TAIFA STARS, BURUNDI KUCHEZA APRILI 26

Timu ya Taifa ya Tanzania (Taifa Stars) itacheza mechi ya kirafiki na Burundi (Intamba Mu Rugamba) Aprili 26 mwaka huu ikiwa ni sehemu ya maadhimisho ya miaka 50 ya muungano wa Tanganyika na Zanzibar.

Taifa Stars inayodhaminiwa na Kilimanjaro Premium Lager tayari ipo kambini Tukuyu mkoani Mbeya ikijiandaa kwa ajili ya mechi hiyo ikiwa na wachezaji waliopatikana katika programu maalumu ya kusaka vipaji.

Baadaye wachezaji wengine wa Taifa Stars ambao wapo nje ya programu ya kusaka vipaji wataungana na wenzao kabla ya kutengeneza kikosi cha mwisho kitakachoivaa Burundi.
Mechi hiyo itakayofanyika Uwanja wa Taifa, Dar es Salaam itachezeshwa na waamuzi wanaotambuliwa na Shirikisho la Kimataifa la Mpira wa Miguu (FIFA) kutoka nchini Kenya.

21 KUCHEZA RCL

Timu 21 kati ya 27 zitakazocheza Ligi ya Mabingwa wa Mikoa (RCL) kutafuta tiketi ya kucheza Ligi Daraja la Kwanza (FDL) msimu ujao tayari zimejulikana.

Timu hizo ni Abajalo SC (Dar es Salaam), AFC (Arusha), African Sports (Tanga), Bulyanhulu FC (Shinyanga), Geita Veterans (Geita), JKT Mafinga (Iringa), JKT Rwamukoma (Mara), Kariakoo SC (Lindi), Kiluvya United (Pwani), Milambo SC (Tabora) na Mshikamano FC (Dar es Salaam).

Nyingine ni Mvuvumwa FC (Kigoma), Navy SC (Dar es Salaam), Njombe Mji (Njombe), Pachoto Shooting Stars (Mtwara), Panone FC (Kilimanjaro), Singida United (Singida), Tanzanite (Manyara), Town Small Boys (Ruvuma), Ujenzi FC (Rukwa) na Volcano (Morogoro).

WATANO WAFANYA MTIHANI WA UWAKALA WA WACHEZAJI
Watanzania watano wamefanya mtihani wa uwakala wa wachezaji wa Shirikisho la Kimataifa la Mpira wa Miguu (FIFA) ambao ulifanyika jana (Aprili 3 mwaka huu) duniani kote.

Watahiniwa katika mtihani huo ambao ulikuwa na maswali kutoka FIFA na Shirikisho la Mpira wa Miguu Tanzania (TFF) walikuwa Godlisten Anderson, Jesse Koka, Lutfi Binkleb, Rwechungura Mutahaba na Silla Yalonde.

NAVY SC, ABAJALO, MSHIKAMANO KUIWAKILISHA DAR LIGI YA MABINGWA WA MIKOA

CHAMA Cha Mpira wa Miguu Mkoa wa Dar es Salaam (DRFA), kimetangaza timu tatu zilizofanikiwa kucheza Ligi ya Mabingwa wa Mikoa baada ya kufanya vizuri katika Ligi Daraja la Pili Mkoa wa Dar es Salaam iliyomalizika Jumapili iliyopita.

Ofisa Habari wa DRFA Mohamed Mharizo amesema timu hizo ni Navy SC ya Temeke iliyokua vinara baada ya kujizolea pointi 34 ikifuatiwa na Abajalo ya Sinza iliyojikusanyia pointi 31 na Mshikamano ya Temeke iliyokua na pointi 30.

“Ligi yetu naweza kusema ilikua bora nay a ushindani kwa sababu tulianza raundi ya kwanza tukiwa na timu 32 na baadae zikabaki timu 16 ambazo katika hizo tatu ndio zimefanikiwa kuwakilisha mkoa wetu wa Dar es Salaam katika Ligi ya Mabingwa wa mikoa inayotarajia kuanza Aprili 20 mwaka huu.

“Kwa niaba ya uongozi wa DRFA, tunazipongeza timu hizi na tunaamini kwa dhati kabisa kuwa zitatuwakilisha vyema katika Ligi ya Mabingwa wa mikoa na hatimaye kufuzu kucheza Ligi Daraja la Kwanza,” alisema Mharizo.

Imetolewa Aprili 4, 2014
Mohamed Mharizo
Ofisa Habari
Chama cha Mpira wa Miguu Mkoa wa Dar es Salaam (DRFA).

KOCHA AZAM ATAMBA UBINGWA NI WAO

KOCHA Mkuu wa Azam FC, Joseph Marius Omog amewataka wachezaji wake kutobweteka kwa ushindi wa jana dhidi ya Simba SC, kwani vita ya ubingwa bado ni kali na Mbeya City na Yanga SC nao pia wote wana nafasi ya kubeba taji.

