MANJI AAHIDI KUFANYA USAJILI WA NGUVU YANGA

MWENYEKITI wa klabu ya Yanga SC ya Dar es Salaam, Yussuf Mehboob Manji amesema kwamba atafanya usajili wa kutisha na pia ahadi yake ya kujenga Uwanja wa kisasa katika klabu hiyo ipo pale pale.


Akizungumza na Waandishi wa Habari mchana wa leo, makao makuu ya klabu leo, Manji amesema yameongelewa mengi sana kwa kipindi cha mwezi mmoja ambao hakuwepo nchini kwa ajili ya kazi zake binafsi lakini sasa amerejea na maandalizi ya msimu ujao yameshaanza.

Aidha, Manji amesema kwamba kuondoka kwa wachezaji wao wawili Didier Kavumbagu na Frank Domayo sio mwisho wa timu, kwani uongozi wake unaendelea na mipango ya kuhakikisha inasajli wachezaji wengine wazuri ambao wataisadia timu kwenye msimu ujao kwa kufuata maelekezo ya Benchi la Ufundi.

“Kuondoka kwa Kavumbagu ni kutokana na kuchelewa kwa majibu ya TFF juu ya idadi ya wachezaji wageni kwa msimu mpya, huku Domayo ambaye tangu mwaka jana aliombwa kuongeza mkataba alikua akisema anamsubiria mjomba wake ndipo aweze kufanya hivyo,”.

Amesema pamoja na kuondoka kwa wachezaji hao bado kwa kushirikiana na aliyekuwa kocha wao, Hans van der Pluijm watahakikisha Yanga inaendelea kutisha msimu ujao na kufanya vizuri kwenye mashindano ya kimataifa.

Hans aliahidi kuleta wachezaji wazuri watakaoisaidia Yanga siku alipokua akiiongea na waandishi wa habari kuwaaga.

Aidha Manji amelifuta rasmi tawi la Tandale kutokana na kuwa na chanzo cha vurugu na migogoro ndani ya klabu, pia amewafuta uanachama wanachama sita ambao walikiuka katiba ya Yanga kwa kwenda kuongea na waandishi na HABARI bila ya Idhini ya uongozi huku pia wakishindwa kulipia ada zao za uanachama kwa zaidi ya miezi sita.

Waliofutwa uanachama ni Ally Kamtande, Isihaka Dude, Hamisi Matandula, Waziri Jitu Ramadhani, Mohamed Kigali Ndimba na Selaman Hassan Migali.

Amekumbushia mkutano mkuu wa mabadiliko ya katiba utafanyika terehe mosi Juni, 2014 katika Ukumbi wa Oysterbay Police Mess na wanachama wote wanaombwa kulipia ada zao ili waweze kuhuhudhira mkutano huo wakiwa hai.

Manji amesema suala la ujenzi wa Uwanja wa Kisasa eneo la Jangwani bado lipo pale pale, kikubwa kinachosubirwa ni majibu ya serikali juu ya maombi ya eneo la ziada, kwani Mkuu wa Mkoa wa Dar es Salaam alisema suala hilo lipo ukingoni na mda si mrefu.

KUMEKUCHA UCHAGUZI MKUU SIMBA, AVEVA ACHUKUA FOMU YA UENYEKITI, WAMBURA, DALALI BADO WANAPIMA UPEPO

MWANACHAMA maarufu wa klabu ya Simba, Evans Aveva (kulia) amechukua fomu ya kuwania uenyekiti

 KIONGOZI wa zamani wa Simba, Michael Wambura bado anapima upepo

MWENYEKITI wa zamani wa Simba, Hassan Dalali bado anapima upepo

UCHAGUZI Mkuu wa klabu ya Simba umeanza kupamba moto baada ya katibu mkuu msaidizi na mjumbe wa zamani wa kamati ya utendaji, Evans Aveva kuchukua fomu ya kuwania uenyekiti.

Aveva alichukua fomu jana asubuhi makao makuu ya klabu hiyo mtaa wa Msimbazi, Dar es Salaam, akiwa amesindikizwa na msafara wa wanachama wa klabu hiyo.

Msafara huo uliongozwa na wanachama waliokuwa wakiendesha pikipiki huku wengine wakiwa wamejazana kwenye mabasi mawili aina ya double coaster.

Baada ya kuchukua fomu, msafara huo wa Aveva uliondoka klabuni hapo na kurudi tena saa 8.45, ambapo mgombea huyo alirejesha fomu yake.

Aveva amekuwa mwanachama wa kwanza kujitokea kuwania nafasi hiyo katika uchaguzi mkuu wa Simba, unaotarajiwa kufanyika Juni 29 mwaka huu.

Wagombea wengine wanaotarajiwa kuchukua fomu ya kuwania nafasi hiyo ni pamoja na Katibu Mkuu wa zamani wa klabu hiyo, Michael Wambura.

Uchunguzi wa blogu hii umebaini kuwa, Wambura na Aveva ndio wanaoungwa mkono na wanachama wengi katika kuwania nafasi hiyo inayoshikiliwa na Ismail Aden Rage.

Mwenyekiti wa zamani wa klabu hiyo, Hassan Dalali naye ametajwa kuwa miongoni mwa wagombea wanaotarajiwa kuchukua fomu za kuwania nafasi hiyo, japokuwa haungwi mkono na wanachama wengi kama ilivyokuwa zamani.

Mwanachama mwingine aliyechukua fomu hadi sasa ni Alfred Elia, anayewania nafasi ya mjumbe wa kamati ya utendaji. Mwisho wa kuchukua na kurejesha fomu ni Jumanne.

Nafasi zinazogombewa katika uchaguzi huo ni ya mwenyekiti, makamu mwenyekiti na ujumbe wa kamati ya utendaji.

KADI ZA UANACHAMA YANGA SASA KWA ATM

Makamu Mwenyekiti wa kalbu ya Yanga SC Bw Clement Sanga (katikati) akiongea na waandishi wa habari makao makuu ya Benki ya Posta, kulia ni mkurugenzi masoko wa Benki ya Posta Bw. Deo Kwiyukwa


Klabu ya Young Africans imeeingia makubaliano na Benki ya Posta nchini juu ya mabadiliko ya utengenezaji wa kadi za wanachama kutoka kwenye mfumo wa zamani (analogy) kwenda kwenye mfumo mpya wa kisasa (digital) ambapo sasa wanachama wake watakua wakitumia kadi zenye mfumo wa ATM.

Mkurugenzi Masoko wa Benki ya Posta nchini Bw. Deo Kwiyukwa amesema wamefikia makubaliano hayo baada ya kukaa na viongozi na kuona njia hiyo itaisaidia klabu kuongeza mapatao kwani wigo wake wa kuandikisha wanachama utakua ni mkubwa kwa nchi nzima na kwa muda mfupi.

