WEMA: ACHENI KUNIONEA, NIMEWAKOSEA NINI?

BAADA ya ukimya wa muda mrefu, mcheza filamu machachari, Wema Sepetu ameibuka na kuvitaka vyombo vya habari viache kumfuatafuata na kuchafua jina lake.

Wema amesema haelewi ni kwa nini vyombo vya habari vimekuwa vikimchafua mara kwa mara na ameiita tabia hiyo kuwa ni ya kionevu na iliyolenga kumkatisha tamaa kimaisha.

"Mara ya mwisho nililia wakati nilipoambiwa nina pepo la ngono. Leo hii nalia tena baada ya kuambiwa nimekamatwa na unga (dawa za kulevya) China na nitanyongwa," ameeleza Wema wiki hii kupitia akaunti yake ya mtandao wa intergram.

Wema ameamua kutoa dukuduku lake hilo, kufuatia taarifa zilizoripotiwa na baadhi ya vyombo vya habari nchini hivi karibuni kwamba, amekamtwa na dawa za kulevya China na amehukumiwa kunyongwa.

"Siwezi kusema kwamba nina furaha, sina furaha kabisa na sikuwahi kufikiria kwamba magazeti yetu, ipo siku yatakuwa na nguvu ya kuandika uongo wa namna hii," ameeleza Wema kupitia mtandao huo.

"Kwa sababu huwa nakaa kimya, ndio muone kwamba mnaweza kunionea muda wote! Roho inaniuma sana. Naumia kwa sababu nimechoka kuchafuliwa jina langu bila sababu za msingi.

"Nimesema nitoke zangu kimya kimya kuja huku (China), kujihangaikia zangu kuhusu kazi zangu, lakini nimeonekana nimekuja kuuza unga na nitanyongwa hivi karibuni.

"Ni lini nyinyi watu mtaniacha niishi kwa amani? Sidhani kama nilishawahi kumkosea yeyote kati yenu.

"Maskini ya Mungu naishi maisha yangu mwenyewe, sina habari na mtu, sijawahi hata kufikiria kufanya upuuzi huo, nimeumia sana. Mungu nisaidie," amesema Wema kupitia akaunti yake hiyo.

DIAMOND ATABIRI KIFO CHAKE, ATUNGA WIMBO KAMA WA MAREHEMU KANUMBA

SIKU chache kabla ya kifo chake, aliyekuwa msanii nyota wa filamu nchini, marehemu Steven Kanumba alitunga wimbo kuhusu kifo. Wimbo huo ulikuwa ukizungumzia mambo mbalimbali, ambayo alitabiri kwamba yatatokea baada ya kifo chake.

Hazikupita siku nyingi, Kanumba alifariki dunia baada ya kujigonga ukutani, nyumbani kwake Sinza, Dar es Salaam, baada ya kutokea ugomvi kati yake na msanii mwenzake, Elizabeth Michael 'Lulu'.

Wimbo huo, uliopigwa kwa miondoko ya taratibu, uliacha maswali mengi miongoni kwa mashabiki wake. Lakini kikubwa ni kwamba, Kanumba alijitabiria kifo chake kwa njia ya wimbo.

Wakati mashabiki wakiwa bado na kumbukumbu ya kifo hicho cha Kanumba, msanii nyota wa muziki wa kizazi kipya nchini, Naseeb Abdul 'Diamond', naye ameibuka na kibao kipya kinachokwenda kwa jina la Kama nikifa kesho.

Diamond amerekodi kibao hicho siku chache baada ya kuzindua wimbo wake wa My Number One, ambao bado unaendelea kutamba kwenye vituo mbalimbali vya redio na luninga nchini.

Msanii huyo machachari amepiga kibao hicho kwa miondoko ya taratibu, mipigo yake ikiwa haina tofauti kubwa na ile ya wimbo wake wa Kesho. Isipokuwa kibao hicho kimesheheni mashairi yanayohuzunisha.

Katika kibao hicho, Diamond anahoji iwapo atakufa kesho, nani atakayezikwa naye
na je, ni nani atakayembembeleza mama yake mzazi asilie.

"Ni swali gumu sana nauliza, lakini wakati utafika nitapumzishwa. Siku zamu yangu ikifika, nikiitwa na Mungu, uhai wangu utakatishwa. Nafsi yangu itatenganishwa na roho, milele nitakwenda kupumzika. Sijui wengi watalia kwa uchungu au watafurahi,"anaimba Diamond katika moja ya beti za wimbo huo.

Msanii huyo anakwenda mbali zaidi kwa kuhoji, baada ya kifo chake, wasanii wenzake watamwimbia au jina lake litafutika na nyimbo zake hazitasikika tena?

Kana kwamba haitoshi, Diamond anauliza iwapo wacheza shoo wa kundi lake la Wasafi watamlilia na kama ndugu na rafiki zake watahudhuria mazishi yake au atakapokufa atakuwa hana chake?

Diamond pia anamuusia mama yake mzazi akimweleza kuwa,hana mtoto hata wa kusingiziwa, hivyo wasije wakatokea mabinti wakamdanganya kwamba amezaa nao.

"Mama mwanao sina mtoto hata wa kusingiziwa,wengi tulipanga kufanya hivyo, lakini walisema wakati wao wa kuzaa bado. Nikiondoka wasikudanganye, waliniambia ngoja ngoja, wataharibu ujana wao, baada ya shida zao wakanikimbia,"ameimba Diamond.

Akizungumzia kibao hicho, Diamond ameeleza kupitia tovuti yake juzi kuwa, hakupanga kuutoa hivi karibuni na ameshangazwa na kitendo cha mtu, aliyeuvujisha kwenye mtandao.

"Kuvujisha wimbo wangu hakuwezi kunipunguzia wala kunidhuru chochote. Sanasana utanizidishia umaarufu na kunipa shoo zaidi,"ameeleza Diamond kupitia mtandao wake.

"Kama nimeacha kurekodi nyimbo kwenye studio yako, usipaniki, tulia, tafuta msanii mwingine mkali zaidi yangu umrekodie ngoma, apae juu kuliko mimi. Lakini kuvujisha nyimbo zangu, unajisumbua bure," ameongeza.

Katika hatua nyingine, Diamond amesema hajatengana na mpenzi wake wa sasa, Penny na kurudiana na mpenzi wake wa zamani, Wema Sepetu.

Diamond amesema taarifa zilizosambazwa na vyombo vya habari kwamba ametengana na Penny ni za uongo na uzushi.

"Kumekuwa na uvumi na habari nyingi sana mitandaoni na kwenye media tofauti kwamba mimi na mwanadada Wema Sepetu tuna uhusiano wa kimapenzi, kitu ambacho si kweli. Taarifa hizo ni za uongo," ameeleza.

Kwa mujibu wa Diamond, uvumi huo ulianza baada ya Wema kuchangia mada kwenye akaunti yake ya instagram.

"Hebu tujifunze kubadilika. Ina maana watu mkiwa hamko kwenye uhusiano wa mapenzi, basi msizungumze ama kushiriki katika jambo lolote? Futeni huo uzamani na mbadilike. Ina maana mnapenda kuona watu wana uadui? Ni muda wa kufanyakazi ili kulipa sifa na heshima Taifa la Tanzania na si kujengeana chuki zisizo na faida," ameeleza na kusisitiza anampenda Penny na hajarudiana na Wema.

Diamond ndiye msanii anayeongoza kwa kulipwa fedha nyingi kwa kila onyesho. Msanii huyo amekuwa akilipwa dola za Marekani 10,000 (sh. milioni 16) anapofanya onyesho moja nje ya nchi.

Katika mahojiano na vyombo vya habari hivi karibuni, Diamond alisema katika baadhi ya nchi, kiwango cha malipo kwa kila onyesho ni kati ya dola 15,000 (sh. milioni 24) na 25,000 (sh. milioni 42).

"Sifanyi shoo nje ya nchi chini ya dola 10,000. Katika nchi kama vile Muungano wa Falme za Kiarabu (UAE), kiwango changu ni dola 25,000. Wakati mwingine nalipwa hadi dola 30,000," alisema.

Diamond anasema kwa nchi kama vile Comoro, ambako alikwenda kufanya onyesho hivi karibuni, malipo kwa onyesho yalikuwa dola 25,000 (sh. milioni 42).

Hata hivyo, Diamond anasema wakati mwingine amekuwa akilipwa zaidi ya anavyotarajia, akitoa mfano wa Rwanda, ambako promota aliyemwalika alimlipa sh. milioni 180.

Kabla ya kujitosa katika muziki, Diamond aliwahi kufanya kazi katika kiwanda cha kutengeneza mikoba kilichoko Mikocheni, Dar es Salaam kati ya 2008 na 2009 na kulipwa mshahara wa sh. 2,000 kwa saa nane.

Anasema mshahara huo ulikuwa mdogo, haukuweza kukidhi mahitaji yake ya kila siku kwa sababu alikuwa akitumia sh. 1,000 kwa nauli na sh. 1,000 kwa ajili ya chakula.

Diamond anamiliki vitega uchumi kadhaa, ambavyo ni hoteli, nyumba, viwanja, magari na pikipiki anazozitumia kwa biashara. Anasema mali hizo zina thamani ya sh. bilioni moja.

ABDALLA KIBADENI: SICHEZESHI MCHEZAJI SABABU YA UMAARUFU

LICHA ya timu kongwe ya soka nchini, Simba kuongoza katika michuano ya ligi kuu ya Tanzania Bara, baadhi ya mashabiki hawajaridhishwa na mwenendo wake katika ligi kutokana na kulazimishwa kutoka sare katika mechi nyingi na kupata ushindi katika mechi chache. Katika makala hii ya ana kwa ana iliyoandikwa na Mwandishi Wetu ATHANAS KAZIGE, kocha huyo anaelezea mambo mbalimbali kuhusu mwenendo wa timu hiyo.

