JK AMPONGEZA SAMATTA KWA KUTWAA TUZO YA AFRIKA

Mchezaji Mbwana Samatta aliyeshinda tuzo ya Mchezaji Bora wa Afrika kwa wachezaji wa ndani,  akimkabidhi jezi  yake anayoivaa akiwa katika timu yake ya TP Mazembe ya Jamhuri ya Kidemokrasia ya Congo, Rais Mstaafu na Mwenyekiti wa Chama cha Mapinduzi, Jakaya Kikwete. Kulia anayeshuhudia ni  Waziri wa Habari, Utamaduni, Sanaa na Michezo, Nape Nnauye  wakati walipokutana leo katika ofisi ndogo ya CCM Makao makuu Lumumba jijini Dar es salaam.

ALIYEKUWA Rais wa Awamu ya Nne  wa Jamhuri ya Muungano wa Tanzania, Dk. Jakaya Kikwete amempongeza  mshambuliaji wa kimataifa wa Tanzania,  Mbwana Samatta kwa kutwaa tuzo ya  mchezaji bora wa Afrika 2015  kwa wachezaji wa ligi za ndani  na kumtakia kila la kheri kwenye safari yake ya soka.

Rais mstaafu, Dk. Kikwete, ambaye pia ni Mwenyekiti wa Chama cha Mapinduzi (CCM), alitoa pongezi hizo jana,  kwenye Ofisi Ndogo za Makao Makuu ya Chama,  zilizoko mtaa wa Lumumba, Dar es Salaam.

Dk. Kikwete alisema Watanzania wamekuwa wakisubiri kwa muda mrefu ili kuziona timu zao na wachezaji wao bila ya mafanikio kufanya vizuri  na kung'ara vema kwenye michuano ya kimataifa.

Alisema kitendo cha Shirikisho la Soka Afrika (CAF), kumtangaza Samatta, ambaye anaichezea klabu ya kulipwa ya T.P Mazembe ya DR Congo,  kuwa mwanasoka bora wa Afrika, imekuwa chachu na dira kwake ya kusakwa na klabu nyingi za Ulaya.

"Kwanza nachukuaa fursa hii kumpongeza Samatta kwani kwa tuzo yake ya uchezaji bora wa Afrika 2015, aliyoipata, imetupa furaha na nina imani itatoa mwelekeo mzuri kwa wachezaji wengine wengi wa Tanzania, ambao wana kiu kubwa ya kupata mafanikio kwenye medani hiyo ya soka," alisema Dk. Kikwete.

Aidha, Kikwete amemtaka Samatta kutobweteka na mafanikio ambayo tayari ameanza kuyapata kwenye soka, kwani kufanya hivyo kutamwezesha kufikia ndoto zake za muda mrefu za kucheza soka barani Ulaya.

Alisema Watanzania wengi siku  za Jumamosi na Jumapili wanajazana pembezoni mwa luninga zao kuungalia ligi kubwa za soka za bara la Ulaya, ikiwemo ligi maarufu ya England.

"Mafanikio aliyoanza kuyapata Samatta yanamfanya sasa aanze kufuatiliwa na mawakala wengi wa nje ili akazitumikie klabu zao. Lakini nadhani mafanikio ya mchezaji huyo, hatimaye yatachangia mawakala wengi kuja kusaka wachezaji hapa nchini," alisema.

Naye, Samatta akizungumza  na vyombo vya habari kwenye hafla hiyo kabla ya kukabidhi jezi ya klabu yake ya T.P Mazembe yenye namba tisa mgongoni  kwa Dk. Kikwete, amewashukuru wadau, serikali na Watanzania wote ambao wamemuunga mkono kwa hali na mali.

"Kama ambavyo  nimekuwa nasema mara nyingi kwamba siku za nyuma nilikutana na Rais Kikwete kule Lubumbashi (DRC) na kuzungumza naye kwa kina kuhusu soka. Lakini kikubwa aliniaasa niongeze bidii ili nisiishie tu kucheza  T.P Mazembe na kweli ushauri wake nimeufanyia kazi na matunda yake yameanza kuonekana," alisema Samatta ambaye kwa sasa ametangazwa kuwa nahodha wa timu ya soka ya taifa, Taifa Stars.

Samatta amewataka Watanzania  hususan wadau wa soka, kuendelea kumuunga mkono kwenye harakati zake za kusaka kucheza soka ya kulipwa barani Ulaya.

Alisema anaamini kufanikiwa kwake katika hilo, kutakuwa na tija kwenye medani ya soka ya kimataifa, ambayo siku hizi imekuwa chanzo kikubwa cha ajira kwa kuwashirikisha vijana wengi na wa kila jinsia.

Katika hatua nyingine, Samatta alimkabidhi Dk. Kikwete jezi ya T.P Mazembe ya DR Congo,  yenye namba tisa mgongoni kama sehemu ya kutambua mchango wa kiongozi huyo mstaafu  kwenye tasnia yake ya soka ya kulipwa.

SAMATTA NAHODHA MPYA TAIFA STARS

KOCHA Mkuu wa timu ya soka ya Taifa, Taifa Stars, Charles Boniface Mkwasa, amemteua mshambuliaji Mbwana Samattam kuwa nahodha mpya wa timu hiyo.

Samatta amechukua nafasi ya nahodha wa zamani wa timu hiyo Nadir Haroub 'Cannavaro'.

Akizungumza na waandishi wa habari mjini hapa jana, Mkwasa alisema uteuzi huo umetokana na kazi nzuri iliyofanywa na Samatta, kuitangaza Tanzania kimataifa.

"Samatta anastahili kuwa nahodha wa Taifa Stars kwa sasa, ingewa tumekuwa na nahodha, ambaye anastahili kuendelea,"alisema Mkwasa.

Aliongeza: "Tumeona kitu pekee cha kumlipa mchezaji huyo kutokana na heshima aliyoiletea nchi yetu ni kumpa beji ya unahodha wa Taifa Stars." 

Hata hivyo, Mkwasa amesema Cannavaro ataendelea kuwa nahodha wa timu ya Tanzania, inayoshiriki michuano ya Afrika kwa wachezaji wa ndani, akisaidiwa na John Bocco.

Uteuzi wa Samatta kuwa nahodha wa Taifa Stars, umekuja siku chache baada ya kuibuka mshindi wa tuzo ya mwanasoka bora wa Afrika kwa wachezaji wa ndani.

