WANA-HABARI KUPEWA MAFUNZO YA MBINU ZA UPANGAJI MATOKEO

Taasisi moja kutoka Uingereza inayohusika na kampeni dhidi ya upangaji matokeo kwenye mpira wa miguu (match fixing) itafanya uwasilishaji (presentation) juu ya suala hilo kwa waandishi wa habari za michezo nchini.

Uwasilishaji huo utafanyika kesho (Julai 5 mwaka huu) saa 11 jioni kwenye hoteli ya Accomondia iliyopo Barabara Nkrumah jijini Dar es Salaam.

Wataalamu hao wa kupiga vita upangaji matokeo ambao pia wataelezea jinsi matokeo yanavyopangwa, jana (Julai 3 mwaka huu) walifanya uwasilishaji wao kwa wachezaji na benchi la ufundi la timu ya Taifa ya vijana wenye umri chini ya miaka 17 (Serengeti Boys).

Taasisi hiyo yenye kibali kutoka Shirikisho la Kimataifa la Mpira wa Miguu (FIFA) katika utoaji elimu ya kubaini upangaji matokeo, vilevile inatoa elimu juu ya athari zinazopatikana kutokana na upangaji matokeo.

MAFUNZO YA TIKETI ZA ELEKTRONIKI MBEYA
Shirikisho la Mpira wa Miguu Tanzania (TFF) limeendesha mafunzo ya matumizi ya tiketi za elektroniki kwa wadau wa mpira wa miguu mkoani Mbeya.

Mafunzo hayo yamefanyika jana na leo (Julai 4 mwaka huu) kwenye Uwanja wa Sokoine, na kushirikisha wasimamizi wa mechi, viongozi wa Chama cha Mpira wa Miguu Mkoa wa Mbeya (MREFA) na makatibu na maofisa habari wa klabu za Tanzania Prisons na Mbeya City.

Wengine walioshiriki mafunzo hayo ni Meneja wa Uwanja wa Sokoine na msaidizi wake, wasimamizi wa milangoni (stewards) na waandishi wa habari wa mkoani Mbeya.

Mafunzo hayo yanahitimishwa kesho (Julai 5 mwaka huu) kwa mechi kati ya Tanzania Prisons na Mbeya City itakayochezwa Uwanja wa Sokoine kuanzia saa 10 kamili jioni. Kiingilio ni sh. 3,000, na tiketi zilianza kuuzwa Julai Mosi mwaka huu kupitia M-Pesa, CRDB Simbanking na maduka ya Fahari Huduma.

MAXIMO AMPA MASHARTI MAZITO MANJI

KOCHA Mkuu wa Yanga, Marcio Maximo akizungumza na Mwenyekiti wa klabu hiyo, Yussuf Manji leo makao makuu ya klabu hiyo mitaa ya Twiga na Jangwani, Dar es Salaam.

Katika mazungumzo hayo, Maximo amemweleza Manji kuwa lazima timu hiyo ifanye mazoezi kwenye Uwanja wa Kaunda, badala ya kutumia viwanja vingine kwa kuazima.

Kocha huyo pia alimweleza Manji kuwa lazima ahakikishe vyumba vyote vya wachezaji vilivyoko kwenye makao makuu ya klabu hiyo vinakuwa na kipoza hewa na viwekwe tiles ili kuvifanya viwe na hadhi badala ya vilivyo hivi sasa.

Wengine pichani ni Katibu Mkuu wa Yanga, Benno Njovu na Ofisa Habari, Baraka Kaziguto.

CHUJI AJIPELEKA AZAM

KIUNGO wa zamani wa klabu za Simba na Yanga, Athumani Iddi 'Chuji' jana alionekana akifanya mazoezi na wachezaji wa Azam kwenye uwanja wa Azam Complex ulioko Mbagala, Dar es Salaam.

Kuonekana kwa Chuji kwenye kikosi cha Azam kulitafsiriwa kuwa, huenda amejiunga na timu hiyo kwa ajili ya msimu ujao wa ligi.

Hata hivyo, Msemaji wa Azam, Jaffer Iddi amesema leo kuwa, Chuji ameomba kufanya mazoezi na timu hiyo kwa ajili ya kujiweka fiti.

Alisema jukumu la kusajili wachezaji ni la kocha mkuu wa timu hiyo, hivyo iwapo atamuona anafaa kusajiliwa, anaweza kufanya hivyo.

AVEVA AANZA KAZI RASMI SIMBA, ATEUA KAMATI ZA USHINDI

Rais mpya wa Simba SC, Evans Aveva (wa pili kulia) akiwa na Makamu wake, Geoffrey Nyange 'Kaburu' kushoto na Wajumbe wa Kamati ya Utendaji, Said Tuliy kulia, Salim Abdallah na Iddi Kajuna leo makao makuu ya klabu hiyo, Mtaa wa Msimbazi wakati wakikagua jengo hilo.

RAIS mpya wa Simba SC amemteua Zacharia Hans Poppe kuendelea kuwa Mwenyekiti wa Kamati ya Usajili ya klabu hiyo, huku Makamu wake akiwa ni Kassim Mohammed Dewji.

Akizungumza na waandishi wa habari mchana wa leo makao makuu ya klabu, Msimbazi, Dar es Salaam Aveva aliwataja Wajumbe wa Kamati hiyo kuwa ni Said Tuliy, Musley Al Ruwaih, Crescentius Magori na Dk Roadney Chiduo.

Aveva pia ameunda Kamati mbili zaidi, ya Soka ya Vijana itakayokuwa chini ya Mwenyekiti, Said Tuliy, Ally Suru, Patrick Rweyemamu, Mulamu Nghambi, Madaraka Suleiman na Amina Poyo.

Kamati ya Mashindano Mwenyekiti wake atakuwa Mohammed Nassor, Makamu Iddi Kajuna na Wajumbe Jerry Yambi, Hussein Simba na Mohammed Omar.

Aveva amesema pia baada ya kikao cha kwanza cha Kamati ya Utendaji jana, Mohammed Nassor, Musleh Al Ruwaih na Salim Abdallah wameteuliwa katika Kamati ya Utendaji.

Aveva amesema kikao cha jana pia kiliamua kuwasimamisha uanachama, wanachama 69 waliokwenda Mahakamani kupinga uchaguzi wa klabu hiyo mwishoni mwa mwezi uliopita.

Amesema hatima ya wanachama hao, pamoja na ya mwanachama mwingine maarufu, Michael Wambura aliyeenguliwa kwenye uchaguzi kwa kosa kama hilo, itaamuliwa katika Mkutano Mkuu Agosti 3, mwaka huu.

IMETOLEWA KUTOKA BLOGU YA BIN ZUBEIRY

STARS YAJIPIMA NA BOTSWANA

Timu ya Taifa (Taifa Stars) inacheza mechi ya kirafiki na Botswana leo (Julai Mosi
mwaka huu) kuanzia saa 9 alasiri kwa saa za huko.

Mechi itakayofanyika Uwanja wa Taifa jijini Gaborone ni sehemu ya maandalizi ya Taifa
Stars kwa ajili ya mechi ya michuano ya Afrika dhidi ya Msumbiji (Mambas)
itakayochezwa Julai 20 mwaka huu Uwanja wa Taifa, Dar es Salaam.

Stars inayodhaminiwa na Kilimanjaro Premium Lager inatarajiwa kurejea nchini Julai 6
mwaka huu kuendelea na programu nyingine kwa ajili ya mechi dhidi ya Msumbiji.

