PHIRI KUIPIMA SIMBA KWA URA YA UGANDA KESHO

SIMBA kesho inatarajiwa kushuka tena dimbani kumenyana na URA ya Uganda katika mechi ya kirafiki ya kimataifa itakayochezwa kwenye Uwanja wa Taifa, Dar es Salaam.


Mechi hiyo itakuwa ya pili ya kimataifa kwa Simba baada ya wiki iliyopita kuvaana na Gor Mahia ya Kenya na kuibuka na ushindi wa mabao 3-0.

Kocha Mkuu wa Simba, Patrick Phiri, anatarajiwa kuutumia mchezo huo kufanya tathmini ya mwisho kwenye kikosi chake kabla ya kuanza kwa michuano ya Ligi Kuu Septemba 20 mwaka huu.

Makamu Mwenyekiti wa Simba, Geofrey Nyange 'Kaburu', alisema jana kuwa maandalizi ya mchezo huo yanakwenda vizuri na wapinzani wao walitarajiwa kuwasili Dar es Salaam leo.

Kaburu amewaomba manazi wote wa Simba kujitokeza kwa wingi katika mchezo huo ili kuishangilia timu yao kwa lengo la kuwapa nguvu wachezaji.

YANGA, AZAM KUWAKOSA COUTINHO NA BOCCO J'PILI

TIMU za soka za Yanga na Azam, huenda zikaingia dimbani Jumapili bila ya baadhi ya wachezaji wake nyota.

Yanga na Azam zinatarajiwa kushuka dimbani Jumapili katika mechi ya kuwania Ngao ya Jamii, itakayopigwa kwenye Uwanja wa Taifa, Dar es Salaam.

Habari kutoka ndani ya Yanga zimeeleza kuwa, timu hiyo itamkosa mshambuliaji wake mahiri, Andrey Coutinho, ambaye ni majeruhi.

Mbrazil huyo aliumia wakati Yanga ilipocheza mechi ya kirafiki juzi dhidi ya Polisi Dar es Salaam kwenye uwanja wa sekondari ya Loyola.

Mshambuliaji huyo alipatwa na maumivu hayo wakati alipokuwa akijaribu kupiga mpira na hivyo kushindwa kuendelea na mchezo. Timu hizo zilitoka suluhu.

Kwa mujibu wa habari za uhakika, Mbrazil huyo huenda akakaa nje ya uwanja kwa zaidi ya mwezi mmoja. Yanga itatoa taarifa rasmi leo baada ya mchezaji huyo kufanyiwa vipimo.

Coutinho amekuwa kivutio kikubwa kwa mashabiki wa Yanga kutokana na staili yake ya uchezaji, aliyoionyesha katika mechi kadhaa za kirafiki alizocheza hadi sasa.

Wakati huo huo, mshambuliaji nyota wa Azam, John Bocco naye ataikosa mechi hiyo kutokana na kusumbuliwa na maumivu ya misuli.

Habari kutoka ndani ya Azam zimeeleza kuwa, mshambuliaji huyo atakuwa nje ya uwanja kwa wiki tatu.
Meneja wa Azam FC, Jemadari Said, amesema Bocco aliyeumia kwenye michuano ya Kombe la Kagame mwezi uliopita mjini Kigali, Rwanda baada ya kufanyiwa vipimo, ametakiwa kupumzika ili kupona vizuri.
“Tunao majeruhi wawili, ambao hawatakuwepo kwenye programu ya mchezo wa Ngao ya Jamii, ambao ni beki Waziri Salum na nahodha wetu, John Bocco,”alisema Jemedari.

KIINGILIO CHA CHINI MECHI YA YANGA, AZAM BUKU TANO

KIINGILIO cha chini kwenye mechi ya Ngao ya Jamii kuashiria uzinduzi wa msimu mpya wa Ligi kati ya Azam na Yanga itakayochezwa Jumapili (Septemba 14 mwaka huu) Uwanja wa Taifa, Dar es Salaam ni sh. 5,000.

Mechi hiyo itaanza saa 10 kamili jioni, na kiingilio hicho cha sh. 5,000 ni kwa viti vya rangi ya kijani na bluu vitakavyochukua jumla ya watazamaji 36,000 katika uwanja huo wenye viti 57,558.

Viingilio vingine katika mechi hiyo ambayo itatumia tiketi za elektroniki ni sh. 10,000 kwa viti vya rangi ya chungwa, sh. 20,000 kwa viti vya VIP C na B wakati viti vya VIP A kiingilio ni sh. 30,000.

MWAMUZI LUGENGE KUAGWA LEO
Mwamuzi wa daraja la kwanza (class one), Luteni Godwill David Lugenge aliyefariki dunia juzi (Septemba 7 mwaka huu) kwa ajali ya gari katika Wilaya ya Handeni mkoani Tanga anaagwa leo (Septemba 9 mwaka huu).

Mwili wa marehemu ambao umehifadhiwa katika Hospitali Kuu ya Jeshi (GMH) Lugalo, baadaye leo saa 6 mchana utapelekwa nyumbani kwa kaka yake Kimara Bucha jijini Dar es Salaam ambapo shughuli za kuaga zitafanyika kabla ya safari ya kwenda mkoani Njombe kwa ajili ya mazishi.

