MWALIMU NYERERE ALIKATAA KUKUTANA NA MUHAMMAD ALI

BINGWA wa zamani wa ngumi za uzito wa juu duniani, Mohammad Ali, akiwasili kwenye uwanja wa ndege wa zamani wa Dar es Salaam.

ILIKUWA Jumamosi ya Februari 2, 1980, wakati bingwa wa zamani wa ngumi za kulipwa za uzani wa juu, Muhammad Ali, alipowasili kwenye uwanja wa ndege wa zamani wa Dar es Salaam.

Ali alikuja nchini akiwa ametumwa na Rais wa Marekani wakati huo, Jimmy Carter, kuja kuishawishi Tanzania isusie Michezo ya Olimpiki ya mwaka 1980, iliyofanyika Moscow, Urusi.

Marekani ilitaka kuzishawishi nchi kadhaa za kiafrika, kususia michezo hiyo kutokana na kitendo cha Urusi, kuivamia kijeshi nchi ya Afghanistan mwaka 1979.

Bondia huyo machachari, ambaye kabla ya kubadili dini mwaka 1964, alikuwa akijulikana kwa jina la Cassius Clay, pia alitumwa kuzishawishi nchi za Kenya, Nigeria, Liberia na Senegal zisusie michezo hiyo.

Hata hivyo, ziara hiyo ya Muhammad Ali iliishia kwenye uwanja huo wa ndege huku akipokewa na mashabiki lukuki wa mchezo huo, wakiongozwa na aliyekuwa Waziri wa Utamaduni, marehemu Chadiel Mgonja.

Ali hakuweza kukutana na Mwalimu Nyerere. Aliishia kukaa kwenye Hoteli ya Kilimanjaro kwa siku tatu kabla ya kuamua kuendelea na safari yake katika nchi zingine.

Licha ya umaarufu wake katika mchezo wa ngumi za kulipwa na ushawishi mkubwa wa ubalozi wa Marekani, juhudi za bondia huyo kukutana ana kwa ana na Mwalimu Nyerere ziligonga mwamba.

Imeelezwa kuwa Mwalimu Nyerere alikasirika kupangiwa kukutana na Muhammad Ali kwa vile aliona bondia huyo hakuwa na sifa ya kidiplomasia ya kukutana naye.

Baada ya kukwama kukutana na Mwalimu Nyerere, Ali ambaye pia alikuwa maarufu kwa jina la The Greatest, aliendelea na ziara yake katika nchi zingine nne, lakini aligonga tena mwamba alipokwenda Nigeria, ambako Rais wa zamani wa nchi hiyo, Alhaj Shehu Shagari aligoma kukutana naye.

Marais pekee aliobahatika kukutana nao na kuwawasilishia salamu kutoka kwa Rais Carter wa Marekani ni Daniel arap Moi wa Kenya, Leopold Sedar Senghor wa Senegal na William Tolbert wa Liberia.

Akiwa Senegal, bondia huyo alielezwa kwamba nchi hiyo inaongozwa kwa sera ya kutochanganya mambo ya michezo na siasa. Alifanikiwa kwenye nchi mbili tu za Kenya na Liberia.

Hata hivyo, baadaye Liberia ilibadili msimamo baada ya Rais Tolbert kupinduliwa Aprili, 1980, kabla ya kuanza kwa michezo hiyo, ambapo kiongozi wa mapinduzi hayo, Samuel Doe aliipeleka timu Moscow, lakini akaiondoa baada ya sherehe za ufunguzi.

Ziara hiyo ya Muhammad Ali haikuwa na mafanikio sana kwa vile kama angefanikiwa kuishawishi Tanzania, nchi nyingine nyingi za Afrika zingeweza kubadili msimamo.

Timu ya Tanzania ilikwenda Moscow kushiriki katika michezo hiyo na kufanikiwa kurudi nyumbani ikiwa na medali mbili za shaba, zilizonyakuliwa na wanariadha Filbert Bayi na Suleiman Nyambui.

Hiyo ndio michezo pekee ya Olimpiki, ambayo Tanzania iliambulia
medali. Bila shaka kama nchi nyingine zisingegoma, isingekuwa rahisi kwa Tanzania kupata medali hata moja.

Je, ni kwa nini Mwalimu Nyerere aliamua kuwakomalia Wamarekani kwa kukataa kugomea michezo hiyo?

Sababu hasa ni tukio la mwaka 1976, wakati wa Michezo ya Olimpiki iliyofanyika mjini Montreal, Canada.

Nchi za kiafrika zikiongozwa na Tanzania, mwaka huo, zilisusia michezo hiyo kutokana na kitendo cha timu ya New Zealand kuruhusiwa kushiriki.

Nchi za Afrika zikiongozwa na Tanzania, ziliiomba Kamati ya Kimataifa ya Olimpiki (IOC), isiiruhusu New Zealand kushiriki michezo hiyo kutokana na timu yake ya rugby, mwanzoni mwa mwaka 1976, kuzuru Afrika Kusini na kucheza na timu ya Afrika ya Kusini.

Kitendo hicho kilionekana ni kinyume na maazimio ya kuitenga Afrika ya Kusini kijamii na kiuchumi, kutokana na sera za ubaguzi wa rangi (apartheid).

Kutokana na ombi hilo kukataliwa, nchi nyingi za Afrika zilisusia michezo hiyo mwaka huo. Nchi nyingine kama Marekani, ziliendelea kushiriki bila kuziunga mkono nchi hizo za Afrika bila kujua ambacho kitatokea baada ya miaka minne.

TFF YATEUA KAMATI YA LESENI ZA KLABU

Kamati ya Utendaji ya Shirikisho la Mpira wa Miguu Tanzania (TFF) imeteua Kamati ya Leseni (Club Licensing Committee) ambayo ndiyo yenye jukumu la kupitia maombi ya leseni kwa klabu za Ligi Kuu na Ligi Daraja la Kwanza na kutoa uamuzi kwa kuzingatia Kanuni ya Leseni ya Klabu.

Wajumbe walioteuliwa kwenye Kamati hiyo inayoundwa kwa mara ya kwanza ni Wakili Lloyd Nchunga (Mwenyekiti), Wakili Emmanuel Matondo (Makamu Mwenyekiti), David Kivembele, Hamisi Kissiwa na Prof. Mshindo Msolla.

Klabu zinatakiwa kuchukua fomu za maombi TFF ambapo baada ya kuzirejesha zitafanyiwa kazi ambapo zile zitakazokuwa zimekidhi matakwa ya Kanuni husika zitapatiwa leseni husika ili zishiriki michuano ya Ligi Kuu ya Vodacom na Ligi Daraja la Kwanza ya StarTimes kwa msimu wa 2016/2017.

Kwa klabu ambazo zitashindwa kukidhi matakwa ya leseni yanayolenga kuhakikisha mpira wa miguu unaendeshwa kwa weledi na kupiga vita upangaji matokeo katika maeneo matano ya wachezaji (sporting), viwanja (infrastructure), utawala (administrative and personnel), umiliki wa klabu (ownership) na fedha (financial), hazitapa leseni hivyo kutokuwa na sifa ya kushiriki ligi.

Klabu ambazo zitanyimwa leseni na kutoridhika na uamuzi huo, zitakuwa na fursa ya kukata rufani kwenye Kamati ya Rufani ya Nidhamu ya TFF. Kwa mujibu wa Ibara ya 5(3) ya Kanuni ya Leseni ya Klabu ya TFF, Kamati hiyo ndiyo inayosikiliza rufani zinazopinga uamuzi wa Kamati ya Leseni ya TFF.

Wajumbe wanaounda Kamati hiyo ni Wakili Alloyce Komba (Mwenyekit), Wakili Abdallah Gonzi (Makamu Mwenyekiti), Dk Francis Michael, Abdallah Mkumbura na Wakili Twaha Mtengela. Klabu zote zinahimizwa kuchukua fomu za maombi mapema ili kutoa muda wa kutosha kwa TFF kupitia maombi yao na kufanya uamuzi kwa wakati muafaka.

TFF YARIDHIA YANGA KUSIMAMIA UCHAGUZI WAKE

Shirikisho la Mpira wa Miguu Tanzania (TFF), leo Juni 7, 2016 limefanya kikao cha pamoja na uongozi wa Klabu ya Young Africans.