Wakati huo huo, kutakuwa na utaratibu maalumu kwa waandishi wa habari za michezo
kwa ajili ya kuripoti mechi ya Stars dhidi ya Msumbiji. Hivyo, vyombo vya habari
vinatakiwa kutuma majina mawili ya waandishi watakaoripoti mechi hiyo. Mwisho wa
kupokea majina hayo ni Julai 8 mwaka huu.

WACHEZAJI WATANO WAOMBEWA ITC
Wachezaji watano wameombewa Hati ya Uhamisho ya Kimataifa (ITC) ili waweze
kucheza mpira wa miguu nchini na nje ya Tanzania.

Abdulhalim Humoud kutoka Simba, Crispine Odulla (Coastal Union) na Haji Ugando
(Mbagala Market FC) wameombewa ITC na Shirikisho la Mpira wa Miguu la Kenya
(FKF) ili wakacheze nchini humo katika klabu za Sofapaka, Bandari FC na Nakuru All
Stars.

Vilevile TFF imemuombea ITC mchezaji Ismaila Diarra kutoka nchini Mali ili aweze
kujiunga na timu ya Azam FC. TFF inafanyia kazi maombi hayo, na mara taratibu zote
zitakapokamilika itatoa ITC hizo kwa wachezaji wanaokwenda nje ya Tanzania.

SERENGETI BOYS YAJINOA KUIKABILI AFRIKA KUSINI
Timu ya Taifa ya vijana wenye umri chini ya miaka 17 (Serengeti Boys) inaendelea vizuri
na mazoezi kujiandaa kwa mechi ya mashindano dhidi ya Afrika Kusini (Amajimbos).

Mechi hiyo ya kwanza ya raundi ya pili itachezwa Ijumaa ya Julai 18 mwaka huu Uwanja
wa Azam Complex uliopo Chamazi jijini Dar es Salaam kuanzia saa 10 kamili jioni.

Kocha Mkuu wa Serengeti Boys, Hababuu Ali Omari ameshafanya mchujo wa awali wa
wachezaji wa timu hiyo kutoka 39 na kubaki na 31. Timu hiyo imepiga kambi kwenye
hosteli ya TFF iliyopo Uwanja wa Karume.

MBEYA CITY, PRISONS KUJARIBU TIKETI ZA ELEKTRONIKI

Timu za Ligi Kuu ya Vodacom (VPL) za Mbeya City na Tanzania Prisons zinacheza
mechi ya kirafiki Jumamosi (Julai 5 mwaka huu) kwenye Uwanja wa Kumbukumbu ya
Sokoine jijini Mbeya.

Mechi hiyo ambayo itakuwa ya kwanza kuchezwa jijini Mbeya katika mfumo wa
matumizi ya tiketi za elektroniki kwa washabiki wanaoingia uwanjani itaanza saa 10 kamili
jioni.

Kiingilio ni sh. 3,000 kwa majukwaa yote ambapo tiketi zimeanza kuuzwa leo (Julai Mosi
mwaka huu).

Wakati huo huo, keshokutwa (Julai 3 mwaka huu) kutakuwa na mafunzo ya matumizi ya
tiketi za elektroniki yatakayofanyika Uwanja wa Kumbukumbu ya Sokoine jijini Mbeya
kuanzia saa 3 asubuhi.

Washiriki wa mafunzo hayo ni wasimamizi wa mechi katika uwanja huo, viongozi wa
Chama cha Mpira wa Miguu Mkoa wa Mbeya (MREFA), meneja wa Uwanja wa
Sokoine na msaidizi wake, makatibu wa Tanzania Prisons na Mbeya City, maofisa
habari wa Mbeya City na Tanzania Prisons, Ofisa Usalama wa MREFA na wasimamizi
wa milangoni (stewards).

40 YA AMINA NGALUMA JUMAMOSI

KISOMO cha 40 ya aliyekuwa mwimbaji mahiri nchini, marehemu Amina Ngaluma ‘Japanese’ kinatarajiwa kufanyika Jumamosi wiki hii Kitunda, Machimbo Dar es Salaam.

Akizungumza na gazeti hili, mume wa marehemu Rashid Sumuni, alisema kisomo hicho kitafanyika nyumbani kwa wazazi wake marehmu na kwamba pia watakuwa na shughuli maalum ya kufutarisha waumini baada ya kumalizika kisomo hicho.

“Tunaomba ndugu, jamaa na marafiki wote tulioshiriki kwa namna mbalimbali wakati wa msiba wa marehemu mke wangu, tushirikiane pia katika 40 siku hiyo,” alisema Sumuni na kueleza kuwa shughuli hiyo itaanza baada ya swala ya alasiri.

“Naomba wanamuziki wenzangu, mashabiki wake, pamoja na wadau wengine wa muziki na marafiki wote, tushirikiane katika tukio hili na tutakapomaliza kusoma, tutafuturu pamoja nyumbani kwa wazazi pale pale Machimbo,” alisema Sumuni.

Ngaluma aliyepata kung’ara na bendi mbalimbali nchini, alifariki dunia Mei 15 mwaka huu kwa shinikizo la damu akiwa Thailand alikokuwa akifanya shughuli za muziki katika bendi ya Jambo Survivor na kuzikwa Mei 24 jijini Dar es Salaam.

Wakati wa uhai wake alitamba na bendi mbalimbali zikiwemo African Revolution ‘Tamtam’, Double M Sound ‘Mshikemshike’ na TOT Plus zote za Dar es Salaam.

Pia alipigia makundi ya Arusha Sangoma, Sayari Band na Less Mwenge yote ya Arusha na Mangelepa na Sky Sound za Kenya. Pia amepata kufanya shughuli za muziki kwa miezi sita nchini Uganda.

Baadhi ya nyimbo alizotunga wakati wa uhai wake ni Manyanyaso Kazini na Mapendo alizotunga akiwa Tamtam, wakati Double M Sound alitunga nyimbo za Wajane na Ukewenza.Pia alitoa albamu yake binafsi iitwayo Jitulize.

Baadhi ya nyimbo alizopata kuimba na kumpatia umaarufu mkubwa ni Mgumba, Maisha Kitendawili, Ndugu Lawama, Zawadi ya Watanzania, Ugumu wa Maisha na Call Box zote zikitungwa na Muumin Mwinjuma ‘Kocha wa Dunia’.

MAZOEZI YA MAXIMO YANGA USIPIME

Picha zote na Emmanuel Ndege wa magazeti ya Uhuru, Mzalendo na Burudani.

MBEYA CITY YAFUNGA USAJILI 2014/2015

NA SOLOMON MWANSELE, MBEYA


TIMU ya Mbeya City F.C, imefunga rasmi zoezi la usajili kwa msimu ujao wa ligi Kuu ya Tanzania Bara, maarufu zaidi Ligi Kuu ya Vodacom (VPL).

Imeelezwa hatua hiyo imechukuliwa kutokana na klabu hiyo, kuwa na mipango ya kupunguza kikosi, ili kuwa na kikosi kidogo chenye ufanisi.

Katibu Mkuu wa Mbeya City, Emmanuel Kimbe, alisema hayo ni maazimio ya Kikao cha Bodi ya timu hiyo kilichoketi Juni 19, mwaka huu, na kukubaliana kufunga rasmi zoezi la usajili.