Azam FC jana iliifunga Simba SC mabao 2-1 Uwanja wa Taifa, Dar es Salaam na kufikisha pointi 53 baada ya kucheza mechi 23 mbele ya Yanga SC yenye pointi 46 za mechi 22 na Mbeya City yenye pointi 45 za mechi 23.

Omog ambaye ni raia wa Cameroon amewataka wachezaji wake kuendelea kupambana kuhakikisha wanashinda mechi zote zilizosalia kama wanataka kusherehekea ubingwa. “Hakuna mechi nyepesi katika hatua hizi, hata timu inayotaka kushuka daraja inaweza kukufunga, lazima tutilie mkazo mechi zote,”alisema Omog.

Kocha huyo wa zamani wa timu ya taifa ya Cameroon amewapongeza wachezaji wake kwa ushindi wa jana katika mchezo mgumu na akawataka sasa kuhamishia fikra zao katika mchezo ujao dhidi ya Ruvu Shooting Aprili 6, Uwanja wa Mabatini, Mlandizi mkoani Pwani.

Ikitoka Mlandizi, Azam FC itakwenda Mbeya kucheza na Mbeya City Aprili 13 Uwanja wa Sokoine kabla ya kumalizia Ligi Kuu msimu huu kwa kumenyana na JKT Ruvu Aprili 19, Uwanja wa Azam Complex, Chamazi, Dar es Salaam.

YANGA YAKANA KUWATIMUA KASEJA, CHUJI NA YONDANI

Young Africans itashuka dimbani siku ya jumapili kucheza na JKT Ruvu katika muendelezo wa michezo ya Ligi Kuu ya Vodacom Tanzania bara mzunguko wa pili raundi ya 23 mchezo utakaofanyika katika dimba la Uwanja wa Taifa jijini Dar es salaam.


Ligi Kuu ya Vodacom inaelekea ukingoni na sasa kila timu ikijitahid kufanya vizuri ili kuweza kujiweka katika mazingira mazuri aidha ya kubakia Ligi Kuu, kupata Ubingwa au kujinusuru kutoshuka daraja.

Young Africans yenye pointi 46 imebakisha michezo minne ambapo ikiweza kushinda yote itafikisha pointi 58 ambazo zinaweza kupitwa na vinara wa Ligi Kuu ya Vodacom Azam FC peke kama itashinda michezo yake yote miatatu iliyosalia.

Baada ya kupoteza mchezo wake dhidi ya Mgambo JKT mwishoni mwa wiki jijini Tanga, Kikosi cha mhoalanzi Hans Van der Pluijm kimeingia kambini jana jioni katika Hoteli ya Kiromo huku kikiendelea kufanya mazoezi katika Uwanja wa Boko Beach Veterani.

Mlinda mlango Deoragtias Munish "Dida" aliyekua majeruhi kwa takribani wiki mbili kwa sasa ameshapona majeraha aliyokuanayo na ameungana na wenzake kambini tayari kwa maandalizi ya mchezo huo wa siku ya jumapili.

Katika mchezo wa awali wa mzunguko wa kwanza timu hizi zilipokutana, Young Africans iliibuka na ushindi wa mabao 4-0

Aidha taarifa zinazosambazwa na baadhi ya vyombo vya kawamba wachezaji Athuman Idd, Kelvin Yondani na Juma Kaseja wamesimamishwa kutokana na timu kufungwa mchezo dhidi ya Mgambo JKT hazina ukweli, wachezaji hao hawajafukuzwa na wapo wanaendelea na mazoezi pamoja na wenzao.

Tunaomba vyombo vya habari kuwa wanatoa taarifa za ukweli na sio kupotosha jamii na mwisho wa siku kuwapa usumbufu viongozi kufanya kazi ya kukanusha.

KAPOMBE AANZA KUFANYA MAZOEZI NA AZAM

Mshambuliaji Shomari Kapombe amejiunga rasmi na klabu ya Azam FC na kufanya nayo
mazoezi ili kujiweka fiti kwa wakati huu, ambao hana timu baada ya kugoma kurejea klabu
yake ya Daraja la Nne Ufaransa, AS Cannes.

Tovuti ya Azam FC imemnkukuu Kapombe akisema kwamba ameamua kuja kufanya
Azam FC kwa sababu kwanza ni jirani na eneo analoishi na pia wana vifaa vyote vya vya
mazoezi vitakavyosaidia kumuweka fiti.

Hata hivyo, Kapombe hakutaka kuzama ndani juu ya mustakabali wake wa baadaye,
akisema; “Nimekuja Azam kufanya mazoezi kujiweka fiti tu, basi,”alisema.

