JULIO, MALIMA WAKATWA UCHAGUZI MKUU WA TFF, VYETI VYA WALIOPITISHWA VYAPELEKWA KUKAGULIWA

Kamati mpya ya Uchaguzi ya Shirikisho la Mpira wa Miguu Tanzania (TFF), tayari imekutana kwa mara ya kwanza baada ya kuteuliwa mapema wiki iliyopita na Kamati ya Utendaji ya TFF.

Mara baada ya kikao hicho cha jana Jumamosi, Kamati imeweka hadharani majina ya wagombea wa nafasi mbalimbali za uchaguzi, kinyang'anyiro kinachotarajia kufanyika Agosti 12, mwaka huu mkoani Dodoma.

Katika kinyang'anyiro hicho, wagombea watatu wa nafasi ya urais hawakupitishwa akiwemo Jamal Malinzi ambaye alikatwa kutokana na kutohudhuria usaili kinyume cha kanuni ya 11 (7) ya kanuni za uchaguzi za TFF.

Mgombea mwingine ambaye hajapitishwa kuwania nafasi hiyo ni Fredrick Masolwa ambaye hajapitishwa kwa kukosa uzoefu kwa mujibu wa kanuni ya 9 (3) ya kanuni za uchaguzi za TFF.

John Kijumbe aliondolewa katika kinyang'anyiro hicho kwa kukosa uzoefu huku Athumani Nyamlani alijitoa kuwania uongozi wa Shirikisho hilo.

Waliopitishwa kuwania urais na Mwenyekiti wa Kamati ya uchaguzi, Wakili Revocatus Kuuli ni Imani Madega, Fredrick Mwakalebela, Wallace Karia, Ally Mayay, Shija Richard na Emmanuel Kimbe.

Nafasi ya Makamu wa Rais aliyejitoa ni Geofrey Nyange Kaburu ambaye anakabiliwa na tuhuma ya makosa matano yakiwemo ya utakatishaji fedha kwa klabu ya Simba huku waliopitishwa ni Mulamu Ng'ambi, Michael Wambura, Mtemi Ramadhani, Robert Selasela na Stephen Mwakibolwa.

Kwa mujibu wa Kuuli, zoezi linalofuata kwa sasa ni kuhakiki kwa vyeti vya kidato cha nne kwa kila mgombea baada ya kupitisha majina.

Kanda namba 1 ya Mikoa ya Kagera na Geita: waliopitishwa ni Saloum Chama, Leopold Mukebezi na Kaliro Samson huku Abdallah Mussa aliondolewa katika hatua za awali kwa kutoambatanisha cheti cha elimu ya sekondari.

Kanda namba 2 inayounganisha mikoa ya Mara na Mwanza: Vedastus Lufano, Ephraim Majinge, Samwel Daniel na Aaron Nyanda (Wamepitishwa) huku Kanda namba 3 (Mikoa ya Shinyanga na Simiyu) Stanslaus Nyongo, Mbasha Matutu na Bannista Rugora (wamepitishwa).

Kanda namba 4 (Mikoa ya Arusha na Manyara) waliopitishwa ni Omar Walii, Sarah Chao na Peter Temu (wamepitishwa), Kanda namba tano inayounganisha mikoa ya Kigoma na Tabora waliopitishwa ni John Kadutu, Issa Bukuku, Abubakar Zebo na Francis Michael.

Kanda namba 6 yenye mikoa ya Katavi na Rukwa Keneth Pesambili na Baraka Mazengo – wote wamepitishwa huku Kanda namba 7 Mbeya na Iringa waliopitishwa ni Cyprian Kuyava, Elias Mwanjala na Erick Ambakisye ilhali Abdusuphyan Sillah hajapitishwa kwa kukosa uzoefu.

Kanda namba 8 mikoa ya Njombe na Ruvuma waliopitishwa ni Golden Sanga, James Mhagama, Vicent Majili na Yono Kevela huku Kanda namba 9 Lindi na Mtwara Athumani Kambi na Dunstan Mkundi (wamepitishwa).

Kanda namba 10 Dodoma na Singida waliopitishwa ni Hussein Mwamba, Steward Masima, Mohamed Aden, Ally Suru na George Komba (wamepitishwa) huku Mussa Sima hajapitishwa kwa kukosa uzoefu.

Kanda namba 11 Pwani na Morogoro waliopitishwa ni Charles Mwakambaya, Gabriel Mkwawee na Francis Ndulane huku Hassan Othuman hajapitishwa kwa kukosa uadilifu huku Kanda namba 12 Kilimanjaro na Tanga waliopitishwa ni Khalid Mohamed na Godluck Moshi wamepitishwa wakati Thabity Kandoro hajapitishwa kwa kukosa uzoefu.

Kanda namba 13 Dar es Salaam: waliopitishwa ni Abdul Sauko, Emmanuel Kazimoto, Ayoub Nyenzi, Shaffih Dauda, Peter Mhinzi, Lameck Nyambaya, Mussa Kissoky, Said Tulliy, Ally Kamtande, Aziz Khalfan, Ramadhani Nassib na Saad Kawemba.

Wakati Saleh Abdallah hajapitishwa kwa kukosa uzoefu, Jamhuri Kihwelu na Bakari Malima (hawajapitishwa kwa kushindwa kuwasilisha vyeti vya elimu ya sekondari).

MCHAKATO WA UCHAGUZI RUREFA NA LIPULI

Kamati ya Uchaguzi ya Shirikisho la Mpira wa Miguu Tanzania (TFF), iliyokutana Julai 8, mwaka huu pamoja na mambo mengine pia ilijadili mchakato wa chaguzi za Mkoa wa Rukwa (RUREFA) na timu ya Lipuli inayoshiriki Ligi Kuu ya Vodacom.

