KANUMBA KUZIKWA KESHO

Mazishi ya msanii nguli wa filamu nchini, Steven Kanumba yamepangwa kufanyika kesho kwenye makaburi ya Kinondoni, Dar es Salaam.
Mwenyekiti wa kamati ya mazishi ya msanii huyo, Jacob Steven JB alisema jana kuwa, mwili wa marehemu Kanumba utaagwa kwenye viwanja vya Leaders, Kinondoni kuanzia saa nne mbalimbali.
JB alisema shughuli ya kuuaga mwili wa msanii huyo inatarajiwa kuhudhuriwa na viongozi mbalimbali wa serikali, wasanii, mashabiki na ndugu wa marehemu.
Kwa mujibu wa JB, mazishi yamepangwa kufanyika saa 10 jioni kwenye makaburi ya Kinondoni.
JB alisema shughuli ya kuuaga mwili wa Kanumba itakwenda sambamba na misa mbalimbali za kumuombea dua.

MAMA MZAZI WAANUMBA MSIBANI

Mama mzazi wa msanii Steven Kanumba, Florence Mtegoe (aliyeshika tamaa) akiwa nyumbani kwa msanii huyo pamoja na waombolezaji wengine.

PINDA AMUOMBOLEZA KANUMBA

WAZIRI Mkuu Mizengo Pinda akitia saini kwenye kitabu cha maombolezo ya kifo cha msanii Steven Kanumba nyumbani kwake Sinza mjini Dar es Salaam.

KIKWETE ATIA SAINI KITABU CHA MAOMBOLEZO

RAIS Jakata Kikwete akitia saini kitabu cha maombolezo ya kifo cha msanii Steven Kanumba, nyumbani kwake, Sinza mjini Dar es Salaam juzi.

Kanumba alikuwa mtu wa watu,

KUTOKANA na kifo cha msanii Steven Kanumba, mitandao mbalimbali jana ilifurika wasomaji na wachangiaji wakitaka kujua na kujuzana mambo mbalimbali kuhusu msanii huyo, huku wengine wakifuatilia michango aliyowahi kuitoa enzi za uhai wake.
Ifuatayo ni michango yake michache katika mtandao wa twitter, ambao alipenda kuutumia kuwasiliana na watu mbalimbali wakiwemo wabunge, wanasiasa na watu wa kawaida.
Katika ukurasa wake, mtandao huo unaonyesha kuwa juzi, 'alichati' na mashabiki wake fulani, lakini mwishoni aliishia kuvituhumu vyama vyao (vya wasanii) kwa kutomsaidia mwenzao aitwaye Kajala Masanja, ambaye yupo mahabusu.
Kanumba alisema: "Wakati msanii mwenzetu Kajala yuko jela, eti TAFF na Bongo Movie hawamtambui Kajala wala hawawezi kusaidia lolote, hii roho mbaya inatoka wapi? "
Pia siku tatu zilizopita (kabla ya jana), Kanumba aliandika katika ukurasa huo akiwatuhumu mashabiki wanaopenda kumpingia simu usiku na mwisho wa siku wanakuwa hawana cha kusema zaidi ya kutaka tu kumsalimia.
Kanumba alisema: "Sometym mashabiki mnaboa sana, m2 unapiga cm ucku wa manane ukiulizwa shida? oh nilikuwa nataka kukusalimia? mchana mnakua wp? kdg mara unaringa"
Aidha siku 13 kabla ya jana, aliwatumia ujumbe mashabiki wake kupitia ukurasa huo akiwaonya dhidi ya mtu aliyekuwa akitumia jina lake katika mtandao wa Facebook akitaka atumiwe fedha, ambapo Kanumba aliandika akisema:"TAFADHALI MASHABIKI WANGU WOTE FACEBOOK KUNA MTU ANATUMIA JINA LANGU LA STEVEN KANUMBA KUOMBA PESA,PLZ MSITUME NI MWIZI".
Katika kuonyesha mapenzi yake kwa Kajala, siku 18 zilizopita, Kanumba aliandika katika mtandao huo akiwaomba mashabiki wake wamuombee msanii huyo ambaye yupo mahabusu, alisema: "Everybody plz pray for Kajala, prison is not a gud place to be."
Aidha katika blogu yake ya kanumbathegreat juzi Kanumba aliweka picha ya ndege wakiwa juu ya mbuzi na kuandika maneno yafuatayo:
Look at this pic careful. Mmoja ya vitu tulivyotofautishwa na wanyama na ndege ni akili ya kujua mema na mabaya, tizama hao ndege na huyo mbuzi hawana akili kabisa, lakini wanapendana ndio maana unaona wako pamoja, ila binadamu aliyepewa akili ana roho mbaya sana. Katika mafundisho ya YESU KRISTO alisema neno kuu nawapeni PENDANENI. Hata uwe na uwezo wa kuhamisha milima kama huna upendo ni bure, mpende jirani yako kama unavojipenda, upendo haujivuni, hauhesabu mabaya, hautakabari, hauhusudu.....nk
WAKORINTHO 13, Mungu ana akili sana kutuumba kwa mwili huu wa nyama, laiti kama angetuumba kwa vioo au sightmirror ili uweze kuona mwenzako anakuwazia nini?anakufanyia nini?anapanga nini juu yako? ungekuta ni heri ukaishi msituni na wanyama wakali kuliko kukaa na binadamu. Katika tafiti zangu nimegundua kuna dawa mbalimbali mfano ya kichwa, homa nk, lakini dawa ya chuki na roho mbaya hakuna. Kama hiki kingekuwa kipindi kama kile cha zamani za Sodoma na Gomora au cha Nuhu, ambacho Mungu alikuwa akiadhibu hapo hapo, watu wengi sana wangeumbuka hasa wale wanaojifanya wasafi usoni, lakini rohoni ni tofauti. Mungu atusaidie sana hasa sisi vijana tujue kusimama katika ukweli na uwazi, tuubebe upendo wa dhati toka rohoni huku mdomoni tukitamka amani ya kweli impendezayo Mungu ili watoto wetu waje watuenzi kwa mazuri na dunia ijivunie uwepo wetu.
Wakati wa uzinduzi wa duka la mitindo ya mavazi uliofanyika hivi karibuni, Kanumba aliandika maneno yafuatayo kupitia kwenye blogu yake: TULIOSAPOTI MPAKA KITUO HIKI KUFIKIA HAPA KILIPO SOMA MAJINA HAPO JUU JINA LANGU LIPO HAPO. KUSEMA UKWELI INAPOKUJA MAMBO YA KUSAIDIA JAMII, NAJITAIDI KUTOA NINACHOKUA NACHO MAANA HAPA HUKUMBUKA MANENO YA MWANDISHI ALBERT PINE: "What we do for ourselves dies with us. What we do for others and the world remains and is immortal."
Siku chache zilizopita, Kanumba alionekana kukerwa na taarifa zilizoripotiwa na gazeti moja la udaku zikimkariri kusema maneno, ambayo hakuyasema. Aliandika hivi kwenye blogu yake:TAFADHALI SANA SIJASEMA MANENO HAYO WALA SIJAHOJIWA LOLOTE KUHUSU HUO MTAFUTANO,SASA HIYO NUKUU IMETOKA WAPI??VIJANA WENZANGU EBU TUJIFUNZE KUSIMAMA KTK UKWELI MAANA HATA MUNGU HAPENDEZWI NA UONGO.
MASHABIKI WAMLILIAKatika ukurasa wake facebook, mashabiki na rafiki zake walifurika kutuma salamu zao na hizi ni chache kati ya nyingi zilizoko katika ukurasa huo.
Peris Mamadi Ratemo: "Its hard to take it!May ur soul rest in peace!We av every reason to celebrate u!"
Jane Kati: "REST IN PEACE KANUMBA"
Gayle Gabriel: rest in peace Kanumba Steve, every year I celebrate my daughter's birthday, I will remember u because u share birthday with my daughter"
Fatma Binti Mrisho Watuta: "Hata nimekosa la kusema.. ila kwa Mola tunatoka na marejeo ni kwake pia"
Kudra Makunzo: "R.I.P Kanumba Steve, Tanzanians love u, but God loves u more"
Ezekiel Simon Munge: "R.I.P The great one Steve Kanumba!"
Mary Maganga: "Gone too soon! R.I.P Kanumba,you'll be missed by many."
Joyce Joseph Mollel: "Gone to soon...! RIP Steve Kanumba!"
Johnson Mkubwa Super: Kanumba tunaku miss tungekua na uwezo ungeludi tunakupenda ila mungu amekupenda zaidi yetu sawa uende salama tunajisikia vibaya huku nchini Canada" Nigaze Perfect: "We are and for alway miss you Kanumba, rest in peace my friend."
Sophie Kessy: "R.I.P Stevin Kanumba Nyota ya filamu iliyozimika ghafla tutakukumbuka daima we will miss you Kanumba."
Malikia Hapi Kichuna: "R.I.P ua gone 2 soon"
Katika ukurasa huo, nyota huyo alikuwa na marafiki aliowasajili 3,693 huku kukiwa na picha 619 zinazoonyesha mambo na matukio mbalimbali yanayomhusu.

