TAIFA STARS KUJIPIMA NGUVU NA UNIVERSITY OF PRETORIA

Kikosi cha timu ya taifa ya Tanzania ‘Taifa Stars’ kinachodhaminiwa na bia ya Kilimanjaro Premium Lager, Jumapili kinatarajiwa kucheza mchezo wa kirafiki na timu ya University of Pretoria (Tucks FC) jijin Johannesuburg ikiwa ni sehemu ya maandalizi ya mchezo dhidi ya Algeria, Novemba 14, mwaka huu jijini Dar es salaam.

Mchezo huo wa kirafiki ni sehemu ya progamu ya kocha mkuu, Charles Mkwasa baada ya kufanya mazoezi na vijana wake kwa takribani siku nne mpaka sasa, anahitaji kuona maendeleo ya kikosi chake kabla ya kurejea nyumbani kwa mchezo dhidi ya Mbweha wa Jangwani Algeria.

Stars iliyowasili jijini Johannesburg jumatatu mchana, imefikia katika hoteli ya Holiday Inn Express iliopo katika eneo la Woodmead ambapo imekua ikifanya mazoezi yake asubuhi na jioni katika viwanja vya St. Peters College na kituo cha cha michezo cha Edenvale.

Kuhusu hali ya kambi, kocha mkuu wa Stars Charles Mkwasa amesema anashukru maendeleo ni mazuri vijana wake wote wapo katika hali nzuri hakuna majeruhi na wanaendelea na maaandalizi ya mchezo dhidi ya Algeria utakaopigwa Novemba 14 jijini Dar es salaam.

"Dhumuni la kuweka kambi huku ni kupata nafasi ya kuwaanda vijana kwa mazoezi katika mazingira mazuri ikiwamo viwanja vya mazoezi, chakula na malazi kinachopelekea kuongezeka kwa umakini katika mazoezi" Alisema Mkwasa.

"Tumeanza na mazoezi ya kujenga utimamu wa mwili kwa wachezaji, nguvu na stamina, pumzi ili kuhakikisha vijana wote wanakua katika kiwango sawa (fitness level) kisha tutaendelea na mazoezi ya kiufundi kwa siku zilizosalia kabla ya kurejea nyumbani" aliongeza Mkwasa.

Wachezaji 26 waliopo kambini ni magolikipa Ally Mustafa, Aishi Manula na Said Mohamed, walinzi ni Shomari Kapombe, Juma Abdul, Ramadhan Kessy, Mohamed Hussein, Mwinyi Haji, Hassan Isihaka, Salim Mbonde, Kelvin Yondani na nahodha Nadir Haroub “Cannavaro”.

Wengine ni Himid Mao, Frank Domayo, Mudahir Yayha, Salum Abubakar, Said Ndemla, Jonas Mkude, Salum Telela, Farid Musa, Saimon Msuva, Malimi Busungu, Elias Maguri, John Bocco na Mrisho Ngasa.

Aidha wachezaji Mbwana Samatta na Thomas Ulimwengu wanaochezea klabu ya TP Mazembe ya Congo DR, wanatarajiwa kuungana na kikosi cha Stars baada ya mchezo wao wa fainali Ligi ya Mabingwa Afrika Jumapili dhidi ya USM Algiers.

NB: Namba ya Afisa Habari wa TFF aliyepo nchini Afrika Kusini +27 78 641 1595.

MICHUANO YA KOMBE LA SHIRIKISHO KUANZA NOVEMBA 8

Michuano ya Kombe la Shirikisho ya Azam Sports inafunguliwa rasmi Jumapili (Novemba 8, 2015) kwa mechi tatu zitakazochezwa kwenye viwanja vitatu tofauti.

Mechi rasmi ya ufunguzi itakuwa kati ya wenyeji JKT Rwamkoma ya Mara na Villa Squad ya Dar es Salaam itakayofanyika kwenye Uwanja wa Kumbukumbu ya Karume mjini Musoma.

Siku hiyo pia kutakuwa na mechi kati ya Kariakoo ya Lindi na Changanyikeni FC ya Dar es Salaam itakayochezwa kwenye Uwanja wa Ilulu mjini Lindi, wakati Uwanja wa Kumbukumbu ya Sokoine jijini Mbeya utakuwa mwenyeji wa mechi kati ya Wenda FC ya Mbeya na Madini SC ya Arusha.

Bingwa wa michuano hiyo inayodhaminiwa na Azam Sports HD ataiwakilisha Tanzania kwenye michuano ya Kombe la Shirikisho barani Afrika mwaka 2017.

TWIGA STARS KUMUAGA ESTHER CHABRUMA J'MOSI

Mshambuliaji wa timu ya Taifa ya Wanawake ya Tanzania ‘Twiga Stars’ Estha Chaburuma ‘Lunyamila’ ataagwa rasmi katika mchezo wa kirafiki kati ya timu ya Taifa ya Tanzania ya Wanawake ‘Twiga Stars’ dhidi ya timu ya taifa ya wanawake ya Malawi utakaochezwa siku ya jumamosi katika uwanja wa Azam Complex Chamazi jijini Dar es salaam.

Chaburuma amekua ni miongoni mwa wachezaji waanzilishi wa Twiga Stars ambapo amekua akiitumikia timu hiyo tangu kuanzishwa kwake mpaka sasa timu inapojiandaa na mchezo dhidi ya Malawi.