Kimbe alisema Bodi imeazimia kuwa na kikosi kidogo, chenye ufanisi na kwa kuzingatia klabu kwa msimu uliomalizika na msimu ujao kutokuuza wachezaji wake.

“Baadhi ya wachezaji watapandishwa toka katika kikosi cha pili, na wachezaji wawili wapya (hakuwataja majina), waliojiunga na timu kwa ajili ya msimu ujao 2014/2015 wanatosha” alisema Kimbe.

Aliongeza mchakato unaoendelea toka Juni 26, mwaka huu ni kutafuta wachezaji, kwa ajili ya kikosi cha pili (Juniour team) A na A2 na mchakato huo utamalizika Julai 2, mwaka huu.

Kwa mujibu wa Katibu Mkuu huyo wa Mbeya City lengo la klabu hiyo ni kupata wachezaji wenye umri kati ya miaka 17 hadi 21. Aliwataja wachezaji ambao muda wao wa kuendelea kuitumikia klabu hiyo umefika tamati ni Aziz Sibo, ambaye mkataba wake umekwisha muda wake Mei 31 mwaka huu.

Wengine ni Mohamed Suleiman, ambaye amepangiwa majukumu mengine, Baraka Haule, Francis Castro, Jeremiah Mangasini na Richard Brown. Kimbe aliongeza kuwa wacheza Yusuph Wilson na Geofrey Jackson wametolewa kwa mkopo na hakuweka bayana timu walizopelekwa.

Alisema watumishi ambao mikataba yao imekwisha muda wake, na kwa sababu mbalimbali zinazojulikana kwa pande zote na imeshindikana kuihuisha ni pamoja na aliyekuwa kocha msaidizi, Maka Mwalwisi.   Kimbe alisema Mwalwisi mkataba wake umeisha Juni 30, mwaka huu na wakati aliyekuwa Ofisa Habari wa timu hiyo Fredy Jackson mkataba wake ulikwisha toka Mei 31, mwaka huu.

AZAM YAOKOA MAISHA YA SOKA YA DOMAYO

AZAM FC imelazimika kwenda kumfanyia matibabu ya nyama za paja kiungo Frank Domayo iliyemsajili miezi miwili iliyopita kutoka Yanga SC ya Dar es Salaam.


Domayo amekuwa akicheza na majeruhi bila kujijua, lakini baada ya kusajiliwa Azam FC na kwenda kufanyiwa vipimo vya afya, ikagundulika msuli wake mmoja wa paja umechanika.

Azam FC ikampandisha ndege hadi Afrika Kusini kwenda kwa mtaalamu kufanyiwa upasuaji wa kina, zoezi ambalo limekamilika salama.

“Domayo alikuwa anajitaharisha kufupisha maisha yake ya uwanjani, wataalamu wamesema, kama angeendelea kucheza, msuli mwingine ukakatika, maana yake asingepona na huo ungekuwa mwisho wake wa kucheza soka,”alisema Katibu wa Azam FC, Nassor Idirsa ‘Father’.

Domayo sasa anatarajiwa kuwa nje ya Uwanja kwa miezi miwili, kabla ya kurejea kazini akiwa fiti kabisa.

Aidha, kiungo chipukizi wa Azam FC, Patrick Kimwaga naye amefanyiwa upasuaji wa goti lililokuwa linamsumbua.

“Wachezaji wote hawa wamefanyiwa upasuaji Afrika Kusini na watarejea nyumbani pamoja kuendelea na matibabu, hadi hapo watakapokuwa fiti na kurudi uwanjani,”alisema Father.

SIONDOKI AZAM NG'O-KIPRE TCHETCHE

MSHAMBULIAJI Kipre Herman Tchetche wiki hii amezima uzushi kwamba yuko kwenye mpango wa kuhamia Yanga SC, baada ya kuibukia kwenye mazoezi ya timu yake, Azam FC.

Nyota huyo kutoka Ivory Coast aliwasili mwishoni mwa wiki Dar es Salaam kutoka kwao Abidjan alipokwenda kwa mapumziko baada ya msimu na mwanzoni mwa wiki akaibuka mazoezini Uwanja wa Azam Complex, Chamazi.

Kipre alilakiwa na kocha Mcameroon Joseph Marius Omog na kuzungumza naye kwa dakika kadhaa kabla ya kujiunga na wenzake kwa mazoezi.

Baadaye, Kipre alikabidhiwa tuzo yake ya Mchezaji Bora wa msimu uliopita wa Ligi Kuu ya Vodacom Tanzania Bara na Meneja wa timu hiyo Jemadari Said Kazumari.

Kipre alikuwa amekwishakwenda kwao wakati wadhamini wa Ligi Kuu, Vodacom Tanzania wanakabidhi tuzo za washindi mwezi uliopita.

Akizungumza baada ya mazoezi, Kipre alisema kwamba hajawahi hata kufanya mazungumzo na Yanga SC na anashangazwa na habari hizo. “Mimi sijawahi kuzungumza na mtu yeyote wa Yanga, nashangaa sana,”alisema.

Baada ya Azam FC kusajili wachezaji wawili kwa mpigo wa Yanga SC, kiungo Frank Domayo na mshambuliaji Mrundi, Didier Kavumbangu, ikadaiwa klabu hiyo ya Jangwani inataka kulipa kisasi kwa mabingwa hao wa Ligi Kuu kwa kuwachukua Kipre Tchetche na kiungo Salum Abubakar ‘Sure Boy’.

Tayari Sure Boy alikwishakanusha uvumi huo na kusema yeye ana mkataba na Azam na kwa sasa akili yake imelalia kwenye klabu hiyo inayomilikiwa na bilionea Alhaj Sheikh Said Salim Awadh Bakhresa na familia yake.

NYOTA KUTOKA HUNGARY, SWEDEN WATUA AZAM

WACHEZAJI watatu akiwemo winga kutoka akademi ya Orlando Pirates ya Afrika Kusini, Gery Epeso wametua klabu bingwa ya Tanzania Bara, Azam FC kwa ajili ya majaribo.

Kocha Mcameroon Joseph Marius Omog amewapokea wachezaji hao mazoezini na amesema atahitaji kuwaangalia kabla ya kuamua.

“Wakati mwingine unaweza kupata mchezaji mzuri kati ya hawa ambao wanakuja majaribio, acha tuwaangalie kwa muda,”alisema.

Epeso alisema wiki hii kwamba alikuwa anachezea akademi ya Orlando, lakini kwa sasa ni mchezaji wa klabu ya Don Bosco ya Jamhuri ya Kidemokrasia ya Kongo (DRC) ambako ndiko nyumbani kwao.

Mbali na winga huyo wa kushoto, wachezaji wengine waliotua kujaribu bahati yao Azam FC ni mshambuliaji Hisham Abdallah aliyekuwa anacheza soka ya kulipwa Hungary na kiungo mkabaji, Athumani Ali Sheikh kutoka IFK Amal ya Daraja la Pili Sweden.

Hisham anayecheza zaidi kama mshambuliaji wa pili, asili yake ni Zanzibar wakati Sheikh ni mwenyeji wa Dar es Salaam.

Tayari Azam FC ina wachezaji watano wa kigeni ambao ni kiungo Kipre Michael Balou, washambuliaji Kipre Herman Tchetche wote kutoka Ivory Coast, Didier Kavubangu kutoka Burundi, Ismaila Diara kutoka Mali na Brian Umony kutoka Uganda.