SWALI: Umeiongoza Simba katika mechi saba za ligi kuu ya Tanzania Bara hadi sasa na mnaongoza kwa kuwa na pointi 15. Kipi ulichokiona kwa timu yako hadi sasa?
JIBU: Namshukuru Mungu kwamba hadi sasa tunaongoza ligi kwa tofauti ya pointi tatu kati yetu na Yanga. Binafsi namshukuru Mungu, viongozi wa klabu, benchi la ufundi, wachezaji na wanachama kwa kutuunga mkono na kuonyesha mshikamano mkubwa kwa timu yao.
Japokuwa hatujawa na mwenendo wa kuridhisha sana, lakini nina imani tutaweza kufanya vizuri zaidi katika mechi zijazo iwapo umoja na mshikamano uliopo sasa utaendelea kudumu.
Ninachopenda kuwatahadharisha wana-Simba wote ni kwamba, waendelee kuwa na uvumilivu kwa sababu timu yao ni mpya na iwapo watagawanyika, mambo yanaweza kuharibika.
SWALI: Katika siku za hivi karibuni, kumekuwepo na malalamiko kwako kuhusu upangaji wa timu. Inadaiwa kwamba, umekuwa ukipenda kuwapanga baadhi ya wachezaji  wakati uwezo wao ni mdogo. Kuna ukweli wowote kuhusu malalamiko haya?
JIBU: Ninachoweza kusema ni kwamba, kila mtu ana uhuru wa kuzungumza lolote analotaka kutokana na vile anavyofikiria. Lakini jambo la msingi ni kwamba, mimi ni kocha mwenye taaluma na ndiyo inayoniongoza katika kutekeleza majukumu yangu ya kila siku.
Siwezi kwenda kinyume na mafundisho niliyopewa wakati nikisomea kazi hii, ikiwa ni pamoja na kuzingatia uwezo wa mchezaji katika upangaji wa timu, afya yake na mambo mengine muhimu ya kiufundi.
Mchezo wa soka una mambo mengi, ikiwa ni pamoja na kufahamu kila kitu kinachomuhusu mchezaji wako ndani ya saa 24, iwapo ana matatizo ama anasumbuliwa na jambo lolote linaloweza kumtoa mchezoni. Ni lazima kocha afahamu yote haya kabla ya kuamua kumpanga mchezaji kwenye timu.
SWALI: Kuna tuhuma kwamba kikosi chako kimegawanyika kutokana na kuwepo kwa shinikizo la kupangwa kwa baadhi ya wachezaji kutoka kwa viongozi na wadau wa Simba. Kuna ukweli wowote kuhusu tuhuma hizi?
JIBU: Sidhani kama kuna ukweli wowote kuhusu tuhuma hizo. Kama ingekuwa ni kweli, sidhani iwapo tungeweza kuongoza ligi hadi sasa. Watu wanaoeneza tuhuma hizo, hawana nia njema na Simba na bila shaka wana malengo yao.
Ninachoweza kusema ni kwamba, kwa sasa Simba imetulia na kazi inaendelea kufanyika kwa umakini mkubwa, ingawa yapo matatizo ya hapa na pale ya kiufundi, ambayo hayawezi kukosekana, lakini ninapambana nayo.
SWALI: Ni matatizo yepi, ambayo umekuwa ukikumbana nayo kwa sasa?
JIBU: Matatizo yapo mengi, ikiwa ni pamoja na ongezeko la wachezaji majeruhi na wengine kucheza chini ya kiwango. Mchezaji anapokuwa katika hali hiyo, ninalazimika kumweka pembeni kwenye programu yangu.
Tatizo ni kwamba, mashabiki wengi hawaelewi mambo haya ndio sababu wanapoona mchezaji hapangwi, wanaanza kulalamika na kuhoji na pengine kulitupia lawama benchi la ufundi.
Lakini kwa ujumla ni kwamba ninashirikiana vyema na viongozi kuhakikisha wachezaji wote wanakuwa na afya njema na hali nzuri ya kuwawezesha kuitumikia timu yao kila kukicha. Hakuna kitu kinachoitwa kuwapendelea baadhi ya wachezaji. Mchezaji atachezeshwa kutokana na bidii yake na kujituma kwake.
SWALI: Tatizo lipi kubwa umeliona katika ligi hadi sasa?
JIBU: Tatizo kubwa lililopo na ambalo nadhani ni sugu, ni uchezeshaji mbovu wa baadhi ya waamuzi. Baadhi ya waamuzi wamekuwa hawaitendei haki timu yetu na jambo hili limekuwa likiwavunja nguvu wachezaji.
Waamuzi wengine wanafanya hivyo kutokana na kushindwa kuzitafsiri vyema sheria 17 za soka, lakini wengine wanafanya makusudi kwa sababu, ambazo hazieleweki.
SWALI: Umeshapata kikosi cha kwanza cha Simba baada ya kuwa umeiongoza katika mechi saba za ligi?
JIBU: Kusema ule ukweli, hadi sasa Simba haijawa na kikosi cha kwanza kutokana na sababu mbalimbali. Mojawapo ya sababu hizo ni kuendelea kupima uwezo wa kila mchezaji kutokana na ukweli kwamba wengi ni wapya na hawajazoeana sawasawa.
Huenda baada ya kufikisha mechi 10, nitakuwa nimepata kikosi cha kwanza kwa vile wachezaji watakuwa wamecheza mechi nyingi na kuzoea mikikimikiki ya ligi. Lakini kwa sasa bado kutokana na ugeni wa wachezaji kwenye timu. Tunachokifanya kwa sasa ni kuunganisha mfumo wa uchezaji kutokana na staili ya kila mchezaji.
Tunao wachezaji wapya watatu kwenye timu kutoka nje, Gilbert Kaze, Hamisi Tambwe na Joseph Owino, ambao hawana muda mrefu kwenye timu na wengine tumewapandisha kutoka kikosi cha pili. Lengo letu ni kuwa na kikosi imara na cha ushindi.
SWALI: Unapenda kuwaeleza nini mashabiki wa Simba?
JIBU: Nawaomba watulie na wafahamu kwamba, timu yao inapita kwenye kipindi kigumu kutokana na uwepo wa wachezaji wengi wapya. Itachukua muda kidogo kwa timu yao kuwa imara zaidi hivyo uvumilivu ni kitu muhimu.
Huwezi kumlaumu kocha baada ya kuwa na timu kwa miezi michache na isitoshe tunafanya jitihada kubwa za kuifanya Simba iwe tishio ndio sababu unaona tunaongoza ligi na wapinzani wetu wapo nyuma yetu.

JANUZAJ, KINDA WA UBELGIJI ANAYEWINDWA NA ENGLAND

LONDON, England
KLABU ya Manchester United ya England, imempa mshambuliaji wake chipukizi, Adnan Januzaj ofa ya mshahara wa pauni 60,000 za Uingereza (sh. milioni 138) kwa wiki ili abaki katika klabu hiyo.

Uamuzi huo wa Manchester United umekuja siku chache baada ya chipukizi huyo wa kimataifa wa Ubelgiji, kufunga mabao mawili katika mechi ya ligi dhidi ya Sunderland iliyochezwa kwenye uwanja wa Light.

Januzaj (18), ambaye ni zao lingine la kizazi kipya cha Ubelgiji, alifunga mabao hayo mawili baada ya Manchester United kuwa nyuma kwa bao 1-0. Mechi hiyo ilikuwa ya kwanza kwa Januzaj kucheza kwa dakika 90 katika ligi kuu ya England.
 Mkataba wa chipukizi huyo kuichezea Manchester United, unatarajiwa kumalizika miezi minane ijayo na tayari klabu kadhaa za Ulaya, zikiwemo Manchester City, Real Madrid na Chelsea zimeshaanza kumtolea macho.

Kocha Mkuu wa Manchester United, David Moyes amesema atahakikisha anampa Januzaj mkataba mpya ili abaki katika klabu hiyo.

Staili ya uchezaji anayotumia chipukizi huyo wa Ubelgiji, inafanana na ile ya Wayne Rooney wakati alipokuwa akiichezea Everton kabla ya kunyakuliwa na Manchester United.

"Anajiamini sana,"alisema Rooney. "Vijana wengi wanaochipukia hivi sasa hawajiamini na waoga, lakini anaonekana kuifurahia kazi yake, anajiamini na uwezo wake ni mkubwa. Ni aina ya mchezaji, ambaye kila kocha angependa kuwa naye."

"Anamiliki mpira vizuri, anakimbia na mpira kumwendea adui. Nafikiri kocha amefanya jambo zuri kumjumuisha kwenye kikosi, hasa kutokana na yaliyotokea katika mechi chache zilizopita,"aliongeza Rooney, alipokuwa akimzungumzia chipukizi huyo.

Rooney pia alimtetea Moyes, akisisitisa kuwa hapaswi kulaumiwa kutokana na kufanya vibaya kwa timu hiyo katika ligi. "Amekuja kocha mpya na bado hatujaweza kucheza vizuri. Tunajua ni sisi tunaomuangusha,"alisema.

Mabao ya Januzaj pia yalipunguza presha iliyokuwa ikimkabili Moyes kutoka kwa mashabiki wa klabu hiyo baada ya kuvurunda katika mechi za hivi karibuni.

Moyes ni muumini mkubwa wa vijana wenye vipaji na ndiye aliyemwibua Rooney na kumpa nafasi kwenye kikosi cha Everton. Moyes pia ndiye aliyemwibua chipukizi mwingine wa Manchester United, Ross Barkley katika siku za hivi karibuni.

Kocha huyo wa Manchester United amemwelezea Januzaj kuwa ni mchezaji mzuri na ni vigumu kumzuia anapokuwa na mpira.

"Nakumbuka nilipompa nafasi Rooney katika mechi yake ya kwanza. Januzaj naye ameonyesha uwezo kama aliokuwa nao Rooney. Anafunga mabao na ana uwezo wa kumiliki mpira,"alisema Moyes, ambaye amerithi mikoba ya kocha wa zamani wa timu hiyo, Sir Alex Ferguson.

"Ni mchezaji aliye kwenye kiwango cha juu na atakuwa mchezaji mwenye kipaji cha aina yake. Ningeweza kumchezesha wiki kadhaa zilizopita, lakini alikuwa majeruhi na sikutaka kufanya kosa hilo,"alisema Moyes.

Kwa upande wake, Rio Ferdinand alisema: "Sitaki kumzunguzia sana, lakini ni mchezaji mwenye kipaji, anaweza kuwa mchezaji wa kiwango cha juu. Atakuwa hazina kubwa ya Manchester United siku zijazo."

Katika hatua nyingine, Chama cha Soka cha England kimewasiliana na klabu ya Manchester United kwa ajili ya kumshawishi Januzaj aichezee timu ya taifa ya England.

Januzaj, ambaye alijiunga na Manchester United 2011, akiwa na umri wa miaka 16, akitokea klabu ya Anderlecht ya Ubelgiji, bado hajaamua timu ipi ya taifa atakayoichezea. Chipukizi huyo alizaliwa Ubelgiji na wazazi wake wana asili ya Kosovo na Albania.

"Nafikiri kuna njia inayoweza kumfanya awe na sifa ya kuichezea England,"alithibitisha Moyes. "Nafikiri ni suala la uraia."

Januzaj ameishi England kwa miaka mitano na amekuwa akiitwa mara kadhaa kwenye timu ya taifa ya vijana ya Ubelgiji, lakini hajawahi kuichezea. Pia amekuwa akiitwa kwenye timu za taifa za vijana za Albania na Croatia, lakini amekuwa akizitolea nje.

Alipoulizwa iwapo tayari Chama cha Soka cha England kimeshawasiliana na Manchester United kuhusu suala hilo, Moyes alisema: "Ndiyo, wamefanya hivyo."

