SNURA KWA MINENGUO, WE ACHA TU

NA STEPHEN BALIGEYA
NI msichana mwenye kiuno cha nyigu, ambacho mkato wake unaonyesha namna, ambavyo kazi ya ziada ilifanywa na Manani katika kukiumba kiumbe hiki jalili.
Mwendo wake ni wa madaha, mithili ya Twiga katika Mbuga ya Taifa ya Serengeti. Tofauti ya miondoko yao ni kwamba, mmoja ni kiumbe cha mwituni na mwingine ni kiumbe katika makazi  rasmi ya binadamu.
Anavutia, anatia hamasa kumtazama hasa akiwa jukwaani, haoni ajizi kukitumia kiuno chake cha nyigu alichopewa kwa ustadi na Manani. Kweli ana haki ya kumvutia kila kiumbe jahiri.
Huyu si mwingine bali ni msanii wa nyimbo za kikazi kipya, Snura Mushi, kwa sasa ni maarufu kwa jina la ‘Mama wa Majanga’, ambaye anazidi kutisha katika sanaa ya muziki nchini.
Snura, ambaye historia yake ya muziki ilianzia katika kucheza ngoma za asili, kisha uigizaji, anatoa somo kwa vijana kwamba hutakiwi kukata tamaa wakati wa kutafuta na siku zote mvumilivu hula mbivu.
Snura anasema ana matumaini atafika mbali kimuziki ili aiwakilishe nchi yake katika nyanja za kimatifa.
”Sitaki mchezo kwenye muziki kwa sasa maana nataka kufika mbali na kufanikiwa zaidi,”anaeleza Snura wakati akihojiwa na kituo kimoja cha redio nchini hivi karibuni.
Snura anasema wimbo wa Majanga una mikasa mingi,  ambayo ni ya kweli, kwani hata yeye amejiimba katika wimbo huo kutokana na watu kugombania mali za marehemu wakati aliyetafuta mwingine.
“Wimbo wa Majanga hata mimi unanigusa, maana bibi yangu alipofariki ndugu walianza kugombania nyumba na nikaamua kuimba,  nyumba ajenge yeye kwanini sisi tugombane, kitu ambacho sio kizuri,”anaeleza Snura.
Vilevile, anasema wimbo wake wa ‘Nimevurugwa’ umetokana na uhalisia wa maisha katika jamii, kwani kuna watu wanafanya mambo ya hovyo na kisha huanza kujutia maisha.
BIFU LAKE NA WEMA LIMEKUWA SUGU
Pamoja na maelezo ya Snura katika muziki, hakusita kuelezea kuwa yeye na Wema Sepetu walikuwa chanda na pete, lakini urafiki wao wa karibu ulipotea bila yeye kufahamu sababu mpaka sasa.
Anaeleza kuwa walikuwa wakishinda pamoja na msanii huyo mwenzake kila sehemu na wakati mwingine watu walidhani kwamba labda wanaishi pamoja ingawa haikuwa hivyo.
“Mimi nadhani kuna mtu alituchonganisha kwa kumpa maneno, ambayo sio sahihi, maana mpaka leo sijui nilimkosea nini na hajaweza kuniambia sababu mpaka leo,”anaeleza.
Snura anasema kuwa urafiki wao uliishia Uwanja wa Ndege wa Kimataifa wa Mwalimu Juluius Nyerere, Dar es Salaam wakati wakitokea Arusha na waliachana kwa furaha kwa kila mmoja kwenda nyumbani kwake.
“Kilichonishangaza zaidi ni kwamba tuliagana kwa furaha pale uwanjani na kila mmoja akaenda kwake, lakini kesho yake nilipomtumia ujumbe wa salamu, hakujibu na nilipompigia simu hakupokea.
“Jambo hilo lilinishangaza kwani tulisafiri na kurudi salama bila ugomvi, sasa kama kungekuwa na tatizo angenambia kwa kuwa mimi nilikuwa rafiki yake wa karibu sana, lakini mwenzangu hakutaka kusema chochote na kukaa kimya,”anaeleza kwa masikitiko.
Msanii huyo mcheshi na mwenye mvuto awapo jukwaani kutokana na namna anavyokitumia vyema kiuoni chake alichokipachika kwa jina la ‘Majanga’, anasema kuwa mpaka sasa hajakaa vizuri na Wema ingawa yeye ameshasahau yaliyopita.
USHAURI WA SHARO WAMTOA
Snura, ambaye pia aliwahi kujitumbukiza katika muziki wa taarabu, anasema safari yake ya muziki iliwaunganisha na Sharo Milionea (sasa marehemu), wakati huo wakiwa pamoja katika kutafuta maisha.
“Mwenzangu aliwahi kutoka kwa kujikita katika maigizo na kisha  muziki na siku moja alinifuata na kunieleza kuwa, natakiwa kutosahau muziki pamoja na kwamba nilikuwa naigiza.
“Sharo alikuja nyumbani na kunambia, dada unatakiwa kutosahau muziki wetu, jaribu kurudi na kweli niliamua kurudi katika muziki, ambao sasa naanza kuona matunda yake,”anasimulia Snura.
Snura, msanii ambaye hukiita kiuno chake kwamba kimevurugwa kabla ya kukitumia jukwaani kwa jinsi kilivyojichonga mithili ya nyigu, anaeleza kuwa mihangaiko pia iliwahi kumkutanisha na  Masanja wa Original Komedy,  kabla ya kundi hilo kuteka soko la vichekesho nchini.
Anaeleza kuwa alikutana na Masanja na Mac Reagan katika filamu ya ‘Itunyama’, ambayo Snura aliigiza kama mhusika mkuu na kufanya vyema kiasi cha watu wengi kuanza kumtumia kwenye filamu zao.
Vilevile anasema kwa sasa anategemea kufanya muziki wa taarabu na Mzee Yusuph, ili kuongeza wigo wa muziki kwa wadau wake, ambao ni Watanzania wanaomuunga mkono.
Snura anaeleza kuwa hana ‘bifu’ na msanii mwenzake Shilole na kwamba watu wanaozungumzia uhasama wao wanalo jambo mioyoni mwao. Anasema anazungumza vizuri na Shilole, ambaye wanashindana kwa kukata viuno jukwaani.