"Badala ya wanachama kuja Dar es salaam makao makuu kujaza fomu za uanachama watakua wanaweza kufanya hivyo popote walipo kwa kwenda ofisi za Benki ya Posta na kujaza fomu hizo na baadae kupewa kadi ya uanachama" alisema Deo.

Gharama za kujiunga na uanchama zitabakia zile zile Tshs 15,000/=, na ada ya mwaka elfu Tshs 12,000/= ambapo mwanachama wa Yanga atapata kadi ya TPB yenye logo ya timu yake ambayo pia ataitumia kwenye shughuli za kibenkI kwa huduma ya kuweka na kutoa fedha.

Naye Makamu Mwenyekiti wa Klabu ya Yanga Clement Sanga amesema anaishukuru Benki ya Posta kwa kuweza kufikia makubalianao hayo, kwa kutumia mfumo huu wa kisasa tutaweza kujua idadi ya wachama wetu walio hai kwa wepesi zaidi na taarifa zetu zitaweza kuwafikia wanachama kwa uharaka zaidi.

Uzinduzi rasmi wa kadi mpaya za uanachama utafanyika tarehe 16.05.2014 kwenye hoteli ya Hyatt Kempsinki eneo la Posta (zamani Kilimanjaro Hotel) na mara baada ya uzinduzi moja kwa moja zoezi la kuhamisha wanachama kutoka kwenye mfumo wa analogy kwenda digital utaanza.

HANS AAGA YANGA, AOMBA UANACHAMA

Katibu Mkuu wa Yanga SC, Beno Njovu (kushoto) akiongea na wandishi wa habari, kulia ni aliyekua kocha mkuu wa Yanga Hans Van der Pluim

Hans Van Der Pluijm kocha mkuu wa timu ya Young Africans leo amewaaga rasmi wachezaji wake, viongozi, wapenzi na wanachama baada ya kumalizaa wake wa miezi sita na sasa anakwenda kujiunga na timu Al Shoalah FC iliyopo Ligi Kuu nchini Saudi Arabia.

Kocha huyo mdachi ambaye ameiongoza Young Africans kwa kipindi cha miezi mitano amesema anashukuru kwa sapoti aliyokua akiipata kutoka kwa wachezaji, viongozi, wapenzi na wanachama wa timu hii kwa kipindi chote alipokuwa nchini Tanzania.

"Najua wengi itawashangaza kuona naondoka lakini ukweli ni kwamba niikua na hiyo deal hata hata kabla ya kuja Yanga, nilikua na makubaliano na timu ya Al Shoalah FCmakubaliano ambayo yanaanza mwezi ujao hivyo nilikubaliana na viongozi wa Yanga kuja kufanya kazi kwa kipindi cha miezi sita tu, nashukuru tumefanya kazi salama na baada ya mkataba huo kuisha nipo tayari kurudi kuja kufanya kazi Tanzania" alisema Hans

Naipenda Yanga SC, nimejaza fomu kuomba uanachama hivyo mimi ni sehemu ya Yanga na katika usajili ujao nitawasaidia kuleta wachezaji wazuri ambao wataisaidia timu kwenye msimu ujao kwa Ligi ya Vodacom na mashindao ya Kimataifa.

Kocha Hans anaondoka leo nakwenda Ghana kisha baadae atakwenda nchini Saudu Arabia tayari kwa kujiandaa na maandalizi ya msimu ujao katika timu yangu hiyo ambayo nitaitumikia kwa kipindi cha mwaka mmoja.

Kuhusu usajili kocha mkuu ameshakabidhi ripoti yake ya kiufundi jana, viongozi wanaifanyia kazi kisha baadae itawekwa wazi.

MABADILIKO YA KATIBA YANGA JUNI MOSI

Uongozi wa klabu ya Young Africans Sports Club umeitisha mkutano mkuu wa wanachama wa mabadiliko ya Katiba ili wanachama waweze kutoa maamuzi kwenye baadhi ya vipengele vilivyoongezwa kabla ya kuelekea kwenye mchakato wa Uchaguzi Mkuu wa viongozi.

Akiongea na waandishi wa habari makao makuu mitaa ya Twiga/Jangwani, Katibu Mkuu wa Young Africans Bw Beno Njovu amesema wamefikia kuitisha mkutano huo wa mabadiliko ya Katiba ili wanachama wapate fursa ya kupitisha baadhi ya vipengele kabla ya kuelekea kwenye uchaguzi mkuu.

"Tumekua na mawasiliano na TFF juu ya kuongezwa baadhi ya vipengele kwenye Katiba yetu kabla ya kufanya uchaguzi mkuu wa viongozi, baada ya hapo ni nafasi kwa wanachama wa Yanga sasa kukutana na kuweza kupitisha hivyo vipengele vitakavyoongezwa kwenye Katiba Mpya" alsiema Beno.

Aidha Beno amesema wanachama wakishapitisha/kukubaliana juu ya hivyo vipengele ndipo uoungozi utawasilisha mapendekezo hayo kwa TFF ambayo ikishayabariki, yatapelekewa kwa Msajili nae akiyapitisha ndipo itakua tayari ni Katiba halali ambayo itatumika kwwenye uchaguzi mkuu.

"Nawaomba wanachama wa Yanga wajitokeze kwa wingi kwenye mkutano wa mabadiliko juni mosi 2014 ili waweze kupitisha hivyo vipengele ambavyo vitapelekea kuwa na Katiba Mpya itakayotumika kwa shughuli za kila siku za klabu ya Yanga SC" aliongea Beno.

Eneo na Ukumbi utakapofanyika mkutano huo Juni Mosi 2014 utatangazwa hivi karibuni mara baada ya taratibu zote kukamilika.

REAL MADRID KUTUA DAR AGOSTI 23

KIKOSI cha wachezaji wakongwe wa timu ya Real Madrid kutoka Hispania, kinatarajiwa kuja nchini kucheza mechi ya kirafiki na nyota wa soka wa Tanzania, mchezo utakaofanyika Agosti 23 mwaka huu kwenye Uwanja wa Taifa, Dar es Salaam.

Ofisa Habari wa Kampuni ya TSN, Dennis Ssebo alisema jana kuwa, kikosi hicho kitaundwa na wachezaji nyota wa zamani, 'Real Madrid Legend Team', waliowahi kuwika katika timu hiyo.