Mwanasoka mkongwe wa England,Gary Lineker, ambaye kwa sasa ni mchambuzi wa masuala ya soka katika kituo cha televisheni cha BBC alisema, Januzaj ataruhusiwa kisheria kuichezea England kuanzia 2018.

Kwa mujibu wa kanuni za Shirikisho la Soka la Dunia (FIFA), zilizoanza kutumika Mei 2008, kama mchezaji ameishi katika nchi kwa miaka mitano mfululizo baada ya kutimiza miaka 18, anaruhusiwa kuichezea timu ya taifa ya nchi hiyo.

"Hakuna wasiwasi kwamba ni mchezaji mwenye kipaji na macho yetu sote yako kwake, lakini yapo mambo mengi yanayopaswa kujadiliwa kwanza,"alisema Gary.

Kocha Mkuu wa England, Roy Hodson naye amethibitisha kuwa, amekuwa akimtupia macho kinda huyo na anaweza kuichezea timu ya taifa ya nchi hiyo katika siku zijazo.

"Kama atapata uraia, hilo halina shaka,"alisema kocha huyo." Amekuwepo Manchester United kwa kipindi kirefu na bila shaka majadiliano juu ya suala hilo yanapaswa kupewa uzito wakati tutakapoanza kuwapa uraia wachezaji."

Hivi karibuni, Januzaj alikaririwa akisema kuwa, anataka kuichezea Albania, lakini kutokana na uraia wa wazazi wake, anaweza pia kuzichezea Serbia na Uturuki.

Januzaj alianza kuchezea kikosi cha Manchester United katika mechi ya kuwania Ngao ya Hisani dhidi ya Wigan kabla ya kucheza mechi zingine mbili akitokea benchi. Manchester United inataka kumuongezea mkataba wa miaka mitano.

Chipukizi huyo alizaliwa mjini Brussels, Ubelgiji 1995. Alijiunga na Anderlecht akiwa na umri wa miaka 10. Alijiunga na Manchester United, Machi 2011 kwa ada ya uhamisho wa pauni 297,000.

KAMATI YA JAJI LUANDA KUSIKILIZA RUFANI ALHAMISI

Kamati ya Rufani ya Uchaguzi ya Shirikisho la Mpira wa Miguu Tanzania (TFF) inayoongozwa na Jaji wa Mahakama ya Rufani Tanzania, Bernard Luanda itakutana keshokutwa (Oktoba 10 mwaka huu) kusikiliza rufani zilizowasilishwa mbele yake.

Waombaji uongozi watatu wamekata rufani katika Kamati ya Jaji Luanda wakipinga kutopitishwa kugombea katika uchaguzi wa TFF, uamuzi uliofanywa na Kamati ya Uchaguzi ya TFF kwa ajili ya uchaguzi huo utakaofanyika Oktoba 27 mwaka huu.

Warufani ni Samwel Nyalla aliyeondolewa kugombea ujumbe wa Kamati ya Utendaji kupitia Kanda namba 2 ya mikoa ya Mara na Mwanza kwa kutojaza kikamilifu fomu namba 1 ya maombi ya kugombea uongozi TFF kwa kutoonesha malengo yake.

Ayoub Nyaulingo yeye anapinga kuondolewa kugombea ujumbe wa Kamati ya Utendaji kupitia Kanda namba 6 (Katavi na Rukwa) kwa kutokuwa na uzoefu uliothibitika wa miaka mitano katika uongozi wa mpira wa miguu.

Naye Ayoub Nyenzi amekata rufani kupinga kuondolewa kugombea ujumbe wa Kamati ya Utendaji kuwakilisha Kanda namba 7 (Iringa na Mbeya) kwa kushindwa kuthibitisha uraia wake.

UCHAGUZI BODI YA LIGI SASA OKTOBA 25

Uchaguzi wa viongozi wa Bodi ya Ligi Tanzania (TPL Board) sasa utafanyika Oktoba 25 mwaka huu badala ya Oktoba 18 mwaka huu.

Kamati ya Uchaguzi ya Shirikisho la Mpira wa Miguu Tanzania (TFF) imesogeza mbele uchaguzi huo kutokana na maombi ya Kamati ya Ligi kwa vile baadhi ya wajumbe wa Baraza la Bodi hiyo kuwa vilevile wajumbe wa Mkutano Mkuu wa TFF.

TFF itafanya Mkutano Mkuu wake Oktoba 26 mwaka huu ambao utakuwa na ajenda za kawaida kama zilivyoainishwa katika Katiba yake wakati ajenda ya uchaguzi itakuwa Oktoba 27 mwaka huu.

Wagombea uongozi TPL Board ni Hamad Yahya Juma anayewania nafasi ya Mwenyekiti wakati Makamu Mwenyekiti ni Said Muhammad Abeid. Wanaowania nafasi za ujumbe katika Kamati ya Uongozi ni Kazimoto Miraji Muzo na Omar Khatib Mwindadi.

Kamati ya Uchaguzi ya TFF chini ya Mwenyekiti wake Hamidu Mbwezeleni inatarajia wakati wowote kutangaza tarehe ya kuanza kampeni kwa wagombea katika uchaguzi huo. Baraza la Bodi linaundwa na wajumbe 38 ambao ni wenyeviti 14 wa klabu za Ligi Kuu na wenyeviti 24 wa klabu za Daraja la Kwanza.

UCHAGUZI TFF LAZIMA UFANYIKE OKTOBA 27-TENGA

Rais wa Shirikisho la Mpira wa Miguu Tanzania (TFF), Leodegar Tenga amewahakikishia Watanzania kuwa uchaguzi wa kupata Kamati mpya ya Utendaji ya shirikisho utafanyika Oktoba 27 mwaka huu kama ilivyopangwa.

“Wazungu wanasema ije mvua au jua, uchaguzi utafanyika. Isipokuwa tunachotaka kuhakikisha ni kuwa unakuwa uchaguzi huru na wa haki,” amesema Rais Tenga wakati akizungumza na waandishi wa habari kwenye ofisi za TFF leo mchana (Oktoba 7 mwaka huu).

Amesema mchakato unakwenda vizuri kilichobaki ni revision (mapitio) na rufani, masuala ambayo yako mbele ya Kamati ya Rufani ya Maadili na Kamati ya Rufani ya Uchaguzi.

Rais Tenga amesema lengo la hatua hizo si kuzuia watu wasigombee kwani ni lazima mambo ya msingi ikiwemo sifa za wagombea yaangaliwe, lakini kwenye haki ni lazima kuhakikisha inatendeka hata kama ni kwa mtu mmoja.

Mchakato wa uchaguzi ulivutia waombaji 58 ambapo watatu wamekata rufani Kamati ya Rufani ya Uchaguzi kupinga kuondolewa na Kamati ya Uchaguzi wakati wengine wanane masuala yao yamepelekwa Kamati ya Rufani ya Maadili kwa njia ya mapitio (revision) ili kupata mwongozo wa utekelezaji.

Mwongozo huo umeombwa na Sekretarieti ya TFF kwa Kamati ya Rufani ya Maadili kwa vile Kamati ya Maadili iliwaona waombaji wanane wa uongozi waliofikishwa mbele yake kwa makosa ya kimaadili kutokuwa na hatia, lakini wakati huo huo ikitambua kuondolewa kwao kwenye kinyang’anyiro cha uchaguzi kulikofanywa na Kamati ya Uchaguzi.

MRADI WA FOOTBALL FOR HOPE KUFUNGULIWA OKTOBA 13
Mradi wa Football for Hope kusaidia watoto na wasiojiweza kupitia mpira wa miguu uliofadhiliwa na Shirikisho la Kimataifa la Mpira wa Miguu (FIFA) mkoani Iringa utafunguliwa rasmi Oktoba 13 mwaka huu.

FIFA hutoa mradi huo kwa baadhi ya nchi kwa kuzingatia mambo mbalimbali ikiwemo utawala bora, lakini kwa kupitia taasisi zisizo za kiserikali (NGOs) ambapo kwa Tanzania umepatikana kupitia taasisi ya Iringa Development of Youth, Disabled and Child Care (IDYDCC).

Rais wa TFF, Leodegar Tenga ameishukuru FIFA kwa msaada huo, kwani ni mkubwa na kuongeza kuwa ni matumaini yake utatumika kwa lengo lililopangwa.

Amesema mradi huo wa FIFA ambao ni wa kusaidia watoto kielimu na wasiojiweza kwa kupitia mpira wa miguu haukupita moja kwa moja TFF ni mzuri kwani moja ya mambo uliofanikisha ni kuwepo jengo na sehemu ya watoto kucheza.

Ni wastani wa nchi kumi tu duniani kwa mwaka zinapata mradi huo kutoka FIFA, jambo ambalo Rais Tenga amesema linachangiwa pia na uhusiano na ushirikiano uliopo kati ya Tanzania na shirikisho hilo.

KAMATI YA WANAWAKE, TWFA YAPONGEZWA
Kamati ya Mpira wa Miguu wa Wanawake ya Shirikisho la Mpira wa Miguu Tanzania (TFF) na Chama cha Mpira wa Miguu wa Wanawake Tanzania (TWFA) wamepongezwa kwa kuhakikisha akina mama wanacheza mashindano mbalimbali.

Pongezi hizo zimetolewa na Rais wa TFF, Leodegar Tenga ambapo amesema timu za wanawake zimekuwa zikishiriki katika mashindano mbalimbali licha ya ukweli kuwa hadi sasa hakuna udhamini kwenye mchezo huo.

Amesema mpira wa miguu unaendeshwa na udhamini na kuchangia, jambo ambalo linafanikishwa kwa kiasi kikubwa na uwazi katika matumizi ya fedha, jambo ambalo hivi sasa lipo ndani ya TFF.

Rais Tenga amesema baada ya kuanzisha Kamati ya Ligi, hivi sasa TFF inapata asilimia 4.5 tu ya mapato ya mechi za ligi kutoka asilimia 33 iliyokuwa ikipata wakati anaingia madarakani mwaka 2004.

Amesema asilimia hiyo 4.5 haiwezi kuendesha mpira na ndiyo maana nguvu zinaelekezwa katika kutafuta wadhamini na kuchangia. Pia TFF inatoa zaidi ya asilimia 15 ya Fedha za Msaada wa Maendeleo ya Mpira wa Miguu (FAP) kutoka FIFA kwenye mpira wa miguu wa wanawake ambapo ni nchi chache zinazofikia kiwango hicho.

Hivyo, ametoa mwito kwa kampuni kujitokeza kudhamini au kuchangia timu za Taifa za mpira wa miguu za wanawake ambazo zinashiriki mashindano mbalimbali mwaka huu, kwani gharama za kuziendesha ni kubwa.