Kuhusu mchakato wa uchaguzi Mkoa wa Rukwa (RUREFA), Kamati ya Uchaguzi inayoongozwa na Mwenyekiti Msomi Wakili Revocatus Kuuli, imeagiza zoezi hilo liendelee na inamtuma Mjumbe wake siku ya usaili, Msomi Wakili Thadeus Karua kwa ajili ya kushuhudia.

“Na pia Kamati ya Uchaguzi itawatuma wajumbe siku ya uchaguzi tarehe 5 Agosti, 2017,” imesema kamati hiyo ilipoagiza kuhusu kuendelea kwa uchaguzi huo.

Kuhusu uchaguzi wa Lipuli,  Mwenyekiti wa Kamati ya Uchaguzi, Msomi Wakili Kuuli, imemwagiza Katibu Mkuu wa klabu hiyo, kuendelea na maandalizi ya uchaguzi kama ilivyoelekezwa na kamati kwamba ufanyike Agosti 5, mwaka huu.

“Na Kamati inamtuma mjumbe wa Kamati ya Uchaguzi Msomi Wakili Mohamed Ally Mchungahela kwa ajili ya uangalizi siku ya uchaguzi,” imesema sehemu ya taarifa ya kamati kwa uongozi wa Lipuli.

Kamati imesisitiza, “Na wanachama waendelee kulipia ada za uanachama kwa kuwa watakaoruhusiwa kupiga kura ni wanachama hai tu.”

AMINA, SOMOYE, ZENA WAREJESHWA KUIONGOZA TWFA

Kaimu Rais wa Shirikisho la Mpira wa Miguu Tanzania (TFF), Wallace Karia amewapa kongole viongozi wa Chama cha Mpira wa Miguu kwa Wanawake (TWFA), waliochaguliwa kwenye Uchaguzi Mkuu uliofanyika jana kwenye Ukumbi wa Hoteli ya Chichi, Dar es Salaam.

Katika uchaguzi huo uliopata uwakilishi wa theluthi mbili ya mikoa yote ya Tanzania, Amina Karuma alitetea kiti chake kwa kupata kura 47 kati ya 52 za wapigakura wote huku nafasi ya Makamu Mwenyekiti ikichukuliwa na Rose Kissiwa ambaye aliyepata kura 42.

Mwanahabari Mkongwe wa Gazeti la Nipashe kutoka Jumba la Magazeti la The Guardian, Somoe Ng’itu alishinda nafasi ya Katibu Mkuu kwa kuvuna kura 49 ilihali Theresia Mung’ong’o alishinda nafasi ya Katibu Msaidizi.

Hilda Masanche alishinda nafasi ya Mweka Hazina wa TWFA kwa kupata kura 25 wakati Mwanahabari mwingine Zenna Chande alishinda nafasi ya Ujumbe wa Mkutano Mkuu wa TFF kwa kupata kura 44.

Wajumbe Triphonia Temba, Mwamvita Kiyogoma, Jasmine Soudy na Chichi Mwidege hawakushinda baada ya wagombea wote wanne kutopata zaidi ya nusu ya kura kulingana na idadi ya wapigakura kwa mujibu wa katiba ya TWFA.

Uchaguzi huo ulisimamiwa na Mwenyekiti Kamati ya Uchaguzi ya TWFA, Msomi Wakili George Mushumba, ambaye pia aliwapongeza washindi.

Awali akifungua mkutano huo wa uchaguzi, Kaimu Katibu Mkuu wa TFF, Salum Madadi aliwataka wajumbe hao kuwa makini katika kuchagua na kwamba si wakati wa kufanya mzaha katika soka la wanawake.

MBARAKA YUSSUFU ABAKI AFRIKA KUSINI, MWAKYEMBE AIMWAGIA SIFA TAIFA STARS

MSHAMBULIAJI Mbaraka Yussuf wa Taifa Stars, amebaki nchini Afrika Kusini kwa ajili ya kupatiwa matibabu.

Mbaraka, mchezaji wa zamani wa Kagera Sugar, ambaye inasemekana amejiunga na Azam kwa ajili ya msimu ujao, hakuweza kumaliza michuano hiyo kutokana na kuumia.

Kocha Mkuu wa Taifa Stars, Salum Mayanga, alisema juzi usiku baada ya timu hiyo kurejea kutoka Afrika Kusini kuwa, bado hawajaelewa kipi kinachomsumbua mchezaji huyo.

“Tuliyemuacha Afrika Kusini ni Mbaraka Yusuph na taarifa ya nini kinamsumbua na anarudi lini, madaktari watatuambia,” alisema Mayanga.

Wakati huo huo, Waziri wa Habari, Utamaduni, Sanaa na Michezo, Dk. Harrison Mwakyembe, ameipongeza Taifa Stars kwa kumaliza michuano ya Kombe la COSAFA ikiwa ya tatu.

“Nchi nzima ilitamani kuwepo hapa kuwapokea, tupo hapa tunawahakikishia vijana wa Taifa Stars kuwa, kazi waliyoifanya ni nzuri,” alisema Dk. Mwakyembe.

HATIMAYE ABDI BANDA APATA TIMU AFRIKA KUSINI

SAA chache ya kuwasili nchini, beki wa timu ya taifa ya Tanzania, Taifa Stars Abdi Banda, akitokea Afrika Kusini, alikokuwa akishiriki katika michuano ya Kombe la COSAFA, ameweka wazi kuwa sasa ni rasmi hatoendelea kuitumikia Simba SC msimu ujao.