Timu hiyo ya Real Madrid Legend iliwakilishwa na mchezaji mkongwe na kapteni wa timu hiyo, Ruben de la Red aliyeambatana na mchezaji mwingine mkongwe, Rayo Garcia pamoja na Isaac Recarey Sanchez,
anayehusika na maswala ya mahusiano ya Real Madrid Legend Club.

Akizungumza na wana habari, mwakilishi huyo wa TSN alisema timu hiyo itawakilishwa na wachezaji 25 na itakuwepo nchini kwa siku tatu ikiwa na ratiba ya kufanya shughuli mbalimbali.

"Nje ya mechi ya kirafiki na timu yetu ya Taifa, wachezaji hawa wakongwe ambao bado wako fiti na wanacheza soka, wanatazamiwa kutembelea mbuga za wanyama kwa minajili ya kuendelea kutangaza utalii wa Tanzania,"alisema.

Mwakilishi na kepteni wa timu ya Real Madrid Legend, aliishukuru kampuni ya TSN kwa kuwapa nafasi ya kuja kuiona Tanzania.

Alisema wanatambua kuwa Tanzania ni moja ya nchi yenye mashabiki wengi wa soka na anaamini mechi yao na vijana wa Tanzania itakuwa kali na mashabiki watakaohudhuria watafurahia.

Aliwashauri vijana wa timu ya Tanzania kuanza kujifua mapema kabla ya kukabiliana nao kwa kile alichodai kuwa, inawezekana baadhi yao hawachezi tena soka, lakini bado wako fiti na wembe mkali.

Rais wa Shirikisho la Soka nchini (TFF), Jamal Malinzi aliipongeza kampuni ya TSN kwa hatua hii nzuri itakayoongeza tija kwa soka nchini, machoni mwa ulimwengu wa soka duniani na kuahidi kutoa ushirikiano kamili katika ujio huu.

“TSN wamefanya jambo la busara sana kwa soka nchini. Ujio wa timu hii utatupa mafunzo mengi na uzoefu walionao wachezaji hawa, lakini pia watasaidia kuitangaza nchi kwa ujumla. TFF inaahidi kutoa ushirikiano kamili kwa TSN ili kufanikisha ziara hii,” alisema.

TSN imesaini mkataba na wawakilishi wa Real Madrid leo katika hoteli ya Serena.

JK AKUTANA NA SAMATTA NA ULIMWENGU DRC

RAIS wa Jamhuri ya Muungano Tanzania, Jakaya Mrisho Kikwete leo amewatembelea washambuliaji wawili Watanzania wanaocheza TP Mazembe ya Jamhuri ya Kidemokrasia ya Kongo (DRC), Mbwana Ally Samatta na Thomas Emannuel Ulimwengu.


Tovuti ya TPM imeandika kwamba Rais Kikwete aliwatembelea wachezaji hao leo mjini Kinshasa ambako wapo na timu yao kwa ajili ya mchezo wa Ligi Kuu ya DRC dhidi ya mahasimu wao katika mbio za ubingwa AS Vita.

Rais Kikwete akiwa na Samatta kulia na Ulimwengu kushoto mjini Kinshasa leo

Rais Kikwete aliye ziarani DRC, alikuwa ameambatana na maofisa wawili wa Ubalozi wa Tanzania majira ya Saa 6:15 mchana alipokutana na wachezaji hao pamoja na Mwenyekiti wa klabu yao, Moses Katumbi.

Rais Kikwete yupo Kinshasa tangu jana usiku kwa ziara maalum ya Saa 24 juu ya ushirikiano wa DRC na Tanzania, ambako alikutana na rais mwenzake wa huko, Joseph Kabila.

Kikwete alitumia robo saa kuzungumza na akina Samatta katika hoteli ya Congo River, ambako wameweka kambi kwa ajili ya mechi ya kukata na shoka kesho.

Rais Kikwete aliwakumbusha Samatta na Ulimwengu kwamba, Watanzania wanajivunia kuwaona wakiwa na jezi za TPM na kwamba wao ni tegemeo la timu ya taifa, Taifa Stars kwa sasa.

FLYING EAGLES YATUA DAR, KUKIPIGA NA NGORONGORO HEROES J'PILI, KIINGILIO BUKU MBILI

Timu ya Nigeria (Flying Eagles) imewasili nchini kwa ajili ya mechi ya michuano ya Afrika kwa vijana wenye umri chini ya miaka 20 dhidi ya Tanzania (Ngorongoro Heroes) itakayochezwa Jumapili (Mei 11 mwaka huu) katika Uwanja wa Taifa, Dar es Salaam.

Flying Eagles yenye msafara wa watu 32 imewasili leo (Mei 8 mwaka huu) alfajiri kwa ndege ya Ethiopian Airlines ambapo imefikia hoteli ya Sapphire. Mechi hiyo ya kwanza ya raundi ya pili itafanyika kuanzia saa 10 kamili jioni.

Nigeria inayofundishwa na kocha Manu Garba itafanya mazoezi leo (Mei 8 mwaka huu) saa 10 jioni itafanya mazoezi kwenye Uwanja wa Taifa ambao ndiyo utakaotumika kwa mechi siku ya Jumapili.

Viingilio katika mechi hiyo vitakuwa sh. 2,000 kwa sehemu zote wakati upande wa VIP itakuwa ni sh. 5,000. Tiketi zitauzwa uwanjani siku ya mechi katika magari maalumu.

Ngorongoro Heroes ambayo katika raundi ya kwanza iliitoa Kenya kwa jumla ya mabao 4-3 inaendelea kujinoa jijini Dar es Salaam chini ya Kocha wake John Simkoko na Msaidizi wake Mohamed Ayoub kujiweka sawa kwa mechi hiyo inayosubiriwa kwa hamu na washabiki wa mpira wa miguu nchini.

Nigeria kama ilivyo kwa nchi nyingine 12 imeanzia moja kwa moja raundi ya pili kutokana na ratiba iliyopangwa na Shirikisho la Mpira wa Miguu Afrika (CAF). Nchi hizo ni Afrika Kusini, Angola, Benin, Burkina Faso, Cameroon, Gabon, Ghana, Jamhuri ya Kidemokrasi ya Congo (DRC), Mali, Misri, Morocco na Zambia.

MICHUANO YA BEACH SOOCER YAINGIA ROBO FAINALI
Michuano ya mpira wa miguu wa ufukweni (beach soccer) inayoendeshwa na Shirikisho la Mpira wa Miguu Tanzania (TFF) ikishirikisha vyuo mbalimbali vya Dar es Salaam imeingia hatua ya robo fainali.

Robo fainali hiyo inayoshirikisha timu nane itachezwa Jumamosi (Mei 10 mwaka huu) kwenye ufukwe wa Escape One uliopo Mikocheni kuanzia saa 5 asubuhi, huku Chuo cha Elimu ya Biashara (CBE) na Taasisi ya Ustawi wa Jamii (SWI) zikicheza robo fainali ya kwanza.