Mwenyekiti wa Kamati ya Soka la Wanawake ya TFF, Amina Karuma amesema wameamua kutumia mchezo huo wa kirafiki kwa ajili ya kumuaga Chabruma ambaye amekua ni chachu ya maendeleo ya mpira wa miguu kwa wanawake, kutokana na kuwafanya wanawake wengi kujitokeza kucheza mchezo huo.

Naye kocha wa timu hiyo, Rogasian Kaijage amesema vijana wake wapo katika hali nzuri, wananadelea na maandalizi ya mchezo huo wa jumamosi, ambapo anaimani watautumia vizuri katika kumuaga mchezaji mwenzao wa siku nyingi.

TFF YATAFUTA SULUHU MGOGORO WA ZFA

Kufuatia tishio la Shirikisho la Mpira wa Miguu Barani Afrika (CAF) la kutaka kuifungia Zanzibar ushiriki wa shughuli za mpira duniani, Rais wa TFF Jamal Malinzi alihitisha kikao cha usuluhishi. 

Kikao hichoi kilikuwa na washiriki toka pande zote za mgogoro ambao ulipelekea mambo ya mpira kupelekwa Mahakamani.

Kikao kimefanyika leo katika Hoteli ya Courtyard Dar Es Salaam chini ya Uenyekiti wa Rais wa TFF,  Jamal Malinzi.

Baada ya kutambua uzito wa suala lenyewe ambalo lingeweza kupelekea Zanzibar kukosa ushiriki michuano ya CAF na CECAFA ili kunusuru soka la Zanzibar na Tanzania kwa ujumla, kikao kimefikia maamuzi yafuatayo:

1. Uitishwe mkutano mkuu wa Zanzibar Football Association (ZFA) wa dharura kujadili

1.1 Mwenendo wa kamati ya utendaji.

1.2. Mapato na matumizi ya ZFA.

1.3. Kuteua kamati ndogo ya kuandika upya Katiba ya ZFA.

2. Rais wa ZFA, Ravia Idarus, kwa mujibu wa Katiba ya ZFA, ndiye atakeyeitisha mkutano huo.

3. Kamati ya sasa inayoendesha ligi Zanzibar, itaongezewa wajumbe watatu watakoteuliwa na Rais wa ZFA.

Ili maamuzi haya yaweze kuwa na nguvu za kisheria na kikatiba, kikao kimeazimia kuwa mashauri yote yaondolewe Mahakamani sasa na waliohusika kufungua mashtaka hayo wamekubali kuyaondoa mara moja.

Shirikisho la Mpira wa Miguu Tanzania (TFF) linazishukuru pande zote na wadau wote wa Mpira wa Zanzibar waliowezesha kufikia hatua hii muhimu katika maendeleo ya Mpira wa Zanzibar na Tanzania kwa ujumla.

STARS YAENDA AFRIKA KUSINI KUIWEKEA KAMBI ALGERIA

Kikosi cha timu ya Taifa ya Tanzania ‘Taifa Stars’ inayodhaminiwa na bia ya Kilimanjaro Premium Lager, kimeondoka leo saa 4 asubuhi kuelekea nchini Afrika Kusini kuweka kambi ya siku 10 kujiandaa na mchezo dhidi ya Algeria Novemba 14 jijini Dar es salaam.

Taifa Stars imeondoka kwa usafiri wa Shirika la Ndege la Fastjet ikiwa na kikosi cha wachezaji 24, pamoja na bechi la ufundi linalongozwa na Kocha Mkuu, Charles Boniface Mkwasa.

Wachezaji waliondoka ni Ally Mustafa, Aishi Manula, Said Mohamed, Juma Abdul, Shomari Kapombe, Ramadhan Kessy, Mohamed Hussein, Haji Mwinyi, Hassan Isihaka, Salim Mbonde, Kelvin Yondani na Nadir Haroub.

Wengine ni Mudathir Yahya, Frank Domayo, Himid Mao, Salum Abubakar, Farid Mussa, Saimon Msuva, Salum Telela, Jonas Mkude, Said Ndemla, Ibrahim Hajibu, Malimi Busungu na John Bocco.

Mshambuliaji wa Stand United, Elias Maguri anatarajiwa kuungana na kikosi hicho kesho baada ya kuitumikia timu yake katika  mchezo wa Ligi Kuu ya Vodacom leo jumatatu dhidi ya Mgambo Shooting katika uwanja wa Mkwakwani jijini Tanga.

Aidha, washambuliaji Mbwana Samatta, Thomas Ulimwengu na Mrisho Ngasa wanaocheza soka nje ya nchi, wataungana na wenzao baada ya michezo ya mwishoni mwa wikiendi hii.

TWIGA STARS YAENDELEA KUWANOLEA KICHINJIO MALAWI

Timu ya Taifa ya Wanawake ‘Twiga Stars’ inayonolewa na kocha mkuu Rogasian Kaijage imendelea na mazoezi kujiandaa na mchezo wa kirafiki dhidi ya Timu ya Taifa ya Wanawake ya Malawi utakaochezwa Novemba 07, mwaka huu jijini Dar es salaam katika uwanja wa Azam Chamazi.