Banda amejiunga na klabu ya Baroka ya Afrika Kusini kwa mkataba wa miaka mitatu na amerudi Tanzania kwa ajili ya kuaga kabla ya Julai 12, mwakahuu, kurejea Afrika Kusini kuungana na timu yake hiyo mpya inayoshiriki Ligi Kuu Afrika Kusini.

“Ni ishu ambayo imekuwa rasmi kwa sasa hivi, lakini ya muda mrefu kwa hiyo nimekuja tu nyumbani mara moja kupata baraka za nyumbani, kwani nimekuja kuaga kwa viongozi wangu wa zamani wa Simba ambao nimekuwa nao muda mrefu," alisema Banda.

TFF YAIPONGEZA TAIFA STARS KUSHIKA NAFASI YA TATU KOMBE LA COSAFA

Kaimu Rais wa Shirikisho la Mpira Mpira wa Miguu Tanzania (TFF), Wallace Karia, ameipongeza Taifa Stars kwa mafanikio ya kushika nafasi ya tatu katika michuano ya Kombe la Castle la Cosafa - inayoandaliwa na Baraza la Soka kwa nchi za Kusini mwa Afrika.

“Haya ni matunda ambayo tunayaota kila wakati kwa timu kupata ushindi. Tunawapongeza wachezaji, benchi nzima la ufundi likiongozwa na Kocha Salum Mayanga, pamoja na watendaji wote kwa mafanikio ya timu yetu ya Taifa Stars,” amesema Karia alipozungumza na TFF TV online.
 
Amesema kwamba timu hiyo imeonyesha uzalendo wa hali ya juu katika kutafuta mafanikio na ana imani kwamba Tanzania itashiriki michuano mingi ya kimataifa kwa kuwa ina wachezaji wengi makinda huku TFF ikiendelea kuwakuza wengine kwa ajili ya kutimiza ndoto za furaha ya Watanzania kwa sasa na hapo baadaye.
 
Taifa Stars jana usiku Julai 7, mwaka huu iliifunga Lesotho katika mchezo wa kutafuta mshindi wa tatu wa michuano ya Castle Cosafa kwa mapigo 4-2 ya penalti katika mchezo uliofanyika Uwanja wa Moruleng nchini Afrika Kusini.
 
Katika mchezo huo wa jana, mabao ya Taifa Stars jana yalifungwa na Himid Mao, Abdi Banda, Simon Msuva na Raphael Alpha. Taifa Stars walikosa mkwaju mmoja wa penalti uliopigwa na Shiza Kichuya kwa kugongesga mwamba wa juu, lakini Lesotho walikosa mapigo mawili - moja likiwa limegonga mwamba wa pembeni na jingine likipanguliwa na Kipa Said Mohammed.
 
Taifa Stars inatarajiwa kurejea usiku wa kuamkia kesho Jumapili Julai 9, mwaka huu saa 9.30 usiku kwa ndege ya Shirika la Ndege la Rwanda ambako itajipanga kwenda Mwanza siku ya Jumatatu saa 12.00 jioni kwa ndege ya Shirika la Ndege la Fast Jet.
 
Itakwenda Mwanza kujiandaa na mchezo dhidi ya Rwanda unaotarajiwa kufanyika Jumamosi Julai 15, mwaka huu katika mchezo wa kufuzu kwa fainali za Kombe la Mataifa ya Afrika kwa wachezaji wanaocheza ligi za ndani (CHAN).
 
Timu hiyo ambayo kwa mwaka huu imecheza mechi tisa za kimataifa na kushinda mitano; kutoka sare miwili na kufungwa mmoja wa nusu fainali za Cosafa, itakuwa na kikosi cha wachezaji 20.
 
Wachezaji wanne hawatakuwako kwenye kikosi ambao ni majeruhi Mbaraka Yussuf na Shaban Idd Chilunda kadhalika nyota wa kimataifa ambao hawahusiki na mechi za CHAN ambao ni Thomas Ulimwengu na Elius Maguri.
 
Tayari Kocha Mkuu wa Taifa Stars, Salum Mayanga amewaongeza nyota wawili katika kikosi hicho ambao ni John Bocco na Kelvin Sabato kutoka Majimaji ya Songea kujaza nafasi za Chilunda na Mbaraka.
 
Pia amemwita  kinda Athanas Mdamu ambaye ni mchezaji mwanafunzi kutoka Shule ya kukuza vipaji ya Alliance ya Mwanza ili kumpatia uzoefu kwenye timu ya taifa ya wakubwa. Mdamu ataungana na timu huko Mwanza yaliko makazi yake.

UCHAGUZI TWFA KUFANYIKA DAR ES SALAAM

Uchaguzi wa Chama cha Mpira wa Miguu kwa Wanawake (TWFA), sasa utafanyika Dar es Salaam badala ya Dodoma na Morogoro - mikoa iliyotangazwa awali.
 
Mwenyekiti Kamati ya Uchaguzi ya TWFA, Msomi Wakili George Mushumba, amesema kwamba taratibu zote zimekamilika na kwamba siku ya uchaguzi ni Jumamosi Julai 8, mwaka huu.


Wakili Mushumba ametoa wito kwa wajumbe wote kufika Dar es Salaam Ijumaa Julai 7, mwaka huu kwa ajili ya kufahamu tararibu za awali za uchaguzi.


Tayari Kamati ya Mushumba ilitangaza majina ya wagombea 11 waliopitishwa kuwania nafasi mbalimbali katika uchaguzi mkuu.


Majina ambayo yamepitishwa ni Amina Karuma, Rose Kisiwa, Somoe Ng’itu, Theresia Mung’ong’o, Hilda Masanche, Salma Wajeso, Zena Chande, Triphonia Temba, Mwamvita Kiyogoma, Jasmine Soudy na Chichi Mwidege.