LULU: NIMEZALIWA UPYA

MCHEZA filamu nyota wa kike nchini, Elizabeth Michael 'Lulu' amesema tangu alipotoka jela, anajiona amezaliwa upya.

Lulu amesema kwa sasa amekuwa mtu mzima na mwenye majukumu ya kuielimisha jamii, tofauti na ilivyokuwa miaka michache iliyopita.

Msanii huyo amesema kukua kwake kiakili na kimaisha ndiko kulikomfanya azindue filamu yake ya kwanza, inayojulikana kwa jina la Foolish Age. Filamu hiyo ilizunduliwa wiki iliyopita kwenye ukumbi wa Mlimani City mjini Dar es Salaam.

Lulu, ambaye ni mwigizaji bora wa kike wa 2012/2013 kupitia tuzo za ZIFF, alisema hayo hivi karibuni alipokuwa akihojiwa na mtandao wa filamucentral.

Msanii huyo aliachiwa kwa dhamana mapema mwaka huu na kubadilishiwa mashtaka ya tuhuma za kumuua msanii mwenzake, Steven Kanumba kuwa ya kuua bila kukusudia.

Lulu alisema anaishukuru Kampuni ya Proin Promotion, inayosimamia kazi zake
kwa kumpa nafasi ya kutoa mafunzo ya mambo aliyopitia kwa watu wengine kupitia fani ya filamu.

Alisema chanzo cha matatizo yaliyomkuta katika maisha ya utoto wake ni kutopenda kusikiliza ushauri na maonyo kutoka kwa wakubwa zake.

Binti huyo, ambaye hivi karibuni alitimiza rasmi umri wa miaka 18 alisema, amepitia mambo mengi katika maisha yake na kumpa usumbufu na mateso makubwa mama yake mzazi.

Alisema mkasa uliompata kwa marehemu Kanumba ni miongoni mwa sababu zilizomfanya aandae filamu ya Foolish Age, inayoelezea maisha yake alipokuwa na umri wa chini ya miaka 18.

"Nimetumia filamu hii kuwaelimisha vijana wenzangu kwamba wanapokuwa na umri kama wangu, wasipuuze ushauri kutoka kwa wakubwa zao,"alisema Lulu, ambaye kipaji chake kiliibuliwa na kundi la sanaa za maonyesho la Kaole.

“Sikumsikiliza mama yangu na wakubwa zangu. Nilikuwa gizani. Yale
niliyoyafanya niliamini kuwa ndio sahihi. Sikuweza kuona hatari iliyokuwa mbele
yangu.