Luteni Lugenge ambaye mwishoni mwa wiki alishiriki mitihani ya utimamu wa mwili kwa waamuzi wa Ligi Kuu, akiwa na ndugu yake Christopher Alexander Lunyungu katika gari dogo walipata ajali hiyo wakati wakienda mkoani Kilimanjaro.

Shirikisho la Mpira wa Miguu Tanzania (TFF) ambalo limetoa ubani wa sh. 200,000 kwa familia ya marehemu kwenye shughuli ya kuaga itawakilishwa na mjumbe wake wa Kamati ya Utendaji ambaye pia ni Mwenyekiti wa Kamati ya Waamuzi, Saloum Umande Chama.

TFF tunatoa pole kwa familia ya marehemu Luteni Lugenge, Chama cha Waamuzi wa Mpira wa Miguu nchini (FRAT) na Jeshi la Wananchi wa Tanzania (JWTZ) na kuwataka kuwa na subira na uvumilivu katika kipindi hiki kigumu cha msiba huo mzito. Bwana ametoa, Bwana ametwaa. Jina lake lihimidiwe

TAIFA STARS YACHAPWA 2-0 NA BURUNDI

TIMU ya soka ya taifa, Taifa Stars bado haijapata dawa ya kufuta uteja kwa Burundi baada ya kukandikwa mabao 2-0 katika mechi ya marudiano ya kirafiki ya kimataifa iliyochezwa jijini Bujumbura Burundi.


Stars iliyokwenda Burundi ikitamba kwenda kulipa kisasi cha mabao 3-0 ilichopewa na wenyeji wao kwenye mechi ya kirafiki ya kuadhimisha Siku ya Uhuru, ilishindwa kutimiza tambo hizo kwa kukandikwa na wenyeo wao kwenye mechi hiyo ya ugenini.

Mabao yaliyoizamisha Stars yalifungwa katika dakika ya kwanza tu ya mchezo na Saido Ntibazonkiza kabla ya Yusuf Ndikumana kuongeza la pili kwenye dakika ya 29 na kuifanya Stars ipigane kusaka angalau bao la kufutia machozi bila mafanikio yoyote.

TFF YASEMA OKWI HANA MKATABA NA YANGA, SIMBA WACHEKELEAAAAA

Kamati ya Sheria na Hadhi za Wachezaji ya Shirikisho la Mpira wa Miguu Tanzania (TFF) imekutana leo (Septemba 7 mwaka huu) na kupitia masuala mbalimbali ikiwemo mgogoro wa kimkataba kati ya klabu ya Yanga na mchezaji Emmanuel Okwi.

Mkataba huo ulipitiwa na Kamati, ikiwemo kumsikiliza mchezaji mwenyewe pamoja na upande wa Yanga, na kuridhika kuwa mkataba kati ya pande hizo umevunjika.

Ukiwa ni mkataba wa pande mbili, Yanga ilikiuka kipengele namba 8 kuhusu malipo ya ada ya usajili.

Yanga ikiwa mwajiri, haikutekeleza kipengele hicho cha kimkataba hadi kufikia Juni 27 mwaka huu ilipoandika barua TFF kuomba mkataba huo uvunjwe. Kwa maana hiyo, Okwi ni mchezaji huru, hivyo yuko huru kujiunga na timu yoyote.

Mkataba ni uhusiano kati ya mwajiri (Yanga) na mwajiriwa (Okwi), ambapo Kamati imebaini kuwa uhusiano huo haupo, hivyo hakuna mazingira ya pande hizo mbili kuendelea kufanya kazi pamoja.

Pamoja na Yanga kuwasilisha pingamizi la kuwepo mmoja wa wajumbe katika kikao kwa sababu za kimaslahi (conflict of interests), walifahamishwa kuwa kilichopo mbele ya kamati ni mgogoro wa kimkataba kati ya Yanga na Okwi, na si usajili.

Pia lilijitokeza suala la Okwi kutakiwa na klabu ya Wadi Degla ya Misri. Kamati imeiagiza Sekretarieti ya TFF kulifanyia uchunguzi suala hilo na kulitolea taarifa katika kikao kijacho.

Hata hivyo mjumbe huyo hakushiriki katika kuchangia hoja na kutoa maamuzi. Uamuzi wa kamati ulifanyika baada ya majadiliano, hivyo hakukuwa na suala la kupiga kura.

Kuhusu pingamizi la Coastal Union kwa Abdi Banda, Kamati imebaini kuwa klabu hiyo imevunja mkataba kati ya pande hizo mbili kwa kushindwa kumlipa mchezaji huyo mshahara wa miezi mitatu mfululizo kama takwa la mkataba.

Klabu ya Coastal Union iliwakilishwa na mmoja wa viongozi wake, wakati Banda aliwakilishwa na mwanasheria wake.

Vilevile Kamati imekubaliana na pingamizi la Chama cha Mpira wa Miguu Mkoa wa Morogoro (MRFA) kuhusu wachezaji waliofanyiwa uhamisho kutoka katika mkoa wake bila kulipiwa ada za usajili, hivyo klabu husika zinatakiwa kulipa ada hizo.

Pia Kamati imeagiza klabu zote zilizosajili wachezaji bila kuwafanyia uhamisho, kulipa ada za uhamisho kwa pande husika kabla ya kuanza ligi, vinginevyo leseni zao zitazuiwa hadi watakapolipa.

Mashauri mengine ya pingamizi yatasikilizwa baadaye kwa vile klabu husika hazikupata fursa ya kufika mbele ya kamati.