Tayari kuna habari kwamba, Kapombe anataka kucheza klabu ya Tanzania ambayo
itashiriki michuano ya Afrika mwakani.

Kiungo huyo anayeweza kucheza nafasi za ulinzi pia, anamaliza Mkataba wake Simba
SC mwezi huu, lakini alikwishaingia Mkataba wa miaka minne na AS Cannes ya
Ufaransa mwaka jana.

Na Simba SC imekubaliana na klabu ya Daraja la Nne Ufaransa, kuununua Mkataba wa
mchezaji huyo arejee kufanya kazi Msimbazi baada ya kushindwa kuendelea kucheza
Ulaya.

Mwenyekiti wa Kamati ya Usajili ya Simba SC, Zacharia Hans Poppe alizungumza na
AS Cannes mwezi uliopita na kufikia makubaliano ya kuuziana Mkataba huo, ili
Kapombe arejee Msikmbazi.

Poppe alisema kwamba Simba SC imekubali kuilipa Cannes kiasi cha Euro 33, 000
ambazo sawa na Sh. Milioni 66 ili kurejeshewa mchezaji wake huyo.

Kapombe alitolewa bure kwenda AS Cannes katikati ya mwaka jana akiwa bado ana
Mkataba na klabu hiyo ya Msimbazi, unaomalizika Aprili mwaka huu.

Baada ya kuwa Ufaransa kwa zaidi ya miezi mitatu, Kapombe alirejea nchini Novemba
mwaka jana kwa ruhusa maalum ya kuja kuichezea timu ya taifa katika mchezo wa
kirafiki dhidi ya Zimbabwe.

Baada ya mchezo huo, mchezaji huyo akaamua kubaki moja kwa moja nyumbani akidai
halipwi mishahara.

IMETOLEWA KUTOKA BLOGU YA BIN ZUBEIRY

VYAMA KUMI VYA MIKOA VYATUMA WAWAKILISHI WAKE RCL

Vyama kumi vya mpira wa miguu vya mikoa vimewasilisha majina ya mabingwa wao
watakaoshiriki Ligi ya Mabingwa wa Mikoa (RCL).

Mabingwa hao ni Arusha (AFC), Kilimanjaro (Panone FC), Lindi (Kariakoo SC),
Manyara (Tanzanite SC), Mara (JKT Rwamukoma), Morogoro (Volcano FC), Mtwara
(Pachoto Shooting Stars), Pwani (Kiluvya United), Shinyanga (Bulyanhulu FC), Singida
(Singida United) na Tanga (African Sports).

Mikoa ambayo haijawasilisha mabingwa wake ni Dar es Salaam, Dodoma, Geita, Iringa,
Kagera, Katavi, Kigoma, Mbeya, Morogoro, Njombe, Rukwa, Ruvuma, Simiyu na
Tabora wakati mikoa ya Dodoma na Mwanza imeomba kuongezewa muda kutokana na
sababu mbalimbali.

Kamati ya Mashindano ya Shirikisho la Mpira wa Miguu Tanzania (TFF) iliagiza kuwa
mikoa yote iwe imemaliza ligi na kuwasilisha jina la bingwa wake Machi 30 mwaka huu.

WACHEZAJI NGORONGORO HEROES WAAHIDI USHINDI

Nahodha wa timu ya Taifa ya vijana wenye umri chini ya miaka 20 (Ngorongoro Heroes), Aishi Manula amesema wamejipanga kwa ajili ya kupata ushindi kwenye mechi dhidi ya Kenya itakayochezwa Jumapili (Aprili 6 mwaka huu) katika mji wa Machakos.

Akizungumza leo (Aprili 2 mwaka huu) kwenye hafla ya kukabidhiwa bendera kwa timu hiyo kwenye ofisi za Shirikisho la Mpira wa Miguu Tanzania (TFF), Manula ambaye pia anaidakia timu ya Azam alisema lengo lao ni kufanya vizuri kwenye mechi hiyo.

Naye Mkurugenzi Msaidizi wa Maendeleo ya Michezo, Wizara ya Habari, Vijana, Utamaduni na Michezo, Juliana Yasoda akikabidhi bendera hiyo, aliwataka wachezaji hao kujituma na kutanguliza uzalendo mbele bila kusahau kuwa mchezo wa mpira wa miguu ni ushirikiano.

Alisema Tanzania ina wachezaji wengi wenye vipaji, hivyo waliopata fursa ya kuwemo Ngorongoro Heroes wakati huu wajue kuwa wamepata bahati, na wanatakiwa kufahamu kuwa wao ni wawakilishi wa Tanzania, na Watanzania wana kiu ya kusikia matokeo ya mechi hiyo.