KIFO CHA KANUMBA NI PIGO KUBWA-WASANII

VICENT KIGOSI RAY

WILLIAM MTITU

SANDRA

STEVE NYERERE

MONALISA

CLOUD

IRENE UWOYA

WASANII mbalimbali wa fani ya filamu nchini wameelezea hisia zao kutokana na kifo cha msanii mwenzao, Steven Kanumba kilichotokea usiku wa kuamkia jana nyumbani kwake Sinza, Dar es Salaam.
Baadhi ya wasanii hao wamesema kifo cha Kanumba kimeacha pigo kubwa katika tasnia ya filamu nchini na kwamba si rahisi pengo lake kuzibika. Zifuatazo ni kauli zilizotolewa na baadhi ya wasanii.
VICENT KIGOSI ‘RAY’

Kanumba alikuwa mtu aliyependa kupambana ili kutimiza ndoto na tulianza kupendana tangu tukiwa hatuna pesa (wakipanda daladala) hadi tulipoachana na usafiri huo wa umma kwa kuanza kutumia magari binafsi.
Baada ya kupata taarifa za kifo cha Kanumba, nilifika nyumbani kwake na kujitahidi kutaka kujua kilichomsibu rafiki yangu kwa kumshika na kumtikisa bila mafanikio.
Nilipofika nilianza kumuita, nikamshika mkono na kumtikisa tikisa, lakini hakuna nilichofanikiwa. Kanumba alikuwa amefariki dunia.
Mimi na Kanumba tulikuwa na mashindano. Yeye akifanya hiki, mimi nafanya kile, lakini hivyo ndivyo ilivyo maana hata tulipoanza na filamu ya Johari, tulikuwa watu wa kawaida sana.
Kimsingi Kanumba hakupenda tu aonekane yeye, lakini alitaka na wengine wafahamike na zaidi alijitahidi sana kuitangaza Tanzania duniani.
Ingekuwa vipi hata bendera ya nchi ingepepea nusu mlingoti kwa sababu ya Kanumba maana ameitangaza sana nchi yetu huko nje, kiasi kwamba hakuna wasikomjua-kaenda Uingereza, Nigeria, Kongo, Uganda, Marekani na sehemu nyingi tu akitangaza sanaa hii na jina la Tanzania.
Urafiki wetu ulifika mahali tukawa kama ndugu, lakini zaidi ulikuwa wa (urafiki) wa kimashindano zaidi mathalan, yeye alipomleta Ramsey Noah (nyota wa filamu wa Nigeria), mimi nilikuwa nafikiria kumleta nyota mmoja wa Ghana. Pia viwanja vyetu tumenunua jirani jirani huko Mbezi Mpiji na tulipanga kuanza kujenga pamoja.
STEVE NYERERE

Kanumba alikuwa tegemeo langu kubwa katika sanaa na ni yeye pamoja na Ray (Vincet Kigosi) walinipa wazo la kucheza filamu, nikaamua kuanza na Mr. President. Hata juzi, mimi na Ray tulikuwa naye pale Club Maisha, ambapo yeye alikuwa juu anakunywa bia zake na sisi tulikuwa chini na Twanga Pepeta ilikuwa inatumbuiza pale.
Kama asingekuwa Kanumba, mimi nisingekuwa na maisha niliyo nayo, hata gari nililonalo nisingelipata maana ni yeye na Ray ndio walionisaidia kufika hapa nilipo.
ISSA MUSSA 'CLOUD’

Naweza kumueleza Kanumba kwamba alikuwa msanii mbunifu, aliyependa kujituma na kila unakokwenda, ilikuwa lazima kumkuta. Hakuchagua sana maishani mwake, iwe kwenye 'fasheni shoo', muziki au kokote, lazima utaikuta sura yake. Hali hiyo inaonyesha alikuwa mtu wa aina gani.
Sisi wasanii wa filamu tumepata pigo, lakini sio letu pia la Watanzania na Waafrika kwa ujumla. Kwa upande wa wasanii, pigo hili linatukumbukusha wenzetu wa Bongo Fleva walivyompoteza Mtoto wa Dandu (James Ndandu). Sina zaidi ila tunapaswa kumuombea Kanumba maana safari yake ameimaliza na alichotuachia ndicho tunachopaswa kuiga.
WILLIAM MTITU

Nilipata taarifa kama saa sita hivi (usiku), nikaenda pale (nyumbani kwa Kanumba) nikamkuta Ray na wasanii wengi, lakini Kanumba alikuwa amelala macho yake yako juu.
Nilisikitika sana na bado nasikitika kwa hakika siamini mpaka sasa. Kumbuka Kanumba ni msanii mkubwa, kafanya kazi nyingi nzuri hata tulipofika Muhimbili tulikuwa watu wengi wamefika pale.
(Baadhi ya) manesi na madaktari walishindwa kufanya kazi wakaja pale mochwari kushuhudia, wasanii wa muziki na watu wengine wengi tu. Tukio lilikuwa la kusikitisha sana, Kanumba alikuwa amevaa pensi yake, amechana nywele. Jambo la kusikitisha zaidi ni kwamba Kanumba hajaacha familia.
IVON SHERRY ‘MONALISA’

Kanumba alikuwa mmoja wa rafiki zangu wa karibu. Nimeumia sana. Nitaadhirika. Tulishaanza kufanya kazi za nje za kimataifa na tulitakiwa tukafanye filamu Ghana mwaka huu.
MOHAMED FRANK

Wakati tunaanza Kaole Sanaa Group mwaka 2002-2003, Kanumba alikuwa rafiki yangu wa karibu alipofanikiwa, hakuwasahau wasanii wenzake.
Nilipopata taarifa ya kifo chake sikuamini. Nilimwambia Dino, mbona siku ya wajinga imeshapita. Sikuamini kwa sababu siku moja niliwahi kupokea ujumbe ukisema Tino amefariki wakati si kweli. Dino akanisisitizia kwamba Kanumba amefariki. Ilinibidi nifunge safari moja huo huo hadi nyumbani kwake Sinza.
Kanumba atabaki kuwa Kanumba. Kifo chake ni pigo kubwa. Hakuna msanii anayeweza kuziba pengo lake. Tunapaswa kumshukuru Mungu. Siku zake za kuishi hapa duniani zimefikia mwisho.
Ameondoka akiwa kijana mdogo sana. Umri wake ni miaka 28. Ni juzi juzi tu alitengeneza filamu inayoitwa Ndoa yangu. Sijui alitaka kueleza nini katika filamu hiyo. Ni kama drama, lakini ndio ukweli wenyewe.
SANDRA