Twiga Stars iliingia kambini Oktoba 29, katika hosteli za Shirikisho zilizopo Karume, ina kikosi cha wachezaji 22 wanaofanya mazoezi asubuhi na jioni katika uwanja wa Karume.

Mchezo dhidi ya Malawi ni mchezo wa kirafiki wa kimataifa, ambao kocha Kaijage atautumia kuangalia maendeleo ya wachezaji wake kwa ajili ya maandalizi ya micheo ya kimataifa.

Wachezaji waliopo kambini ni Asha Rashid, Estha Chaburuma, Fatuma Bushiri, Fatuma Omari, Mwajuma Abdallah, Mwanahamis Omar, Fatuma Khatibu, Amina Ally, Fatuma Issa, Belina Julius, Happines Hezron na Donizia Daniel.

Wengine ni Maimuma Hamisi, Stumai Abdallah, Anna Hebron, Anastazia Anthony, Shelder Boniface, Wema Richard, Tumaini Michael, Jane Cloudy, Saada Ramadhani na Sofia Mwasikili.

TOTO AFRICAN YAPIGWA 5-0 NA AZAM, KOCHA ABWAGA MANYANGA

Kocha Mkuu wa Toto African, Martin Grelics akiagana na wachezaji wake baada ya mchezo na Azam FC kwenye Uwanja wa Chamazi. Kocha amevunja mkataba na timu hiyo.

Wachezaji wa Toto African  wakiwa wamebeba ujumbe uliokuwa unasomeka 'Asante Sana Kocha Martin'

Beki wa Toto African, Salum Chuku (katikati) akichuana na mshambuliaji wa Azam FC, Didier Kavumbagu (wa pili kushoto) wakati wa mchezo wa Ligi Kuu ya Soka Tanzania Bara uliofanyika kwenye Uwanja wa Chamazi jijini Dar es Salaam jana. Azam ilishinda 5-0.

KOCHA Mkuu wa Toto African ya Mwanza, Martin Grelics kutoka Ujerumani, ameamua kubwaga manyanga kuifundisha timu hiyo.

Martin alifikia uamuzi wake huo jana, muda mfupi baada ya Toto African kuchapwa mabao 5-0 na Azam katika mechi ya ligi kuu iliyochezwa kwenye Uwanja wa Chamazi, Dar esSalaam.

Hakuna taarifa zaidi iliyotolewa kuhusu sababu za kocha huyo kubwaga manyanga,lakini wachambuzi wa masuala ya soka wameeleza kuwa, haridhishwi na usimamizi na uendeshaji wa timu hiyo.

Hivi karibuni, kocha huyo alikiri hadharani kuwa mwenendo mbaya wa timu hiyo katika ligi unatokana na wachezaji kutolipwa mishahara na pia kupata huzuma nzuri.

Ushindi wa jana uliiwezesha Azam kurejea tena kwenye uongozi wa ligi, uliokuwa ukishikiliwa na Yanga, ambayo juzi iliichapa Kagera Sugar mabao 2-0 mjini Tabora. Azam iko mbele kwa tofauti ya pointi mbili.


Katika mchezo huo, ambao wachezaji wa Toto waliingia na bango la kumuanga rasmi kocha wao, Mjerumani Martin, Azam FC walimaliza kipindi cha kwanza wakiwa wanaongoza 3-0.

Beki wa kulia Shomary Kapombe alifunga mabao mawili dakika za 34 na 36, akimalizia kazi nzuri ya winga Farid Mussa, wakati la tatu lilifungwa na Kipre Herman Tchetche dakika ya 45 akimalizia pasi ya kisigino ya Didier Kavumbangu.

Na mabao hayo yalikuja baada ya Toto kumpoteza kipa wake wa kwanza, Mussa Mohammed aliyeumia dakika ya 18 na nafasi yake kuchukuliwa na kipa wa pili, Said Omar.

Azam FC nayo ilipata pigo dakika ya 33 baada ya kiungo wake wa ulinzi, Himid Mao kuumia pia na nafasi yake kuchukuliwa na Mnyarwanda, Jean Baptiste Mugiraneza.

Mabao mengine mawili ya Azam FC yalifungwa na Kavumbangu dakika ya 45 kwa shuti akimalizia pasi ya Ramadhani Singano ‘Messi’ na dakika ya 63 kwa shuti pia akimalizia pasi ya Mudathir Yahya.

Katika mechi zingine zilizochezwa jana, JKT Ruvu ilipata ushindi wao wa kwanza msimu huu, baada ya kuilaza African Sports mabao 2-0 kwenye Uwanja wa Mkwakwani.

SIMBA YAUNGURUMA, YANGA YAREJEA KILELENI

MIAMBA ya soka nchini Simba jana ilitoa onyo kali kwa timu zinazoshiriki michuano ya ligi kuu ya Tanzania Bara baada ya kuichapa Majimaji ya Songea mabao 6-1.

Katika mechi hiyo iliyokuwa ya upande mmoja, iliyopigwa kwenye Uwanja wa Taifa, Dar es Salaam, mshambuliaji Ibrahim Hajib aliweka rekodi ya pili ya kufunga mabao matatu katika mechi moja.

