RAGE: WANANIOGOPA

SIKU moja baada ya Kamati ya Utendaji ya klabu ya Simba, kumsimamisha Mwenyekiti wake, Ismail Rage, mwenyekiti huyo amesema hautambui uamuzi huo.

Katika taarifa yake, aliyoitoa jana kwa njia ya mtandao, Rage alisema
kamati ya utendaji haina mamlaka ya kumsimamisha kwa kuwa haikufuta utaratibu.

Rage alisema tuhuma na uamuzi uliotolewa na wajumbe wa kamati hiyo, hauna mashiko na kuongeza kuwa, atazungumzia suala hilo kwa kina baada ya kurejea nchini kesho akitokea Sudan.

Aliongeza kuwa, iwapo kamati ya utendaji ya Simba haikuwa na imani naye kama ilivyodai, ilipaswa kumjadili katika vikao vingine vilivyofanyika akiwa hapa nchini..

Rage alisema anashangaa kuona kamati hiyo imepitisha uamuzi huo wakati akiwa hayupo nchini na kuhoji kwanini isitoe uamuzi huo akiwa ndani ya kikao hicho.

"Awali, wanachama wapatao 700 walitangaza kunipindua na wakatoa sababu lukuki, lakini sikuondoka, hivyo hata uamuzi wa sasa wa kamati hiyo hauna maana, wanahitaji kujipanga upya," alisema Rage.

Alisema anasubiri kupata barua ya uamuzi huo kutoka kwa kamati hiyo kabla ya kuzungumza na kujua hatma ya uamuzi huo, ambao amesisitiza kuwa, hawezi kuutambua.

Kamati ya Utendaji ya Simba, chini ya Kaimu Makamu Mwenyekiti, Joseph Itang'are 'Kinesi', ilitangaza kumsimamisha Rage kutokana na kukosa imani naye huku ikiwatupia virago Kocha Mkuu, Abdallah Kibadeni na msaidizi wake, Jamhuri Kihwelo 'Julio'

Kinesi aliwaambia waandishi wa habari juzi kuwa, uamuzi wa kumsimamisha Rage una lengo la kuboresha utendaji kazi ndani ya klabu hiyo kutokana na Rage kutoa maamuzi binafsi bila kuwashirikisha viongozi wenzake.

Alisema moja ya makubaliano aliyokiuka Rage ni kusimamisha mkutano mkuu wa marekebisho ya katiba, uliopangwa kufanyika mwezi huu huku akiyaagiza matawi kuendelea kutuma taarifa ya marekebisho ya katiba hiyo.

Alizitaja tuhuma zingine zilizosababisha Rage asimamishwe uongozi kuwa ni kuingia mkataba na Azam TV bila makubaliano na viongozi wenzake na kumuuza mshambuliaji Emmanuel Okwi kwa klabu ya Etoile Sahel ya Tunisia bila Simba kulipwa fedha.

Wakati huo huo, siku moja baada ya Kamati ya Utendaji ya Simba kumng'oa mwenyekiti wao, Ismail Rage kwa madai ya kukosa imani naye, klabu hiyo imewasilisha taarifa rasmi kwa Shirikisho la Soka Tanzania (TFF), kuhusu uamuzi huo.

Akizungumza na Uhuru kwa njia ya simu jana, Kaimu Katibu Mkuu wa TFF, Boniface Wambura, alisema barua hiyo waliipokea jana na itafikishwa kwenye kamati husika kwa kupitiwa kisha kutolewa uamuzi.

Kwa sasa TFF haina kamati hata moja baada ya kuvunjwa na Rais mpya, Jamal Malinzi, ambaye aliahidi kuunda zingine baada ya kuanza kazi kwenye taasisi hiyo.

Hata hivyo, Wambura aliahidi taarifa hizo za Simba zitajadiliwa na kamati husika ndani ya kipindi kifupi na kutolewa uamuzi kuhusu taratibu za kisheria zilizotumika 'kubariki' mapinduzi hayo ndani ya klabu hiyo.

"Si kwamba taarifa hizo tumesoma au kusikia kwenye vyombo vya habari bali, tunazo rasmi kwani tumeletewa barua inayoeleza kuhusu kusimamishwa Mwenyekiti wa Simba," alisema Wambura.

Katibu huyo alisema, binafsi hawezi kutoa ufafanuzi wowote kuhusu kilichofanywa na kamati ya utendaji ya Simba kwa kuwa kinyume na taratibu za utendaji za shirikisho hilo.

"Ni suala la kamati, ambazo zinafanya kazi kwa niaba ya kamati ya utendaji ya TFF," alifafanua Wambura.

Hatima ya Rage iko mikononi mwa Kamati ya Sheria, Katiba na Hadhi za Wachezaji za kurudishwa madarakani au kupigwa chini rasmi baada ya kuketi kujadili sakata hilo jipya katika klabu hiyo.

Mwenyekiti huyo kama atarudishwa madarakani itakuwa mara ya pili kuwashinda 'wana mapinduzi', kwani mapema mwaka huu wanachama wa Simba wapatao 700 waliokutana kwenye Hoteli ya Star Light jijini, Dar es Salaam, walimwengua katika uongozi na kupeleka taarifa hiyo TFF, lakini waligonga mwamba.

FULANA ZA MICHEZO ZAGEUZWA DILI DAR, ZINAONGOZA KWA KUUZWA NA KUVALIWA

KUANZIA mwanzoni mwa miaka ya 2000, biashara ya vifaa vya michezo imekuwa ikishamiri sana hapa nchini. Karibu sehemu kubwa ya maduka ya nguo yaliyotapakaa katika mitaa mbalimbali ya Jiji la Dar es Salaam, biashara yake kubwa ni kuuza vifaa vya michezo.

Vifaa vinavyouzwa kwa wingi kwenye maduka hayo ni seti za jezi, fulana, bukta, suti za michezo, mipira, soksi, raba na viatu vya kuchezea michezo ya aina mbalimbali.

Kwa mujibu wa utafiti uliofanywa na Burudani kwa wiki kadhaa, vifaa vyenye nembo za klabu za Simba na Yanga, ndivyo vinavyoongoza kwa kuuzwa kwa wingi kwenye maduka hayo ya vifaa vya michezo. Vifaa hivyo ni jezi, bukta, suti za michezo, soksi, kofia na skafu.

Kwa klabu za Ulaya, vifaa vinavyouzwa kwa wingi ni vya klabu za Barcelona na Real Madrid za Hispania, Manchester United, Arsenal, Chelsea, Liverpool, Sunderland na Manchester City za England, Inter Milan, AC Milan na Juventus za Italia.

Vifaa vingine vya michezo vinavyoongoza kwa kuuzwa kwa wingi ni jezi na suti za michezo za timu ya Taifa ya Tanzania, Taifa Stars, jezi za Brazil, Hispania, Cameroon, Nigeria, England na Hispania.

Ukitembelea sehemu mbalimbali za kazi, burudani na michezo, ni jambo la kawaida kumuona mtu mmoja ama kikundi cha watu, wakiwa wamevaa jezi ama fulana zenye nembo za klabu mbalimbali maarufu duniani, hasa Simba na Yanga.

