata bao kupitia kwa Seif Abdalla dakika ya 44.

Yanga ilisawazisha dakika moja baadaye kwa bao lililofungwa na Donaldo Ngoma, kufuatia mpira wa kona uliopigwa na beki Juma Abdul.

Lipuli ililazimika kumaliza mchezo huo ikiwa na wachezaji 10, baada ya nahodha wake, Asante Kwasi kutolewa nje kwa kadi nyekundu. Awali, alikuwa ameonyeshwa kadi ya njano.

SIMBA YAANZA LIGI KUU KWA KISHINDO, YAIBAMIZA RUVU SHOOTING 7-0



SIMBA imeanza michuano ya soka ya ligi kuu ya Tanzania Bara kwa kishindo baada ya kuibamiza Ruvu Shooting mabao 7-0.

Katika mechi hiyo iliyochezwa kwenye Uwanja wa Uhuru, Dar es Salaam, mshambuliaji wa kimataifa wa Uganda, Emmanuel Okwi aliibuka shujaa wa Simba baada ya kuifungia mabao manne kati ya saba.

Kutokana na kufunga idadi hiyo ya mabao, Okwi alizaliwadiwa mpira uliotumika katika mechi hiyo baada ya pambano kumalizika.

Mabao mengine ya Simba yalifungwa na Shiza Kichuya, Juma Luizio na Erasto Nyoni.

Katika mechi nyingine za ligi hiyo, Azam iliichapa Ndanda bao 1-0 kwenye Uwanja wa Nangwanda Sijaona, Mtwara, Mwadui ilishinda 2-1 dhidi ya Singida United kwenye Uwanja wa Mwadui Complex, Shinyanga wakati Mtibwa Sugar wameilaza Stand United 1-0 kwenye Uwanja wa Manungu, Turiani, Morogoro.

Timu machachari ya Mbao FC nayo iliibuka na ushindi ugenini baada ya kuichapa Kagera Sugar 1-0 kwenye Uwanja wa Kaitaba mjini Bukoba, Tanzania Prisons iliibuka na ushindi wa mabao 2-1 dhidi ya Mji Njombe wakati Mbeya City iliilaza Majimaji ya Songea 1-0 katika mchezo uliofanyika Uwanja wa Sokoine, mjini Mbeya.

Saturday, August 26, 2017

STAND UNITED YAPATA MKATABA WA MILIONI 100 KUTOKA BIKO



Wakati pazia la Ligi Kuu ya Vodacom Tanzania Bara 2017-2018 likitarajiwa kufunguliwa rasmi kesho Agosti 27, mwaka huu kwa timu zote 16 kuingia viwanjani,Kampuni ya Michezo ya Bahati Nasibu Mtandaoni – BIKO imeidhamini Klabu ya Stand United ‘Chama la Wana’ shilingi milioni 100 kuanzia mwaka huu.
Akizungumza katika mkutano wa hadhara uliofanyika leo Ijumaa,Agosti 25,2017mjini Shinyanga, Mbunge wa Jimbo la Shinyanga Mjini Mheshimiwa Stephen Masele (CCM) alisema BIKO wameamua kuidhamini timu hiyo baada ya kuridhishwa na mwenendo wa timu hiyo.
“Baada ya Stand United kupoteza mwelekeo na wadhamini wake Kampuni ya Acacia kujiondoa katika udhamini,hivi sasa nimeamua kuwa msimamizi mkuu wa timu hii,nimetafuta udhamini mwingine,nimeiomba kampuni ya Kitanzania ya BIKO,imekubali kuwa wadhamini wakuu na imetupatia shilingi milioni 100 kwa mwaka huu”,alieleza Masele.
Mbunge huyo alisema ameamua kuwa msimamizi mkuu wa timu hiyo ili kuhakikisha kuwa timu hiyo inafanya vyema katika michezo mbalimbali.

“Najua mnaelewa uhusika wangu katika Stand United,mnafahamu jitihada nilizofanya kuhakikisha timu hii inafanya vizuri,ili timu hii iwe ya kimataifa na timu hii baada ya kupata matatizo yaliyotokea,ilikuwa kama timu yatima,haina ulezi,haina msaada,na mimi kama mbunge nilikuwa nimekasirika na nikasema Maeja na wenzake wasinisumbue katika mambo ya mpira”,alisema.
“Nilitafuta ufadhili wa shilingi bilioni 2.4 kutoka Acacia,lakini tuliuchezea,na baada ya kujiridhisha na uongozi mpya ulioingia ukiongozwa na Dk. Maeja nimetafuta wadhamini wengine ambao ni kampuni ya BIKO ili kuisadia timu yetu,naomba fedha hizi zitumike vizuri”,alisema Masele.