Kamati inasisitiza kwa wanachama wa TFF kuheshimu mikataba.

TFF YARUDISHA LIGI DARAJA LA PILI

Kamati ya Utendaji ya Shirikisho la Mpira wa Miguu Tanzania (TFF) iliyokutana hivi karibuni imekubali mapendekezo ya Kamati ya Mashindano ya kurejesha michuano ya Ligi Daraja la Pili (SDL).

Lengo la kurejesha ligi hiyo ni kuongeza wigo wa mashindano kitaifa ambapo itasaidia kushirikisha kundi kubwa zaidi la wachezaji kwenye mashindano makini yanayozingatia viwango na vigezo ili kuwapa wachezaji maendeleo ya kiuchezaji ikiwemo kuendelezwa vipaji vyao kitaalamu.

Ligi hiyo yenye timu 24 itachezwa katika hatua ya makundi manne ya timu sita sita kwa mtindo wa nyumbani na ugenini ambapo mshindi wa kila kundi atapanda kucheza Ligi Daraja la Kwanza (FDL). Timu ya mwisho kila kundi itarudi kwenye ligi ya mkoa wake.

Hatua ya pili ni kutafuta bingwa wa SDL ambapo timu zilizoongoza makundi (nne) zitacheza kwa mtoano nyumbani na ugenini. Utakuwepo mchezo wa fainali ambapo mshindi atkuwa bingwa wa SDL msimu wa 2014/2015.

Timu zitakazocheza SDL kwa msimu huu ni zile zilizoshika nafasi ya pili hadi ya nane katika Ligi ya Mabingwa wa Mikoa (RCL) katika makundi yao msimu uliopita, na tatu zilizoshuka kutoka FDL msimu uliopita.

Kundi A litakuwa na timu za Milambo FC (Tabora), Mji Mkuu FC (Dodoma), Mpanda United (Mpanda), Mvuvumwa FC (Kigoma), Singida United (Singida) na Ujenzi (Rukwa). Kundi B ni Arusha FC (Arusha), Bulyanhulu FC (Shinyanga), Eleven Stars (Kagera), Mbao FC (Mwanza), Pamba FC (Mwanza) na Rwamukoma JKT (Mara).

Timu za kundi C ni Abajalo (Dar es Salaam), Kiluvya United (Pwani), Kariakoo FC (Lindi), Mshikamano FC (Dar es Salaam), Navy FC (Dar es Salaam) na Transit Camp (Dar es Salaam). Kundi D ni Magereza FC (Iringa), Mkamba Rangers (Morogoro), Njombe Mji (Njombe), Town Small Boys (Ruvuma), Volcano FC (Morogoro) na Wenda FC (Mbeya).

Ligi itachezwa kuanzia Novemba mwaka huu.

MBUNGE MTANDA KUFUNGA KOZI YA LESENI A
Mwenyekiti wa Kamati ya Bunge ya Huduma za Jamii, Mheshimiwa Said Mtanda anatarajia kufunga kozi ya ukocha ya Leseni A ya Shirikisho la Mpira wa Miguu Afrika (CAF) inayomalizika kesho (Septemba 7 mwaka huu).

Hafla hiyo ya ufungaji wa kozi hiyo iliyoshirikisha makocha 22 itafanyika saa 7 mchana kwenye Uwanja wa Kumbukumbu ya Karume, jijini Dar es Salaam.

Kozi hiyo ya siku tano iliyokuwa chini ya wakunzi wa CAF, Moatasim Mohamed Nasr kutoka Sudan na Sunday Kayuni wa Tanzania.

KOZI YA UKUFUNZI WA UTAWALA YA FIFA KUFANYIKA DESEMBA
Shirikisho la Mpira wa Miguu Tanzania (TFF) kwa kushirikiana na Shirikisho la Kimataifa la Mpira wa Miguu (FIFA) wameandaa kozi ya ukufunzi wa utawala itakayofanyika Desemba mwaka huu.

Kozi hiyo itakayoendeshwa na wakufunzi kutoka FIFA itafanyika jijini Dar es Salaam kuanzia Desemba 1 hadi 5 mwaka huu, ambapo sifa ya chini ya elimu kwa wanaotaka kushiriki ni kidato cha nne.

Kwa wanaotaka kushiriki kozi hiyo wanatakiwa kutuma maombi yao kwa Katibu Mkuu wa TFF. Mwisho wa kupokea maombi hayo ni Septemba 12 mwaka huu ambapo wanatakiwa pia kuwasilisha nakala za vyeti vyao vya kitaaluma.

FDL KUCHEZWA MAKUNDI MAWILI
Ligi Daraja la Kwanza (FDL) msimu wa 2014/2015 itachezwa katika makundi mawili kwa mtindo wa nyumbani na ugenini kuanzia Oktoba 11 mwaka huu.

Kundi A lina timu za African Lyon, African Sports, Ashanti United, Friends Rangers, Kimondo SC, Kurugenzi Mafinga, Lipuli, Majimaji, Mlale JKT, Polisi Dar es Salaam, Tessema FC na Villa Squad.

Wakati kundi B lina timu za Burkina Faso, Geita Veterans SC, Green Warriors, Kanembwa JKT, Mwadui SC, Oljoro JKT, Panone FC, Polisi Dodoma, Polisi Mara, Polisi Tabora, Rhino Rangers na Toto Africans.