Hata hivyo, kuna uwezekano Umony akatemwa na nafasi yake akapewa mchezaji mwingine- maana yake Epeso kama atamvutia kocha Omog anaweza kuziba nafasi ya Mganda huy

Wakati huo huo, mshambuliaji mpya wa Azam FC kutoka Mali, Ismaila Diara amesema kwamba atajihitaji muda kuzoea mazingira ya soka ya Tanzania kabla ya kuanza kuwika.

Akizungumza wiki hii Uwanja wa Azam Complex, Chamazi, Dar es Salaam mchezaji huyo mwenye mwili mkubwa amesema kwamba hajui lolote kuhusu soka ya Tanzania na yote atajifunza hapa.

“Sijui, sijui kabisa, mimi ni mchezaji na naweza kucheza popote. Nitahitaji muda kidogo nizoee, ila nina amini nitafanya vizuri,”amesema.

MBRAZIL WA YANGA WE ACHA TU

Andrey Coutinho akisaini mkataba wa kuitumikia Yanga kwa kipindi cha miaka miwili mbele ya Katibu Mkuu Beno Njovu leo makao makuu ya klabu


Kiungo mshamabuliaji Andrey Marcel Ferreira Coutinho raia wa Brazil leo amesaini mkataba wa miwili kuitumikia timu ya Young Africans kwa ajili ya michuano mbalimbali ikiwemo ya Ligi Kuu ya Vodacom pamoja na mashindano ya Kombe la Shirikisho barani Afrika.

Katibu mkuu wa Young Africans Bw Beno Njovu amesema usajliwa mchezaji Coutinho ni sehem ya muendelezo wa maandalizi ya msimu mpya wa Ligi Kuu na kama ilivyokawaida wao mambo yao ni kimyakimya.

Coutinho ambaye alizaliwa tarehe 12 Januari 1990 amekulia kwenye mji wa Berem ambapo alianza kucheza soka la kulipwa katika klabu ya Paysandu Sports Club kabla ya kwenda nchini Asia katika nchi ya Myanmar katika klabu ya Rukhapura United.

Mpaka anajiunga na klabu ya Young Africans Andrey Coutinho alikuwa akichezea timu ya Castanhal EC iliyopo kwenye Ligi Daraja la pili ambao aliweza kuichezea kwa michezo yote ya mzunguko wa pili mwaka 2014.

Katika hatua nyingine kikosi cha Young Africans kinatarajia kuendelea na mazoezi kesho chini ya kocha Marcio Maximo katika ufuke wa Coco Beach ikiwa ni siku yake ya kwanza na jioni katika Uwanja wa Bandari Tandika kuanza kazi baada ya leo kuwa na mkutano wa ndani na wachezaji wake pamoja na benchi la ufundi.

MAXIMO AAHIDI MAKUBWA YANGA

Kocha Mkuu mpya wa Yanga SC Marcio Maximo (kushoto) akiongea na waandishi wa habari makao makuu ya klabu ya Yanga, kulia ni msaidizi wake Leonado Neiva


Kocha mbrazil Marcio Maximo leo amesaini mkataba wa miaka miwili kwa ajili ya kuwatumikia Mabingwa mara 24 wa Ligi Kuu ya Vodacom timu ya Young Africans pamoja na msaidizi wake Leonadro Neiva ambao wamesema wamekuja kuisaidia Yanga iweze kufanya vizuri kwenye michuano mbalimbali.

Akiongea na waandishi wa habari makao makuu ya klabu ya Yanga, Maximo amesema anajiskia furaha sana kurudi kufanya kazi Tanzania, kwani watu wake ni wakarimu, wapenda mpira hivyo anaona kama yupo nyumbani japo awamu hii ni kwa majukumu ya ngazi ya klabu tofauti na awali alipokua ngazi ya Taifa.

Nimekuja kufanya kazi na Yanga, nawashukuru viongozi wake kwa kuamua kuniamini na kunipa nafasi hii, wamenifuatilia kwa awamu tatu mfululizo na hatimaye safari hii wamefanikiwa kunipata kwa kushirikiana na wakala wangu Ally Mlei sasa kazi ni moja tu kuijenga Yanga.

"Jumatatu naanza kazi moja kwa moja pamoja na msaidizi wangu Neiva kwa kushirikiana na kocha wa kikosi cha U-20, wachezaji waliopo na wachezaji wa kikosi cha U20 watakua wakifanya mazoezi pamoja alisema" Maximo".

Natambua tuna wachezaji wengi katika timu za Taifa mbalimbali ikiwemo ya Tanzania (Taifa Stars), Uganda (The Cranes) na Rwanda (Amavubi) ambao wapo wanayatumikia mataifa yao, na punde watakapomaliza majukumu hayo wataungana nasi kwa maandalizi.

Kuhusu Kaseja yale yalishapita, najua ni kipa mzuri mwenye uwezo na uzoefu wa kutosha na kipindi hiki najivunia kuwa na makipa watatu wenye uwezo mzuri, Yaliyopita Yameshapita yalikuwa ni timu ya Taifa na sasa tumekutana Yanga kazi yetu ni moja tu kuifanya klabu iwe kwenye hadhi ya Kimataifa zaidi.

Naye kocha msaidizi Leonado Neiva amesema tumekuja kufanya kazi, kwa kushirikiana na wachezaji waliopo kutoka sehem mbambali barani Afrika na Amerika tutapata mchanganyiko mzuri wa uchezaji.

Wakala wa Maximo Barani Afrika Bw Ally Mlehi kwa upande wake amewaomba wapenzi, wanachama na washabiki wa Yanga kuwa wavumilivu kwani soka ni tofauti ni chai ambayo ukikoroga sukari tu unasikia utamu, badala yake wanapaswa kuwapa muda makocha na baadae wataaona matunda yake

AVEVA MWENYEKITI MPYA SIMBA, KABURU MAKAMU MWENYEKITI

Na Samira Said, DAR E SALAAM

RAIS mpya wa Klabu ya Simba ya jijini Dar es Salaam, Evans Aveva, amesema kwamba anawaahidi wanachama wa klabu hiyo waliomchagua hatawaangusha baada ya kumpa ridhaa ya kuwaongoza katika kipindi kingine cha miaka minne atakayokaa madarakani kwa mujibu wa katiba.

Aveva alifanikiwa kuibuka mshindi katika uchaguzi huo ambao awali ulizingirwa na 'mizengwe' mbalimbali hadi kufikia kusimamishwa na Shirikisho la Soka Tanzania (TFF) wakati wa mchakato wake kwa kupata kura 1,455 dhidi ya mpinzani wake aliyekuwa anaungwa 'mkono' na wafuasi wa Michael Wambura, aliyeenguliwa, Andrew Tupa, aliyepata kura 388

Akizungumza muda mfupi baada ya kutangazwa kuwa mshindi wa nafasi hiyo katika uchaguzi uliofanyika jana Jumapili kwenye Ukumbi wa Bwalo la Maafisa wa Polisi Oysterbay jijini, Aveva, alisema kuwa anafahamu kazi yake anayotakiwa kuifanya akiwa madarakani ambayo wanachama wa Simba imewaumiza kwa kipindi cha miaka minne iliyomalizika.