Chuo Kikuu cha Ardhi (AU) na Chuo cha Kumbukumbu ya Mwalimu Nyerere watcaheza robo fainali ya pili kuanzia saa 6 kamili. Saa 8 kamili itaanza robo fainali ya tatu itakayozikutanisha Taasisi ya Uhasibu (TIA) na Chuo cha Usimamizi wa Fedha (IFM).

Robo fainali ya mwisho itakayoanza saa 9 kamili itakuwa kati ya Taasisi ya Teknolojia Dar es Salaam (DIT) na Chuo cha Utumishi Magogoni. Washindi watacheza nusu fainali Jumapili (Mei 11 mwaka huu) kwenye ufukwe huo huo.

Mechi za kutafuta mshindi wa tatu, na ile ya fainali zitachezwa kwenye ufukwe huo huo wikiendi ya Mei 17 mwaka huu.

MWINYI KAZIMOTO ATUA TAIFA STARS

Kiungo mshambuliaji wa timu ya Al Markhiya ya Qatar, Mwinyi Kazimoto amewasili nchini kujiunga na kikosi cha Taifa Stars kinachojiandaa na mechi ya michuano ya Afrika dhidi ya Zimbabwe.

Kazimoto ambaye amewasili nchini jana (Mei 5 mwaka huu) anatarajia kusafiri leo (Mei 6 mwaka huu) kwenda Tukuyu mkoani Mbeya ambapo Taifa Stars imeweka kambi yake chini ya Kocha Mart Nooij kujiandaa kwa mechi hiyo.

Taifa Stars inayodhaminiwa na Kilimanjaro Premium Lager juzi (Mei 4 mwaka huu) ilicheza mechi ya kirafiki na Malawi (Flames) ikiwa ni sehemu ya maandalizi kabla ya kuikabili Zimbabwe (Mighty Warriors). Mechi hiyo dhidi ya Flames ilichezwa Uwanja wa Kumbukumbu ya Sokoine na kumalizika kwa suluhu.
WACONGO KUCHEZESHA MECHI YA NGORONGORO HEROES
Shirikisho la Mpira wa Miguu Afrika (CAF) limeteua waamuzi kutoka Jamhuri ya Kidemokrasi ya Kongo (DRC) kuchezesha mechi kati ya Tanzania (Ngorongoro Heroes) na Nigeria.

Mechi ya mchujo kusaka tiketi ya kucheza Fainali za 19 za Afrika kwa vijana wenye umri chini ya miaka 20 zitakazofanyika mwakani nchini Senegal itachezwa wikiendi hii jijini Dar es Salaam.

Waamuzi hao wataongozwa na Jean-Jacques Ndala Ngambo atakayesaidiwa na Oliver Safari Kabene, Nabina Blaise Sebutu na Mupemba Ignace Nkongolo. Kamishna wa mechi hiyo namba 37 ni Poiret Antoine Ralph Danny kutoka Shelisheli.

TFF KUANZISHA MFUKO WA MAENDELEO

Shirikisho la Mpira wa Miguu Tanzania (TFF) limeazimia kuanzisha Mfuko wa Maendeleo ya Mpira wa Miguu Tanzania (TFF Development Trust Fund).

Uamuzi wa kuanzisha mfuko huo umepitishwa katika kikao cha Kamati ya Utendaji ya TFF iliyokutana Mei 3 mwaka huu jijini Dar es Salaam ambapo madhumuni yake ni kutafuta vyanzo vya rasilimali za kuendeleza programu za mpira wa miguu Tanzania.

Mfuko huo utakaokuwa chini ya uenyekiti wa Rais aliyepita wa TFF, Leodegar Tenga utatafuta rasilimali za kuendeshea michuano ya Taifa na kimataifa ya wavulana na wasichana kwa vijana wenye umri chini ya miaka 13, 15, 17 na 19.

Pia kuendeleza maeneo ya ardhi kote Tanzania ambayo ni mali ya TFF kwa kujenga vituo vya michezo (sports centres), kutafuta rasilimali za kutoa mafunzo kwa makocha, marefa, madaktari wa tiba ya michezo na viongozi (administrators).

Majukumu mengine ya mfuko huo ni kuagiza na kusambaza vifaa vya michezo hasa kwa watoto wadogo (grassroots) na vijana.

Mfuko huo utazinduliwa Oktoba 8 mwaka huu ambayo ni siku ya kilele cha Tanzania kutimiza miaka 50 ya uanachama wake katika Shirikisho la Kimataifa la Mpira wa Miguu (FIFA).

Mbali ya Tenga, wajumbe wengine wanaounda bodi ya mfuko huo ni Mwenyekiti wa zamani wa Simba, Ayoub Chamshama, Katibu Mkuu wa zamani wa TFF, Fredrick Mwakalebela, Mkurugenzi Mkuu wa Bodi ya Michezo ya Kubahatisha, Tarimba Abbas na Mbunge wa Viti Maalum, Zarina Madabida.

UWANJA WA SOKOINE MBEYA KUWEKWA NYASI BANDIA

NA SOLOMON MWANSELE,MBEYA.


SHIRIKISHO la Soka Tanzania (TFF), linatarajia kutuma wawakilishi kutoka CAF na FIFA ili kuufanyia ukaguzi uwanja wa Sokoine, kuona kama una vigezo vya kuweza kutumika kwa mashindano ya michezo ya kimataifa.

Imeelezwa wataalamu hao kutoka CAF na FIFA wanatarajiwa kuwasili jijini Mbeya, hivi karibuni kwa ajili ya kufanikisha ukaguzi huo.

Rais wa TFF,Jamal Malinzi, aliyasema hayo jana alipokuwa akijibu maswali mbalimbali ya waandishi wa habari,mara baada ya kumalizika kwa mchezo wa kirafiki wa kimataifa kati ya Malawi na Taifa Stars, uliochezwa uwanja wa Sokoine,mjini hapa.

Malinzi alisema lengo la TFF ni kuhakikisha kuwa michezo ya ngazi za kimataifa inachezwa katika viwanja mbalimbali nchini na siyo kuishia Dar es Salaama pekee yake.

Alisema wataalamu hao kutoka CAF na FIFA watafika uwanja wa Sokoine kwa ajili ya kuukagua ili kuweza kuona kama unafaa na unastahili kwa mechi za kimataifa na hilo likipita wapenzi wa soka Mbeya wategemee kuona mechi nyingi za kimataifa.

