Azam itakuwa kama TP Mazembe-Idrissa Nassoro

SWALI: Ukiwa mmoja wa viongozi wa Azam, mmejisikiaje baada ya timu kumaliza michuano ya ligi kuu msimu huu ikiwa nafasi ya pili na kupata nafasi ya kucheza michuano ya kimataifa?
JIBU: Huu ni msimu wetu wa nne kushiriki katika michuano ya ligi kuu. Tangu mwaka wetu wa kwanza kucheza ligi hiyo, tulijiwekea malengo na lengo letu kubwa msimu huo lilikuwa ni kubaki katika ligi kuu. Tulijiwekea lengo hilo kwa sababu huko nyuma ilikuwa ni kawaida kwa timu kupanda na kushuka katika ligi kuu kutokana na mazingira mabovu yaliyokuwepo wakati huo. Tulimaliza ligi tukiwa nafasi ya tano.
SWALI: Baada ya hapo mikakati yenu mingine iliyofuata ilikuwa ipi?
JIBU: Katika mwaka wetu wa pili, tukiwa chini ya Kocha Itamar Amorin, tulijiwekea malengo tumalize ligi tukiwa katika nafasi nne za kwanza. Na kama unavyojua, Azam ni timu inayodhaminiwa na kampuni zilizo chini ya Azam na malengo ya hizi kampuni ni kufanya biashara.
Hivyo kwa Tanzania naweza kusema tumejijenga vizuri na tumejitanua hadi katika nchi jirani za Rwanda, Uganda, Malawi na Msumbiji, lengo likiwa ni kujitangaza zaidi kibiashara. Hivyo dhamira yetu nyingine ya dhati tuliyonayo ni kuinua soka ya Tanzania.
Katika msimu wetu wa tatu tulijiwekea malengo ya kushika nafasi tatu za kwanza, lakini hatukufanikiwa. Mwaka huu tukajiwekea lengo la kushika nafasi mbili za kwanza na tunashukuru Mungu kwamba tumefanikiwa.
SWALI: Kwa maana hiyo, unataka kusema kwamba lengo la kuanzishwa kwa Azam ni kutangaza bidhaa zinazozalishwa na kampuni hii?
JIBU: Wadhamini wetu wanatudhamini kwa nguvu zote. Sisi kama klabu ya mpira, malengo yetu ni kufika mbali zaidi. Kwa wale wanaodhani kwamba Azam ni nguvu ya soda, nadhani wamekosea. Malengo yetu ni kuendelea kuwepo kwa miaka mingi zaidi. Tunashukuru kwamba tumeshaanza kutoa mguu nje kwa kushiriki katika michuano ya kimataifa. Lengo letu ni kuandika historia mpya ya soka Tanzania.
Tunazipongeza sana Simba na Yanga kwa sababu zimeiwakilisha nchi yetu kwa miaka mingi katika michuano ya kimataifa na zimefanya mambo mengi mazuri, zimetwaa ubingwa wa kihistoria wa Afrika Mashariki kwa miaka mingi na pia michuano ya klabu za Afrika na haya si mafanikio ya kubeza. Kila mtu anatamani kufikia mafanikio hayo.
Sisi ndio kwanza tumeanza. Ni kama watoto, tumeanza kutia mguu. Matarajio yetu ni kufika mbali zaidi kule, ambako wenzetu hawa wameshindwa kufika.
SWALI: Hivi sasa mmeshapata nafasi ya kucheza mashindano ya kimataifa mwakani. Nini hasa malengo yenu katika mashindano hayo?
JIBU: Malengo yetu ni kufika mbali zaidi. Lakini waswahili wanasema mipango si matumizi. Unaweza kusema tumejiandaa kufanya vizuri, lakini hayo hayatawezekana bila ya kuwa na viongozi wazuri, makocha wazuri na wachezaji wazuri na mashabiki wa kuwahamasisha kwa sababu nao ni nguvu ya timu na wana mchango mkubwa.
Cha muhimu ni kuiboresha zaidi timu yetu. Tunaye kocha mzuri, ambaye kwa sasa yupo kwao Uingereza kwa mapumziko. Tunao vijana wazuri. Tutakachokifanya ni kumsikiliza mwalimu anasema nini. Tayari tunao vijana, ambao mwalimu aliwapendekeza na tumeshamalizana nao.
SWALI: Azam imeanza hivi karibuni, lakini imeweza kufanya mambo makubwa kama vile kujenga uwanja, hosteli na kuendeshwa kwa utaratibu wa kuvutia. Nini siri ya mafanikio haya?
JIBU: Ndoto kubwa ya viongozi wetu kuanzia mwenyekiti, mkurugenzi na viongozi wa bodi ni kuifanya Azam iwe kama TP Mazembe. Lakini kama ujuavyo, Rome ni mji mkubwa na mzuri, lakini haukujengwa kwa siku moja. TP Mazembe ni timu kubwa, lakini haikutengenezwa kwa siku moja.
Kama unavyojua, tuna miaka minne tu hadi sasa ndio tumepata nafasi ya kupeperusha bendera ya Tanzania kimataifa, lakini hatuna sababu ya kurudi hapa na kusema hatukuandaliwa vizuri ama kutimiziwa mahitaji yetu. Kama ni visingizio, basi vitakuwa nje ya sababu hizo. Dhamira tuliyonayo ni kufika mbali zaidi. Kama wengine wameweza, kwa nini sisi tushindwe.
SWALI: Vipi kuhusu usajili wenu wa wachezaji kwa ajili ya msimu ujao na michuano ya kimataifa?
JIBU: Kwa mujibu wa sheria za kimataifa, kila timu inaruhusiwa kusajili wachezaji watano wa kigeni na tukiwa katikati ya ligi, tulimuuza kipa wetu Obren Cirkovic, hivyo tulikuwa na nafasi moja na tumeshaijaza kwa kusajili mchezaji mwingine wa kigeni kutoka nje ya nchi na tupo mbioni kuongeza kipa mwingine. Mchezaji wa kigeni tuliyemsajili anaitwa George Otieno, alikuwa mchezaji bora katika ligi ya Kenya mwaka jana na aliwahi kucheza soka ya kulipwa Denmark.
SWALI: Vipi kuhusu Yaw Berko na Emmanuel Okwi, kuna taarifa kwamba Azam inataka kuwasajili kwa ajili ya msimu ujao?
JIBU: Napenda kuchukua nafasi hii nikiwa katibu mkuu wa Azam kusema kwamba, hatuna mpango wa kumsajili Yaw Berko wala Emmanuel Okwi.
SWALI: Unadhani wachezaji mlionao sasa wanatosha kushiriki vyema katika michuano ya kimataifa na kuiwezesha Azam kufanya vizuri?
JIBU: Kwa uzuri wa timu yetu na mipango tuliyonayo, tuna uhakika mkubwa wa kufanya vizuri kwa vile vijana wetu wengi ni damu changa na wana ari kubwa.
SWALI: Vipi kuhusu kocha John Stewart, mtaendelea kuwa naye msimu ujao?
JIBU: Napenda kuchukua fursa hii kumpongeza sana Stewart kwa kuisaidia Azam kufikia malengo yake. Kama unakumbuka vizuri, kwa kipindi cha miaka 12 iliyopita, hakuna timu nyingine iliyoweza kushika nafasi ya kwanza na ya pili katika ligi kuu zaidi ya Simba na Yanga. Tuna imani naye kubwa na ametujengea msingi mzuri katika timu yetu. Hatuoni kocha mwingine anayeweza kutufaa zaidi yake kwa sasa. Kazi aliyoifanya ni kubwa na tunampongeza kwa hilo kwa sababu ni kocha mzoefu. Sote ni mashahidi na tumeona jinsi alivyoibadili timu ya Zanzibar.
SWALI: Kuna madai kuwa mafanikio yenu katika ligi ya msimu huu yamekuja dakika za mwisho na yametokana na kuiga mchezo mchafu, ambao umekuwa ukifanywa na klabu za ligi kuu. Je, kuna ukweli wowote kuhusu madai haya?
JIBU: Nilitarajia swali hilo. Kusema kweli mazoea yana tabu. Binadamu akizoea jambo, anakuwa na tabu anapolikosa. Hata Mtibwa walipochukua ubingwa mwaka 2000, yalimkuta haya haya. Hata Kajumulo naye yalimkuta hayo hayo. Nadhani hata Moro United ilifanyiwa hivyo.
Azam tangu mwanzo hatukuwa na malalamiko yoyote na wadhamini wetu ni wale wale. Tulikuwa na kocha Santos, akaja Itamar na tulikuwa na wachezaji wengi wa kigeni kama vile akina Dani Wagaruka na wengineo. Hata msimu huu ulipoanza, hatukusikia malalamiko yoyote. Tulikuwa tunakebehiwa tu kwamba nafasi yenu ya tatu inawasubiri palepale.
Lakini tuliposhiriki mashindano ya Kombe la Mapinduzi kule Zanzibar, tulitwaa ubingwa baada ya kuzifunga Simba na Yanga. Tuliporudi na kombe hili, wakalikebehi kwamba ni kombe la mbuzi. Matatizo yakaanza baada ya kuongoza ligi. Wakasema mengi, lakini napenda kuwahakikishia mashabiki wetu kwamba Azam ni timu nzuri na ina uwezo wa kuzifunga Simba na Yanga wakati wowote.
Katika mechi yetu ya kwanza ya ligi dhidi ya Yanga, tuliwafunga 1-0.Tulipokutana kwenye mechi ya hisani, tuliwafunga 2-0, tulipocheza Kombe la Mapinduzi, tuliwafunga 3-0 na tuliporudiana kwenye ligi, tukawafunga 3-1. Sasa ina maana Azam tumewahonga Yanga katika mechi zote nne?
Mechi yetu dhidi ya Polisi Dodoma ilikuwa ya kufa na kupona kwa sababu ilikuwa tukiwafunga, tunashika nafasi ya pili na wao wakifungwa, wanateremka daraja. Katika mazingira haya, kila timu ilicheza kwa kupania kushinda. Na hivyo ndivyo ilivyokuwa.
Tangu tulipoanza kucheza na Polisi Dodoma, tumekutana nao katika mechi sita na tumewafunga zote. Sasa kulikuwa na ajabu gani Azam kuifunga Polisi katika mechi ile?
SWALI: Na vipi kuhusu mechi yenu na Mtibwa, ambayo iliamriwa irudiwe? Mlicheza mara ya kwanza, mkatoka sare, lakini mkapewa ushindi. Mliporudiana, mkafungwa. Vipi?
JIBU: Nisingependa kuzungumzia yaliyopo chini ya pazia, lakini mechi ile ilikuwa na taharuki na ni kweli kwamba Mtibwa waligomea mechi yetu ya awali na wachezaji kutoka nje ya uwanja na kanuni zipo wazi kuhusu jambo hilo, lakini kama unavyojua nchi yetu, unapoingia katika mambo mengine, ujue wazi kwamba unapambana na Simba na Yanga.
Mtibwa walitoka uwanjani, lakini mwamuzi akaambiwa alivunja mchezo. Sheria zipo wazi. Wanasema mwamuzi alitakuwa kusubiri kwa dakika 15, lakini kisheria, pale tu mchezaji wa mwisho anapotoka uwanjani, mwamuzi anaruhusiwa kuvunja mchezo pale pale.
Mwisho wa siku tukajikuta tukicheza mechi mbili ndani ya siku tatu, lakini tuliyakubali yote hayo. Waswahili wanasema funika kombe mwanaharamu apite ama asiyekubali kushindwa si mshindani. Tuliadhibiwa, tukaambiwa turudiane na Mtibwa kwenye uwanja mwingine, kisheria timu inahamishiwa uwanja mwingine kama kulitokea vurugu. Tumefungwa na Simba, wametwaa ubingwa, tunawapongeza kwa hilo.
SWALI: Vipi ndani ya Azam, hakuna zile siasa za Usimba na Uyanga?
JIBU: Ni kweli zipo siasa hizo katika timu za ligi. Kwa mfano, Toto African wana uhusiano wa karibu na Yanga kama ilivyo kwa Simba na Coastal Union. Lakini kwa Azam, hicho kitu hakipo kabisa ndio sababu umeona tuliifunga Yanga katika mechi zote nne msimu huu.
SWALI: Kuna mipango yoyote ya kuuboresha zaidi uwanja wa Chamazi ili uweze kutumika kwa mechi za kimataifa?
JIBU: Hicho kitu kipo na michoro ya uwanja huo ipo kwa sababu tunalo eneo lingine kubwa jirani na uwanja wetu wa sasa. Hivyo moja ya mikakati yetu ya baadaye ni kuwa na uwanja mwingine mkubwa wa kisasa, ambao tutakuwa tukiutumia kwa mechi za kimataifa.