Kikao hicho kilifanyika ofisi ya TFF iliyoko Uwanja wa Kumbukumbu ya Karume, Ilala jijini Dar es Salaam na kuongozwa na Rais wa TFF Jamal Malinzi kilihudhuriwa na Katibu Mkuu wa TFF, Mwesigwa Selestine; Kaimu Mkurugenzi wa Sheria na Uanachama, Elliud Mvella; Makamu Mwenyekiti wa Young Africans, Clement Sanga na Katibu Mkuu wa Young Africans, Baraka Deusdedit.

Baada ya mazungumzo, Rais wa TFF, Malinzi ametoa maelekezo yafuatayo:-

1.   Mchakato wa Uchaguzi wa Young Africans uendelee.

2.   Mchakato huo usimamiwe na Kamati ya Uchaguzi ya Young Africans chini ya uangalizi wa Kamati ya Uchaguzi ya TFF.

3.    Wale wote waliochukuliwa fomu za uchaguzi wa Young Africans katika ofisi za TFF washirikishwe kwenye mchakato huo.

Mwisho, Rais wa TFF Jamal Malinzi amewatakia kila la kheri wanachama na  wapenzi wa Young Africans na kuwa na umoja na mshikamano kuelekea uchaguzi huo muhimu wa kwa mustakabali wa klabu.

SAMATTA AAHIDI KUJENGA KITUO CHA KUKUZA SOKA YA VIJANA

NAHODHA wa  Timu  ya Soka ya Tanzania (Taifa Stars) Mbwana Ali Samatta ameahidi  kujenga kituo maalum nchini cha kuibua na kukuza vipaji vya wanasoka wachanga ili wafikie viwango vya kimataifa.

Hafla ya makabidhiano  hayo yaliyofanyika juzi katika kijiji  cha wasanii kilichopo Mwenzanga, wilayani Mkuranga.Hayo  yamebainishwa  na baba wa mwanasoka  huyo wa kimataifa, Ali Samtta alipozungumza kwa niaba ya  mwanae, katika halfa ya kukabidhiwa  ekari tano  za eneo la ujenzi wa kituo hicho kulikofanywa na Mtandao wa Wasanii na Wanamichezo  nchini, (SHIWATA.).

Alisema,  Salamu alizoziacha Mbwana kwa wasanii kwanza ni kuishukuru SHIWATA kwa hatua ya kutambua mchango wake kitaifa, hivyo, katika kulipa fadhila ni kujenga uwanja utakaokuwa na hadhi ya kimataifa kwa taifa.Akizungumza  kwa niaba ya mwanae, baba wa  nyota  huyo alisema, azma ya Samatta (Mbwana) ni kujenga kituo kikibwa  cha kimataifa ambacho, moja ya madhumuni ni kuendelea kuwaibua na kuwakuza akina 'Samatta'  wengine wajao.

"Niliongea na Mbwana  amenituma niwakilishe salamu zake kwa kwanza kwa  kuishukuru SHIWATA na kisha kueleza nia yake ya kutaka kuendelea kuibua  vipaji  vya  soka la vijana kupitia kituo kitakachojengwa hapa katika kijiji cha wasanii Mwenzange" alisema Ali Samatta na kuongeza.

Katika  hatua nyingine, mwakilishi wa mgeni rasmi, Nape Mnauye, Bi Leah Kihindi aliipongeza SHIWATA kwa hatua yake ya kuwawekea misingi wanachama wake ili wawe na makazi ya kudumu kupitia kijiji hicho.

"Engekuwapo  hapa  leo, lakini alilazimika kusafiri mara tu baada ya kumalizika kwa mechi ya Stars dhidi ya Misri, kurejea  Ubelgiji kwa wito wa  haraka, lakini anatarajia kurejea  tena nchini kwa mapumziko, na mimi amenituma nimwakilishe kwa kauli zake hizi"

Sambamba na hilo, alilipongeza shirikisho  hilo kwa kutambua mchango wa Mbwana Samatta katika  soka ambako katika sherehe hizo wanachama 35 walikabidhiwa nyumba na misingi ya kujenga nyumba.

Mwenyekiti wa SHIWATA, Cassim Taalib akiwatoa taarifa fupi ya kijiji hicho alisema lengo ni kuwasaidia wasanii, wanamichezo na waandishi wa habari kujenga nyumba za kuishi ili kujiandaa kwa ajili ya kuishi maisha ya taabu baada ya kustaafu kazi zao.

SHIWATA inayomiliki ekari 300 za makazi katika kijiji hicho jumla ya wanachama 185 wamnejenga nyumba kwa njia ya kuchangishana.

TFF YATOA KALENDA YA MWAKA, USAJILI KUANZA JUNI 15

Na Zainab Nyamka,Blog ya Jamii

SHIRIKISHO la Mpira wa Miguu Nchini Tanzania (TFF), limetoa kalenda ya msimu mpya wa mashindano na matukio ambako baada ya mapumziko ya wachazaji yanayoishia Juni 10, 2016 ambapo Juni 15 - 30 itakuwa ni uhamisho wa wachezaji na kwa mujibu wa Kalenda hiyo, timu ambazo hazishiriki Ligi Kuu ya Vodacom msimu wa 2016/2017 zitaanza kutangaza wachezaji walioachwa kuanzia Juni 15 hadi Juni 30, mwaka huu.

Kwa upande wa timu zitakazoshiriki Ligi Kuu ya Vodacom (VPL), watatumia kipindi cha Juni 15, 2016 hadi Juni 30, 2016 kutangaza usitishwaji mkataba wa wachezaji. Usajili wa wachezaji utaanza Juni 15 hadi Agosti 6, kwa timu zinazoshiriki Ligi Kuu ya Vodacom Tanzania Bara huku pingamizi itakuwa ni Agosti 7 hadi 14, 2016 kabla ya kuthibitisha usajili kwa hatua ya kwanza kati ya Agosti 15 na Agosti 19, 2016 wakati usajili hatua ya pili utaanza Agosti 17, 2016 hadi Septemba 7, 2016 na kitafuatiwa kipindi cha kipindi cha pingamzi hatua ya pili kuanzia Septemba 8 hadi Septemba 14, 2016.

Septemba 15 hadi Septemba 17, 2016 itakuwa ni kipindi cha kuthibitisha usajili hatua ya pili, ratiba hiyo inasema kwamba timu zinatakiwa kuandaliwa kuanzi Juni 15 2016 hadi Julai 15, 2016 ambako kuanzia Julai 16, 2016 hadi Agosti 14 ni kipindi cha mechi za kirafiki za ndani na nje. Ratiba ya Ligi Kuu ya Vodacom Tanzania Bara itatoka kati ya Julai 16 hadi Agosti 14.


WAKATI HUO HUO TFF IMETATANGAZA KOZI ZA UKOCHA

SHIRIKISHO la Mpira wa Miguu Tanzania (TFF) kupitia Idara ya Ufundi, imetangaza kozi nne (4) za Leseni za Shirikisho la Soka Afrika (CAF) zinazotarajiwa kuanza Juni 20, 2016 katika mikoa ya Mwanza, Morogoro na Dar es Salaam. Kwa Mkoa wa Mwanza, TFF itaendesha kozi ya leseni Daraja C. kozi hiyo inatarajiwa kuanza Juni 20, 2016 hadi Julai 4, mwaka huu ambako baadhi ya washiriki 29 wamekwisha kujiandikisha ingawa bado kuna nafasi 11 ili kutimiza darasa la wanafuzni 40.

Sifa za watakaochukua kozi hiyo ni kuwa kuwa na cheti ngazi ya kati (intermediate) na umahiri (activeness).Hii ni kozi ya CAF itakayoendeshwa na TFF na kwamba watu wenye ndoto za kuwa makocha wa mpira wa miguu wanaruhusiwa kuomba na kwa Jiji la Mwanza na mikoa mingine ya Kanda ya Ziwa, kozi hiyo inaratibiwa na Makamu Mwenyekiti wa Kamati ya Ufundi ya TFF, Vedastus Rufano na Mwalimu atakuwa Wilfred Kidao ambaye ni Mkufunzi wa ukocha anayetambuliwa na CAF.