Aliongeza hivi sasa Shirikisho hilo linahangaika kuhakikisha kuwa viwanja vya michezo katika mikoa mingine nchini vikiwemo Nelson Mandela, kilichopo Sumbawanga, nacho kinaboreshwa ili michezo ya kimataifa iweze kupelekwa huko.

“Uwanja wa Sheikh Amri Abeid uliopo jijini Arusha, CCM Kirumba uliopo Mwanza tunataka kuhakikisha kama uwanja unakidhi hadhi basi michezo ya kimataifa inapelekwa ili kutoa burudani kwa watanzania wengi zaidi” alisema Malinzi.

Kuhusu Taifa Stars, Rais huyo wa TFF alisema wamempata Kocha mpya,Mart Nooij kutoka nchini Uholanzi,ambaye ni mtaalamu aliyekaa na wachezaji kambini kwa muda mfupi na pia ameuona mchezo na Malawi maarufu zaidi The Flames.

Kwa mujibu wa Malinzi, bila shaka Kocha Nooij baada ya kukiona kikosi hicho kikicheza ataona yeye kama kuna mabadiriko anataka kuyafanya na ini imani ya TFF kufika Mei 18, mwaka huu timu itakapocheza na Zimbabwe iitakuwa imebadirika zaidi.

Malinzi alisema lakini wapenzi wa soka wameweza kuona jinsi timu hiyo inavyocheza kitimu zaidi, kwani licha ya kutoibuka na ushindi katika mchezo huo lakini imeweza kufika golini mwa Malawi na kukosa magoli ya wazi manne.

“Mmemuona mshambuliaji wetu John Bocco amekosa magoli mawili, na mawili mengine likiwemo la kichwa la Aggrey Morris…Lakini yote haya ni jambo la kawaida kwenye mchezo wa soka” alisema Malinzi.

Kikubwa zaidi katika mchezo huu, ni kuwa tumeshambuliwa na Malawi lakini bado tumeweza kuzuia vizuri na hatujafungwa goli,kwani ni lazima uangalie kama umefika kwa adui na adui alipokushambulia umefanya nini.

Rais wa TFF aliongeza hivi sasa beki ya Taifa Stars, wachezaji wa viungo na hata washambuliaji wameimarika zaidi kwa kuweza kufanya mashambulizi mengi langoni mwa Malawi.

RED CROSS KUTETA NA TFF

NA SOLOMON MWANSELE,MBEYA.


CHAMA Cha Msalaba Mwekundu Tanzania, kimesema kinataka kuzungumza na uongozi wa Shirikisho la Soka nchini (TFF), ili kuweza kuboresha zaidi utoaji wa huduma kwenye viwanja mbalimbali vya soka.

Imeelezwa wamefikia hatua hiyo kutokana na kuwa TFF wamekuwa ni mojawapo ya wadau ambao wanasababisha mikusanyiko mikubwa ya watu wanaojitokeza kushuhudia michezo mbalimbali ikiwemo ya Ligi Kuu Tanzania Bara.

Rais wa Chama hicho nchini,Dk.George Nangale, aliyayasema hayo mwishoni mwa wiki wakati akizungumza na waandishi wa habari, katika viwanja hoteli ya Mbeya Paradise Inn, iliyopo jijini Mbeya.

Dk.Nangale alisema Chama hicho kinahitaji msaada kutoka TFF ili kiweze kufanya kazi zake za kutoa huduma kwa wachezaji wanaoumia viwanjani kwa ufanisi zaidi, kuliko ilivyo sasa hivi.

Aliongeza lengo la kukutana na uongozi wa TFF chini ya Rais wake,Jamali Malinzi, ni kuhakikisha kunakuwepo utaratibu mzuri unaoeleweka kati ya Chama hicho na Shirikisho hilo la Soka.

“Mbali ya TFF pia tunataka kuwa kushirikiana kwa karibu zaidi na vyama vya siasa nchini,kwani navyo vinapelekea mikusanyiko mikubwa kwenye mikutano yao ya hadhara” alisema Dk.Nangale.

Alisema Chama hicho kinao wataalamu wa kutosha katika masuala ya utoaji huduma katika matukio, hivyo wanatarajia kuwa mazungumzo yao kati ya TFF na vyama vya siasa yataenda vizuri.

Dk.Nangale alisema wanataka walau wawe na mahema maalumu, viwanjani ambapo wachezaji wakiumia watakuwa wanahudumiwa humo na kama tatizo linakuwa kubwa zaidi basi ndipo wakimbizwe hospitalini kwa huduma zaidi.

AZAM YAVUNJA MKATABA NA KONE WA IVORY COAST

UONGOZI wa klabu ya Azam FC umefikia makubaliano ya kuvunja Mkataba na mshambuliaji kutoka Ivory Coast, Ismail Kone ambaye alikuwa anamaliza Novemba mwaka huu.

Pande zote mbili zimefikia makubaliano na mchezaji huyo amepewa haki zake na kurejea nchini mwao. Aidha, Azam FC inawashukuru kwa mchango wao, wachezaji wake wanne, Jabir Aziz, Ibrahim Mwaipopo, Malika Ndeule na Omar Mtaki kwa kipindi chao chote walichoitumikia klabu hiyo.

Wanne hao wamemaliza mikataba yao na hawataongezewa- klabu inawashukuru kwa mchango wao kwa kipindi chote tangu wajiunge nayo. Azam FC pia imepokea na kuyakubali maombi ya wachezaji wake wawili, Samih Haji Nuhu na Luckson Kakolaki kustaafu kwa sababu mbalimbali.

Nuhu anasumbuliwa na maumivu ya goti ambalo hana matumaini ya kupona karibuni, wakati Kakolaki ameamua kustaafu ili achukue mafunzo ya ukocha. Klabu imempa ajira ya kudumu Nuhu katika moja ya viwanda vyake, wakati Kakolaki ameingizwa kwenye benchi la Ufundi la akademi ya klabu.

Tayari klabu imekamilisha usajili wa wachezaji wapya watatu, ambao ni washambuliaji Didier Kavumbangu wa Burundi, Ismaila Diarra kutoka Mali na mzalendo Frank Domayo.

Usajili wa Kavumbangu na Diarra unafanya Azam iwe na wachezaji watano wa kigeni, wengine wakiwa ni Kipre Herman Tchetche na Kipre Michael Balou, ndugu wawili na pacha kutoka Ivory Coast na Mganda Brian Umony.

Azam chini ya kocha wake, Mcameroon Joseph Marius Omog imepanga kuboresha zaidi kikosi ili msimu ujao iweze kupata mafanikio zaidi katika Ligi ya Mabingwa Afrika na kutetea ubingwa wa Bara.