Alishinda tuzo hiyo baada ya kupata pointi 127, na kuwabwaga mchezaji mwenzake wa TP Mazembe, Robert Muteba Kidiaba aliyepata pointi 88, Baghdad Bounedjah wa Etoile du Sahel ya Tunisia, aliyepata pointi 63.

SIMBA, YANGA ZATUPWA NJE KOMBE LA MAPINDUZI

MABINGWA watetezi wa Kombe la Mapinduzi, Yanga na watani wao wa jadi Yanga, jana walifungasha virago mapema mwaka huu baada ya kupata vipigo kutoka kwa Mtibwa Sugar na URA.

Katika mechi hizo za nusu fainali zilizochezwa kwenye Uwanja wa Amaan, mjini Unguja, Simba ilichapwa bao 1-0 na Mtibwa Sugar wakati Yanga ilifungwa kwa penalti 4-3 na URA ya Uganda.

Kwa matokeo hayo, Mtibwa na URA sasa zitamenyana katika mechi ya fainali itakayochezwa kesho kwenye uwanja huo wakati Simba na Yanga zimeshafungasha virago kurejea Dar es Salaam.

Mtibwa Sugar ilijipatia bao lake la pekee na la ushindi dakika ya 45 kupitia kwa Ibrahim Rajabu 'Jeba'.

Bao hilo lilitokana na uzembe wa kipa Manyika Peter wa Simba, kuutema mpira uliopigwa kwenye lango la timu yake na kumkuta mfungaji, aliyeukwamisha wavuni.

Katika kipindi cha kwanza, Mtibwa walionekana kucheza soka safi na ya kuonana, ambapo walifanikiwa kupeleka mashambaulizi mengi katika goli la Simba.

Kipindi cha pili kilianza kwa kasi, ambapo Kocha wa Simba, Dylan Kerr alifanya mabadiliko kwa kuwatoa Awadh Juma,Danny Lyanga,Mwinyi Kazimoto na Emily Nimuboma na nafasi zao kuchukuliwa na Ibrahimu Ajibu,Said Ndemla,  Brian Mwajegwa na Rafael Kiongera.

Kuingia kwa wachezaji hao kuliongeza kasi ya Simba kulishambulia lango la Mtibwa,lakini uimara wa golikipa wa Mtibwa Sugar, Said Mohamed, ulikuwa kizingiti kwa Simba kusawazisha.

Kwa matokeo hayo, Mtibwa Sugar imeweka rekodi ya kucheza fainali ya michuano mara tano tangu tangu ilipoanza kushiriki katika michuano hiyo.

Nazo Yanga na URA zililazimika kupigiana penalti tano tano ili kumpata ushindi baada ya kumaliza dakika 90 zikiwa sare ya bao 1-1.

Penalti za Yanga zilifungwa na Kevin Yondan, Deo Munishi ‘Dida’ na Simon Msuva huku Malimi Busungu na Geoffrey Mwashiuya
wakikosa.

Kwa upande wa URA, penalti zake zilifungwa na Deo Othieno, Said
Kyeyune, Jimmy Kulaba na Brian Bwete, wakati Sam Sekito alikosa.

Yanga ilikuwa ya kwanza kupata bao lililofungwa na mshambuliaji Mrundi, Amissi Joselyn Tambwe dakika ya 13 kwa kichwa akimalizia mpira uliorudi baada ya kutemwa na kipa wa URA, Brian Bwete kufuatia mchomo wa winga Simon Msuva.

URA ilisawazisha dakika ya 76 kwa bao lililofungwa na Peter Lwasa kutokana na uzembe wa mabeki wa Yanga.

SAMATTA APATA MAPOKEZI MAKUBWA DAR

Mshindi wa Tuzo ya Mchezaji Bora wa Afrika wa Wachezaji wa Ndani 2015, Mbwana Samata akiwasili kwenye Uwanja wa Ndege wa Kimataifa wa Julius Nyerere (JNIA) jijini Dar es Salaam akitokea Abuja, Nigeria katika hafla ya utoaji tuzo kwa mwanamichezo bora.

Baba na mama wa Mbwana Samatta wakiwa wamepozi wakati wakisubiri kuwasili kwa mtoto wao

Shirikisho la Mpira wa Miguu Tanzania (TFF), limewashukuru watanzania wote, wapenzi, na wadau wa mpira wa miguu Tanzania waliojitokeza usiku saa 8 uwanja wa ndege wa Kimataifa  Julius Nyerere jijini Dar es salam kumpokea mchezaji bora wa Afrika kwa wachezaji wanaocheza ndani Mbwana Samatta.

Samatta alipokelewa na viongozi wa serikali, TFF, familia yake wakiwemo baba na mama yake mzazi na watanzania wengi walijitokeza kumlaki mchezaji huyo.

Mara baada ya mapokezi ya uwanja wa ndege, TFF ilimpeleka moja kwa moja kupumzika katika hoteli ya Serena iliyopo eneo la Posta jijini Dar es salaam, ambapo imemlipia gharama ya kukaa kwa siku mbili.

Akiwa hoteli ya Serena, Mkurugenzi Msaidizi Idara ya Michezo, Wizara ya Habari, Utamaduni, Sanaa na Michezo, Mama Juliana Yassoda alitoa salamu za pongezi kwa niaba ya Serikali, kisha mchezaji alipata nafasi ya kuongea na waandishi wa habari.

Kwa kuwa Jumanne, Januari 12 ni Sikukuu ya Mapinduzi, na Janauri 13 ni fainali ya kombe la Mapinduzi Visiwani Zanzibar, siku ya Alhamisi Januari 14 TFF imeandaa dua maalumu ya kumpongeza Samatta itakayoongozwa na viongozi wa dini mbalimbali katika uwanja wa Karume kuanzia saa 11 jioni.

Hata hivyo ratiba zingine za kumpongeza Mbwana Samatta zinazoweza kuandaliwa na wadau wengine zinaweza kuendelea ilimradi TFF ijulishwe mapema kwa ajili ya kuratibu uwepo wa mchezaji mwenyewe.

MALINZI AMTUMIA SALAMU ZA PONGEZI SAMATTA

Rais wa Shirikisho la Mpira wa Miguu (TFF), Jamal Malinzi amempongeza mshambuliaji wa kimataifa wa Tanzania na klabu ya TP Mazembe ya Congo DR kwa kushinda tuzo ya mchezaji bora wa Afrika kwa wachezaji wanaocheza ndani.