Iliwachukua Simba dakika moja kuhesabu bao la kwanza lililofungwa na Ajib baada ya kufanyika kwa shambulizi la kushtukiza kwenye lango la Majimaji.

Ajib aliiongezea Simba bao la pili dakika ya 11 alipounganisha wavuni kwa kichwa mpira wa krosi uliopigwa na Mohamed Hussein kuoka pembeni ya uwanja.

Hamisi Kiiza aliiongezea Simba bao la tatu dakika ya 37 baada ya kuuwahi mpira ndani ya eneo la hatari na kufumua shuti lililotinga wavuni.

Dakika nne baadaye, Ajibu aliifungia Simba bao la nne na kukamilisha orodha yake ya mabao matatu kwa mechi ya jana. Alifunga bao hilo baada ya kupokea krosi kutoka kwa Mwinyi Kazimoto. Mabao hayo yalidumu hadi mapumziko.

Beki Hussein, maarufu kwa jina la Tshabalala, aliiongezea Simba bao la tano dakika ya 78 baada ya kupokea pasi ndefu kutoka kwa Awadh Juma.

Kiiza alihitimisha karamu ya mabao kwa Simba baada ya kuifungia bao la sita dakika ya 80, kufuatia pige nikupige kwenye lango la Majimaji.

Bao la kujifariji la Majimaji lilifungwa na Ditram Nchimbi dakika ya 88 baada ya kupokea pasi kutoka kwa Mrisho Saidi.

Wakati huo huo, Yanga jana ilirejea kileleni mwa ligi kuu baada ya kuicharaza Kagera Sugar mabao 2-0 katika mechi iliyochezwa kwenye Uwanja wa Ali Hassan Mwinyi mjini Tabora.

Ushindi huo uliiwezesha Yanga kurejea kwenye uongozi wa ligi hiyo kwa tofauti ya pointi moja kati yake na Azam, inayoshuka dimbani leo mjini Mwanza kumenyana na Toto African.

Bao la kwanza la Yanga lilifungwa na Donaldo Ngoma kipindi cha kwanza kabla ya Daudi Kaseke kuongeza la pili katika kipindi cha pili.

TAIFA STARS KWENDA ALGERIA KWA FASTJET

Timu ya Taifa Tanzania (Taifa Stars) inayodhaminiwa na bia ya Kilimanjaro Premium Lager, inatarajiwa kusafiri na ndege binafsi ya kukodi ya shirika la Fastjet kuelekea nchini Algeria kwa ajili ya mchezo wa marudiano utakaochezwa Novemba 17 mjini Algiers.

Meneja Mkuu wa Shirika la Ndege la Fasjet kwa ukanda wa Afrika Mashariki, Jimmy Kibati amesema kampuni yao imefikia makubaliano na TFF ya kuwa msafirishaji rasmi wa timu ya Taifa kwa ajili ya mchezo huo wa kuwania kufuzu kwa fainali za Kombe la Dunia nchini Urusi 2018 dhidi ya Algeria.

Jimmy amesema katika safari hiyo, Fastjet itatoa ndege yenye uwezo wa kubeba abiria 156 walioketi, sambamba na wafanyakazi wa ndege, ambapo wao wametoa punguzo la asilimia 35 katika gharama nzima ya safari ya kuelekea Algeria.

Aidha Jimmy ameongeza kuwa safari hiyo itakua ya masaa 7 ambapo ndege itaitoka Dar es salaam na kutua Djamena – Chad kuongeza mafuta kabla ya kuendelea tena na safari mpaka nchini Algeria.

Naye katibu wa kamati ya Taifa Stars, Teddy Mapunda aliwashukuru Fastjet kwa kukubali kuwa wasafirishaji rasmi wa TaifA Stars kwa mechi dhidi ya Algeria, huku akisema gharama za safari za mtu mmoja kusafiri ni dolla 800 kwenda na kurudi.

Teddy amewaomba watanzania, wapenzi, washabiki wa mpira wa miguu wanaotaka kusafiri kufika ofisi za TFF zilizopo Karume kwa ajili ya kujiandiksha na kuelekea taratibu nzima za safari.

CAF YAIJIA JUU ZANZIBAR

Shirikisho la Mpira wa Miguu Barani Afrika (CAF) leo hii limeamuru Kamati ya muda inayoongoza Chama cha Mpira Zanzibar (ZFA) iondoe mahakamani mashatka yote dhidi ya uongozi halali wa ZFA.

Katika barua yake kwenda kwa Katibu Mkuu wa ZFA na nakala yake kuletwa TFF, CAF imesisitiza kuwa kwa mujibu wa katiba za CAF na FIFA ni marufuku masuala ya mpira kupelekwa mahakamani, ZFA ni mwanachama mshiriki wa CAF (Associate Member).

CAF inaigiza kamati ya muda ya ZFA hadi tarehe 07 Novemba, 2015 iwe imetekeleza maagizo na kuhakikisha uongozi halali uliochaguliwa na ZFA unarejea katika shughuli zake uongozi ZFA.

Jambo hili lisipotekelezwa CAF imesema itaifungia Zanzibar uanachama wake. Kikanuni na kikatiba kufungiwa uanachama maana yake ni Mwanachama husika kusitishwa ushiriki katika shughuli zote zinazosimamiwa na FIFA, CAF na wanachama wake wote.