KATIBA SIMBA SASA RUKSA, WALIOWAHI KUFUNGWA MARUFUKU KUGOMBEA UONGOZI

MBIO za uchaguzi mkuu wa Simba zinatarajia kuanza rasmi wakati wowote kuanzia sasa, baada ya marekebisho ya katiba ya klabu hiyo kupitishwa rasmi.

Katiba hiyo imepitishwa na ofisi ya Msajili wa Klabu na Vyama vya Michezo nchini, ambapo uongozi wa Simba kesho utatangaza tarehe ya uchaguzi mkuu wa klabu hiyo.

Msajili ameipitisha katiba hiyo lakini amekataa kipengele kilichofanyiwa marekebisho na wanachama wa Simba cha kutaka mwanachama aliyewahi kufungwa kwa kosa la jinai, aruhusiwe kugombea.

Akizungumza Dar es Salaam jana, Katibu Mkuu wa Simba, Ezekiel Kamwaga, alisema leo Kamati ya Uchaguzi chini ya Mwenyekiti Damas Ndumbaro na makamu wake Salum Madenge, itakutana kwa ajili ya kupanga tarehe ya uchaguzi.

"Uchaguzi wa Simba sasa umeiva niwaombe tu wanachama watumie fursa yao kuhakikisha wanachangamkia nafasi za uongozi," alisema Kamwaga.

Alisema kilichokuwa kikisubiriwa kilikuwa ni katiba na kwa kuwa imeshapatikana, hakuna kipingamizi cha uchaguzi huo.

Kamwaga alisema katika mapendekezo yote yaliyomo kwenye katiba hiyo yaliyoazimiwa katika mkutano mkuu wa wanachama uliofanyika Machi 16 mwaka huu, yamepitishwa isipokuwa kimoja cha sifa ya mgombea.

Alisema pia kwa mujibu wa katiba hiyo mpya ya Simba, nafasi ya mwenyekiti sasa itajulikana kama Rais na nafasi ya makamu imebadilika na kuwa Makamu wa Rais.

Katibu huyo katiba ya Simba imepitisha sheria mpya ambayo inataka tawi la Simba liwe na wanachama wasiozidi 250 katika kila kata na wasiopungua 50 na kwamba mpaka sasa hakuna tawi lolote la klabu hiyo lenye wanachama hai 250.

Kamwaga pia alisema kupitia katiba hiyo kumeundwa Kamati ya Maadili na Kamati ya Rufani na kati ya wajumbe watano wa kuchaguliwa, nafasi moja lazima iwe ya mwanamke, hivyo amewataka wanawake kuomba uongozi katika klabu hiyo.

Uongozi wa Simba unaomaliza muda wake chini ya Ismail Rage uliingia madarakani Mei 9, 2010, ambapo sasa klabu hiyo inaingia katika mchakato wa kupata viongozi wapya wa klabu hiyo.

Wakati huo huo, wachezaji watakaoachwa na klabu ya Simba wanatarajia kutangazwa kesho kwa lengo la kupewa nafasi ya kutafuta timu nyingine mapema.

Akizungumza Dar es Salaam jana, Katibu Mkuu wa Simba, Ezekiel Kamwaga, alisema Kamati ya Usajili leo itakaa kikao na wachezaji hao ili kufikia makubaliano nao na kuwaacha watafute timu nyingine.

"Masuala yote ya usajili yapo sawa na tunategemea kesho (leo) kukaa na wachezaji kwa ajili ya kuagana na kuwaacha huru," alisema Kamwaga.

Alisema wameamua kuchukua hatua ya kukaa nao kwanza kabla ya kutangaza majina yao ili kuwaondolea presha.

"Wa kwanza kujua kama wanaachwa ni wao wachezaji hatukupenda tutangaze majina yao kabla ya kuzungumza nao," alisema Kamwaga.

Alisema pia wapo baadhi ya wachezaji ambao wameuomba uongozi waachwe huru, ili kuangalia masuala mengine ya maisha.

Katika ripoti ya kocha mkuu wa Simba, Zdravko Logarusic, amependekeza kikosi kipya cha simba kiwe na wachezaji 25 tu.

Kocha huyo ameagiza kila nafasi iwe na wachezaji wawili wa ndani na makipa watatu.

Kwa mujibu wa Kamwaga, kati ya wachezaji waliopendekezwa na kocha huyo waachwe si wote wataoondolewa kwenye kikosi hicho cha Msimbazi.

"Tutaangalia kulingana na nafasi ya mchezaji husika na kuamua wa kuwaacha," alisema Kamwaga.

KUMBUKUMBU YA MZEE MOHAMED SLEYUM ZAHOR

MOHAMED SLEYUM ZAHOR (1922-2003)


HATIMAYE umetimiza miaka 11 tangu ulipofariki dunia mwaka 2003
baada ya kuugua kwa muda mrefu na kuzikwa katika makaburi ya Kigilagila,
Kiwalani, Dar es Salaam.

Kifo chako kimetuachia pengo na upweke mkubwa. Tunazikosa simulizi zako, maono
yako, ucheshi wako, busara zako na hekima zako.

Unakumbukwa sana na watoto wako, Rashid, Pili, Amisa,
Shani, Asha, Saumu, Nuru na Hilali pamoja na wajukuu zako wote.

Hakika sisi zote ni waja wa Mwenyezi Mungu na kwake lazima tutarejea.

Tunaamini maandiko ya Mungu kwamba kila chenye roho, lazima kitaonja mauti.

Mungu ailaze roho yako mahali pema, peponi. Amin

DIAMOND ASHINDA TUZO SABA ZA KILIMANJARO

1.Tuzo ya Wimbo bora wenye vionjo vya asili ya Tanzania ilichukuliwa na wimbo wa Bora Mchawi ya Dar Bongo Massive.