Timu ya wakubwa (Twiga Stars) inacheza mashindano ya mchujo ya Fainali za Afrika (AWC) zitakazofanyika mwakani nchini Namibia wakati ile ya chini ya miaka 20 inacheza mashindano ya Dunia ambayo fainali pia zitachezwa mwakani nchini Canada.
MECHI YA YANGA, MTIBWA YAINGIZA MIL 97/-
Mechi ya Ligi Kuu ya Vodacom (VPL) iliyochezwa jana (Oktoba 6 mwaka huu) Uwanja wa Taifa, Dar es Salaam kati ya Yanga na Mtibwa Sugar imeingiza sh. 97,557,000.

Watazamaji waliokata tiketi kushuhudia pambano hilo namba 46 lililochezeshwa na Isihaka Shirikisho kutoka Tanga walikuwa 17,313. Yanga ilishinda mabao 2-0.

Viingilio katika mechi hiyo vilikuwa sh. 5,000, sh. 8,000, sh. 15,000 na sh. 20,000 huku kila klabu ikipata mgawo wa sh. 23,453,748.95 wakati Kodi ya Ongezeko la Thamani (VAT) iliyolipwa ni sh. 14,881,576.27.

Mgawo mwingine wa mapato hayo ni asilimia 15 ya uwanja sh. 11,925,635.06, gharama ya kuchapa tiketi ni sh. 3,171,190 wakati gharama za mchezo ni sh. 7,155,381.04.

Kamati ya Ligi sh. 7,155,381.04, Mfuko wa Maendeleo ya Mpira wa Miguu (FDF) sh. 3,577,690.52 na Chama cha Mpira wa Miguu Mkoa wa Dar es Salaam (DRFA) sh. 2,782,648.18.

Boniface Wambura Mgoyo
Ofisa Habari
Shirikisho la Mpira wa Miguu Tanzania (TFF)

YANGA RAHA SANA

YANGA jana ilichupa nafasi za juu katika msimamo wa ligi kuu ya soka ya Tanzania Bara baada ya kuibuka na ushindi wa mabao 2-0 dhidi ya Mtibwa Sugar.

Mechi hiyo iliyochezwa kwenye Uwanja wa Taifa, Dar es Salaam, ilikuwa na ushindani mkali kutokana na kila timu kuonyesha kandanda ya kiwango cha juu.

Matokeo hayo yameiwezesha Yanga kushika nafasi ya pili katika msimamo wa ligi hiyo, ikiwa na pointi 12 baada ya kucheza mechi saba, nyuma ya Simba inayoongoza kwa kuwa na pointi 15.

Mshambuliaji Mrisho Ngasa aliiandikia Yanga bao la kwanza dakika ya saba baada ya kupokea pasi kutoka kwa Didier Kavumbagu na kufumua shuti lililompita kipa Hussein Sharrifu na mpira kutinga wavuni.

Baada ya kufunga bao hilo, Ngasa alikwenda kwenye jukwaa linalokaliwa na mashabiki wa Simba na kuwaonyesha ishara za kuwadhihaki.

Bao la pili la Yanga lilifungwa na Kavumbagu dakika ya 24 baada ya kazi nzuri iliyofanywa na Ngasa, aliyemtoka beki Paul Ngelema wa Mtibwa.

Katika mechi nyingine ya ligi hiyo iliyochezwa jana, Prisons iliichapa Mgambo JKT bao 1-0 kwenye Uwanja wa Mkwakwani mjini Tanga.

SIMBA CHUPUCHUPU KWA RUVU SHOOTING, PAMBANO LAINGIZA MIL 75/-

SIMBA jana iliponea chupuchupu kuadhiriwa na Ruvu Shooting baada ya kulazimishwa kutoka nayo sare ya bao 1-1 katika mechi ya ligi kuu ya Tanzania Bara iliyochezwa kwenye Uwanja wa Taifa, Dar es Salaam.

Ruvu Shooting ilikuwa ya kwanza kupata bao dakika ya 15 lililofungwa na Saidi Dilunga baada ya kuwazidi mbio mabeki Joseph Owino na Gilbert Kaze wa Simba. Bao hilo lilidumu hadi mapumziko.

Mrundi, Hamisi Tambwe aliisawazishia Simba kwa njia ya penalty dakika ya 52 baada ya Betram Mombeki kuangushwa ndani ya eneo la hatari.

Kwa matokeo hayo, Simba bado inaongoza ligi hiyo ikiwa na pointi 15 baada ya kucheza mechi saba, ikifuatiwa na JKT Ruvu yenye pointi 12, Azam, Coastal Union, Mbeya City na Kagera Sugar zenye pointi 11 kila moja.

Katika mechi zingine za ligi hiyo zilizochezwa jana, Coastal Union ilitoka suluhu na Azam, Mbeya City iliichapa JKT Oljoro mabao 2-1 wakati JKT Ruvu iliichapa Kagera Sugar 2-0.

PAMBANO LA RUVU, SIMBA LAINGIZA MIL 75/-

Pambano la Ligi Kuu ya Vodacom (VPL) kati ya wenyeji Ruvu Shooting na Simba lililochezwa jana (Oktoba 5 mwaka huu) katika Uwanja wa Taifa, Dar es Salaam imeingiza sh. 75,692,000.

Watazamaji waliokata tiketi kushuhudia pambano hilo namba 43 la VPL msimu wa 2013/2014 lililomalizika kwa timu hizo kutoka sare ya bao 1-1 walikuwa 13,395.

Viingilio katika mechi hiyo vilikuwa sh. 5,000, sh. 8,000, sh. 15,000 na sh. 20,000 huku kila klabu ikipata mgawo wa sh. 17,983,902.31 wakati Kodi ya Ongezeko la Thamani (VAT) iliyolipwa ni sh. 11,546,237.29.

Mgawo mwingine wa mapato hayo ni asilimia 15 ya uwanja sh. 9,144,357.11, tiketi sh. 3,183,382, gharama za mechi sh. 5,486,614.26, Kamati ya Ligi sh. 5,486,614.26, Mfuko wa Maendeleo ya Mpira wa Miguu (FDF) sh. 2,743,307.13, Chama cha Mpira wa Miguu Mkoa wa Pwani (COREFA) sh. 1,066,841.66 na Chama cha Mpira wa Miguu Mkoa wa Dar es Salaam (DRFA) sh. 1,066,841.66.

 

UAMUZI KAMATI YA MAADILI KUFANYIWA MAPITIO

Shirikisho liko kwenye hatua za mwisho za mchakato wa Uchaguzi Mkuu uliopangwa kufanyika tarehe 26/27 Oktoba 2013 hapa jijini Dar es salaam.

 

Hivi sasa, wagombea wanasubiri vyombo vya juu vya uamuzi kwa ajili ya kutoa uamuzi wa mwisho kabla ya kuanza kampeni na hatimaye uchaguzi.

 

Hata hivyo, baada ya Kamati ya Maadili kufanya uamuzi dhidi ya kesi nane zilizowasilishwa mbele yake, Sekretarieti imeona kuwepo kwa ukakasi katika utekelezaji wa uamuzi huo kutokana na ukweli kuwa kuna baadhi ya mambo yanaonekana kuwa na ugumu katika kuyatekeleza.

 

Sekretarieti si chombo chenya mamlaka ya kutafsiri uamuzi wa vyombo huru vya Shirikisho, kazi yake kubwa ni kupokea uamuzi na kuutekeleza, hivyo kwa kuwa kuna ukakasi huo imeamua kuwasilisha uamuzi huo kwenye Kamati ya Rufani ya Maadili kwa ajili ya kuufanyia mapitio (revision) na pia kutoa mwongozo kabla ya kurejesha uamuzi huo kwenye Kamati ya Uchaguzi kwa ajili ya kuendelea na mchakato.

 

Sekretarieti imefanya hivyo kwa lengo la kusaidia wagombea ambao wengi wanaonekana kuwa njia panda baada ya kupokea uamuzi wa Kamati ya Maadili na kuiuliza Sekretarieti kuwa inakuwaje Kamati ya Maadili iwaone hawana hatia, lakini hapo hapo ikubaliane na uamuzi wa kuwaengua, jambo ambalo kwa kweli limetufanya tukose majibu sahihi na hivyo kuamua kuomba revision na mwongozo.

 

Pia mwongozo utakaotolewa na Kamati ya Rufani ya Maadili utasaidia kuweka mwelekeo mzuri wa masuala ya Maadili katika siku zijazo.

 

Miongoni mwa mambo yanayoonekana kuwa na ukakasi ni kuwaona watu wote ambao kesi zao ziliwasilishwa kwenye Kamati ya Maadili hawana hatia, lakini hapo hapo kukubaliana na uamuzi wa Kamati ya Uchaguzi wa kuwaengua baadhi yao kwa sababu za kinidhamu ikisema haiwezi kuwahukumu mara mbili kwa kuwa wameshaadhibiwa kwa kuenguliwa kwenye uchaguzi.

 

Ili haki itendeke na ionekane inatendeka, Sekretarieti imeona ni vizuri masuala hayo yakafanyiwa revision (mapitio) na kutolewa mwongozo ili kuondoa ukakasi uliojitokeza miongoni mwa wagombea, Shirikisho na wadau na hivyo kujenga hisia kuwa kuna mbinu zimefanyika dhidi ya baadhi ya wagombea.

 

Uamuzi huu haumaaniishi kuwa Sekretarieti inapingana na uamuzi wa Kamati ya Maadili, bali ni utaratibu wa Sekretarieti kuomba ufafanuzi au mwongozo kutoka vyombo husika pindi inapotokea ukakasi katika utekelezaji wa uamuzi wa vyombo vya uamuzi vya Shirikisho.

 

Sekretarieti imeshamwandikia Mwenyekiti wa Kamati ya Rufani za Maadili ili aitishe kikao kwa manajiri ya kufanya mapitio na kutoa mwongozo ambao utasaidia Shirikisho kuendelea na uchaguzi bila ya ukakasi.

 

SERIKALI, TAASISI ZAOMBWA KUISAIDIA U20 WANAWAKE

Shirikisho la Mpira wa Miguu Tanzania (TFF) limeiomba Serikali, taasisi na kampuni mbalimbali kuisaidia timu ya Taifa ya mpira wa miguu ya wanawake kwa vijana wenye umri chini ya miaka 20 inayojiwinda kwa mechi ya Kombe la Dunia dhidi ya Msumbiji.

 

Timu hiyo hivi sasa iko kambini Mlandizi mkoani Pwani chini ya Kocha Rogasian Kaijage kujiandaa kwa mechi hiyo ya kwanza ya raundi ya kwanza itakayochezwa Oktoba 26 mwaka huu katika Uwanja wa Taifa, Dar es Salaam.

 

Mwenyekiti wa Kamati ya Mpira wa Miguu ya Wanawake ya TFF, Lina Kessy amesema hiki ndio kipindi muafaka cha kuisaidia timu hiyo ili iweze kufanya vizuri katika mashindano hayo.

 

Ameitaka jamii kujitokeza kuisaidia timu hiyo ambayo haina mdhamini wala mfadhili, kwani timu za Taifa ni za Watanzania badala ya kusubiri ifanye vibaya na kusema ni kichwa cha mwendawazimu.