Hata waheshimiwa wabunge, mawaziri, viongozi wa vyama vya siasa na watumishi wa serikali ni miongoni mwa watu wanaopenda kuvaa mavazi hayo, hasa wanapokuwa kwenye michezo, matamasha ya muziki ama kwenye shughuli zingine za baada ya kazi.

Mavazi hayo hushamiri zaidi siku timu kongwe za soka nchini, Simba na Yanga zinapokutana katika mechi za ligi ama zinapocheza dhidi ya timu nyingine na pia siku Taifa Stars, inapocheza mechi za kirafiki ama za kimataifa dhidi ya timu kutoka nje.

Katika siku za hivi karibuni, wamiliki wa baa nao wameyageuza mavazi hayo ya michezo kuwa sare za wahudumu wao. Mara nyingi zare hizo hununuliwa na wahudumu wenyewe kwa maelekezo ya mmiliki wa baa. Sare zinazopendwa zaidi na wahudumu ni fulana zenye nembo za Yanga na Arsenal.

Si kwamba wahudumu hao wanapenda kuvaa sare hizo kwa sababu ni mashabiki wa klabu hizo, la hasha. Ni kwa sababu ya rangi zake na uzuri wake. Ubora na kiwango cha fulana za Yanga na Arsenal kipo juu ikilinganishwa na fulana zingine.

Wakizungumzia kupendwa kwa sare hizo za michezo, baadhi ya wakazi wa Jiji la Dar es Salaam wamesema, kumetokana na ushabiki wa soka.

"Watu wanapenda kuvaa jezi za klabu mbalimbali kwa sababu ya ushabiki. Kwa mfano, mimi huwezi kunivisha fulana zenye nembo ya Manchester United ama Simba kwa sababu sio shabiki wa timu hizo," amesema Jumanne Gude, mkazi wa Buguruni, Dar es Salaam.

Issaya Katembo, mkazi wa Temeke-Mwembe Yanga, Dar es Salaam, anasema huwa anaona fahari kuvaa fulana yenye nembo ya Yanga kwa sababu ndiyo klabu anayoipenda na kuishabikia.

Kwa upande wake, Jamila Hassan, mkazi wa Magomeni, Dar es Salaam, anasema watu wengi wanapenda kuvaa fulana za michezo kwa sababu bei zake ni nafuu, ikilinganishwa na mashati ama fulana za kawaida.

"Kusema kweli, bei ya fulana za michezo ipo chini. Tatizo pekee ni kwamba, viwango vyake vinatofautiana. Zipo fulana za kiwango cha juu, cha kati na cha chini. Na hata bei zake zinatofautiana kwa sababu ya ubora," amesema Jamila.

Abbas Jamal, mkazi wa mtaa wa Mkunguni, Dar es Salaam amesema, anapenda zaidi kuvaa fulana za michezo badala ya mashati, kwa sababu zinafiti kwa suruali ya aina yoyote, hasa jeans.

Muhudumu wa baa ya Kisauni iliyoko Kiwalani, Dar es Salaam, Frida Kessy anasema, alipoanza kazi, alikuta wenzake wakiwa wanavaa fulana zenye nembo ya Yanga na Arsenal, hivyo naye hakuwa na budi kufanya hivyo.

"Mimi sio shabiki wa Yanga wala Arsenal, nalazimika kuvaa fulana hizi kwa sababu ndiyo sare ya wafanyakazi na tunalazimika kujinunulia wenyewe,"amesema.

Mkurugenzi wa Masoko wa duka la vifaa vya michezo la Isere Sports, lililoko mtaa wa Mchikichi, Dar es Salaam, Abbas Isere amekiri kuwa, biashara hiyo kwa sasa inalipa kutokana na kumwingizia fedha nyingi.

Abbas amesema katika duka lake hilo, amekuwa akiuza fulana za michezo zenye nembo za klabu mbalimbali maarufu duniani, lakini anazouza zaidi ni za timu za Barcelona, Real Madrid, Manchester United, Chelsea na Liverpool.

"Vifaa vyangu vyote ninavyouza hapa dukani ni orijino na vya kiwango cha juu ndio sababu bei zake zipo juu kidogo. Siuzi vifaa feki. Nauza vifaa orijino kwa lengo la kuimarisha biashara yangu na ninaviuza kwa bei ya jumla na rejareja," amesema Abbas.

Mkurugenzi huyo amesema pia kuwa, fulana za Simba na Yanga na zile zenye nembo na rangi ya Taifa Stars, ndizo zinazoongoza kwa mauzo, hasa timu hizo zinapofanya vizuri katika michuano ya ligi na kimataifa.

Ameongeza kuwa, amekuwa akiuza jezi kwa bei ya sh. 500,000 kwa seti moja na kuongeza kuwa, bei ya fulana ni kati ya sh. 20,000 na sh. 15,000 kwa kutegemea ubora wake.

"Kwa sasa nataka nifungue duka lingine la vifaa vya michezo Dodoma baada ya kupokea maombi kutoka kwa baadhi ya wabunge. Natarajia kufanya hivyo hivi karibuni,"amesema Abbas.