Kozi nyingine ni ya leseni Daraja B ambayo itafanyika kuanzia Julai 1, hadi Julai 16, mwaka huu mkoani Morogoro na utaratibu wa kujiunga unaratibiwa na Ofisi ya Idara ya Ufundi ya TFF iliyoko Uwanja wa Karume, Ilala jijini Dar es Salaam na kwa upande wa Dar es salaam ambayo kuanzia Julai 1, hadi Julai 16, mwaka huu ambapo washiriki wa kozi hiyo ni ya TFF makocha ambao tayari walifanya kozi ya FIFA-IOC iliyofanyika Oktoba, 2014 hivyo kwa sasa wanatakiwa kuthibitisha kushiriki kabla ya Juni 15, 2016 katika ofisi ya Mkurugenzi wa Ufundi wa TFF, Salum Madadi.

Kadhalika kozi nyingine ji ya Leseni Daraja A ambayo itafanyika kuanzia Julai 17, 2016 hadi Julai 31, mwaka huu kwa hatua ya kwanza yaani Module 1 wakati Module 2 itafanyika Novemba, mwaka huu. Wakufunzi wa kozi hiyo ya juu ni Makocha Salum Madadi na Sunday Kayuni, kabla ya CAF kumleta mtoa tathimini ya matokeo ya makocha hao kabla ya kutoa leseni ya daraja husika.

Washiriki wa kozi hiyo wanatarajiwa kuwa makocha wa timu zinazoshiriki Ligi Kuu ya Vodacom Tanzania Bara (VPL) kwani msimu wa mwisho wa makocha wa Leseni Daraja B na C ni msimu wa 2016/2017.

MAISHA YA MAREHEMU MUHAMMAD ALI PICHANI

Muhammad Ali, ambaye alifariki dunia Ijumaa iliyopita akiwa na umri wa miaka 74, pia alikuwa akijulikana kwa jina la The Greatest, kutokana na umahiri wake katika masumbwi ya kulipwa.

Ali, wakati huo akijulikana kwa jina la Cassius Claty, akiwa na umri wa miaka minne (kulia) akiwa na kaka yake, Rahman, wakati huo akiwa na umri wa miaka miwili (kushoto).

Ali akiwa na mkewe wa kwanza, Sonji Roi mwaka 1964, kabla ya kutengana.

Cassius Clay akiwa ameungukwa na mashabiki wake mwaka 1963 baada ya kushinda medali ya dhahabu ya Olimpiki.

Ali akiwa na mkewe wa pili, Belinda Boyd. Hapa wakiwa na watoto wao wawili mapacha, Jamillah na Rasheda mwaka 1974.

Ali akiwa na mkewe wa tatu, Veronica Porsche mwaka 1977. Aliishi naye kwa miaka minane kabla ya kutengana.

Muhammad Ali akiwa na mkewe wa nne, Lonnier mwaka 1999. Aliishi na mkewe huyo hadi mauti yalipomkuta.

Ali akipokewa na kundi la mashabiki alipowasili mjini London kwa ajili ya pambano la marudiano dhidi ya Henry Cooper, mwaka 1966.

Ali akizungumza jambo na Malkia wa Uingereza, alipotembelea Marekani mwaka 1976.

Ali akiwa na wanamuziki wa kundi la The Beatles mjini Miami baada ya kundi hilo kufanya onyesho. Wanamuziki hao walijawa na furaha kubwa baada ya kukutana na bondia huyo.

Ali alisababisha msongamano mkubwa wa watu kila alipokwenda. Hapa akipiga picha akiwa amevaa kofia ya polisi mwaka 1980.

Wazimu wa pesa. Hapa Ali akiwaamekaa juu ya kitita cha fedha alizozawadiwa kwa kushinda pambano lake la kwanza la ngumi za kuliwa

Ali akiwa nchini Uingereza mwaka 1977, alikokwenda kuhudhuria uzinduzi wa filamu inayoelezea maisha yake, akiwa na bintiye Hana, anayekunywa maziwa wakati mkewe Ronnie akiwa amekwenda kufanya manunuzi.

DIAMOND AKABIDHI MSAADA WA MADAWATI 600 KWA WANAFUNZI WA DAR

MSANII nyota wa muziki wa kizazi kipya nchini, Naseeb Abdul 'Diamond', amekabidhi msaada wa madawati 600 kwa Mkuu wa Mkoa wa Dar es Salaam, Paul Makonda. Madawati hayo yatatolewa kwa shule za mkoa wa Dar es Salaam, ambapo Diamond alimtaka Makonda asiwasahau wanafunzi wanaosoma maeneo ya Tandale. Diamond alisema ameamua kutoa msaada huo kwa lengo la kuwakumbuka watanzania wenzake, kutokana na ukweli kwamba wamekuwa wakimuunga mkono kimuziki. Amesema lengo lake ni kusaidia madawati katika mikoa mbalimbali nchini na kwamba ameanzia na mkoa wa Dar es Salaam kwa sababu ndiko anakoishi.

YUSUF MANJI, SANGA WAKOSA WAPINZANI UCHAGUZI MKUU YANGA

WANACHAMA 19  wa klabu ya Yanga, wamechukua fomu kwa ajili ya kuwania nafasi mbalimbali za uongozi katika uchaguzi mkuu wa klabu hiyo.

Mwenyekiti wa Kamati ya Uchaguzi ya Yanga, Sam Mapande, alisema mjini Dar es Salaam, jana, kuwa, wanachama wawili wameondolewa kutokana na fomu zao kuwa na dosari.

Mapande alisema kamati hiyo ilikutana juzi kwa ajili ya kupitia majina yote ya wanachama walioomba kuwania nafasi mbalimbali za uongozi, ambapo majina mawili ndiyo yaliyoonekana kuwa na dosari.

Aliwataja wanachama, ambao majina yao yameondolewa kutokana na fomu zao kuwa na dosari kuwa ni Yusuf Mhandeni na Leonard Marango, waliokuwa wakiwania ujumbe wa kamati ya utendaji.

Uchaguzi mkuu wa Yanga, umepangwa kufanyika Juni 11, mwaka huu na nafasi zinazogombewa ni ya mwenyekiti, makamu mwenyekiti na wajumbe wa kamati ya utendaji.

Kwa mujibu wa Mapande, uchaguzi huo utafanyika kwa kutumia kadi za zamani za klabu hiyo na katiba inayotambuliwa na serikali.

Mapande alisema usaili kwa ajili ya wanachama hao 19 waliochukua fomu za kuwania uongozi, ulitarajiwa kufanyika jana jioni.

Wagombea waliochukua fomu za kuwania uongozi hadi jana, nafasi wanazowania zikiwa kwenye mabano ni Yusuf Manji (mwenyekiti), Clement Sanga (makamu mwenyekiti).

Wengine ni Samwel Lukumay, Salum Mkemy, Beda  Tindwa, David Ruhago, Lameck Nyambaya, Ayubu Nyenzi na George Manyama (wajumbe).

Wengine ni Sylvester Haule, Liza Lymo, Hosein David, Hashim Abdalah, Athumani Kihamia, Pascal Laizer, Godfrey Mheluko, Bakari Malima, Mchafu Chakoma na Thobias Lingalangala.

Awali, uchaguzi huo ilikuwa usimamiwe na Kamati ya Uchaguzi ya Shirikisho la Soka Tanzania (TFF), lakini baadaye iliamriwa usimamiwe na kamati ya uchaguzi ya Yanga.

MISRI YAITUNGUA TAIFA STARS MABAO 2-0

TIMU ya soka ya Taifa, Taifa Stars jana ilitupwa nje katika michuano ya kuwania kufuzu kucheza fainali za Afrika za 2017, baada ya kufungwa mabao 2-0 na Misri.

Katika mechi hiyo iliyochezwa kwenye Uwanja wa Taifa, Dar es Salaam, Taifa Stars ilifanikiwa kupata penalti kipindi cha pili, lakini iliota mbawa baada ya shuti la Mbwana Samatta kutoka nje ya lango.

Mshambuliaji Mohamed Salah ndiye aliyeiwezesha Misri kutokana na ushindi ugenini baada ya kuifungia mabao hayo mawili, moja katika kila kipindi.