" Lakini nahisi ulikuwa mpango wa Mungu kwa tukio lililonitokea. Watu
walinihukumu, lakini ukweli wa hili ni Mungu pekee anayeujua. Kwa sasa
nampenda Yesu, ninaomba na kusali. Nimekuwa Lulu mpya na ninataka
kuielimisha jamii  kupitia maisha yangu ya utoto,”alisema binti huyo
mantashau.

Lulu alisema asingependa kuzungumzia kilichotokea kati yake na marehemu Kanumba kwa sababu kesi aliyofunguliwa bado ipo mahakamani. Alisema amepania kufanyakazi kwa nguvu baada ya kuwa amejifunza mengi na hataki kurudi alikotoka.

Alisema anaishukuru kampuni ya Proin Promotion, inayosimamia kazi zake na kuongeza kuwa, hawezi kufanyakazi ya kucheza filamu nje ya kampuni hiyo.

Mama wa msanii huyo, Lukiresia Kagilla amesema alikuwa akipata shida na mateso makubwa kutokana na vitendo alivyokuwa akivifanya Lulu wakati wa utoto.

“Lulu alinitesa hadi nilikuwa napata shida na kuhaha, lakini
 nimejifunza kwake kwani mwanangu kabadilika na kuwa mtu mzima
 anayejua nini anafanya. Kumbe ilikuwa ni utoto tu," alisema mama huyo.

"Nami pia nimejifunza kutoka kwake, nilikuwa mkali sana na hiyo ilichangia Lulu
kuniogopa na kuwa mbali na mimi pale anapokosa. Wazazi inabidi tuongee na
watoto wetu kwa upole,”alisema mama huyo.

Alikiri kuwa kwa sasa Lulu ndiye mlezi wa familia yake na kwamba amekuwa akifaidika kutokana na mapato ya binti yake huyo, ambaye anamsomesha mdogo wake wa kike katika shule ya kimataifa kwa kumlipia ada na gharama zote muhimu.

"Mwenyewe anasema anafanya mpango wa kuendelea na shule kwani moja ya malengo yake ni kuwa mwigizaji wa kimataifa na kuitangaza Tanzania kupitia filamu, anaamini anaweza kufanya hilo kwa kwenda shule zaidi na anamuomba Mungu amsaidie,"alisema mama Lulu.

Kwa mujibu wa Lulu, baada ya kung'ara katika filamu ya Foolish Age, sasa
anajiandaa kutengeneza  filamu nyingine, itakayojulikana kwa jina la
Mapenzi ya Mungu.

Alisema katika filamu hiyo, amemshirikisha mama mzazi wa marehemu Kanumba,
Frola Mtegoa. Alisema filamu hiyo pia itazungumzia maisha na mikasa iliyowahi kumtokea katika maisha yake.

Msanii Mahsen Awadh 'Dr. Cheni' ndiye aliyeibua kipaji cha Lulu na kumkabidhi katika kundi la Kaole, ambako alicheza tamthilia kadhaa kama vile Tetemo, Jahazi, Dira, Tufani, Gharika na Baragumu.

TENGA AWATAKA WAHITIMU GRASSROOTS KUSAMBAZA UJUZI

Rais wa Shirikisho la Mpira wa Miguu Tanzania (TFF), Leodegar Tenga amewataka wahitimu wa kozi ya ukocha wa grassroots kusambaza ujuzi walioupata nje ya shule zao ili mradi huo uwe na manufaa nchi nzima.

Akifunga kozi hiyo iliyoshirikisha makocha 30 kutoka Tanzania Bara na Visiwani kwenye ukumbi wa TFF leo (Septemba 13 mwaka huu), Rais Tenga amewakumbusha kuwa mradi huo umelengwa kuenea nchi nzima katika kipindi cha miaka mitatu.

Mradi wa grassroots unalenga wachezaji mpira wa miguu (wasichana na wavulana) wenye umri kuanzia miaka 6-12, na kozi hiyo ilikuwa chini ya Mkufunzi wa Shirikisho la Kimataifa la Mpira wa Miguu (FIFA), Govinder Thandoo kutoka Mauritius.

Washiriki waliohitimu kozi hiyo na kukabidhiwa vyeti ni Abdulkheir Khamis Mohamed (Kaskazini A), Ali Hamad Mohamed (Wete), Ali Khamis Ali (Wete), Amin Amran Yunus (Micheweni), Amina Mhando (Kibaha), Benito Mwakipesile (Kibaha), Deogratius Yesaya (Kibaha), Editha Katabago (Bagamoyo), Habiba Mulungula (Bagamoyo) na Irene Semng’indo (Kibaha).