Kanumba alikuwa rafiki yangu sana. Tulipokuwa Kaole, alizoea sana kunitania. Siku moja aliniambia ‘Dada Sandra, nampenda sana yule mwanamke (msanii mwenzao), lakini naogopa kumwambia kwa sababu sina pesa.’ Alikuwa mtu wa utani sana.
ADAM SWEBE

Tumempoteza mtu aliyefanya mambo makubwa na ambayo hayawezi kusahaulika katika tasnia ya filamu. Na bado alikuwa na ndoto ya kufanya mambo mengi zaidi. Kifo chake ni pigo kubwa kwa tasnia ya filamu.
THEA

Huu ni msiba mkubwa na umetushua. Najiuliza kwa nini Kanumba.
IRENE UWOYA

Siwezi kumsahau Kanumba katika maisha yangu. Amenisaidia sana katika fani ya filamu. Kifo chake ni pigo kubwa sana kwangu na watanzania wote. Tumempoteza mtu muhimu.
UGONE MPHEHO

Ulikuwa mtu mbele ya watu, Ukajivika tabasamu cheko na bashasha,Ulikuwa wa mwanzo na jemadari, Kuona mbele na safari kuongoza,Ulikuwa wa mwisho kununa, Ulipokisimangwa kwa kero na ujuvi,Wewe ulishika panga, ukaingia mwituni na njia kutupasulia!Eh jiti kuu la mwituni, ndege wema na wabaya watamiapo,Eh mzizi ulotambaa, ukagusa nyika na bahari kwa pamoja,Eh mbuyu wa thamani, dawa poa na sumu kali zote zipo,Eh wimbo wa pozeo, jua la kuchea na na mwezi wa kuchwea.Nikwambe nini jabali, ulobeba tasnia,Nikusifuje kwa hili, mbinguni wakasikia,Leo dunia hulali, Pepo yakutazamia,

BURIANI STEVEN KANUMBA

NI pigo kubwa na zito. Si kwa familia ya marehemu Steven Kanumba pekee, bali hata kwa wasanii wa fani ya filamu nchini pamoja na mashabiki wa fani hiyo katika nchi za ukanda wa Afrika Mashariki na Kati.
Ni vigumu kuelezea namna kila mtu anayemfahamu Kanumba alivyopokea na kuguswa na taarifa za kifo chake. Wapo walioamini, lakini wengine waliona kama ni ndoto. Wengine walidhani taarifa hizo ni za uzushi.
Kwa wengine, taarifa za kifo cha Kanumba zilionekana kama vile ni za utani. Hawakuamini. Wapo waliopiga simu huku na kule kutaka uthibitisho na wengine walifunga safari hadi nyumbani kwake Sinza, Dar es Salaam.
Taarifa za kifo cha Kanumba zilianza kusambaa saa tisa usiku wa kuakia jana. Kila aliyepata taarifa hizo naye alimtaarifu mwenzake. Baada ya saa chache, asilimia kubwa ya wakazi wa Jiji la Dar es Salaam wakawa wamepata taarifa hizo, hasa baada ya kuanza kutangazwa na vituo mbalimbali vya redio na televisheni nchini.
Kanumba (28) alifariki dunia nyumbani kwake Sinza baada ya kudondoka na kujibamiza sakafuni akiwa chumbani kwake. Tukio hilo lilitokea baada ya kuzozana na mpenzi wake, Elizabeth Michael ‘Lulu’.
Kwa mujibu wa kamanda wa polisi mkoa wa Kinondoni, Charles Kenyela, kulijitokeza hali ya kutokuelewana kati ya Kanumba na Lulu na kusababisha wagombane. Inasemekana Lulu alimsukuma Kanumba na kugonga kichwa chake chini.
Habari ambazo hazijathibitishwa zimeeleza kuwa, Kanumba alikuwa akioga ili watoke matembezini ndipo alipomsikia Lulu akiongea kwa simu na mtu mwingine na alipotoka kumuuliza, ndipo mzozo kati yao ukaanza.
Mdogo wa Kanumba, ambaye alikuwepo nyumbani usiku huo, Seti alithibitisha kutokea kwa majibizano kati ya kaka yake na Lulu na kuongeza kuwa, binti huyo ndiye aliyempa taarifa za Kanumba kuanguka chumbani kwake.
Seti alisema baada ya kuingia chumbani kwa Kanumba, alimkuta amedondoka sakafuni huku povu likimtoka mdomoni na baadaye wakabaini kwamba alishakata roho. Lulu, ambaye alitoweka nyumbani hapo kutokana na kuchanganyikiwa, anashikiliwa na polisi kwa ajili ya uchunguzi.
Hivyo ndivyo mauti yalivyomkuta Kanumba. Ametangulia kule ambako binadamu wote lazima watafika, lakini kila mmoja kwa siku na muda wake.
Ni kweli kwamba mauti huugeuza mwili wa binadamu ukawa vumbi, lakini yale mema aliyoyafanya hapa duniani yatabaki kuwa kumbukumbu kwa miaka mingi ijayo.
Wasanii wengi wa filamu wameelezea kuguswa mno na kifo cha Kanumba kwa sababu alikuwa mfano wa kuigwa kwao kutokana na mafanikio makubwa aliyoyapata kiusanii katika kipindi kifupi cha maisha yake.
Kwa mashabiki wa filamu za kibongo, Kanumba alikuwa ni namba moja na kwa kiasi kikubwa aliweza kuweka viwango kwani alikuwa anafaa kwa kila kona kuanzia kuigiza mpaka kuvaa.
Kanumba alikuwa akiishi maisha tofauti na wasanii wenzake hivyo kuwavutia watu wa rika zote. Amemaliza kipindi chake cha miaka 28 akiwa ameacha kumbukumbu ambayo itaishi kwa muda mrefu.
Kanumbaa alizaliwa Januari 8, 1984 mkoani Shinyanga. Alipata elimu ya msingi katika shule ya Bugoyi na baadaye sekondari ya Mwadui, kabla ya kuhamia Dar Christian Seminary.
Baada ya kumaliza kidato cha nne Dar Christian, Kanumba alijiunga na sekondari ya Jitegemee, Dar es Salaam kwa ajili ya masomo ya kidato cha tano na sita. Ni wakati huo akiwa Jitegemee, Kanumba alianza shughuli za sanaa katika kundi la Kaole Sanaa Group la Magomeni, Dar es Salaam. Alishiriki kucheza tamthilia nyingi za kundi hilo zilizokuwa zikirushwa hewani na kituo cha televisheni cha ITV kama vileTufani, Gharika, Baragumu na Sikitiko Langu.
Baada ya kukomaa Kaole, Kanumba aliamua kuanzisha kampuni yake mwenyewe ya filamu na hadi anakutwa na umauti, alikuwa mwigizaji anayefahamika Afrika nzima. Baadhi ya filamu alizotunga na kuzicheza na kumpatia umaarufu mkubwa ni pamoja na Haviliki, Dangerous Desire, She is My Sister, Dar 2 Lagos, Cross my Sin, Village Pastor, Family Tears, Johari, Riziki, Deception, The Shock, Uncle JJ, Off Side, More than Pain, Young Billionaire, This is it, Moses, Devil Kingdoma, Because of you na Big Daddy.
Marehemu Kanumba pia aliwahi kushirikiana na baadhi ya wasanii maarufu wa Nigeria kucheza filamu zake. Miongoni mwa wasanii hao ni Ramsey Nouah, Mercy Johnson, Emmanuel France na Nkiru Silvanus.
Enzi za uhai wake, Kanumba aliwahi kushinda tuzo nyingi za filamu ikiwa ni pamoja na mwigizaji bora mwaka 2006 na 2007 na msanii bora wa mwaka 2007 na 2008.
Kanumba hakuwa tu mwigizaji na mtayarishaji maarufu wa filamu. Hivi karibuni aliteuliwa kuwa balozi wa Oxfam Grow kwa Tanzania.
Baadhi ya watu, ambao Kanumba alikuwa akiwataja mara kwa mara na kuwashukuru kutokana na mafanikio aliyoyapata ni pamoja na Chrissant Mhengga, Sharifa Kalala, Mtitu, Sanura Hussein, Vicent Kigosi na wasanii wa kundi la Kaole.
Kanumba atakumbukwa na wengi sana kwa ucheshi wake, upole na ushirikiano mzuri na wenzake katika kazi. Kifo cha Kanumba ni pigo katika tasnia ya filamu Tanzania. Taifa limempoteza mtu ambaye alikwishaanza kuitangaza vema nchi kupitia sanaa hiyo na ambaye angetarajiwa kuitangaza zaidi katika anga za kimataifa kupitia sanaa hii. Wanigeria kwa sasa wanaijua Tanzania kupitia filamu. Vivyo hivyo kwa nchi ya Ghana, ambako Kanumba alikwenda kucheza filamu mwaka jana akiwa na Monalisa.
Nchi nyingi za Afrika zinaijua Tanzania hivi sasa kupitia fani ya filamu na hii ni kutokana na kazi nzuri ya Kanumba. Mwenyewe aliwahi kukaririwa akisema kuwa ndoto yake ni kucheza filamu za Hollywood, ambako aliwahi kutembelea mwaka jana.
Buriani Kanumba. Kifo chako kimeacha pengo kubwa katika tasnia ya filamu. Tunamuomba Mwenyezi Mungu aipumzishe roho yako mahali pema.