Samatta: Sikutarajia  kupoteza penalti

NAHODHA wa timu ya soka ya Taifa ya Tanzania, 'Taifa Stars',  Mbwana Samatta,  amesema hakutarajia kupoteza penalti katika mchezo wao wa kimataifa dhidi ya Misri.

Samatta, alikosa mkwaju wa penalti katika kipindi cha pili cha mchezo huo wa kuwania kufuzu kucheza fainali za Afrika za 2017, uliochezwa juzi, kwenye Uwanja wa Taifa Dar es Salaam.

Katika mchezo huo, Taifa Stars ilifungwa mabao 2-0 na Misri na kuondoshwa kwenye kinyan'ganyiro hicho, baada ya kupoteza mechi mbili na kutoka sare moja.

Akizungumza baada ya kumalizika kwa mchezo huo, Samatta aliwaomba radhi Watanzania kwa kusema, ni hali ya kawaida kutokea katika soka.

“Sikutarajia wala sikudhani kama naweza nikakosa penalti, lakini ndiyo ilishatokea, ni sehemu ya mchezo. Nisingeweza kubadilisha nikauchukue mpira nje nipige tena,” alisema Samatta.

Mshambuliaji huyo anayecheza soka ya kulipwa katika klabu ya Genk ya Ubelgiji, alisema Taifa Stars iliuanza mchezo huo vizuri, lakini baada ya wapinzani wao kupaa goli la kuongoza, walibadilika.

Alisema mchezo ulibadilika kwa sababu Wamisri wanajua kutumia nafasi wanazopata kufunga mabao, tofauti na Taifa Stars, ambayo ilijitahidi kutengeneza nafasi nyingi, lakini walishindwa kuzitumia.

Samatta alisema goli la kwanza la Misri, liliwavuruga wachezaji wa Taifa Stars,  hali iliyosababisha waruhusu goli la pili ndani ya muda mfupi.

“Baada ya wao kupata goli la kwanza, walituvuruga kwa sababu hatukutegemea. Muda mwingi sisi tulikuwa na mpira na tunashambulia, lakini ndiyo mchezo, hauwezi kubadilisha matokeo,” alisema.

Taifa Starsa imebakiwa na mchezo mmoja ugenini dhidi ya Nigeria, utakaochezwa Septemba, mwaka huu, lakini hata kama itashinda, haiwezi kusonga mbele.

Katika mechi yake ya kwanza dhidi ya Misri, iliyochezwa mjini Cairo, Taifa Stars ilichapwa mabao 3-0.

DUNIA YAOMBOLEZA KIFO CHA MUHAMMAD ALI

Mazishi yake kufanyika Ijumaa, nyumbani kwake Lousville
Bintiye Hana asimulia dakika za mwisho za baba yake
Obama, Tyson, Foreman, Mywether waelezea walivyoguswa
Aliagiza mazishi yake yawe wazi kwa watu wa aina zote
WASHINGTON, Marekani

WAKATI dunia ikiomboleza kifo cha bingwa wa zamani wa ndondi za uzani wa juu duniani, Muhammad Ali, imeelezwa kuwa mazishi yake yafanyika Ijumaa wiki hii.

Ali, bondia wa kwanza maarufu mwenye asili ya Kiafrika, alifariki juzi asubuhi akiwa na umri wa miaka 74.

Ali, ambaye alijizolea sifa nyingi kutokana na machachari yake awapo ulingoni, alifariki katika jini la Phoenix Arizona, ambako alilazwa hospitali Alhamisi iliyopita kutokana na matatizo ya kupumua.

Taarifa iliyotolewa na familia yake jana, ilieleza kuwa ibada ya mazishi itafanyika nyumbani kwake Lousville Kentuck.

Msemaji wa familia hiyo, Bob Gunnel alisema mazishi ya Ali yanatarajiwa kuhudhuriwa na viongozi mbalimbali maarufu nchini Marekani, akiwemo Rais wa zamani wa nchi hiyo, Bill Clinton.

Gunnel pia alidokeza kuwa Ali hakupata msukosuko wowote wakati anakata roho na kwamba, muda  wote alikuwa amezungukwa na familia yake, ambayo ilikesha ikimsomea Quraan.

Kwa mujibu wa Gunnel, mwanamasumbwi huyo aliagiza watu wa rika zote waruhusiwe kuhudhuria maisha yake kwa sababu yeye alikuwa raia wa dunia.

Meya wa Jiji la Lousville, Greg Fischer alitangaza jana kuwa, mji huo umeandaa siku maalumu ya maombolezo ya kifo cha bondia huyo wa zamani, yatakayofanyika Jumamosi.

Mara baada ya kifo chake, bintiye Hana aliandika kupitia mtandao wa twitter akisema, familia yake ina furaha kwa sababu  baba yao kwa sasa yuko huru.

Hana pia alielezea jinsi baba yake alivyopambana kabla ya mauti kumkumba na kuwashukuru watu wote waliokuwa wakimuunga mkono.

"Nyoyo zetu zimeumia. Lakini tuna furaha kwamba hatimaye baba sasa yuko huru," alieleza Hana kupitia mtandao huo.

"Sote tulijaribu kuwa jasiri na kumnong'oneza masikioni tukimwambia, 'Sasa unaweza kwenda. Tutakuwa salama. Tunakupenda. Asante baba. Sasa unaweza kurejea kwa Mungu," alieleza Hana.

"Sote tulikuwa tumemzunguka, tukiwa tumemkumbatia na kumbusu huku tukiishika mikono yake na kusoma aya za kiislamu. Kwa sekunde 30 moyo wake ulikuwa ukipiga kwa kasi," alieleza Hana kupitia ujumbe huo.

Hana, ambaye ni mtunzi wa kitabu cha 'The Soul of a Butterfly and More Than a Hero Life Lessons from Ali', kinachoelezea maisha ya baba yake, pia aliweka picha mbalimbali za baba yake kwenye mtandao wa Instagram.

"Tuiombee roho yake ipumzike mahali pema na kumuombea safari ya furaha huko aendako. Mungu akubariki baba. Wewe ni kipenzi cha moyo wangu," alieleza Hana kupitia mtandao huo.

Ali alizaliwa Januari 17, 1942 na kupewa jina Cassius Marcellus Clay, kabla ya kuamua kubadili dini kutoka mkristo kuwa mwislamu.

Alianza kucheza ndondi akiwa na umri wa miaka 12 na baadaye akaishia kushinda dhahabu katika uzani wa light-heavyweight katika Michezo ya Olimpiki iliyofanyika mjini Roma mwaka 1960.

ASEMAVYO TYSON

Bingwa wa zamani wa ndondi hizo, Mike Tyson, amemuenzi Ali kwa kutuma ujumbe mfupi kupitia anwani yake ya Tweeter akisema, "Mungu alikuja kumchukua bingwa wake''.

OBAMA ANENA
Rais wa Marekani, Barrack Obama amewaongoza viongozi mbalimbali katika kumuenzi Muhammad Ali kwa kusema enzi za uhai wake, Ali aliushangaza ulimwengu kutokana na staili yake ya upiganaji.

Obama pia amesema ulimwengu umekuwa bora kwa sababu ya Ali. Rais huyo wa Marekani pia amesema yeye na mkewe, Michelle wanaomba bingwa huyo wa zamani akalale mahali pema peponi.

MAYWEATHER
Bondia Floyd Mayweather Jr naye ameandika kupitia akaunti yake ya tweeter akisema: "Leo moyo wangu unanung'unika kwa kumpoteza mwanzilishi, bondia hodari, bingwa na shujaa kwa vyovyote vile. Hakuna siku niliingia katika ulingo wa ndondi bila kukukumbuka. Ucheshi, uzuri wako na vinginevyo ni vitu tutakavyovienzi."

FOREMAN
George Foreman, ambaye aliwahi kupambana na Ali katika pambano la karne lililofanyika mwaka 1974, amesema:
"Muhammed Ali alikuwa na ushawishi wa kukufanya akupende. Iwapo usingempenda, angekufanyia vituko ili umchukie."

KENT
Aliyekuwa bondia wa kimataifa nchini Kenya, Muhammad Abdallah Kent, anasema ameshangazwa na kifo cha Muhammad Ali na hakuweza kujizuia machozi yake wakati dadake alipompingia simu na kumueleza kuhusu kifo hicho.