Juma Omar Abdallah (Kaskazini A), Kassim Ibrahim Mussa (Mkoani), Khamis Haji Ali (Kusini Unguja), Khamis Hamad Rajab (Chakechake), Mahfoudh Abdulla Said (Wete), Marianus Nyalale (Bagamoyo), Maryam Suleiman Ali (Mjini Magharibi), Maryasa Juma Ali (Mjini Magharibi), Mohamed Ali Abdullah (Mjini Magharibi) na Mohamed Salim Omar (Micheweni).

Mohamed Seif Abeid (Mkoani), Ramadhan Kejeli (Bagamoyo), Rhobi Kibacho (Kibaha), Salim Suleiman Juma (Chakechake), Shaaban Naim Suleiman (Kusini Unguja), Shabani Rashid Masimbi (Bagamoyo), Talib Ali Rajab (Chakechake), Thabit Juma Makungu (Kusini Unguja), Yusuf Ali Issa (Mjini Magharibi), Zakia Choum Makame (Mjini Magharibi).

Hiyo ni kozi ya pili ya grassroots kufanyika nchini ambapo ya kwanza ilifanyika Desemba mwaka juzi.

ILALA KUCHEZA FAINALI NA MJINI MAGHARIBI

Ilala imepata tiketi ya kucheza fainali ya michuano ya Copa Coca-Cola kwa vijana wenye umri chini ya miaka 15 upande wa wavulana baada ya kuivua ubingwa Morogoro katika mechi iliyoamriwa kwa mikwaju ya penalti.

Hadi muda wa kawaida wa mchezo huo uliochezwa leo (Septemba 13 mwaka huu) jioni Uwanja wa Kumbukumbu ya Karume, jijini Dar es Salaam timu hizo zilikuwa zimefungana bao 1-1.

Paul Ngowi ndiye aliyeanza kuifungia Ilala dakika ya 30, lakini Morogoro wakasawazisha dakika ya 50 kupitia kwa Omari Sultan. Katika changamoto ya mikwaju ya penalti, Ilala ilipata tatu dhidi ya mbili za Morogoro.

Ilala sasa itacheza fainali na Mjini Magharibi itakayofanyika kesho (Septemba 14 mwaka huu) kuanzia saa 9 alasiri.

Fainali hiyo ya wavulana itatanguliwa na ile ya wasichana kati ya Mwanza na Ilala itakayoanza saa 7 mchana. Mwanza imepata tiketi ya kucheza fainali baada ya leo kushinda nusu fainali ya pili dhidi ya Mbeya kwa mabao 3-0.

Mabao hayo katika mechi hiyo iliyochezwa Uwanja wa Kumbukumbu ya Karume yamefungwa na Flora Fulgence dakika ya 47, Emiliana Akuti dakika ya 56 na Yulitha Masamu dakika ya 57.
AIRTEL RISING STARS KUKABIDHIWA BENDERA
Timu ya Airtel Rising Stars ya Tanzania kwa wavulana na wasichana itakabidhiwa bendera kesho (Septemba 14 mwaka huu) tayari kwa safari ya Nigeria itakayofanyika keshokutwa alfajiri.

Hafla hiyo ya kukabidhi bendera kwa timu hiyo yenye kikosi cha wachezaji 32 itafanyika saa 5 asubuhi kwenye ofisi za Shirikisho la Mpira wa Miguu Tanzania (TFF). Katibu Mkuu wa TFF, Angetile Osiah ndiye atakayekabidhi bendera kwa kikosi hicho.

30 WAITWA KAMBINI TWIGA STARS

Kocha Mkuu wa Twiga Stars, Rogasian Kaijage ameita kambini kikosi cha wachezaji 30, wengi wao wakiwa vijana ikiwa ni mwendelezo wa programu ya kujenga timu hiyo.

Kambi hiyo itakuwa jijini Dar es Salaam kuanzia Septemba 15 hadi 26 mwaka huu. Vijana wengi wamejumuishwa ikiwa ni hatua ya mwanzo ya kuandaa timu itakayocheza mechi za mchujo za Kombe la Dunia, Kanda ya Afrika kwa vijana wenye umri chini ya miaka 20.