KASEJA: Hatutishiki na vitimbi vyao

NAHODHA wa Simba, Juma Kaseja, amesema vitimbi wanavyofanyiwa na wenyeji
havitawafanya wapunguze ari ya kushinda pambano lao dhidi ya Setif kesho.
Akizungumza na tovuti ya Simba, Kaseja alisema wametazama kwa makini matukio
mbalimbali yanayofanywa na wenyeji wao na wamebaini yako mambo ambayo lengo
lake ni kuwaondoa mchezoni.
“Hebu fikiria, watu wanataka kutusafirisha kwa basi kwa masaa sita wakati wanajua
kanuni ni masaa mawili tu. Halafu, badala ya kutusafirisha hadi mji wa Setif
tulipocheza, wao wametupeleka kwanza mji mwingine na halafu wakatusafirisha kwa
basi kuja Setif. Hizi ni mbinu zao lakini tunazijua,” alisema.
Kaseja alikuwa miongoni mwa wachezaji wa Simba walioitoa Zamalek ya Misri katika
michuano ya Ligi ya Mabingwa Afrika miaka kumi iliyopita na anasema hakuna cha
ajabu iwapo timu yake itaitoa Setif.
“Katika uzoefu wangu wa soka, timu pekee ya kiarabu ambayo ilitutendea vema
ilikuwa ni Harass Al Hadoud ya Misri miaka miwili iliyopita. Lakini hawa walikuwa wema
kwa sababu walikuwa wametufunga katika mechi ya kwanza na hivyo hawakuwa na
wasiwasi.
“Ukiona Waarabu wanakufanyia vitimbi ujue wana wasiwasi na wewe. Kama hawana
hofu, watakupa kila unachohitaji. Nashukuru kwamba tuna wachezaji wazoefu wa
kutosha wanaoweza kupambana na lolote,” alisema.

Wakati huo huo, Simba kesho inashuka kwenye Uwanja wa Mei 8, 1945, jijini Setif, Algeria; uwanja ambao una historia ya kipekee nchini humu.
Tarehe 8, Mei mwaka 1945, majeshi ya Ufaransa iliyokuwa ikiikalia kimabavu Algeria
yaliua wananchi kati ya 6,000 hadi 45,000 wa Setif katika mapambano yaliyofanyika
mjini humo.
Uwanja huo wenye uwezo wa kubeba watu 30,000 ulibadilishwa jina wakati huo na
kupewa jina hilo la tarehe –kwa kifaransa Stade Mai 8 1945, kwa heshima ya watu
waliopoteza maisha siku hiyo.
Mauaji hayo ndiyo yaliyosababisha timu ya Setif kubadili rangi ya jezi zake kutoka
nyeupe na kijani na kuwa nyeusi na kijani –nyeusi ikiwa na maana ya kuomboleza
maelfu hayo ya watu waliouawa siku hiyo.

MILOVAN: Hali ya hewa haiwezi kutuathiri

KOCHA Mkuu wa Simba, Milovan Cirkovic, amesema hali ya hewa ya mji wa Setif
ambayo ni baridi kali inaweza kuwa faida kwa timu yake na si hasara.
Akizungumza na tovuti ya Simba, Milovan alisema hali ya hewa ya baridi huwafanya
wachezaji wasichoke mapema tofauti na joto ambalo huchosha.
Kuna baridi za aina mbili. Kuna baridi inayotokana na hali ya hewa ya mahali na kuna
baridi inayotokana na eneo kuwa kwenye miinuko (altitude). Zote ni baridi lakini zina
tofauti.
“Ile ya miinuko huwafanya wachezaji washindwe kupumua vizuri na huwa na athari
mbaya sana. Tuliliona hili kwenye mechi ya Kiyovu lakini hapa Setif hakuna miinuko
sana kama Rwanda na hivyo wachezaji wanaweza kucheza vizuri,” alisema.
Alisema jambo la muhimu kwa timu yake ni kutoathiriwa na sauti za washangiliaji wa
Setif wala kughadhabika kirahisi wanapochokozwa na wapinzani wao.
“Mechi yetu na Setif ni ngumu sana. Kila timu ina nafasi ya kufanya vizuri ingawa sisi
tuna faida kutokana na ushindi tulioupata nyumbani. Ni jukumu letu kuhakikisha
tunaulinda ushindi wetu,” alisema.

TFF yalaani mauaji ya bosi wa FA Somalia

Rais wa Shirikisho la Mpira wa Miguu Tanzania (TFF), Leodegar Tenga amepokea kwa masikitiko taarifa za shambulizi la kigaidi lililofanywa jana asubuhi (Aprili 4 mwaka huu) jijini Mogadishu, Somalia na kupoteza maisha ya Mwenyekiti wa Shirikisho la Mpira wa Miguu Somalia (SFF), Said Mohamed Nur.

Kwa niaba ya TFF na wadau wa mpira wa miguu Tanzania anatuma salamu za rambirambi kwa Makamu Mwenyekiti wa SFF, Ali Said Ghuled kutokana na kifo hicho cha ghafla cha shambulizi la bomu cha Nur ambaye pia alikuwa mjumbe wa Kamati ya Utendaji ya Baraza la Vyama vya Mpira wa Miguu Afrika Mashariki na Kati (CECAFA).

Amesema Nur alishiriki kikamilifu katika kujenga maisha ya wananchi wa Somalia kwa kupitia mpira wa miguu, hivyo analaani kwa nguvu vitendo vya kigaidi ambavyo pia vimepoteza maisha ya watu wengine katika tukio hilo.

Kwa kipindi chote cha maisha yake, Nur ameutumikia mpira wa miguu katika ngazi tofauti nchini kwake na ukanda huu wa CECAFA, hivyo kifo chake ni pigo kwa Tanzania, na daima itaendelea kukumbuka mchango wake katika mchezo wa mpira wa miguu.

Rais Tenga amesema TFF iko pamoja na familia ya Marehemu katika kuomboleza msiba huu mzito na kuwataka wawe na uvumilivu na nguvu katika kipindi hiki cha majonzi makubwa kwao.