Masele alitumia fursa hiyo kuwatahadharisha viongozi wa timu kuhusu matumizi mabaya na ubadhirifu wa fedha zilizotolewa na wadhamini hao na kuwa hawatasita kuwachukulia hatua kali za kisheria.
“BIKO itapenda kuona fedha hizi zinatumikaje na kuanzia sasa mtu yeyote atakayejihusisha na ubadhirifu tutamfikisha katika vyombo vya sheria kwa sababu wanaumiza hisia za watu wengi”,aliongeza Masele.
“Nataka niwahikikishie kuwa timu hii haitashuka daraja kinatochotakiwa ni kutoa msaada kwa timu hii ikiwemo kuishangilia,jambo jingine naomba mjitahidi kubana matumizi katika masuala mbalimbali ikiwemo pale mnaposafiri punguzeni idadi ya watu wa kusafiri lakini pia lipeni mishahara ambayo haiumizi sana”,aliongeza.
Kwa upande wake,Mwenyekiti wa Klabu ya Stand United,Dkt. Ellyson Maeja alisema Klabu hiyo ya Stand United imejipanga vizuri kuhakikisha kuwa inafanya vizuri katika Ligi Kuu ya Vodacom Tanzania Bara 2017-2018.

“Hivi sasa timu imetulia kiuongozi tatizo ni bajeti,mpira ni pesa,bila pesa hakuna timu,lakini pia hatuna usafiri wala hosteli kwa ajili ya wachezaji,tunaomba wadau waendelee kujitokeza kuisaidia timu hii,tumesajili wachezaji wapya 19,jumla sasa wapo 30,tunaye kocha mzuri,walimu wazuri,malengo yetu ni kushika nafasi ya kwanza hadi ya tatu katika Ligi Kuu ya Vodacom Tanzania Bara msimu huu wa 2017-2018?,alisema Dkt.Maeja.

YANGA WAMWONGEZEA LWANDAMINA MKATABA WA MWAKA MMOJA


Kocha wa Yanga, George Lwandamina hana mpango wa kuondoka, maana tayari ameongezewa muda wa kuendelea kufanya kazi Jangwani.
Uongozi wa Yanga umeamua kumuongezea mkataba wa mwaka mmoja kocha wake George Lwandamina raia wa Zambia baada ya ule wa awali kumalizika Julai 16, mwaka huu.
Katika mkataba wake uliopita, Lwandamina aliiwezesha Yanga kutwaa ubingwa wa Ligi Kuu Bara msimu uliopita na kuifikisha katika nusu fainali ya Kombe la FA kabla ya kutolewa na Mbao FC ya Mwanza.
Katibu Mkuu wa Yanga, Boniface Mkwasa amesema  mchana kuwa, wameamua kumuongezea mkataba Lwandamina baada ya kuridhishwa na kazi yake.
“Tunaingia mkataba mwingine wa mwaka mmoja na Lwandamina kwani ule wa mwanzo umeisha na sasa kila kitu kipo tayari hivyo muda wowote tena kwa uwazi kabisa atasaini mkataba mpya.
“Tumejitahidi kwa uwezo wetu kuboresha mkataba wake mpya kwa kumuongezea maslahi kidogo ili apate motisha ya kufanya kazi yake ipasavyo,” alisema Mkwasa.
Lwandamina alitarajiwa kusaini mkataba huo muda wowote kuanzia jana mchana ili awe na uhakika wa kuendelea kufanya kazi yake kwa uhuru na kujiamini.

MAYANGA ATAJA TAIFA STARS MPYA KUIVAA BOTSWANA


Kocha Mkuu wa timu ya Mpira wa Miguu ya Tanzania ‘Taifa Stars’, Salum Shabani Mayanga ametangaza kikosi kipya kitakachocheza na Botswana katika mchezo wa kirafiki wa kimataifa chini ya utaratibu wa kalenda ya Shirikisho la Kimataifa la Mpira wa Miguu (FIFA).


Wiki ya FIFA kwa mechi za kimataifa inatarajiwa kuanza Jumatatu Agosti 28 hadi Septemba 2, mwaka huu ambako Tanzania imekubaliana kucheza na Botswana kwenye Uwanja wa Uhuru jijini Dar es Salaam Jumamosi ya Septemba 2, 2017.


Katika kikosi hicho cha wachezaji 21, Kocha Mayanga amemwita upya Mlinzi wa Young Africans, Kelvin Yondani huku nyota kutoka nje ya mipaka ya Tanzania wakiwa saba, akiwamo nahodha wa kikosi hicho, Mbwana Ally Samatta.


Kikosi hicho kinachotarajia kuingia kambini kesho Jumapili kuanzia saa 2.00 usiku ni makipa Aishi Manula (Simba SC), Mwadini Ally (Azam FC) na Ramadhani Kabwili (Young Africans).


Walinzi ni Gadiel Michael (Young Africans), Boniphas Maganga (Mbao FC), Abdi Banda (Baroka FC/Afrika Kusini), Kelvin Yondani (Young Africans), Salim Mbonde (Simba SC) na Erasto Nyoni (Simba SC).


Viungo ni Himid Mao - Nahodha Msaidizi (Azam FC), Hamis Abdallah (Sony Sugar/Kenya), Mzamiru Yassin (Simba SC), Said Ndemla (Simba SC), Saimon Msuva (Difaa El Jadidah/Morocco), Shiza Kichuya (Simba SC), Farid Mussa (CD Tenerif/Hispania) na Orgenes Mollel (FC Famalicao/Ureno).