Samatta ameshinda tuzo ya mchezaji bora kwa wachezaji wanaocheza Afrika baada ya kwashinda Robert Kidiaba (Congo DR) alieshika nafasi ya pili na Bounedjah Baghdad (Algeria) aliyeshika nafasi ya tatu.

Kwa kushinda tuzo hiyo, Samatta amekua mchezaji wa kwanza kwa ukanda wa Afrika Mashariki kushinda tuzo kubwa barani Afrika.

Pamoja na kushinda tuzo hiyo, Samatta pia amejumuishwa katika kikosi bora cha wachezaji wa Afrika kwa mwaka 2015 sambamba na Robert Kidiaba (Congo DR), Sergie Aurier (Ivory Coast), Aymen Abdenmor (Tunisia), Mohamed Meftah (Algeria), Sadio Mane (Senegal), Yaya Toure (Ivory Coast), Yacine Ibrahim (Algeria), Andrew Ayew (Ghana), Mbwana Samatta (Tanzania), Pierre-Emercik Aubameyang (Gabon) na Baghdad Bounedjah (Algeria).

Mshambuliaji Mbwana Samatta alieyambatana na Katibu Mkuu wa TFF, Mwesigwa Selestine wanatarajia kuwasili nchini leo saa 8 usiku kwa shirika la ndege la Ethiopia.

SAMATTA ASHINDA TUZO YA MWANASOKA BORA WA AFRIKA KWA WACHEZAJI WA NDANI

MSHAMBULIAJI wa kimataifa wa Tanzania, Mbwana Ally Samatta ameshinda tuzo ya Mchezaji Bora Anayecheza Afrika katika sherehe zilizofanyika usiku huu ukumbi wa mikutano wa Kimataifa mjini Abuja.
Samatta amepata pointi 127, mbele ya mchezaji mwenzake wa TP Mazembe, kipa Robert Muteba Kidiaba wa DRC, aliyepata pointi 88, wakati mshambuliaji wa Etoile du Sahel ya Tunisia na timu ya taifa ya Algeria, Baghdad Bounedjah amepata pointi 63.
Mafanikio ya Samatta anayeweka rekodi ya kuwa Mtanzania wa kwanza kushinda tuzo kubwa ya Afrika, yanakuja baada ya kuiwezesha Mazembe kutwaa taji la tano la Ligi ya Mabingwa Afrika, huku akiibuka mfungaji bora kwa mabao yake nane.
Mshambuliaji wa Gabon, Pierre-Emerick Aubameyang ameshinda tuzo ya Mwanasoka Bora wa Afrika kwa mara ya kwanza.
Mchezaji wa Borussia Dortmund ya Ujerumani mwenye umri wa miaka 26, amewaangusha Yaya Toure wa Ivory Coast aliyekuwa anashikilia tuzo hiyo na Andre Ayew wa Ghana.
Amekusanya pointi 143, saba zaidi ya Toure wakati Ayew ameshika nafasi ya tatu kwa kupata pointi 112 na anakuwa mchezaji wa kwanza wa
Gabon kushinda tuzo ya CAF
Kiungo wa Nigeria, Etebo Peter Oghenekaro ameshinda tuzo ya Mchezaji Anayechipukia Vizuri dhidi ya Mnigeria mwenzake, Azubuike Okechukwu, kipa wa Mali, Djigui Diarra, Mahmoud Abdelmonem Abdelhamid ‘Kahraba’ wa Misri na Mualgeria, Zinedine Ferhat.
Etebo, anayechezea timu ya Ligi Kuu ya Nigeria, Warri Wolves, aling’ara katika michuano ya U-23 ya Afrika Desemba nchini Senegal, akiibuka mfungaji bora kwa mabao yake matano, yakiwemo mawili aliyofunga katika ushindi wa 2-1 dhidi ya Algeria katika fainali.
Mshambuliaji kinda wa Nigeria, Victor Osimhen ameshinda tuzo ya Mwanasoka Bora Chipukizi akimshinda ndugu yake, Kelechi Nwakali, wachezaji wawili wa Mali, Adama Traore na Samuel Diarra na Yaw Yeboah wa Ghana.
Osimhen anayeshinda tuzo hiyo siku tisa tangu asherehekee kufikisha miaka 17 ya kuzaliwa, mafanikio hayo yanafuatia kufanya kwake vizuri katika Kombe la Dunia la U-17 Oktoba mwaka jana nchini Chile, akifunga mabao 10 na kuibuka mfungaji bora sambamba na kushinda Mpira wa Fedha baada ya Mchezaji Bora wa pili wa michuano hiyo, huku Nigeria ikitwaa Kombe.
Anakuwa mchezaji wa pili wa Nigeria kushinda tuzo hiyo baada ya Kelechi Iheanacho mwaka jana.
Mfaransa, Herve Renard ameshinda tuzo ya kocha bora wa mwaka kwa mara ya pili, baada ya kuipa Ivory Coast ubingwa wa Afrika mwaka jana nchini Equatorial Guinea.
Mfaransa huyo amewashinda Baye Ba wa Mali U-17, Patrice Carteron wa TP Mazembe, Faouzi Benzarti wa Etoile du Sahel na Emmanuel Amunike wa Nigeria U-17
Renard, ambaye alishinda tuzo ya kwanza baada ya kuipa Zambia ubingwa wa Afrika mwaka 2012, alikabidhiwa tuzo yake na Mjumbe wa Kamati ya Utendaji ya CAF, Adoum Djibrine.
Cameroon imezishinda Ghana, Afrika Kusini na Zimbabwe katika kipengele cha timu bora ya taifa ya wanawake, wakati Ivory Coast imeziangusha
Ghana, Mali U-17, Nigeria U-17 na Nigeria U-23 katika timu bora ya taifa ya wanaume.
Refa wa Gambia, Papa Bakary Gassama ameshinda tuzo ya refa bora kwa mara ya pili mfululizo akiwaangusha Ghead Zaglol Grisha wa Misri, Janny Sikazwe wa Zambia na Eric Arnaud Otogo Castane wa Gabon.
Mualgeria, Haimoudi Djamel pia alishinda tuzo hiyo mara mbili mfululizo mwaka 2012 na 2013.
CHANZO CHA HABARI: BLOGU YA BINZUBEIRY