Aveva alisema kwamba atahakikisha anavunja makundi yaliyopo katika klabu hiyo ili kuleta umoja, ushirikiano na mshikamano ndani ya klabu hiyo na anafahamu wazi makundi hayo yalikuwepo kama sehemu ya kutekeleza demokrasia ya kila mwanachama.

Alisema kuwa makundi hayo yatakapomalizika ndipo mafanikio na maendeleo ya pamoja yatatimia na hilo ndiyo jambo ambao Wana-Simba wanatakiwa kulitekeleza kwa pamoja ili kufikia malengo waliyojiwekea.

"Nina kazi kubwa mbele yenu, naamini sitowaangusha, nitafanya kazi kwa umakini mkubwa ili kufikia malengo tuliyojiwekea, nawashukuru wote walioniunga mkono na hata wale ambao hawakunipigia kura kwa sababu kila mmoja ametumia haki yake ya kidemokrasia, nawapongeza pia wagombea wengine walioshinda na wale waliokosa kura zao hazikupotea ila ni maamuzi ya wanachama yanatakiwa kuheshimiwa," alisema Aveva.

Aliongeza kuwa uchaguzi umemalizika na kinachotakiwa kufuata ni wanachama kujipanga kwa ajili ya kuimarisha umoja na utulivu ili mpira uchezwe ndani ya timu yao

AHADI ALIZOTOA
Wakati aliposimama kuomba kura kwenye ukumbi huo wa uchaguzi, Aveva, alisema kuwa mara atakapofanikiwa kuingia madarakani atahakikisha anaongeza idadi ya wanachama wa klabu hiyo kutoka 7,000 na kufikia 50,000.

Aveva alisema kuwa anaamini kwa kuongeza wanachama, klabu yao itaweza kupata rasilimali watu na kujiweka katika nafasi nzuri ya kujiongezea mapato na kuwataka wanachama wawe wanalipa ada zao kila mwaka na si kusubiri wakati wa uchaguzi.

Alisema anauzoefu ndani ya Simba na akiwa mwenyekiti wa kamati mbalimbali alizoziongoza aliipatia klabu mafanikio hivyo watarajie mazuri zaidi baada ya yeye kupata ridhaa ya wanachama ya kuwa rais mpya na wa kwanza wa Wekundu wa Msimbazi.

WENGINE WALIOSHINDA
Akitangaza matokeo ya uchaguzi huo saa 9:58 usiku wa kuamkia leo Jumatatu, Mjumbe wa Kamati ya Uchaguzi na aliyesimamia zoezi hilo, Amin Bakhresa, alisema kuwa mshindi wa nafasi ya Makamu wa Rais ni Geofrey Nyange 'Kaburu' ndiye aliibuka kidedea kwa kupata kura 1,046 na kuwashinda Jamhuri Kihwelu 'Julio' (412), Swedy Mkwabi (373) na Bundala Kabula aliyeambulia kura 25.

Bakhersa pia aliwatangaza wagombea watano waliochaguliwa kuunda Kamati ya Utendaji kuwa ni pamoja na zilichukuliwa na Iddi Kajuna aliyepata kura 893, Said Tully (788), Collins Frisch (758), Ally Suru ( 627) na kwa upande wa mwanamke aliyeibuka kinara ni Jasmine Badour.

Mjumbe huyo wa kwanza mwanamke kuingia katika uongozi alipata kura 933 na kuwagalagaza wapinzani wake Asha Muhaji aliyepata kura 623 na Amina Poyo (330).

MAHAKAMA KUU YATUPILIA MBALI OMBI LA KUZUIA UCHAGUZI MKUU SIMBA, UNAFANYIKA KESHO

KLABU ya Simba itafanya uchaguzi wake mkuu kesho baada ya Mahakama Kuu kutupilia mbali maombi ya wanachama watatu wa klabu hiyo kutaka uchaguzi huo usimamishwe.

Wanachama hao wa Simba, Josephat Waryoba, Saidi Ally Monero na Hassan Hassan kwa niaba ya wenzao 60, waliwasilisha maombi hayo Mahakama Kuu Kanda ya Dar es Salaam, wakiomba amri ya zuio la muda la uchaguzi huo.

Walikuwa wakiiomba mahakama hiyo iwape kibali cha kufungua kesi ya uwakilishi na pia itoe amri ya zuio la uchaguzi huo.

Hata hivyo, Mahakama Kuu katika uamuzi wake uliotolewa jana na Jaji Agustine Mwarija baada ya kusikiliza hoja za pande zote, yaani watoa maombi na wajibu maombi, ilikubaliana kufungua kesi ya uwakilishi, lakini ikatupilia mbali maombi ya zuio la uchaguzi.

Jaji Mwarija alifikia uamuzi wa kutupilia mbali maombi ya wanachama hao baada ya kubaini kuwa yamewasilishwa mahakamani isivyo sahihi kisheria, kutokana na kutokuwepo kesi ya msingi mahakamani.

Alisema kwa mujibu wa kanuni ya 1 (8) ya mahakama hiyo ya uendeshaji wa mashauri ya jinai, kesi inayowahusisha watu wengi wenye masilahi yanayofanana, inaweza kufunguliwa na mmoja wao au baadhi yao kwa niaba ya wengine baada ya kupata kibaku cha mahakama.

Kuhusu maombi ya zuio la muda, Jaji Mwarija alisiea mahakama inaweza kutoa zuio pale tu panapokuwepo na kesi ya msingi iliyofunguliwa mahakamani, lakini kesi hiyo haipo.

SMALL BOYS, MSHIKAMANO, PACHOTO ZAPIGWA FAINI

Shirikisho la Mpira wa Miguu Tanzania (TFF) zimezipiga faini ya kati ya sh. 300,000 na sh. 500,000 klabu za Mshikamano FC, Pachoto Shooting Stars, Town Small Boys na Kiluvya United kutokana na makosa mbalimbali ikiwemo viongozi, wachezaji na washabiki kufanya vurugu kwenye mechi za Ligi ya Mabingwa wa Mikoa (RCL) iliyomalizika hivi karibuni.

Uamuzi huo umefanywa na Kamati ya Mashindano ya TFF iliyokutana juzi (Juni 23 mwaka huu) jijini Dar es Salaam kupitia masuala mbalimbali ikiwemo taarifa za mechi, na malalamiko kutoka kwa baadhi ya timu zilizoshiriki RCL iliyochezwa katika vituo vya Mbeya, Morogoro na Shinyanga.

Town Small Boys ya Ruvuma imepigwa faini ya sh. 500,000 kwa mujibu wa kanuni ya 37(13) ya Kanuni ya RCL kutokana na udanganyifu kwa kumtumia mchezaji Agaton Mapunda ambaye hakustahili ingawa usajili wake ulithibitishwa na TFF, kwa kutokuwepo pingamizi kutoka klabu yoyote katika kipindi cha pingamizi.

Licha ya usajili wake kuthibitishwa na TFF, Kamati ilibaini mchezaji huyo hakutoka ndani ya Mkoa wa Ruvuma kama kanuni za RCL zinavyoelekeza. Hata hivyo, matokeo ya mechi hiyo dhidi ya Njombe Mji iliyomalizika kwa bao 1-1 yanabaki kama yalivyo kwa mujibu wa kanuni ya Kanuni ya 52 (3 na 4) na 31(11) ya RCL kwa kuwa mchezaji Mapunda alithibitishwa na TFF (qualified player).