RAGE OUT SIMBA, KIBADENI, JULIO NAO WATUPIWA VIRAGO

KAMATI ya Utendaji ya Simba imemsimamisha mwenyekiti wa klabu hiyo Ismail Aden Rage kutokana na kukosa imani naye na kuwatupia virago Kocha Mkuu Abdallah Kibadeni na msaidizi wake Jamhuri Kihwelo 'Julio'.
Rage amekumbwa na rungu hilo kwa madai ya kukiuka makubaliano ya kamati ya utendaji na kutoa uamuzi wake binafsi, huku kocha Zdravock Logarusic raia wa Croatia akitangazwa ndiye mpya aliyemrithi Kibadeni na atasaidiwa na kocha wa vijana Suleiman Matola.
Akizungumza jijini Dar es Salaam jana, Kaimu Makamu Mwenyekiti wa Simba Joseph Itang'are 'Kinesi', alisema uamuzi huo ulifikiwa juzi na kamati hiyo kwenye kikao ambacho kilihudhuriwa na wajumbe wote.
"Jana (juzi) kamati imekaa na kuamua kwa nia nzuri ya kuboresha utendaji na si kumkomoa mtu na moja ya maamuzi tuliyofikia, ni kumsimamisha mwenyekiti wetu (Rage) ambaye amekiuka makubaliano ya kamati na kufanya maamuzi yake binafsi," alisema Kinesi.
Alisema moja ya makubaliano aliyokiuka mwenyekiti huyo ni kusimamisha mkutano mkuu wa Simba wa marekebisho ya katiba uliopangwa kufanyika mwezi huu, kwa madai anasafiri.
Kaimu Makamu Mwenyekiti huyo alisema kosa lingine la Rage, kuyaagiza matawi yaendelee kutuma taarifa juu ya marekebisho hayo ya katiba.
Kinesi alisema licha ya kumsimamisha Rage kikao hicho pia, kiliazimia kufanya mkutano mkuu wa marekebisho ya katiba kama ulivyopangwa na sasa utafanyika Desemba mosi, mwaka huu katika ukumbi utakaotangazwa baadaye.
Alisema mkutano huo utakuwa na ajenda kuu mbili; kutokuwa na imani na Rage, na marekebisho ya katiba ya Simba.
Akifafanua kuhusu kifungu walichotumia kumsimamisha Rage, Kinesi alisema wametumia kifungu cha katiba ibara ya 30 (m) kinachoeleza kuwa, kamati ya utendaji inaweza kuchukua hatua zozote inazoona zinafaa kumwajibisha mwenyekiti.
Kutokana na uamuzi huo wa kumweka Rage kando, nafasi ya mwenyekiti kuanzia sasa inaikaimiwa na Kinesi na Kaimu Makamu Mwenyekiti ni Swed Nkwabi.
Hata hivyo, mwenyekiti huyo wa Simba aliyesimamishwa hakupatikana kuzungumzia suala hilo kwa madai kuwa yupo nje ya nchi.
Hii ni mara ya pili Rage kusimamishwa katika klabu hiyo baada wanachama wapatao 700, kuitisha mkutano wa kumsimamisha uliofanyika katika ukumbi wa Star Light Hoteli mapema mwaka huu, lakini Shirikisho la Soka nchini (TFF) lilipinga 'mapinduzi' hayo kwa maelezo kuwa ni batili.
Kuhusu benchi la ufundi la Simba, Kinesi alisema kamati hiyo iliona kuna umuhimu wa kufanya mabadiliko na ndio maana imeazimia kumleta kocha huyo Logarusic aliyekuwa akiinoa timu ya Gor Mahia ya Kenya.
Alisema kocha huyo atawasili nchini Desemba mosi na tayari taratibu zote kuhusu mkataba wake ziko katika matayarisho.
Makamu mwenyekiti alisema mabadiliko hayo yanalenga kuimarisha benchi la ufundi ambalo lilionekana kutofanya vyema katika mzunguko wa kwanza huku kukiwa na malalamiko kutoka kwa wachezaji.
"Naamini baada ya kocha kuja mambo yatabadilika kwani tunachotaka kuona ni timu yetu ikifanya vizuri katika mzunguko wa lala salama na kuwania ubingwa," alisema Kinesi.
Simba imemaliza mzunguko wa kwanza wa ligi hiyo ikiwa na pointi 24 baada ya kucheza michezo 13.

WAZIMBABWE KUTUA MCHANA HUU

Kikosi cha Zimbabwe kinawasili leo mchana (Novemba 18 mwaka huu) kuikabili Taifa Stars katika mechi ya Kalenda ya Shirikisho la Kimataifa la Mpira wa Miguu (FIFA)- FIFA Date itakayofanyika kesho (Novemba 19 mwaka huu) Uwanja wa Taifa, Dar es Salaam.

Msafara wa timu hiyo ukiwa na watu 30 utatua Uwanja wa Ndege wa Kimataifa wa Julius Nyerere (JNIA) saa 8 kamili mchana kwa ndege ya Kenya Airways yenye mruko namba KQ 484 kupitia Nairobi.

Kocha wa timu hiyo Ian Gorowa atazungumza na waandishi wa habari mara baada ya timu hiyo kutua JNIA. Kiongozi wa msafara wa timu ya Zimbabwe ni John Phiri.

Wachezaji wanaounda kikosi hicho ni makipa; Frankson Busire, Maxwell Nyamupangedengu na Tapiwa Kapini. Mabeki ni Carrington Nyadombo, Felix Chindungwe, Innocent Mapuranga, Nkosana Siwela, Ocean Mushure na Patson Jaure.

Viungo ni Isaac Masami, Kundakwashe Mahachi, Milton Neube, Misheck Mburayi, Obey Mwenehari na Silas Dylan Songani. Washambuliaji ni Gerald Ndlovu, Lot Chiungwa, Nqobizitha Masuku, Simba Sithole na Themba Ndlovu.

Waamuzi wa mechi hiyo wanatoka Uganda wakati Kamishna atakuwa Leslie Liunda wa Dar es Salaam. Mwamuzi wa mezani ni Oden Mbaga pia wa Dar es Salaam.

Viingilio ni sh. 5,000 kwa viti vya rangi ya bluu na kijani, sh. 30,000 kwa VIP A, sh. 20,000 kwa VIP B, sh. 15,000 kwa VIP C wakati viti vya rangi ya chungwa ni sh. 10,000.

Tiketi zinauzwa kwenye magari maalumu katika vituo vya; Shule ya Sekondari Benjamin Mkapa, mgahawa wa Steers uliopo Mtaa wa Ohio na Samora, Dar Live Mbagala, OilCom Ubungo, Uwanja wa Uhuru, na kituo cha mafuta Buguruni.

TFF YATUMA RAMBIRAMBI KIFO CHA NYOTA WA SAYARI

Shirikisho la Mpira wa Miguu Tanzania (TFF) limepokea kwa masikitiko kifo cha mchezaji wa Sayari, Fatuma Bahau ‘Crouch’ kilichotokea jana (Novemba 15 mwaka huu) kwenye Hospitali ya Temeke, Dar es Salaam.

Msiba huo ni mkubwa katika mpira wa miguu kwani Fatuma ndiyo kwanza alikuwa anachipukia katika mpira wa miguu wa wanawake ambapo alikuwa mfungaji bora wa michuano ya U15 Copa Coca-Cola ya mwaka huu akichezea timu ya Ilala, hivyo mchango wake katika mchezo huu tutaukumbuka daima.

Kwa mujibu wa mlezi wa mchezaji huyo, Stephania Kabumba, marehemu anasafirishwa kesho kwenda kwao Mwanza kwa ajili ya maziko ambapo kifo chake kimesababishwa na ugonjwa wa malaria.

TFF tunatoa pole kwa familia ya marehemu Bahau, klabu ya Sayari, Chama cha Mpira wa Miguu Wilaya ya Kinondoni (KIFA) na Chama cha Mpira wa Miguu Mkoa wa Dar es Salaam (DRFA) na kuwataka kuwa na subira na uvumilivu katika kipindi hiki kigumu cha msiba huo mzito.

Mungu aiweke roho ya marehemu Fatuma mahali pema peponi. Amina

TAIFA STARS SASA KUKIPIGA NA ZIMBABWE

Taifa Stars sasa inacheza na Zimbabwe mechi ya Kalenda ya Shirikisho la Kimataifa la Mpira wa Miguu (FIFA)- FIFA Date itakayofanyika keshokutwa Jumanne (Novemba 19 mwaka huu) Uwanja wa Taifa, Dar es Salaam.

Awali Taifa Stars inayodhaminiwa na Kilimanjaro Premium Lager ilikuwa icheze na Kenya (Harambee Stars), lakini Shirikisho la Mpira wa Miguu Kenya (FKF) lilituma taarifa jana jioni (Novemba 16 mwaka huu) likieleza kuwa timu yake haitacheza tena mechi hiyo.