Nafasi zinazogombewa ni Mwenyekiti, Makamu Mwenyekiti, Katibu Mkuu, Katibu Msaidizi, Mweka Hazina, Mjumbe wa Mkutano Mkuu wa TFF na Wajumbe wanne wa Kamati ya Utendaji.


FOMU ZA KUWANIA UONGOZI TAFCA


Mwenyekiti wa Kamati ya Uchaguzi ya Chama cha Makocha wa Mpira wa Miguu Tanzania (TAFCA), Ramadhani Mambosasa ametoa wito wa walimu wa soka kujitokeza kwa wingi kuchukua na kurejesha fomu za kuwania nafasi mbalimbali za uongozi - ngazi ya taifa.


Mambosasa ametoa wito huo ikiwa zimebaki siku mbili tu kwa mujibu wa kanuni kukamilisha hatua hiyo. Fomu hizo zinazopatikana ofisi ya Chama cha Mpira wa Miguu Mkoa wa Dar es Salaam, zilianza kutolewa juzi Julai 3, 2017 na mwisho ni Julai 7, mwaka huu.


“Wanaojitokeza wachache. Wengine wanadai hawafahamu zilizo ofisi za DRFA. Tunatoa wito wajitokeze kwa wingi kuwania nafasi mbalimbali,” amesema Mambosasa.


Nafasi zilizotangazwa kuwaniwa ni Mwenyekiti, Makamu Mwenyekiti, Katibu Mkuu, Katibu Msaidizi, Mweka Hazina ambao fomu zao zinapatikana kwa Sh 200,000 wakati nafasi za wajumbe wa Mkutano Mkuu TFF na Wajumbe wa Kamati ya Utendaji fomu zao zinapatikana kwa Sh 100,000.


UCHAGUZI CHAMA CHA WATAALAMU WA TIBA ZA MICHEZO


Mwenyekiti wa Kamati ya Uchaguzi ya Chama cha Wataalamu wa Tiba za Michezo (TASMA), kimetangaza Uchaguzi Mkuu wa chama hicho kwamba utafanyika Agosti 5, mwaka huu katika Ukumbi wa Manispaa ya Kinondoni, Dar es Salaam.


“Wanachama wote wanakaribishwa kushiriki kwa namna moja au nyingine katika zoezi hili muhimu sana,” amesema Mwenyekiti wa kamati hiyo, Leslie Liunda alipokuwa anatangaza ramani ya mchakato wa uchaguzi huo leo Alhamis Julai 06, 2017.


Amesema: Mwanachama ye yote anayependa kukiongoza chama hiki anaombwa kuchukua fomu katika ofisi za Olimpiki Maalumu, zilizoko jirani na Uwanja wa Uhuru, Dar es Salaam kwa ajili ya kugombea nafasi anayoona kuwa anaweza kuimudu.”


Nafasi zinazowaniwa ni Mwenyekiti, Makamu Mwenyekiti, Katibu Mkuu, Katibu Msaidizi, Mweka Hazina ambao fomu zao zinapatikana kwa Sh 200,000 wakati nafasi za wajumbe wa Mkutano Mkuu TFF na Wajumbe wa Kamati ya Utendaji fomu zao zinapatikana kwa Sh 100,000.

KAMATI YA UCHAGUZI TFF YAVUNJWA NA KUUNDWA UPYA

Kamati ya Utendaji (EXCOMM) ya Shirikisho la Mpira wa Miguu Tanzania, imekutana tena leo Jumanne Julai 4, 2017 katika kikao cha dharura ambako ilijadili mgawanyiko katika Kamati ya Uchaguzi ya TFF.


Kamati hiyo ya utendaji inakutana kwa dharura kwa mujibu wa Ibara ya 35 (1) ya Katiba ya TFF inayosomwa pamoja na Ibara ya 35 (6). Kikao cha Kamati hiyo kilianza saa 8.58 alasiri hadi saa 10.51 jioni.


Katika kikao chake kilichofanyika katika Ukumbi wa Ofisi za shirikisho, Karume jijini Dar es Salaam Kamati iliamua kufanya mabadiliko madogo katika Kamati zake za Kisheria na Kamati za uchaguzi kwa mujibu wa Katiba Ibara ya 44 (7) na Ibara ya 52 inayotoa mamlaka ya kufanya mabaduiliko hayo.


Katika Kamati ya Uchaguzi, EXCOMM imeteua Mawakili kuongoza kamati hiyo wakiongozwa na Msomi Wakili Revocatus Kuuli; Mheshimiwa Wakili Mohammed Mchengelwa; Msomi Wakili Malangwe Mchungahela; Msomi Wakili Kiomoni Kibamba na Msomi Wakili Thadeus Karua.


Katika Kamati ya Rufaa Uchaguzi, EXCOMM imeteua Msomi Wakili, Abdi Kagomba kuwa Mwenyekiti wakati Makamu Mwenyekiti ni Msomi Wakili Kenneth Mwenda na wajumbe ni Msomi Wakili  Rashid Sadalla, Mhe. Jabir Shekimweri na Mohammed Gombati.


Kadhalika katika kamati za kisheria za TFF, ikianzia Kamati ya Maadili, EXCOMM imeteua Msomi Wakili Hamidu Mbwezeleni kuwa Mwenyekiti wakati Makamu Mwenyekiti ni Msomi Wakili Steven Zangira na wajumbe ni Mhe. Glorius Luoga, Walter Lungu na Amin Bakhressa.


Kamati ya Rufaa na Maadili, EXCOMM imeteua Msomi Wakili Ebenezer Mshana kuwa Mwenyekiti wakati Makamu Mwenyekiti ni Naibu Kamisha katika Jeshi la Polisi (DCP), Mohammed Mpinga na Wajumbe ni Msomi Wakili Benjamin Karume; Dk. Lisobine Kisongo na Mrakibu Msaidizi wa Polisi - ASP Benedict Nyagabona.