Kwa mechi zote za TFF zitakazochezwa katika kipindi cha siku 7 zijazo kutakuwa na dakika moja ya kusimama kimya kwa ajili ya kuomboleza msiba huo. Mungu aiweke roho ya marehemu mahali pema. Amina.

Wachezaji Yanga wapunguziwa adhabu

Kamati ya Nidhamu ya Shirikisho la Mpira wa Miguu Tanzania (TFF) imesikitishwa na
vitendo vilivyofanywa na baadhi ya wachezaji wa Yanga katika mchezo namba 132 wa
Ligi Kuu ya Vodacom kati ya timu yao na Azam uliofanyika Machi 10 mwaka huu.

Vilevile imesikitishwa na uongozi wa klabu ya Yanga kushindwa kuvikemea hadharani
vitendo hivyo vilivyofanywa na wachezaji wake.

Kamati hiyo ilikutana jana (Aprili 4 mwaka huu) chini ya Mwenyekiti wake Kamishna
mstaafu wa Polisi, Alfred Tibaigana kujadili rufani iliyowasilishwa mbele yake na Yanga
kupinga uamuzi uliofanywa na Kamati ya Ligi ya TFF dhidi ya wachezaji hao.

Mbele ya Kamati hiyo, Yanga ilikuwa na rufani mbili. Rufani ya kwanza ya Machi 11
mwaka huu iliomba matokeo ya mchezo huo yafutwe, ikiwemo kadi walizooneshwa
wachezaji wao na mwamuzi aadhibiwe kwa kushindwa kumudu mchezo huo.

Wakati ikifanya mawasilisho (submissions) mbele ya Kamati, Yanga iliamua kuondoa
rufani hiyo kwa vile katika ya pili iliyokatwa Machi 14 mwaka huu ikipinga adhabu
zilizotolewa ina kifungu (j) kilichodai Kamati ya Ligi ya TFF ilikosea kutotoa uamuzi
wowote kwa refa aliyedaiwa kutoa maneno ya kashfa na kejeli kwa wachezaji wao.

Baada ya kusikiliza submissions za pande zote mbili (walalamikaji- Yanga) ambao
walikiri hatia ya vitendo hivyo na kuomba wachezaji wake wapunguziwe adhabu, na
(walalamikiwa- TFF), Kamati imetoa uamuzi ufuatao;

Mchezaji Nurdin Bakari amepewa adhabu ya kutocheza mechi tatu za ligi na faini ya
sh. milioni moja. Omega Seme amepewa adhabu ya kutocheza mechi tatu na faini ya
sh. milioni moja.

Nadir Haroub atatumikia adhabu ya kukosa mechi tatu na faini ya sh. 500,000 kwa mujibu wa Kanuni ya 25(c) ambayo haikatiwi rufani.

Lakini Kamati ya Nidhamu imeondoa adhabu ya mechi nyingine tatu iliyotolewa na Kamati ya Ligi ya TFF kwa vile hizo atazitumikia kwa pamoja, lakini adhabu ya faini ya sh. 500,000 inabaki, hivyo atalipa jumla ya sh. milioni moja.

Stephano Mwasika ambaye alifungiwa mwaka mmoja na faini ya sh. milioni moja,
adhabu yake imebadilishwa na sasa atakosa mechi zilizobaki za msimu wa ligi
2011/2012, lakini faini imeongezwa na kuwa sh. milioni mbili.

Kwa upande wa Jerryson Tegete aliyefungiwa miezi sita na faini ya sh. 500,000,
adhabu yake imebadilishwa na sasa atakosa mechi zilizobaki za ligi msimu huu
(2011/2012), lakini faini imeongezwa na kuwa sh. milioni mbili. Adhabu ya Yanga kupigwa faini ya sh. 500,000 kutokana na vurugu za washabiki wake inabaki kama ilivyo kwa mujibu wa Kanuni ya 32(1).

Vilevile adhabu ya faini ya sh. 500,000 kutokana na timu hiyo kupata kadi tano na kuendelea kwenye mechi moja inabaki kama ilivyo vile kanuni ya 25(1) haikatiwi rufani. Kamati imesema adhabu zimeanza kutumika tangu zilipotolewa na Kamati ya Ligi, hivyo kwa ambapo tayari wameshatumikia mechi kadhaa zinahesabika.

Kwa watakaoshindwa kulipa faini wataendelea kuwa nje ya uwanja mpaka fedha hizo zitakapolipwa.

Mwenyekiti Tibaigana amewataka viongozi wa Yanga kusimamia nidhamu ya wachezaji wao, na makosa hayo yakijirudia adhabu kali zaidi zitatolewa. Pia Kamati ya Nidhamu ya TFF haikujadili suala la Yanga kunyang’anywa pointi tatu katika mchezo kati yake na Coastal Union kwa vile hakukuwa na rufani hiyo mbele yake.

KABURU: Lazima tuishinde ES Setif

KIKOSI cha timu ya soka ya Simba kiliondoka nchini Jumatatu iliyopita kwenda Algeria kwa ajili ya mechi ya marudiano ya michuano ya Kombe la Shirikisho dhidi ya ES Setif ya huko inayotarajiwa kuchezwa kesho mjini Setif. Katika makala hii ya ana kwa ana iliyoandikwa na Mwandishi Wetu, ATHANAS KAZIGE, Makamu Mwenyekiti wa Simba, Geofrey Nyange ‘Kaburu’ anaelezea mikakati na matumaini yao katika mechi hiyo.
SWALI: Kikosi chenu kimeshaondoka nchini kwenda Algeria kwa ajili ya mechi yenu ya marudiano dhidi ya ES Setif, itakayochezwa Ijumaa. Mmejipanga vipi kuhakikisha kuwa mnashinda mechi hiyo?
JIBU: Tumejipanga vizuri. Kwanza kabisa viongozi tumefanya kazi yetu ya utawala kwa umakini mkubwa na kila kitu kuhusu Simba kwenda Algeria kimekwenda vizuri.
Unajua safari ni hatua, hivyo tumejipanga kwenda katika vita ya marudiano, ambayo tuna hakika itakuwa ngumu kwetu kwa vile wapinzani wetu hawatakuwa tayari kufungwa nyumbani kwao tena mbele ya mashabiki wao.
Pamoja na ukweli huo, sisi kama viongozi tulishawasiliana na ubalozi wa Tanzania uliopo Algeria kwa ajili ya kuweka mazingira mazuri na tayari baadhi ya viongozi wetu wa kamati ya ufundi walishatangulia huko.
SWALI: Nimemsikia mwenyekiti wenu Ismail Aden Rage akisema kwamba, wapo baadhi ya Watanzania wanaoishi nchini Algeria, ambao wameahidi kuwashangilia kwa nguvu zote wakati wa mechi hiyo. Je, taarifa hizo ni za kweli?
JIBU: Habari hizo ni za kweli. Wapo watanzania wengi kule Algeria, ambao wameahidi kutuunga mkono. Kwa maana hiyo, Simba itakwenda Algeria ikiwa haina wasiwasi wa kukosa kuungwa mkono.
Kule Algeria wapo wanafunzi wengi kutoka hapa nchini, ambao wamekwenda huko kusoma katika vyuo mbalimbali. Watanzania hao ndio waliotuahidi kutuunga mkono katika mechi hiyo.
SWALI: Mmepanga kusimama kwa muda Misri kwa ajili ya kujipanga kabla ya kwenda Algeria. Lengo lenu ni lipi hasa ?
JBU: Tumeamua kusimama Misri kwa muda kwa ajili ya kufanya mazoezi angalau kwa siku moja na kisha siku inayofuata, tutaondoka kwenda Algeria. Sababu hasa ya kusimama kwa muda Misri ni kutaka kuzoea hali ya hewa ya huko, ambayo inafanana na ile ya Algeria.
Nina hakika wachezaji wetu wataweza kuizoea hali hiyo ya hewa haraka ili waweze kukabiliana vyema na wapinzani wenu. Tumefanya hivyo kwa sababu tulipata tabu sana tulipokwenda Rwanda kucheza na Kiyovu katika mechi ya raundi ya kwanza.
SWALI: Kuna wakati Rage alitoa ahadi ya kuwashonea suti wachezaji wote wa Simba. Je, ameshatimiza ahadi hiyo kabla ya timu kuondoka kwenda Algeria?
JIBU: Ni kweli, tayari wachezaji wetu wote pamoja na viongozi wa benchi la ufundi wameshapata suti hizo na walizivaa siku walipoondoka kwenda Algeria.
Lengo la uongozi kuwanunulia suti wachezaji ni kuipa timu heshima yetu kama ilivyokuwa miaka ya nyuma. Klabu zetu zinapaswa kubadilika hivi sasa kwa kwenda na wakati. Tunapaswa kuwavalisha wachezaji wetu nguo za heshima ili waonekane kuwa na thamani mbele ya watu.
Tumepanga kuendelea kufanya mambo makubwa zaidi katika mechi zetu zijazo na hilo litaonekana hapo baadaye. Tunataka wachezaji wetu waweze kujitambua kwamba wapo kwenye klabu kubwa, ambayo inahitaji kuheshimiwa, si kimchezo tu, bali hata kwa mavazi.
SWALI: Kuna ahadi yoyote mliyotoa kwa wachezaji wenu ili kuwahamasisha waweze kushinda mechi hiyo?
JIBU: Ahadi ya zawadi ipo, lakini hiyo ni siri ya klabu, hatuwezi kuitangaza kwa vile ni mambo ya ndani ya klabu yetu ya Simba.
SWALI: Nini maoni yako kuhusu mwenendo wa michuano ya ligi kuu ya Tanzania Bara, ambayo kwa sasa inaelekea ukingoni?
JIBU: Ligi ya msimu huu ni ngumu ndio sababu hadi sasa hakuna timu yenye uhakika wa kuibuka na ubingwa. Ushindani bado ni mkubwa kwa timu tatu za kwanza na yoyote itakayoshinda mechi zilizosalia, inaweza kutwaa ubingwa.
Pengine jambo la msingi ningependa kuwaomba waamuzi wa ligi hiyo waheshimu na kuzingatia sheria 17 za soka ili washindi waweze kupatikana kutokana na uwezo wao uwanjani badala ya kubebwa.
SWALI: Unauelezeaje ushindani uliopo kati yenu, Yanga na Azam katika kuwania ubingwa?
JIBU: Kwa maoni yangu, naweza kusema kwamba mchuano ni mkali na tunaendelea kupambana ili kuhakikisha tunaivua ubingwa Yanga. Hilo linawezekana kwa vile ndani ya kikosi chetu kuna ushirikiano mkubwa kati ya wachezaji, viongozi na benchi la ufundi.