Washambuliaji ni Raphael Daud (Young Africans), Kelvin Sabato (Azam FC), Mbwana Samatta (KRC Genk/Ubelgiji) na Elias Maguli (Dhofar FC/Oman).


Benchi la Ufundi la Mayanga linaundwa na yeye mwenyewe ambaye ni Kocha Mkuu, Fulgence Novatus (Kocha Msaidizi), Patrick Mwangata (Kocha wa Makipa), Danny Msangi (Meneja), Dkt. Richard Yomba (Daktari wa timu), Dkt. Gilbert Kigadye (Daktari wa Viungo) na Ally Ruvu (Mtunza Vifaa).

LIGI KUU TANZANIA BARA KUANZA KUTIMUA VUMBI LEO



Ligi Kuu ya Vodacom Tanzania Bara (VPL), msimu wa 2017/18 inaanza rasmi leo Jumamosi Agosti 26, 2017 kwa michezo saba itayochezwa katika viwanja tofauti nchini.
 
Ni msimu mpya utakaotoa timu bingwa mpya itakayoshiriki Ligi ya Mabingwa Afrika inayoandaliwa na Shirikisho la Mpira wa Miguu Afrika (CAF), msimu wa 2019.


Itakumbukwa, msimu wa CAF wa 2018, timu itakayoiwakilisha nchi ni Young Africans SC ambayo ni Bingwa wa VPL msimu 2016/17 wakati michuano ya Kombe la Shirikisho, Tanzania itawakilishwa na Simba SC.


TFF tunazitakia kila la kheri timu zote zinazoshiriki ligi hii, tukiamini kwamba uadilifu utaongoza mbele ya taratibu, kanuni na sheria zinazosimamia mpira wa miguu hapa nchini na kwingineko.


Kwa mechi za kesho Jumamosi, Simba inatarajiwa kuwa mwenyeji wa Ruvu Shooting katika mchezo utakaofanyika Uwanja wa Uhuru, Dar es Salaam wakati Mbao watakuwa wageni wa Kagera Sugar kwenye Uwanja wa Kaitaba mjini Bukoba.


Mchezo mwingine utakuwa ni kati ya Majimaji ya Songea itakayosafiri hadi Mbeya kucheza na Mbeya City kwenye Uwanja wa Sokoine jijini humo huku Njombe Mji ikiialika Tanzania Prisons ya Mbeya kwenye Uwanja wa Sabasaba huko Makambako.


Kadhalika Uwanja wa Manungu ulioko Turiani, Mtibwa mkoani Morogoro, Mtibwa Sugar itaikaribisha Stand United ya Shinyanga kwenye mchezo mwingine wa VPL ilihali Azam atakuwa mgeni wa Ndanda FC kwenye Uwanja wa Nangwanda Sijaona mjini Mtwara.


Mwadui watakuwa wenyeji wa Singida United ya Singida kwenye Uwanja wa Mwadui huko Shinyanga na Jumapili kutakuwa na Mchezo mmoja utakaokutanisha Young Africans na Lipuli kwenye Uwanja wa Uhuru jijini.

RAIS WA FIFA AMPONGEZA KARIA, AMWALIKA ZURICH

Rais wa Shirikisho la Kimataifa la Mpira wa Miguu (FIFA), Gianni Infantino, ametuma salamu za pongezi kwa Rais wa Shirikisho la Mpira wa Miguu Tanzania, Wallace Karia kwa kuchaguliwa kuwa Rais wa TFF kwa kipindi cha miaka minne ijayo ya 2017-2021.


Rais Infantino katika barua yake ya Agosti 14, 2017 aliyoiandika kutoka Zurich, amesema: “Ningependa kuchukua nafasi hii kukupa pongezi zangu dhati. Nakutakia kila la kheri katika majukumu yako.”


Rais wa FIFA amesema kwamba hana shaka na uwezo wa Karia hasa ikizingatiwa kuwa alikuwa Makamu wa Rais wa kipindi kilichopita, hivyo atakuwa fursa thabiti ya kuiletea nchi maendeleo ya mchezo soka.


“Kwa wakati wote, nakuhakikishia ushirikiano wa kutosha kutoka FIFA katika malengo yako. Milango ya FIFA iko wazi wakati wowote wewe kuja kujadili masuala ya mchezo wa mpira wa miguu hasa eneo la utawala.


“Ningependa kuchukua nafasi hii kukualika kuja hapa Zurich wakati wowote kuanzia sasa ambako nitapata  fursa ya kukutambulisha maeneo mbalimbali ya FIFA. Nimeagiza upande wa utawala kuwasiliana nawe kuona na kupanga tarehe rasmi ya safari,” amesema na kuongeza:
 
“Nikutakie tena kheri na fanaka, nguvu na kila aina ya mafanikio katika majukumu yako mapya huku nikitarajia ujio wa kuonana nawe haraka.”


Wakati huo huo, Shirikisho la Mpira wa Miguu la Rwanda (FERWAFA) nalo kwa upande wake wamempongeza Rais wa TFF, Wallace Karia kwa kuchaguliwa kuwa kiongozi mpya wa shirikisho.