Ngorongoro Heroes inayofundishwa na John Simkoko inaondoka kesho (Aprili 3 mwaka huu) saa 4.30 asubuhi kwa ndege ya Kenya Airways, na mara baada ya kuwasili itakwenda moja kwa moja kwenye hoteli ya Garden iliyopo Machakos ambayo ndiyo imepangiwa kufikia na Shirikisho la Mpira wa Miguu Kenya (FKF).

Wachezaji waliopo kwenye msafara huo unaoongozwa na mjumbe wa Kamati ya Utendaji ya TFF), Ayoub Nyenzi ni Abrahman Mohamed, Aishi Manula, Ally Idd, Ally Mwale, Athanas Mdamu, Ayoub Semtawa, Bryson Raphael na Edward Manyama.

Wengine ni Gadiel Michael, Hamad Juma, Hassan Mbande, Ibrahim Ahmada, Idd Ally, Kelvin Friday, Michael Mpesa, Mohamed Ibrahim, Mudhathir Yahya, Pato Ngonyani, Peter Manyika na Salum Mineli.

TIMU YA WATOTO WA MTAANI YACHACHAFYA BRAZIL

Timu ya Watoto wa Mitaani ya Tanzania kutoka Kituo cha Mwanza inaendelea vizuri katika mashindano ya Kombe la Dunia kwa Watoto wa Mitaani yanayoendelea Rio de Janeiro nchini Brazil ambapo katika mchezo wake wa kwanza ilitoka sare ya mabao 2-2 na Burundi.

Juzi (Machi 31 mwaka huu), timu hiyo inayoongozwa na mjumbe wa Mkutano Mkuu wa Shirikisho la Mpira wa Miguu Tanzania (TFF) kutoka Mkoa wa Mwanza, John Kadutu ilicheza mechi mbili. Katika mechi ya kwanza iliifunga Argentina mabao 3-0 na baadaye ikailaza Nicaragua mabao 2-0.

Michuano hiyo ya siku kumi inashirikisha timu kumi. Mbali ya Tanzania, nyingine ni Argentina, Burundi, India, Kenya, Liberia, Marekani, Mauritius, Misri na Pakistan. Kwa wasichana ni Afrika Kusini, Brazil, El Salvador, Indonesia, Msumbiji, Nicaragua, Philippines, Uingereza na Zimbabwe.

SIMBA, AZAM ZAINGIZA MIL 26/-

Mechi ya Ligi Kuu ya Vodacom (VPL) kati ya Azam na Simba iliyochezwa jana (Machi 30 mwaka huu) Uwanja wa Taifa jijini Dar es Salaam imeingiza sh. 26,455,000.

Watazamaji 4,741 walikata tiketi kushuhudia pambano hilo ambapo Azam iliibuka na ushindi wa mabao 2-1. Viingilio vilikuwa sh. 5,000, sh. 15,000 na sh. 20,000.

Mgawanyo kwa mapato ulikuwa Kodi ya Ongezeko la Thamani (VAT) sh. 4,035,508.47, gharama za kuchapa tiketi sh. 3,908,686 wakati kila klabu ilipata sh. 5,460,687.63.

Uwanja sh. 2,776,620.83, gharama za mechi sh. 1,665,972.50, Bodi ya Ligi sh. 1,665,972.50, Mfuko wa Maendeleo ya Mpira wa Miguu (FDF) sh. 832,986.25 na Chama cha Mpira wa Miguu Mkoa wa Dar es Salaam (DRFA) sh. 647,878.19.

TFF YATUMA RAMBIRAMBI MSIBA WA DK MZIRAY

SHIRIKISHO la Mpira wa Miguu Tanzania (TFF) limepokea kwa masikitiko kifo cha daktari wa tiba ya michezo, Dk. Hemed Mziray kilichotokea juzi jijini Dar es Salaam.

Dk. Mziray ambaye alikuwa mfanyakazi wa Hospitali ya Manispaa ya Temeke na mjumbe wa Kamati ya Utendaji ya Chama cha Tiba ya Michezo Tanzania (TASMA) amesafirishwa kwenda kwao mkoani Kilimanjaro kwa ajili ya mazishi.

Msiba huo ni mkubwa katika fani ya mpira wa miguu kwani kwa nyakati tofauti Dk. Mziray ameshirikiana na TFF na wadau wengine wa mpira wa miguu katika masuala ya tiba na uongozi.

Alikuwa kiungo kati ya Uwanja wa Taifa ambapo mechi za kimataifa, za ligi na za kirafiki zimekuwa zikichezwa na Hospitali ya Temeke kwa wagonjwa wanaohitaji huduma zaidi, hivyo mchango wake tutaukumbuka daima.

TFF tunatoa pole kwa familia ya marehemu Dk. Mziray, TASMA na wafanyakazi wa Hospitali ya Temeke na kuwataka kuwa na subira na uvumilivu katika kipindi hiki kigumu cha msiba huo mzito. Pia TFF inatoa ubani wa sh. 200,000 kwa familia ya marehemu kama rambirambi zake.