Kiongozi T-Motto akiti Mzee Yussuf ni kiboko

MKURUGENZI wa kundi la muziki wa taarab la Tanzania Motto,Amini Salmini Amour amekiri kuwa, kundi la Jahazi kwa sasa liko juu na kazi zake zinapendwa na mashabiki wengi.
Amini amesema pia kuwa, nyota ya kiongozi wa kundi hilo, Mzee Yussuf 'Mfalme' inaendelea kung'ara katika medani ya muziki wa taarab na anamuheshimu.
Kiongozi huyo wa Tanzania Motto alisema hayo wiki hii mjini Dar es Salaam alipokuwa akizungumza na Burudani kuhusu maendeleo ya taarab nchini.
“Jahazi ni kundi lililoleta mabadiliko makubwa katika muziki wa taarab hapa nchini na Yussuf ni muimbaji hodari, mbunifu na mwenye kuona mbali, hakuna kundi au mwimbaji anayeweza kumfikia kwa sasa,”alisema.
Amini alisema binafsi anakiri kwamba Yussuf yupo juu kimuziki na kundi lake litaendelea kutamba kwa muda mrefu bila kuwa na mpinzani.
Akizungumzia kundi lake la Tanzania Motto, Amini alisema limeanza kujipanga upya baada ya kuanza kwa kusuasua mwishoni mwa mwaka jana.

Waamuzi wanne wafungiwa Z'bar

Na Aboud Mahmoud, Zanzibar
WAAMUZI wanne wa soka wamefungiwa kuchezesha mechi za michuano mbalimbali ya ligi za Zanzibar kwa muda wa mwaka mmoja kwa makosa ya utovu wa nidhamu.
Waliokumbwa na adhabu hiyo ni pamoja na Ramadhani Ibada Kibo na Mgaza Kinduli wanaotambuliwa na Shirikisho la Soka la Dunia (FIFA). Wengine ni Remtullah Ali na Mohammed Kassim.
Adhabu hizo zilitangazwa juzi na Ofisa Habari wa Chama cha Soka cha Zanzibar (ZFA), Munir Zakaria alipokuwa akizungumza na waandishi wa habari mjini hapa.
Munir alisema ZFA imefikia uamuzi huo baada ya kubaini kuwa, waamuzi hao wamekuwa wakijihusisha na vitendo vya utovu wa nidhamu.
“Baada ya kuziadhibu klabu pamoja na wachezaji, tumebaini kuwa baadhi ya waamuzi nao wamekuwa chanzo cha vurugu michezoni, hivyo tumechukua uamuzi wa kuwasimamisha,”alisema.
Ofisa huyo alisema wameamua kutoa adhabu kali kwa waamuzi hao ili liwe fundisho kwa wengine, wanaojihusisha na vitendo hivyo.
Alisema ZFA imetoa onyo kwa waamuzi wengine wanaochezesha ligi mbalimbali, kuheshimu sheria 17 za mchezo huo, vinginevyo nao watakumbwa na fagio la chuma.
“ZFA imechoshwa na vitendo vya vurugu vinavyotokea katika mechi mbalimbali za ligi, hivyo inatoa onyo kwa waamuzi wazingatie sheria 17 za soka,”alisema.

Afande Sele akana kuwa na bifu na Chidi Benzi

MSANII nyota wa muziki wa kizazi kipya nchini, Selemani Msindi ‘Afande Sele’ amesema hana ugomvi na kiongozi wa kundi la La Familia, Chidi Benzi.
Afande Sele alisema mjini Dar es Salaam wiki hii kuwa, kilichotokea kati yake na Chidi Benzi ni mambo ya kawaida katika jamii, lakini alisisitiza kuwa bado wao ni marafiki.
Msanii huyo alielezea msimamo wake huo baada ya kutokea hali ya kutokuelewana kati yao, kufuatia Afande Sele kumponda msanii Ditto wa Watu Pori aliyejiunga na La Familia.
Afande Sele alikaririwa na kituo cha Radio cha East Africa akisema kuwa, uamuzi wa Ditto kujiunga na La Familia ni sawa na mchezaji wa Manchester United kujiunga na Bolton.
“Malumbano yanayoendelea kati yetu si mazuri, ni mambo ya kupita,sina bifu naye. Nipo tayari kurekodi naye wakati wowote na yeye anajua hilo, alishaniambia kitambo. Nasubiri wimbo wake hata kesho ili tufanye kitu kilicho bora zaidi,”alisema Afande Sele.