Kumng'oa Nchunga kwa staili hii ni sawa na mchezo wa kitoto

Lloyd Nchunga

Katibu wa baraza la wazee la Yanga, Ibrahim Akilimali

Wanachama wa Yanga waliohudhuria mkutano uliotangaza kumng'oa Nchunga

BARAZA la wazee la klabu ya Yanga mwishoni mwa wiki iliyopita lilitangaza kumng’oa madarakani Mwenyekiti wa Klabu hiyo, Lloyd Nchunga kwa tuhuma za kushindwa kuiongoza vyema.
Mkutano huo, unaodaiwa kuhudhuriwa na wanachama zaidi ya 700, uliitishwa na Katibu wa baraza la wazee, Ibrahim Akilimali na kufanyika makao makuu ya klabu hiyo mitaa ya Twiga na Jangwani, Dar es Salaam.
Katika mkutano huo, wanachama hao, ambao inadaiwa kuwa wengine walitoka mikoa ya jirani, kwa kauli moja waliamua kuanzia sasa Yanga iendeshwe kwa mfumo wa kampuni, ikiwa ni kutekeleza sharti lililotolewa na mfadhili wa zamani wa klabu hiyo, Yusuph Manji.
Uamuzi mwingine uliofikiwa katika mkutano huo ni kuundwa kwa kamati maalumu, itakayokuwa ikisimamia masuala yote ya klabu hiyo pamoja na usajili wa wachezaji kwa ajili ya msimu ujao wa ligi.
Kilichofanywa na wanachama hao wa Yanga katika mkutano huo, hakina tofauti na kile walichokifanya Juni 7, 2010 wakati walipotangaza kumng’oa madarakani aliyekuwa mwenyekiti wa klabu hiyo, Imani Madega.
Tofauti pekee iliyopo ni kwamba uongozi wa Nchunga ulishaanza kuyumba kutokana na viongozi wengi waliochaguliwa katika uchaguzi wa mwaka juzi kujiuzulu kwa sababu mbalimbali.
Alianza makamu mwenyekiti, Davis Mosha akifuatiwa na wajumbe wa kamati ya utendaji, Seif Ahmed, Ally Mayay na Tito Osoro. Wajumbe wengine, Mohamed Bhinda, Mzee Yusuph na Paschal Kihanga nao walitangaza kujiuzulu wakati wa mkutano huo.
Mara baada ya mapinduzi ya mwaka juzi ya kumng’oa Madega, niliandika makala ndefu katika gazeti hili kuhusu mkutano uliofikia uamuzi huo kutokuwa halali kutokana na kukiuka katiba.
Karibu kila gazeti liliandika taarifa za mkutano huo kivyake wakati huo. Yapo yaliyoandika kuwa, uongozi wa Madega uliondolewa madarakani na mengine yaliripoti kuwa, umesimamishwa.
Vyombo vingine vilikwenda mbali zaidi kwa kuripoti kuwa, katika mkutano huo, wanachama walimteua Jaji Mkwawa, ambaye ni Mwenyekiti wa Kamati ya Uchaguzi ya Yanga, kuchukua nafasi ya Madega hadi uchaguzi mkuu utakapofanyika.
Hali hiyo ilisababisha wananchi wengi washindwe kutambua ni kipi hasa kilichotokea kwenye mkutano huo. Walibaki kujiuliza je, ni kweli kwamba uongozi wa Madega uliondolewa madarakani? Kwa kigezo na taratibu zipi?
Wengine walishindwa kutambua lengo hasa la mkutano huo lilikuwa lipi? Je, ilikuwa ni marekebisho ya katiba na yalipitishwa? Na kama mkutano huo ulikuwa wa kujadili katiba, kwa nini wanachama walichukua uamuzi wa kumuondoa madarakani Madega?
Hivyo ndivyo ilivyofanyika. Baada ya Madega kuwauliza wanachama mara tatu, iwapo waliyakubali marekebisho hayo ya katiba yaliyotolewa na Shirikisho la Soka Tanzania (TFF) na kumjibu ndio, aliamua kufunga mkutano na kutangaza kuwa, uchaguzi mkuu utafanyika Julai 4 mwaka 2010.Alifanya hivyo kwa sababu ajenda ya mkutano huo ilishamalizika.
Ujasiri wa Madega katika kusimamia katiba ya Yanga ndio uliomwezesha kuendelea kuwepo madarakani hadi uchaguzi mkuu ulipofanyika na kupatikana viongozi wapya, akiwemo Nchunga.
Katika hali ya kushangaza, tatizo hili limejirudia tena safari hii. Baraza la wazee la Yanga limeitisha mkutano wa wanachama na kutangaza kumng’oa madarakani Nchunga kwa kigezo cha kushindwa kuiongoza vyema klabu hiyo.
Kabla ya mkutano huo, wazee hao walishatoa tamko la kutaka kuchukua timu kwa madai kuwa, uongozi ulishindwa kuisimamia vyema na kusababisha wachezaji kudai mishahara ya miezi mitatu na posho za zaidi ya mechi 15.
Mbali na kutaka kuchukua timu, jaribio ambalo lilikwama, wazee hao pia walitoa tamko la kumtaka Nchunga ajiuzulu, vinginevyo wangetumia nguvu kumuondoa. Hata hivyo, Nchunga hakubabaika, bado aliendelea kusimama kwenye katiba.
Katika mazungumzo yake na waandishi wa habari, Nchunga alitangaza kuitisha mkutano mkuu Julai 15, mwaka huu, na kwamba mkutano huo ndio utakaotoa uamuzi wa mwisho iwapo abaki madarakani ama aondoke.
Nchunga alisema hawezi kuondoka madarakani kwa shinikizo la wazee kwa sababu hawatambuliki kikatiba. Alisisitiza kuwa, yeye alichaguliwa na wanachama na ndio wenye uamuzi wa mwisho juu yake.
Swali la kujiuliza ni je, mkutano uliotangaza kumng’oa Nchunga ulikuwa halali kikatiba? Na je, uamuzi uliotolewa katika mkutano huo unakubalika?
Kwa mujibu wa katiba ya Yanga ya mwaka 2008 ibara ya 22, inayohusu mkutano mkuu wa dharura, anayepaswa kuuitisha ni mwenyekiti kwa kushauriana na kamati yake ya utendaji.
Kipengele cha pili cha ibara hiyo kinasema kuwa, mkutano huo utaitishwa iwapo tu nusu ya wanachama watawasilisha maombi kwa kamati ya utendaji kwa maandishi na kamati hiyo itawajibika kuuitisha katika kipindi kisichozidi siku 30 baada ya kuwasilishwa kwa ombi hilo.
Kipengele cha tatu cha ibara hiyo kinasema kuwa, taarifa ya mkutano huo inapaswa kutolewa siku 15 kabla ya kufanyika kwake na ajenda na nyaraka zingine zitapelekwa kwa wajumbe siku saba kabla ya mkutano.
Kipengele cha tano cha ibara hiyo kinaeleza kuwa, endapo mkutano mkuu wa dharura utaitishwa kwa juhudi za kamati ya utendaji, ndiyo itakayoandaa ajenda na kama utaitishwa kwa ombi la nusu ya wanachama, ajenda itakuwa masuala yaliyopendekezwa na wanachama.
Kwa maana hiyo, kilichofanywa na wazee wa Yanga ni sawa na mchezo wa kujifurahisha kwa sababu mkutano waliouitisha ni batili na uamuzi wake pia ni batili.
Kikatiba, wazee wa Yanga hawatambuliki hivyo hawana mamlaka ya kuitisha na kuongoza mkutano wa wanachama. Waliopaswa kufanya hivyo iwapo mwenyekiti atagoma ni wajumbe wa kamati ya utendaji.
Inawezekana wazee hao walifikia uamuzi huo kutokana na wajumbe wengi wa kamati ya utendaji kujiuzulu, lakini sababu hiyo haina msingi kwa kuwa taratibu nzima katika kuitisha mkutano huo hazikufuatwa.
Klabu ya Yanga kwa sasa inao wanachama zaidi ya 4000, hivyo nusu ya hao ndio waliopaswa kujiorodhesha majina yao na kuwasilisha maombi ya kutaka uitishwe mkutano wa dharura kwa mwenyekiti. Hilo halikufanyika.
Idadi ya wanachama waliohudhuria mkutano huo na uhalali wao nayo inatia shaka. Si rahisi kuamini iwapo watu wote waliohudhuria mkutano huo walikuwa wanachama halali wa Yanga na iwapo walifika 700. Inawezekana kabisa kuwa takwimu hiyo ilikuwa ya kughushi kwa lengo la kuufanya mkutano huo uonekane umehudhuriwa na wanachama wengi wakati si kweli.
Katiba ya Yanga hailitambui baraza la wazee. Baraza hilo lipo kwa lengo tu la kuwaenzi wazee hao na pia kuchota hekima na busara zao. Hivyo inapotokea baraza hilo linakuwa mstari wa mbele kukiuka katiba na kuongoza mapinduzi, ni hali ya kushangaza kidogo.
Inasikitisha zaidi kuona kuwa, waandishi wa habari nao wameingia kwenye mtego wa kuripoti matukio bila kuhoji uhalali wake. Wameshindwa kuainisha katika taarifa zao iwapo mkutano ulioitishwa na wazee wa Yanga ulikuwa halali au la. Wameripoti habari za upande mmoja.
Walichopaswa kufanya ni kutazama katiba ya Yanga inasema nini kuhusu kuitishwa kwa mkutano huo na je, ulikuwa halali au vipi? Wangefanya hivyo, wasomaji wao wangeweza kutambua mara moja kuwa, kilichofanywa na wanachama wale ni mchezo wa kitoto.
Lengo la makala hii si kumtetea Nchunga na viongozi wenzake. Lengo ni kuwakumbusha wanachama wa Yanga umuhimu wa kuheshimu na kufuata katiba ya klabu yao katika kupitisha maamuzi mbalimbali.
Kwa mujibu wa maelekezo ya Shirikisho la Soka Tanzania (TFF), kiongozi wa wa chama ama klabu zilizo chini yake hawezi kuondolewa kwa njia ya mapinduzi. Kujaribu kuwawajibisha viongozi kwa njia hiyo ni kuvunja katiba na pia kuzusha mgogoro mkubwa zaidi, ambao unaweza kurudisha nyuma maendeleo ya klabu.
Kama alivyosema Katibu Mkuu wa TFF, Angetile Osiah, shirikisho lake haliwezi kufanya kazi na kamati ya utendaji yoyote ile ya mwanachama wake, ambayo haikuchaguliwa kikatiba hata kama itakuwa ya uongozi wa muda. Hii maana yake ni kwamba TFF haiungi mkono mapinduzi hayo na bado inautambua uongozi wa Nchunga.
Ni kweli kwamba uongozi wa Nchunga unaonekana kuyumba na kupoteza mwelekeo na imani kwa wanachama na mashabiki wa klabu hiyo, hasa baada ya timu kufanya vibaya katika ligi na tuhuma za wachezaji kutolipwa mishahara na posho zao kwa wakati.
Lingekuwa jambo la busara kwa Nchunga kukubaliana na ukweli huo na kujiweka kando ili kupisha viongozi wengine. Lakini si busara hata kidogo kwa wazee wa Yanga kuitisha na kuongoza mkutano wa kumpindua Nchunga wakati hawatambuliki kikatiba na hawakufuata taratibu. Huku ni kuleta vurugu zaidi ndani ya Yanga.
Mwenyekiti wa zamani wa Yanga, Tarimba Abbas alinukuliwa na gazeti hili wiki iliyopita akisema kuwa, japokuwa hawatambuliki kikatiba, wazee ni watu muhimu katika klabu hiyo, lakini alionya kuwa, hawapaswi kutumiwa vibaya.
Alichokionya Tarimba ndicho kilichojitokeza kwenye mkutano huo. Ni wazi kuwa, wapo watu nyuma ya wazee hao, ambao ndio walioshawishi kufanyika kwa mkutano huo kwa lengo la kumng’oa Nchunga. Hilo ni kosa kubwa na ni ukiukaji wa katiba, ambao haupaswi kupewa nafasi. Ikumbukwe kuwa ni wanachama wenyewe wa Yanga walioamua kumchagua Nchunga, tena kwa mbwembwe nyingi wakati wa uchaguzi mkuu wa klabu hiyo uliofanyika kwenye ukumbi wa PTA, Sabasaba, Dar es Salaam.
Kulikuwepo na wagombea wengine wazuri na wenye uzoefu wa uongozi katika nafasi ya mwenyekiti kama vile Francis Kifukwe na Mbaraka Igangula, lakini kwa mshangao wa wengi, wanachama wakaamua kumchagua Nchunga, ambaye hakuwa na uzoefu wowote wa uongozi.
Hii maana yake ni kwamba, wanachama wa Yanga wamevuna walichopanda. Waliowashawishi kumchagua Nchunga wapo pembeni wamekaa kimya, kama vile hawaoni kinachotokea. Waswahili wanasema mtoto akililia wembe mpe, ukimkata ndipo atakapojua madhara yake.
Nina hakika iwapo Yanga ingekuwa chini ya Kifukwe ama Igangula, ingekuwa mbali hivi sasa na hata ile ndoto ya Manji ya kutaka klabu hiyo iendeshwe kwa mfumo wa kampuni, ingekuwa imeshatimia.
Kilichotokea katika mkutano huo kinapaswa kuwa funzo kubwa kwa wanachama wa Yanga kwamba wasikubali ‘kupelekeshwa’ na watu wachache wenye lengo la kuweka mbele zaidi maslahi yao binafsi badala ya klabu. Wanapaswa kukumbuka msemo wa Kiswahili unaosema, ‘Majuto mjukuu’.
Ni dhahiri kwamba wanachama wa Yanga waliingia kwenye mkutano huo wakiwa tayari wameshaandaliwa kutenda walichoagizwa na ‘watu’ wao. Hili ni jambo la hatari kwa mustakabali wa Yanga na endapo wanachama hawatakuwa makini, watakuja kujuta baadaye.
Busara inahitajika sana kwa pande zinazopingana ndani ya Yanga kutafakari kwa makini hatma ya klabu yao kwa sasa. Ni vyema pande hizo zikakaa pamoja na kukubaliana kipi kifanyike ili kuiokoa klabu hiyo isiingie kwenye mgogoro mkubwa zaidi na pia ili iweze kushughulikia masuala muhimu kama vile usajili wa wachezaji kwa ajili ya msimu ujao wa ligi.
Ni kweli Nchunga ana matatizo yake, lakini ukweli unabaki palepale kwamba, taratibu zilizotumika kumwondoa madarakani katika mkutano huo hazikuwa halali na hakuna kipengele chochote kwenye katiba ya klabu hiyo ya Yanga kinachozungumzia uwepo wa baraza la wazee na kama wana mamlaka ya kuitisha na kuendesha mkutano wa wanachama.
Julai 15 haipo mbali. Ndiyo siku, ambayo Nchunga amepanga kuitisha mkutano mkuu wa wanachama kwa lengo la kujadili masuala mbalimbali yanayoihusu klabu hiyo na kwamba atakuwa tayari kuondoka iwapo wanachama wataamua hivyo. Kwa nini wazee wa Yanga hawataki kusubiri siku hiyo? Kuna kitu gani kilichojificha nyuma ya wazee hawa? Kwa nini wanashinikiza Nchunga aondoke hivi sasa? Wanaharakia nini?
Hebu tujiulize, hivi kwa utaratibu huu wa kuondoa viongozi madarakani, ni mtu gani na heshima zake atakubali kugombea nafasi mojawapo ya uongozi ndani ya Yanga? Tusubiri, tuone.