2.Tuzo ya msanii Bora chipukizi anayeibukia ilichukuliwa na Young Killer.
3.Tuzo ya wimbo bora wa Zouk imechukuliwa na wimbo wa Yahaya wa Lady Jay Dee.
4.Tuzo ya wimbo wa Afropop ni Number One ya Diamond Platnumz
5.Tuzo ya wimbo bora wa Ragga/Dancehall ni wimbo wa Nishai wa Juru ft. Tash.
6.Tuzo ya wimbo bora wa kiswahili ni Ushamba Mzigo ya Mashujaa Band.
7.Tuzo ya mwimbaji bora wa kiume taarab,mshindi ni Mzee Yusuph.
8.Tuzo ya mwimbaji bora wa kike Taarabu ni Isha Ramadhani.
9.Tuzo ya wimbo bora wa Taarab ni Wasi wasi wako wa Mzee Yusuph.
10.Tuzo ya wimbo bora wa Reggea imechukuliwa na wimbo wa Niwe na wewe ya Dabo.
11.Tuzo ya Mtunzi bora wa mwaka Hip hop imechukuliwa na Fid Q,
12.Tuzo ya wimbo bora wa kushirikisha/kushirikiana ni wimbo wa Muziki Gani ya Ney wa Mitego ft.Diamond.
13.Tuzo ya msanii bora wa Hip Hop imeenda kwa Fid Q.
14.Tuzo ya wimbo bora wa Hip Hop ni Nje ya Box ya Nikki wa Pili ft.Joh Makini na G nako.
15.Tuzo ya mwimbaji bora wa kiume kizazi kipya imeenda kwa Diamond Platnumz.
16.Tuzo ya mwimbaji bora wa kiume Bendi imeenda kwa Jose Mara.
17.Tuzo ya mwimbaji bora wa kike bendi ni Luiza Mbutu.
18.Tuzo ya wimbo bora wa R&B imechukuliwa na Closer ya Vanessa Mdee.
19.Tuzo ya kikundi cha mwaka imeenda kwa Weusi.
20.Tuzo ya mtunzi bora wa mwaka imeenda kwa Diamond Platnumz.
21.Tuzo ya mtunzi bora wa mwaka bendi ni Christian Bella.
22.Tuzo ya mtunzi bora wa mwaka taarab imeenda kwa Mzee Yusuph.
23.Tuzo ya wimbo bora wa Afrika Mashariki imechukuliwa na wimbo wa Tubonge wa Jose Chameleone.
24.Tuzo ya wimbo bora wa mwaka ni Number One ya Diamond Platnumz.
25.Tuzo ya heshima ya Hall of fame Institution imeenda kwa Masoud Masoud.
26.Tuzo ya heshima ya Hall of fame individual imeenda kwa Rehan Bitchuka.
27.Tuzo ya mtumbuizaji bora wa kike imeenda kwa Isha Ramadhani.
28.Tuzo ya wimbo bora wa mwaka ni Number One ya Diamond Platnumz.
29.Tuzo ya Mtayarishaji bora wa nyimbo za kizazi kipya ni Man Water.
30.Tuzo ya Mtayarishaji bora wa nyimbo wa bendi ni Amoroso.
31.Tuzo ya video bora ya Muziki ya Mwaka ni Number One ya Diamond Platnumz.
32.Tuzo ya kikundi bora cha mwaka Taarab ni Jahaz Modern Taarab.
33.Tuzo ya kikundi bora cha mwaka bendi ni Mashujaa.
34.Tuzo ya rapa bora wa bendi imeenda kwa Furgason
35.Tuzo ya Mtayarishaji bora wa mwaka taarabu imeenda kwa Enrico
36.Tuzo ya Mtumbuizaji bora wa kiume kizazi kipya ni Diamond Platnumz.

TIMU 16 KUCHEZA LIGI KUU MSIMU UJAO

Ligi Kuu ya Vodacom (VPL) kuanzia msimu wa 2015/2016 itakuwa na timu 16 badala ya 14 za sasa.

Mabadiliko hayo yamepitishwa na Kamati ya Utendaji ya Shirikisho la Mpira wa Miguu Tanzania (TFF) iliyokutana jana (Mei 3 mwaka huu) jijini Dar es Salaam baada ya kupokea mapendekezo ya kuongeza idadi ya timu kutoka kwenye Kamati ya Mashindano.

Uamuzi huo umefanywa kwa lengo la kuongeza ushindani katika ligi hiyo, na kuwezesha wachezaji kupata mechi nyingi zaidi za mashindano. Kwa mabadiliko hayo maana yake ni kuwa Ligi ya msimu wa 2015/2016 itakuwa na mechi 240 wakati kwa sasa ina mechi 182.

Kuhusu idadi ya wachezaji wa kigeni kwenye VPL, Kamati ya Utendaji itafanyia uamuzi mapendekezo katika eneo hilo baada ya kwanza kupata maoni ya klabu za VPL na Ligi Daraja la Kwanza (FDL) ambazo Mei 11 mwaka huu zitakutana na Rais wa TFF, Jamal Malinzi.

Mapendekezo ya Kamati ya Mashindano ni kuwa idadi ya wachezaji wa kigeni iendelee kuwa watano kama ilivyo katika kanuni za sasa za VPL.

YANGA YANAWA MIKONO KWA AZAM, YADAI KAVUMBAGU, DOMAYO WAMEWASALITI

Uongozi wa klabu ya Young Africans unapenda kuwajulisha wanachama wake, wapenzi wa soka na wadau kwa ujumla kuwa taarifa za kuhama kwa wachezai wake Didier Kavumbagu na Frank Domayo kwenda kujiunga na Azam FC zisiwakatishe tamaa, ni mapenzi ya wachezaj wenyewe kwani walishakubaliana na uongozi kila kitu juu ya kuendelea kuitumikia Yanga kabla ya siku mbili hizi kuonekana wakiwa wamejiunga na wana ramba ramba.


Yanga tayari ina wachezaji watatu wenye mikataba inayoendelea na kama kanuni za VPL kwa wachezai wa kimataifa kuwa watatu zitatumika wachezaji Haruna Niyonzima, Hamisi Kizza na Emmanuel Okwi ndio watakaoendelea, hivyo uongozi uliomba mwongozo kwa TFF juu ya taratibu zitakazotumika kwa msimu ujao kabla ya kuwasainisha Kavumbagu na Twite.

Awali uongozi wa Yanga ulikuwa kwenye mazungumzo na wachezaji hao tangu mwanzoni mwa msimu wa 2013/2014 juu ya kuongezewa muda wa mikataba yao ili waweze kuendelea kuitumika Yanga kwa ajili msimu mpya ujao 2014/2015.

Didier Kavumbagu na Mbuyu Twite ambao mikataba yao ilikuwa mwishoni waliongea na uongozi tangu mapema mwaka jana mwezi wa Septemba juu ya kuweka sahihi zao na kuendelea kuitumikia Yanga na kukubaliana mambo yote ya msingi kikubwa kilichokuwa kinasubiriwa ni maamuzi ya TFF juu ya usajili wa wachezaji wa kigeni msimu mpya wa 2014/2015 kwani Azimio la Bagamoyo linapaswa kuanza kutekelezwa msimu huu

Uongozi wa Yanga uliandikia TFF barua mapema kuomba kupewa mwongozo wa kanuni zitakazotumika kwenye usajli kwa wachezaji wa kimataifa kwa msimu mpya kufuatia Azimio la Bagamoyo kuelekeza msimu huu kila timu inapasa kuwa na wachezaji watatu wa kigeni, mpaka sasa uongozi wa Yanga haujapata majibu juu ya utaratibu utakaotumika kwenye msimu wa Ligi Kuu ijayo.