Rage awaonyesha undava Waalgeria

MWENYEKITI wa klabu ya Simba, Ismael Aden Rage juzi aliamua kutumia pesa zake kuisafirisha timu hiyo kwa ndege kutoka katika mji wa Algiers kwenda katika mji mwingine jirani na Setif.
Uamuzi huo wa Rage ulitokana na uongozi wa ES Setif kutaka kuisafirisha timu hiyo kwa basi kutoka Algiers kwenda Setif jana, umbali unaokadiriwa kufika kilometa 200.
Akizungumza kwa njia ya simu jana, Rage alisema alifikia uamuzi huo baada ya kubaini kuwa, lengo la wapinzani wao lilikuwa ni kuwachosha wachezaji wa Simba.
Kwa mujibu wa Rage, umbali kutoka katika mji huo mdogo kwenda Setif ni kilometa 100 na kwamba alitumia dola 1900 kwa ajili ya kulipia msafara wao wote kwa ndege.
Alisema mara baada ya kufika kwenye mji huo mdogo, walipanda basi kwenda Setif tayari kwa ajili ya mechi yao ya marudiano dhidi ya ES Setif inayotarajiwa kuchezwa kesho usiku.
Rage alisema uongozi wa ES Setif umeahidi kumrejeshea fedha hizo kabla ya pambano kati yao. Alisema alitoa fedha hizo kutoka mfukoni mwake.
Mwenyekiti huyo wa Simba alisema anamshukuru Mungu kwamba wachezaji wote wapo katika hali nzuri na wana ari kubwa ya kushinda mechi hiyo.
Rage alisema juzi, kikosi hicho cha Simba kilifanya mazoezi kwenye uwanja wa kikosi cha zimamoto kilichopo katika mji wa Algiers. Mazoezi hayo yalifanyika chini ya Kocha Milovan Cirkovic.
Aliwashukuru vijana wa Kitanzania wanaosoma nchini Algeria wenye itikadi za Simba na Yanga kwa kuwaunga mkono na kusafiri nao kutoka Algiers hadi Setif kwa ajili ya kuwashangilia.
Alisema vijana hao wametoa msaada mkubwa katika kufanikisha kupatikana kwa chakula kwa ajili ya wachezaji baada ya kubaini kuwa, wanaweza kuhujumiwa na wapinzani wao kwa kupewa chakula kibovu.
‘Sisi kama viongozi tumeamua wachezaji wasile chakula cha wenyeji wetu, tumeamua timu iwe inajipikia chakula chake ili kukwepa kuhujumiwa na wapinzani wetu,”alisema.
Rage alisema wamekuwa wakipambana na mbinu mbalimbali za kuwakatisha tamaa zinazofanywa na wenyeji wao tangu walipowasili Algiers, ikiwa ni pamoja na kucheleweshwa uwanja wa ndege kwa saa kadhaa na mizigo yao kuzuiwa na watu wa Idara ya Uhamiaji.
ES Setif (Tai Mweusi) ilianzishwa katika mji wa El Kahla mwaka 1958, ambako inamiliki uwanja wake uitwao Ground Stade 8 Mai 1945, wenye uwezo wa kuchukua watu 30,000 kwa wakati mmoja wakiwa wamekaa.

LULU: Jamani sina mpenzi, umri wangu bado mdogo

MCHEZA filamu machachari wa kike nchini, Elizabeth Michael, maarufu kwa jina la Lulu, wiki hii aliwashangaza mashabiki wa fani hiyo baada ya kusema kuwa hana mpenzi na havutiwi na suala la mapenzi kwa sababu umri wake ni mdogo. Lulu alisema hayo alipokuwa akihojiwa katika kipindi cha Mkasi kilichorushwa hewani na kituo cha televisheni cha Channel Five. Yafuatayo ni mahojiano ya ana kwa ana kati ya Lulu na mtangazaji wa kipindi hicho, Salama Jabir kama yalivyonukuliwa na mwandishi wetu.

SWALI: Ni kwa nini umekuwa ukiandikwa sana na vyombo vya habari?
JIBU: Hata mimi nashindwa kuelewa! Lakini habari zote zinazoandikwa juu yangu sio za kweli, ni uongo mtupu.
SWALI: Kuna wakati gazeti moja liliwahi kuripoti kwamba ulikuwa na rafiki wa kike msagaji, je habari hizi ni za kweli?
JIBU: Kwa kweli sielewi niseme nini kwa sababu nilipigwa picha nikiwa na dada mmoja klabu, ambaye ninamuheshimu, lakini nikashangaa kuona habari ile.
SWALI: Kuna habari kwamba nyinyi mmekuwa mkiuza stori zenu kwa waandishi wa habari ndio sababu mmekuwa mkiandikwa mara kwa mara, je madai haya yana ukweli wowote?
JIBU: Nasikia vitu hivyo vipo, lakini mimi havijawahi kunitokea. Inavyosemekana wapo wasanii wanaofanya hivyo, lakini sina uhakika.
SWALI: Kwa hiyo unataka kusema kwamba hata wewe umekuwa ukishtukia tu kuona habari zako zinaandikwa magazetini?
JIBU: Ni kweli kabisa na wakati mwingine watu huwa wakinipigia simu kuniuliza, ‘tumeona habari fulani kuhusu wewe’. Huwa zinanishangaza sana.
SWALI: Ni kipi kilichokuvutia na kukufanya upende kuwa mwigizaji filamu?
JIBU: Aliyevumbua kipaji changu ni Dk. Cheni. Ndiye aliyenipeleka katika kikundi cha Kaole wakati huo nikiwa mdogo sana na hatimaye nikajikuta nakuwa mwigizaji.
SWALI : Kwa maana hiyo unataka kusema kwamba uigizaji ni kitu ulichokuwa ukitaka kukifanya kwa muda mrefu?
JIBU: Kwa kweli sikuwa na ndoto hiyo. Sikufikiria iwapo siku moja nitakuwa staa. Sikuona kama ni kazi. Nilikuwa nikisikia raha tu kuigiza.
SWALI : Kuna gazeti moja liliwahi kuripoti hivi karibuni kwamba una uhusiano wa kimapenzi na Ali Kiba. Je, kuna ukweli wowote kuhusu habari hii ?
JIBU: Hapana, ndio maana uliposoma hilo gazeti, hukuona picha imechapishwa ikimuonyesha Lulu na Kiba. Kama habari hiyo ingekuwa ya kweli, lazima kungekuwepo na picha inayomuonyesha Lulu na Kiba. Kwangu mimi Ali Kiba ni rafiki yangu wa kawaida tu.
SWALI: Inasemekana kwamba watayarishaji wengi wa filamu wamekuwa wakitengeneza sehemu ya kwanza na ya pili kwa lengo la kupata pesa, yaani wanawaibia mashabiki. Je, kuna ukweli wowote kuhusu madai hayo ?
JIBU: Mimi nadhani inategemea na stori ya mtu. Zingine zinastahili kuwa na sehemu ya kwanza na ya pili na zingine hazistahili. Kibaya zaidi nyingi hazina kiwango. Kwa sasa hatuna uwezo huo, tunajaribu tu.
Kwa mfano, mimi kwa wakati huu natengeneza filamu yangu, lakini sina uwezo wa kuifanya iwe ya kiwango cha juu. Lakini nitajaribu kuifanya iwe na mvuto ili lengo langu litimie.
SWALI : Kuna madai kwamba baadhi yenu waigizaji nyota hampendi kuigiza nafasi za watumishi wa ndani ama zingine za kiwango cha chini. Kuna ukweli wowote kuhusu hili ?
JIBU: Sipendi kuwasemea wengine, lakini kwa upande wangu, naweza kuigiza nafasi yoyote kwa sababu nina uwezo wa kufanya hivyo.
SWALI : Hebu tuambie, unao wapenzi wangapi wa kiume?
JIBU: Jamani, sina mpenzi, mimi ni mwanamke singo na umri wangu bado mdogo kuwa na mwanaume. Nina miaka 18 tu.
SWALI : Tafadhali zungumza ukweli maana kwa msichana kama wewe unaweza kuwa na wanaume wa aina tofauti, huyu wa kununua vocha, huyu wa kununua mavazi, huyu wa kununua gari na huyu mtoa huduma. Unataka kutuambia hilo gari lako aina ya Lexus limekuja lenyewe ?
JIBU: Hivi kwa sababu gani humtaki kuniamini? Tatizo nini? Vitu vyote hivi navipata kutoka kwa mama yangu.
SWALI : Unataka kutuambia kwamba mama yako ndiye anayekupa pesa za kwenda saluni, kununua nguo za bei mbaya na kununua gari?
JIBU: Kuna habari pia kuwa baadhi yenu huwa mnapenda sana wanaume watu wazima je, ni kweli ?
JIBU: Ni kweli wapo wanawake wa aina hiyo, lakini kwangu mimi hapana.
SWALI: Hebu tueleze kuhusu maisha yako, wewe ni mtu wa aina gani ?
JIBU : Mimi ni mtu wa kawaida tu, naishi maisha ya kawaida na ninaongea na kila mtu.
SWALI : Ni kweli kwamba baadhi yenu wacheza filamu wa kike huwa hampewi nafasi ya kucheza filamu hadi utembee na watayarishaji wa filamu wanaume kama vile Ray na Kanumba ? JIBU: Siwezi kulizungumia hilo kwa sababu halijawahi kunitokea.
SWALI : Ni kwa nini ulifikiria kuanza kutengeneza filamu zako mwenyewe ? Inawezekana ni kwa sababu uliona malipo unayoyapata kwa kucheza filamu hayatoshi ?
JIBU: Niliona nimeshacheza filamu nyingi na nimeshapata uzoefu na pia nina kipaji.
SWALI : Nini matarajio yako ya baadaye ?
JIBU : Kwa sasa nataka niendelee na shule. Unajua mimi nilimaliza kidato cha nne na shule ndiyo kila kitu. Nimejiwekea malengo ya kufika mahali fulani katika maisha yangu.
SWALI : Unaweza kupika chakula wewe ?
JIBU : Kwa nini nisiweze ? Naweza kupika vyakula vya aina zote, napiga ugali, wali, pilau na vinginevyo.
SWALI : Katika familia yenu mpo wangapi ?
JIBU: Tupo wawili, mimi na mdogo wangu. Tumelelewa zaidi na mama.
SWALI: Ni filamu gani iliyowahi kukusumbua sana tangu ulipoanza kucheza filamu?
JIBU: Kuna movi moja hiyo siwezi kuisahau, tulikuwa tunakimbia porini pekupeku na kuchomwa na miiba. Tuliigiza sehemu moja hivi kule Kibaha.
SWALI: Ni kiasi gani cha pesa, ambacho umekuwa ukilipwa kwa kucheza filamu moja?
JIBU: Unataka nikueleze siri yangu? Ni malipo ya kawaida tu ya kumwezesha mtu aweze kumudu maisha yake ya kila siku.
SWALI: Umeshamaliza kutengeneza filamu yako? Umetumia gharama kiasi gani kuanzia mwanzo hadi mwisho na je, imeshaingia sokoni?
JIBU: Filamu yangu imeshamalizika, lakini bado haijaingia sokoni. Nimetumia fedha nyingi tu kuitengeneza.
SWALI: Unaionaje kazi ya kucheza filamu?
JIBU: Naifurahia sana, najisikia raha kucheza filamu.
SWALI: Mbali na kucheza filamu, kitu gani kingine unachokipenda katika maisha yako?
JIBU: Napenda kuimba na kucheza.
SWALI : Ungependa kuwa mwanamuziki siku moja ?
JIBU : Ndio
SWALI : Unadhani muziki unakupenda au wewe ndio unaupenda ?
JIBU : Utanipenda tu.