PHIRI AANZA KUONYESHA MAKUCHA SIMBA, YAICHAPA GOR MAHIA 3-0

Wachezaji wa Simba wakishangilia moja ya mabao ya timu hiyo jana

Mshambuliaji Emmanuel Okwi (kushoto) wa Simba akitafuta mbinu za kumtoka beki wa Gor Mahia katika mechi ya jana.

SIMBA jana iliichapa Gor Mahia ya Kenya mabao 3-0 katika mechi ya kirafiki ya kimataifa ya soka iliyochezwa kwenye Uwanja wa Taifa, Dar es Salaam.

Katika mechi hiyo, Simba ilimchezesha kwa mara ya kwanza mshambuliaji wake nyota kutoka Uganda, Emmanuel Okwi, baada ya kumsajili kutoka kwa wapinzani wao wa jadi, Yanga.

Okwi, alijikuta akiwa kwenye wakati mgumu kutokana na mashabiki wa Yanga kumzomea kila alipogusa mpira.

Mshambuliaji Paul Kihongera kutoka Kenya, aliibuka shujaa wa Simba baada ya kuifungia mabao mawili kati ya matatu. Bao lingine lilifungwa na Ramadhani Singano 'Messi'.

Wakati huo huo, Yanga inashuka dimbani leo kumenyana na Big Bullets ya Malawi katika mechi ya kirafiki itakayochezwa kwenye Uwanja wa Taifa, Dar es Salaam.

Mechi hiyo itakuwa ya pili ya kimataifa kwa Yanga, kwa ajili ya kujiandaa na msimu ujao wa ligi kuu ya Tanzania Bara, ikiwa chini ya Kocha mpya, Marcio Maximo kutoka Brazil.

HUC YATANGAZA UFADHILI WA MASOMO YA UFUNDI

Na Nathan Mpangala wa HUC.

Shirika lisilo la kiserikali la Help for Underserved Communities Inc. (HUC), linatangaza nafasi za ufadhili wa masomo ya ufundi VETA kwa vijana wa Kitanzania. Kozi hizo ni ufundi wa magari, umeme wa magari, udereva magari/pikipiki, ufundi cherehani, hair dressing (urembo), mapambo ya ukumbi na nyinginezo.

Kwa mujibu wa taarifa iliyotolewa na shirika hilo, inasema, HUC, itafadhili wanafunzi 15 wa kozi mbalimbali za awali VETA kwa mwaka 2014-2015.

Walengwa ni vijana wa kike na kiume waliomaliza shule za msingi ambao wamethibitika kuwa wazazi/walezi wao wameshindwa kuwalipia ada. Imesema sehemu ya taarifa hiyo.

Taarifa hiyo imeongeza kuwa, mwanafunzi atatakiwa kujaza kwa usahihi fomu ya maombi (imeambatanishwa hapa), akiambatanisha na barua akieleza sababu za kuomba ufadhili huu na barua ya utambulisho toka ofisi ya serikali za mitaa na mwisho wa kupokea barua za maombi ni Jumatano, Oktoba 01, 2014, saa 11 jioni.

Barua za maombi zitumwe kupitia:
Maombi ya ufadhili wa masomo,

Help for Underserved Communities Inc.
P. O. Box 7022,
Dar es Salaam,
Tanzania.
Au
Help for Underserved Communities Inc.
P.O.Box 6822,
Ellicott City, MD 21042
Au
Kupitia baruapepe:
info@myhuc.org OR kijasti@hotmail.com

fomu ya kujiunga

Taarifa hiyo imesema, majina ya watakaopata ufadhili yatatangazwa Oktoba 10, 2014 na kwamba ada italipwa moja kwa moja chuoni.
HUC ni shirika lisilo la kiserikali toka nchini Marekani lenye lengo la kuziwezesha jamii zipatazo huduma hafifu kupata maji safi na salama, vifaa vya elimu na ufadhili wa masomo ya ufundi. Mwaka jana, shirika hili lilifadhili vijana 11 VETA.

AZAM YAINGIA MKATABA NA NMB

BENKI ya NMB imeingia mkataba wa udhamini wa miaka miwili na klabu bingwa ya soka Tanzania Bara, Azam FC ambao utahusu gharama za usafiri na baadhi za uendeshaji wa timu.


Akizungumza leo makao makuu ya klabu, Azam Complex, Chamazi, nje kidogo ya Jiji la Dar es Salaam, Mwenyekiti wa Azam FC Sheikh Said Muhammad Said amesema kwamba mkataba huo unaanza mara moja.

Sheikh Said amesema kwamba wanaishukuru NMB kwa kuwapa Mkataba huo na anaamini utaongeza ufanisi katika klabu yao.

“Tumeupokea kwa furaha Mkataba huu na tunapenda kutoa shukrani zetu za dhati kwa NMB kwa kuungana nasi,”amesema.

Akifafanua kuhusu Mkataba huo, Katibu Mkuu wa Azam FC, Nassor Iddrisa Mohammed ‘Father’ amesema NMB itanufaika kwa kutangazwa kwenye jezi za Azam, mabasi na pia kuweka mabango yao kwenye Uwanja wa Azam Complex.

“Nembo za NMB zitapamba jezi za Azam FC kuanzia mazoezini na kwenye mashindano yote, vyombo vyetu vya usaifiri kadhalika vitawekwa nembo za NMB kama itakavyokuwa kwenye Uwanja wetu a Azam Complex,”amesema Father.