Kikosi cha Zimbabwe chenye msafara wa watu 30 kinatarajia kuwasili Uwanja wa Ndege wa Kimataifa wa Julius Nyerere (JNIA) kesho (saa 3 asubuhi) tayari kwa mechi hiyo itakayochezwa kuanzia saa 11 kamili jioni.

Waamuzi wa mechi hiyo wanatoka Uganda wakati Kamishna atakuwa Leslie Liunda wa Dar es Salaam. Mwamuzi wa mezani ni Oden Mbaga pia wa Dar es Salaam.

Stars chini ya Kocha Kim Poulsen ipo kambini tangu Novemba 12 mwaka huu kujiwinda kwa mechi hiyo. Kim amejumuisha kwenye kikosi chake wachezaji watano wanaocheza mpira wa miguu nje ya Tanzania.

Kiingilio katika mechi ya kirafiki ya kimataifa kati ya wenyeji Tanzania (Taifa Stars) na Zimbabwe ni sh. 5,000 wakati tiketi zitaanza kuuzwa Jumatatu (Novemba 18 mwaka huu) kwenye vituo mbalimbali jijini Dar es Salaam.

Mbali ya kiingilio hicho cha sh. 5,000 ambacho ni kwa viti vya bluu na kijani, viingilio vingine ni sh. 30,000 kwa VIP A, sh. 20,000 kwa VIP B, sh. 15,000 kwa VIP C wakati viti vya rangi ya chungwa ni sh. 10,000.

Tiketi zitauzwa katika magari maalumu katika vituo vya; Shule ya Sekondari Benjamin Mkapa, mgahawa wa Steers uliopo Mtaa wa Ohio na Samora, Sokoni Kariakoo, Dar Live Mbagala, OilCom Ubungo, BMM Salon iliyopo Sinza Madukani, Uwanja wa Uhuru, mgahawa wa Brake Point uliopo Kijitonyama, na kituo cha mafuta Buguruni.

BODI YA LIGI YAFUNGIA VIWANJA SABA, SIMBA NA MBEYA CITY ZATOZWA FAINI

 

Bodi ya Ligi Kuu Tanzania (TPL Board) imefungia viwanja saba vilivyokuwa vikitumiwa na timu za Ligi Kuu ya Vodacom (VPL) na Ligi Daraja la Kwanza (FDL) hadi vitakapofanyiwa marekebisho ili kukidhi mahitaji ya mechi za mpira wa miguu.

 

Uamuzi huo umefikiwa na TPL Board katika kikao chake cha kwanza kilichofanyika juzi (Novemba 10 mwaka huu) jijini Dar es Salaam ambapo pamoja na mambo mengine kilipitia ripoti za mechi za VPL na FDL katika mzunguko wa kwanza.

 

Viwanja vilivyofungiwa na marekebisho yanayotakiwa kufanyika kwanza ili viruhusiwe kutumika tena ni Uwanja wa Kaitaba mjini Bukoba (majukwaa yake yamechakaa, hivyo kuhatarisha usalama wa watazamaji), na Uwanja wa CCM Mkwakwani jijini Tanga (vyumba vya wachezaji kubadilishia nguo (dressing rooms) havina hadhi).

 

Uwanja wa Kumbukumbu ya Sokoine jijini Mbeya (sehemu ya kuchezea- pitch ni mbovu), Uwanja wa Kumbukumbu ya Sheikh Kaluta Amri Abeid jijini Arusha (pitch ni mbovu), Uwanja wa Ali Hassan Mwinyi (vyumba vya kubadilishia kutumika kwa ajili ya shule ya awali), Uwanja wa Majimaji mjini Songea (pitch ni mbovu) na Uwanja wa Jamhuri mjini Morogoro (pitch ni mbovu).

 

Klabu ambazo timu zake zinatumia viwanja hivyo zimeshaarifiwa rasmi juu ya uamuzi huo ambapo ama vinatakiwa kuwasiliana na wamiliki wa viwanja hivyo ili wafanye marekebisho au kutafuta viwanja vingine vya kuchezea mechi zao.

 

Kwa upande wa ripoti za mechi za VPL; Mbeya City imepigwa faini ya sh. 500,000 na kupewa onyo kali kwa timu yake ya U20 kutocheza mechi ya utangulizi walipocheza na Yanga. Pia wanatakiwa kulipa gharama za uharibifu baada ya washabiki wao kuvunja kioo cha basi la Yanga baada ya gharama hizo kuthibitishwa na Bodi ya Ligi.

 

Pia Mbeya City imepigwa faini ya sh. 500,000 kwa washabiki wake kushambulia basi la wachezaji wa Tanzania Prisons baada ya mechi dhidi yao, na kulipa gharama za uharibifu baada ya kuthibitishwa na Bodi ya Ligi.

 

Coastal Union imepigwa faini ya sh. 500,000 kutokana na vurugu za washabiki wake ilipocheza na Azam kwenye Uwanja wa Mkwakwani ambapo mwamuzi msaidizi Hassan Zani alishambuliwa kwa mawe na kujeruhiwa mkononi na kichwa, tukio lililosababisha mchezo kusimama kwa dakika tatu.

 

Beki wa Coastal Union, Hamad Khamis wa  amepigwa faini ya sh. 500,000 kwa kumpiga kichwa kwa makusudi Kipre Tchetche wa Azam. Kitendo hicho kilisababisha refa amtoe nje kwa kadi nyekundu, hivyo atakosa mechi tatu zinazofuata za timu yake.

 

Mchezaji Cosmas Lewis wa Ruvu Shooting alifanya kitendo cha utovu wa nidhamu kwa kupiga kelele wakati mgeni rasmi akisalimia timu na kukataa kupeana mkono na kamishna kwenye mechi dhidi ya Rhino Rangers, hivyo amefungiwa mechi tatu na kupigwa faini ya sh. 500,000.

 

Mtunza vifaa (Kit Man) wa JKT Ruvu, Selemani Oga aliondolewa kwenye benchi la ufundi wakati wa mechi yao dhidi ya Mbeya City kwa kosa la kutoa lugha chafu kwa refa, hivyo suala lake litapelekwa katika Kamati ya Maadili.

 

Kocha Msaidizi wa Oljoro JKT, Fikiri Elias amepigwa faini ya sh. 500,000 na kufungiwa mechi tatu kwa kumshambulia kwa matusi refa wakati wa mechi yao dhidi ya Ashanti United. Naye mtunza vifaa wa timu hiyo Elas Justin amepelekwa Kamati ya Maadili kwa kumshambulia refa kwa matusi ya nguoni.

 

Simba wamepigwa faini ya sh. 500,000 kutokana na vurugu za washabiki wake wakati wa mechi dhidi ya Kagera Sugar.

 

Katika FDL, mchezaji Ally Mtoni wa Villa Squad amepigwa faini y ash. 200,000 na kufungiwa mechi tano. Kosa lake ni kujisaidia haja ndogo golini wakati wa mechi dhidi ya Ndanda FC iliyochezwa mjini Mtwara.

 

Kamishna Paul Opiyo wa mechi ya FDL kati ya Villa Squad na Transit Camp amepewa onyo wa kutokuwa makini. Katika ripoti yake ameeleza kuwa Transit Camp ilichelewa kufika uwanjani, lakini hakusema ilichelewa kwa muda gani.