 

Kessy ambaye pia ni Mwenyekiti wa Chama cha Mpira wa Miguu wa Wanawake Tanzania (TWFA), ameishukuru kambi ya JKT Ruvu kwa kutoa fursa ya kambi kwani timu hiyo hailipii malazi badala yake inalipia huduma nyingine inazopata hapo.

 

Vilevile amewashukuru wadau mbalimbali ambao wamekuwa wakijitolea kutokana na ukweli kuwa tangu kuanza mashindano ya mpira wa miguu wa wanawake kumekuwepo uungwaji mkono mkubwa.

 

“Shukrani za kipekee kwa wazazi kukubali watoto wao wachezee timu ya Taifa, kwani wengi bado wanasoma na wapo chini ya uangalizi wa wazazi. Pia tunawaomba wazazi wajitokeze mazoezini ili kuwajenga kisaikolojia wachezaji wetu,” amesema.

 

Fainali za Dunia za U 20 kwa wanawake zitafanyika mwakani nchini Canada. Iwapo Tanzania itaitoa Msumbiji katika raundi hiyo, raundi inayofuata itacheza na mshindi kati ya Botswana na Zimbabwe.

 

WASHABIKI WENYE SILAHA MARUFUKU VIWANJANI

Shirikisho la Mpira wa Miguu Tanzania (TFF) kupitia Jeshi la Polisi kuanzia sasa halitashikilia silaha za washabiki, na badala yake litawazuia kabisa kuingia viwanjani wakati wa mechi.

 

Jeshi la Polisi limekuwa likihifadhi silaha za washabiki wanaokwenda viwanjani, na baadaye kuwarejeshea baada ya mechi kumalizika kwa vile Kanuni za Usalama Viwanjani za Shirikisho la Kimataifa la Mpira wa Miguu (FIFA) zinakataza silaha viwanjani.

 

Wikiendi iliyopita katika Uwanja wa Taifa, Dar es Salaam, Jeshi la Polisi lilikamata bastola 17 katika upekuzi wa washabiki waliokwenda kushuhudia mechi kati ya Yanga na Ruvu Shooting na ile kati ya JKT Ruvu na Simba. Wote waliokutwa na silaha hizo walikuwa na leseni za kuzimiliki.

 

Hivyo, kwa washabiki wanaomiliki silaha hatawaruhusiwa kabisa kuingia viwanjani, na badala yake tunawashauri kuzihifadhi huko wanakotoka kabla ya kufika viwanjani.

 

Pia tunatoa mwito kwa shabiki ambaye atamuona mwenzake akiwa na silaha uwanja kutoa taarifa kwa mamlaka husika likiwemo Jeshi la Polisi ili aweze kuchukuliwa hatua.

MOTO WATEKETEZA MALI ZA NIYONZIMA

Haruna Niyonzima akiwa amekaa nyumbani kwake Magomeni baada ya kumaliza kuzima shoti ya umeme iliyokuwa inateketeza mali zake

Kiungo wa kimataifa wa timu ya Taifa ya Rwanda, Haruna Niyonzima, ambaye pia ni mchezaji wa mabingwa wa Ligi Kuu ya Vodacom, Young Africans amepatwa na janga la kuunguliwa kwa baadhi ya mali zake, kufuatia kutokea shoti ya umeme leo asubuhi.

Niyonzima, ambaye anaishi eneo la Magomeni Makuti, Dar es Salaam, amekutwa na tatizo hilo leo saa 12 asubuhi, akiwa anajiandaa kwenda mazoezini.

Mchezaji huyo alishtuka kuona moshi ukifuka kutokea eneo la sebuleni kwake na aliposogea, alibani ni moto ulikuwa ukiwaka.

"Nilisikia hewa nzito ndani, nikaamka kuelekea sebuleni, nilipofika nilikuta moto umetanda chumba kizima, ndipo majirani walijitokeza na kuanza kutusaidia kuzima moto huo kwa kuvunja madirisha ya vioo na kumwaga maji ili moto huo uzimike," alisema Niyonzima

"Nashukuru tulifanikiwa kuuzima moto baada ya muda kwa kushirikiana na majirani, lakini vitu vyote vilivyokuwa ndani hatukufanikiwa kuivitoa vikiwa salama. Baadhi ya vitu vilivyoungua ni pamoja na luninga iliyokua imefungwa ukutani, redio (music system), makochi na fenicha za ndani,"aliongeza.

Niyonzima alisema anahisi moto huo ulitokana na shoti ya umeme juu ya dari kwa vile ndio sehemu iliyokuwa chanzo cha moto huo.

Ofisa Habari wa Yanga, Baraka Kizuguto alifika nyumbani kwa Niyonzima saa mbili
asubuhi na kuzungumza na mchezaji huyo, ambaye alisema anashukuru familia yake iko salama na hakuna aliyedhurika zaidi ya vitu vilivyoteketea na moto.

Uongozi wa Yanga umempa pole Niyonzima kwa matatizo yaliyomfika na kumuomba Mungu amjalie nguvu na uvumilivu na kwamba upo pamoja naye katika wakati huu mgumu.

WARUNDI KUZICHEZESHA TWIGA STARS NA MSUMBIJI

Shirikisho la Mpira wa Miguu Afrika (CAF) limeteua waamuzi kutoka Burundi kuchezesha mechi ya mchujo ya Kombe la Dunia kwa wanawake chini ya miaka 20 Kanda ya Afrika kati ya Tanzania na Msumbiji.

Waamuzi hao watakaochezesha mechi hiyo ya kwanza ya raundi ya kwanza itakayofanyika Uwanja wa Taifa, Dar es Salaam kati ya Oktoba 26 na 27 mwaka huu wataongozwa na Ines Niyonsara. Atasaidiwa na Jacqueline Ndimurukundo na Axelle Shikana.

Irene Namiburu kutoka Uganda ndiye atakayekuwa mwamuzi wa mezani wakati Kamishna wa mechi hiyo ni Evelyn Awuor wa Kenya. Mechi ya marudiano itachezwa jijini Maputo kati ya Novemba 9 na 10 mwaka huu, na itachezeshwa na waamuzi kutoka Madagascar.

Fainali hizo za Kombe la Dunia zitafanyika mwakani nchini Canada, ambapo Tanzania inashiriki kwa mara ya kwanza michuano hiyo ya Kombe la Dunia kwa wasichana.

Timu ya Tanzania tayari imepiga kambi mkoani Pwani ikiwa chini ya Kocha wake, Rogasian Kaijage.

Wachezaji walioko kambini ni Amina Ally, Amina Ramadhan, Amisa Athuman, Anastazia Anthony, Anna Hebron, Belina Julius, Donisia Daniel, Esther Mayala, Fatuma Issa, Gerwa Lugomba, Happiness Lazoni, Harriet Edward, Hellen Maduka, Irene Ndibalema, Jane Cloud, Khadija Hiza na Latifa Salum.

Wengine ni Maimuna Hamis, Mwanaidi Khamis, Najiati Abbas, Neema Paul, Niwael Khalfan, Rehema Abdul, Sabahi Hashim, Sada Ramadhan, Shamimo Hamis, Shelder Boniface, Stumai Abdallah, Tatu Idd, Therese Yona, Violet Nicholas, Vumilia Maarifa, Yulitha Kimbuya na Zena Said.

WATATU KUSHIRIKI KOZI YA FUTURO ADDIS ABABA
Watanzania watatu ni miongoni mwa washiriki 30 walioteuliwa kuhudhuria kozi ya wakufunzi ya waamuzi ya FUTURO III itakayofanyika Addis Ababa, Ethiopia kuanzia Oktoba 5 hadi 10 mwaka huu.

Leslie Leonard Liunda, Abdi Soud Mohamed na Israel Nkongo Mujuni ndiyo watakaoshiriki katika kozi hiyo itakayoendeshwa na wakufunzi kutoka Shirikisho la Kimataifa la Mpira wa Miguu (FIFA).

Kozi hiyo pia itakuwa na washiriki kutoka nchi nyingine tisa za Afrika. Nchi hizo ni Gambia, Ghana, Kenya, Liberia, Nigeria, Seychelles, Sierra Leone, Somalia na Uganda.

JULIO; KASEJA BADO BONGE LA KIPA

 

KOCHA Msaidizi wa timu ya soka ya Simba, Jamhuri Kihwelo 'Julio' amesema bado anaamini kuwa, nahodha wa zamani wa timu hiyo, Juma Kaseja ndiye kipa bora nchini kwa sasa.

Julio alisema mjini Dar es Salaam wiki hii kuwa, hakuna kipa anayeweza kufikia uwezo wa Kaseja kwa sasa ni kwamba watu wasiokubali ukweli huo, wanalo jambo kwenye mioyo yao.

"Kuna watu wanaomkataa Mwenyezi Mungu licha ya ukweli kwamba ndiye aliyetuumba, vivyo hivyo wapo wanaompinga Kaseja kwa sababu zao, lakini kwangu mimi Kaseja bado kipa bora nchini kwa sasa,"amesema Julio.

Julio alieleza kusikitishwa kwake na taarifa kuwa, wapo watu waliopeleka taarifa mbaya kwa klabu ya FC Lupopo ya Jamhuri ya Kidemokrasi ya Congo kuhusu Kaseja ili isimsajili msimu huu.

Amesema watu waliotoa taarifa hiyo kwa FC Lupopo hawamtakii mema kipa huyo na kwamba wana roho mbaya na hawataki afike mbali kimaendeleo.
                                                           ROHO MBAYA
Julio amesema moja ya sababu zinazokwamisha maendeleo ya soka nchini ni baadhi ya watu kupenda kufitiniana na kujengeana chuki bila sababu za msingi na wengine kutofurahia maendeleo ya wenzao.

"Tanzania itapata mafanikio katika soka na michezo mingine, iwapo kizazi cha sasa kitatoweka. Pengine kizazi kijacho ndicho kitakacholeta mabadiliko,"amesema mchezaji huyo wa zamani wa Simba na timu ya Taifa, Taifa Stars.

Julio amesema tabia ya wivu na roho mbaya miongoni mwa wadau wa soka nchini, ndiyo iliyomfanya aamue kuwapaleka watoto wake kwenye shule ya soka iliyoko Arabuni.

Amesema awali, aliwapeleka watoto wake hao Arabuni kwa msaada wa mfanyabiashara marehemu Isihaka Kibene na baada ya kuonyesha maajabu, wamepata nafasi katika shule moja iliyoko katika mji wa Abu Dhabi.

Julio amesema watoto wake hao, Super na Kihwelo, ambao wamemaliza kidato cha nne, maendeleo yao ni mazuri na wamemweleza wakala wao kwamba wanataka kwenda kucheza soka ya kulipwa Ulaya.