Kent aliiwakilisha Kenya katika ndondi za kulipwa kuanzia
mwaka 1973 hadi 1986. awali akiwa anapigana katika uzani wa kati na baadaye uzani wa juu.

Alipigana na Ali katika pambano la raundi nne mwaka 1980, mjini Nairobi wakati Ali alipozuru Afrika kwa lengo la kuyashawishi baadhi ya mataifa kujiondoa katika Michezo ya Olimpiki iliyofanyika Moscow, ikiwa ni siku chache baada ya Urusi
kuvamia  Afghanistan.

ALIVYOJIUNGA NA NGUMI
Muhammad Ali ajiunga na mchezo wa ngumi kwa bahati wakati akiwa na umri wa miaka 12. Ofisa wa polisi, Joe Martin ndiye aliyemshawishi ajiunge na mchezo huo kwa ahadi ya kumsaidia kumtafuta mwizi aliyemwibia baiskeli yake. Alipofikisha umri wa miaka 18, akafanikiwa kushinda medali ya dhahabu katika Michezo ya Olimpiki iliyofanyika Rome, Italia.

Muhammad Ali alikuwa mtu wa kujigamba kupita kiasi, lakini alikuwa na kila sababu ya kufanya hivyo. Alikuwa na kipaji cha pekee kwenye ndondi. Alikuwa na kasi na nguvu. Alianza kujulikana aliposhinda medali ya dhahabu katika Michezo ya Olimpiki ya Roma mwaka 1960.

Alianza kucheza ngumi za kulipwa mwaka 196 na kushinda mapambano 18 mfululizo kabla ya kusafiri kwenda London, mwaka 1963, ambako alishinda pambano lake la kwanza ugenini dhidi ya Henry Cooper wa Uingereza. Alimshinda Cooper kwa knockout ya raundi ya tano.

Katika pambano hilo la kihistoria, Cooper alimbwaga Ali raundi ya nne, lakini Mmarekani huyo alitimiza ubashiri wake kwa kumshinda raundi ya tano mbele ya watazamaji 55,000, waliokuwa wamefurika kwenye Uwanja wa Wembley.

Ushindi wa Ali dhidi ya Tony Liston ulikuwa na bado ni moja ya matokeo ya kushangaza zaidi katika historia ya ndondi. Baada ya pambano hilo, Ali alijisifu kwa kusema: "Mimi ndiye bingwa zaidi! Mimi ndiye bora zaidi! Mimi ni mfalme wa dunia!".

Ali alishinda Liston kwa kumpiga kwa knock-out, dakika ya kwanza ya raundi ya kwanza. Hadi leo, watu wengi duniani wanaamini Liston aliuza pambano hilo, lakini Ali alikuwa akisisitiza kwamba, alishinda kwa njia safi.

Ali alirejea London kupigana na Henry Cooper kwa mara ya pili Mei, 1966 kwenye Uwanja wa zamani wa klabu ya Arsenal wa Highbury.  Mashabiki wake wa Uingereza, ambao hawakuwa wamemtambua mara ya kwanza, walimshabikia sana kiasi cha kumpa mapokezi mazito.

Angelo Dundee ndiye aliyekuwa msaidizi wa Ali kila alipopanda ulingoni. Alikuwa akimsaidia Ali tangu alipoanza kucheza ndondi.

"Kuna Cassius Clay mmoja," alikuwa akipenda kusema Dundee. "Namshukuru Mungu."

Bondia wa kwanza kumshinda Ali alikuwa Joe Feazier, lakini aliweza kulipa kisasi kwa kushinda pambano la marudiano.

Hata hivyo, pambano pekee lililosifika ni lile dhidi ya George Foreman, lililofanyika mwaka 1974 nchini Zaire, lililojulikana kama  'Rumble in the Jungle", ikiwa na maana "Mngurumo Msituni". Ali alikaa raundi nane za kwanza akiwa amejibanza kwenye kamba, mbinu aliyoiita 'rope-a-dope'.

Marehemu Ali aligunduliwa kuwa na ugonjwa wa Parkinson (ugonjwa wa kutetemeka) mwaka 1984, lakini alikabiliana na hali hiyo kwa ujasiri na staha. Mwaka 1996, alitazamwa na mabilioni ya watu akiwasha mwenye wa Olimpiki mjini Atlanta.

MKOKO KUONGOZA KAMATI YA TUZO YA TASWA

KAMATI ya Utendaji ya Chama cha Waandishi wa Habari za Michezo Tanzania (TASWA) imemteua Makamu Mwenyekiti wa TASWA, ambaye pia Mhadhiri Msaidizi wa Shule Kuu ya Uandishi wa Habari na Mawasiliano kwa Umma (SJMC) ya Chuo Kikuu cha Dar es Salaam (UDSM), Egbert Mkoko kuwa Mwenyekiti wa Kamati ya Tuzo za Wanamichezo Bora Tanzania mwaka 2015/2016.

Pia TASWA imeteua wajumbe tisa wa kamati hiyo. Majina yao na vyombo vyao katika mabano ni Mahmoud Zubeiry (Bin Zubeiry Sports- Online), Jane John (TBC), Baruani Muhuza (Azam Media), Limonga Justine (Redio Uhuru), Maulid Kitenge (E-FM Redio), Deogratias Rweyunga (Redio One/ITV), Shaffih Dauda (Clouds Media), Asha Muhaji (Bingwa) na Nelly Mtema (Daily News).

Kamati inaweza kuongeza wajumbe wengine au kupunguza kwa kadri itakavyoona inafaa. Utaratibu wa kuizindua kamati hiyo unaandaliwa na sekreterieti ya TASWA. Jukumu la kamati itakuwa ni kuandaa utaratibu wa kuwapata wanamichezo watakaowania tuzo hiyo na pia kuteua washindi kwa kila mchezo.

Tuzo za Wanamichezo Bora zinazotolewa kila mwaka na TASWA zimepangwa kufanyika Agosti 26, mwaka huu, Dar es Salaam zikihusisha michezo mbalimbali.

B; ZIARA YA MAFUNZO NAIROBI

TASWA kwa kushirikiana na Chama cha Waandishi wa Habari za Michezo Kenya, vimeanzisha program ya ziara ya mafunzo na kubadilishana uzoefu baina ya vyama hivyo viwili, ikiwa katika makundi tofauti ya wahariri/waandishi waandamizi na kundi lingine la waandishi wa habari chipukizi.

Kwa kuanzia wahariri wa habari za michezo 18 au wale wenye uzoefu katika uandishi usiopungua miaka kumi kutoka vyombo mbalimbali vya habari nchini wataenda Nairobi kwa ziara ya mafunzo kuanzia Julai 6-9 mwaka huu.
Tunaamini wakirudi wataendelea kuwa waalimu wazuri kwa wale chipukizi, ambao nao watapata fursa kama hiyo siku za usoni.
Ahsanteni,
Amir Mhando
Katibu Mkuu TASWA
01/06/2016

MWENYEKITI KAMATI YA UCHAGUZI TFF ABWAGA MANYANGA

WAGABON KUZICHEZESHA STARS NA MISRI

Waamuzi wanne kutoka Gabon, ndio watakochezesha mchezo wa kimataifa kati ya Taifa Stars ya Tanzania na Mapharao wa Misri utakaofanyika Jumamosi Juni 4, 2016 Uwanja wa Taifa, Dar es Salaam.

Mchezo huo utakaoanza saa 10.00 jioni ni wa kutafuta nafasi ya kushiriki fainali za Kombe la Mataifa ya Afrika (AFCON) zitakazofanyika Gabon ambako mwamuzi wa kati atakuwa ni Meye Bastrel atakayesaidiwa na Mihundou Ganther na Vinga Theophile wakati Mwamuzi wa akiba (mezani) atakuwa Otogo Eric.

Wakati waamuzi wote wanatoka Gabon, Kamishna wa mchezo huo ni Tarig Atta Salih kutoka Sudan.

Maandalizi ya mchezo huo yamekamilika kwa Shirikisho Soka la Tanzania (TFF) kuipokea timu ya taifa ya Misri inayotarajiwa kuingia kesho Juni mosi, 2016 ambako wataweka kambi kambi kwenye Hoteli ya Kilimanjaro Kempiski, Dar es Salaam.