Bwana alitoa, Bwana ametwaa jina lake lihimidiwe. Amina

WANACHAMA TFF KUANDALIWA KATIBA ZA MFANO

Kamati ya Sheria na Hadhi za Wachezaji ya TFF imekutana Machi 30 mwaka huu kujadili utekelezaji wa maagizo ya TFF kwa wanachama wake kurekebisha Katiba zao ili ziendane na Katiba ya TFF pamoja na ile ya FIFA kabla ya Machi 30 mwaka huu.

Vyama vya mikoa Lindi na Dar es Salaam na Chama cha Mpira wa Miguu cha Wanawake (TWFA) viliomba kuongezewa muda wakati vingine vimeomba Katiba mama kama angalizo lao la mabadiliko hayo. Klabu ya Simba Sports ndiye mwanachama pekee aliyewasilisha mabadiliko ya Katiba. TFF inawapongeza viongozi na wanachama wa klabu hiyo kwa kufanya mkutano wao kwa utulivu.

Kamati itatangaza nyongeza ya muda wa kufanya mabadiliko hayo baada ya kuviandalia vyama vya mikoa na vyama shiriki katiba mfano kwa ajili ya kurahisisha shughuli hiyo.

Baada ya kupitia uamuzi wa wanachama wa Simba S.C. Kamati ya Sheria na Hadhi za Wachezaji imeamua ifuatavyo:

(i) Kwa kuwa pendekezo la wanachama wa Simba kubadili kipengele na 26 kuhusu sifa za mgombea kinapingana na kipengele na 29 (4) cha Katiba ya TFF, hivyo basi Kamati imeagiza kipengele cha Katiba ya Simba kibaki vilevile bila kubadilishwa.

(ii) Vipengele vingine vyote vimepitishwa na vitapelekwa kwa Msajili wa Klabu na Vyama vya Michezo kwa ajili ya kusajiliwa.

(iii) Mchakato wa uchaguzi wa Klabu ya Simba uendelee kama ulivyopangwa wakizingatia uamuzi huu wa Kamati. TFF inaitakia Klabu ya Simba uchaguzi mwema.

Pia Kamati ya Sheria na Hadhi za Wachezaji imeshauri TFF kuwasiliana na FIFA kupata mwongozo kuhusu katazo la watu wenye rekodi ya kifungo kugombea.

TFF imepokea ushauri huo na itaufanyia kazi na kama kuna mabadiliko yoyote kiutaratibu yataanzia katika Katiba ya TFF kupitia Mkutano Mkuu.

KOMBE LA NSSF LAANZA KWA KISHINDO

 Mgeni rasmi, Waziri wa Kazi na Ajira, Gaudencia Kabaka akisalimiana na wachezaji wa Azam TV

 Waziri wa Kazi na Ajira, Gaudencia Kabaka akirusha mpira kimiani wakati alipokuwa akifungua michuano ya netiboli.

 Waziri Kabaka akisalimiana na mwamuzi, Hassan Isihaka aliyechezesha mechi ya soka kati ya Habari Zanzibar na New Habari

Waziri wa Kazi na Ajira, Gaudencia Kabaka akisalimiana na wachezaji wa Habari Zanzibar
HABARI Zanzibar jana ilianza vyema michuano ya soka ya Kombe la Shirika la Taifa la Hifadhi ya Jamii (NSSF), baada ya kuibugiza New Habari mabao 4-1 katika mechi iliyochezwa kwenye uwanja wa klabu ya Sigara, Chang'ombe, Dar es Salaam.

Mabao ya Habari Zanzibar yalifungwa na Yussuf Chuma aliyefunga matatu bna Amir Suleiman wakati bao la kujifariji la New Habari lilifungwa na Florian Masinde.

Katika netiboli, Jambo Leo ilianza michuano hiyo kwa kishindo baada ya kuibugiza Wizara ya Habari mabao 60-8 wakati Azam TV iliicharaza TSN mabao 18-13.

Michuano hiyo ilifunguliwa na Waziri wa Kazi na Ajira, Gaudencia Kabaka, ambaye alivitaka vyombo vya habari kuitumia kujenga ushirikiano na kuimarisha umoja miongoni mwao.

Waziri Kabaka pia alivitaka vyombo hivyo vya habari kuepuka kuwatumia wachezaji wasio waajiriwa kwa sababu kufanya hivyo ni kuondosha maana ya mashindano hayo.

SIMBA, YANGA ZACHEZEA VICHAPO LIGI KUU

MABINGWA watetezi wa ligi kuu ya soka ya Tanzania Bara, Yanga na watani wao wa jadi, Simba jana walichezea vichapo kutoka kwa timu za Mgambo JKT na Azam.