"Sikupenda niwaingize kwenye timu za Bongo kwa sababu ya wivu na roho mbaya. Wangeweza kuumizwa ama kufanyiwa lolote baya ili kukwamishwa,"amesema beki huyo, ambaye aliwahi kucheza soka ya kulipwa Arabuni kwa zaidi ya miaka saba.
                                                      SHULE ZA SOKA
Kocha huyo ametoa mwito kwa serikali kujenga uwanja mwingine wa kisasa wa soka katika eneo la Jangwani au Tanganyika Packers, Dar es Salaam ili kuongeza hamasa ya mchezo huo.

Julio pia ametoa mwito wa kuanzishwa kwa shule nyingi zaidi za soka kwa lengo la kuibua vipaji vya vijana na kuwaendeleza. Amesema Tanzania inayo hazina ya vijana wengi wenye vipaji vya kucheza soka, lakini kinachokosekana njia za kuwaibua na kuwaendeleza.

Kocha huyo mwenye makeke hakuwa tayari kueleza matumaini ya Simba katika msimu huu wa ligi kwa madai kuwa ni mapema kufanya hivyo kwa kuwa ligi ndiyo kwanza imeanza.

Vilevile alikataa kueleza matumaini ya timu yake katika mechi yao dhidi ya watani wa jadi Yanga, itakayopigwa Oktoba 20 mwaka huu kwa madai kuwa, mechi kati yao huwa hazitabiriki.

                                                        BONGO MOVI
Julio amewataka wasanii wa filamu na muziki wa kizazi kipya nchini, kujenga uhusiano wa karibu na wanamichezo badala ya kujiona wapo juu kuliko wenzao.

Amesema amekuwa akisitishwa na tabia ya wasanii wa Bongo Movi kushindwa kutoa ushirikiano kwa wanamichezo, hasa wakati wa misiba kwa kujiona wapo matawi ya juu.

"Sisi wanamichezo tulishiriki vizuri katika msiba wa marehemu Steven Kanumba, lakini  wakati wa msiba wa marehemu Patrick Mafisango, hakuna mcheza filamu hata mmoja aliyeonekana msibani," alisema.

Julio ni mtoto wa pili katika familia ya watoto tisa ya marehemu Kihwelo. Kwa sasa wamebaki watoto sita baada ya watatu kufariki. Watoto wote wa kiume walikuwa wakijihusisha na soka, wakifuata nyayo za kaka yao, marehemu Mussa Kihwelo.

Alianza kucheza soka katika kikosi cha Simba Kids miaka ya 1980 kabla ya kupandishwa kikosi cha Simba B na baadaye timu ya wakubwa, ambayo aliichezea kwa miaka 11. Pia aliichezea Taifa Stars kwa miaka sita.

MABAO 90 YAFUNGWA LIGI KUU

JUMLA ya mabao 90 yameshatinga wavuni hadi sasa katika michuano ya soka ya ligi kuu ya Tanzania Bara, inayoendelea kwenye viwanja mbalimbali nchini.

Katika mabao hayo, Simba inaongoza kwa kufunga mabao 15, ikifuatiwa na Yanga iliyofunga mabao 11 na Azam iliyofunga mabao tisa. Kagera Sugar na Rhino Rangers zinashika nafasi ya nne kwa kufunga mabao saba kila moja.

Coastal Union, JKT Ruvu, Ruvu Shooting na Mbeya City zinashika nafasi ya tano kwa kufunga mabao sita kila moja, zikifuatiwa na Mtibwa Sugar iliyofunga mabao matano na Ashanti yenye mabao manne. JKT Oljoro na Prisons zimefunga mabao matatu kila moja wakati Mgambo JKT imeambulia mabao mawili.

Ashanti ndiyo timu yenye ngome dhaifu kuliko zote hadi sasa baada ya kuruhusu kufungwa mabao 15, ikifuatiwa na Mgambo JKT iliyofungwa mabao 10 na Prisons iliyochapwa mabao tisa.

Rhino Rangers imefungwa mabao manane, ikifuatiwa na Yanga iliyofungwa mabao saba, Mtibwa Sugar, JKT Oljoro na Azam zimefungwa mabao sita kila moja, Mbeya City imefungwa mabao matano wakati Ruvu Shooting, JKT Ruvu na Simba zimefungwa mabao manne kila moja.

Kagera Sugar na Coastal Union ndizo zenye ngome ngumu kuliko timu zote kutokana na kufungwa mabao matatu kila moja.

Timu pekee, ambazo hazijaonja ladha ya ushindi katika ligi hiyo hadi sasa ni Prisons na Ashanti wakati Simba inaongoza kwa kushinda mechi nne kati ya sita, ikifuatiwa na Kagera Sugar, JKT Ruvu na Ruvu Shooting zilizoshinda mechi tatu kila moja.

Timu zilizoambulia ushindi katika mechi mbili ni Azam, Coastal Union na Yanga wakati timu zilizoambulia ushindi wa mechi moja ni Mbeya City, Rhino Rangers, Mtibwa Sugar, JKT Oljoro na Mgambo JKT.

Simba inaongoza ligi hiyo kwa kuwa na pointi 14 baada ya kucheza mechi sita, ikifuatiwa na Kagera Sugar yenye pointi 11 wakati Azam na Coastal Union zinashika nafasi ya tatu na nne, zikiwa na pointi 10 kila moja.

Mabingwa watetezi Yanga wanashika nafasi ya tano kwa kuwa na pointi tisa, sawa na JKT Ruvu na Ruvu Shooting, Mbeya City ni ya nane ikiwa na pointi nane, Rhino na Mtibwa zinashika nafasi ya tisa na kumi zikiwa na pointi saba kila moja wakati JKT Oljoro na Mgambo JKT zinashika nafasi ya 11 na 12 zikiwa na pointi tano kila moja.
Prisons ni ya 13 ikiwa na pointi nne wakati Ashanti inashika mkia kwa kuwa na pointi mbili.
Wakati huo huo, mshambuliaji Hamisi Tambwe anaongoza kwa ufungaji mabao katika ligi kuu ya Tanzania Bara.

Mshambuliaji huyo wa kimataifa kutoka Burundi amefunga mabao saba katika mechi tano alizoichezea Simba hadi sasa. Tambwe hakucheza mechi ya kwanza dhidi ya Rhino Rangers kutokana na kukosa hati ya uhamisho wa kimataifa.

Tambwe hadi sasa anashikilia rekodi ya kufunga mabao manne katika mechi moja baada ya kuifungia Simba idadi hiyo ya mabao ilipoibuka na ushindi mnono wa mabao 6-0 dhidi ya Mgambo JKT.

Mrundi huyo pia aliifungia Simba mabao mawili ilipotoka sare ya mabao 2-2 na Mbeya City kabla ya kufunga bao lingine mwishoni mwa wiki iliyopita katika mechi dhidi ya JKT Ruvu, ambapo Simba iliibuka na ushindi wa mabao 2-0.

Tambwe anafuatiwa kwa karibu na Jerry Tegete , Didier Kavumbagu (Yanga), Haruna Chanongo (Simba), Kipre Tchetche (Azam) na Peter Michael (Prisons) waliofunga mabao matatu kila mmoja.
Waliofunga mabao mawili kila mmoja ni Jonas Mkude (Simba), Jerry Santo, Haruna Moshi (Coastal Union), Bakar Kondo (JKT Ruvu), Elias Maguri (Ruvu Shooting), Saady Kipanga (Rhino Rangers), Paul Nonga, Mwagani Yeya (Mbeya City), Hamis Kiiza (Yanga), Themi Felix (Kagera Sugar) na Shaaban Kisiga (Mtibwa Sugar).

RATIBA YA MECHI ZIJAZO ZA LIGI HIYO NI KAMA IFUATAVYO:
Jumamosi, 5,2013
Ruvu Shjooting vs Simba
JKT Ruvu vs Kagera Sugar
Coastal Union vs Azam
JKT Oljoro vs Mbeya City
Jumapili; 6, 2013
Mgambo JKT vs Prisons
Yanga vs Mtibwa Sugar
Oktoba 9, 2013
Rhino Rangers vs Mbeya City
JKT Oljoro vs Ruvu Shooting
Azam vs Mgambo JKT
Mtibwa vs JKT Ruvu
Oktoba12, 2013
Kagera Sugar vs Yanga
Simba vs Prisons
Oktoba 13, 2013
Ashanti vs Coastal Union

MSIMAMO WA LIGI HIYO HADI SASA NI KAMA IFUATAVYO:
  P W D L GF GA PTS
1  Simba SC  6  4  2  0  15  4  14
2  Kagera Sugar  6  3  2  1  7  3  11
3  Azam   6  2  4  0  9  6  10
4  Coastal Union  6  2  4  0  6  3  10
5  Yanga  6  2  3  1  11  7  9
6  JKT Ruvu  6  3  0  3  6  4  9
6  Ruvu Shooting  6  3  0  3  6  4  9
8  Mbeya City  6  1  5  0  6  5  8
9  Rhino Rangers  7  1  4  2  7  8  7
10  Mtibwa Sugar  6  1  4  1  5  6  7
11  JKT Oljoro  6  1  2  3  3  6  5
12  Mgambo JKT  6  1  2  3  2  10  5
13  Prisons  6  0  4  2  3  9  4
14  Ashanti United  7  0  2  5  4  15  2

WAFUNGAJI MABAO
7- Hamisi Tambwe (Simba)
3- Jerry Tegete , Didier Kavumbagu (Yanga), Haruna Chanongo (Simba), Kipre Tchetche (Azam), Peter Michael (Prisons).
2- Jonas Mkude (Simba), Jerry Santo, Haruna Moshi (Coastal Union), Bakar Kondo (JKT Ruvu), Elias Maguri (Ruvu Shooting), Saady Kipanga (Rhino Rangers), Paul Nonga, Mwagani Yeya (Mbeya City), Hamis Kiiza (Yanga), Themi Felix (Kagera Sugar), Shaaban Kisiga (Mtibwa Sugar).
1- Abdi Banda, Crispian Odulla,(Coastal Union), Henry Joseph, Betram Mombeki, Ramadhani Singano (Simba), Haruna Niyonzima, Nizar Khalfan, Simon Msuva (Yanga), Iman Joel, Salum Majid, Mwalimu Musuku, Kamana Salum, Hussein Abdallah (Rhino Rangers), Gaudence Mwaikimba, Seif Abdallah, Khamis Mcha, Aggrey Morris,  John Bocco, Joseph Kimwaga (Azam), Steven Mazanda, Richard Peter (Mbeya City), Laurian Mpalile (Prisons-OG), Shaaban Susan, Jerome Lembeli, Cosmas Ader (Ruvu Shooting), Juma Luzio, Masoud Ally, Shaaban Nditti, (Mtibwa Sugar), Shaaban Juma, Anthony Matangalu, Tumba Swedi, Paul Maono (Ashanti Utd), Abdallah Bunu, Emmanuel Switta, Salum Machaku, Amos Mgisa (JKT Ruvu), Fully Maganga, Hamis Msafiri (Mgambo JKT), Seleman Kibuta, Daud Jumanne, Maregesi Marwa, Godfrey Wambura, Clement Douglas (Kagera Sugar), Shaibu Nayopa, Amir Omary, Paul Malipesa (Oljoro JKT)

NORA AWEKA REHANI SIMU YA MKONONI

MSANII nyota wa filamu nchini, Nuru Nassor 'Nora' ameweka dhamana ya simu yake aina ya Samsung Galaxy ili kufidia deni analodaiwa katika nyumba ya kulala wageni ya Samaria iliyopo Ubungo Makuburi, Dar es Salaam.