Taifa Stars imeweka kambi Hoteli Urban Rose ambayo pia iko katikati ya jiji la Dar es Salaam tangu iliporejea kutoka Kenya jana Mei 30,2016 ambako ilicheza timu ya Taifa ya Kenya maarufu kama Harambee Stars. Katika mchezo huo uliofanyika Jumapili Mei 29, mwaka huu timu hizo zilitoka sare ya 1-1.

TIMU YA TAIFA YA WANAWAKE

Timu ya soka Taifa ya Wanawake ya Tanzania – Twiga Stars, inatarajiwa kucheza mchezo wa kirafiki wa kimataifa dhidi ya Rwanda, utakaofanyika Uwanja wa Amahoro jijini Kigali, Rwanda.

Rwanda wameomba mchezo ufanyike ili kukiimarisha kikosi chao sambamba na kuboresha uhusiano wa nchi ambazo zote ni nchi wanachama wa Jumuiya ya Afrika Mashariki.

TFF YASOGEZA MBELE UCHUKUAJI FOMU YANGA

Kamati ya Uchaguzi ya Shirikisho la Soka Tanzania (TFF), iliyopewa jukumu la kusimamia uchaguzi wa Klabu ya Young Africans imeridhishwa na mwenendo wa wanachama kwa namna wanavyochukua na kurejesha fomu.

Katika kikao chake cha kufanya tathmini kilichoketi jioni ya leo, kamati hiyo chini ya Mwenyekiti wake, Wakili Alloyce Komba, kutokana na mipango yake, imesogeza mbele mchakato wa kuchukua na kurejesha fomu mpaka Jumatatu Juni 6, 2016 saa 10:00 jioni. Isipokuwa Jumamosi na Jumapili ya Juni 4 na 5, 2016.

Hadi sasa wanachama tisa (9) wamechukua na kurejesha fomu. Wanachama hao ni Aaron Nyanda na Titus Osoro wanaowania nafasi ya makamu mwenyekiti kwa mujibu wa katiba ya mwaka 2010 inayotambulika serikalini hadi sasa.

Wengine ni Paschal Laizer, Edgar Chibula, Mohammed Mattaka, Mchafu Ahmed Chakoma, Bakari Malima ‘Jembe Ulaya’, Omari Said kutoka Zanzibar ambao wanawania nafasi ya Ujumbe wa Kamati ya Utendaji. Uchaguzi wa Yanga unatarajiwa kufanyika Juni 25, 2016.

Fomu zinapatikana katika ofisi za TFF zilizoko Uwanja wa Kumbukumbu ya Karume, Ilala jijini Dar es Salaam. Vilevile utaratibu unafanyika ili fomu ziweze kupatikana katika tovuti ya shirikisho www.tff.or.tz

Fomu zinapatikana kwa gharama ya Sh 200,000 kwa nafasi ya mwenyekiti na makamu mwenyekiti na Sh 100,000 kwa wagombea wa nafasi ya ujumbe wa kamati ya utendaji. Mwisho wa kuchukua na kurejesha fomu ni tarehe 6 Juni, 2016. 

MKWASA: MECHI YETU NA MISRI ITAKUWA FAINALI

Kocha Mkuu wa timu ya soka ya Tanzania, Charles Boniface Mkwasa amesema kwamba mchezo ujao kati ya Mapharao wa Misri na Taifa Stars, utakuwa ni fainali ya kuamua taifa litakalofuzu katika fainali za Kombe la Mataifa ya Afrika AFCON hapo mwakani kutoka kundi G.

Akizungumza na waandishi wa habari mara baada ya mchezo kati ya Harambee Stars ya Kenya na Taifa Stars ya Tanzania Mei 29, 2016, uliofanyika Uwanja wa Moi Kasarani, Mkwasa maarufu kama Master anasema kwa msimamo na hali ilivyo kwa sasa, “Najua Misri wanatufuatilia. Na hata Kenya kwa siku zote tatu walikuwako. Najua  Misri wanahitaji sare ili wafuzu kwa fainali hizi, lakini hawataipata Tanzania.”

Mkwasa anasema mchezo dhidi ya Misri, ana uhakika vijana wake watajitahidi ili kupata matokeo mazuri baada ya Jumapili kufanya vema dhidi ya Harambee Stars waliocheza mechi hiyo mbele ya mashabiki wao wachache ambao pia hawakuchangamka kama wale wa Tanzania ambao licha ya kuwa ugenini walichangamsha mji na uwanja.

Wakati Misri wana pointi saba, Taifa Stars ina pointi moja na hivyo wa kuibania au kupindua matokeo ya Misri isiende AFCON mwakani, basi ni Tanzania hasa kama itawafunga Mapharao Jumamosi kabla ya kwenda Nigeria Septemba, mwaka huu kucheza na Nigeria.

“Kama nilivyosema, Misri wanakujawanahitaji pointi moja. Lakini sisi tunahitaji pointi tatu. Mchezo wa leo unatosha kuona mapungufu (upungufu). Maana ilikuwa mechi ngumu iliuyojaa nyota wote wa Kenya ambao ni professionals, lakini mimi nilikuwa na local based players na matokeo yamekuwa hayo.

“Tilianza kufunga bao, lakini wakarudisha. Bora mchezo umeishia hivi maana najua Wakenya hawana uvumilivu, tungewafunga hapa sijui kama tungetoka salama,” amesema Mkwasa ambaye baadhi ya waandishi, hususani wale wa Kenya walianguka kicheko kuashiria kuwa kuna matatizo katika utawala wa soka.

Mkwasa anasema ana taarifa namna ambavyo Misri wanaifuatilia Taifa Star hususani ukusanyaji wa video kwa ajili ya kuona aina ya soka la Tanzania, huku akisema: “Hawatafanikiwa kwa sababu soccer is the game of different approach (Soka ni mchezo wenye mifumo tofauti). Hivyo tulivyocheza na Kenya sivyo nitakavyocheza na Misri, nitakuwa na approach yake.”

Anasema ushindi wa Jumamosi ijayo ni wa kuvuna pointi tatu ili kupata kasi ya kushinda mchezo dhidi ya Nigeria na kufungua ukurasa mpya wa Taifa Stars kutengeneza mazingira mazuri ya kuwashinda Nigeria katika mchezo wa mwisho hatua ya makundi utakaofanyika Septemba, mwaka huu.

“Tunaomba Wakenya mtuombee. Nasi tunawaombea ili kama wote inatokea mwaka huu tunakosa mafasi, basi iwe kheri kwa kipindi kijacho. Sisi tumekuja kucheza kwenu katika mji wenu wenye baridi basi nanyi karibuni siku moja dar es Salaam, Tanzania katika mji wetu wetu wenye joto, huenda mkaambulia sare vile vile,” anasema.

Mkwasa alipongeza Shirikisho la Soka Tanzania (FKF), kwa kuandaa mchezo huo angalau kwa asilimia 70 kwa kushirikiana na Tanzania iliyojazia gharama za juu sambamba vijana wake kwa kucheza kwa kujituma licha ya kuwakosa nyota wake wa kulipwa na hivyo kupata picha na mbinu sahihi za kuivaa Misri Jumamosi ijayo.

“Bado tunaendele kujenga timu yetu, wengi ni vijana kama mlivyoona na wengine ni mara ya kwanza wanacheza. Nimewapa nafasi na mmeona uwezo wao, bila shaka tutafanya vema maana wengine ni under 21 wako kwenye kikosi. Huko mbele tutakuwa na timu nzuri,” anasema Mkwasa akimtolea mfano Shiza Ramadhani ambaye alipewa nafasi kwa mara ya kanza katika kikosi cha kwanza akichukua winga ya kulia.

 VICTOR WANYAMA
“Kwa hiyo tayari tumeona kitu gani cha kuongeza,” anasema Mkwasa hoja yake iliyoungwa mkono na Nahodha wa Harambee Stars, Victor Wanyama ambaye kwa dakika chache, alizungumza na Ofisa Habari na Mawasiliano wa Shirikisho la Soka Tanzania na kuhoji: “Unasema leo hamkuwa na professional pale uwanjani?” alipohakikishiwa ukweli huo, akasema:

“Basi mna kikosi kizuri. Wengi ni vijana, wanaweza kama mkicheza kwa kutubana kama mlivyobana hapa, Misri mnaifunga na hata hao Nigeria, si ajabu nikasikia mnakwenda AFCON mwakani. Ninaitakia kila la kheri timu hii, nawatakiwa kila la kheri Watanzania katika harakati zao.