Kaijage amesema pamoja na malengo hayo kwa timu ya vijana, bado maana kubwa inabaki kuandaa Twiga Stars iliyo imara kwa ajili ya mashindano mbalimbali ya kimataifa.

Amesema Twiga Stars haikabiliwi na mashindano yoyote mwaka huu, hivyo lengo ni kuijenga upya ndiyo maana haichezi michezo ya kimataifa ya kirafiki hadi itakapofika wakati wake.

Utaratibu huo ulianza kuanzia kambi ya Machi mwaka huu, na ndio umezaa timu ya vijana wenye umri chini ya miaka 20 ambayo sasa itashiriki mashindano ya Kombe la Dunia.

Wachezaji walioitwa ni Amina Ally (Lord Barden, Pwani), Asha Rashid (Mburahati Queens, Dar es Salaam), Belina Julius (Lord Barden, Pwani), Donisia Daniel (Lord Barden, Pwani), Esther Chabruma (Sayari Queens, Dar es Salaam), Eto Mlenzi (JKT, Dar es Salaam) na Evelyn Sekikubo (Mburahati Queens, Dar es Salaam).

Fatuma Bushiri (Simba Queens, Dar es Salaam), Fatuma Hassan (Mburahati Queens, Dar es Salaam), Fatuma Issa (Evergreen, Dar es Salaam), Fatuma Mustafa (Sayari Queens, Dar es Salaam), Fatuma Omari (Sayari Queens, Dar es Salaam), Flora Kayanda (Tanzanite, Dar es Salaam) na Gerwa Lugomba (Umisseta, Kanda ya Ziwa).

Hamisa Athuman (Marsh Academy, Mwanza), Maimuna Hamisi (Airtel Rising Star, Ilala), Maimuna Said (JKT, Dar es Salaam), Mwanahamisi Omari (Mburahati Queens, Dar es Salaam), Mwapewa Mtumwa (Sayari Queens, Dar es Salaam), Pulkeria Charaji (Sayari Queens, Dar es Salaam) na Rehema Abdul (Lord Barden, Pwani).

Sabahi Hashim (Umisseta, Zanzibar), Semeni Abeid (Tanzanite, Dar es Salaam), Sharida Boniface (Makongo Sekondari, Dar es Salaam), Sofia Mwasikili (Sayari Queens, Dar es Salaam), Tatu Idd (Lord Barden, Pwani), Therese Yona (TSC Academy, Mwanza), Vumilia Maarifa (Evergreen, Dar es Salaam), Yulitha Kimbuya (Marsh Academy, Mwanza) na Zena Khamis (Mburahati Queens, Dar es Salaam).

MJINI MAGHARIBI KUCHEZA FAINALI

Mjini Magharibi imepata tiketi ya kucheza fainali ya michuano ya Copa Coca-Cola kwa vijana wenye umri chini ya miaka 15 upande wa wavulana baada ya kuing’oa Temeke kwenye nusu fainali iliyochezwa leo (Septemba 13 mwaka huu) asubuhi Uwanja wa Kumbukumbu ya Karume, jijini Dar es Salaam.

Ushindi wa mabao 2-0 yaliyofungwa dakika za 30 na 63 kupitia Juma Ali Yusuf ndiyo yaliyoipa Mjini Magharibi tiketi ya kucheza fainali itakayofanyika kesho (Septemba 14 mwaka huu) Uwanja wa Kumbukumbu ya Karume kuanzia saa 9 alasiri.

Mjini Magharibi itacheza fainali hiyo na mshindi wa nusu fainali ya pili inachezwa leo jioni kwenye uwanja huo huo kati ya mabingwa watetezi Morogoro na Ilala.

Kwa upande wa wasichana Ilala imetinga fainali baada ya kuifunga Kinondoni mabao 2-0 katika nusu fainali ya kwanza. Mabao ya washindi yalifungwa dakika ya 27 na Fatuma Bahau wakati Happiness Lazoni alifunga la pili dakika ya 39.

Nusu fainali ya pili kwa wasichana itakuwa kati ya Mwanza na Mbeya.

SIMBA, YANGA, AZAM VITANI LEO

Ligi Kuu ya Vodacom (VPL) inaingia raundi ya tatu kesho (Septemba 14 mwaka huu) kwa timu zote 14 kushuka viwanjani huku masikio ya washabiki wengi yakielekezwa kwenye mechi kati ya Simba na Mtibwa Sugar na ile kati ya Mbeya City na Yanga.