Wakati Yanga ilichapwa mabao 2-1 na Mgambo kwenye Uwanja wa Mkwakwani mjini Tanga, watani wao Simba walichezea kichapo hicho kutoka kwa Azam kwenye Uwanja wa Taifa, Dar es Salaam.

Matokeo hayo yaliiwezesha Azam kuzidi kujichimbia kileleni mwa ligi hiyo, ikiwa na pointi 53 baada ya kucheza mechi 22 wakati Yanga inaendelea kushika nafasi ya pili ikiwa na pointi 46.

Mabao ya Azam yalifungwa na Khamis Mcha na John Bocco dakika ya 16 na 56 wakati bao la Simba lilifungwa na Uhuru Selemani dakika ya 45.

Kwa upande wa Yanga, kipigo ilichokipata kimefifisha matumaini ya timu hiyo kutetea taji hilo msimu huu.

Iliwachukua Mgambo dakika moja kuhesabu bao la kwanza lililofungwa na Full Maganga kwa shuti la mbali lililomshinda kipa Juma Kaseja.

Bao la kusawazisha la Yanga lilifungwa kwa njia ya penalti na nahodha Nadir Haroub 'Cannavaro dakika ya 52 baada ya beki mmoja wa Mgambo kuunawa mpira ndani ya eneo la hatari.

Mgambo iliongeza bao la pili dakika ya 63 lililofungwa na Malima Busungu kwa njia ya penalti baada ya kukwatuliwa na beki mmoja wa Yanga ndani ya eneo la hatari.

YANGA YAUA, AZAM YASONGA MBELE

MABINGWA watetezi wa ligi kuu ya soka ya Tanzania Bara, Yanga jana waliendelea kuitimulia vumbi Azam baada ya kuichapa Prisons mabao 5-0 katika mechi iliyochezwa kwenye Uwanja wa Taifa, Dar es Salaam.

Ushindi huo mnono uliiwezesha Yanga kuendelea kushika nafasi ya pili katika msimamo wa ligi hiyo, ikiwa na pointi 46 baada ya kucheza mechi 21 huku ikiwa na mchezo mmoja mkononi.

Azam, ambayo jana iliibuka na ushindi wa mabao 2-0 dhidi ya Mgambo JKT kwenye Uwanja wa Mkwakwani, Tanga, bado inaongoza ligi hiyo ikiwa na pointi 50 baada ya kucheza mechi 22.

Yanga ilihesabu bao la kwanza dakika ya 21 lililofungwa na Emmanuel Okwi kwa mpira wa adhabu ya moja kwa moja, ambao kipa Beno Kakolanya wa Prisons hakuweza kuuona.

Prisons ilipata nafasi nzuri ya kusawazisha dakika ya 43 baada ya beki Oscar Joshua wa Yanga kumwangusha Frank Hau ndani ya eneo la hatari na mwamuzi Andrew Shamba kutoka Pwani kuamuru ipigwe penalti. Hata hivyo, shuti la Lugano Mwangama lilitoka nje ya lango.

Dakika tano baadaye, Mrisho Ngasa aliiongezea Yanga bao la pili baada ya kuunganisha wavuni krosi maridhawa kutoka kwa Hussein Javu, aliyeingia kuchukua nafasi ya Jerry Tegete.

Katika dakika ya 44, lango la Prisons lilikuwa kwenye msukosuko mkali baada ya Yanga kufanya shambulizi zito, lakini shuti la Javu liligonga mwamba wa goli na mpira uliporudi uwanjani, uliokolewa na beki mmoja wa Prisons, ukamkuta Ngasa, ambaye shuti lake lilitolewa nje na kuwa kona.

Timu hizo zilikwenda mapumziko Yanga ikiwa mbele kwa mabao 2-0.

Bao la tatu la Yanga lilifungwa na Hamisi Kiiza dakika ya 67 baada ya kuuwahi mpira uliotemwa na kipa Beno wa Prisons, aliyepangua kiki kali ya Simon Msuva ambaye aligongeana vizuri na Hassan Dilunga.

Beki Nadir Haroub 'Cannavaro' aliiongezea Yanga bao la nne dakika ya 78 kwa

njia ya penalti, iliyotokana na Javu kuangushwa ndani ya eneo la hatari. Kiiza alihitimisha karamu ya mabao kwa kufunga bao la tano dakika ya 88 baada ya kupokea pasi kutoka kwa Javu.

Katika kipindi hicho cha pili, Prisons ilionekana kuzidiwa kila idara na kushindwa kufanya mashambulizi kama ilivyokuwa kipindi cha kwanza wakati Javu aliongeza kasi ya mashambulizi kwa Yanga na kushangiliwa na mashabiki kila alipogusa mpira.