"Sisi mwaka huu tumepotea kabisa, hatuna matumaini tena, tunajipanga ndiyo maana nimekuja kutetea taifa langu, hata kama tumekosa nafasi,” alisema Wanyama anayekipiga Southampton ya England.

Katika mchezo huo, Taifa Stars iliwakosa nyota wake Mbwana Samatta anayechezea Genk ya Ubelgiji kwa kuwa alikuwa na mchezo muhimu wa kupa nafasi timu yake ama icheze Ligi ya Uropa au ibaki nje katika michezo ya kimataifa ngazi ya klabu Ulaya.

Shirikisho la Soka Tanzania na Kocha Mkwasa walimruhusu kama ilivyo kwa Thomas Ulimwengu anayekipiga TP Mazembe waliokuwa na mchezo mkali dhidi ya AS Vita ambao wana utani na ushindani mkali wa soka huko Jamhuri ya Kidemokrasia ya Congo (DRC).

MWINYI KAZI MOTO
Naye Nahodha wa Taifa Stars katika mchezo huo, Mwinyi Kazimoto amesema kwamba mchezo dhidi ya Kenya, umeonesha picha ya kinachotakiwa kufanyika katika michezo ijayo inayoikabili timu hiyo baada ya kusifu maandalizi, mapokezi mazuri na sapoti nzuri kutoka kwa mashabiki wa Kitanzania, hasa wale waliosafiri umbali mrefu kutoka Dar es Salaam kwenda Nairobi, Kenya kuishangilia Stars. Nahodha wa Taifa Stars ni Mbwana Samatta anayesaidiwa na John Bocco ambao katika mchezo huo, hawakucheza. Bocco ni Majeruhi.

MCHEZO WA HARAMBEE STARS, TAIFA STARS
Katika mchezo huo, kipindi cha kwanza mashabiki walishuhudia mabao 1-1 kwa kila upande na ndiyo yaliyokuwa matokeo ya mwisho katika dakika 90, lakini kipindi cha pili wadau wa soka walishuhudia mabadiliko ya kila timu kujaribu nyota wake kwa mujibu wa sheria na taratibu za Shirikisho la soka la Kimataifa (FIFA), linaloruhusu kubadili wachezaji hadi wachezaji sita. Lakini hakukuwa na mabadiliko ya matokeo.

Kuhusu mabao ni Elias Maguli ndiye aliyetangulia kuifungia Taifa Stars bao katika dakika ya 30 kwa kichwa baada ya kupokea krosi murua kutoka kwa Juma Abdul kutoka Mashariki ya Uwanja wa Moi Kasarani kabla ya dakika saba baadaye kumfanyia madhambi Winga Ayub Masika ndani ya eneo la hatari hivyo Mwamuzi, Brian Nsubuga kutoka Uganda, kuamuru penalti iliyokwamishwa wavuni na Victor Wanyama.

Katika mchezo huo ambao wakati wote ulikuwa ni wa kushambuliana kwa timu zote mbili, Taifa Stars iliwapumzisha kipa Deogratius Munishi na nafasi yake ikachukuliwa na Aishi Manula na kwa wakati mmoja kuwatoa Jonas Mkude na Shiza Ramadhani na nafasi zao kuchukuliwa na Farid Mussa na Mohammed Ibrahim baadaye Kocha Mkwasa alimwingiza Jeremiah Juma kuchukua nafasi ya Maguli.

Kenya wao waliwatoa Humphrey Ochieng kwa kuingia Cliford Miheso; akatolewa tena Jesse Were kwa Wyclif Ochomo; Ayub Masika akapumzishwa na John Makwata akapewa nafasi kama alivyopumzishwa Anthony Agay na nafasi yake kuchukuliwa na Mayeko Mohammed. Pamoja na mabadiliko hayo, matokeo yalibaki vilevile 1-1 hadi dakika ya 90 katika mchezo ambao Wanyama alipewa kadi ya njano kwa kumfanyia madhambi Kazimoto.

VIKOSI VYA TIMU ZOTE
Vikosi vya kwanza katika mchezo, Kenya: 1. Boniface Oluoch, 9. Joakins Otieno Atudo, 5. Abud Omar Khamis, 12. Eugene Ambuchi Asike, 8. David Owino Odhiambo, 14. Anthony Akumu Agay, 15. Victor Mugubi Wanyama, 23. Ayub Timbe Masika, 19. Humphrey Mieno Ochieng’ 16. Eric Johanna Omondi, 29. Jesse Jackson Were

Wachezaji wa akiba: 3. David Okello Abongo, 10. Eric Ouma Otieno, 6. Mayeko Musa Mohammed, 24. Victor Ali Abondo, 27, Wycliff Okello Ochomo, 20. John Mark Makwata, 21. Clifford Miheso Ayisi

Tanzania XI: 1. Deo Munishi, 6. Juma Abdul Jafari, 2. Mohammed Hussein ‘Tshabalala’, 13. Aggrey Morris, 15. Erasto Edward Nyoni, 17. Jonas Gellard Mkude, 7. Himid Mao Mkami, 16. Shiza Ramadhan Yahya, 12. Mwinyi Kazimoto Mwitula, 10. Elias Mrugao Maguli, 4. Deus David Kaseke

Wachezaji wa akiba walikuwa: 18. Aishi Salum Manula, 5. David John Mwantika, 9. Farid Mussa Shah, 11. Jeremiah Juma Ally, 8. Abrahim Hajibu Migomba, 3. Mwinyi Haji Mngwali, 14. Mohammed Ally Ibrahim.

MUSSA WA JKT RUVU MCHEZAJI BORA WA MWEZI MEI

Mshambuliaji Abdulrahman Musa wa JKT Ruvu ameibuka mchezaji bora wa Ligi Kuu ya Vodacom kwa mwezi Mei 2016.

Musa katika kinganyiro hicho aliwapiku Donald Ngoma wa Yanga na Ali Nassoro wa Mgambo Shooting. Katika mwezi huo uliokuwa na raundi tatu, Musa alicheza mechi zote tatu za timu yake na kufunga jumla mabao manne; mawili katika kila mechi.

Kwa kushinda tuzo hiyo ya Mei ambayo ni ya mwisho kwa msimu huu kwa wachezaji bora wa mwezi, Musa atazawadiwa kitita cha sh. 1,000,000 (milioni moja) kutoka kwa wadhamini wa Ligi hiyo, kampuni ya Vodacom.

Washindi wengine wa tuzo hiyo ya mwezi kwa msimu huu wa 2015/2016 ambao mechi zake za mwisho zilichezwa Mei 22 mwaka huu ni Hamisi Kiiza wa Simba (Septemba), Elias Maguli wa Stand United (Oktoba), Thaban Kamusoko wa Yanga (Desemba), Shomari Kapombe wa Azam (Januari), Mohamed Mkopi wa Tanzania Prisons (Februari), Shiza Kichuya wa Mtibwa Sugar (Machi) na Juma Abdul wa Yanga (Aprili).

LIGI YA SDL YAENDELEA KUTIMUA VUMBI

Michuano ya Ligi ya Mabingwa wa Mikoa (RCL) msimu wa 2015/2016 inaendelea vizuri katika vituo vinne vya Kagera, Morogoro, Singida na Njombe ambapo itafikia tamati Juni 6 mwaka huu.

Timu sita zitapanda daraja kucheza Ligi Daraja la Pili (SDL) msimu wa 2016/2017. Timu hizo ni zile zitakazoongoza kila kundi, na washindwa bora (best losers) wawili kutoka makundi mawili tofauti.

Shirikisho la Mpira wa Miguu Tanzania (TFF) limeweka waangalizi wake katika kila kituo, na litawachukulia hatua watu wote watakaobainika kutumia michuano hiyo kuchafua viongozi.

Mtwivila City ya Iringa inaongoza kituo cha Njombe ikiwa na pointi sita baada ya kucheza mechi tatu. Katika kituo hicho kesho (Mei 31) kutakuwa na mechi kati ya Jangwani FC ya Rukwa na Nyundo FC ya Katavi kwenye Uwanja wa Amani.