 

Kocha wa Polisi Dar es Salaam, Ngelo Nyanjabha na Meneja wa timu hiyo Mrimi Masi wamepigwa faini ya sh. 200,000 na kufungiwa mechi tatu kila mmoja kwa kuongoza kundi la washabiki kumvamia refa wa mechi yao dhidi ya Villa Squad iliyochezwa Dar es Salaam.

 

Pia Bodi ya Ligi imeagiza Polisi waandikiwe barua ya onyo kwa vile wakati waamuzi wanapigwa walikuwepo, lakini hawakutoa msaada kwa wakati.

 

Kocha wa Friends Rangers, Kheri Mzozo amepigwa faini ya sh. 200,000 na kufungiwa mechi sita kwa kosa la kumtukana refa na kutishia kuhamamisha washabiki waingie uwanjani kufanya fujo kwenye mechi dhidi ya Villa Squad.

 

Naye Kocha msaidizi wa timu ya Transit Camp, Haji Amiri amepigwa faini ya sh. 200,000 na kufungiwa mechi sita kwa kutoa lugha ya matusi kwa mwamuzi wa akida wakati wa mechi dhidi ya Friends Rangers.

 

Adhabu zote zimetolewa kwa mujibu wa kanuni. Pia Bodi ya Ligi imeahirisha kufanya uamuzi wa mechi kati ya Stand United na Kanembwa JKT iliyochezwa Uwanja wa Kambarage ili kukusanya taarifa zaidi. Mechi hiyo haikumalizika. Bodi ya Ligi itakutana tena Jumapili (Novemba 17 mwaka huu).

 

FUTURE TAIFA STARS vs TAIFA STARS UWANJANI KARUME KESHO

Timu za Taifa za Future Taifa Stars na Taifa Stars zinacheza kesho (Novemba 13 mwaka huu). Mechi hiyo ya kirafiki itafanyika Uwanja wa Kumbukumbu ya Karume jijini Dar es Salaam kuanzia saa 10 kamili jioni.

 

Mechi hiyo ni maalumu kwa Benchi la Ufundi la Taifa Stars linaloongozwa na Kim Poulsen kuangalia wachezaji kumi kutoka Future Taifa Stars watakaoongezwa katika Taifa Stars tayari kwa mechi ya kirafiki ya kimataifa itakayochezwa Novemba 19 mwaka huu jijini Arusha.

 

Watazamaji 300 tu wataruhusiwa kushuhudia mechi hiyo kwa kiingilio cha sh. 5,000.

Taifa Stars inayodhaminiwa na Kilimanjaro Premium Lager imeingia kambini leo (Novemba 12 mwaka huu). Miongoni mwa wachezaji wanaotarajia kuripoti ni kipa Ivo Mapunda wa Gor Mahia.

Boniface Wambura Mgoyo

Kaimu Katibu Mkuu

Shirikisho la Mpira wa Miguu Tanzania

NDEGE 3 WAIBUKA NA SINGO MPYA

KUNDI jipya la muziki la Ndege 3, linaloundwa na wasanii watatu nyota wa muziki wa dansi nchini, limeibuka na kibao kingine kipya.

Wasanii wanaounda kundi hilo ni Khadija Mnoga (Kimobitel), Pauline Zongo na Joan Matovolwa.

Taarifa iliyotumwa na Khadija kwa blogu ya Liwazozito wiki hii, imeutaja wimbo huo kuwa ni Misukosuko.

Ndege 3wamerekodi wimbo huo kwa kushirikiana na repa machachari nchini, Grayson Semsekwa wa bendi ya Twanga Pepeta.

Khadija alisema tayari wamesharekodi audio ya wimbo huo na kuzisambaza kwenye vituo mbalimbali vya redio nchini.

Amesema kwa sasa wanajiandaa kurekodi video ya wimbo huo kabla ya kuisambaza kwenye vituo vya televisheni nchini.

WAAMUZI 18 KUCHEZESHA KOMBE LA CHALENJI, WAMO WATANZANIA WATATU

BARAZA la Vyama vya Soka Afrika Mashariki na Kati (CECAFA), leo limetangaza majina ya waamuzi 18 watakaochezesha michuano ya mwaka huu ya Kombe la Chalenji itakayofanyika nchini Kenya.

Katibu Mkuu wa CECAFA, Nicholas Musonye amesema leo kuwa, kati ya waamuzi hao, tisa watakuwa wa kati na wengine tisa wasaidizi.

Musonye amesema waamuzi wote hao watalazimika kwenda Nairobi mapema kwa ajili ya kufanyiwa vipimo vya afya zao pamoja na uimara wa mwili.

Michuano hiyo imepangwa kuanza Novemba 27 mwaka huu, ikizishirikisha nchi zote wanachama wa baraza hilo kongwe barani Afrika.

Waamuzi wa kati ni :
1. Anthony Okwayo-Kenya
2. Denis Batte-Uganda
3. Wish Yabarow- Somalia
4. Israel Mujuni- Tanzania
5. Louis Hakizimana- Rwanda
6. ThieryNkurunziza- Burundi
7. WaziriSheha- Zanzibar
8. GebremichaelLuleseged- Eritrea
9. KheiralaMurtaz - Sudan
Waamuzi wasaidizi ni
1. Gilbert Cheruiyot- Kenya
2. TonnyKidiya- Kenya
3. Mark sonko- Uganda
4. FedinardChacha- Tanzania
5. Suleiman Bashir- Somalia
6. Fraser Zakara-South Sudan
7. SimbaHonore-Rwanda
8. Hamid Idam- Sudan
9. KinfeYimla-Ethiopia

YANGA YAMKANA STEWART HALL

Uongozi wa mabingwa watetezi wa Ligi Kuu Tanzania bara timu ya Young Africans umesema hauna mpango wa mazungumzo yoyote na aliyekua kocha mkuu wa timu ya Azam FC muingereza Stewart Hall juu ya kumpa ajira ya kuwa kocha na Ernie Brandts bado anaendelea na kazi yake ya ukocha mkuu.

Taarifa hii ya uongozi wa klabu ya Yanga inafuatia kuzagaa kwa taarifa hizo leo mchana kwenye baadhi ya mitandao mbali mbali ya kijamii kuwa wapo katika maongoezi na kocha huyo ili achukue nafasi ya kocha mholanzi Ernie Brandts.

Msiumizwe vichwa na taarifa hizo kwani wengi wao lengo lao ni kutaka kuivuruga Yanga sasa ili isiweze kufanya vizuri katika mzunguko unaofuata na mashindano ya kimataifa, uzuri tumelijua hilo na sisi tunauambia umma hatuna mazungumzo na kocha huyo na wala hatujawahi fikiria kufanya hivyo.

Tunaomba umma wa wapenzi wa soka nchini, wanachama, washabiki na wapenzi wa Young Africans watamabue kuwa Ernie Brandts bado ni kocha mkuu wa klabu yetu na hatuna mpango wa kufanya mabadiliko na wala hatujawahi kufikiria kufanya hivyo.