Mbali na dhamana hiyo, msanii huyo alilipa sh. 90,000 kwa uongozi wa nyumba hiyo ya wageni ili kufidia deni alilokuwa akidaiwa.

Mkuu wa kituo kidogo cha Polisi cha Mwongozo kilichopo Ubungo Extrenal, Meja Haule, alisema jana kuwa, Nora ameweka dhamana ya simu pamoja na kiasi hicho cha fedha ili kupunguza deni la sh. 250,000 analodaiwa.

Haule alisema uongozi wa nyumba hiyo ya kulala wageni pamoja na Nora walifikia makubaliano ya kulipa deni hilo kwa maandishi baada ya gari la msanii huyo kushikiliwa kituoni hapo hadi atakapolipa deni hilo.

Alisema msanii huyo aliahidi kumalizia deni la sh. 65,000 zilizobaki jana jioni, lakini hadi gazeti hili lilipokuwa linakwenda mtamboni, alikuwa bado hajalipa fedha hizo na kukomboa simu pamoja na gari lake.

"Juzi baada ya kuhangaika huku na kule, alilipa sh. 90,000, akaweka na simu kama dhamana, hivyo akimaliza deni atapatiwa gari lake," alisema Haule.

Juzi, Nora alifikishwa katika kituo kidogo cha Polisi cha Mwongozo akidaiwa sh. 250,000 baada ya kushindwa kulipa fedha hizo kutokana na huduma za malazi alizopatiwa katika nyumba hiyo ya wageni kwa siku saba.

Nora alipanga katika nyumba hiyo akidai kuwa, anafanya kazi ya kuandaa filamu yake mpya, hivyo angelipa deni hilo baada ya kumaliza kazi yake.

Lakini baada ya kukamilisha kazi yake, alikataa kulipa deni hilo na kusema kuwa hana fedha hadi atakapoletewa na bosi wake. Hata hivyo, bosi wake hakutokea.

Baada ya kutokea hali hiyo, uongozi wa nyumba hiyo ya wageni ulizuia gari lake aina ya Vitz lenye namba za usajili T637 BZU, ambapo Nora alikimbilia Polisi kutaka wamsaidie aweze kupewa gari lake.

Tukio hilo ni la pili kwa msanii huyo. Siku tatu zilizopita, alifikishwa kituoni hapo kwa kosa la kupigana baada ya kushindwa kulipa deni la sh. 3,000 katika hoteli ya Lunch Time iliyopo Ubungo External, Dar es Salaam.

Katika tukio hilo, Nora alifungua jalada la kesi ya shambulio la kudhuru mwili lenye namba MWP RB 1171/2013 baada ya kujeruhiwa na mhudumu wa hotel hiyo kutokana na kushindwa kulipa fedha hizo. Jalada la kesi hiyo limehamishiwa katika kituo cha Polisi cha Mbezi, Dar es Salaam.

JANET JACKSON KUASILI MTOTO

LOS ANGELES, Marekani

MIEZI michache baada ya kufunga ndoa kwa siri na bilionea wa Qatar, mwanamuziki nyota wa Marekani, Janet Jackson amepanga kuasili mtoto ili kuongeza familia yake.

Janet, ambaye ni dada wa mwanamuziki nyota wa zamani wa miondoko ya pop duniani, Michael Jackson, anataka kuasili mtoto huyo aidha Jordan au Syria.

Chanzo cha habari kimelieleza gazeti la US Weekly la Marekani juzi kuwa, Janet (47) ameshaanza kufanya taratibu za kuasili mtoto kutoka nchi za dunia ya tatu.

Janet alifunga ndoa na mfanyabiashara huyo, Wissam Al Mana hivi karibuni, lakini ndoa hiyo ilifanywa kuwa siri kubwa.

Kwa mujibu wa chanzo hicho cha habari, Janet anataka kuasili mtoto kwa vile si rahisi kwake kupata uja uzito kwa sasa.

"Ndio sababu ameamua kuasili mtoto. Katika kipindi hiki, ambacho anaishi nje ya Marekani, amekuwa akiguswa sana na matukio yanayotokea katika nchi za Syria na Jordan,"kimesema chanzo hicho cha habari.

Kiliongeza kuwa, bado haijajulikana ni lini mwanamuziki huyo atakamilisha taratibu hizo, lakini tayari ameshaanza kuzifanya.

Kwa mujibu wa gazeti hilo la US Weekly, Janet ameomba msaada wa Malkia Rania wa Jordan ili aweze kukamilisha mpango wake huo.

Gazeti hilo limeongeza kuwa, Janet ana hamu ya kuanzisha familia na Al Mana, ambaye walianzisha uhusiano wa kimapenzi tangu 2010.

"Anataka watoto. Kama hawezi kuwapata, ataasili,"kimesema chanzo hicho cha habari.

Al Mana ni mume wa tatu wa Janet. Awali, aliolewa na James DeBarge na Rene Elizondo. Pia alikuwa na uhusiano wa muda mrefu na Jermaine Dupri.

KAVUMBAGU ATOWEKA YANGA

SIKILIZENI vijana. Nataka ushindi. Sitaki kusikia mnafungwa ama kutoka sare.Hivi ndivyo Mwenyekiti wa Yanga, Yussuf Manji alivyokuwa akiwaambia nahodha wa Yanga, Nadir Haroub 'Cannavaro' na msaidizi wake, Athumani Iddi 'Chuji' wakati wa mazoezi ya gym yaliyofanyika jana kwenye jingo la Quality Centre, barabara ya Nyerere, Dar es Salaam.

MWENYEKITI wa Yanga, Yussuf Manji akiteta jambo na mshambuliaji Mrisho Ngasa wakati wa mazoezi ya gym yaliyofanyika jana kwenye jingo la Quality Centre.

MSHAMBULIAJI Didier Kavumbagu wa Yanga jana aligoma kufanya mazoezi na wachezaji wenzake kutokana na uongozi wa klabu hiyo kupuuza madai yake.

Habari za uhakika kutoka ndani ya Yanga zimeeleza kuwa, mshambuliaji huyo wa kimataifa wa Burundi kodi ya nyumba anayoishi imemalizika na hana pesa zingine za kulipa.

Chanzo cha habari kimeeleza kuwa, Kavumbagu aliwaeleza tatizo hilo viongozi wa Yanga tangu wiki iliyopita, lakini wamekuwa wakimpuuza.

"Hali hiyo ndiyo iliyosababisha Kavumbagu ashindwe kuja mazoezini leo," kilieleza chanzo hicho cha habari.

Wachezaji wa Yanga jana walipelekwa kufanya mazoezi kwenye gym iliyoko kwenye jengo la Quality Centre lililoko barabara ya Nyerere mjini Dar es Salaam.

Kavumbagu amekuwa mchezaji wa pili kutoka nje kugoma kufanya mazoezi na timu hiyo wiki hii. Wengine ni beki Mbuyu Twite na kiungo Haruna Niyonzima.

Twite amegoma kufanya mazoezi kutokana na uongozi wa Yanga kushindwa kumtafutia nyumba ya kuishi na kumlipia kodi kama alivyoomba kwa uongozi wiki iliyopita.

Kwa upande wake, Niyonzima amegoma kufanya mazoezi kutokana na uongozi kushindwa kummalizia pesa zake za usajili. Hata hivyo, haijajulkana kiwango cha pesa anazodai mchezaji huyo.

Mmoja wa watendaji wapya wa Yanga, Patrick Naggi alisema jana kuwa, ni kweli Twite na Kavumbagu wana matatizo ya nyumba za kuishi, lakini hakueleza tatizo hilo litatatuliwa lini.

Hata hivyo, Naggi alisema Niyonzima hajagombea mazoezi, isipokuwa amepatwa na matatizo nchini Rwanda, ambako imedaiwa kuwa, mmoja wa watoto wake amepotea.

Wakati huo huo, Mwenyekiti wa Yanga, Yussuf Manji amewataka wachezaji wa timu hiyo kuhakikisha wanashinda mechi zao zijazo za ligi hiyo dhidi ya Mtibwa Sugar na Kagera Sugar.

Manji alitoa agizo hilo jana alipozungumza kwa faragha na nahodha wa timu hiyo, Nadir Haroub 'Cannavaro' na msaidizi wake, Athumani Iddi 'Chuji' wakati wa mazoezi ya gym yaliyofanyika kwenye jengo la Quality Centre.

Alisema hataki kuona timu hiyo ikifungwa ama kutoka sare kwa sababu matokeo ya aina hiyo yatawaweka kwenye mazingira magumu ya kutetea ubingwa wa ligi kuu msimu huu.

Mwenyekiti huyo wa Yanga amewataka wachezaji kuwa na umoja na kucheza kwa ushirikiano ili waweze kutimiza malengo yao.

Yanga inashika nafasi ya tano katika msimamo wa ligi hiyo, ikiwa na pointi tisa baada ya kucheza mechi sita. Simba inaongoza kwa kuwa na pointi 14 baada ya kucheza idadi hiyo ya mechi.

YANGA YAUMBUKA, ENEO LA JANGWANI KUJENGWA CITY GARDEN, YADAIWA FEDHA ZA KODI YA ARDHI

SERIKALI imesema klabu ya Yanga haiwezi kupewa eneo la ziada kwa ajili ya ujenzi wa uwanja wake wa kisasa wa soka.

Ofisa Habari wa Wizara ya Ardhi, Nyumba na Maendeleo ya Makazi, Rehema Isengo alisema mjini Dar es Salaam jana kuwa, tayari eneo la Jangwani liko katika mipango ya maendeleo.

Msimamo huo wa wizara huenda ukawa pigo kubwa kwa Yanga, ambayo ilipanga kujenga uwanja wa kisasa katika maeneo ya Jangwani, Dar es Salaam.

Mbali na kujenga uwanja wa kisasa, Yanga pia ilipanga kujenga maduka, hoteli, viwanja vya mazoezi, ukumbi wa mikutano na eneo la kuegesha magari.

Klabu hiyo, juzi ilsitisha mkataba wa ujenzi wa uwanja huo na Kampuni ya Beijing Contractors Engineering ya China, ikisubiri majibu ya barua yao ya kupata eneo la nyongeza kutoka Wizara ya Ardhi, Nyumba na Maendeleo ya Makazi.