YANGA YATINGA NUSU FAINALI KOMBE LA MAPINDUZI KWA KISHINDO

YANGA SC imemaliza kileleni mwa Kundi B michuano ya Kombe la Mapinduzi, kufuatia ushindi wa mabao 2-1 dhidi ya Mtibwa Sugar jioni ya leo Uwanja wa Amaan, Zanzibar.
Ushindi huo unaifanya Yanga SC ifikishe pointi saba baada ya kushinda mechi mbili na kutoa sare moja, hivyo kuongoza Kundi B ikifuatiwa na Mtibwa inayomaliza na pointi nne, Mafunzo pointi tatu, wakati Azam FC waliovuna pointi mbili wameshika mkia na kuaga.
Yanga SC sasa itacheza na mshindi wa pili wa Kundi A katika Nusu Fainali, wakati Mtibwa Sugar itacheza na mshindi wa pili wa kundi hilo.
Mtibwa Sugar walikuwa wa kwanza kupata bao kupitia kwa kiungo wake, Shizza Kichuya aliyemalizia pasi ya mshambuliaji anayecheza kwa mkopo timu hiyo ya Manungu kutoka Yanga SC, Hussein Javu
Yanga SC walisota hadi dakika ya 42 walipofanikiwa kusawazisha bao hilo kupitia kwa kiungo wake mpya kutoka Niger, Boubacar Issoufou.
Issoufou alifunga bao hilo kwa shuti zuri la mpira wa adhabu kutoka pembeni kulia nje kidogo ya boksi, baada ya mshambuliaji Mzimbabwe, Donald Ngoma kuangushwa na beki wa Mtibwa, Salum Mbonde.
Kwa ujumla, kipindi cha kwanza timu zote zilicheza vizuri, Mtibwa Sugar wakitawala sehemu ya kiungo na Yanga SC wakipitisha mashambulizi yao pembezoni mwa Uwanja.
Kipindi cha pili, timu zote ziliendelea kushambuliana kwa zamu, lakini mwishowe bahati ilikuwa ni ya Yanga waliofanikiwa kushinda mechi.
Mshambuliaji Malimi Busungu aliyetokea benchi, aliwafungia mabingwa hao wa Bara bao la pili dakika ya 81 akimalizia krosi ya winga Simon Msuva.
Kiungo wa Mtibwa Sugar, Henry Joseph aliyetokea benchi kipindi cha pili, alitolewa kwa kadi nyekundu dakika za mwishoni baada ya kumchezea rafu Salum Telela.
Mechi za makundi zinatarajiwa kuhitimishwa kesho kwa michezo ya Kundi A, kati ya URA na Jamhuri jioni na Simba SC na JKU usiku.
Hadi sasa, Simba SC inaongoza Kundi A kwa pointi zake nne, ikifuatiwa na URA na JKU zenye pointi tatu kila moja.
CHANZO CHA HABARI: BINZUBEIRY BLOG

MAFUNZO YAIFUNGASHA VIRAGO AZAM KOMBE LA MAPINDUZI

KWA mara ya kwanza katika historia ya Kombe la Mapinduzi, Azam FC imetolewa katika hatua ya makundi, baada ya kufungwa mabao 2-1 jioni ya leo na Mafunzo FC Uwanja wa Amaan, Zanzibar.
Azam FC pia inaondoka bila ya ushindi katika mashindano hayo, ikiwa ni mara ya kwanza katika historia yake ya ushiriki wa michuano hiyo ikimaliza na pointi mbili, za sare dhidi ya Yanga na Mtibwa Sugar, zote 1-1 pamoja na kipigo cha leo.
Aliyewarudisha mapema Azam FC Dar es Salaam leo ni Habib Sadik aliyemalizia mpira wa adhabu uliopigwa na Haji Abdi dakika ya 90 na ushei kuipatia Mafunzo bao la pili.
Azam FC walitangulia kupata bao kupitia kwa mshambuliaji Kipre Herman Tchetche dakika ya 20 akimalizia kona iliyochongwa na beki wa kulia, Shomary Kapombe
Mafunzo ambao leo walicheza bila kocha wao Mkuu, Hemed Morocco, aliyefiwa na mama yake mzazi, ilipata bao la kusawazisha dakika ya 35 kupitia kwa mshambuliaji wake, Rashid Abdallah  aliyemalizia pasi ya Ali Hassan.
Matokeo haya yanazifanya Yanga SC na Mtibwa Sugar zenye pointi nne kila moja zifuzu moja kwa moja hatua ya nusu fainali na zitamenyana katika mechi ya mwisho ya kundi A usiku wa leo kusaka mshindi wa kwanza na wa pili.
CHANZO CHA HABARI: BINZUBEIRY BLOG

KAIJAGE AJIUZULU KUIFUNDISHA TWIGA STARS

Kocha Mkuu wa timu ya Taifa ya Wanawake ya Mpira wa Miguu (Twiga Stars), Rogasian Kaijage amejiuzulu nafasi hiyo kuanzia leo baada ya kuomba kwa uongozi wa Shirikisho la Mpira wa Miguu  nchini (TFF).

Kaijage aliiongoza Twiga Stars kwenye fainali za michezo ya Afrika (All Africa Games) zilizofanyika nchini Congo Brazzavile Septemba mwaka jana, baada ya kuiondoa timu ya taifa ya Zambia katika hatua ya mtoano.

TFF imesikitishwa na taarifa za kujiuzulu kwa kocha huyo mwenye leseini A ya CAF, ambaye amekuwa akizinoa timu za taifa za wanawake ya wakubwa (Twiga Stars) pamoja na timu ya wanawake wenye umri chini ya miaka ya 20 (Tanzanite) tangu mwaka 2013.

Kufuatia kujiuzulu kwa kocha Kaijage, TFF inaendelea na programu za maendeleo ya soka kwa wanawake, ikiwemo kuendesha ligi ya wanawake (Tanzania Women League).

TFF inamtakia kila la kheri kocha Rogasian Kiajage katika shughuli zake.

Aidha maandalizi ya mchezo kati ya Twiga Stars dhidi ya Zimbambwe  yataendelea chini ya kocha atakayeteuliwa kuchukua nafasi yake, mchezo utakaochezwa mwezi Machi mwaka huu na mshindi kucheza na Zambia.

TFF  itaendelea kupambania kwenye maendeleo ya soka la wanawake.

TFF YATUMA SALAMU ZA RAMBIRAMBI KIFO CHA JUMA ALI DAVID

Rais wa Shirikisho la Mpira wa Miguu Tanzania (TFF), Jamal Malinzi ametuma salamu za rambirambi kwa chama cha soka cha Zanzibar (ZFA) kufuatia kifo cha mwamuzi mstaafu wa FIFA Juma Ally Khamis kilichotokea jana kisiwani Pemba.