Liwazo Zito yawania tuzo ya blogu bora TZ

Wapenzi wasomaji wa blogu hii ya liwazozito, napenda kuwafahamisha kuwa, blogu yenu hii muipendayo itashiriki kuwania tuzo za blogu bora Tanzania mwaka huu. Shindano hilo limeanza Aprili Mosi mwaka huu na litaendelea hadi Mei 31 mwaka huu. Nawaomba muipendekeze blogu hii kuingia kwenye shindano hilo, hasa katika vipengele vya sports na entertainment kama ilivyo blogu yenyewe. Ipigie kura kupitia mtandao wa: www.tanzaniablogawards.com

Simba yatua Cairo salama

WAWAKILISHI pekee wa Tanzania katika michuano ya Afrika, Simba SC tayari wapo mjini Cairo, Misri wakiwa njiani kuelekea Algeria.

Simba waliondoka alfajiri ya leo Dar es Salaam kuelekea Algeria kwa ajili ya mechi ya marudiano, raundi ya pili ya michuano ya Kombe la Shirikisho la Afrika dhidi ya wenyeji ES Setif, wakipitia Algeria.

Simba walioondoka wakiwa na matumaini makubwa ya kuitoa ES Setif katika mchezo huo utakaofanyika Ijumaa wiki hii, ina mpango wa kukaa kwa siku mbili Cairo kabla ya kuunganisha kwenda Algeria.

Viongozi waliofuatana na timu ni Mwenyekiti wa Ismail Aden Rage, Mjumbe wa Kamati ya Utendaji ya klabu hiyo Damian Manembe na Ofisa Habari, Ezekiel Kamwaga.Wengine ni Kocha Mkuu, Milovan Cirkovic, Kocha Msaidizi Amatre Richard, kocha wa makipa James Kisaka, daktari wa timu Cosmas Kapinga, Meneja Nico Nyagawa na mtunza vifaa Kessy Rajab.

Wachezaji waliopo kwenye msafara ni Juma Kaseja, Ally Mustafa, Nassor Masoud, Shomari Kapombe, Amir Maftaha, Juma Nyoso, Kelvin Yondani, Victor Costa, Obadia Mungusa, Jonas Mkude, Patrick Mafisango, Mwinyi Kazimoto, Haruna Moshi, Salum Machaku, Uhuru Suleiman, Felix Sunzu, Emmanuel Okwi, Edward Christopher, Derick Walulya na Gervais Kago.

Simba ilishinda mchezo wa kwanza wiki moja iliyopita mabao 2-0, hivyo sare ya aina yoyote au isipofungwa zaidi ya bao 1-0 itakuwa imesonga mbele.

LEILA RASHID WA JAHAZI AIBUKA MWIMBAJI BORA WA TAARAB

Leila Rashid

Khadija Omar Kopa

MWIMBAJI Leila Rashid wa kikundi cha Jahazi ameibuka mshindi katika shindano la kumsaka mwimbaji bora wa muziki wa taarab.

Shindano hilo lililodumu kwa mwezi mmoja, liliendeshwa na blogu ya Liwazozito, inayomilikiwa na mwandishi wa habari, Rashid Zahor.

Katika shindano hilo, wasomaji wa blogu hii walitakiwa kuwapigia kura waimbaji saba walioshindanishwa kwa lengo la kumpata mshindi.

Leila aliibuka mshindi baada ya kupata kura saba kati ya kura 14 zilizopigwa na wasomaji kutoka nchi mbalimbali duniani, ikiwemo Marekani, Uingereza na Canada. Kura hizo ni sawa na asilimia 31 ya kura zilizopigwa.

Nafasi ya pili ilinyakuliwa na Khadija Kopa wa TOT, Sabah Salum wa East African Melody na Khadija Yussuf wa Jahazi waliopata kura nne kila mmoja, ambazo ni sawa na asilimia 18 ya kura zilizopigwa.

Mwimbaji mwenye makeke Isha Ramadhani 'Mashauzi' alishika nafasi ya tatu baada ya kuambulia kura mbili, ambazo ni sawa na asilimia tisa wakati Zuhura Shaaban wa Zanzibar Stars alishika nafasi ya nne kwa kupata kura moja, ambayo ni sawa na asilimia nne. Zena Khamis wa File Stars hakupata kura.