LILIAN INTERNET: Niliwahi kucheza shoo nikiwa na mimba ya miezi sita

KWA mwonekano, Lilian Joseph Tungaraza ni msanii mwenye mvuto. Umbile lake, uso wake na rangi yake ni miongoni mwa vitu vinavyomfanya avutie kumkodolea macho. Kwa kifupi ni kwamba ameumbwa na kuumbika.
Sifa nyingine aliyonayo mwanadada huyu, maarufu zaidi kwa jina la Lilian Internet ni kwamba, ni hodari mno wa kulishambulia jukwaa kwa minenguo ya aina yoyote. Ni mwepesi wa kuchezesha maungo ya mwili wake mithili ya binadamu asiyekuwa na mifupa.
Kwa sasa, Lilian ni mmoja wa wacheza shoo nyota wa bendi ya muziki wa dansi ya Mashujaa, akitokea Twanga Pepeta International, aliyodumu nayo kwa zaidi ya miaka sita.
Uamuzi wa Lilian kujiunga na Mashujaa ulipokewa kwa hisia tofauti na mashabiki wa muziki nchini. Wapo wanaoamini kuwa, huo ni mwendelezo wa bendi ya Mashujaa kuibomoa Twanga Pepeta.
Wanaamini hivyo kwa sababu ni miezi michache tu iliyopita Mashujaa ilimnyakua mwimbaji nyota wa Twanga Pepeta, Charles Gabriel ‘Chalz Baba’ na baadaye mpiga gita la solo Ally Akida na mpiga tumba, MCD.
Lakini kwa upande wake, Lilian anapingana na dhana hiyo. Anasema aliamua kuihama Twanga Pepeta kwa lengo la kutafuta maslahi bora zaidi.
Akizungumza katika kipindi cha Mkasi kilichorushwa hewani na kituo cha televisheni cha Channel Five wiki hii, Lilian alisema licha ya kulipwa pesa nyingi ili ajiunge na Mashujaa, amekuwa akipata malipo mazuri ya mshahara na pia fedha za matibabu, usafiri na nyumba.
Mbali na hilo, Lilian alisema amejiunga na Mashujaa kwa lengo la kupata uzoefu zaidi katika harakati zake hizo za kusaka maisha mazuri kupitia muziki.
“Nilipokuwa Twanga Pepeta, nilijiona kama vile nimebaki peke yangu. Wenzangu wote niliokuwa nao walihama. Nilijiona mpweke. Ndio sababu nilipopata ofa hii, sikusita mara mbili,”alisema msanii huyo.
“Sikuondoka Twanga Pepeta kwa kumkimbia mtu ama kugombana na mtu yeyote. Lengo langu ni kutafuta maslahi mazuri zaidi. Kama ni Twanga Pepeta, niliitumikia kwa miaka mingi, nikaona inatosha,”aliongeza.
“Kama unakaa na mume kwa miaka kadhaa na kuona huzalishi chochote, huwezi kuendelea kuishi naye, lazima utafute mume mwingine,” alisema msanii huyo huku akicheka.
Lilian alikiri kuwa, kazi ya kucheza shoo katika bendi za muziki ni ngumu na inazo changamoto nyingi, lakini amekuwa akijitahidi kukabiliana nazo.
Akitoa mfano, alisema baadhi ya mashabiki wa kiume wamekuwa wakipenda kuwadhalilisha wanapokuwa stejini kwa kuwatuza pesa kwa kuziingiza kwenye sehemu zao za siri.
“Kuna siku nilistukia nikitiwa singi (kusukumizwa kichwa) stejini na mwanamke, ambaye sikumjua. Nadhani huyo dada alipomuona bwanaake akija kunitunza, alikasirika akidhani nina uhusiano naye,”alisema Lilian huku akitabasamu.
Kutokana na ugumu wa maisha, Lilian alisema kuna wakati alipokuwa Twanga Pepeta, alilazimika kuendelea kucheza shoo stejini huku akiwa mja mzito wa miezi sita hadi kiongozi wake alipomzuia kwa hofu ya mimba kuharibika.
Lilian, ambaye ana mtoto mmoja wa kiume alisema, hapati tabu ya kumtunza mwanaye kwa vile amekuwa akiishi na dada yake bila ya kuwa na matatizo yoyote.
Alisema anamshukuru Mungu kwamba mtoto huyo si mlinzi na hana muda wa kutaka kujua mama yake yupo wapi, anafanya nini na kwa nini anachelewa kurudi nyumbani.
Lilian ameeleza kushangazwa kwake na baadhi ya wasichana, ambao ni wasanii ama wanamuziki wanaopenda kubadili rangi ya miili yao kwa kujichubua.
“Wao hudhani weupe ndio kivutio kwa mashabiki wanapokuwa stejini. Ni vizuri ujivunie rangi yako ya asili. Mimi sipati tabu katika hilo kwa sababu naipenda rangi yangu. Sipotezi muda kupaka madawa,”alisema.
Mwanadada huyo pia alikanusha madai kuwa, wacheza shoo wengi wa kike wamekuwa wakitumiwa na wanaume kwa kuwataka kimapenzi na kuwageuza vimada. Alisema uhuni ni tabia ya mtu na kwamba hata wasanii wa kiume wapo wanaotekwa kimapenzi na mashuga mami.
Alipoulizwa iwapo ni kweli viuno vya stejini vinafanana na vile vya kitandani wakati wa kufanya mapenzi, Lilian alitoa kicheko na kusema hilo haliwezekani.
“Ni kweli wapo wanaume wengi wanaodhani kwamba, akimchukua mcheza shoo wa kike na kwenda naye kufanya mapenzi, atampa viuno kama vile anavyokata stejini. Hilo haliwezekani kabisa,”alisema msanii huyo huku akiangua kicheko.
Lilian anavutiwa sana na mcheza shoo mwenzake, Super Nyamwela, ambaye yupo katika bendi ya Extra Bongo. Alisema Nyamwela ndiye mwalimu wake na pia mshauri wake mkuu katika masuala ya muziki na maisha kwa jumla.
Alikiri kuwa, kazi ya kucheza shoo ni ngumu na kwamba wacheza shoo wa kike wanahitaji muda mrefu wa kupumzika na kula chakula kizuri mara kwa mara ili kulinda afya zao.