Mholanzi Ernie Brandts anatarajiwa kurejea nchini jumapili Novemba 24, 2013 tayari kabisa kwa kuanza mazoezi na vijana wake siku ya jumatatu Novemba 25, 2013 kwa ajili ya maandalizi ya mchezo wa Hisani (Nani Mtani Jembe) dhidi ya Simba SC Disemba 14, 2013.

Mara baada ya mchezo huo kikosi kitaendelea na maandalizi kujiandaa na mzunguko wa pili wa Ligi Kuu pamoja na mashindano ya kimataifa lakini pia timu inategema kushiriki wa mashidano ya Mapinduzi Cup kisiwani Zanzibar mapema mwezi Januari 2014. 

Msimu wake wa kwanza ameiongoza Yanga kutwaa Ubingwa wa Ligi Kuu ya Vodacom na hivi sasa anaongoza msimamo wa Ligi kwa kuwa na pointi 28 na mabao 31 ya kufunga na mabao 11 ya kufungwa.

Kocha Brandts mara baada ya mchezo wa mwisho dhidi ya JKT Oljoro alitoa mapumziko ya wiki mbili kwa wachezaji wake na benchi la ufundi kwa ajili ya kuwa na familia zao na mapumziko na ambapo timu inatarajiwa kuanza tena mazoezi tarehe 25 Novemba kujiandaa na michezo itakayokuwa inawaikabili timu.

KASEJA SASA RASMI YANGA, ALIPWA MIL 40/-

HATIMAYE ile minong'ono na mustakabali wa kipa wa kimataifa wa Tanzania, Juma Kaseja sasa imemalizika baada ya kuamua kumwaga wino Yanga.

Kaseja, ambaye msimu uliopita aliichezea Simba, amemwaga wino Yanga kwa mkataba wa miaka miwili, ulioanza Jumamosi iliyopita.

Kwa mujibu wa mkataba huo, Kaseja amemwaga wino Yanga kwa malipo ya sh. milioni 40.

Mkataba huo ulitiwa saini na Kaseja mbele ya wajumbe wa kamati ya usajili ya Yanga, Abdalla Bin Kleb na Ahmed Seif 'Magari'. Pia alikuwepo wakala wa Kaseja, Abdulfatah Saleh.

Kusajili kwa Kaseja kunaifanya Yanga sasa iwe na makipa watatu. Wengine ni Ally Mustapha 'Barthez' na Deogratius Munishi 'Dida'.

Barthez alikuwa kipa namba moja wa Yanga mwanzoni mwa msimu huu, lakini alipoteza namba kwa Dida mwishoni mwa mechi za mzunguko wa ligi.

Hii ni mara ya pili kwa Kaseja kusajiliwa na Yanga. Mara ya kwanza ilikuwa msimu wa 2009/2010.

Sababu kubwa ya kuachwa kwa Kaseja katika kikosi cha Simba ni madai kuwa kiwango chake kimeshuka. Nafasi yake ilichukuliwa na Abel Dhaira kutoka Uganda.

Baada ya kutupiwa virago, Kaseja hakuichezea timu yoyote katika mechi za mzunguko wa kwanza wa ligi uliomalizika wiki iliyopita.

Kaseja amewahi kuzichezea timu za Moro United kuanzia 2001, timu ya Taifa ya vijana wa chini ya miaka 17, Serengeti Boys kabla ya kuhamia Simba 2003.

DIRISHA DOGO KUFUNGULIWA NOVEMBA 15

Usajili wa wachezaji kwa dirisha dogo kwa msimu wa 2013/2014 Tanzania Bara
unafunguliwa Novemba 15 mwaka huu na utafungwa rasmi Desemba 15 mwaka
huu.

Kwa mujibu wa kanuni, klabu zenye fursa ya kusajili wachezaji katika dirisha dogo ni
zile ambazo hazijatumia nafasi zote 30 za wachezaji.

Ligi Kuu ya Vodacom (VPL) na Ligi Daraja la Kwanza (FDL) zimemaliza duru la
kwanza msimu huu. Duru za pili litaanza kutimua vumbi Januari mwakani.

Kwa mujibu wa Kalenda ya Matukio ya Shirikisho la Mpira wa Miguu Tanzania (TFF)
matukio ya Novemba na Desemba ni dirisha dogo la usajili na mechi za kirafiki za
Shirikisho la Kimataifa la Mpira wa Miguu (FIFA)- FIFA Date.

Matukio mengine ni michuano ya Kombe la Uhai inayoshirikisha wachezaji wenye
umri chini ya miaka 20 wa klabu za VPL na michuano ya Kombe la Chalenji
itakayofanyika Nairobi, Kenya.

TANZANITES YAIUA TENA MSUMBIJI

Timu ya Taifa ya wanawake chini ya miaka 20 (Tanzanite) imefuzu kucheza raundi
ya pili ya michuano ya Kombe la Dunia kwa ushindi wa jumla ya mabao 15-1 baada
ya  kuibugiza Msumbiji mabao 5-1.

Mabao ya Tanzanite katika mechi hiyo iliyochezwa Uwanja wa Taifa wa Zimpeto jijini
Maputo yalipatikana kupitia kwa Sherida Boniface alipiga matatu (hat trick) wakati
mengine yalifungwa na Vumilia Maarifa na Donesia Minja.

Msafara wa Tanzanite ulioongozwa na mjumbe wa Kamati ya Utendaji ya Shirikisho
la Mpira wa Miguu Tanzania (TFF), Kidao Wilfred uliwasili Uwanja wa Ndege wa
Kimataifa wa Julius Nyerere (JNIA) jana Jumapili (Novemba 10 mwaka huu) saa
8.30 mchana kwa ndege ya LAM.

Tanzanite inayofundishwa na Rogasian Kaijage, itacheza mechi ya raundi ya pili dhidi
ya Afrika Kusini. Mechi ya kwanza itachezwa jijini Dar es Salaam kati ya Desemba 6
na 8 mwaka huu wakati ile ya marudiano itafanyika Afrika Kusini kati ya Desemba
20-22 mwaka huu.

WATATU WAOMBEWA ITC UJERUMANI

Watanzania watatu wameombewa Hati ya Uhamisho wa Kimataifa (ITC) na Chama
cha Mpira wa Miguu Ujerumani (DFB) ili wacheze mpira wa miguu nchini humo.

Wachezaji hao ni Charles Mishetto na David Sondo wanaombewa hati hiyo ili waweze
kujiunga na timu ya SpVgg 1914 Selbitz, wakati Eric Magesa ameombewa kibali
hicho ili achezee timu ya klabu ya SC Morslingen.

Hata hivyo, katika maombi hayo DFB haikuleza hapa nchini walikuwa wakicheza
katika klabu zipi. Wachezaji wote wameombewa hati hiyo kama wachezaji wa ridhaa.

KOMBE LA UHAI NOVEMBA 17

Michuano ya Kombe la Uhai inayoshirikisha wachezaji wenye umri chini ya miaka 20
wa klabu za Ligi Kuu inaanza kutimua vumbi Novemba 17 mwaka huu katika viwanja
vya Karume na Azam Complex, Dar es Salaam.