Kamati ya Nidhamu ya TFF, EXCOMM imeteua Tarimba Abbas kuwa Mwenyekiti wakati Makamu Mwenyekiti ni Peter Hella huku Wajumbe wakiwa ni Boniface Lyamwike, Dk. Billy Haonga na Kassim Dau.


Kamati ya Rufaa ya Nidhamu, EXCOMM imeteua Msomi Wakili Rahim Shaban kuwa Mwenyekiti wakati Makamu Mwenyekiti ni Siza Chenja huku Wajumbe wakiwa ni Abbas Mtemvu; Amani Mulika, Amin Bakhressa na Stella Mwakingwe.

BURIANI DEDE, MAZISHI YAKE YAWEKA HISTORIA KWA KUHUDHURIWA NA MAMIA YA WATU

MWANAMUZIKI gwiji wa uimbaji na utunzi wa nyimbo nchini, Shaban Dede hatunaye. Amefariki dunia. Ametangulia kwenda kule ambako sote binadamu lazima  tufike, isipokuwa kila mmoja kwa siku na wakati wake.

Hatutamwona tena Dede. Hatutaisikia tena sauti yake tamu na murua, ikighani nyimbo mbalimbali za muziki wa dansi, iwe alizozitunga mwenyewe au zile zilizotungwa na wanamuziki wenzake.

Dede alifariki dunia juzi, saa mbili asubuhi, katika Hospitali ya Taifa ya Muhimbili, Dar es Salaam, ambako alilazwa wiki mbili zilizopita kutokana na kusumbuliwa na ugonjwa wa kisukari.

Mkongwe huyo alizikwa jana, kwenye makaburi ya Kisutu, Dar es Salaam, katika mazishi yaliyoweka rekodi ya kuhudhuriwa na mamia ya watu, wakiwemo wanamuziki wakongwe na wa kizazi cha sasa na wadau wa tasnia ya muziki.

Kabla ya mauti kumkumba, Dede alishazushiwa kifo wiki iliyopita, kupitia mitandao mbalimbali ya kijamii, kutokana na tabia mbaya za baadhi ya binadamu kupenda kuzungumzia mambo ambayo hawana uhakika nayo. Ni kama walikuwa wanamchulia.

Kifo cha Dede kimepokelewa kwa mshtuko na majonzi makubwa na mashabiki wa muziki nchini. Sio tu kwa sababu wataikosa sauti yake, bali pia watazikosa tungo zake, ambazo zilimpatia umaarufu mkubwa tangu alipokuwa bendi ya Msongo Ngoma, enzi hizo ikiitwa Juwata Jazz, DDC Mlimani Park, Bima Lee na baadaye kurejea Msondo Ngoma miaka minne iliyopita.

Ni kweli kwamba mauti huua mwili wa binadamu ukabaki vumbi tupu kaburini, lakini yale aliyoyafanya hapa duniani, yatabaki kuwa kumbukumbu kwa vizazi vilivyopo na vijavyo kwa miaka mingi.

Ni kwa sababu Dede alikuwa mmoja wa watunzi mahiri wa nyimbo, hasa alipokuwa bendi ya Mlimani Park, ambapo inasemekana alitunga nyimbo zaidi ya 100, akiwa anashika nafasi ya pili nyuma ya Hassan Rehani Bitchuka.

Pia, alikuwa chachu ya ushindani wa kimuziki uliokuwepo kati ya Msondo Ngoma na Mlimani Park, ambapo alikuwa karata muhimu ya ushindi katika kila bendi. Alikuwa anajua nini cha kufanya ili kuwafurahisha mashabiki na kuwapa ile burudani wanayoihitaji.

Kifo cha Dede sio pigo tu kwa familia yake, bali pia wanamuziki wenzake. Wengi wamemuelezea kuwa, bado alikuwa akihitajika kutokana na uwezo mkubwa aliokuwa nao wa kutunga na kuimba nyimbo zenye mvuto.

Vilevile ushauri wake uliwasaidia wanamuziki wengi aliowahi kufanya nao kazi katika bendi mbalimbali alizopitia, ikiwa ni pamoja na kuziletea mafanikio makubwa. Ni sawa na kusema mbuyu umeanguka. Hauwezi kuota tena.

“Ninamfahamu Dede kwa kipindi kirefu kwani alikuwa mtunzi mzuri na mtu mwenye mchango mkubwa katika tasnia ya muziki. Nimesikitishwa sana na kifo chake na pengo lake halitazibika kwa urahisi,” alisema Bichuka, alipozungumza na gazeti hili jana, kuhusu kifo cha nguli huyo.

Kiongozi wa sasa wa Mlimani Park, Abdalah Hemba, amekiri kuwa Dede ndiye aliyeibua kipaji chake, ambacho kwa sasa kimemfanya awe mwimbaji mahiri na kiongozi wa bendi hiyo kongwe nchini.

Hemba alisema Dede ndiye aliyemsaidia kuingia katika bendi hiyo na kujulikana kupitia sanaa ya muziki. Kwamba, alikuwa mtambuzi mzuri wa vipaji vya wanamuziki baada ya kuwa nao kwa muda mfupi.

Wanamuziki wengine walioelezea kusikitishwa sana na kifo cha dede ni wakongwe Abdul Salvador, John Kitime na Hussein Jumbe, ambao wameeleza wazi kuwa sio rahisi pengo lake kuzibika.

Meneja wa Msondo Ngoma, Saidi Kibiriti, alisema bado hawajajua mazishi ya Dede yatafanyika lini na wapi kwa sababu hadi jana jioni, walikuwa wakiendelea kuwasiliana na ndugu wa marehemu, nyumbani kwake, Mbagala, Dar es Salaam.