Katika barua ya FERWAFA iliyosainiwa na Rais wa shirikisho hilo, Nzamwita Vincent imesema kwamba Rwanda itaendelea kuwa bega kwa bega na Tanzania katika maendeleo ya mpira wa miguu kwa ushirikiano baina ya nchi mbili kadhalika ukanda wa Afrika Mashariki unaounda Baraza la Sola la nchi za Afrika Mashariki.

Thursday, August 24, 2017

TFF YAWAOMBA RADHI WADAU WA SOKA


Shirikisho la Mpira wa Miguu Tanzania (TFF), linaomba radhi wanafamilia wote wa mpira wa miguu kutokana na makosa ya maandishi yaliyoonekana kwenye utambulisho wa Ngao ya Jamii iliyotolewa Jumatano Agosti 23, 2017.

Ngao hiyo ilitolewa mara baada ya mchezo uliokutanisha timu za Simba SC na Yanga SC za Dar es Salaam kwenye Uwanja Mkuu wa Taifa jijini. Katika mchezo huo, Simba ilishinda kwa mikwaju ya penalti 5-4 dhidi ya Yanga na kutwaa Ngao hiyo.

Watanzania hususani wanafamilia ya mpira wa miguu popote pale, TFF hatujapokea vizuri mwonekana wenye makosa kwenye Ngao hiyo ya Jamii kama ambavyo wadau hawajapokea vema suala hili.

Kutokana na makosa hayo, Kaimu Katibu Mkuu wa TFF, tayari amechukua hatua za kinidhamu kwa watumishi waliohusika kadhalika kuwasiliana na uongozi wa Simba SC kuirejesha Ngao hiyo ili kufanyiwa marekebisho yatakayobaki kwenye kumbukumbu sahihi.

Hatutegemei tukio kama hili kujirudia tena.

SIMBA SIMBA SIMBA


NGEBE, tambo na majivuno baina ya mashabiki wa klabu za Yanga na Simba zimemalizika. Jana ilikuwa hukumu kwa timu hizo kongwe katika mchezo wa Ngao ya Jamii.

Timu ya Simba ilitwaa Ngao ya Jamii, baada ya kushinda mabao 5-4 kwa penalti.

Mchezo huo wa kuashiria ufunguzi wa msimu mpya wa Ligi Kuu Tanzania Bara, ulichezwa Uwanja wa Taifa, Dar es Salaam.

Mikwaju ya penalti ilitumika ili kupata bingwa, baada ya miamba hiyo ya kandanda kumaliza ndani ya dakika 90.

Penalti za Yanga zilifungwa na Papy Tshishimbi, Thabani Kamusoko, Ibrahim Ajibu, Donald Ngoma wakati Kelvin Yondani, Juma Mahadhi walikosa.

Simba ilipata penalti zake kupitia kwa Method Mwanjali, Emmanuel Okwi, Haruna Niyonzima, Shiza Kichuya na Mohammed Ibrahim 'Mo' wakati Mohammed Hussein 'Tshabalala' walikosa.


Mchezo huo ulikuwa ni moja ya ‘derby’ maarufu Afrika ikishika nafasi ya tatu baada ya Al Ahly vs Zamalek za Misri inayotajwa namba moja.

Nyingine ni ‘Soweto Derby’ baina ya Orlando Pirates vs Keizer Chiefs za Afrika Kusini ikifuatiwa na Simba dhidi ya Yanga.

Awali, mpira ulianza kwa kasi hasa ukichezwa zaidi katikati kwa takribani dakika 10 huku wachezaji wa kimataifa Haruna Niyonzima wa Simba na Papy Tshishimbi, wakionyesha ufundi.

Niyonzima aliyejiunga na Simba kutoka Yanga, alicheza kwa ustadi katika eneo la katikati akisaidiana na Mzamiru Yassin.

Tshishimbi, kiungo wa kimataifa aliyetua Yanga kutoka Mbabane Swallors, aling'ara katika dimba la kati akigawa mipira maridadi kwa washambuliaji wake.

Kiungo huyo raia wa Swaziland mwenye asili ya Jamhuri ya Congo, alicheza pacha na nahodha wake Thabani Kamusoko.

Licha ya kujiunga na Yanga muda mfupi, Tshishimbi, alicheza kwa ustadi kulinganisha na Niyonzima katika mchezo huo.

Simba ilifanya shambulizi la kushitukiza dakika ya 15, lakini Laudit Mavugo, alikosa bao akiwa ndani ya eneo la hatari.

Mavugo, alishindwa kuunganisha mpira wa krosi uliopigwa na Niyonzima kutoka upande wa kulia mwa uwanja.

Ibrahim Ajibu, mmoja wa washambuliaji hatari nchini, alikosa bao dakika ya 24 kwa kupiga shuti lililotoka pembeni kidogo mwa lango la Simba.

Ajibu ametua Yanga kutoka Simba na jana alicheza kwa kiwango bora na kuwa tishio kwa safu ya ulinzi ya Simba iliyokuwa chini ya mabeki wa kati nahodha Method Mwanjali na Salim Mbonde.

Yanga ilikosa bao dakika ya 30 baada ya Donald Ngoma, kupiga mpira wa krosi uliotua mikononi kwa kipa Aishi Manula.