MAMIA WAMUAGA MAFISANGO DAR

Uche Jombo afunga ndoa kwa siri

LAGOS, Nigeria
HATIMAYE mcheza filamu machachari wa Nigeria, Uche Jombo anadaiwa kufunga ndoa kwa siri na rafiki yake wa Kimarekani.
Uche anadaiwa kufunga ndoa hiyo mwishoni mwa wiki iliyopita katika Jiji la New York nchini Marekani.
Awali, kulikuwa na uvumi kwamba Uche alipanga kufunga ndoa hivi karibuni na kijana huyo hivi karibuni.
Lakini Uche alikanusha uvumi huo kwa kusema, hana mpango wa kufunga ndoa na Mmarekani huyo.
Hata hivyo, kwa mshangao wa wengi, habari za uhakika kutoka kwa watu wa karibu na mwigizaji huyo zimeeleza kuwa, tayari ameshafunga ndoa na kijana huyo.
Kwa sasa, Uche na mumewe huyo wapo fungate nchini Marekani.

Aki amwacha solemba mkewe?

LAGOS, Nigeria
MWIGIZAJI nyota wa filamu nchini Nigeria, Chinedu Ikedieze (Aki) amedaiwa kumwacha solemba mkewe, Nneoma Nwaijah.
Tetesi za Aki kumwacha solemba mkewe, zilianza kuvuma mwezi uliopita baada ya mcheza filamu huyo kuonekana akihudhuria sherehe za utoaji wa tuzo za waigizaji bora akiwa na wanawake watano.
Katika sherehe hizo zilizofanyika kwenye hoteli ya Eko mjini Lagos, Aki alifika ukumbini bila ya mkewe.
Uamuzi wa Aki kutofuatana na mkewe kwenye sherehe hizo uliwaacha vinywa wazi watu wengi, hasa katika kipindi hiki, ambacho ndio yao bado ina miezi michache.
Baadhi ya wadau wa tasnia ya filamu walitarajia kumuona Aki akiwa amefuatana na Nneoma, ikiwa ni ishara ya kukoleza penzi lao.
Badala yake, Aki alitinga ukumbini akiwa ameongozana na wanawake watano, ambao walikuwa na miili mikubwa kuliko mkewe.
Tukio hilo lilitafsiriwa na baadhi ya wadau hao kuwa, huenda Aki ametengana na mkewe ama kuna tatizo limetokea kati yao.
Hata hivyo, mmoja wa watu wa karibu na mwigizaji huyo aliueleza mtandao wa naijerules kuwa, Nneoma hapendi kujirusha.
“Naweza kukuhakikishia kwamba, hakuna tatizo lolote kati ya wanandoa hao. Nneoma si aina ya mtu anayependa kujirusha,”alisema mtu huyo.
Aki na Nneoma walifunga ndoa Desemba 9 mwaka jana . Walianza kufunga ndoa ya kimila huko Obolo, Isiala Mbano katika jimbo la Imo na kufuatiwa na ndoa ya kanisani iliyofungwa mjini Lagos.

HANNAH: Siwezi kutoa penzi ili nipate umaarufu

LAGOS, Nigeria
MSANII chipukizi wa filamu nchini Nigeria, Hannah Ojo amesema kamwe hawezi kutoa penzi kwa mtu yeyote ili aweze kupewa nafasi ya kucheza filamu.
Hannah, ambaye ana matumaini makubwa ya kuwa mwigizaji nyota wa Nollywood katika siku zijazo amesema, amewahi kushawishiwa kufanya hivyo mara kadhaa, lakini alikataa.
Akizungumza na mtandao wa naijerules wiki hii, Hannah alisema hataki kupata umaarufu kwa njia ya mkato.
Msanii huyo mwenye sura na umbo lenye mvuto alisema, anafahamu wazi kuwa, vitendo hivyo vimekuwa vikiwabeba wacheza filamu wengi wa kike wa Nigeria, lakini kwake haiwezekani.
“Unaweza kubaki ulipo, lakini haitakuwa milele. Kama wewe ni mwigizaji mzuri, hata kama unafanyakazi ndogo ndogo, kuna wakati utapata mafanikio kama watayarishaji na waongozaji filamu wataridhishwa na kazi zako,”alisema.
Hannah, ambaye ni mkazi wa jimbo la Ekiti alisema, amewahi kutoa pesa mara kadhaa ili apatiwe nafasi ya kucheza filamu, lakini baadhi ya watayarishaji wamekuwa wakimkatisha tamaa.
Alisema yupo tayari kuendelea kutoa pesa ili acheze filamu nyingi, lakini sio kupata nafasi hiyo kwa njia ya kutoa penzi.
Hannah, ambaye alijitosa kwenye fani hiyo mwaka 2005 alisema, baadhi ya wakati alikuwa akiombwa pesa ili asajiliwe kwenye baadhi ya kampuni za filamu, lakini mwisho wa siku alishtukia akitapeliwa.
“Unaweza kulipa pesa ili usajiliwe, lakini mwisho wa siku hakuna lolote wanalofanya. Watakupa maelezo ya filamu, unapoteza muda wako kuyasoma, kwenda mazoezini na mwisho wa siku hawatengenezi filamu yoyote. Unaweza kutumia wiki mbili kwa mazoezi, lakini pesa zako na nguvu zako zinapotea,”alisema binti huyo mrefu na mwenye sura jamali.
Kwa mujibu wa Hannah, tangu alipojitosa kwenye fani hiyo, amecheza filamu tatu na tamthilia kadhaa. Filamu alizocheza ni My Story, Wrong Passion, Edge of Paradise, Needle’s Eye, Burning Spear, Private Sector na Clinic Matters.
Hannah alisema ana hakika kwa uwezo wa Mungu, ipo siku atapata mafanikio makubwa kupitia fani hiyo na anaamini wakati wenyewe ndio sasa.
Alipoulizwa ni kitu gani chenye mvuto kwenye mwili wake, mwanadada huyo alisema ni sura, matiti na urefu wake.
“Kitu cha kwanza kinachowavutia wanaume kwangu ni matiti na nafikiri hata macho yangu nayo yanawavutia,”alisema.
Alipoulizwa iwapo atapewa nafasi ya kuwa mwigizaji mkuu katika filamu kwa sharti la kufanya mapenzi na mtayarishaji, Hannah alisema hayupo tayari kufanya hivyo kwa mtu yeyote.
“Siwezi kufanya hivyo kwa sababu hiyo haipaswi kuwa njia ya kupata mafanikio. Sikuwahi kufanya hivyo tangu nilipoanza uigizaji na kamwe sitathubutu kufanya hivyo,”alisisitiza.
Alipoulizwa iwapo anaweza kucheza picha za uchi, Hannah alisema kamwe hawezi kufanya kitu kama hicho, lakini alidokeza kuwa, anaweza kubusiana na mwanaume.
“Huwezi kuwa maarufu kwa kucheza filamu za uchi. Uigizaji ni kufanya kile unachokiweza. Unapaswa kuwa na viwango. Nawafahamu baadhi ya wasanii, ambao hawajawahi kucheza filamu za uchi, lakini wameweza kupata mafanikio makubwa,”alisema.
Matarajio makubwa ya Hannah ni kuwa mwigizaji maarufu nchini Nigeria. Amewataka watayarishaji wa filamu kumpa nafasi ili athibitishe uwezo wake.

SIMBA YAPATA MSIBA MZITO, MAFISANGO AFARIKI DUNIA

KIFO cha kiungo wa kimataifa wa Rwanda na klabu ya Simba, Patrick Mafisango kilichotokea usiku wa kuanzia jana mazingira yake yalikuwa ya kusikitisha, gazeti la Majira limeripoti leo.
Vilio vilitawala nyumbani kwa mchezaji huyo huku kila mmoja akiwa haamini kile kilichotokea, hasa kwa wachezaji wenzake, ambao baadhi yao walishindwa kujizuia kutokwa machozi.
Akizungumzia mazingira ya ajali hiyo, rafiki wa marehemu aliyejitambulisha kwa jina la Olya Ilemba, ambaye alishuhudia kifo hicho alisema, mauti yalimfika Mafisango wakati wakitoka kujirusha katika klabu ya Maisha, ambako bendi ya FM Academia ilikuwa ikitumbuiza.
"Baada ya muziki kumalizika, tuliondoka mimi, Mafisango na watu wengine watatu. Mafisango ndiye aliyekuwa akiendesha gari aina ya Toyota Cresta, lakini alikuwa akiendesha kwa mwendo wa kasi sana. Tulipomuuliza akasema, amechoka anahitaji kupumzika hivyo tumuache,"alisema Olya.
Aliongeza kuwa, walipofika maeneo ya Chuo ch Ufundi Chang'ombe (VETA) mwisho wa ukuta, walikutana na mwendesha guta, hivyo Mafisango akajaribu kumkwepa, lakini ikatokea pikipiki, ambayo ilikuwa katika mwendo wa kasi.
Olya alisema wakati Mafisango akijaribu kumkwepa mwendesha pikipiki, bahati mbaya gari lake liliacha njia na kuparamia mtaro pamoja na baadhi ya miti iliyokuwepo kwenye eneo hilo.
"Kwa kweli ile ajali ilikuwa mbaya sana kwani baada ya gari kusimama, tulimfuata Mafisango na kumkuta jicho lake la upande wa kushoto likiwa limechomoka huku akiwa ameumia vibaya kichwani. Tukajaribu kuuondoa mwili wake, ambao ulikuwa umegandamizwa na usukani,"alisema.
Olya alisema baada ya kumtoa, rafiki yao mwingine alikuwa amechanganyikiwa na baada ya kuhisi kuwa Mafisango amefariki, alimwambia ajikaze ili wampeleke hospitali.
Alisema bahati zuri teksi ilikuwa ikipita karibu yao, hivyo walimchukua na kumpeleka hadi Hospitali ya Taifa Muhimbili, ambako walithibitisha kifo chake.
"Inauma sana, Mafisango ni kipenzi chetu, ametuacha wakati ambapo tunamuhitaji sana, tena ilikuwa aondoke jana kwenda kwao Rwanda kujiunga na timu ya taifa, lakini safari yake imekuwa kifo,"alisema
Msiba wa Mafisango upo Chang'ombe Maduka Mawili kwenye nyumba aliyokuwa akiishi pamoja na wachezaji wenzake, Gervas Kago kutoka Jamhuri ya Afrika ya Kati na Derrick Walulya kutoka Uganda.
Taarifa zinasema kuwa, mwili wa Mafisango unatarajiwa kuagwa leo saa nne asubuhi kwenye uwanja wa klabu ya Sigara, Chang'ombe, Dar es Salaam. Marehemu ameacha mke na mtoto mmoja wa kiume, Chris Paul.
Akizungumzia kifo hicho, kiungo wa kimataifa wa Rwanda na klabu ya Yanga, Haruna Niyonzima alisema ajali hiyo ilitokea saa chache kabla ya wao kusafiri kwenda kujiunga na timu yao ya taifa.
Alisema wakati akijiandaa kwenda uwanja wa ndege wa Julius Nyerere, aligundua kwamba alisahau pasi yake ya kusafiria na wakati akirudi nyumbani, ndipo alipopokea simu ikimtaarifu kuhusu ajali na kifo cha mchezaji mwenzake.
"Sikuamini mpaka nilipokwenda Muhimbili,"alisema Niyonzima huku akitokwa na machozi ya uchungu.
Alisema siku chache zilizopita, Mafisango alimkumbusha aitunze jezi yake namba 30, ambayo alibadilishana naye siku Simba ilipocheza na Yanga na kuibuka na ushindi wa mabao 5-0. Alisema Mafisango alimtaka asigawe jezi hiyo kwa mtu yeyote bali iwe kumbukumbu yake.
"Kumbe jamaa ndio alikuwa anakufa, nitamkumbuka daima,"alisema.
Wachezaji wa timu ya Taifa, Taifa Stars waliokuwa mazoezini kwenye uwanja wa Karume baadhi yao walishindwa kuendelea na mazoezi na kubaki wakilia kwa simanzi.
Kipa Juma Kaseja na beki Amir Maftah ndio walioonekana wakilia kwa uchungu zaidi wakati Haruna Moshi baada ya mazoezi, aliamua kwenda moja kwa moja kwenye chumba cha maiti cha Hospitali ya Taifa ya Muhimbili.
Mafisango ni mzaliwa wa Jamhuri ya Kidemokrasi ya Congo lakini alipewa uraia wa Rwanda na kuichezea timu ya taifa ya nchi hiyo katika michuano ya kimataifa. Aliingia nchini mwaka juzi na kujiunga na Azam kabla ya mwaka jana kuhamia Simba.