Hivyo makubaliano ya wachezaji Didier Kavumbagu, Mbuyu Twite na uongozi wa Yanga SC yalikua yakisubira majibu ya TFF juu ya kanuni zipi zitakazotumika kwenye usajili msimu wa 2014/2015 kwa wachezaji wa kigeni na katika hali ya kushangaza Kavumbagu akaonekana tayari ameshasaini kuichezea timu ya Azam FC.

Kuhusu Frank Domayo aliyeripotiwa jana kujiunga na Azam FC pia alikuwa katika makubaliano ya kuongeza mkataba tangu mwezi Julai 2013, alikubaliana na uongozi juu ya mambo yote ya msingi na kilichobakia ilikuwa ni kuweka sahihi kwenye mkataba mpya, lakini Domayo alisema hawezi kusaini mpaka siku atakapokuja mjomba wake ambaye ndie wakala wake na ahadi hiyo iliendelea kwa muda wa mwaka mzima kabla ya jana kusikia ameshasaini timu nyngine.

Habari hizi zimewashitua wapenzi, wanachama na washabiki wa Young Africans, lakini ukweli ni kuwa wachezaji wenyewe walishindwa kuwa wakweli kwa viongozi na mwisho wa siku walikuwa na mipango yao ya kuondoka, hivyo uongozi ulijitahidi kadri ya uwezo wake, lakini wachezaji wanaonekana hawakuwa tayari kuendelea kuichezea Yanga SC.

Taarifa kamili kuhusu mipango ya timu kwa msimu ujao pamoja na ripoti ya kocha mkuu Hans pamoja na benchi lake la Ufundi zitatolewa hivi karibuni baada ya benchi la ufundi na uongozi kukaa kwa pamoja na kuafikiana mipango ya msimu ujao.

Aidha uongozi wa Yanga SC unawaomba wanachama wake, wapenzi na washabiki wasiwe na wasi wasi juu ya kuondoka kwa wachezaji hao kwani Yanga bado ina nafasi wachezaji wengi wenye vipaji na itaendelea kuboresha kikosi chake kwa kuzingatia maelekezo ya kocha mkuu Hans katika usajli wa msimu ujao

DOMAYO: HATA YANGA WAFANYE NINI, MIMI NI MCHEZAJI WA AZAM

KIUNGO wa kimataifa wa Tanzania, Frank Domayo amesema amekwishamalizana na Azam FC na kwa vyovyote ataheshimu makubaliano yake na klabu hiyo kwa kuwa yeye ni Mkristo safi.


Akizungumza mjini  Mbeya juzi, Domayo amesema kwamba amesaini Mkataba wa miaka miwili na Azam FC na amesikia kashikashi alizozipata kiongozi wa klabu hiyo aliyekuja hapa kumsainisha, lakini kwa vyovyote ataheshimu makubaliano.

“Nimesikia, lakini ninavyojua hakuna Mkataba uliochanwa, ila hata kama Mkataba umechanwa, mimi nina nakala yangu, na kwa vyovyote nitaheshimu makubaliano, mimi ni Mkristo safi,”alisema

Hata hivyo, Domayo hakutaka kuzungumza zaidi akisema kwa sasa akili yake anaielekeza kwenye mchezo wa Taifa Stars na Malawi Jumapili mjini hapa.

“Hayo yamekwishapita kwa upande wangu, kwa sasa akili yangu naielekeza kwenye mchezo wa Malawi,”alisema.

Rais wa Shirikisho la Soka Tanzania (TFF), Jamal Malinzi jana alisema kwamba amemteua Wakili Wilson Ogunde kuchunguza mlolongo mzima wa tukio la usajili wa Domayo juzi mjini hapa.

Malinzi alisema baada ya kukamilisha uchunguzi wake, Wakili Ogunde ataishauri TFF kuhusu hatua za kisheria na kikanuni za kuchukua. Malinzi ametoa wito kwa wachezaji, klabu na wadau wa mpira wa miguu kufuata kanuni na taratibu katika utendaji wao.

Viongozi wa Azam FC juzi walikwenda kwenye kambi ya Taifa Stars kukamilisha taratibu za usajili na kiungo Frank Domayo, aliyemaliza Mkataba wake Yanga SC.

Baada ya kufanikiwa kumsainisha Mkataba wa miaka miwili, wasimamizi wa kambi waliwaitia Polisi viongozi wa Azam FC ambao hata hivyo baadaye waliachiwa. Lakini inadaiwa fomu za usajili zilichanwa

Azam si klabu ya kwanza kusajili mchezaji katika kambi ya timu ya taifa, kwani vigogo wa soka nchini, Simba na Yanga ndiyo waasisi wa mchezo huo.

Mwaka jana Simba SC walisaini Mkataba mpya na kiungo wao, Amri Kiemba akiwa katika kambi ya Taifa Stars, hoteli ya Tansoma mjini Dar es Salaam.

Yanga SC iliwasajili Domayo kutoa JKT Ruvu, Kevin Yondan kutoka Simba SC wote wakiwa katika kambi ya Taifa Stars Dar es Salaam miaka miwili iliyopita.

IMETOLEWA KUTOKA BLOGU YA BIN ZUBEIRY.

YANGA YAZIDI KUMEGUKA, DOMAYO AFUATA NYAYO ZA KAVUMBAGU, AMWAGA WINO AZAM

KIUNGO mkabaji wa Yanga SC, Frank Domayo amesaini mkataba wa miaka miwili kujiunga na mabingwa wapya wa Tanzania Bara, Azam FC jana mjini Mbeya.

Domayo amesaini Azam FC baada ya kumaliza mkataba wake wa miaka miwili na Yanga SC, ambayo alijiunga nayo akitokea JKT Ruvu miaka miwi iliyopita.

Katibu wa Azam FC, Nassor Idrisa Mohamed ‘Father’ amesema katika kuendelea kukiimarisha kikosi chao kwa ajili ya msimu ujao, wamepiga hatua nyingine kwa kumsaini Domayo.

Father alisema wamemsajili Domayo kutokana na ushauri na mapendekezo ya Kocha Mkuu wa timu hiyo,
Joseph Marius Omog.

Domayo anakuwa mchezaji wa wa pili ndani ya siku mbili kusajiliwa na Azam FC kutoka Yanga. Siku mbili zilizopita, Azam ilifanikiwa kumsajili mshambuliaji wa kimataifa wa Burundi, Didier Kavumbagu baada ya mkataba wake na Yanga kumalizika.