Simba ilijibu shambulizi dakika tatu baadaye kwa shuti la kiungo wa pembeni Shiza Kichuya kupiga mkwaju uliozuiwa na beki Vincent Andrew 'Dante'.

Niyonzima alikosa bao dakika ya 40, alipounganisha mpira wa kona uliochongwa na Kichuya lakini alifumua shuti juu.

Kipindi cha pili kilianza kwa timu zote kushambuliana kwa zamu huku timu zote zikikosa mabao licha ya kutengeneza nafasi za kufunga.

Laudit Mavugo wa Simba nusura afunge bao baada ya kuwatoka mabeki wa Yanga, lakini shuti lake lilitoka nje kabla ya Kamusoko kukosa bao dakika ya 53.

Lango la Simba lilikuwa katika hatari ya kufungwa bao, baada ya Yanga kufanya shambulizi lakini mabeki waliokoa.

Juma Liuzio alikosa bao dakika ya 75 baada ya kupiga shuti ambalo mabeki wa Yanga walikaa imara kuokoa.

Pia Ajibu alikosa bao dakika ya 77 kwa shuti lake kupaa kabla ya Tshishimbi kufumua shuti dakika mbili baadaye lililokosa mwelekeo.

Niyonzima aliyepewa kadi ya njano na mwamuzi wa mchezo, Elly Sasi, alionekana mara kwa mara akilalamika uwanjani.

Dakika ya 86 Ajibu alikosa bao baada ya kupiga mpira wa krosi kuokolewa na libero Salim Mbonde.

Yanga: Youthe Rostand, Juma Abdul/Hassani Kessy, Gadiel Michael, Vincent Andrew, Kelvin Yondani, Papy Tshishimbi, Thabani Kamusoko, Raphael Daudi/Juma Mahadhi, Donald Ngoma, Ibrahim Ajibu na Emmanuel Martin.

Simba: Aishi Manula, Ali Shomari, Erasto Nyoni/Mohammed Hussein, Method Mwanjali, Salim Mbonde, James Kotei, Mzamiru Yassin/Mohammed Ibrahim, Haruna Niyonzima, Emmanuel Okwi, Laudit Mavugo/Juma Liuzio na Shiza Kichuya.

Wednesday, August 23, 2017

KIDAU KATIBU MKUU MPYA TFF




Kamati ya Utendaji ya Shirikisho la Mpira wa Miguu Tanzania (TFF), imepitisha jina la Kidao Wilfred kuwa Kaimu Katibu Mkuu.

Kidao ambaye ni mchezaji wa zamani wa Taifa Stars ambaye pia Mwenyekiti wa Chama cha Makocha Tanzania (TAFCA), ameteuliwa rasmi jana Agosti 22, 2017 na Kamati ya Utendaji ya TFF. Wasifu wa Kidao utawajia punde.

KIUNGO YANGA AFUNGIWA MWAKA MMOJA


Kamati ya Katiba, Sheria na Hadhi za Wachezaji ya Shirikisho la Mpira wa Miguu Tanzania, iliyokutana kwa siku mbili mfululizo Agosti 20 na 21, 2017, jijini Dar es Salaam, imepitia usajili wa majina ya klabu 40.

Katika idadi hiyo ya timu 40, kamati imepitia klabu 16 za Ligi Kuu ya Vodacom Tanzania Bara na Klabu 24 za Ligi Daraja la Kwanza (FDL) kwa mujibu wa katiba na kanuni za mashindano yanayosimamiwa na kuendeshwa na TFF.

Kamati ya Katiba, Sheria na Hadhi za Wachezaji ya TFF, inayoongozwa na Wakili Richard Sinamtwa, imegundua na kubaini kuwa mchezaji Pius Busita amesaini mikataba ya klabu mbili tofauti katika msimu mmoja wa 2017/18.

Kamati imebaini kwamba mchezaji huyo aliyechezea Mbao FC ya Mwanza msimu uliopita, amevunja Kanuni ya 66 ya Ligi Kuu ya Vodacom ambayo inaelekeza adhabu ya kufungiwa mwaka mmoja. Mchezaji huyo amefungiwa kucheza mpira wa miguu kwa mwaka mmoja.

Kamati ya Katiba, Sheria na Hadhi za Wachezaji ya  TFF, imebaini upungufu katika uwasilishaji wa majina ya wachezaji wa msimu wa 2017/18 kwa timu zote.

Klabu imeagiza klabu zote kuleta majina matatu ya wachezaji wasiopungua 18 na wasiozidi 30 wa kikosi cha timu ya vijana (U20).

Klabu zote zimeagizwa kuanisha wachezaji wa zamani na wapya na klabu wakakotoka kwa timu zote mbili za wakubwa na vijana.

Kamati imezitaka klabu hizo pia kuzingatia matakwa ya kanuni kwa kila mchezaji ambaye atapewa leseni ya kushiriki Ligi Kuu ya Vodacom na Ligi daraja la Kwanza.

Matakwa hayo ambayo ambayo yamesisitizwa ni kila mchezaji kujaziwa fomu ya utimamu wa mwili ‘Medical Form’ ya TFF.