Rehema alisema katika mazungumzo ya awali kati ya wizara na manispaa, tayari eneo la Jangwani liko kwenye mradi wa kujengwa City Garden, hivyo Yanga haiwezi kupewa eneo hilo.

Alisema Yanga ilishapewa majibu hayo kupitia ofisi ya mipango miji na kuongeza kuwa, wizara haihusiki na ugawaji wa viwanja kwa vile suala hilo lipo chini ya halmashauri. Alisema kazi ya wizara ni kupitia faili lililowasilishwa kabla ya kutia saini.

Mbali na hilo, Rehema alisema Yanga inadaiwa deni la kodi ya ardhi tangu mwaka 1997 hivyo ameitaka kulilipa mara moja.

"Yanga siyo walipaji wazuri wa kodi, wanadaiwa kodi tangu 1997, wameshapewa maelezo wafuatilie na kulipa kodi hiyo,"aliongeza.

Ofisa Habari huyo aliweka wazi kuwa, athari inazoweza kupata Yanga endapo itashindwa kulipa deni hilo ni kunadiwa kwa mali zake au kupelekwa mahakamani.

Ofisa Habari wa Yanga, Baraka Kizuguto hakuwa tayari kuzungumzia suala hilo jana.

FIFA YAIVUTIA PUMZI YANGA, MADAI YA PAPIC YAANZA KUJADILIWA

Shirikisho la Kimataifa la Mpira wa Miguu (FIFA) limewasilisha rasmi suala la madai ya aliyekuwa Kocha wa Yanga, Kostadin Papic dhidi ya klabu hiyo katika Kamati ya Hadhi ya Wachezaji.

FIFA imesema imepeleka rasmi suala hilo katika kamati yake hiyo baada ya kupokea vielelezo vya Papic anayedai kuidai Yanga dola 10,000 za Marekani pamoja na vile vya Yanga inayodai kumlipa kocha huyo fedha zote alizokuwa akiidai klabu hiyo.

Kwa taratibu za FIFA, hivi sasa haitapokea vielelezo vingine kutoka pande hizo mbili, na badala yake Kamati hiyo inayoongozwa na Theo Zwanziger kutoka Ujerumani itafanya uamuzi na kuziarifu pande husika. Zwanziger kitaaluma ni mwanasheria.

Papic aliyeinoa Yanga kwa vipindi viwili tofauti aliwasilisha malalamiko yake FIFA akidai hadi mkataba wake unamalizika klabu hiyo ilikuwa haijamlipa dola 10,000 za Marekani.

LIPULI, MAJIMAJI KUUMANA WAMBI FDL
Mechi ya Ligi Daraja la Kwanza (FDL) kati ya Lipuli ya Iringa na Majimaji ya Songea sasa itachezwa kesho (Oktoba 2 mwaka huu) kwenye Uwanja wa Wambi uliopo Mafinga badala ya Uwanja wa Kumbukumbu ya Samora mjini Iringa.

Mabadiliko hayo yamefanyika kutokana na Serikali kuutumia Uwanja wa Kumbukumbu ya Samora kwa ajili ya shughuli za mbio za Mwenge.

Mechi nyingine ya FDL kesho itakuwa kati ya Tessema FC ya Dar es Salaam na Ndanda FC ya Mtwara, na itafanyika kwenye Uwanja wa Kumbukumbu ya Karume jijini Dar es Salaam.

MICHUANO YA CHALENJI KUANZA NOV 27 HADI DES 12 KENYA

Michuano ya Kombe la Chalenji inayoandaliwa na Baraza la Vyama vya Mpira wa Miguu Afrika Mashariki na Kati (CECAFA) inafanyika Kenya kuanzia Novemba 27 hadi Desemba 12 mwaka huu.

Nchi wanachama ambazo zinataka kushiriki zinatakiwa kuthibitisha ushiriki wao kwa Sekretarieti ya CECAFA kabla ya Oktoba 20 mwaka huu. Wanachama wa CECAFA ni Burundi, Djibouti, Eritrea, Ethiopia, Kenya, Rwanda, Somalia, Sudan, Sudan Kusini, Tanzania, Uganda na Zanzibar.

Michuano hiyo itatanguliwa na Mkutano Mkuu wa CECAFA utakaofanyika Novemba 26 mwaka huu ambao pamoja na mambo mengine utakuwa na ajenda ya uchaguzi. Uchaguzi huo ni kwa ajili ya kujaza nafasi nne za wajumbe wa Kamati ya Utendaji.

Wajumbe wanaomaliza muda wao ni Sahilu Gebremarian wa Ethiopia ambaye pia ni Makamu Mwenyekiti wa CECAFA, Abdigaani Saed Arab (Somalia), Tariq Atta (Sudan) na Raoul Gisanura (Rwanda).

Majina ya wagombea yanatakiwa kuwa yamewasilishwa katika Sekretarieti ya CECAFA kabla ya Oktoba 20 mwaka huu, na yakiwa yamethibitishwa na vyama vyao vya mpira wa miguu.

SIMBA, YANGA ZAINGIZA MIL 182/-

Mechi za Yanga na Simba za Ligi Kuu ya Vodacom (VPL) zilizochezwa wikiendi iliyopita jijini Dar es Salaam zimeingiza jumla ya sh. 182,103,000.

Yanga katika mechi yake dhidi ya Ruvu Shooting iliyochezwa Jumamosi (Septemba 28 mwaka huu) Uwanja wa Taifa, Dar es Salaam na kuibuka na ushindi wa bao 1-0 imeingiza sh. 94,202,000.

Watazamaji 16,492 walikata tiketi kushuhudia pambano hilo ambapo kila klabu ilipata mgawo wa sh. 22,630,921.58. Viingilio katika mechi hiyo vilikuwa sh. 5,000, sh. 8,000, sh. 15,000 na sh. 20,000, na Kodi ya Ongezeko la Thamani (VAT) iliyolipwa ni sh. 14,369,796.61.

Mgawo mwingine wa mapato hayo ni asilimia 15 ya uwanja sh. 11,507,248.26, tiketi sh. 3,117,215, gharama za mechi sh. 6,904,348.96, Kamati ya Ligi sh. 6,904,348.96, Mfuko wa Maendeleo ya Mpira wa Miguu (FDF) sh. 3,452,174.48 na Chama cha Mpira wa Miguu Mkoa wa Dar es Salaam (DRFA) sh. 2,685,024.59.

Nayo Simba ambayo iliibuka na ushindi wa mabao 2-0 dhidi ya JKT Ruvu katika mechi iliyochezwa Jumapili (Septemba 29 mwaka huu) katika Uwanja wa Taifa, Dar es Salaam imeingiza sh. 87,901,000.

Watazamaji waliokata tiketi kushuhudia pambano hilo namba 41 walikuwa 15,780. Viingilio katika mechi hiyo vilikuwa sh. 5,000, sh. 8,000, sh. 15,000 na sh. 20,000 huku kila klabu ikipata mgawo wa sh. 21,051,025.92 wakati Kodi ya Ongezeko la Thamani (VAT) iliyolipwa ni sh. 13,408,627.12.

Mgawo mwingine wa mapato hayo ni asilimia 15 ya uwanja sh. 10,703,911.48, tiketi sh. 3,132,963, gharama za mechi sh. 6,422,346.89, Kamati ya Ligi sh. 6,422,346.89, Mfuko wa Maendeleo ya Mpira wa Miguu (FDF) sh. 3,211,173.44, Chama cha Mpira wa Miguu Mkoa wa Dar es Salaam (DRFA) sh. 1,248,789.67 na Chama cha Mpira wa Miguu Mkoa wa Pwani (COREFA) sh. 1,248,789.67.

Wakati huo huo, mechi ya ligi hiyo kati ya Mbeya City na Coastal Union  iliyochezwa Jumamosi (Septemba 28 mwaka huu) Uwanja wa Kumbukumbu ya Sokoine jijini Mbeya imeingiza sh. 16,959,000 huku kila klabu ikipata sh. 4,035,229.

Mgawo wa mechi hiyo ulikuwa ifuatavyo; Kodi ya Ongezeko la Thamani (VAT) sh. 2,586,966, uwanja sh. 2,051,811.57, tiketi sh. 696,290, gharama za mechi sh. 1,231,086, Kamati ya Ligi sh. 1,231,086, Mfuko wa Maendeleo ya Mpira wa Miguu (FDF) sh. 615,543, Chama cha Mpira wa Miguu Mkoa wa Mbeya (MREFA) sh. 478,756.

MATAWI SIMBA KUANZA KUTOA MAONI YA MAREKEBISHO YA KATIBA LEO

MARA baada ya kupokea maoni mbalimbali kutoka kwa wadau kuhusu mapendekezo ya Katiba ya Simba, uongozi wa klabu unapenda kutoa shukrani za dhati kabisa kwa wote walioshiriki kwenye hatua hiyo.

Mara baada ya kumalizika kwa hatua hiyo ya kwanza, matawi ya Simba sasa yanakaribishwa kuanza kutoa maoni yao kuanzia kesho (Jumanne), Oktoba Mosi mwaka 2013.
Matawi yatajadili na kutoa maoni yao kabla ya kuwasilisha kwa sekretarieti ya klabu iliyopo katika Ofisi za Makao Makuu Mtaa wa Msimbazi Dar es Salaam.

Sekretarieti ya Simba itapokea maoni haya hadi Oktoba 11 mwaka huu.
Sekretarieti ya klabu itayakusanya na kuyachambua maoni yote yaliyotolewa na baada ya uchambuzi huo, yatapelekwa kwa wajumbe wa Kamati ya Utendaji ya Klabu ambao nao watafanya mapitio yao.
Uchambuzi na mapitio yatakayofanywa kwa baraka za Kamati ya Utendaji ndiyo ambayo yatapelekwa kwenye kikao cha Matawi kilichopangwa kufanyika Novemba 11 mwaka huu.
Wiki moja baadaye, yaani Novemba 19 mwaka huu, Kamati ya Utendaji kwa ridhaa iliyopewa na Katiba ya Simba SC, itapitisha vipengele vya kuombewa mabadiliko ya Katiba.
Vipengele hivyo ndivyo ambavyo vitawasilishwa Novemba 24 mwaka huu kwenye Mkutano Maalumu wa Mabadiliko ya Katiba uliotangazwa kufanyika na klabu katika Mkutano Mkuu wa wanachama uliopita.
Uongozi unawaomba wanachama kupitia matawi yao kushiriki kikamilifu katika mchakato huu adhimu kwa klabu. Ni matarajio ya klabu kwamba mchakato huu hautatumika kuwagawa bali kuwafanya wawe kitu kimoja kwa faida ya Simba.
Mungu Ibariki Simba SC. Nguvu Moja.
Imetolewa na
Ezekiel Kamwaga
Ofisa Habari
Simba SC