Kwa upande wake, Mkurugenzi Mtendaji wa NMB, Mark Wiessing amesema mafanikio ya Azam FC ndiyo yaliyowavutia kuingia nao ndoa hiyo. “Mafanikio ya Azam FC katika soka ya Tanzania ndiyo yametuvuta kuingia nao ushirika huu,”amesema

YANGA YAUNDA KAMATI YA VIJANA NA MASHINDANO

TAARIFA KWA VYOMBO VYA HABARI

Wajumbe Wenza wa Kamati ya Utendaji ya YANGA (Maendelo ya Michezo), Ndugu Seif Ahmed na Engineer Isaac Chanji, wanapenda kutoa taarifa kupitia vyombo vya habari kwa wanaYANGA, wameunda Kamati ndogo chini ya Kamati ya Utendaji ya YANGA zifuatazo:

1) KAMATI YA UFUNDI
Wajumbe:
1) Duduma, Nassoro
2) Lamlembe, Roger
3) Malulu, Pascal
4) Msolla, Peter
5) Zangira, Steve

2) KAMATI YA SOKA YA VIJANA NA WANAWAKE
Wajumbe:
1) Katwila, Shaban
2) Kabisa, Jessica (Advocate)
3) Mazwile, Isack
4) Mwita, George
5) Tembele, Ally Mayay

3) KAMATI YA MASHINDANO
Wajumbe:
1) Cheyo, Magembe
2) Didi, Ibrahim
3) Hussein, Ndama Risasi
4) Katabalo, Moses
5) Katunzi, Mudhamiri
6) Kihanga, Pascal
7) Kingo, Ray Shauri
8) Kleb, Abdallah Bin
9) Luhago, David
10) Lukumay, Samwel
11) Macha, Innocent
12) Maige, Jackson
13) Mahende, Mugaya
14) Makay, Sule
15) Malebo, Michael
16) Malume, Paul
17) Matata
18) Mbise, Anandumi Timothy
19) Mlangwa, David
20) Mogha, John
21) Mutaboyerwa, Joseph John
22) Ntimizi, Said
23) Nyambaya, Lameck
24) Nyika, Hussein
25) Nyumbamkaly,
26) Ramadhan, Fulgence
27) Rashid, Ahmed
28) Suleman, Majid
29) Tenga, Frank
30) Tindwa, Beda
31) Zakaria, Dr.

Ifahamikekwamba, kutakuwa na nyongeza ya uteuzi wa Wajumbe wengine wa Kamatiza YANGA zilizotajwa hapo juu.

Ndugu Seif Ahmed na Engineer Isaac Chanji Wajumbe Wenza wa Kamati ya Utendaji ya YANGA (Maendelo ya Michezo) watakuwa Wenyekiti Wenza wa Kamati zilizotajwa hapo juu.

Kamati ya Utendaji ya YANGA, ina karibisha Wajumbe waliotajwa katika Kamati zilizotajwa hapo juu kwa dhamira njema kuwa watasaidia kujenga YANGA bora, na wanaomba ushirikiano kutoka kwa wanaYanga wote ili Wajumbe walioteuliwa waweze ketenda kazi zao vyema kwa manufaa ya YANGA.

(YANGA DAIMA MBELE NYUMA MWIKO)
(BENO NJOVU)
KATIBU MKUU WA YANGA

SIMBA KUJIPIMA KWA GOR MAHIA NA APR, YANGA USO KWA USO NA THIKA UNITED LEO

TIMU kongwe ya soka nchini, Simba mwishoni mwa wiki hii itacheza mechi ya kirafiki ya kimataifa dhidi ya Gor Mahia ya Kenya. Mechi hiyo itapigwa kwenye Uwanja wa Taifa, Dar es Salaam.


Taarifa kutoka ndani ya Simba zimeeleza kuwa, maandalizi ya mechi hiyo yanaendelea vizuri, timu ikiwa kambini Zanzibar, chini ya Kocha wake mzoefu, Patrick Phiri kutoka Zambia.

Kwa mujibu wa habari hizo, Simba huenda ikacheza mechi nyingine ya kirafiki ya kimataifa wiki ijayo kwa kumenyana na APR ya Rwanda.

Mechi dhidi ya Gor Mahia itapigwa Jumamosi wakati mechi dhidi ya APR itapigwa Jumatano ijayo kwenye uwanja huo.

Wakati huo huo, Yanga leo inacheza mechi yake ya kwanza ya kimataifa ya kirafiki kwa kumenyana na Thika United ya Kenya.

Mechi hiyo itapigwa kwenye Uwanja wa Taifa na itakuwa ya kwanza kwa Kocha mpya wa Yanga, Marcio Maximo kutoka Brazil tangu alipoanza kuinoa timu hiyo.

Mechi hiyo itakuwa kipimo kizuri kwa Yanga, ambayo imeshacheza mechi tatu za kirafiki dhidi ya Chipukizi, Shangani na KMKM za Zanzibar na kuibuka na ushindi.

Mechi hiyo itachezwa kuanzia saa 11:00 jioni kwa saaa za Afrika Mashariki ili kutoa fursa kwa wafanyakazi wa maofisini na taasisi mbalimbali waweze kuwahi na kushuhudia mchezo huo.