Droo ya michuano hiyo inayodhaminiwa na Maji Uhai imefanyika leo (Novemba 8
mwaka huu) mbele ya waandishi wa habari katika ofisi za Shirikisho la Mpira wa
Miguu Tanzania (TFF) ambapo timu zimepangwa katika makundi matatu.

Kundi A linaundwa na timu za Azam, Coastal Union, JKT Ruvu Stars, Mbeya City na
Yanga, wakati kundi B ni Ashanti United, Mgambo Shooting, Oljoro JKT na Ruvu
Shooting. Kagera Sugar, Mtibwa Sugar, Rhino Rangers na Tanzania Prisons ndizo
zinazounda kundi C.

Mechi za ufunguzi kundi A Novemba 17 mwaka huu ni kati ya Azam na Coastal
Union (saa 2 asubuhi- Karume), Yanga na Mbeya City (saa 8 mchana- Karume).
Kundi B ni Ruvu Shooting na Ashanti United (saa 4 asubuhi- Karume), Oljoro JKT na
Simba (saa 10 jioni- Karume).

Kagera Sugar na Mtibwa Sugar (saa 2 asubuhi- Azam) na Rhino Rangers na
Tanzania Prisons (saa 10 jioni- Azam) ndizo zitakazocheza mechi za ufunguzi
Novemba 17 mwaka huu katika kundi C.

Robo fainali ya michuano hiyo itachezwa Novemba 24 na 25 mwaka huu wakati
nusu fainali itapigwa Novemba 26 na 27 mwaka huu. Mechi ya kutafuta mshindi wa
tatu na ile ya fainali zitachezwa Novemba 30 mwaka.

YANGA YAKWEA KILELE, AZAM NA MBEYA CITY HAKUNA MBABE

MABINGWA watetezi wa ligi kuu ya Tanzania Bara, jana walimaliza mzunguko wa kwanza wa ligi hiyo wakiwa wa kwanza, baada ya kuicharaza JKT Oljoro mabao 3-0 katika mechi iliyopigwa kwenye Uwanja wa Taifa, Dar es Salaam.

Ushindi huo uliiwezesha Yanga kuwa na pointi 28 baada ya kucheza mechi 13, na kuzipiku Azam na Mbeya City, ambazo zimetoka sare ya mabao 3-3 na kumaliza mzunguko huo zikiwa na pointi 27 kila moja.

Yanga ilihesabu bao lake la kwanza dakika ya 21 kupitia kwa kiungo wake, Haruna Niyonzima kabla ya Mrisho Ngasa kufunga bao la pili dakika ya 30. Bao la tatu lilifungwa na Jerry Tegete dakika ya 52.

Wakati huo huo, Azam na Mbeya City zimeshindwa kutambiana baada ya kutoka sare ya mabao 3-3 katika mechi iliyopigwa kwenye uwanja wa Chamazi, Dar es Salaam.

SIMBA YAIUA ASHANTI, MESSI ANATISHA, TAMBWE AFIKISHA MABAO 10

SIMBA imemaliza duru la kwanza la ligi kuu Tanzania Bara msimu huu kwa kuifanyia mauaji ya mabao 4-2 timu ya Ashanti United katika mechi iliyokuwa na presha kali.

Katika mchezo huo uliopigwa kwenye Uwanja wa Taifa, Dar es Salaam, jana, pia ilishuhudiwa kipa wa Ashanti wa Ashanti United Amaan Simba akitolewa kwa kadi nyekundu na mwamuzi Andrew Shamba kutoka Pwani kwa kosa la kudaka mpira nje ya kisanduku cha hatari.

Golikipa huyo alijitoa muhanga kudaka mpira huo kutokana na beki wake kutokwa na William Lucian na hivyo kulazimika kujitosa kuokoa jahazi bila mafanikio kwa sababu mpira huo ulikuwa mrefu kwake.

Awali mechi hiyo ilianza kwa kukamiana na Ashanti ilibisha hodi langoni mwa Simba katika dakika ya nne, lakini Joseph Mahundi alishindwa kuunganisha wavuni mpira wa adhabu ilitokana na Paul Maona kuchezewa madhambi.

Simba walijibu mapigo dakika moja baadaye kupitia kwa kiungo Amri Kiemba aliyewalamba chenga mabeki wa Ashanti na kupiga krosi iliyotua kichwani kwa Amis Tambwe, lakini mpira huo ulipaa kwenye lango la Ashanti.

Mshambuliaji machachari Ramadhani Singano 'Messi' aliwatoka mabeki wa Ashanti na kufumua shuti ambalo lilimpita kipa Amaan Simba na kujaa wavuni katika dakika ya nane.

Idd Said wa Ashanti alionywa kwa kadi ya njano baada ya kumchezea faulo Tambwe katika dakika ya 21, adhabu iliyotolewa pia kwa Jonas Mkude aliyemkwatua Mahundi.

Timu hizo zilikwenda mapumziko zikiwa sare ya 1-1 kufuatia Hussein Sued kusawazisha kwa kichwa katika dakika ya 45 akijitwisha krosi murua ya Said Maulid 'SMG' aliyeichachafya vikali ngome ya Simba katika kipindi hicho.

Kipindi cha pili ilikuwa zamu ya mashabiki na benchi la ufundi la Simba kucheka na kushusha presha, baada ya kuanza mchezo kwa kasi na kufunga mabao kama 'mvua'.

Tambwe mshambuliaji kutoka Burundi alizidi kujichimbia katika usukani wa washambuliaji wanaoongoza kwa ufungaji katika ligi kuu ya bara msimu huu, kwa kufunga bao la pili la Simba katika dakika ya 46.

Mrundi huyo alisindikiza mpira wavuni kwa pasi ya Singano aliyekuwa nyota wa mchezo huo kutokana na kuonyesha ufundi wa kuipangua ngome ya wauza mitumba wa Ashanti.

Hakuna lugha fasaha ya kueleza zaidi ya kusema jana ilikuwa siku ya Singano aliyefanya kazi nyingine nzuri ya kuichambua ngome ya Ashanti na kutoa pasi kwa Mwombeki aliyefunga bao la tatu kiulaini katika dakika ya 49.

Mshambuliaji mkongwe nchini SMG aliwarudisha Ashanti katika hali ya mchezo kwa kufunga bao la pili kwa shuti kali akiunganisha nyavuni mpira wa krosi ya juu, lakini hali ilizidi kuwa ngumu kwao baada ya Mwombeki kuwatandika bao la nne kwa kichwa katika dakika ya 69.

Pasi iliyozaa bao la Mwombeki aliyetoka kuonyeshwa kadi ya njano dakika kabla ya kufunga bao hilo, ilipigwa na beki Haruna Shamte aliyepanda kusaidia mashambulizi ya Simba.

ASHANTI UNITED: Amaan Simba, Hussein Mkongo, Jaffar Gonga, Tumba Sued, Samir Ruhava, Idd Said/Emmanuel Memba, Fakihi Hakija, Paul Maona, Hussein Sued, Said Maulid 'SMG' na Joseph Mahundi.