Dede alijulikana kwa uimbaji wenye kiwango cha juu kutokana na tungo murua, ambazo baadhi zilitokea kuwa gumzo ndani na nje ya nchi.
Miongoni mwa nyimbo za Dede, ambazo zinapendwa na wadau wa muziki wa dansi ni Fumanizi, Kelele za paka hazimzuii mwenye nyumba kulala, Mshenga, Baba mkwe, Amina, Talaka rejea na Kizabinazabina.

Nyimbo hizo na nyinginezo kadhaa, alizitunga wakati akiwa katika bendi ya DDC Mlimani Park kwa muda wa miaka 27, kabla hajarudi katika bendi yake ya zamani ya Msondo Ngoma, mwaka 2014.

Mbali na wimbo wake wa ‘Suluhu’, ambao ulikuwa wa kwanza kuutunga baada ya kurejea Msondo Ngoma, mwanamuziki huyo pia aliitungia bendi hiyo nyimbo kedekede, ikiwemo Fatuma, Umbeya umenichosha, Julekha, Jane, Kuruthumu na Amba,  ambazo zilimjengea umaarufu na kujikuta akipachikwa jina la ‘Kamchape’ na ‘Super Motisha’.

Dede alilazimika kurejea Msondo Ngoma kutokana na bendi hiyo kuyumba baada ya kuondokewa na waimbaji wake waliokuwa tegemeo kubwa, tena mfululizo, akianza Suleiman Mbwembwe, Othmani Momba, Ally Muhoja Kishiwa ‘TX Moshi’ na Joseph Maina.

Vifo vya waimbaji hao vilisababisha bendi hiyo kongwe kubakiwa na mwimbaji mmoja pekee nguli, marehemu Maalimu Gurumo, hivyo uongozi uliona kuna kila sababu ya kumrejesha Dede ili kuongeza nguvu. Alikuwa akisaidiana na Eddo Sanga, Juma Katundu na Hassan Moshi.

Bahati kubwa iliyonayo bendi ya Msondo Ngoma ni kwamba, bado inao wapigaji mahiri wa ala mbalimbali za muziki, wakiwemo Saidi Mabera, Abdul Ridhiwan, Zahoro Bangwe, Huruka Uvuruge, Hamisi Mapanga, Ibrahim Kandaya na James Mawila.

Uwezo wake wa kutunga na kuimba haukuishia kwa bendi hizo mahasimu kwani alipotua Bima Lee, mwaka 1983, aliwika kwa nyimbo kama Kipepeo, Bilionea wa mapenzi, Shangwe ya harusi, Zenaba, Kununanuna na Dunia duara.

Dede pia aliwahi kung'ara katika bendi ya Orchestra Safari Sound, ambako alivuma kwa nyimbo kama Nyumba ya mgumba haina matanga, Habari imeota mbawa, Titi na Mariam, kabla ya kurejea DDC Mlimani Park.

Pumzika kwa amani Dede. Mashabiki wa muziki walikupenda, lakini Mungu amekupenda zaidi. Kazi uliyoifanya hapa duniani imetosha na itabaki kuwa kumbukumbu kwa vizazi vilivyopo na vijavyo kwa miaka mingi.

Ni wazi kuwa umeacha mengi ya kujifunza kwa wanamuziki wa sasa. Nayo ni uvumilivu wa kudumu kwenye bendi kwa miaka mingi, kutunga nyimbo zinazogusa hisia na kuimba kwa sauti yenye mvuto.

MWANAMUZIKI MKONGWE SHAABAN DEDE AFARIKI DUNIA

MTUNZI na mwimbaji mahiri wa nyimbo za muziki wa dansi nchini, Shaaban Dede, amefariki dunia.

Dede amefariki dunia leo asubuhi katika Hospitali ya Taifa ya Muhimbili, Dar es Salaam, alikokuwa amelazwa wiki mbili zilizopita kutokana na ugonjwa wa kisukari.

Mwimbaji huyo nyota nchini, amefariki akiwa mwanamuziki wa bendi ya Msondo Ngoma, ambayo alijiunga nao miaka miwili iliyopita akitokea Mlimani Park Orchestra.

Meneja wa Msondo Ngoma, Saidi Kibiriti, amesema hadi sasa bado haijaeleweka mazishi ya mwanamuziki huyo yatafanyika lini.

"Ndio kwanza tumeanza kikao cha kujadili taratibu za msiba kwa hiyo bado hatujajua mazishi yatafanyika lini na wapi,"amesema Kibiriti.

Dede alianza kujipatia umaarufu wakati akiwa bendi ya Dodoma International kabla ya kuhamia Msondo Ngoma na baadaye DDC Mlimani Park

WAKILI MSEMWA AJITOA KESI YA MALINZI

WAKILI wa kujitegemea Jerome Msemwa amejitoa katika kesi Namba 213 ya 2017, inayowakabili Rais wa Shirikisho la Mpira wa Miguu Tanzania (TFF), Jamal Emil Malinzi, Katibu Mkuu wa TFF, Mwesigwa Joas Selestine na Mhasibu wa TFF, Nsiande Isawayo Mwanga.

Msemwa, ambaye alikuwa akiwatetea washtakiwa hao,  ameandikia barua kwa Hakimu Mkazi Mkuu wa Mahakama ya Kisutu, Wilbard Mashauri, akieleza amejitoa katika kesi hiyo kutokana na kutopata maelekezo sahihi kutoka kwa wateja wake.