Pia Klabu zinatakiwa kuwasilisha nakala tatu za mikataba (Contracts) ya kila mchezaji katika Shirikisho la Mpira wa Miguu (TFF), Uthibitisho wa kukatiwa Bima ‘Insurance’, Barua ya Uhamisho ‘Release Letter’ kutoka timu ambayo ametoka.

Kadhalika sharti jingine linahusu wachezaji wa kigeni ambako kila mchezaji hana budi kuwa na Hati ya Uhamisho wa Kimataifa (ITC) na kulipwa Ada ya ushiriki ya msimu Sh. 2,000,000.

Klabu zimeagizwa kikamilisha utaratibu wa usajili kabla ya Agosti 24, 2017.

KARIA ATEUA KAMATI MPYA TFF, NYAMLANI NA MGOYI WAPEWA SHAVU


Rais wa Shirikisho la Mpira wa Miguu Tanzania, Wallace Karia amewateua Makamu wa Rais wa zamani wa TFF, Athuman Nyamlani na Ahmed Mgoyi kuwa Wajumbe wa Kamati ya Utendaji ya TFF.

Rais Karia ameteua kwa kwa mujibu wa mamlaka aliyonayo katika Katiba ya TFF ikiwa ni wiki moja baada ya kupatikana kwa viongozi wa shirikisho katika uchaguzi mkuu uliofanyika Agosti 12, mwaka huu.

Rais Karia aliwatambulisha viongozi hao kwenye Kikao cha Kamati ya Utendaji iliyofanyika Jumanne Agosti 22, mwaka huu jijini Dar es Salaam.

Katika kikao hicho pia Rais Karia alitumia fursa hiyo kutangaza viongozi wa kamati mbalimbali za TFF zikiwamo za kinidhamu na kisheria.

Kamati ya Nidhamu: Mwenyekiti Tarimba Abbas, Makamu Mwenyekiti, Peter Hella wakati wajumbe ni Boniface Lyamwike, Dk. Bill Haonga na Kassim Dau.

Kamati ya Rufani za Nidhamu: Mwenyekiti ni Wakili Rahim Zuber Shaban; Makamu Mwenyekiti, Stella Mwakingwe wakati Wajumbe ni Abbas Mtemvu, Amani Mulika na Siza Chenja.

Kamati ya Maadili: Mwenyekiti ni Wakili Hamidu Mbwezeleni, Makamu Mwenyekiti ni Wakili Steven Zangira wakati Wajumbe ni Glorious Luoga, Walter Lungu na Amin Bakhressa.

Kamati ya Rufaa ya Maadili: Mwenyekiti ni Wakili Ebenezer Mshana; Makamu Mwenyekiti ni DCP. Mohammed Mpinga na wajumbe  ni Wakili Benjamin Karume, George Mayawa na ASP. Benedict Nyagabona.

Kamati ya Uchaguzi: Mwenyekiti ni Revocatus Kuuli; Makamu Mwenyekiti ni Wakili Mohammed Mchengerwa; Wakili Edwin Mgendera; Wakili Kiomoni Kibamba na Wakili Thadeus Karua.

Kamati ya Rufani ya Uchaguzi: Mwenyekiti ni Kenneth Mwenda; Makamu Mwenyekiti ni Jabir Shekimweri na Wajumbe ni Wakili Rashid Sadalla, Irene Kadushi na Mohammed Gombati.

Kamati ya Katiba, Sheria na Hadhi za Wachezaji: Mwenyekiti ni Elias Mwanjala; Makamu Mwenyekiti ni Wakili Malangwe Mchungahela wakati Wajumbe ni Zakaria Hanspope, Robert Selasela, Goodluck Moshi, Mhandisi Issa Batenga na Hamis Semka.

Kamati ya Fedha na Mipango: Mwenyekiti ni Michael Wambura; Makamu Mwenyekiti ni Francis Ndulane na Wajumbe ni Almas Kasongo, Pascal Kihanga, Maximillian Tabonwa, Paul Bilabaye na Farid Abeid.

Kamati ya Mashindano: Mwenyekiti ni Ahmed Mgoyi; Makamu Mwenyekiti ni James Mhagama wakati Wajumbe ni Kenneth Pesambili, Shafii Dauda, Fortunatus Kalewa na Mhandisi Andrew Makota.

Kamati ya Ufundi: Mwenyekiti ni Vedastus Lufano; Makamu Mwenyekiti ni Issa Bukuku na wajumbe ni Sarah Chao, Ally Mayay, Michael Bundala, Omar Abdulkadir na Israel Mujuni.

Kamati ya Soka la Vijana: Mwenyekiti ni Khalid Abdallah; Makamu Mwenyekiti ni Lameck Nyambaya na Wajumbe ni Mohammed Aden, Ramadhani Nassib, Salim Kibwana na Vicent Majili.

Kamati ya Mpira wa Wanawake: Mwenyekiti ni Amina Karuma; Makamu Mwenyekiti ni Rose Kissiwa na Katibu wa Kamati hiyo ni Somoe Ng’itu wakati Wajumbe ni Zena Chande, Beatrice Mgaya, Sofia Tigalyoma, Zuhura Kapama na Nia Mjengwa.