Viingilio vya mchezo huo ni:
VIP A Tshs 30,000/=
VIP B & C Tshs 20,000/=
Orange Tshs 10,000/=
Bluu & Kijanni Tshs 5,000/=

YANGA YAINGIA MKATABA NA CRDB

Uongozi wa klabu ya Young Africans leo umewekeana sahihi ya makubaliano na Benki ya CRDB nchini juu ya uboreshaji na utengenezaji wa kadi za uanachama, hafla hiyo imefanyika katika Makao Makuu ya Benki hiyo eneo la Posta mpya jijni Dar es salaam.

Mkurugenzi wa Benki ya CRDB Dr Charles Kimei amesema anaushukuru uongozi wa Yanga kwa kuwaamini benki yao kuwa wanaweza kufanya kazi hiyo, na sisi tunaamini tutafanya kazi vizuri na kuweza kufikia malengo yao waliyotuwekea katika kipindi muafaka.

"Kwetu sisi kupata nafasi ya kufanya kazi na klabu ya Yanga ni jambo jema, tunatambua wana wana wapenzi zaidi ya milioni 20 nchi nzima, hivyo ni jukumu letu kuhakikisha tunawifikia kila sehemu walipo na wanajiunga na uanachama wa klabu yao pendwa," alisema Dr Kimei.

Aidha Kimei amesema kwa utaratibu huo wa mfumo wa kisasa, wataanza kwa kutoa bure kadi za uanchama wa Yanga ambazo zitakua na nembo ya VISA itakayomfanya mtumiaji aweze kuitumia sehem yoyote alipo na kurahisisha zoezi la ukusanyaji wa ada za uanachama.

Gharama ya kadi itakua ni Tshs 8,000 tu kwa watakaoanza upya (bure kwa waliokua tayari wanachama) na mteja/mwanachama ataendelea kuichangia klabu yake ya Yanga kiasi cha Tsh 250/= tu kwa wiki ambapo kwa mwezi ni sawa Tsh 1,000/= na kufanya kwa mwaka ada kuwa ile ile Tshs 12,000/=.
Mjumbe wa Baraza la Wadhamini wa klabu ya Young Africans, Bi Fatma Karume amesema anaishukuru benki ya CRDB kwa kubali kufanya kazi hiyo, na kwa uwezo wao wa utendaji kazi anaamini wataifanya kazi hiyo kwa kiwango cha hali ya juu.
"Kikubwa nilichofurahi ni kuwa hawa CRDB Bank wapo mpaka kwetu Unguja, hivyo naona zoezi hilo litafanikiwa vizuri na kurahisisha upatikanaji wa kadi za wanachama kwa uharaka zaidi," alisema  Bi Fatma.
Kadi mpya za uanachama wa Yanga zitakazotolewa na CRBD Bank zitakua za aina mbili, Premieum Visa Card kwa ajili ya viongozii mashuhuri wa klabu ya Young Africans tangu kuanzishwa kwake na nyingine ni Normal Visa Card kwa ajili ya wanachama wa kawaida.
Awali klabu ya Young Africans ilikuwa na mkataba wa aina hiyo na Benki ya Posta, Uongozi wa Yanga umeshawasilisha Notice kwa benki ya Posta juu ya kusitisha mkataba nao na sasa huduma hiyo itaanza kutolea kupitia benk ya CRDB.

SIMBA YAIPIGA KMKM 5-0

TIMU kongwe ya soka nchini, Simba jana usiku iliibugiza KMKM mabao 5-0 katika mechi ya kirafiki iliyochezwa kwenye Uwanja wa Amaan, Zanzibar.


Katika mechi hiyo, Kocha Patrick Phiri wa Simba aliendelea kukitumia kikosi kile kile, ambacho kimecheza mechi tatu za kirafiki mjini hapa.

Kipigo hicho ni cha pili mfululizo kwa KMKM. Jumatano ya wiki iliyopita, KMKM ilipigwa mabao 2-0 na Yanga kwenye uwanja huo.

Mshambuliaji Hamisi Tambwe aliendelea kudhihirisha kuwa ni tishio katika kuzifumania nyavu baada ya kuifungia Simba mabao mawili kati ya matano. Mabao mengine yalifungwa na Amri Kiemba, Ramadhani Singano na Elius Maguri.

Kocha Phiri alilazimika kubadili kikosi chake chote cha kwanza na kuingiza wachezaji wengine katika kipindi cha pili.

Katika mechi hiyo, Emmanuel Okwi, ambaye usajili wake umezua utata, alijikuta akisugua benchi kama ilivyokuwa kwa beki Donald Musoti, ambaye amechwa kwa vile ana mipangoa ya kwenda Arabuni.

Viongozi kadhaa wa Simba, wakiwemo wanaounda kundi la Marafiki wa Simba, walikuwepo uwanjani kushuhudia mechi hiyo.