YANGA YAMTAMBULISHA RASMI IBRAHIM AJIB

KLABU ya Yanga leo imemtambulisha rasmi mshambuliaji wake mpya, Ibrahim Ajib, aliyesajiliwa msimu huu kutoka klabu ya Simba.

Uongozi wa Yanga umemtambulisha nyota huyo wa zamani wa Simba katika hafla iliyofanyika kwenye makao makuu ya klabu hiyo, mitaa ya Twiga na Jangwani, Dar es Salaam.

Ajib alikabidhiwa jezi ya Yanga yenye nembo ya wadhamini wake, Kampuni ya Sport Pesa na Meneja wa timu hiyo, Hafidh Mohamed, mbele ya Katibu Mkuu wa klabu hiyo, Charles Boniface.

Akizungumza katika hafla hiyo, Boniface alisema wanayo furaha kukamilisha taratibu zote za kumsajili Ajib baada ya kuwa amekamilisha mkataba wake wa kuitumikia Simba.

Boniface alisema Ajib anatarajiwa kuungana na wachezaji wenzake kuanza kambi ya kujiandaa na mechi ya kuwania Ngao ya Hisani kati yao na Simba, itakayochezwa mapema mwezi ujao.

Mbali na Ajib, Yanga pia imefanikiwa kuwaongezea mikataba washambuliaji wake Donard Ngoma kutoka Zimbabwe na Hamisi Tambwe kutoka Burundi.

SINGIDA UNITED YATAMBULISHA BASI LAKE JIPYA

Klabu ya Singida United imetambulisha ramsi basi lake jipya itakalotumia kwa msimu ujao wa Ligi Kuu Bara.

Basi hilo lenye thamani ya Sh 350 milioni limezinduliwa rasmi na litaanza kutumika katika safari za timu hiyo iliyopanda daraja msimu huu.

Katika basi hiyo, Singida imeweka picha za Rais wa timu hiyo, Mwingulu Nchemba ambaye ni Waziri wa Mambo ya Ndani pamoja na picha ya mmiliki wa timu, Yusuf Mwandami.

Ofisa Habari wa timu hiyo, Festo Sanga alisema wataanza maandalizi yao hivi karibuni ili kujiandaa na msimu mpya wa Ligi Kuu huku wakitarajia kukamilisha usajili wa nyota wachache waliosalia.

MALINZI, MWESIGWA WARUDISHWA TENA RUMANDE

RAIS wa Shirikisho la Soka Tanzania (TFF), Jamal Malinzi, Katibu Mkuu wake, Selestine Mwesigwa na Mhasibu, Nsiande Isawafo Mwanga, wamerudishwa rumande hadi Julai 17, mwaka huu, upepelezi wa kesi yao utakapokamilika.

Malinzi na wenzake hao walipandishwa kizimbani leo katika Mahakama ya Hakimu Mkazi Kisutu, Dar es Salaam, wakitokea rumande, ambako walipelekwa Julai 29, mwaka huu,

Walipofikishwa mahakamani kwa mara ya kwanza, Malinzi na wenzake hao walisomewa mashitaka 28 ya kughushi na kutakatisha fedha kupitia akaunti ya TFF, iliyoko katika Benki ya Stanbic, Dar es Salaam.

Hakimu Mkazi Mwandamizi wa Mahakama ya Kisutu, Dar es Salaam, Wilbord Mashauri, aliwanyima dhamana baada ya kutokea mabishano ya kisheria ya mawakili wa utetezi dhidi ya mawakili wa upande wa serikali na akawapangia kufika tena mahakamani leo.

Hata hivyo, hali imeendeelea kuwa mbaya kwa Malinzi na wenzake, baada ya kunyimwa tena dhamana leo, ambapo wamerudishwa rumande.                       
Katika mashitaka hayo 28 waliyoshitakiwa, 25 yanamuhusu Malinzi, akidaiwa kughushi michakato mbalimbali ya kifedha, huku matatu yakiwahusu wote watatu.

KAMATI YA UTENDAJI TFF KUKUTANA KESHO KWA DHARULA

Kamati ya Utendaji ya Shirikisho la Mpira wa Miguu Tanzania, itakutana tena kwa dharura siku ya Jumanne Julai 04, 2017 kwenye ofisi za TFF, Dar es Salaam ambako pamoja na ajenda nyingine, itatathmini mwenendo wa kazi za Kamati ya Uchaguzi ya shirikisho.

Kaimu Katibu Mkuu wa TFF, Salum Madadi amesema kwamba kamati hiyo ya utendaji inakutana kwa dharura kwa mujibu wa Ibara ya 35 (1) ya Katiba ya TFF inayosomwa pamoja na Ibara ya 35 (6).

Kamati hiyo inakutana baada ya barua ya Mwenyekiti wa Kamati ya Uchaguzi, Wakili Revocatus Kuuli kudai kwamba kuna mitazamo tofauti inayosababisha kutokamilisha majukumu yao kwa asilimia 100 kutoka hatua moja hadi nyingine wakati huu wa mchakato wa uchaguzi.

Kutokana na tofauti hizo, Wakili Kuuli kwa kutumia nafasi ya kofia ya uenyekiti, amesitisha kwa muda mchakato wa uchaguzi hadi hapo hali ya mambo itakapowekwa sawa na Kamati ya Utendaji inayotarajiwa kukutana Jumanne wiki inayoanza kesho.

Hii ni mara ya pili kwa kamati kukutana ndani ya wiki moja kwani Jumamosi Julai 01, 2017 kamati hiyo ya utendaji ilikutana na kufanya uamuzi wa kumpitisha Wallace Karia kuwa Kaimu Rais wa shirikisho.

Kadhalika, Kamati hiyo ya Utendaji ya TFF, ilimpitisha Mkurugenzi wa Ufundi wa TFF, Salum Madadi kuwa Kaimu Katibu Mkuu wa TFF.