Yanga: Juma Kaseja, Juma Abdul, Oscar Joshua, Nadir Haroub 'Cannavaro', Kelvin Yondan, Frank Domayo, Simon Msuva, Hassan Dilunga, Jerry Tegete/Hussein Javu, Mrisho Ngasa/Haruna Niyonzima, Emmanuel Okwi/Hamisi Kiiza.

Prisons: Beno Kakolanya, Salum Kimenya, Laurian Mpalile, Lugano Mwagama, Nurdin Chona, Jumanne Fadhil, Godfrey Mageta, Fred Chudu, Peter Michael, Frank Hau/Bryson Mponzi na Ibrahim Mamba/ Six Mwakasega.

Mwandishi Wetu ameripoti kutoka Tanga kuwa, Azam iliendelea kujikita kileleni mwa ligi hiyo baada ya kuichapa Mgambo JKT bao 1-0 kwenye Uwanja wa Mkwakwani mjini Tanga.

Bao la kwanza la Azam lilifungwa na mshambuliaji John Bocco dakika ya 60 kabla ya Brian Umony kuongeza la pili dakika ya 82.

OKWI AUZIMIA MUZIKI WA MBEYA CITY

Na Emmanuel Ndege
MSHAMBULIAJI nyota wa klabu ya Yanga, Emmanuel Okwi, amesema anakunwa na kiwango cha juu cha soka kinachoonyeshwa na timu ya Mbeya City katika michuano ya ligi kuu ya Tanzania Bara.

Akizungumza na Burudani makao makuu ya klabu hiyo, mitaa ya Twiga na Jangwani, Dar es Salaam juzi, Okwi alisema Mbeya City imeleta changamoto mpya katika ligi kuu msimu huu.

Okwi alisema timu hiyo yenye makao makuu yake mjini Mbeya, haijayumba kisoka tangu ligi kuu ilipoanza na wachezaji wake wanacheza kwa kujiamini na bila kukata tamaa.

"Iwapo wataendelea hivi msimu ujao, haitakuwa ajabu kwa Mbeya City kutwaa ubingwa,"alisema mshambuliaji huyo wa kimataifa wa Uganda.

Okwi amekiri kuwa, ligi ya msimu huu ni ngumu na yenye ushindani mkali na hakuna timu yenye uwezo wa kutangaza ubingwa mapema.

"Nimeichezea Simba kwa miaka zaidi ya miwili. Huko nyuma timu zilikuwa na uwezo wa kutangaza ubingwa zikiwa zimesalia mechi mbili au tatu, lakini msimu huu ni vigumu,"alisema Okwi.

"Yanga, Azam na Mbeya City kila moja ina uwezo wa kutwaa ubingwa, hali hii imesababisha kuwepo kwa ushindani mkali. Ni vigumu kutabiri bingwa mapema,"aliongeza.

Hata hivyo, Okwi alisema licha ya kuzidiwa kwa pointi na Azam, Yanga bado inayo nafasi kubwa ya kutwaa ubingwa wa ligi hiyo, iwapo wachezaji wake wataendelea kucheza kwa kujituma.

Alisema atahakikisha anasaidiana vyema na wachezaji wenzake kuiwakilisha vizuri timu hiyo ili itwae ubingwa na kupata nafasi nyingine ya kushiriki michuano ya klabu bingwa Afrika mwakani.

Akizungumzia jinamizi lililoikumba timu hiyo hivi karibuni la kupoteza penalti katika mechi muhimu, Okwi alisema, adhabu hiyo haina ufundi na kwamba mchezaji yeyote anaweza kupoteza.

"Penalti ni sawa na mchezo wa bahati nasibu, unaweza kupata au kukosa, hazina ufundi,"alisisitiza nyota huyo wa zamani wa Simba.

Wakati huo huo, klabu ya Yanga imesema, itakata rufani kwenye Mahakama ya Rufani Tanzania kupinga hukumu ya Makahama Kuu Divisheni ya Kazi ya kuitaka timu hiyo iwalipe wachezaji Wisdom Ndlovu na Stephen Marashi sh. milioni 106.

Katibu Mkuu wa Yanga, Ben Njovu, alisema mjini Dar es Salaam jana kuwa, wamepokea nakala ya hukumu ya kesi hiyo iliyofungiwa na wachezaji hao ya kupinga kukatishiwa mikataba yao.

KUMBE ZACK ORJI NI MWANAMUZIKI

LAGOS, Nigeria
WATU wengi wanamtambua Zack Amaefula Orjioke, kuwa ni mmoja wa wacheza filamu nyota na wakongwe nchini Nigeria.

Mkongwe huyo, ambaye ni maarufu zaidi kwa jina la Zack Orji, amecheza filamu nyingi na kujipatia sifa na umaarufu mkubwa kwa mashabiki wa fani hiyo nchini Nigeria.

Kumbe Zack anacho kipaji kingine cha ziada. Nacho ni muziki. Amepanga kuingia studio hivi karibuni na kurekodi wimbo wake wa kwanza.