Nchunga: Sijiuzulu ng'o

MWENYEKITI wa klabu ya Yanga, Lloyd Nchunga amesisitiza msimamo wake wa kutojiuzulu wadhifa huo kwa sababu ya shinikizo la baadhi ya wanachama.
Akizungumza na kituo cha Redio One jana asubuhi, Nchunga alisema hawezi kuondoka madarakani kwa shinikizo la wanachama kwa sababu alichaguliwa kikatiba.
Nchunga alisema kama kuna wanachama wasiomtaka, wanapaswa kufuata katiba katika kumuondoa badala ya kufanya vikao batili.
Alisema katiba za Shirikisho la Soka Tanzania (TFF) na ya Shirikisho la Soka la Dunia (FIFA) zinazuia viongozi wake kuondolewa madarakani kwa kutumia mbinu chafu.
Nchunga alisema kutokana na katiba za klabu zote za ligi kuu kufuata katiba za TFF na FIFA, kipengele hicho kinapaswa kuheshimiwa na wanachama wa Yanga.
Alisema atakuwa tayari kung’atuka madarakani iwapo tu wanachama watamtaka afanye hivyo katika mkutano mkuu aliouitisha Julai 17 mwaka huu.
Mwenyekiti huyo alisema anashangazwa na kauli za wazee wa klabu ya Yanga kutaka kutumia kikao alichokiitisha kati yao keshokutwa kumshinikiza ajiuzulu.
Alisema wazee wa Yanga hawamo kwenye katiba ya klabu hiyo, lakini wamekuwa wakipewa heshima kutokana na busara na ukongwe wao katika soka.
“Hata rais anapotaka kuzungumza na wananchi, amekuwa akiwatumia wazee wa Dar es Salaam, lakini hawamo kwenye katiba ya nchi,”alisema.
“Naomba nisieleweke vibaya ama kaulihii isichukuliwe kuwa ni tusi kwa wazee,” aliongeza.
Mwenyekiti huyo wa Yanga alionya kuwa, iwapo wanachama watakuwa wakitumia kigezo cha timu kufungwa na Simba kumuondoa kiongozi madarakani, hakuna kiongozi atakayeweza kumaliza muda wake.
“Ukitumia kigezo hicho kumwondoa kiongozi madarakani, nafasi hiyo inaweza kutumia vibaya. Watu watakuwa wanawatengenezea viongozi mazingira ya kutoka kila timu inapofungwa na Simba,”alisema.
Nchunga alisema japokuwa baadhi ya wazee wamesusia kikao cha keshokutwa, baadhi yao wamemwahidi kwamba watahudhuria na kutoa maoni yao kuhusu jinsi ya kutatua mgogoro huo.
Alitoa mwito kwa wadau wa Yanga kujitokeza kutatua mgogoro huo kwa lengo la kuweka mambo sawa.

Azam yawakana Okwi na Berko

KLABU ya Azam imesema haina mpango wa kuwasajili kipa Yaw Berko wa Yanga na mshambuliaji Emmanuel Okwi kutoka Simba.
Katibu Mkuu wa Azam, Idrisa Nassoro alisema mjini Dar es Saalam wiki hii kuwa, wachezaji hao hawana nafasi kwenye kikosi cha timu hiyo.
Nassoro alisema taarifa zilizoripotiwa na baadhi ya vyombo vya habari wiki iliyopita kwamba wachezaji hao wameshasajiliwa na Azam hazina ukweli wowote na ni za uzushi.
“Azam itafanya usajili wake kutokana na mapendekezo ya Kocha John Stewart, ambaye kwa sasa yupo likizo Uingereza, lakini hatuna mpango wowote na Okwi ama Berko,”alisema.
Kwa mujibu wa Nassoro, usajili wa timu hiyo msimu ujao utazingatia zaidi wachezaji kutoka kikosi cha pili cha timu hiyo, ambacho kimekuwa kikifanya mazoezi kwa takriban mwaka mmoja sasa chini ya makocha wa kigeni na wazalendo.
Hata hivyo, Nassoro alisema mchezaji pekee wa kigeni waliyeamua kumsajili kwa ajili ya msimu ujao ni George Otieno kutoka Kenya. Alisema wamemsajili mchezaji huyo kutokana na kuridhishwa na kiwango chake.
“Tuna imani na matumaini makubwa na kikosi chetu, hivyo hatuhitaji mchezaji kutoka Simba au Yanga,”alisisitiza.
Nassoro alisema pia kuwa, Azam itaendelea kuwa chini ya Kocha Stewart msimu ujao baada ya kuiletea mafanikio makubwa katika misimu miwili iliyopita.
Alisema tangu mwaka 2000, hakuna timu nyingine ya ligi kuu zaidi ya Simba na Yanga iliyowahi kushika nafasi ya pili ama kutwaa ubingwa, hivyo kocha huyo anastahili kupongezwa.
Akizungumzia timu ya vijana ya Azam, Nassoro alisema imekuwa ikitoa wachezaji wengi wazuri kwenye timu za taifa za vijana wa chini ya miaka 17 na 20, hivyo wataendelea kuienzi kwa kuipatia huduma zote muhimu.
Nassoro alisema uongozi wa Azam unataka kuona timu hiyo ikiwa na hadhi kubwa barani Afrika kama ilivyo kwa TP Mazembe ya Jamhuri ya Kidemokrasi ya Congo.
“Ndoto zetu ni kubwa, sawa na Mlima Kilimanjaro. Tunataka Azam iwe zaidi ya TP Mazembe, lakini ni kazi kubwa, lazima mtoke jasho,”alisema.
Katibu Mkuu huyo wa Azam alisema, katika kutimiza ndoto hizo, moja ya mipango yao ya baadaye ni kufanya upanuzi wa uwanja wao wa soka wa Chamazi.
Alisema kwa sasa, hawawezi kuutumia uwanja huo kwa mechi za kimataifa kutokana na kutokidhi viwango, hivyo watalazimika kuutumia Uwanja wa Taifa, Dar es Salaam ama viwanja vingine.
Nassoro alisema pia kuwa, katika kujiandaa kwa michuano ya Kombe la Shirikisho mwakani,wamepanga kwenda kuweka kambi nchini Afrika Kusini.
Alisema uwepo wa Azam katika ligi na michuano ya kimataifa, ni kuzitangaza kampuni zilizo chini ya Azam, ambazo zimetapakaa katika nchi zote zinazopataka na Tanzania.
Alizipongeza Simba na Yanga kwa kufanya mambo makubwa katika kuendeleza soka nchini na kuongeza kuwa, mafanikio yao hayapaswi kubezwa.
Aliongeza kuwa, lengo la Azam ni kufika mbali zaidi katika mashindano ya kimataifa na ndio sababu wameamua kuanza maandalizi mapema.
“Rome ni mji mzuri duniani na watu wengi wanaupenda, lakini uzuri wake haukutokana na kazi ya siku moja. Hatutaki kuwana visingizio vya maandalizi mabovu ama kukosa huduma,”alisema.
“Timu yetu inaendeshwa kibiashara. Huwezi kusikia mchezaji anadi haki zake au hajalipwa. Kama wengine wameweza, kwa nini sisi tushindwe,”alisisitiza.

CECAFA yafurahia Kombe la Kagame kuchezwa Dar

KATIBU Mkuu wa Baraza la Vyama vya Soka Afrika Mashariki na Kati (CECAFA), Nicholas Musonye amesema baraza lake linafurahia zaidi michuano ya Kombe la Kagame inapofanyika katika Jiji la Dar es Salaam.
Akizungumza na gazeti la East African Business Week mapema wiki hii, Musonye alisema wameamua mashindano ya mwaka huu yafanyike tena Tanzania kutokana na mafanikio yaliyopatikana mwaka jana.
Musonye alisema mashindano hayo na ya le ya Kombe la Chalenji yalikuwa na mafanikio makubwa kutokana na kuhudhuriwa na mashabiki wengi.
Aliitaja sababu nyingine ya kuhamishia mashindano hayo Tanzania kuwa ni uhakika wa udhamini na mapato makubwa ya viingilio.
Mwaka jana mashindano hayo yalitakiwa kufanyika Zanzibar, lakini kwa sababu ya uukosefu wa fedha, yalihamishiwa Sudan, ambayo nayo ilishindwa kuyaandaa kutokana na matatizo ya kisiasa.
Kwa mujibu wa Musonye, mapato ya viingilio yaliyopatikana katika mechi za mashindano hayo mwaka jana yalikuwa sh. bilioni 1.2 (dola 763,358 za Marekani).
Mashindano hayo yalikuwa na mvuto zaidi kuanzia hatua ya robo fainali, ambapo wenyeji Simba na Yanga walicheza na timu tofauti na mechi zao kuvunja rekodi ya kuhudhuriwa na mashabiki wengi.
Musonye alisema maandalizi kwa ajili ya mashindano ya mwaka huu yapo kwenye hatua za mwisho na yanatarajiwa kugharimu dola 600,000 (sh. milioni 944).
Mashindano ya mwaka jana yalidhaminiwa na Kampuni ya Bia Tanzania (TBL) kupitia bia yake ya Castle. TBL ilidhamini mashindano hayo kwa sh. milioni 300.
"Kwa sasa tunasubiri timu kuthibitisha ushiriki wao ili tuweze kupanga ratiba ya timu 12 zinazotarajiwa kushiriki mwaka huu," alisema Musonye.
Mashindano hayo yamekuwa yakidhaminiwa na Rais wa Rwanda, Paul Kagame tangu mwaka 2002. Kabla ya udhamini wa Kagame, mashindano hayo yalijulikana kwa jina la Klabu Bingwa Afrika Mashariki na Kati na yalianzishwa mwaka 1974.
Timu zilizoshiriki mashindano ya mwaka jana ni Ulinzi (Kenya), Ports (Djibouti), St George (Ethiopia), El Merreikh (Sudan), Red Sea (Eritrea), Elman (Somalia), APR na Etincelles (Rwanda), Bunamwaya (Uganda), Vital'O (Burundi) na wenyeji Simba na Yanga za Tanzania Bara.
Mabingwa watetezi wa michunao hiyo ni Yanga iliyoifunga Simba bao 1-0 katika mechi ya fainali.