Shughuli hizo ni pamoja na kushiriki mashindano ya kimataifa, kozi mbalimbali na misaada ya kifedha, vifaa, ufundi nk.

TFF inatoa wito kwa mara nyingine kwa pande zinazokinzana kukaa meza moja na kumaliza tofauti zao kwa faida ya mpira wa Zanzibar, Tanzania na Ukanda wa Afrika Mashariki na Kati (CECAFA).

TFF YAMPONGEZA DK MAGUFULI

Rais wa Shirikisho la Mpira wa Miguu nchini (TFF), Jamal Malinzi amemtumia salamu za pongezi Dk. John Pombe Magufuli kufuatia kuchaguliwa kwake kuwa Rais wa Jamhuri ya Muungano wa Tanzania.

Katika salamu zake, Malinzi amesema TFF ina imani na ahadi za mikakati yake ya kuongeza uwekezaji wa serikali katika maendeleo ya mpira wa miguu na michezo kwa ujumla.

Wakati huo huo, Shirikisho la Mpira wa Miguu nchini (TFF), limetuma salamu za pongezi kwa viongozi wa mpira wa miguu nchini waliochaguliwa kuwa wabunge na madiwani katika uchaguzi mkuu uliofanyika Oktoba 25, 2015.

Viongozi waliochaguliwa katika nafasi ya Ubunge ni John Kadutu – mbunge wa Ulyankulu – Tabora, (mjumbe wa mkutano mkuu kutoka Mwanza) na Alex Gashaza – mbunge wa Ngara (Makamu mwenyekiti wa chama cha soka mkoa wa Kagera)

Aidha waliochaguliwa Udiwani katika maeneo yao ni Khalid Abdallah (Mjumbe wa kamati ya Utendaji – TFF),  Yusuph Kitumbo- (Mwenyekiti wa Chama cha Mpira wa Miguu mkoa wa Tabora), Omari Gindi- (Mwnyekiti wa Chama cha mpira wa Miguu mkoa wa Kigoma), Bathromeo Kimaro - (Mwenyekiti wa Chama cha Mpira wa Miguu mkoa wa Singida) na Omar Kinyeto (Mjumbe wa mkutano mkuu mkoa wa Singida),  Golden Sanga (Mwenyekiti wa Chama cha Mpira wa Miguu mkoa wa Ruvuma), Pachal Kihanga (Mwenyekiti wa Chama cha Mpira wa mkoa Morogoro), Yusuf Manji (Mwenyekiti wa klabu ya Yanga SC) ambao wote ni wajumbe wa mkutano mkuu wa TFF.

TFF inawaomba kutumikia halmashauri zao kwa mafanikio na kutilia mkazo kuhifadhi maeneo ya wazi kwa ajili ya michezo mbalimbali hususani mpira wa miguu mashuleni.

SIMBA YAJITUTUMUA, YANGA YABANWA

TIMU kongwe ya soka ya Simba jana iliwapoza machungu mashabiki wake baada ya kuichapa Coastal Union bao 1-0 katika mechi ya ligi kuu ya Tanzania Bara iliyochezwa kwenye Uwanja waTaifa, Dar es Salaam.

Wakati Simba ikiibuka na ushindi huo kiduchu, mabingwa watetezi Yanga walibanwa mbavu na Mwadui ya Shinyanga kwa kulazimishwa sareya mabao 2-2 kwenye Uwanja wa Kambarage mjini Shinyanga.

Ushindi wa Simba umewapa ahueni kubwa mashabiki wake baada ya kupoteza mechi iliyopita kwa kuchapwa bao 1-0 na Prisons mjini Mbeya.

Bao pekee na la ushindi la Simba lilifungwa na mshambuliaji wa kimataifa wa Uganda, Hamisi Kiiza dakika ya saba.

Kiiza, ambaye alikosa mechi mbili zilizopita, alifunga bao hilo kwa kuunganisha wavuni kwa shuti kali mpira wa krosi uliopigwa kutoka wingi ya kulia na beki Hassan Ramadhani.

Coastal Union nusura isawazishe dakika ya 23 wakati Ismal Mohamed alipoingia na mpira na mpira ndani ya 18, lakini shuti lake lilipanguliwa na kipa Vincent Angban wa Simba.

Kiiza angeweza kuiongezea bao Simba dakika ya 44 baada ya kupewa jukumu la kupiga mpira wa adhabu nje kidogo ya eneo la hatari la Coastal Union, lakini shuti lake lilitoka nje.

Wakati huo huo, mshambuliaji Bakari Kigodeko jana aliipokonya Yanga tonge mdomoni baada ya kuifungia Mwadui bao la kusawazisha.

Yanga ilikuwa ya kwanza kupata mabao kupitia kwa Donald Ngoma, aliyefunga yote mawili.

Bao la kwanza la Mwadui lilifungwa na Paul Nonga kabla ya Kigodeko kusawazisha.

SIMBA KUIVAA COASTAL UNION KESHO, YANGA KUKIPIGA NA MWADUI LIGI KUU

Ligi Kuu ya Vodacom inatarajiwa kuendelea kesho kwa michezo sita kuchezwa katika viwanja mbalimbali, ikiwa inaingia katika raundi ya tisa huku kila timu ikisaka ushindi wa pointi tatu muhimu.