Vilevile mchezaji huyo amepigwa faini ya sh. 200,000 kwa mujibu wa kanuni za 48(4) na 31(11) za RCL. Nayo malalamiko ya Njombe Mji dhidi ya mchezaji David Noel Makakala kuwa ndiye aliyecheza mechi hiyo badala ya Carlos Mapunda yametupwa kwa kukosa vielelezo na ushahidi wa kuthibitisha hilo.

Kiluvya United FC ya Pwani imepigwa faini ya sh. 300,000 kwa mujibu wa kanuni ya 37(1) kutokana na vurugu za washabiki wake kwenye mechi namba 46 dhidi ya Abajalo iliyochezwa mjini Morogoro.

Pachoto Shooting Stars ya Mtwara na Mshikamano FC ya Dar es Salaam zimepigwa faini ya sh. 500,000 kila moja kwa kufanya vurugu kubwa kwenye mechi yao namba 100 iliyovunjika mjini Morogoro. Pia Mshikamano FC wamepewa pointi tatu na mabao matatu kwa mujibu wa kanuni ya 23(1na5) na 22(d).

Wachezaji na viongozi wa Pachoto Shooting na wachezaji wa Mshikamano FC waliofanya vurugu na kupigana, suala lao linapelekwa kwenye Kamati ya Nidhamu ya TFF kwa uamuzi na hatua za kinidhamu.

Nayo Tanzanite ya Manyara imefungiwa kucheza mashindano yote rasmi kwa msimu mmoja, na kuteremishwa daraja hadi ligi ya wilaya mara itakapomaliza kifungo chake kwa mujibu wa kanuni ya 21(3)(a), 37(14) na 22(a). Tanzanite iliadhibiwa kwa mujibu wa kanuni ya 23(1,5 na 6) baada ya kumpiga mwamuzi kwenye mechi dhidi ya AFC na baadaye kugomea mchezo. Ilishindwa kulipa faini na kujitoa mashindanoni kwa kuondoka kituoni.

Wachezaji wanaotuhumiwa kumpiga mwamuzi mpaka kumjeruhi suala lao litapelekwa kwenye Kamati ya Nidhamu ya TFF.

Kamati imetupa malalamiko ya African Sports ya Tanga dhidi ya Abajalo ya Dar es Salaam, Ujenzi FC ya Rukwa dhidi ya AFC, Panone FC ya Kilimanjaro dhidi ya Volcano FC ya Morogoro, na Mvuvumwa FC ya Kigoma dhidi ya Mbao FC ya Mwanza kwa kukosa vielelezo na ushahidi.

Pia malalamiko ya Mvuvumwa FC dhidi ya Geita Veterans ya Geita juu ya kuwachezesha Ibrahim Alphonce, Zamoyoni Magoma na John Mtobesya kwa kuwa hawakusajiliwa yametupwa kwa vile wachezaji hao ni halali, isipokuwa orodha ya wachezaji wa Geita Veterans FC iliyotolewa kwa ajili ya pingamizi ilikuwa na upungufu kiuchapaji ambapo wachezaji sita hawakuorodheshwa.

Nao makamishna Edward Hiza na Jimmy Lengwe waliokuwa kituo cha Morogoro wamepewa onyo kutokana na ripoti zao kuwa na upungufu.

Vilevile Kamati ya Mashindano imezitangaza rasmi timu za African Sports, Geita Veterans na Panone FC kupanda kucheza Ligi Daraja la Kwanza (FDL) msimu wa 2014/2015.

RAY C ASIMULIA KILICHOMSIBU, AWATOA CHOZI WANANCHI

NA SOLOMON MWANSELE.

REHEMA Chalamila maarufu zaidi kama Ray C, siyo jina geni kwa wapenzi wa muziki wa Kizazi kipya nchini, maarufu zaidi Bongo fleva.Ni mmoja wa wasanii walioufikisha muziki huu hapa ulipo leo.

Ray C ni alianza kupata umaarufu, na mafanikio lukuki akiwa na umri mdogo wa miaka 17, na kuweza kutingisha vilivyo, akianzia kazi ya utangazaji katika kituo cha radio ya East Afrika, mnamo mwaka 1999, na mwaka mmoja baadaye alijiunga na radio Clouds.

Mwaka huo huo wa 2000, alianza kujihusisha na muziki wa kizazi kipya na kuweza kuliteka vilivyo soko huku mashabiki wake wakimuongezea jina lingine la kwa kuanza kumuita ‘Kiuno bila mfupa’ kutokana na unenguaji wake mahiri jukwaani.

Ray C aliweza kuutangaza vyema muziki wa Bongo Fleva, katika nchi za Marekani, Dubai ,Sweden, China, Uganda, Kenya, Afrika ya Kusini, Uingereza, Oman, Australia, Norway, Msumbiji, India na Nigeria.

Kutokana na mafanikio yake hayo katika fani hizo, za utangazaji na muziki wa Bongo Fleva, Ray C aliweza aliweza kujenga nyumba nzuri na kubwa, akiwa na umri huo mdogo na baadaye kununua magari, na vile vile kufanikiwa kufungua maduka makubwa jijini Dar es Salaam.

Lakini ghafla ujana uliompaisha na kumpeleka juu, ukamgeuza kichwa chini miguu juu, hali iliyopelekea nuru na nyota yake iliyokuwa inawaka kufifia, ambapo Ray C akawa haonekani tena, kiasi cha kufikia hatua baadhi ya watu kumzushia kuwa amefariki dunia.

Hivi karibuni Ray C alitoa ushuhuda mzito, na uliovuta hisia za mamia ya watu waliohudhuria maadhimisho ya Siku ya Kupiga vita matumizi ya dawa za kulevya Duniani, ambayo kitaifa yalifanyika katika viwanja vya Ruanda Nzovwe jijini Mbeya.

Mgeni rasmi katika maadhimisho hayo alikuwa ni Makamu wa Rais wa Jamhuri ya Muungano wa Tanzania Dk.Mohammed Gharib Bilal.Waziri wa Nchi Ofisi ya Waziri Mkuu (Uratibu, Sera na Bunge), William Lukuvi, pia alihudhuria.

Ray C anasema mara baada ya kujiingiza, katika matumizi ya dawa za kulevya uwezo wake wa kufanya muziki ulitoweka, na akajikuta anaanza taratibu katabia ka kuuza vitu vyake kimoja baada ya kingine.

“Nilianza kwa kuuza vitu vidogo vidogo, baadaye nikauza gari zangu, nyumba na maduka yote nikayafilisi.Nikaanza kuwa mtu wa kujificha, huku nikiendelea kudhoofika, ilifika wakati nililazimika kutembea nikiwa nimevaa ‘kininja’.

Mungu wangu!Nilikuwa nimenasa kwenye mdomo wa Mamba, dawa za kulevya zilikuwa zinanimaliza, na nilipokuja kushtuka nilikuwa nimenasa.Maisha yangu yakawa si starehe tena bali ni mateso na aibu” anasema Ray C.

Anaongeza, alipokuwa katika uteja alikwenda mbali zaidi ya kuuza vitu vyake vya thamani, na roho inamuuma sana anapokumbuka siku, alipomshikia kisu mama yake mzazi ili kumlazimisha ampe fedha ili akanunue dawa za kulevya.

Akiongea huku akishikwa na uchungu mkubwa, na machozi kumtoka akiwa jukwaani akionekana kujutia matendo yake, Ray C anasema roho inamuuma sana anapokumbuka siku alimnyonga mkono mama yake na kumpokonya simu.