Katika salamu zake, Malinzi amewapa pole familia ya marehemu, ndugu, jamaa, marafiki na wadau wa mpira wa miguu na kusema TFF ipo pamoja na wafiwa katika kipindi hiki kigumu cha maombolezo.

Wakati wa uhai wake marehemu Juma Ally Khamis alikuwa mwamuzi mwenye beji ya FIFA, mkufunzi wa waamuzi Tanzania, Meneja wa uwanja wa Amani – uliopo Zanzibar na mratibu wa michezo Wizara ya Habari na Utamaduni na Michezo kisiwani Zanzibar.

Mazishi yalifanyika juzi  nyumbani kwake Pemba.

Wakati huo huo, Shirikisho la Mpira wa Miguu (TFF), limetuma salamu za rambirambi kwa kocha msaidizi wa Taifa Stars Hemed Suleiman “Morocco” kufutia kifo cha baba yake mzazi Suleiman Ally Hemed kilichotokea juzi kisiwani Zanzibar.

Katika salamu hizo za rambirambi, TFF imewapa pole wafiwa, ndugu jamaa na marafiki na kusema wapo pamoja na familia ya marheemu katika kipindi hiki kigumu cha maombeloezo.

Aidha pia TFF imetuma rambirambi (ubani) wa shilingi laki mbili (200,000) kwa familia ya kocha Hemed Moroco kufuatia kifo cha baba yake Suleiman Ally.

Mazishi ya marehmu Suleiman Ally Hemed mefanyika jana jioni mjini Zanzibar

LIGI YA STAR TIMES KUENDELEA WIKIENDI HII

Ligi Daraja la Kwanza Tanzania Bara (StarTimes League) inaendelea wikiendi hii kwa michezo 12 kuchezwa katika viwanja mbalimbali nchini ikiwa katika mzunguko wa kumi, huku kila timu ikisaka pointi tatu muhimu kuweza kupanda Ligi Kuu ya Vodacom msimu ujao wa 2016/2017.

Kundi A, Jumamosi Mji Mkuu watawakaribisha Ashanti United uwanja wa Jamhuri mjini Dodoma, Kiluvya United dhidi ya Polisi Dar uwanja wa Mabatini – Mlandizi, Africa Lyon v Friends Rangers uwanja wa Karume jijini Dar es salaam huku Polisi Dodoma wakiwa wenyeji wa KMC FC uwanja wa Mgambo Mpwapwa.

Kundi B, Polisi Morogoro watacheza dhidi ya Lipuli uwanja wa Jamhuri Morogoro, JKT Mlale watawakaribisha Kimondo FC uwanja wa Majimaji mjini Songea, Kurugenzi FC dhidi ya Ruvu Shooting uwanja wa Wambi Mafinga na Njombe Mji watakua wenyeji wa Burkinafaso uwanja wa Amani- Njombe.

Kundi C, Panone FC watawakaribsha maafane wa JKT Kanembwa uwanja wa Ushirika mjini Moshi, Polisi Mara watacheza dhidi ya JKT Oljoro uwanja wa Karume mjini Musoma, Rhino Rangers dhidi ya Geita Gold uwanja wa Ali Hassan Mwinyi Tabora, huku Mbao FC wakicheza dhidi ya Polisi Tabora mchezo utakaonyeshwa moja moja na kituo cha Star TV.

SIMBA YAITUNGUA URA 1-0 KOMBE LA MAPINDUZI

Na Princess Asia, ZANZIBAR
SIMBA SC imebisha hodi Nusu Fainali ya Kombe la Mapinduzi 2016, kufuatia ushindi wa bao 1-0 dhidi ya URA ya Uganda katika mchezo wa Kundi A usiku huu Uwanja wa Amaan, Zanzibar.
Shujaa wa Simba SC, alikuwa Ibrahim Hajib Migomba aliyefunga bao hilo pekee dakika ya
37 kwa shuti lake la umbali wa mita 20, baada ya kupokea pasi ya beki Mrundi, Emery Nimubona.
Simba SC inapanda kileleni mwa Kundi A baada ya kufikisha pointi nne, kutokana na mechi mbili, ikifuatiwa na URA yenye pointi tatu sawa na JKU, wakati Jamhuri wanashika mkia kwa pointi yao moja.
Simba SC, mabingwa watetezi wa Kombe hilo, ilistahili ushindi katika mchezo wa leo, kutokana na kucheza kwa umakini na nidhamu ya hali ya juu, kiasi cha kuwadhibiti kabisa URA.
Na ingeweza kutoka na ushindi mnene zaidi iwapo, washambuliaji wake wangetumia nafasi zaidi walizopata.
Dakika ya 51, Danny Lyanga alimtoka vizuri Jimmy Kulaba, lakini shuti lake likatoka nje, wakati dakika ya 70, kipa wa URA, Brian Bwette alifanya kazi ya ziada kupangua mpira wa kichwa wa Mganda mwenzake, Hamisi Kizza aliyemalizia pasi ya Mwinyi Kazimoto
Michuano hiyo itaendelea kesho kwa mechi za Kundi B kuhitimishwa, Azam FC wakimenyana na Mafunzo, wakati Yanga SC watamenyana na Mtibwa Sugar usiku.
Simba SC itamaliza na JKU keshokutwa, wakati URA itamaliza na Jamhuri.
Kikosi cha Simba SC kilikuwa; Peter Manyika, Emery Nimubona, Mohammed Hussein ‘Tshabalala’/Brian Majwega dk64, Abdi Banda, Juuko Murushid, Justice Majabvi, Mwinyi Kazimoto, Said Ndemla, Ibrahim Hajib/Awadh Juma dk83, Hamisi Kizza/Mussa Mgosi dk83 na Danny Lyanga.
URA; Brian Bwette, Simeon Massa/Sharifin Kagimu dk47, Allan Munaaba, Jimmy Kulaba, Sam Senkoom, Oscar Agaba, Julius Ntambi, Said Kyeyune, Derrick Tekwo/Ronald Kigongo dk47, Villa Oromuchani na Elkanah Nkagwa/Peter Iwassa dk75.
Wakati huo huo, JKU imefufua matumaini ya kwenda Nusu Fainali ya michuano ya Kombe la Mapinduzi kufuatia ushindi wa mabao 3-0 dhidi ya Jamhuri katika mchezo wa Kundi jioni ya leo Uwanja wa Amaan, Zanzibar.
Ushindi huo unaifanya JKU iokote pointi tatu za kwanza, baada ya awali kufungwa 3-1 na URA katika mchezo wa kwanza na itcheza na Simba SC mechi ya mwisho ya kukata na shoka kugombea tiketi ya Nusu Fainali.
 