YANGA SC YAUNDA KAMATI ZA SHERIA, MAADILI, NIDHAMU NA UCHAGUZI

TAARIFA KWA VYOMBO VYA HABARI

MWANASHERIA Sam Mapande, Mjumbe wa Kamati ya Utendaji ya YANGA –(Utawala Bora)
anapenda kutoa taarifa kupitia vyombo vya habari kwa wana YANGA, ameunda Kamati ndogo chini ya
Kamati ya Utendaji wa YANGA zifuatazo:

1) KAMATI YA MAADILI
Wajumbe:
1) Fimbo, Mgongo Prof. (Advocate)
2) Kabudi, Mpalamaganda Prof. (Advocate)
3) Njaa, Salehe Ramadhani (Advocate)
4) Rashidi, Tausi Abdallah (Advocate)
5) Tenga, Cathbert (Advocate)

2) KAMATI YA NIDHAMU
Wajumbe:
1) Karua, Tedy
2) Lamlembe, Roger
3) Kihanga, Pascal
4) Mahenge, Burton Yesaya
5) Mudhihir, Mudhihir (Advocate)

3) KAMATI YA SHERIA NA KATIBA
Wajumbe:
1) Fimbo, Mgongo Prof. (Advocate)
2) Gikas, Farija (Advocate)
3) Kabisa, Jessica (Advocate)
4) Kabudi, Mpalamaganda Prof. (Advocate)
5) Kambamwene, January (Advocate)
6) Lupogo, Herman (Advocate)
7) Madibi, Richard (Advocate)
8) Mahenge, Burton Yesaya
9) Mgongolwa, Alex (Advocate)
10) Mkucha, Elisha (Advocate)
11) Mudhihir, Mudhihir (Advocate)
12) Njaa, Salehe Ramadhani (Advocate)
13) Rashidi, Tausi Abdallah (Advocate)
14) Tenga, Cathbert (Advocate)
15) Tenga, Ringo Dr. (Advocate)
16) Vedasto, Audax (Advocate

4) KAMATI YA UCHAGUZI
Wajumbe:
1) Kajole, Mustafa
2) Lundenga, Hashim Ibrahim
3) Makele, Bakili
4) Mlelwa, Daniel
5) Ngongolwa, Alex (Advocate)

Ifahamike kwamba, kutakuwa na nyongeza ya uteuzi wa Wajumbe wengine wa Kamati za YANGA
zilizotajwa hapo juu.

Mwanasheria Sam Mapande, Mjumbe wa Kamati ya Utendaji ya YANGA – (Utawala Bora) atakuwa
Mwenyekiti wa Kamati zilizotajwa hapo juu.

Kamati ya Utendaji ya YANGA, ina karibisha Wajumbe waliotajwa katika Kamati zilizotajwa hapo juu
kwa dhamira njema kuwa watasaidia kujenga YANGA bora, na wanaomba ushirikiano kutoka kwa
wanaYanga wote ili Wajumbe walioteuliwa waweze kutenda kazi zao vyema kwa manufaa ya YANGA.

(YANGA DAIMA MBELE NYUMA MWIKO)
(BENO NJOVU)
KATIBU MKUU WA YANGA.

JK AMPA ZAWADI LUIS FIGO

 

RAIS Dkt. Jakaya Mrisho Kikwete akimpa zawadi ya kinyago mchezaji veterani wa timu ya Real Madrid ya Hispania, Luis Figo wakati wa hafla ya chakula cha jioni aliyowaandalia wachezaji wa timu hiyo na timu ya maveterani ya Taifa Stars Ikulu jijini Dar es Salaam juzi usiku baada ya mechi ya kirafiki ambapo Real Madrid illifungaTaifa Stars 3-1 katika Uwanja wa Taifa.  (Picha na Freddy Maro).

26 WAITWA TAIFA STARS, KUIVAA MOROCCO SEPTEMBE 5

KOCHA mkuu wa timu ya soka ya Taifa, Mart Nooirj ametangaza kikosi cha wachezaji 26 kitakachocheza mechi ya kirafiki ya kimataifa dhidi ya Morocco.

Mechi hiyo, ambayo imo kwenye kalenda ya Shirikisho la Soka la Dunia (FIFA), imepangwa kuchezwa Septemba 5 mwaka huu nchini Morocco.


Wachezaji wapya waliomo kwenye kikosi hicho ni kiungo Said Ndemla wa Simba SC na washambuliaji Mwagane Yeya wa Mbeya City na Juma Luizio wa ZESCO United ya Zambia.

Kikosi kamili ni makipa; Deogratias Munishi (Yanga) na Mwadini Ali (Azam). Mabeki ni Said Morad (Azam), Oscar Joshua (Yanga), Shomari Kapombe (Azam), Nadir Haroub (Yanga), Kelvin Yondani (Azam), Aggrey Morris (Azam), Joram Mgeveke (Simba) na Charles Edward (Yanga).

Viungo; Erasto Nyoni (Azam), Mwinyi Kazimoto (Al Markhiya, Qatar), Amri Kiemba (Simba), Himid Mao (Azam), Salum Abubakar (Azam), Said Ndemla (Simba), Said Juma (Yanga) na Haruna Chanongo (Simba).

Washambuliaji; John Bocco (Azam), Khamis Mcha (Azam), Simon Msuva (Yanga), Thomas Ulimwengu (TP Mazembe, DRC), Mbwana Samata (TP Mazembe, DRC), Mrisho Ngassa (Yanga), Mwegane Yeya (Mbeya City) na Juma Liuzio ZESCO, Zambia).

Kikosi hicho kinatarajiwa kuingia kambini Jumapili (Agosti 31 mwaka huu) mchana katika hoteli ya Accomondia mjini Dar es Salaam na kitakuwa kikifanya mazoezi Uwanja wa Karume, Dar es Salaam.