Timu inayoongoza kituo cha Morogoro ni Namungo FC ya Lindi yenye pointi saba kwa mechi tatu. Kesho (Mei 31) ni mechi kati ya Makumbusho FC na Sifapolitan, zote za Dar es Salaam itakayofanyika Uwanja wa Jamhuri mjini Morogoro.

Kitayose ya Kilimanjaro inaongoza kituo cha Singida ikiwa na pointi tisa baada ya kushinda mechi zote tatu ilizocheza. Kesho (Mei 31) kwenye kituo hicho kutakuwa na mechi kati ya Stand FC ya Tabora na Murusgamba ya Kagera itakayochezwa Uwanja wa Namfua.

Mpaka sasa vinara wa Kituo cha Kagera ambacho mechi zake zinachezwa Uwanja wa Vijana mjini Muleba ni Mashujaa FC ya Kigoma yenye pointi saba.

TAIFA STARS YATOKA SARE BAO 1-1 NA HARAMBEE STARS

Kikosi cha kwanza cha timu ya Soka ya Tanzania -Taifa Stars kilichoanza dhidi ya Harambee Stars ya Kenya jana.

Winga wa Taifa Stars, Shiza Ramadhani akichuana na beki Joakins Atudo wa Harambee Stars katika mchezo huo.

Mshambuliaji wa Taifa Stars, Elias Maguli (Kulia) akichuana na David Odhiambo wakati wa mchezo wa kirafiki wa Kimataifa uliofanyika Uwanja wa Moi Kasarani, Nairobi Kenya. timu hizo zilitosahana nguvu kwa kutoka sara ya 1-1.

REAL MADRID VIDUME BARANI ULAYA

WACHEZAJI wa Real Madrid ya Hispania wakishangilia baada ya kuibuka na ushindi kwa njia ya matuta dhidi ya ndugu zao wa Atletico Madrid, katika mechi ya fainali iliyopigwa jana mjini Milan,Italia.

WAGANDA KUZUICHEZESHA STARS NA HARAMBEE STARS LEO, AZAM KURUSHA ‘LIVE’

Waamuzi watatu wa soka kutoka Uganda, ndio wakaochezesha mchezo wa kirafiki wa kimataifa kati ya Taifa Stars ya Tanzania na Harambee Stars ya Kenya utakaofanyika Uwanja wa Moi Kasarani jijini Nairobi, Kenya.

Waamuzi hao watakaochezesha mchezo huo utakaoanza saa 10.00 jioni na kurushwa moja kwa moja na Kituo cha Televisheni cha Azam Tv kwa kushirikishi na Shirika la Utangazaji la Kenya (KBC) ni Brian Nsubuga atakayepuliza kipenga na wasaidizi wake ni Bugembe Hussein upande wa kulia (line 1) na Katenya Ronald kwa upande wa kushoto (line 2)

Kamishna wa mchezo atakuwa Amir Hassan kutoka Somalia ambako Meneja wa Uwanja wa Moi Kasarani, Lilian Nzile amesema kwamba mazingira uwanja ni mazuri na mipango yote ya mchezo huo imekaa vema ikiwa ni pamoja na usalama uliothibitishwa pia na Kanali wa Jeshi la Polisi, Muchemi Kiruhi OCS wa Kasarani.

Kwa upande wa Kocha Mkuu Taifa Stars inayodhaminiwa na Bia ya Kilimanjaro inayozalishwa na Kiwanda cha Bia Tanzania (TBL), Charles Boniface Mkwasa atawakosa washambuliaji wake watatu katika kikosi ambacho kitaivaa Harambee Stars.

Washambuliaji hao ni Mbwana Samatta kutoka Genk ya Ubelgiji, Thomas Ulimwengu anayechezea TP Mazembe ya Jamhuri ya Demokrasia ya Congo (DRC) na John Bocco ambaye ni majeruhi wa mguu aliumia wakati wa fainali za Kombe la FA kati ya Yanga na Azam Jumatano wiki hii.

“Madaktari wamempa Bocco saa 72 za mapumziko. Bila shaka kabla ya kucheza na Misri atakuwa amepona,” alisema Mkwasa leo Mei 28, 2016 asubuhi na kuongeza kuwa Samatta ametuma taarifa kukosa mchezo dhidi ya Kenya kwa kuwa ana ratiba ya kucheza mchezo muhimu Mei 30, mwaka huu na matarajio ni kujiunga na timu Juni 1, 2016 kabla ya kuivaa Misri Juni 4, mwaka huu.

Kwa upande wa Ulimwengu, uongozi wa TP Mazembe nao waliomba kumtumia Ulimwengu katika mchezo wa ushindani wa mpinzani wake AS Vita. TP Mazembe na AS Vita ni timu pinzani huko DRC Congo na uongozi wa Shirikisho la Soka Tanzania (TFF), ukaridhia na Mkwasa sasa amejipanga kukiandaa kikosi bila nyota hao mahiri.

“Katika mchezo huu sitakuwa na professionals (wachezaji wa kulipwa),” alisema Mkwasa ambaye jioni ya leo ameahidi kutoa kikosi cha nyota 11 watakaonza dhidi ya Kenya kesho.

Kwa sasa anaangalia namna ya kuipanga vema safu yake ya ulinzi baada ya kumkosa Kelvin Yondani anayetumikia adhabu ya kuonywa mara mbili kwa kadi ya njano hivyo kutojumuishwa kwenye mipango mchezo dhidi ya Misri. Mabeki anaotarajiwa kuanza nao ni Juma Abdul upande wa kulia na Mohammed Hussein upande wa kushoto.

Walinzi wakaoachukua nafasi ya Yondani na Nadir Haroub Cannavaro ambaye hakuongozana na timu katika safari ya Kenya ni Erasto Nyoni, Aggrey Morris na David Mwantika huku viungo wa kati wanaotarajiwa kupangwa ni Mwinyi Kazimoto, Jonas Mkude na pembeni ni Farid Mussa na Shiza Kichuya. Washambuliaji watakaotikisa Kenya katika mchezo wa kesho ni Elisu Maguli na Ibrahim Ajib.

“Kipa anaweza kuanza Dida (Deo Munishi) au Aishi Manula. Lakini hao niliokutajia ni proposed team (kikosi tarajiwa), lakini hasa nani anaaza kesho nitakutajia jioni ya leo mara baada ya mazoezi pale Moi Kasarani,” alisema Mkwasa aliyeonekana kujiamini na mipango yake kama lilivyo jina lake la umaarufu la Master.

“Nimeiandaa timu kucheza mifumo miwili ambayo ni 4-3-3 ambao ni mfumo wa kushambuliaji na pale tutakapokuwa tuna-defense (tunazuia) basi mfumo utakuwa ni 4-5-1,” alisema Mkwasa.

Katika mchezo wa kesho Mkwasa anayesaidia na Hemed Morocco na Manyika Peter anayewanoa makipa atapata nafasi ya kubadili wachezaji hadi sita ambao ni utaratibu wa Shirikisho la Soka la Kimataifa (FIFA) kwa mechi za kirafiki za kimataifa kadhalika makubaliano katika mkutano wa kabla ya mchezo wa kesho.

Stars iliwasili Nairobi, Kenya jana asubuhi na kupokewa na wenyeji Shirikisho la Soka Kenya iliyowapeleka hoteli ya Nairobi Safari Club iliyoko mtaa wa Koinange, katikati ya jiji la Nairobi ambako mchana kabla ya kwenda mazoezi ilitembelewa na Balozi wa Tanzania nchini Kenya, Dk. John Haule aliyewahakikishia usalama  timu hiyo licha ya kuwako kwa taarifa za kuvamiwa.

“Msaada wowote mnaotaka na chochote mnachohitaji tunaomba mtutaarifu tujue namna ya kuwasaidia. Msiwe na wasiwasi kabisa. Hata kama hamjaipenda hoteli, semeni,” alisema Dk. Haule ambaye aliitakia timu mafanikio mazuri katika mchezo wa dhidi ya Harambee na ule wa Mafarao wa Misri.

Viongozi wa msafara wa Taifa Stars, Ahmed Mgoyi na Omar Walii walimweleza Balozi DK. Haule kuridhika na kambi na kwamba hawakupata tatizo lolote hali ilivyo hadi sasa.