Moyo wa kumchangia Sajuki uendelezwe kwa wasanii wengine

HATIMAYE msanii nyota wa filamu nchini, Sadiki Juma Kilowoko ‘Sajuki’ ameondoka nchini kwenda India kwa ajili ya kupatiwa matibabu.
Sajuki aliondoka nchini Jumapili iliyopita saa nane mchana kwa ndege ya Shirika la Ndege la Emirates akiwa amefuata na mkewe, Wastara Juma ‘Stara’.
Msanii huyo amekwenda India kwa ajili ya kupatiwa matibabu ya kuondoa uvimbe tumboni, ambao umekuwa ukimsumbua kwa miezi kadhaa na kusababisha afya yake idhoofu.
Kuondoka kwa Sajuki kwenda India kumetokana na jitihada kubwa zilizofanywa na wasanii wenzake pamoja na wadau mbalimbali wa sanaa ya filamu, ambao walichangisha fedha kwa ajili ya matibabu yake.
Mbali na wadau hao, kituo cha redio cha Clouds FM kupitia mtangazaji wake, Dina Marios pamoja na kikundi cha Orijino Komedi kupitia msanii wake, Emmanuel Mgaya ‘Masanja’ waliandaa vipindi maalumu kwa ajili ya kuwahamasisha watu mbalimbali kumchangia msanii huyo.
Kadhalika, msanii nyota wa kike wa filamu nchini, Jacqueline Wolper alionyesha moyo wa aina yake baada ya kumchangia msanii huyo dola 10,000 za Marekani (sawa na sh. milioni 15) ili kufanikisha matibabu yake.
Rais wa Shirikishio la Wasanii Tanzania (TAFF), Simon Mwakifamba alisema juzi kuwa, jumla ya sh. milioni 30 zilipatikana kutokana na michango iliyotolewa na wadau mbalimbali.
Kwa mujibu wa Mwakifamba, malengo yalikuwa ni kukusanya sh. milioni 25 zilizokuwa zikihitajika kwa ajili ya kugharamia matibabu ya msanii huyo, hivyo wamevuka malengo.
Mwakifamba amewashukuru wadau mbalimbali waliojitokeza kumchangia msanii huyo na kuwaomba waendeleze moyo huo kwa wasanii wengine wenye matatizo.
Alisema Sajuki anatarajiwa kupatiwa matibabu katika hospitali moja iliyopo katika mji wa Mumbai nchini India. Hakuweza kukumbuka jina la hospitali hiyo.
Sajuki aliwahi kutibiwa kwa mara ya kwanza kwenye hospitali hiyo mwaka jana na kutakiwa arudi tena kwa matibabu zaidi, lakini tatizo kubwa lilikuwa gharama.
“Nimeguswa sana na tatizo lake, si kwamba nina fedha nyingi na sina shida, bali ni moyo wa kusaidia kuokoa uhai wa mwenzetu ili atibiwe na kurudi katika shughuli zake za filamu. Tulizoea kuwa naye location na kwenye tasnia ya filamu kwa ujumla, na sasa anaumwa na hajiwezi, nimeumia sana,”alisema Wolper alipokuwa akizungumzia uamuzi wake wa kumchangia msanii huyo.
Mmoja wa wabunge waliomchangia msanii huyo, Iddi Azzan alisema ameguswa na hali ya msanii huyo, ambaye afya yake ilikuwa ikizidi kuzorota kadri siku zilivyosonga mbele.
Azzan, ambaye ni mbunge wa Kinondoni (CCM) alitoa mchango wa sh. milioni moja baada ya kuhamasishwa kufanya hivyo na msanii Masanja wa Orijino Komedi.
Wabunge wengine waliojitokeza kumchangia msanii huyo ni Ester Bulaya (Viti Maalumu-CCM) na Halima Mdee (Kawe-Chadema), ambao kila mmoja alitoa sh. 500,000.
Wasanii wengine wa filamu na muziki, wameamua kutunga na kuimba wimbo maalumu kwa ajili ya kumchangia Sajuki. Fedha zote zitakazopatikana kutokana na mauzo ya wimbo huo, zitaingizwa kwenye akaunti ya msanii huyo.
Akichangia fedha hizo, Halima alisema wasanii wa filamu pamoja na kuwa na muonekano katika jamii, wapo nyuma katika masuala ya kijamii.
Halima alisema baya zaidi ni kwa wasanii hao kukosa umoja na ushirikiano katika masuala yao na kuongeza kuwa, ameligundua hilo kutokana na kuugua kwa Sajuki.
“Wasanii wa filamu wapo nyuma sana, kila mtu anajijali yeye tu, hana msaada kwa mwenzake. Leo hii Sajuki anaumwa na alikuwa akihitaji msaada wa kifedha ili akatibiwe nje ya nchi, lakini hakuna hata msanii mmoja aliyefanya juhudi zozote, hata kuchangisha fedha hizo. Tatizo lililomkuta Sajuki si tatizo la pekee yake, mtu yoyote linaweza kumkuta,”alisema Halima.
Mbunge huyo alimpongeza msanii wa kundi la Orijino Komedi, Masanja kwa kubuni na kuvunja vipindi vyao na kutumia muda huo kuchangisha fedha kwa ajili ya kumsafirisha Sajuki kwenda India.
Halima alisema yeye na wabunge wenzake, wataendelea kuibana serikali Bungeni kuhusu maslahi ya wasanii na aliahidi kulizungumzia suala hilo wakati wa hotuba ya makadirio ya mapato na matumizi ya Wizara ya Habari, Vijana, Utamaduni na Michezo katika Bunge la mwezi wa sita.
Moyo ulioonyeshwa na Wolper na wadau wengine wa sanaa ya filamu nchini katika kumchangia Sajuki unastahili kupongezwa na uwe mfano wa kuigwa kwa wasanii wengine.
Wolper ameonyesha moyo wa aina yake kwani angeweza kutumia kiasi cha fedha alichotoa kwa matumizi mengine yoyote ikiwa ni pamoja na kustarehe, lakini ameguswa na hali ya Sajuki.
Ni vyema wasanii wengine nchini, hasa wenye uwezo kifedha waige mfano wa Wolper. Na hata wale wasiokuwa na uwezo mkubwa wanapaswa kukumbuka kuwa, kutoa ni moyo si utajiri.
Wasanii wanapaswa kukumbuka kuwa, leo limetokea kwa Sajuki, lakini kesho na keshokutwa linaweza kutokea kwa msanii mwingine yoyote.
Si vyema kwa wasanii kusubiri msanii mwenzao apoteze maisha ndipo wajitokeze kwa wingi kuchangia mazishi na gharama zingine pamoja na kuonyesha mbwembwe msibani, wakati fedha hizo zingeweza kuokoa maisha yake.

JK ana kwa ana na David Beckham

Rais Jakaya Mrisho Kikwete na mkewe Mama Salma Kikwete wakisalimiana na mchezaji soka nyota wa Uingereza anayechezea klabu ya Los angeles Galaxy ya Marekani, David Beckham, walipokutana uwanja wa ndege wa Heathrow jijini London Jumatano iliyopita, muda mfupi kabla ya Rais Kikwete na Mama Salma kuelekea Washington DC kuhudhuria mkutano wa G8 kwa mwaliko wa Rais Barak Obama wa Marekani. Bekham ameonyesha nia ya kutembelea Tanzania kama mtalii siku za karibuni na Rais Kikwete amemkaribisha kwa mikono miwili, akimhakikishia kwamba licha ya kuwa na mashabiki wengi ambao watafurahi kumuona pia atafurahia vivutio kibao vya kitalii.

Miembeni yauzwa kwa Mundu

KLABU ya soka ya Miembeni United ya Zanzibar imetangaza kuuvunja rasmi uongozi wake na kuiuza timu hiyo kwa klabu ya Mundu.
Uamuzi wa kuiuza Miembeni umekuja siku chache baada ya kumalizika kwa michuano ya ligi kuu ya Zanzibar. Mundu ni miongoni mwa timu zilizoshuka daraja.
Hafla ya kuiuza Miembeni ilifanyika mwanzoni mwa wiki hii kwenye ukumbi wa Elimu Mbadala, Rahaleo na kuhudhuriwa na viongozi wa juu wa klabu hizo.
Mmoja wa viongozi wa Miembeni, Haji Sultani Tembe aliithibitishia Burudani kuhusu kuuzwa kwa timu hiyo na kulazimika kuuvunja uongozi wake.
Tembe alisema pia kuwa, kutokana na uamuzi huo, wachezaji wote wa Miembeni kwa sasa wapo huru na wanaweza kusajiliwa na timu yoyote.
Katibu Mkuu wa Mundu, Mussa Diku alikiri klabu yake kuinunua Miembeni baada ya kufikiwa kwa makubaliano kati ya viongozi wa pande hizo mbili.
Diku alisema bado wanaendelea na taratibu zingine ili timu hiyo iweze kushiriki tena katika michuano ya ligi kuu msimu ujao.
Uchunguzi wa Burudani umebaini kuwa, uamuzi wa kuiuza Miembeni umelenga kutoa nafasi kwa mkurugenzi wake, Amani Ibrahim Makungu kugombea urais wa Chama cha Soka cha Zanzibar (ZFA).
Chanzo cha habari kimeeleza kuwa, mipango imeanza kufanyika ili kumwezesha Makungu kushika wadhifa huo baada ya kujiuzuli kwa rais wa zamani wa chama hicho, Ali Ferej Tamim.