Uwanja wa Taifa jijini Dar es Salaam, Simba SC watawakaribisha Coastal Union kutoka jijini Tanga, mchezo utakaonza majira ya saa 10:30 jioni, huku Ndanda FC wakiwa wenyeji wa Stand United uwanja wa Nangwanda Sijaona mjini Mtwara.

Wachimba Almasi wa Mwadui FC watawakaribisha Yanga SC katika uwanja wa Kambarage mjini Shinyanga, Toto African watakua wenyeji wa maafande wa Mgambo Shooting katika uwanja wa CCM Kirumba jijini Mwanza.

Wakata miwa wa Turiani, Mtibwa Sugar watakua wenyeji wa Kagera Sugar katika uwanja wa Manungu Complex mkoani Morogoro, huku watoza ushuru wa jiji la Mbeya katika uwanja wa Sokoine Mbeya City watakua wenyeji wa Majimaji kutoka mkoani Ruvuma.

Ligi hiyo itaendelea siku ya Alhamis kwa michezo miwili kuchezwa, Tanzania Prisons watakua wenyeji wa African Sports katika uwanja wa Sokoine jijini Mbeya, JKT Ruvu watakua wenyeji wa Azam FC katika uwanja wa Karume jijini Dar es salaam.

TWIGA STARS KUJIPIMA NGUVU NA MALAWI

Timu ya Taifa Tanzania ya Wanawake ya Mpira wa Miguu (Twiga Stars) inatarajiwa kucheza mchezo wa kirafiki na timu ya Taifa ya Wanawake ya Malawi Novemba 7, 2015 jijini Dar es salaam.

Mchezo huo wa kirafiki ni sehmu ya kujipima kwa Twiga Stars inayonolewa na kocha Rogasian Kaijage, ambayo ilishiriki Fainali za Michezo ya Afrika (All Africa Games) mwezi Agosti – Septemba nchini Congo – Brazzavile.

Awali, Twiga Stars ilikuWa icheze mchezo huo nchini Malawi Oktoba 24, kabla ya chama cha soka nchini humo (FAM) kuahirisha mchezo huo, na sasa mchezo huo utacheza nchini Tanzania Novemba 07, 2015.

BUSUNGU, MAGULI WAONGEZWA TAIFA STARS

 KOCHA wa timu ya soka ya taifa ya Tanzania, Taifa Stars, Charles Boniface Mkwasa amewaongeza kikosini washambuliaji Malimi Busungu wa Yanga SC na Elias Maguri katika kikosi kitakachomenyana na Algeria katikati ya mwezi ujao.
Taifa Stars itamenyana na Algeria katika hatua ya mwisho ya mchujo wa kuwania kupangwa kwenye makundi ya kuwania tiketi ya Kombe la Dunia 2018 Urusi, baada ya kuitoa Malawi katika hatua ya kwanza.
Akizungumza na Waandishi wa Habari mchana wa leo katika hoteli ya Serena, Dar es Salaam, Mkwasa ametaja wachezaji 28 ambao watakwenda kambini Oman Novemba 2, mwaka huu.
Mkwasa amewataja wachezaji hao kuwa ni makipa; Aishi Manula (Azam FC), Ally Mustafa ‘Barthez’ (Yanga SC) na Said Mohammed (Mtibwa Sugar).
Mabeki ni Shomary Kapombe (Azam FC), Juma Abdul, Mwinyi Hajji Mngwali, Nahodha Nadir Haroub ‘Cannavaro’, Kelvin Yondan (Yanga SC), Hassan Kessy, Mohammed Hussein ‘Tshabalala’, Hassan Isihaka (Simba SC) na Salim Mbonde (Mtibwa Sugar).
Viungo ni Himid Mao, Mudathir Yahya, Salum Abubakar ‘Sure Boy’, Frank Domayo (Azam FC), Jonas Mkude, Said Ndemla (Simba SC) na Salum Telela (Yanga SC).
Washambuliaji ni Mbwana Samatta, Thomas Ulimwengu (TP Mazembe, DRC), Mrisho Ngassa (Free State Stars, A. Kusini), Farid Mussa, John Bocco (Azam FC), Simon Msuva, Malimi Busungu (Yanga SC), Elias Maguri (Ruvu Shooting) na Ibrahim Hajib (Simba SC).
Mkwasa amesema kikosi hicho kitaingia kambini Novemba 1 katika hoteli ya Urban Rose, Dar es Salaam kabla ya safari ya Muscat, Oman kwa kambi ya siku 10.
Amesema wakiwa Oman, pamoja na mazoezi, watacheza mchezo mmoja au miwili ya kujipima na wenyeji wao, iwapo watakuwa tayari kabla ya kurejea Dar es Salaam Novemba 11 tayari kwa mchezo wa kwanza na Algeria Novemba 14, Uwanja wa Taifa.
Amesema kikosi kitaondoka Dar es Salaam kwenda Algiers Novemba 16, tayari kwa mchezo wa marudiano Novemba 17.