“Ninapokumbuka haya roho huwa inaniuma, kuliko hata kupoteza vitu vyangu vya thamani.Namshukuru mama alitambua kuwa sikuwa mimi, hivyo hakunikatia tamaa aliendelea kunihangaikia na kufanya maombi sana” anasema Ray C huku akijifuta machozi.

Anaongeza kwa kumuomba msamaha mama yake mzazi, kwa mateso aliyompa na kumshukuru mama yake huku akimuombea kwa Mungu, azidi kumbariki na kuwaomba wazazi wote nchini kuiga mfano huo kwa kuwasaidia vijana wao.

Ray C anasema anakumbuka alivyofukuzwa kama mbwa, kwa muuza dawa za kulevya kwa sababu alikuwa hana fedha, na anaumia sana anapokumbuka siku alizokuwa analala kwenye boksi, kwani hakuweza kurudi nyumbani akiwa ana ‘arosto’, yaani bila kuvuta unga.

Anasema kwa sababu ya kukosa dawa za kulevya, kutokana na kutokuwa na fedha alilazimika kulala kwenye boksi, akisubiria labda itatokea ‘kampani’yaani rafiki, ili imnunulie dawa apone anasema yalikuwa ni mateso ya ajabu, ambayo hayana mfano.

Msanii huyu wa muziki wa Bongo Fleva, anaongeza kuwa mateso na dharau alizozipata hazikuwa za peke yake, kwani familia yake pia ilikuwa katika dimbwi la mateso, familia yote iliumwa ambapo mama yake alilia sana na kuhangaika.

Anamnukuu mama yake mzazi:”Mwanangu nini hiki…umerogwa na nani mwanangu?Eeeh Mungu nisaidie”.Kilikuwa ndio kilio cha mama kila wakati.

Anaongeza mtu aliyekuwa anategemewa na familia, alikuwa anatoweka taratibu na sasa akawa mzigo mkubwa kwa familia.Alikuwa anaumia sana na kutaka kuacha matumizi ya dawa za kulevya, lakini alikuwa amenasa kwenye meno makali ya Mamba, na hakuwa na ujanja.

“Mama alihangaika sana na ndugu zangu pia walikosa raha.Mama alikuwa ni mtu wa kwenda kwenye maombi kila wakati.Alikuwa na fedha lakini naye uchumi wake uliporomoka, na kutoweka kwa sababu yangu” anasema Ray C huku akijifuta machozi.

Anasema hatimaye Mungu, alimuinua Rais Jakaya Kikwete, ambaye alijitolea kumsaidia kwa kumpa matibabu, na kwa sababu hata yeye mwenyewe, alikuwa na dhamira ya dhati ya kuacha dawa za kulevya, kwake ilikuwa ni jambo rahisi kuachana na dawa hizo.

Anaongeza kuwa anatumia fursa hiyo, kwa mara nyingine kumshukuru mwenyezi Mungu kwa kumpa fursa nyingine ya kuwa Ray C, lakini siyo yule wa zamani bali kuwa mwenye akili na mitazamo mipya kabisa ya maisha, na ambaye watanzania na Taifa litanufaika naye.

Anasema kwa namna ya kipekee, na kwa mara nyingine anamshukuru Rais Kikwete, kwa kumsaidia na kumuomba Mungu azidi kumbariki.Anamuahidi kwa kumsaidia yeye wengi watapona, na anajua hiyo ndio ilikuwa dhamira yake (Rais Kikwete), ili awe mfano ili wengi waokoke na janga hilo la matumizi ya dawa za kulevya.
“Naamini Mungu alikuwa na mpango na mimi, hivyo ni lazima nimtumikie kwa njia hii” anasema Ray C.

Anabainisha kilichomuingiza kwenye matumizi ya dawa za kulevya, ilikuwa ni marafiki wabaya na mahusiano mabaya ya kimapenzi, ambapo kupitia mtu aliyempenda na kumuamini sana, katika mazingira ambayo hayakuwa wazi, alijikuta amenasa kwenye matumizi ya dawa hizo.

Anaongeza, alipokuwa katika tatizo hilo alijifunza mambo matatu, ambayo anayataja kuwa ni sio watu wote wanaotumia dawa za kulevya, wameingia huko wakijielewa.

Pili, kuna unyanyapaa mkubwa wanaofanyiwa waathirika wa dawa za kulevya, kutoka kwa jamii na vyombo vya dola, na kwa asilimia kubwa unyanyapaa huo unatokana na uelewa mdogo, juu ya hali halisi ya tatizo.

Tatu, alijifunza kuwa watu kuendelea kutumia dawa hizo, na nyingi hatarishi wanazokuwa nazo hakutokani na wao kupenda, bali mateso makali ambayo mtu anayapata anapokosa dawa hizo, na kuwa anayajua mateso mazito waliyonayo, tofauti na jamii inavyofikiri.

Ray C anasema kutokana na Mungu kumsaidia, kwa kumtumia Rais Kikwete, na jinsi yeye mwenyewe anavyoguswa na tatizo hilo, shukrani yake ni kwa Rais kufanya juhudi za kuielimisha jamii juu ya athari za dawa za kulevya, na pia kuwasaidia waliokwisha kuingia watoke huko na ambao hawajaingia wasithubutu.

“Kwa kufanikisha hilo, nimeamua kuanzisha asasi inayoitwa Ray C Foundation, asasi hii ina lengo la kufanya uelimishaji mkubwa kwa jamii, kupitia makundi yake mbalimbali pamoja na kusaidia walioathirika, warudi kuwa watu wa kawaida” anasema Ray C.

Kupitia asasi yake hiyo, tayari wameanza kampeni ya shule kwa shule wakitembelea baadhi ya shule za sekondari jijini Dar es Salaam, ambapo wana lengo la kuzitembelea shule zote za sekondari katika mikoa yote ya Tanzania, hasa ile iliyoathirika zaidi na dawa za kulevya.

Anasema, vile vile wameanza kutembelea vijana watumiaji wa dawa za kulevya kwenye maskini zao, na kuwaelimisha waache na katika kipindi cha miezi miwili tu ya kampeni hiyo, vijana 25 wameamua kuacha na wanapata matibabu ya Methadone.

Ray C anaongeza kwa miezi kumi sasa, amekuwa akizungumza kupitia vyombo mbalimbali vya habari, juu ya uwezekano wa kuacha dawa za kulevya kwa watumiaji, na wasio watumiaji kujiweka mbali na dawa hizo.

Anabainisha hilo limechangia ongezeko la watu, wanaotaka kuacha na kupata matibabu na kuwa utekelezaji wa malengo hayo kupitia Ray C Foundation, umepokelewa kwa shauku kubwa na watanzania, lakini anakumbana na changamoto ya uwezeshaji.

Anamuomba Makamu wa Rais Dk.Bilal, serikali, watu binafsi, na taasisi mbalimbali kuiunga mkono Ray C Foundation, ili iweze kutekeleza mikakati na malengo iliyonayo, kwani Taifa linaangamia na hali ni mbaya sana.

“Kwa namna ya pekee, pia natumia nafasi hii kuiomba serikali, kufanya uwekezaji mkubwa katika huduma ya matibabu kwa waathirika wa dawa za kulevya, kwa kufungua huduma hiyo katika hospitali za wilaya na za Rufani nchini” anasema Ray C.