Kamati ya Waamuzi: Mwenyekiti ni Saloum Chama; Makamu Mwenyekiti Joseph Mapunda wakati Wajumbe ni Nassib Mabrouk, Leslie Liunda na Soud Abdi.

Kamati ya Habari na Masoko: Mwenyekiti ni Dunstan Mkundi; Makamu Mwenyekiti ni Mbasha Matutu wakati Wajumbe ni Imani Kajura, Mgaya Kingoba, Godfrey Dilunga na Samson Mbamba.

Kamati ya Ukaguzi wa Fedha: Mwenyekiti ni Yahya Hamad; Makamu Mwenyekiti ni Athuman Nyamlani na Wajumbe ni Khalifa Mgonja, Japhary Kachenje, Jackson Songoro na Benesta Rugora.

Kamati ya Tiba: Mwenyekiti ni Dkt. Paulo Marealle; Makamu Mwenyekiti ni Dkt. Fred Limbanga Wakati wajumbe ni Dkt. Norman Sabun, Dkt. Lisobina Kisongo, Dkt. Eliezer Ndalama, Dkt. Elson Maeja na Violet Lupondo.

Kamati ya Futsal na Beach Soccer: Mwenyekiti ni Ahmed Mgoyi; Makamu Mwenyekiti ni Hussein Mwamba na Wajumbe ni Blassy Kiondo, Isaac Munisi, Didas Zimbihile na Aaron Nyanda.

Kamati ya Ajira: Mwenyekiti ni Issa Bukuku; Makamu Mwenyekiti ni Saloum Chama wakati Wajumbe ni Athuman Kihamia, Mtemi Ramadhani, Noel Kazimoto na Hawa Mniga.

Kamati ya Leseni za Klabu: Mwenyekiti ni Wakili Lloyd Nchunga; Makamu Mwenyekiti Wakili Emmanuel Matondo wakati Wajumbe ni Profesa Mshindo Msolla, Hamisi Kissiwa na David Kivembele.

Kamati ya Rufaa za Leseni: Mwenyekiti Wakili Dk. Damas Ndumbaro; Makamu Mwenyekiti ni Wakili Alex Mngongolwa Wajumbe ni Meneja wa zamani wa Uwanja wa Taifa, Charles Matoke, Tumainiel Mlango na Ahmed Menye.

TIMU SITA DARAJA LA KWANZA SASA KUPANDA LIGI KUU


Kamati ya Utendaji ya Shirikisho la Mpira wa Miguu Tanzania (TFF) litapandisha idadi ya timu zinazoshiriki Ligi Kuu msimu ujao wa 2018/19 kutoka 16 za sasa hadi 20, imefahamika.

Uamuzi huo umefanyika Jumanne Agosti 22, 2017 wakati Kamati ya Utendaji inafanya marekebisho ya Kanuni za Ligi Daraja la Kwanza inayotarajiwa kuanza Septemba 16, mwaka huu.

Kwa marekebisho hayo, timu zitakazoshuka daraja msimu ujao kutoka Ligi Kuu ya Vodacom ya sasa ni mbili hivyo kubaki 14. Na ili kufikia timu 20, timu sita (6) za Ligi Daraja la Kwanza zitapanda daraja.

Kwa mujibu wa utaratibu wa Ligi Daraja la Kwanza, timu, ina maana kwamba msimu huu timu mbili zitapanda kutoka katika kila kundi katika ligi hiyo ambayo inatarajiwa kuanza Septemba 16, mwaka huu.

Makundi ya Daraja, kundi ‘A’ lina timu za African Lyon, Ashanti United, Friends Rangers za Dar es Salaam, JKT Ruvu na Kiluvya United za Pwani, Mgambo JKT ya Tanga, Mvuvumwa ya Kigoma na Polisi Moro ya Morogoro.

Kundi ‘B’ ziko za Coastal Union ya Tanga; JKT Mlale ya Ruvuma; KMC ya Dar es Salam, Mawezi Market ya Morogoro, Mbeya Kwanza ya Mbeya, Mufundi United ya Iringa, Mshikamano na Polisi Dar za Dar es Salaam.

Kundi ‘C’ lina timu za Alliance School, Pamba na Toto

African za Mwanza, Rihno Rangers ya  Tabora, Polisi Mara ya Mara, Polisi Dodoma ya Dodoma, Transit Camp ya Shinyanga na JKT Oljoro ya Arusha.

Sunday, August 20, 2017

WACHEZAJI SIMBA, YANGA KUPIMWA MKOJO



SHIRIKISHO la Soka Tanzania (TFF), limesema wachezaji wa klabu za Simba na Yanga, watafanyiwa vipimo vya mkojo kabla ya mechi yao ya kuwania Ngao ya Jamii, itakayopigwa keshokutwa kwenye Uwanja wa Taifa, Dar es Saaam.

Ofisa Habari wa TFF, Alfred Lucas, alisema mjini Dar es Salaam, jana, kuwa upimaji huo umelenga kubaini iwapo kuna baadhi ya wachezaji wa timu hizo wanatumia dawa za kuongeza nguvu.

Alfred alisema upimaji wa aina hiyo ni wa kawaida kwa timu zote zinazoshiriki katika michuano ya ligi kuu na hufanyika wakati wowote.