AZAM YAIBANJUA NDANDA 1-0

BAO pekee la beki Shomary Salum Kapombe limeipa ushindi wa bao 1-0 Azam FC dhidi ya wenyeji, Ndanda FC katika mchezo wa Ligi Kuu ya Vodacom Tanzania Bara jioni ya leo Uwanja wa Nangwanda, Sijaona, Mtwara.
Kapombe alifunga bao hilo dakika ya 79 kwa kichwa akimalizia krosi ya mshambuliaji wa kimataifa wa Ivory Coast, Kipre Herman Tchetche.
Matokeo hayo yanaifanya Azam FC ifikishe poniti 19, sawa na mabingwa watetezi wa ligi hiyo, Yanga SC wanaoendeleza kuongoza ligi hiyo kwa wastani wa mabao.
Kikosi cha Azam FC leo kilikuwa; Mwadini Ali, Shomary Kapombe, Gadiel Michael, Aggrey Morris, Serge Wawa Pascal, Said Mourad, Frank Domayo, Himid Mao, Ame Ali ‘Zungu’/Khamis Mcha, Kipre Tchetche/Jean Mugiraneza na Ramadhani Singano ‘Messi’/John Bocco.
Mechi nyingine za ligi hiyo leo, Mwadui FC wameibuka na ushindi wa 3-1 dhidi ya Mgambo JKT Uwanja wa Mwadui Complex, Shinyanga.
Mabao ya Mwadui leo yamefungwa na Jerry Tegete dakika ya saba na 32 na Jamal Mnyate dakika ya 75, wakati bao pekee la Mgambo limefungwa na Abuu Daudi dakika ya 64.
JKT Ruvu imetoka sare ya 0-0 na Mtibwa Sugar Uwanja wa Karume, Dar es Salaam wakati Mbeya City imeshinda 1-0 dhidi ya African Sports ya Tanga bao pekee la Geoffrey Mlawa dakika ya 15 Uwanja wa Sokoine mjini Mbeya.

YANGA YAIGAGADUA TOTO AFRICAN

YANGA SC imejiweka vizuri katika kiti cha usukani wa Ligi Kuu ya Vodacom Tanzania Bara baada ya kuichapa mabao 4-1 Toto Africans ya Mwanza jioni ya leo Uwanja wa Taifa, Dar es Salaam.
Ushindi huo unaifanya Yanga SC ifikishe pointi 19 baada ya mechi saba, ikiwazidi kwa pointi tatu Azam FC ambao kesho wanacheza mechi ya saba dhidi ya Ndanda FC mjini Mtwara.
Hadi mapumziko, Yanga SC walikuwa mbele kwa bao 1-0 lililofungwa na beki wa kulia, Juma Abdul dakika ya tisa kwa shuti kali umbali wa zaidi ya mita 20 akimaizia kona ya Haruna Niyonzima.
Hata hivyo, Yanga SC wangeweza kumaliza dakika 45 za kwanza wakiwa wanaongoza kwa mabao zaidi kama wangetumia vizuri nafasi zote walizotengeneza, ikiwemo penalti ambayo alikosa Mzimbabwe Donald Ngoma.
Ngoma alikosa penalti hiyo dakika ya 45 ikipanguliwa na kipa wa Toto, Mussa Mohammed baada ya yeye mwenyewe kumnawisha mpira beki Carlos Protas na refa Ahmada Simba wa Kagera akaamuru pigo hilo.
Katika kipindi cha kwanza, Toto walifanya shambulizi moja tu la maana, Miraji Athumani ‘Madenge’ akishindwa kumalizia vizuri pasi ya Edward Christopher dakika ya 42 kwa kumpa nafasi kipa wa Yanga SC, Ally Mustafa ‘Barthez’ kupangua.
Kipindi cha pili, Yanga SC walianza na mabadiliko Juma Abdul akimpisha Simon Msuva ambaye alikwenda kufunga bao la pili dakika ya 49.
Toto Africans ilipata bao lake dakika ya 62 kupitia kwa Miraj Athumani ‘Madenge’ kwa kichwa akimalizia mpira ulioparazwa na kipa Ally Mustafa ‘Barthez’ baada ya mpira wa adhabu uliopigwa na Bernad Evarigetus.
Mrundi Amissi Tambwe aliipatia Yanga SC bao la tatu dakika ya 81 akimalizia krosi ya Simon Msuva ambaye alifunga bao la nne dakika ya 90 akimalizia pasi ya Mbrazil Andrey Coutinho.
Beki wa Toto, Hassan Khatib alionyeshwa kadi ya pili ya njano dakika ya 90 na ushei kwa utovu wa nidhamu na kutolewa kwa kadi nyekundu.
Kikosi cha Yanga SC kilikuwa; Ally Mustafa ‘Barthez’, Juma Abdul/Simon Msuva dk46, Mwinyi Mngwali, Kevin Yondan/Nadir Haroub ‘Cannavaro’, Vincent Bossou, Thabani Kamusoko, Donald Ngoma, Amissi Tambwe, Malimi Busungu na Godfrey Mwashiuya/Andrey Coutinho. 
Toto Africans; Mussa Mohammed, Hassan Khatib, Robert Magadula/Miraj Makka, Hamisi Kasanga, Carlos Protas, Salimn Hoza/William Kimanzi, Japhet Vedastus/Jaffar Mohammed, Abdallah Seseme, Evarigetus Bernad, Edward Christopher na Miraji Athumani.