Akihojiwa na gazeti la Sun la Nigeria wiki hii, Zack alisema ameamua kujitosa kwenye fani hiyo kwa vile anacho kipaji kingine cha ziada.

Kwa mujibu w a Zack, kibao chake hicho kinajulikana kwa jina la Cradles of Greatness, ambacho kinaelezea mambo mbalimbali kuhusu nchi yake ya Nigeria.

Katika moja ya beti za wimbo huo, Zack ameandika maneno yafuatayo:

"Oh Nigeria, nchi ya asili ya mababu zetu, tunajivunia asili yetu, tunakupenda. Japokuwa tunatofautiana katika makabila na lugha, bado tuko pamoja. Tunajivunia nchi ya asili yetu. Nchi yenye ndoto na nafasi nyingi. Alama ya umoja wetu. Nchi ya uhuru wetu."

EMEKA IKE AKANA KUTENGANA NA MKEWE

LAGOS, Nigeria
KATIKA siku za hivi karibuni, kumekuwepo na uvumi kwamba, mwigizaji Emeka Ike na mkewe, wamekuwa katika msuguano mkali uliosababisha watengane.

Kwa mujibu wa habari hizo, mke wa Emeka alidai talaka kutoka kwa mumewe kutokana na kuchoshwa na tabia za mwigizaji huyo.

Habari hizo ziliendelea kueleza kuwa, kutokana na ndoa ya wawili hao kuvunjika, Emeka aliamua kuwachukua watoto wao wawili na kwenda nao Abuja, akimuacha mkewe akibaki na watoto wengine wawili mjini Lagos.

Hata hivyo, Emeka amekanusha vikali habari hizo na kuziita kuwa ni za uzushi.

Emeka ameandika kwenye mtandao wa facebook wiki hii: " Huu ni uzushi."

Mbali na kuandika maneno hayo, Emeka aliweka picha aliyopiga pamoja na mkewe na watoto wao wanne.

DESMOND: SIWEZI KUACHA UIGIZAJI

LAGOS, Nigeria
KUMEKUWEPO na uvumi kwamba, mwigizaji na mtayarishaji mahiri wa filamu wa Nigeria, Desmond Elliot, anataka kuachana na fani hiyo ili ajitose kwenye siasa.

Baadhi ya mitandao ya kijamii na magazeti ya Nigeria, yaliripoti hivi karibuni kuwa, Elliot anataka kuipa kisogo fani hiyo ili aweze kupata muda wa kutosha katika masuala ya siasa.

Hata hivyo, mwigizaji huyo mwenye mvuto na mshindi wa tuzo za AMVCA, amekanusha taarifa hizo kwa kusema si sahihi.

Eliiot alisema wiki hii mjini hapa kuwa, ni kweli anataka kuwania nafasi ya kisiasa katika uchaguzi mkuu wa 2015, lakini hawezi kuacha uigizaji.

Msanii huyo, ambaye amekuwepo kwenye fani ya uigizaji kwa karibu miaka 12 sasa, alisema: "Siwezi kuacha uigizaji. Kama wamesema hivyo, siyo kweli. Sielewi wameyapata wapi maneno hayo."

STELLA AFUNGA AKAUNTI ZAKE ZOTE ZA FACEBOOK

LAGOS, Nigeria
MCHEZA filamu mwenye mvuto nchini Nigeria, Stella Damasus, ameamua kufunga akaunti zake za facebook kutokana na kuingiliwa na baadhi ya watu wenye dhamira mbaya.
Stella alisema wiki hii mjini hapa kuwa, baadhi ya watu wamekuwa wakitumia akaunti zake hizo kuwalaghai mashabiki wake na kujipatia pesa kwa njia ya udanganyifu.
Uamuzi huo wa Stella, umekuja siku chache baada ya mcheza filamu mwingine nyota wa Ghana, Yvonne Nelson, kuwataka wamiliki wa mtandao wa Twitter kuwadhibiti watu wanaoingilia akaunti yake.
"Napenda kuwafahamisha kwamba, kuanzia leo nafunga akaunti zangu zote za facebok. Ninamaanisha hivyo. Tafadhali sambaza ujumbe huu na kuwaeleza marafiki kwamba, baada ya leo, yeyote atakayejiita Stella Damasus kwenye facebook, siye mimi.
"Nataka kujilinda na kujiweka kwenye mtazamo bora, hasa baada ya baadhi ya matapeli kuanza kutumia akaunti zangu kukusanya pesa kutoka kwa watu wasiokuwa na hatia, ambao wanataka kujitosa kwenye fani ya uigizaji. Ni bora nipoteze akaunti zangu za facebook kuliko kuwaacha watu wafikirie kwamba naweza kufanya kitu kama hicho. Nawapenda na Mungu awabariki," ameeleza Stella.