Azam yakana kuhonga waamuzi

KLABU ya Azam imesema mafanikio yake katika michuano ya soka ya ligi kuu ya Tanzania Bara msimu huu, yametokana na kujiwekea malengo na si kuhonga waamuzi.
Azam imesema kiwango cha soka cha timu hiyo kwa sasa kipo juu na ndio sababu imekuwa ikitoa vipigo mara kwa mara kwa timu kongwe za Simba na Yanga.
Akihojiwa na kituo cha redio cha Uhuru FM wiki hii, Katibu Mkuu wa Azam, Idrisa Nassoro alisema madai ya kuhonga waamuzi hayana msingi na ni wivu wa watu wasioitakia mema timu hiyo.
Alisema kwa sasa, Simba na Yanga si chochote kwa Azam na ndio sababu walizifunga katika michuano ya Kombe la Mapinduzi na katika ligi kuu ya Tanzania Bara.
Nassoro alisema madai ya Azam kuhonga waamuzi, yalianza kujitokeza baada ya timu hiyo kushika nafasi za juu katika msimamo wa ligi kuu na yalitokana na hofu ya wapinzani wao.
“Mwaka huu pekee, Yanga tumeifunga mara nne mfululizo. Tuliifunga bao 1-0 katika mzunguko wa kwanza wa ligi, tukaifunga mabao 2-0 katika mechi ya hisani, tukaifunga mabao 3-0 kombe la Mapinduzi na kisha tukaifunga mabao 3-1 mechi ya marudiano ya ligi,”alisema.
Katibu Mkuu huyo wa Azam pia alieleza kushangazwa na uamuzi wa Kamati ya Nidhamu na Usuluhishi ya Shirikisho la Soka Tanzania (TFF), kuamuru pambano kati yao na Mtibwa Sugar lirudiwe.
Alisema uamuzi huo ulilenga kuibeba Mtibwa kwa vile wachezaji wake waligoma penalti katika mechi ya awali na kutoka nje ya uwanja na kwa mujibu wa kanuni, timu hiyo ilipaswa kushushwa daraja.
“Kanuni zipo wazi, lakini yalijengwa mazingira ili Mtibwa isiteremke daraja, mwamuzi akasingiziwa kamaliza mpira kabla ya wakati, Azam hatukuwa tumefanya kosa lolote, lakini tumeadhibiwa,”alisema.
Nassoro alisema ndani ya Azam, hakuna siasa za Usimba na Uyanga na kusisitiza kuwa, ndoto za viongozi ni kuiona timu hiyo ikipata mafanikio makubwa zaidi kisoka.
Alisema watu wanaodhani kwamba Azam itakufa hivi karibuni, wanaota ndoto za mchana kwa vile lengo lao ni kujulikana zaidi kimataifa.
Kiongozi huyo wa Azam alisema, tangu walipoanza kushiriki michuano ya ligi kuu, wamekuwa na malengo ikiwa ni pamoja na kushika nafasi mbili za juu ili wapate nafasi ya kucheza mashindano ya kimataifa.

Tarimba amshukia Nchunga

BAADA ya kuwa kimya kwa muda mrefu, mwenyekiti na rais wa zamani wa klabu ya Yanga, Tarimba Abbas amesema kuongoza klabu kubwa kama hiyo hakuhitaji elimu pekee bali pia ujanja wa kimpira.
Tarimba amesema Yanga ni klabu kubwa na yenye wanachama wengi wenye matumaini tofauti, hivyo inapaswa kuwa na viongozi wenye mbinu tofauti za kimpira.
Amesema tatizo alilolibaini kwa viongozi wa sasa wa Yanga chini ya Mwenyekiti, Lloyd Nchunga ni kukosa mbinu za mpira, ambazo alisema ni muhimu katika kuongoza klabu kubwa kama hiyo.
Tarimba alisema hayo mwishoni mwa wiki iliyopita alipokuwa akihojiwa na kituo cha televisheni cha ITV kuhusu mgogoro uliozuka hivi karibuni Yanga kati ya uongozi na baadhi ya wanachama wa klabu hiyo.
Mwenyekiti huyo wa zamani wa Yanga alisema, viongozi na wanachama wa klabu hiyo wanapaswa kujifunza kupitia kwa Simba, ambayo ilifanya vizuri katika michuano ya ligi kuu na Kombe la Shirikisho msimu huu.
“Tunapaswa kukaa chini na kujiuliza kwa nini tuliteleza na tufanye nini ili kurekebisha hali hiyo kwa sababu Yanga ni klabu kubwa,”alisema.
Aliipongeza Simba kwa kutwaa ubingwa wa ligi hiyo msimu huu na kucheza vizuri katika mechi za mwanzo za Kombe la Shirikisho kabla ya kutolewa na Al-Ahly Shandy ya Sudan kwa mikwaju ya penalti mwishoni mwa wiki iliyopita.
Alisema kufanya vizuri kwa Simba katika michuano hiyo, hakukutokana na kuonyesha kiwango cha juu cha soka, bali pia utulivu uliopo sasa ndani ya klabu hiyo.
Tarimba alisema viongozi wa Yanga hawapaswi kukimbilia kufanya usajili wa wachezaji wapya hivi sasa, badala yake wakae chini na kutafakari walipokosea na kuchukua hatua za kurekebisha hali hiyo.
“Kama timu haishindi ama kufanya vizuri, lazima tujiulize ni kwa nini?”Alisema Tarimba, ambaye aliwahi kuwa katibu mipango wa Yanga mwaka 1991 hadi 1993, mwenyekiti kuanzia mwaka 1999 hadi 2001 na rais wa klabu hiyo kuanzia 2001 hadi 2004.
Aliongeza kuwa, Yanga imekuwa ikitumia fedha nyingi kila mwaka kwa ajili ya kusajili wachezaji wapya kutoka nje ya nchi, lakini hawatumiki ipasavyo na wengine hukata tamaa mapema kutokana na kutotimiziwa mahitaji yao.
Alisema wachezaji wanapaswa kutengenezewa mazingira mazuri ya kazi, ikiwa ni pamoja na kulipwa mishahara na posho kwa wakati, kinyume na hivyo, morari yao inashuka.
“Unapocheza na timu isiyo na matatizo kama vile Simba au Azam, huwezi kufanikiwa hata siku moja na kuongezeka kwa Azam kwenye ligi, kumeongeza ushindani mkali, hivyo tunapaswa kuwa makini zaidi,”alisema.
Tarimba alikiri kuwa, kipigo cha mabao 5-0 walichokipata kutoka kwa watani wao wa jadi Simba katika mechi ya mwisho ya ligi, kimewaumiza wengi na pia kuipaka Yanga doa lisilofutika.
“Ubingwa tumeukosa, halafu tumefungwa mabao mengi, kwa kweli katika zama hizi, hilo halikubaliki. Ni bora tuukose ubingwa, lakini tumfunge mnyama,”alisema.
Tarimba alisema kipigo hicho kilitokana na mlolongo wa matatizo mengi yaliyojitokeza ndani ya Yanga katika siku za hivi karibuni, lakini alikiri kuwa, Simba ipo juu kisoka ikilinganishwa na Yanga.
Alisema pia kuwa, uongozi wa Yanga haukuwa umejitayarisha kupambana na timu kama Simba na kusisitiza kuwa, hilo ni kosa kubwa katika pambano linalozihusisha timu hizo kongwe nchini.
Alipoulizwa msimamo wake kuhusu uamuzi wa wazee wa Yanga kutaka kuchukua timu, Tarimba alisema huenda walifanya hivyo kutokana na kukerwa na malalamiko ya wachezaji kutolipwa mishahara kwa miezi kadhaa.
Alisema binafsi anaunga mkono uamuzi huo wa wazee, hasa kutokana na tukio lililotokea Arusha, ambako basi la Yanga lilizuiwa na uongozi wa hoteli moja ya mjini humo kutokana na kuwepo kwa deni kubwa.
“Kusema kweli wazee wanapaswa kuheshimiwa, japokuwa wakati mwingine wanaweza kutumia vibaya nafasi hiyo. Mimi nawaunga mkono kwa walichotaka kukifanya, lakini pengine busara ingetumika zaidi,”alisema.
Tarimba alisema uongozi wa Yanga ulipaswa kuwashirikisha wadau mbalimbali katika maandalizi ya mechi yao dhidi ya Simba badala ya kufanya kila kitu peke yao.
“Wachezaji walikuwa na kila sababu ya kukosa ari kwa sababu hawajalipwa mishahara na posho zao za mechi kadhaa na hawakuwa na sababu ya kutaka kujua kama pesa zipo au hazipo. Wengine wanategemewa na familia zao, sasa usipowalipa, wanaweza kufanya lolote,” alitahadharisha.
Hata hivyo, Tarimba alieleza kukerwa na kauli za kupingana zilizokuwa zikitolewa hadharani baina ya Nchunga na wazee wa Yanga kwa madai kuwa, zilikuwa zikizidi kuchochea mgogoro.
Akizungumzia uamuzi wa Kamati ya Ligi ya Shirikisho la Soka Tanzania (TFF) wa kuipoka Yanga pointi tatu katika mechi yake dhidi ya Coastal Union kwa kosa la kumchezesha beki Nadir Haroub Cannavaro, alikiri kwamba ulikuwa sahihi.
Alisema tatizo lilikuwa kwa uongozi wa Yanga kumchezesha beki huyo, ilihali alikuwa na kadi nyekundu aliyopewa kwa kosa la kupigana. Alisema benchi la ufundi la Yanga linapaswa kuweka mtu maalumu kwa ajili ya kurekodi kadi za wachezaji.
Hata hivyo, Tarimba alisema hakubaliani na uamuzi wa Kamati ya Nidhamu na Usuluhishi ya TFF, iliyoamuru pambano kati ya Mtibwa Sugar na Azam lirudiwe.
Alisema kuziamuru Mtibwa na Azam zirudiane, lilikuwa kosa kubwa na ni maamuzi yaliyopitwa na wakati kwa sababu siku zote Shirikisho la Soka la Dunia (FIFA) linasisitiza maamuzi ya uwanjani yabaki kama yalivyo.
Tarimba alisema TFF ilipaswa kuwaadhibu waliosababisha pambano hilo kuvunjika na kuyaacha matokeo ya mechi ya awali yabaki kama yalivyokuwa.
Alisema ni vyema ufike wakati kamati ndogo ndogo za TFF zitoe maamuzi kwa kuongozwa na kanuni badala ya matakwa ya watu wachache.
Aliongeza kuwa, TFF pia inapaswa kufuata kanuni za kimataifa katika kuendesha soka badala ya kutunga kanuni zake, ambazo haziendani na soka ya kimataifa.