Anaongeza hilo ni kutokana na idadi kubwa ya watu wanaopata ufahamu, na kuamua kuacha matumizi ya dawa za kulevya, inakuwa kwa kasi kubwa kutokana na kampeni wanazoendelea kuzifanya

UCHAGUZI MKUU SIMBA RUKSA, TFF YAKUTANA NA KAMATI YA BUNGE

Shirikisho la Mpira wa Miguu Tanzania (TFF) baada ya kupokea na kuzingatia maombi ya Simba (barua imeambatanishwa), na kwa kuzingatia Ibara ya 26 ya Kanuni za Uchaguzi za TFF toleo la 2013 limeiruhusu klabu hiyo kuendelea na mchakato wa uchaguzi wao uliopangwa kufanyika Juni 29 mwaka huu.

TFF inawahimiza wanachama wa klabu ya Simba kuwa watulivu na wafanye uchaguzi wao kwa amani.

TFF YAELEZEA MIKAKATI YAKE BUNGENI
Uongozi wa Shirikisho la Mpira wa Miguu Tanzania (TFF) ukiongozwa na Jamal Malinzi jana (Juni 21 mwaka huu) mjini Dodoma umekutana na Kamati ya Bunge ya Kudumu ya Maendeleo ya Jamii chini ya Mwenyekiti wake Mheshimiwa Said Mtanda (Mbunge wa Mchunga).

Katika kikao hicho TFF ilielezea mikakati yake ya maendeleo ya mpira wa miguu pamoja na maandalizi ya timu ya Taifa kwa ajili ya mchezo wake dhidi ya Msumbiji.

TFF iliiahidi Kamati ya Bunge kuwa itaendelea kuwa inafanya shughuli zake kwa karibu na Serikali na kamati hiyo ya Bunge.

Katika kikao hicho, ujumbe wa benki ya CRDB ukiongozwa na Meneja wa Electronic Banking, Bw. Mangire Kibanda ulihudhuria ili kutoa ufafanuzi juu ya mradi wa kuuza tiketi za elektroniki, mradi ambao maandalizi yanaendelea vizuri.

TFF, PLAN INTERNATIONAL KUHAMASISHA HAKI ZA WATOTO

Wakati mamilioni ya Watanzania wakifuatilia Fainali za Kombe la Dunia nchini Brazil, Shirika la kutetea haki za watoto la Plan International limeingia ubia na Shirikisho la Mpira wa Miguu Tanzania (TFF) kwa ajili ya kutetea na kuhamasisha juu ya ulinzi wa haki za mtoto hapa nchini.

Kwa lengo hilo, mkataba wa ushirikiano umesainiwa leo katika ofisi za makao makuu ya TFF jijini Dar es Salaam baina ya Mkurugenzi wa Plan International Tanzania, Jorgen Haldorsen na Rais wa TFF, Jamal Malinzi. Ushirikiano huo unalenga kufanya kazi pamoja katika kushughulikia masuala ya ukatili wa kijinsia, ndoa na mimba za utotoni.

Kwa mujibu wa Haldorsen, mchezo wa mpira ndio unaoongoza nchini na kote duniani kwa kuwa na ushabiki mkubwa na kwamba joto kali juu ya Fainali za Kombe la Dunia linaloendelea Brazil ni ushahidi tosha.

“Tunatambua uwezo wa mchezo huu wa kuwajumuisha watu. Sasa tunataka tuwajumuishe watu sio tu kwa ajili ya furaha lakini pia kama njia ya kuleta mabadiliko juu ya usawa wa kijinsia kwa kutetea na kuhamasisha juu ya haki za mtoto wa kike,” aliongeza.

Mkurugenzi huyo alidokeza kuwa ushirikiano na TFF ni sehemu ya kampeni ya kimataifa inayoendeshwa na shirika hilo kote ulimwenguni inayoitwa ‘Because I Am A Girl’-BIAAG au kwa Kiswahili- KWA SABABU MIMI NI MSICHANA ambayo inalenga kuwatoa mamilioni ya wasichana kutoka katika umaskini kupitia uhamasishaji juu ya haki zao, elimu na stadi za maisha.

“Kwa kupitia ubia huu tutakuwa na uwezo wa kuwafikia mamilioni ya Watanzania na tutawapa wasichana ujumbe kuwa KWA SABABU MIMI NI MSICHANA, lazima nipate fursa sawa na wavulana. KWA SABABU MIMI NI MSICHANA, lazima niwe na uwezo wa kufunga magoli ya kufikia ndoto zangu katika maisha,” Haldorsen alieleza.

Kwa upande wake, Rais wa TFF, ambaye ni mjumbe katika Kamati ya Huduma kwa Jamii ya Shirikisho la Mpira wa Miguu Ulimwenguni- FIFA, alisema kuwa ubia huo ni sehemu ya utekelezaji wa sera za huduma kwa jamii ya TFF na kwamba wana furaha kushirikiana na Plan International kwa lengo hili muhimu.

“Ushirikiano huu ni muhimu sana kwetu kwani unakileta chombo kikubwa kabisa cha michezo hapa nchini pamoja na shirika la Plan International hususan kwa ajili ya haki za mtoto wa kike. Tunategemea kutumia mtandao wetu nchi nzima kuelimisha juu ya usawa wa kijinsia na uhamasishaji wa haki za mtoto wa kike,” alisema Rais Malinzi.

Kwa pamoja tutashughulikia masuala ya usawa wa kijinsia, hususan kupambana na ndoa za utotoni ambazo zinawazuia mamilioni ya watoto wa kike nchini wasiweze kumaliza shule, kufikia ndoto zao katika maisha, na vile vile kuwaacha waendelee kuteseka katika umaskini,” Rais Malinzi aliongeza.

KUHUSU PLAN INTERNATIONAL: Plan International ni shirika la kimaendeleo la misaada ya kibinadamu, linalomlenga mtoto lisilofungamana na mrengo wowote wa kidini, kisiasa au kiserikali.

Plan International ilianzishwa zaidi ya miaka 70 iliyopita na inaendesha shughuli zake katika nchi 70 duniani. Plan International imekuwa inafanyakazi hapa Tanzania tangu mwaka 1991 ikiwasaidia watoto na jamii kupata huduma za afya, elimu, maji, usafi na mazingira, kujikimu na ulinzi. Inaendesha miradi Dar es Salaam, Morogoro, Dodoma, Geita, Pwani, Mwanza na Rukwa.

KAMPENI YA KWA SABABU MIMI NI MSICHANA –BIAAG: Kampeni ya Kwa Sababu Mimi ni Msichana-BIAAG (2012-2016) ni kampeni ya Plan ulimwenguni kote inayolenga kuelimisha na kutetea haki za mtoto wa kike na kuwatoa mamilioni ya wasichana kutoka kwenye lindi la umaskini kupitia elimu na utoaji wa stadi za maisha na kazi.

Kampeni hii inalenga kupambana na ubaguzi wa kijinsia na kuboresha maisha ya wasichana milioni 4 duniani na zaidi ya laki 3 hapa Tanzania kwa kuwawezesha kujiunga shuleni, kupata stadi za kiufundi na maisha, kujikimu, na kushiriki katika shughuli mbalimbali katika jamii na kulindwa, kwa kukabiliana na vikwazo dhidi ya maendeleo ya mtoto wa kike.