SIMBA: Abuu Hashim, Haruna Shamte, Issa Rashid, Gilbert Kaze, Hassan Khatib/Hassan Isihaka, Jonas Mkude, Ramadhani Singano, Henry Joseph/ Said Ndemla, Betram Mwombeki, Amis Tambwe na Amri Kiemba/ William Lucian.

MAKAMBA MGENI RASMI TUZO ZA MWANASOKA BORA

Naibu Waziri wa Mawasiliano Sayansi na Teknolojia, Mh. January Makamba anatarajiwa kuwa mgeni rasmi katika hafla ya utoaji wa tuzo kwa mwana soka bora wa mwaka katika ligi kuu ya Vodacom mwaka 2013, itakayofanyika katika ukumbi wa  Mlimani City jijini Dar es Salaam.

 

Tuzo hiyo itashuhudia wachezaji walioingia hatua ya Tano bora, AMRI KIEMBA, HARUNA NIYONZIMA, SHOMARI KAPOMBE, THEMI FELIX, na KELVIN YONDANI wakichuana kuwania umwamba wa soka Tanzania,  Baada ya kupigiwa kura na mashabiki na Kamati maalum chini ya Mwenyekiti wake Zamoyoni Mogela kuchambua majina hayo kulingana na kura walizopata.

 

Akizungumza juu ya hafla hiyo, Mkuu wa Kitengo cha Masoko na Mawasiliano Kelvin Twissa amesema, wanafurahi kuwa sehemu ya  maendeleo ya soka nchini na siku zote kampuni yake imekuwa msitari wa mbele katika kuunga mkono michezo nchini, hususani mchezo wa soka na kuhakikisha unakuwa moja ya ajira muhimu kwa watanzania.

 

“Vodacom tumeendelea kuwa wadau muhimu katika mapinduzi ya soka la Tanzania, sasa mpira umekuwa zaidi ya burudani kwa watanzania kutokana na chachu ambayo tumeiweka tangu tuanze kudhamini ligi kuu, ambayo sasa imekuwa na ushindani mkubwa na thamani yake inazididi kupanda siku hadi siku,” alisema Twissa.

 

Aidha Twissa amesema kampuni yake itaendelea kushirikiana na wadau wengine wote wanaopenda maendeleo ya soka bila kusita kutokana na namna ambavyo kampuni yake imejidhatiti katika kuinua michezo nchini.

 

“Mafanikio yanayopatikana katika soka letu sasa hayajapatikana hivivi ni kutokana na dhamira tuliyoiweka katika kuinua mchezo huu wa soka na uwekezaji mkubwa tulioufanya hadi sasa, watu ambao wanaleta mafanikio haya ni wachezaji ambao wamekuwa wanapambana kufa na kupona kutoa burudani kwa Watanzania, Ni lazima tuwaenzi wachezaji hawa kwa njia tofauti tofauti,” alisema Twissa.

 

Kwa upande wake Meneja Masoko wa MCL Bernad Mukasa amesema kuwa, wamefurahi kushirikiana na Naibu waziri Mh. Makamba katika utoaji wa tuzo hizi, ambazo zinatambua mchango wa wanasoka nchini.

 

“Tuzo hizi zinatambulika rasmi kwa jina la zitaitwa MWANASPOTI BORA WA SOKA WA VODACOM 2013. Ni za kipekee na za kwanza kabisa nchini kwa wigo wa wachezaji wanaohusishwa, ushirikishwaji wa uteuzi wa mshindi, na vigezo husika.” alisema Mukasa na kuongeza.

 

“Kwa mwaka huu, licha ya kumpata Mwanaspoti Bora wa soka wa mwaka , pia tutatoa Tuzo kwa “categories” zaidi ya 10 ikiwemo kocha bora, mwamuzi bora, mchezaji bora wa kike, mchezaji bora chipukizi, “1^st eleven”, goli bora, mchezaji bora wa kigeni, Mchezi bora wa kulipwa anayecheza nje, na Kipengele kingine kitajulikana siku ya ijumaa,” alisema Mukasa.

 

Mukasa alihitimisha kwa kutoa wito kwa Watanzania kuendelea kuwapigia kura wachezaji hao  kwa  kuandika ujumbe mfupi unaoanza na neno KURA kisha jina la mchezaji anayemchagua kati ya hao waliotajwa na kisha kutuma kwenda namba 15678.

SIMBA, ASHANTI DIMBANI KESHO TAIFA

Mechi za kukamilisha mzunguko wa kwanza wa Ligi Kuu ya Vodacom (VPL) zinaanza kesho (Novemba 6 mwaka huu) ambapo Ashanti United itakuwa mwenyeji wa Simba kwenye Uwanja wa Taifa, Dar es Salaam.

Viingilio katika mechi hiyo itakayochezwa kuanzia saa 10 kamili chini ya mwamuzi Andrew Shamba kutoka Pwani ni sh. 5,000, sh. 8,000, sh. 15,000 na sh. 20,000. Waamuzi wasaidizi ni Abdallah Mkomwa na Rashid Abdallah wote kutoka Pwani wakati mezani atakuwa Hamisi Chang’walu.

Mechi nyingine za kesho ni JKT Ruvu Stars na Coastal Union (Uwanja wa Chamazi), Kagera Sugar na Mgambo Shooting (Uwanja wa Kaitaba, Bukoba) na Ruvu Shooting na Mtibwa Sugar (Uwanja wa Manungu, Morogoro).

Keshokutwa (Novemba 7 mwaka huu) raundi ya 13 kumaliza mzunguko wa kwanza itakamilika kwa mechi kati ya Yanga na Oljoro JKT kwenye Uwanja wa Taifa kwa viingilio vya sh. 5,000, sh. 8,000, sh. 15,000 na sh. 20,000.

Azam itakuwa mwenyeji wa Mbeya City kwenye Uwanja wa Chamazi wakati Uwanja wa Ali Hassan Mwinyi mjini Tabora utakuwa mwenyeji wa mechi kati ya Rhino Rangers na Tanzania Prisons kutoka Mbeya.

TFF YATAKA ORODHA YA WALIOSAMEHEWA

Shirikisho la Mpira wa Miguu Tanzania (TFF) limetuma waraka kwa vyama vya mpira wa miguu vya wilaya, mikoa na vyama shiriki kuvitaka kuwasilisha orodha ya wote waliofaidika na msamaha wa Oktoba 28 mwaka huu.

Oktoba 28 mwaka huu wakati akizungumza katika Mkutano Mkuu baada ya uchaguzi, Rais mpya wa TFF, Jamal Malinzi alitoa msamaha kwa wote waliofungiwa kwa sababu mbalimbali.

Hata hivyo, msamaha huo hauwahusu waliofungiwa kutokana na makosa ya rushwa au kupanga matokeo. Vilevile haugusi adhabu zilizotolewa ndani ya klabu.

Vyama vya mikoa vinatakiwa kuhakikisha waraka huo unafika kwa wanachama wao (vyama vya mpira wa miguu vya wilaya). TFF inataka orodha ya wote waliofaidika na msamaha huo kwa ajili ya kumbukumbu zake (records).