Rachel, nyota mpya ya THT

MSANII chipukizi wa kundi la Tanzania House of Talent (THT), Winfrida Josephat ‘Rachel’ amewataka wasanii wenzake wa muziki wa kizazi kipya kuacha kuwategemea wakongwe wanapotaka kutoka.
Rachel, mmoja wa wasanii wanaochipukia katika kundi hilo, alisema mjini Dar es Salaam wiki hii kuwa, msanii anayetaka kutoka, anapaswa kusimama mwenyewe.
Msanii huyo, ambaye kwa sasa anatamba na kibao chake cha Kizunguzungu, alisema msanii chipukizi anaweza kumshirikisha msanii mkongwe katika kurekodi nyimbo yake, lakini bado asiweze kutoka.
“Unatakiwa usimame wewe mwenyewe. Ningetaka kufanya hivyo, ningeweza kumshirikisha Barnaba au Linah, lakini nilitaka kutoka kivyangu,”alisema mwanadada huyo.
Rachel, ambaye anashabihiana kwa sura na umbo na msanii mkongwe wa fani hiyo, Rehema Chalamika ‘Ray C’ amesema, mafanikio aliyoyapata kimuziki katika kipindi kifupi yametokana na jitihada zake binafsi na pia kujiamini.
Alisema ili msanii aweze kupata mafanikio, anapaswa kufanyakazi zake kwa kujiamini yeye mwenyewe bila ya kutegemea msaada wa wasanii wakongwe.
Mwanadada huyo wasanii wa kundi la THT hupata nafasi za kurekodi nyimbo zao baada ya kupita kwenye hatua mbalimbali.
Akitoa mfano, Rachel alisema baada ya msanii kutunga wimbo wake, anapaswa kuupeleka kwa viongozi wa kundi hilo, ambao huupitia mmoja mmoja kabla ya kutoa maoni.
“Wimbo wa msanii kabla ya kuamriwa urekodiwe, unapitiwa na watu wengi na kila mmoja atatoa maoni yake. Yupo atakayesema ufanyiwe marekebisho, mwingine atasema haufai, mwingine atasema kiongezwe kitu fulani, hivyo ndivyo utaratibu ulivyo,”alisema.
Kwa mujibu wa Rachel, kwa sasa anajiandaa kurekodi nyimbo zake zingine kwa kushirikiana na kiongozi wa bendi ya Mashujaa, Charles Baba, Ray C na Barnaba.
Alisema ameamua kumshirikisha Ray C kwa sababu ndiye aliyemuahidi kufanya hivyo baada ya kumshuhudia katika mahojiano yake ya kwanza kupitia kwenye luninga.
“Ray C alinipa ahadi hiyo baada ya kuniona kwenye luninga. Hadi sasa tunaendelea kuwasiliana kwa simu, lakini kama unavyojua, mwenzangu ni mtu wa shughuli nyingi,”alisema.
Rachel alikiri kuwa, wimbo wake wa Kizunguzungu umetungwa na msanii mwenzake, Barnaba kwa vile bado hajaanza kutunga nyimbo zake mwenyewe.
Alikiri pia kuwa, kwa sasa amekuwa akipata pesa kutokana na kushirikishwa na baadhi ya wasanii wenzake wa THT kama vile Linah, Barnaba na Ditto kwenye maonyesho yao mbalimbali.
Alikanusha madai kuwa, amekuwa na uhusiano wa kimapenzi na Barnaba. Alisema amekuwa akimchukulia msanii huyo kama kaka yake kwa sababu ni mtu anayemuheshimu.
Rachel alisema kwa sasa anaye mchumba na anampenda kuliko kitu kingine chochote.
Binti huyo taanusi alisema alilazimika kuhama kutoka nyumbani kwa shangazi yake kwa vile alikuwa akimbana sana kiasi cha kumzuia kufanya mambo yake binafsi
Kwa sasa, watu wengine muhimu kwa Rachel ni viongozi wake wa THT na wasanii wenzake wa kundi hilo, hasa Barnaba, ambaye amemwelezea kuwa, amekuwa akimpa sapoti kubwa na kumpa moyo.
Rachel alizaliwa Februari 25, 1992 katika hospitali ya Maweni mkoani Kigoma. Alianza shule ya msingi mwaka 1998 katika shule ya msingi Muungano na baadaye sekondari ya Unit Commercial, zote za Dar es Salaam na kuishia kidato cha tatu kutokana na matatizo ya kifamilia.

SIMBA YAFANYIWA KITU MBAYA SUDAN

Na Ezekiel Kamwaga, Khartoum
WAPINZANI wa Simba katika michuano ya Kombe la Shirikisho (CAF), Al Ahly Shendi ya Sudan, tayari wameanza visa.
Leo hii, wachezaji na viongozi wa Simba wametelekezwa kwa takribani masaa matano hotelini na wenyeji hao ambao walikuwa wameahidi kuipeleka Simba katika mji wa Shendi.
Wenyeji wa Simba nchini hapa ambao ni Shendi na Chama cha Mpira wa Miguu Sudan (SFA), walikuwa wameahidi jana kwamba Wekundu wa Msimbazi wataanza safari ya kwenda Shendi mara baada ya kupata kifungua kinywa saa tatu asubuhi.
Hata hivyo, hadi kufikia saa nane mchana, hakukuwapo na basi lolote au mwakilishi yeyote wa kutoka Shendi au SFA aliyekwenda kwenye Hoteli ya Safiga ilikofikia Simba na kwa mujibu wa mawasiliano, walidai kwamba wamekwama kwenye foleni.
Hali hiyo ilisababisha wachezaji na viongozi wa Simba kushinda nje ya hoteli hiyo wakiwa wamekaa nje kwenye viti vichache, huku wengine wakiwa wamesimama tu kwa muda wa zaidi ya masaa mawili hadi matatu kwa vile muda wa kutoka hotelini ulikuwa umepita.
Kwa mujibu wa kanuni ya 14 (b) ya mashindano yanayosimamiwa na CAF, timu yeyote inatarajiwa kusafirishwa kutoka eneo moja kwenda jingine katika muda ambao unakubalika, labda kama imechelewa yenyewe.
Kuna umbali wa kilomita 150 kutoka mji mkuu wa Sudan, Khartoum iliko Simba hadi mji wa Shendi na kama Simba itachelewa kuondoka jijini hapa, maana yake ni kwamba itashindwa kufanya mazoezi leo jioni na hivyo Shendi na SFA wamekiuka kanuni hiyo.
Akizungumzia hali hiyo, Mwenyekiti wa Simba, Ismail Aden Rage, alieleza kuchukizwa kwake na tukio hilo akisema linaonyesha namna Shendi na SFA walivyojipanga kutumia mbinu za nje ya uwanja kushinda pambano hilo la marudiano.
Katika pambano la kwanza lililofanyika jijini Dar es Salaam wiki mbili zilizopita, Simba iliibuka na ushindi wa mabao 3-0.
“Sisi tulitaraji kukumbana na yote haya ambayo tunayaona sasa. Wanajua kwamba hawataweza kuishinda Simba ndani ya uwanja na hivyo wameamua kutumia mbinu chafu.
“Bahati nzuri, wachezaji wetu, benchi la ufundi na sisi viongozi tumejiandaa kikamilifu kwa mambo kama haya. Hata hivyo, tutapeleka mashitaka yetu kwa kamisaa wa mechi yetu kwa vile wao Shendi walipokuja Dar tuliwahudumia vizuri kwa kila kitu,” alisema.
Kutokana na kuchelewa huko kuondoka, hoteli ya Safiga haikuwa imeandaa chakula cha mchana kwa wachezaji na ilibidi Rage na daktari wa timu, Dk. Cosmas Kapinga, waende kutafuta “vipoza njaa” kwa wachezaji wa Wekundu wa Msimbazi.
Kwa upande wake, Dk. Kapinga alisema inachofanyiwa Simba ni kitu ambacho kwa kitaalamu kinaitwa uchoshwaji wa kisaikolojia, lengo lake likiwa kuiathiri timu kiakili.
“Katika mazingira kama haya, wachezaji na viongozi wanashindwa kufikiria kuhusu mechi na badala yake wanafikiria kuhusu adha wanazozipata. Kama watakuwa hawajaandaliwa vizuri kisaikolojia, hii inaweza kuwa mbaya. Kwa bahati nzuri, wachezaji wa Simba wameandaliwa vizuri kwenye eneo hilo,” alisema Kapinga.

TP MAZEMBE WAFANYIWA VURUGU SUDAN

MASHABIKI wa klabu ya Al Merreikh ya Sudan wameufanyia fujo msafara wa klabu ya Tout Puissant Mazembe ya Jamhuri ya Kidemokrasia ya Kongo (DRC) mjini Khartoum, wakidai na wao walipokewa vibaya na klabu hiyo mjini Lubumbashi wiki mbili zilikzopita.

Mazembe yenye washambuliaji wawili Watanzania, Mbwana Ally Samatta na Thomas Emmanuel Ulimwengu ipo Khartoum kwa ajili ya mchezo wa marudiano wa Ligi ya Mabingwa Afrika dhidi ya Merreikh, hatua ya 16 Bora.
Katika vurugu hizo, basi walilokuwa wamepanda wachezaji wa Mazembe limevunjwa vioo na athari zaidi ikiwemo hali hali za wachezaji bado hazijajulikana.
Sasa mechi hiyo iliyopangwa kufanyika kwenye Uwanja wa Omdurman, hatima yake ipo mikononi mwa Shirikisho la Soka Afrika (CAF)- ambayo inatarajiwa kuchukua hatua muda mfupi ujao, kubwa zaidi ikitarajiwa kuifuta mashindanoni Merreikh na kuifungia hivyo Mazembe kusonga mbele.
Katika mchezo wa kwanza, Samatta, maarufu kama Sama Goal, aliibuka shujaa kwenye Uwanja wa Kibassa Maliba, baada ya kufunga bao moja katika ushindi wa 2-0.
Kama ilivyokuwa dhidi ya Power Dynamos, safu ya ushambuliaji ya Mazembe inayoundwa na wakali kama Tressor Mputu, Given Singuluma, Kalaba na Samata ilikuwa mwiba mkali.
Mazembe ilipata kona sita wakati wapinzani wao hawakupata hata moja na katika kona hizo ni moja tu iliyozaa matunda kwa Sama Goal kufunga dakika ya 22 kwa kichwa akiunganisha kona iliyochongwa na Mputu.
Hadi dakika 45 za kwanza zinamalizika Mazembe inayofundishwa na Lamine Ndiaye ilikwenda kupumzika ikiwa inaongoza kwa bao hilo moja tu.
Nahodha Tressor Mputu aliifungia Mazembe bao la pili dakika ya 70, akipiga shuti zuri nje ya eneo la penalti na mpira kutinga nyavuni upande wa kulia wa lango.
Hakuna kilichobadilika katika dakika 20 za mwisho, licha ya nafasi kadhaa zilizoshindikana kutumiwa vema.
Samatta, Mtanzania aliyetokea Simba SC kujiunga na Mazembe katikati ya msimu uliopita, sasa ana mabao mawili katika Ligi ya Mabingwa ndani ya mechi mbili.
Awali alifunga katika sare ya 1-1 na Power Dymanos ya Zambia, mchezo wa kwanza hatua ya 32 Bora, lakini sikku hiyo aliumia bega na akakosa mechi ya marudiano.

KIM PULSEN KOCHA MPYA STARS

Kim Poulsen ameteuliwa kuwa kocha mpya wa timu ya Taifa ya mpira wa miguu ya Tanzania (Taifa Stars) kuanzia Mei 11 mwaka huu kuziba nafasi ya Jan Poulsen.
Akizungumza na waandishi wa habari Dar es Salaam leo, Rais wa TFF, Leodegar Tenga amesema Kim amepewa mkataba wa mwaka mmoja baada ya Shirikisho kuamua kutomuongezea mkataba Jan. Mkataba wa Jan uliokuwa wa miaka miwili unamalizika Julai 30 mwaka huu.
Amesema kwa vile Taifa Stars inakabiliwa na mechi za mchujo za Kombe la Dunia raundi ya pili Kanda ya Afrika na mechi za mchujo za Kombe la Mataifa ya Afrika (CAN), TFF imeona ni lazima iwe na kocha mpya mapema kabla ya mkataba wa Jan kumalizika.
Kim amekuwa nchini kwa mwaka mmoja sasa akifundisha timu za Taifa za vijana wenye umri chini ya miaka 17 (Serengeti Boys) na miaka 20 (Ngorongoro Heroes), hivyo anawafahamu vizuri wa wachezaji wa Tanzania.
Naye Kim ambaye Jumatatu (Mei 14 mwaka huu) atatangaza kikosi cha Taifa Stars ambacho Juni 2 mwaka huu kuivaa Ivory Coast katika mechi ya mashindano amesema yuko tayari kwa kazi hiyo na kusisitiza kuwepo ushirikiano kutoka kwa wadau mbalimbali ili timu hiyo iweze kufanya vizuri.