MECHI ZA LEO
Jan 7, 2016
Azam Vs Mafunzo (Saa 10:15 jioni)
Mtibwa Sugar Vs Yanga (Saa 2:15 usiku)
Jan 8, 2016
Jamhuri Vs URA (Saa 10:15 jioni)
Simba SC Vs JKU (Saa 2:15 usiku)
IMETOLEWA KUTOKA BLOGU YA BINZUBEIRY

TENGA MWENYEKITI WA HESHIMA CECAFA, CHALENJI KUCHEZWA SUDAN

Na Mwandishi Wetu, Zanzibar
WAKATI Baraza la Vyama vya Soka Afrika Mashariki na Kati (Cecafa) likimteua Mwenyekiti wa zamani wa baraza hilo, Leodegar Tenga kuwa mwenyekiti wa heshima, limetangaza kuwa mashindano ya mwaka huu ya Kombe la Mataifa ya Afrika Mashariki na Kati, CECAFA Challenge yatafanyika nchini Sudan.
Kwa mujibu wa taarifa iliyotolewa jana na Katibu Mkuu wa CECAFA, Nicholas Musonye, mashindano hayo yatafanyika Sudan na tayari Wizara ya Michezo ya nchi hiyo kwa kushirikisha na Chama cha nchi hiyo (SFA) wamethibitisha kuwa wenyeji wa michuano hiyo.
Musonye alisema kuwa uamuzi wa kuipa Sudan uenyeji ulipitishwa katika kikao cha Kamati ya Utendaji ya CECAFA kilichofanyika juzi Jumatatu mjini Khartoum kikiwa na malengo ya kupanga mikakati ya maendeleo ya ukanda huo.
Kiongozi huyo alisema kuwa pia CECAFA imeshaingia makubaliano na Chama cha Soka cha Saudi Arabia kwa ajili ya kutoa ushirikiano na baraza hilo katika kuendesha programu mbalimbali za maendeleo za soka la vijana na wanawake.
Mwenyekiti mpya wa CECAFA, Gaffar Mutasin, ambaye ni raia wa Sudan aliahidi kuendeleza soka la wanawake na vijana katika uongozi wake ili kuinua kiwango cha soka cha nchi 12 wanachama  wa baraza hilo.
CECAFA pia imeshapitisha kuwa mashindano ya Klabu Bingwa Afrika Mashariki na Kati (Kombe la Kagame) mwaka huu yatafanyika Zanzibar wakati ya vijana ya umri chini ya miaka 17 yatachezwa Uganda na Burundi itakuwa mwenyeji wa michuano ya vijana ya umri chini ya miaka 20.
Uganda ndiyo bingwa wa mashindano ya Kombe la Challenge wakati Azam FC ya Tanzania Bara ndiyo wanakishikilia kikombe cha Kagame baada ya kuwafunga Gor Mahia mwaka jana.

KOMBE LA KAGAME KUCHEZWA ZANZIBAR

Michuano ya Klabu Bingwa Afrika Mashariki na Kati, maarufu kama Kombr la Kagame, inatarajiwa kufanyika kati ya Julai na Agosti mwaka huu kisiwani Zanzibar.
Katibu Mkuu wa Baraza la Vyama vya Soka Afrika Mashariki na Kati, (CECAFA), Nicholaus Musonye amesema pamoja na michuano hiyo kufanyika Zanzibar mwaka huu, pia wamejipanga kuendesha michuano ya U17 itakayofanyika Mei nchini Uganda, michuano ya Mpira wa miguu wa Wanawake (Uganda), Mashindano ya vijana chini ya miaka 20 (Burundi) huku michuano ya CECAFA Senior Challenge ikipangwa kufanyika nchini Sudan.
Mwishoni mwa wiki uongozi wa Kamati ya Utendaji wa CECAFA ulikutana nchini Sudan na kufanya kikao chake cha kwanza chini ya Rais Dkt Mutasim Ghafar amabye pia ni Rais wa Chama cha Soka nchini Sudani (SFA).
Katika kikao hicho, CECAFA ilitangaza kumpa Leodgar Tenga Rais wa heshima wa Cecafa huku pia wakisaini makubaliano ya uendelezaji wa soka la vijana na Chama cha Soka cha Saudi Arabia (SAFF) kupitia kwa Rais wake Ahmed Alharbi.
Ikumbukwe Azam FC ndiyo mabingwa watetezi wa Kombe la Kagame ambao walilitwaa mwaka jana Dar es Salaam kwa kuwafunga Gor Mahia ya Kenya katika fainali.

RAUNDI YA TATU KOMBE LA SHIRIKISHO KUANZA JAN 12

Michuano ya Kombe la Shirikisho (Azam Sports Federation Cup) mzunguko wa tatu inatarajiwa kuendelea Januari 12 na wikiendi ya Januari 23-27 kwa timu 32 kuchuana kuwania kufuzu kwa hatua ya 16 bora ya michuano hiyo.

Timu 16 zinazoshiriki Ligi Kuu ya Vodacom zimeingia moja kwa moja mzunguko wa tatu ambapo sasa zinajumuika na timu 16 zilizofuzu kutoka raundi ya pili yenye timu kutoka ligi daraja la kwanza na ligi daraja la pili.

Jumamosi, Januari 12, Majimaji itacheza dhidi ya JKT Mlale uwanja wa Majimaji mjini Songea, Januari 23 Pamba v Toto Africans uwanja wa CCM Kirumba, Ndanda FC v Mshikamano Nagwanda Sijaona Mtwara, huku Burkinafaso wakiwakaribisha Simba SC katika uwanja wa Jamhuri mjini Morogoro.

Januari 24, Young Africans watacheza dhidi ya Friends Rangers uwanja wa Taifa jijini Dar es salaam, Njombe Mji v Tanzania Prisons uwanja wa Amani Makambako, mjini Shinyanga Stand United watachuana dhidi ya Mwadui FC.