IMETOLEWA KUTOKA BLOGU YA BINZUBEIRY

SIMBA YAKALISHWA KITAKO NA PRISONS

BAO pekee la Mohammed Mkopi dakika ya 62 limeipa Prisons FC ushindi wa 1-0 dhidi ya Simba SC  jana kwenye Uwanja wa Sokoine mjini Mbeya katika mchezo wa Ligi Kuu ya Vodacom Tanzania Bara.
Hicho kinakuwa kipigo cha pili kwa Simba SC inayofundishwa na Muingereza Dylan Kerr katika Ligi Kuu msimu huu, baada ya awali kufungwa 2-0 na mahasimu, Yanga SC.
Mchezo huo ulisimama kwa dakika nne kipindi cha kwanza, baada ya Nahodha wa Prisons, kudai mchezaji wa Simba SC, Pape Ndaw, ana kitu mfano wa hirizi kiunoni.
Suala hilo lilifika kwa mwamuzi na mchezaji huyo kupelekwa katika chumba maalum na kukaguliwa na msimamizi wa mechi hiyo, Joseph Mapunda.
Hata hivyo, zilitokea vurugu za hapa na pale kwa kila upande ukiona unaonewa, ingawa Ndaw alirejea uwanjani kuendelea na mchezo baada ya ukaguzi huo.
Katika mchezo mwingine wa Ligi Kuu leo, mshambuliaji wa zamani wa Simba SC, Elias Maguri amefunga mabao mawili dakika za 47 na 60 timu yake, Stand United ikishinda 3-0 dhidi ya Majimaji ya Songea Uwanja wa Kambarage Shinyanga, bao lingine likifungwa na Pastory Athanas dakika ya 66.
Kikosi cha Simba SC kilikuwa; Vincent Angban, Hassan Kessy, Mohammed Hussein ‘Tshabalala’, Hassan Isihaka, Juuko Murshid, Justice Majabvi,  Simon Sserunkuma/Mwinyi Kazimoto, Awadh Juma/Said Ndemla, Pape Ndaw, Joseph Kimwaga na Peter Mwalyazi/Ibrahim Hajib.
Prisons; Aron Kalambo, Laurian Mpalile/Beno Kakolanya, Salum Kimenya, Nurdin Chona, James Mwasote, Jumanne Elfadhili, Lambart Sabiyanka, Juma Seif ‘Kijiko’/Ally Milanzi, Mohammed Mkopi, Jeremiah Juma na Benjamin Asukile.
IMETOLEWA KUTOKA BLOGU YA BINZUBEIRY

KAMATI YA STARS YAANZA KUKUSANYA MICHANGO

Katibu wa Kamati ya Taifa Stars, Teddy Mapunda leo amefanya makutano na waandishi wa habari katika ukumbi wa mikutano wa TFF uliopo Karume, ambapo ametumia nafasi hiyo kutangaza namba za simu za uchangiaji kwa Watanzania kwa ajili ya timu ya Taifa ya Tanzania ‘Taifa Stars’.

Akiongea na waandishi wa habari, Teddy amesema watanzania wanaweza kuichangia Taifa Stars kiasi chochote cha fedha kuanzia shilingi mia moja (TZS 100) kwenda namba 0654-888868 (Tigo Pesa) na 0789-530668 (Airtel Money) ambazo zitatumika kwa ajili ya motisha kwa wachezaji, uhamasishaji/masoko na maboresho ya kambi za ndani na nje ya nchi.

Aidha Teddy amesema Kamati ya Taifa Stars inaandaa utaratibu kwa ajili ya washabiki watakaotaka kusafiri kuelekea nchini Algeria katika mchezo wa marudiano, waweze kuchangia gharama za usafiri ili waweze kwenda kuipa sapoti Stars katika mchezo wa marudaiano Novemba 17, 2015.

“KamatI inaendelea na mchakato wa kukamilisha suala la kambi ya Taifa Stars, na mpaka sasa tunasubiri majibu kutoka katika vyama vya soka vya vya nchi tunazotaka kuweka kambi ambazo ni Afrika Kusini, Dubai na Oman kabla ya kutangaza rasmi kambi itakapokuwa” Alisema Teddy.

Kamati inawaomba watanzania, wadau, washabiki na wapenzi wa mpira miguu nchini kuichangia timu ya Taifa kupitia namba zilizotolewa na pia kujitokeza kwa wingi kuujaza uwanja wa Taifa siku ya mchezo wa tarehe 14 Novemba, 2015.

KIIZA MCHEZAJI BORA WA MWEZI

Mshambuliaji wa timu ya Simba, Hamisi Kiiza ndiye mchezaji bora wa Ligi Kuu ya Vodacom kwa mwezi Septemba.

Kwa kuibuka mchezaji bora, Kiiza atazawadiwa sh. milioni moja kutoka kwa mdhamini wa Ligi hiyo, kampuni ya Vodacom.

Kiiza ambaye ameisadia Simba kufanya vizuri kwenye mwezi huo, ikiwemo kufunga mabao matatu (hat trick) kwenye mechi dhidi ya Kagera Sugar aliwashinda washambuliaji wa timu za Stand United (Elias Maguli) na Yanga (Amisi Tambwe).

Ndani ya mwezi Septemba ambapo zilichezwa raundi tano, Kiiza amefunga jumla ya mabao matano.