Alisema kitakachofanyika ni madaktari kuchukua vipimo vya mchezaji yeyote watakayemuhitaji kutoka katika kila timu na utasimamiwa na TFF.

"Tumekuwa tukifanya hivi kila mwaka, kabla ya ligi kuanza na zoezi hili hufanywa na madaktari maalumu chini ya usimamizi wa TFF. Huu ni muendelezo wa upimaji huo, haitakuwa mara ya kwanza,"alisema Alfred.

Kwa mujibu wa Alfred, maandalizi yote muhimu kwa ajili ya mechi hiyo yanakwenda vizuri na tiketi zimeshaanza kuuzwa katika vituo mbalimbali ili kuwapa fursa mashabiki kununua mapema, hivyo kujiepusha na usumbufu.

Viingilio katika mchezo huo vimepangwa katika makundi manne. Sehemu ya VIP A tiketi ni sh. 25,000; VIP B na C sh. 20,000; Viti vya rangi ya chungwa sh. 10,000 na mzunguko kwa viti vya rangi za bluu na kijani ni sh. 7,000.

Katika kujiandaa na mechi hiyo, Simba na Yanga zimekwenda Unguja na Pemba kwa ajili ya kuweka kambi, ikiwa ni pamoja na kucheza mechi kadhaa za kujipima nguvu.

Wakati huo huo, habari za kuaminika kutoka ndani ya TFF, zimeeleza kuwa, mwamuzi bora wa ligi kuu msimu uliopita, Elly Sassi, mwenye umri wa miaka 28, ndiye atakayechezesha mechi ya watani wa jadi, Yanga na Simba.

Sassi ndiye aliyeibuka mwamuzi bora wa ligi hiyo msimu uliopita na amekuwa akitabiriwa kufika mbali kutokana na uwezo mkubwa aliouonyesha katika kuchezesha soka.

Mwamuzi huyo kijana pia amekuwa akitajwa kuwa ni mwenye msimamo, anayefuata sheria na kanuni zote za kuchezesha soka, jambo ambalo limemfanya amudu michezo mingi mikubwa, ndani na nje ya nchi.

YANGA YAMALIZA KAMBI PEMBA KWA USHINDI


Mabingwa watetezi wa Ligi Kuu ya Vodacom Tanzania bara Yanga wamemaliza Kambi yao Visiwani Pemba kwa ushindi wa bao 1-0 dhidi ya Jamhuri mchezo wa kirafiki wa kujiandaa na msimu pamoja na Mechi ya Ngao ya Hisani utakaowakutanisha na mahasimu wao Simba Agosti 23 mwaka huu kwenye uwanja wa Taifa jijini Dar es salaam.

Wakicheza katika uwanja wa Gombani uliopo visiwani humo Yanga walipata bao hilo kupitia kwa beki wao wa kushoto,Mwinyi Hajji kwa shuti kali lililoenda moja kwa moja na unakuwa ushindi wa tatu wakiwa Zanzibara na ukiwa wa pili visiwani Pemba baada ya Jumatano kuwafunga timu ya Chipukizi bao 1-0 ambalo lilifungwa na Ibrahim Ajibu.

Baada ya hapo walipita visiwani Unguja na kucheza na Mlandege na kupata ushindi wa jumla ya mabao 2-0 yakifungwa na Ibrahimu Ajibu na Emmanuel Martin huku kocha Mkuu George Lwandamina akianza na vikosi viwili kipindi cha kwanza kilikuwa hiki Kabwili, Juma Abdul, Mwinyi Mngwali, Abdallah Hajji ‘Ninja’, Nadir Haroub ‘Cannavaro’/Pato Ngonyani dk34, Maka Edward, Pius Buswita, Said Juma ‘Makapu’, Amissi Tambwe/Said Mussa dk34, Matheo Anthony na Juma Mahadhi/Yussuf Mhilu dk34.

Kipindi cha pili Yanga walifanya mabadiliko kwa kukitoa kikosi kizima na kuingiza hiki Youthe Rostand, Hassan Kessy/Juma Abdul dk70, Gardiel Michael, Kevin Yondan, Andrew Vincent ‘Dante’, Papy Kabamba Tshisbimbi, Thabani Kamusoko, Donald Ngoma, Ibrahim Hajib, Emmanuel Martin na Raphael Daudi.

Hata hivyo hakikuweza kubadili matokeo na kubaki kuwa bao moja hilo na kujiweka mguu sawa kuwavaa watani wao wa Jadi Simba kwenye ngao ya hisani Mchezo unaotarajiwa kuwa na upinzani Mkubwa hii inatokana na usajili uliofanywa na timu hizo.

Yanga wanatarajia kuingia jijini Dar es salaam Siku ya Jumanne ya wiki inayoanza kesho tayari kwa vita ya Ngao ya Hisani pamoja na kuanza Mikikimikiki ya Ligi Kuu ya Tanzania bara linalotanzamiwa kufunguliwa Agosti 26 huku Mabingwa hao watetezi wakitaraajia kutupa karata yao siku ya Jumapili ya Agosti 27 kuvaana na wageni wa Ligi timu ya Lipuli FC kutoka Iringa.