Mechi zingine ni Kagera Sugar v Rhino Rangers, Panone v Madini, Mtibwa Sugar v Abajalo, Lipuli/Kurugenzi v JKT Ruvu, Ashanti United v Azam FC, Africa Sports v Coastal Union, Geita Gold v
Mgambo Shooting, Singida United v Mvuvuma na Wenda v Mbeya City.

Timu 15 zilizofuzu hatua ya tatu kutoka raundi ya pili ni Ashanti United, Friends Rangers, Panone, Geita Gold, Pamba, Mvuvuma, Burkinafaso, Rhino Rangers, Madini FC, JKT Mlale, Mshikamano FC, Njombe Mji, Wenda FC, Singida United, Abajalo huku mchezo mmoja kati ya Lipuli dhidi ya Kurugenzi ukichezwa leo hii kusaka timu ya kufuzu raundi ya tatu.

Bingwa wa michuano ya Kombe la Shirikisho (Azam Sports Federation Cup) ataiwakilisha Tanzania kwenye Kombe la Shirikisho Barani Afrika (CAF CC) mwaka 2017.

YANGA, AZAM ZASHINDWA KUTAMBIANA KOMBE LA MAPINDUZI

Na Princess Asia, DAR ES SALAAM
YANGA SC imeshindwa kuifunga Azam FC pungufu, baada ya kulazimishwa sare ya bao 1-1 katika mchezo wa Kundi B Kombe la Mapinduzi usiku huu Uwanja wa Amaan, Zanzibar.
Sasa timu zote za Bara, Mtibwa Sugar na Yanga SC zinafungana kwa pointi nne nne kila moja baada ya mechi mbili, wakati Azam ina pointi mbili baada ya mechi mbili oia, huku Mafunzo ikishika mkia haina pointi. Yanga itamaliza na Mtibwa, wakati Azam itamaliza na Mafunzo kuwania nafasi mbili za Nusu Fainali keshokutwa.
Azam FC ilimpoteza Nahodha wake, John Raphael Bocco ‘Adebayor’ aliyeonyeshwa kadi ya pili ya njano na refa Mfaume Ali Nassor dakika ya 62, lakini ikamudu kumaliza mechi kwa sare.
Katika mchezo huo uliotawaliwa na undava na matukio ya ubabe na utovu wa nidhamu, hadi mapumziko hakuna timu iliyofanikiwa kupata bao, ingawa Yanga SC walitawala na kutengeneza nafasi kadhaa walizoshindwa kutumia.
Yanga ndio ilikuwa ya kwanza kufanya shambulizi katika lango la Azam dakika ya tatu kupitia kwa mshambuliaji wake, Donald Ngoma ambaye alipiga shuti pembeni na kupoteza nafasi hiyo ya kupata bao la mapema.
Dakika ya 18 Azam walijibu shambulizi hilo, winga Ramadhani Singano ' Messi' akitia krosi nzuri, lakini Bocco aliyekuwa jirani alishindwa kuunganisha.
Dakika 34 kipa wa Azam, Aishi Manula alipangua shuti la kali la Ngoma aliyemtoka kali beki Serge Wawa.
Sekunde chache kabla ya mapumziko, Manula alidaka tena shuti la Simon Msuva na kuikosesha Yanga nafasi nyingine ya kufunga.
Mapema kipindi cha kwanza, beki Muivory Coast, Serge Wawa wa Azam FC alitembezeana undava na mshambuliaji Mzimbabwe wa Yanga SC, Ngoma kabla ya baadaye kuamua kutulia na kucheza mpira.
Beki wa kulia wa Yanga SC, Juma Abdul naye alileteana tafrani mara kadhaa na Bocco, wakati Himid Mao naye alichimbiana mkwara na Ngoma.
Wakati wa mapumziko makomandoo wa Yanga SC na Azam FC walitembezeana mikwara kwenye kibaraza cha kuingia kwenye vyumba vya kubadilishia nguo.
Askari wa Jeshi la Wananchi (JWTZ) waliingia kwenye Uwanja uliosaza mashabiki mwanzoni mwa kipindi cha pili kuimarisha ulinzi kuwasaidia askari Polisi, ambao walikwishaanza kuelemewa. 
Kipindi cha pili, Yanga SC waliendelea kushambulia zaidi, ingawa ni Azam FC waliofanikiwa kupata bao la kuongoza dakika ya 58 baada ya shambulizi la kushitukiza.
Sifa zimuendee mfungaji wa bao hilo, Kipre Herman Tchetche raia wa Ivory Coast aliyewakokota mabeki watatu wa Yanga SC hadi karibu kabisa na boksi na kufumua shuti lililompita kipa Deo Munishi ‘Dida’.
Beki Mtogo, Vincent Bossou aliisawazishia Yanga SC dakika ya 83 akimalizia mpira ulioparazwa kwa kichwa na Malimi Busungu baada ya kona ya Simon Msuva.
Hata hivyo, beki Shomary Kapombe aliokoa mpira huo kuurudisha uwanjani ukiwa umekwishavuka mstari wa lango, lakini refa hakudanganyika na Yanga wakapewa haki yao.
Donald Ngoma alikuwa mwenye bahati kwa kutoonyeshwa kadi nyekundu baada ya kumsukuma kabla ya kumkita kiungo Himid Mao kipindi cha pili.
Na refa alipuuza malalamiko ya Bocco kutemewa mate beki wa Yanga SC, Kevin Yondan licha ya kuuona uchafu huo kwenye uso wa Nahodha wa Azam FC.
Baada ya mchezo, beki Msenegali wa Azam FC, Racine Diouf alitaka kuzichapa na beki wa Yanga SC, Mwinyi Hajji Mngwali kabla ya kuamuliwa na wachezaji wenzao.
Michuano ya Kombe la Mapinduzi itaendelea kesho kwa mechi za Kundi A, JKU wakimenyana na Mafunzo na URA ya Uganda ikimenyana na mabingwa watetezi, Simba SC.
Kikosi cha Yanga SC kilikuwa; Deo Munishi ‘Dida’, Juma Abdul, Mwinyi Mngwali, Pato Ngonyani/Vincent Bossou dk62, Kevin Yondan, Mbuyu Twite, Simon Msuva, Thabani Kamusoko, Amissi Tambwe/Paul Nonga dk71, Donald Ngoma na Deus Kaseke/Malimi Busungu dk76.
Azam FC; Aishi Manula, Shomary Kapombe, Abdallah Kheri, Racine Diouf/David Mwantika dk90, Serge Wawa, Jean-Baptiste Mugiraneza, Ramadhani Singano ‘Messi’/Frank Domayo dk66, Himid Mao, John Bocco, Ame Ali ‘Zungu’/Mudathir Yahya dk46 na Kipre Tchetche/Didier Kavumbangu dk71.