WATAKAOPANGA MATOKEO KUFUNGIWA MAISHA, BONIFACE WAMBURA AULA TFF

KAMATI ya Utendaji ya Shirikisho la Soka Tanzania (TFF) imeamua kuanzia sasa adhabu kwa watu

wanaotoa rushwa au kupanga matokeo katika mchezo huo itakuwa ni kufungiwa maisha kujishughulisha
na mchezo huo.

Taarifa katika tovuti ya TFF imesema kwamba hayo yamefikiwa katika kikao cha Kamati ya Utendaji ya shirikisho hilo juzi.

Kwa muda sasa, kumekuwa na tuhuma nyingi za wachezaji na marefa kuhongwa ili kupanga matokeo-
lakini hakukuwa na sheria madhubuti ya kupambana na hali hiyo- lakini kwa hatua hii mpya ya TFF
dhahiri itasaidia kupunguza mchezo huo mchafu.

Aidha, baada ya Libya kujitoa kuwa mwenyeji wa Fainali za Afrika (AFCON) za 2017, Shirikisho la
Soka Afrika (CAF) limealika nchi wanachama kuomba uenyeji wa fainali hizo.

Kamati ya Utendaji ya TFF iliyokutana Agosti 24, mwaka huu imeamua Tanzania kuomba uenyeji wa
fainali hizo.

“Tunatambua kuwa moja ya masharti ya kuandaa fainali hizo ni pamoja na nchi kuwa imeandaa moja ya
mashindano ya vijana. Lakini kwa kuwa suala hili liko katika mazingira maalumu (exceptional
circumstances) tunaamini CAF watafikiria ombi letu kwa msingi huo,”.

Awali Libya ilipewa uenyeji wa fainali hizo 2015, lakini zikahamishiwa Afrika Kusini kutokana na sababu za kiusalama. Hivyo, Libya ikapewa fainali za 2017 ambapo sasa imejitoa yenyewe kuandaa fainali hizo.

Wakati huo huo: Kamati ya Utendaji ya TFF imemteua Boniface Wambura kuwa Mkurugenzi mpya wa Mashindano kuanzia Septemba 1 mwaka huu.

Kabla ya uteuzi huo, Wambura alikuwa Ofisa Habari na Mawasiliano wa TFF kuanzia Januari 1, 2011.
Nafasi hiyo sasa iko wazi na itajazwa baadaye na Kamati ya Utendaji.

TANZANIA ELEVEN ILIPOMENYANA NA WAKONGWE WA REAL MADRID

Beki wa Tanzania Eleven, Salum Sued akijaribu kumdhibiti mshambuliaji wa wachezaji wakongwe wa Real Madrid ya Hispania, De La Red

 Manahodha wa Tanzania Eleven, Mohamed Mwameja na wa Real Madrid, Andress Sabido wakipiga kura kabla ya kuanza mchezo huo

 Waziri wa Habari, Vijana, Utamaduni na Michezo, Dk. Fenella Mukangara akitambulishwa kwa mmoja wa wachezaji wa Tanzania Eleven.

Rais Jakaya Kikwete akipunga mkono kwa mashabiki waliofika kushuhudia pambano kati ya Tanzania Eleven na wachezaji wakongwe wa Real Madrid.

 Kikosi cha wachezaji wakongwe wa klabu ya Real Madrid ya Hispania

Kikosi cha wachezaji wa zamani wa timu ya Tanzania Eleven

Nahodha wa Tanzania Eleven, Mohamed Mwameja akisalimiana na mwenzake wa Real Madrid, Andress Sabido. Katika mechi hiyo, Real Madrid ilishinda mabao 3-1.

SITTI MTEMVU NDIYE MISS TEMEKE 2014

Redd's Miss Temeke 2014, Sitti Mtemvu akipunga mkono huku akiwa na mshindi wa Pili, Salma Saleh (kushoto) na watatu, Neema Mollel, baada ya kutangazwa kuwa washindi wa shindano hilo.

SIMBA, YANGA KUVAANA OKTOBA 12 LIGI KUU



Add caption



MIAMBA ya soka nchini, Simba na Yanga inatarajiwa kushuka dimbani Oktoba 12 mwaka huu katika mechi ya mzunguko wa kwanza wa michuano ya ligi kuu ya Tanzania Bara.

Ratiba ya ligi hiyo iliyotolewa jana na Shirikisho la Soka Tanzania (TFF), inaonyesha kuwa mechi hiyo itapigwa kwenye Uwanja wa Taifa, Dar es Salaam.

Kwa mujibu wa ratiba, miamba hiyo ya soka inatarajiwa kurudiana Februani 2015 katika mechi ya mzunguko wa pili itakayochezwa kwenye uwanja huo.

Michuano ya ligi kuu ya Tanzania Bara imepangwa kuanza Septemba 20 mwaka huu, ikitanguliwa na mechi ya kuwania Ngao ya Jamii kati ya mabingwa watetezi, Azam na Yanga zitakazomenyana Septemba 12 mwaka huu.

Katika mechi za ufunguzi wa ligi hiyo, Azam itamenyana na Polisi Moro kwenye Uwanja wa Azam Complex, Mtibwa Sugar itaikaribisha Yanga kwenye Uwanja wa Jamhuri, Morogoro, Stand United itavaana na Ndanda FC mjini Shinyanga, Mgambo JKT na Kagera Sugar mjini Tanga, Ruvu Shooting na Prisons mjini Pwani, Mbeya City na JKT Ruvu mjini Mbeya, Simba na Coastal Union mjini Dar es Salaam.