Viongozi hao watakaimu nafasi hizo tajwa hadi hapo mahakama itakavyoamua kuhusu kesi zinazowakabili kwa sasa Rais wa TFF, Jamal Malinzi na Katibu Mkuu, Mwesigwa Selestine.

TAIFA STARS YATINGA NUSU FAINALI MICHUANO YA KOMBE LA COSAFA

TIMU ya soka ya Taifa, Taifa Stars jana ilifuzu kucheza nusu fainali ya michuano ya Kombe la COSAFA Castle baada ya kuwachapa wenyeji Afrika Kusini bao 1-0.

Katika mechi hiyo iliyochezwa kwenye Uwanja wa Royal Bafokeng mjini Rusternburg, Taifa Stars ilijipatia bao hilo la pekee dakika ya 18 kupitia kwa mshambuliaji Elias Maguri.

Maguli alifunga bao hilo kwa shuti kali baada ya kupokea pasi ndefu kutoka kwa kiungo Muzamil Yassin.

Afrika Kusini itabidi ijilaumu kwa kushindwa kutoka uwanjani na ushindi kwani ilitawala sehemu kubwa ya pambano hilo, lakini mabeki wa Taifa Stars walikuwa imara kuondosha hatari hizo.

Kutokana na ushindi huo, Taifa Stars sasa itamenyana na Zambia katika mechi ya nusu fainali itakayopigwa keshokutwa.

IDDI KAJUNA, SALIM ABDALLA WAKABIDHIWA MIKOBA YA KUIONGOZA SIMBA KWA MUDA

MCHAKATO WA UCHAGUZI MKUU TFF WASIMAMISHWA

KAMATI ya Uchaguzi ya Shirikisho la Soka Tanzania (TFF), imetangaza kusimamisha mchakato wa uchaguzi wa shirikisho hilo hadi itakapotangazwa baadaye.

Uamuzi huo umetangazwa leo na Mwenyekiti wa kamati hiyo, Wakili Revocatus Kuuli, wakati akizungumza na waandishi wa habari kwenye ofisi za TFF, zilizoko Uwanja wa Karume, Dar es Salaam.

Kuuli amesema amefikia uamuzi huo baada ya kutokea hali ya kutokuelewana kati ya wajumbe wa kamati hiyo, kuhusu wagombea waliofikishwa mahakama kwa tuhuma za utakatishaji fedha.

Kwa mujibu wa Kuuli, baadhi ya wajumbe wa kamati hiyo walitaka wagombea hao kupitishwa moja kwa moja bila kufanyiwa usaili wakati wengine walipinga.

Kutokana na tofauti hizo, Wakili Kuuli alisema wameamua kwa kauli moja kusitisha mchakato huo ili kufikia mwafaka wa jambo hilo.

Kaimu Katibu Mkuu wa TFF, ambaye pia ni Mkurugenzi wa shirikisho hilo, Salum Madadi, amethibitisha kusimamishwa kwa uchaguzi huo.

Kwa upande wake, Ofisa Habari wa shirikisho hilo, Alfred Lucas, alisema uchaguzi huo utafanyika kama ilivyopangwa, isipokuwa mchakato wake umesimamishwa kwa muda ili kutafuta suluhu ya tofauti zilizojitokeza.

Rais wa TFF, Jamal Malinzi, Katibu wake, Celestine Mwesigwa na Mhasibu, Nsiande Isawafo Mwanga,  walifikishwa mahakamani wiki iliyopita kwa tuhuma za matumizi mabaya ya ofisi, ikiwemo tuhuma za utakatishaji wa fedha. Watuhumiwa hao wapo rumande hadi kesho.

11 WAPITISHWA KUWANIA UONGOZI TWFA

Kamati ya Uchaguzi ya Chama cha Mpira wa Miguu kwa Wanawake (TWFA), imetangaza majina ya wagombea 11 waliopitishwa kuwania nafasi mbalimbali katika uchaguzi mkuu wa chama hicho utakaofanyika Agosti 5, mwaka huu mkoani Morogoro.

Majina ambayo yamepitishwa ni Amina Karuma, Rose Kisiwa, Somoe Ng’itu, Theresia Mung’ong’o, Hilda Masanche, Salma Wajeso, Zena Chande, Triphonia Temba, Mwamvita Kiyogoma, Jasmin Soudy na Chichi Mwidege.

Nafasi zinazogombewa ni Mwenyekiti, Makamu Mwenyekiti, Katibu Mkuu, Katibu Msaidizi, Mweka Hazina, Mjumbe wa Mkutano Mkuu wa TFF na Wajumbe wanne wa Kamati ya Utendaji.

WALLACE KARIA KUVAA VIATU VYA MALINZI TFF

Kamati ya Utendaji ya Shirikisho la Mpira wa Miguu Tanzania, iliyokutana leo Jumamosi Julai 01, 2017 kwenye ofisi za TFF, Dar es Salaam imempitisha Wallace Karia kuwa Kaimu Rais wa shirikisho.

Kadhalika, Kamati hiyo ya Utendaji ya TFF, imempitisha Mkurugenzi wa Ufundi wa TFF, Salum Madadi kuwa Kaimu Katibu Mkuu wa TFF.

Viongozi hao watakaimu nafasi hizo tajwa hadi hapo mahakama itakavyoamua kuhusu kesi zinazowakabili kwa sasa Rais wa TFF, Jamal Malinzi na Katibu Mkuu, Mwesigwa Selestine.

Kamati ya Utendaji ya TFF, imekutana kwa dharura kwa mujibu wa Ibara ya 35 (1) inayosomwa pamoja na Ibara ya 35 (6) na kufanya uamuzi huo.