MTIBWA YABISHA HODI NUSU FAINALI KOMBE LA MAPINDUZI

BAO pekee la mshambuliaji Said Rashid Bahanuzi, limetosha kuipa Mtibwa Sugar ushindi wa 1-0 dhidi ya Mafunzo katika mchezo wa Kundi B michuano ya Kombe la Mapinduzi, uliofanyika Uwanja wa Amaan, Zanzibar.

Bahanuzi ‘Spider Man’, mshambuliaji wa zamani wa Yanga SC, alifunga bao hilo dakika ya 12, akimalizia krosi ya kiungo hodari Ally Shomary.

Katika mchezo huo uliokuwa mkali na wa kusisimua, Mafunzo ilipoteza nafasi ya kupata bao la kusawazisha baada ya kipa wa Mtibwa Sugar, Hussein Sharif 'Casillas' kudaka krosi iliyopigwa na Haji Abdi katika dakika ya 24.

Mafunzo inapoteza mchezo wa pili sasa baada ya awali kufungwa 3-0 na Yanga SC na hivyo kupoteza matumaini ya kwenda Nusu Fainali, ikiziachia vita hiyo timu za Bara tupu, Azam, Mtibwa na Yanga SC.

Kwa ushindi wa leo, Mtibwa Sugar ya kocha Mecky Mexime anayesaidiwa na mchezaji mwenzake wa zamani wa timu hiyo ya Manungu, Turiani, Morogoro inafikisha pointi nne kuelekea mchezo wa mwisho dhidi ya Yanga SC Alhamisi baada ya sare ya 1-1 na Azam FC katika mchezo wa kwanza.

Mchezo wa pili wa kundi hilo leo, unafuatia sasa kati ya Yanga SC na Azam FC kuanzia Saa 2:15 usiku.
IMETOLEWA BLOGU YA BINZUBEIRY

MWESIGWA KUONGOZANA NA SAMATTA KUFUATA TUZO YA CAF

Katibu Mkuu wa Shirikisho la Mpira wa Miguu Tanzania (TFF), Mwesigwa Selestine kesho Jumatano anatarajiwa kuongozana na mshambuliaji wa timu ya Taifa ya Tanzania na klabu ya TP Mazembe ya Congo DR, Mbwana Samatta kuelekea nchini Nigeria kwenye sherehe za utoaji wa tuzo kwa wachezaji bora barania Afrika.

Mwesigwa anatarajiwa kuondoka na Samatta kuelekea Nigeria katika mji wa Abuja ambapo sherehe za utoaji tuzo hizo zitafayika  Alhamisi Januari 7, ambapo siku ya sherehe hizo Katibu Mkuu ataambatana na Ofisa ubalozi wa Tanzania nchini Nigeria

Mbwana Samatta anawania tuzo ya mchezaji bora wa Afrika kwa wachezaji wa ndani, huku pia akiwa mfungaji bora wa michuano ya Ligi ya Mabingwa (CAF CL) baada ya kuifungia klabu yake ya TP Mazembe mabao 8 na kuibuka mabingwa wapya wa michuano hiyo.

Rais wa Shirikisho la Mpira wa Miguu Tanzania (TFF), Jamal Malinzi amemtakia kila la kheri Mbwana Samatta katika kinyanganyiro hicho cha uchezaji bora na kusema kwa niaba ya watanzania wote wanamuombea dua njema aweze kuibuka mchezaji bora wa Afrika kwa wachezaji wa ndani.

Samatta anawania tuzo ya mchezaji bora wa Afrika pamoja na mlinda mlango wa TP Mazembe, Robert Kidiaba (Congo DR) na mshambuliaji wa Etoile du Sahel Baghdad Boundjah (Algeria).

SIMBA YAKABWA KOO NA JAMHURI KOMBE LA MAPINDUZI

MABINGWA watetezi, Simba SC wameanza kwa sare ya 2-2 na Jamhuri ya Pemba katika mchezo wa Kundi A, Kombe la Mapinduzi usiku wa Jumatatu Uwanja wa Amaan, Zanzibar.
  Matokeo hayo yanaiweka Simba SC katika nafasi ngumu kidogo kusonga Nusu Fainali ya michuano hiyo, kufuatia URA ya Uganda kuanza na ushindi wa 3-1 dhidi ya JKU ya Zanzibar katika mchezo uliotangulia siku hiyo.
  Mabao ya Simba SC yamefungwa na kiungo Mzanzibari, Awadh Juma Issa moja kila kipindi, wakati ya Jamhuri yamefungwa na Mwalim Mohammed na Ammy Khamis.
  Awadh alianza kuwafungia Simba SC dakika ya 12, baada ya kuwatoka mabeki wa Jamhuri na kuachia shuti la mbali lililomshinda kipa na kuingia moja kwa moja nyavuni.
  Mwalim Mohammed akawasawazishia wababe wa Pemba dakika ya 15, baada ya kuwatoka mabeki wa Simba na kupiga shuti lilomshinda kipa Peter Manyika.
  Ammy Mohammed akaisawazishia Jamhuri dakika ya 53 kabla ya Awadh Juma kuifungia Simba SC bao la pili baada ya kutokea piga nikupige langoni mwa JKU.
IMETOLEWA BLOGU YA BINZUBEIRY

AZAM, MTIBWA ZATOKA SARE KOMBE LA MAPINDUZI

TIMU za Mtibwa Sugar na Azam FC zimegawana pointi katika mchezo wa Kundi B wa Kombe la Mapinduzi baada ya kutoka sare ya bao 1-1 usiku wa Jumapili, kwenye Uwanja wa Amaan, Zanzibar.

Matokeo hayo yanazifanya timu hizo za Tanzania Bara zifungane kwa kila kitu, nyuma ya Yanga SC yenye pointi tatu na mabao matatu, wakati Mafunzo inashika mkia ikiwa haina pointi.

Mtibwa Sugar walianza kupata bao kupitia kwa mshambuliaji Hussein Javu anayecheza kwa mkopo kutoka Yanga SC.

Azam FC walisawazisha kupitia kwa nahodha wake, John Bocco kwa penalti, ambaye yeye mwenyewe alichezewa rafu ndani ya boksi.