Simba inaikaribisha Mtibwa Sugar kwenye Uwanja wa Taifa, Dar es Salaam katika mechi itakayochezeshwa na mwamuzi Dominic Nyamisana kutoka Dodoma. Viingilio katika mechi hiyo vitakuwa sh. 5,000 viti vya bluu na kijani, sh. 8,000 viti vya rangi ya chungwa, sh. 15,000 VIP C na B wakati VIP A itakuwa sh. 20,000.

Pia Azam TV itautumia mchezo huo kwa ajili ya mazoezi (broadcast training) kwa wafanyakazi wake. Hivyo mechi hiyo haitarekodiwa au kuoneshwa moja kwa moja.

Katika Uwanja wa Kumbukumbu ya Sokoine jijini Mbeya, shughuli itakuwa kati ya mabingwa watetezi Yanga na wenyeji wao Mbeya City SC. Mwamuzi Andrew Shamba kutoka Pwani ndiye atakayepuliza filimbi wakati Kamishna wa mechi hiyo James Mhagama kutoka Songea.

Mechi nyingine za ligi hiyo ni Coastal Union na Tanzania Prisons (Uwanja wa Mkwakwani, Tanga), Ruvu Shooting na Mgambo Shooting (Uwanja wa Mabatini mkoani Pwani), Oljoro JKT na Rhino Rangers (Uwanja wa Kumbukumbu ya Sheikh Kaluta Amri Abeid, Arusha), Kagera Sugar na Azam (Uwanja wa Kaitba, Bukoba), na Ashanti United na JKT Ruvu (Uwanja wa Azam Complex, Dar es Salaam).

YANGA YAPEWA SIKU 14 KUWALIPA NSAJIGWA NA MWASIKA

Yanga imepewa siku 14 kuanzia leo (Septemba 13 mwaka huu) kuwalipa waliokuwa wachezaji wake msimu uliopita, nahodha Shadrack Nsajigwa na Stephen Mwasika wanaoidai klabu hiyo jumla ya sh. milioni 15.5.

Uamuzi huo umefanywa na Kamati ya Sheria na Hadhi za Wachezaji ya Shirikisho la Mpira wa Miguu Tanzania (TFF) iliyokutana jana (Septemba 12 mwaka huu) ambapo pamoja na mambo mengine ilisikiliza madai ya wachezaji hao.

Fedha hizo ni ada ya usajili ambayo klabu hiyo ilikubaliana na wachezaji hao wakati ikiwasainisha mikataba. Yanga imeshawalipa sehemu ya fedha walizokubaliana na kiasi hicho ndicho bado hakijalipwa. Nsajigwa anadai sh. milioni 9 wakati Mwasika ni sh. milioni 6.5.

TENGA AIPONGEZA KAMATI YA LIGI KUU

Rais wa Shirikisho la Mpira wa Miguu Tanzania (TFF), Leodegar Tenga ameishukuru Kamati ya Ligi kwa usimamizi mzuri tangu ilipokabidhi Ligi Kuu ya Vodacom (VPL) katika mzunguko wa pili msimu uliopita.

Amesema TFF iliamua kuanzisha Kamati ya Ligi kwa lengo la kutaka klabu zijisimamie zenyewe ili kuongeza ufanisi, jambo ambalo limeleta mabadiliko kwa vile hivi sasa hakuna matatizo katika kuwalipa marefa na makamisha wanaosimamia VPL na Ligi Daraja la Kwanza (FDL).

“Fedha za udhamini sasa zinakwenda moja kwa moja kwenye Kamati ya Ligi. Ni matarajio yangu kuwa ufanisi utaongezeka, kwani tumeanzisha jambo hili kwa lengo la kuleta tija, maendeleo na utulivu,” amesema Rais Tenga wakati akizungumza na Wahariri wa Michezo kutoka vyombo mbalimbali vya habari.

Rais Tenga amesema mahali penye utulivu na utawala bora watu wanakuwa na imani hasa katika masuala ya fedha, hivyo ni lazima kwa kampuni kuwekeza kwa vile kunakuwa hakuna vurugu.

Amesema ukiondoa Afrika Kusini na Angola katika ukanda huu wa Afrika Mashariki, Kati na Kusini, Ligi Kuu ya Tanzania ndiyo yenye udhamini mkubwa kupitia mdhamini wa ligi na udhamini wa matangazo ya televisheni.

Pia amesema kuanzia msimu ujao 2014/2015 klabu za Ligi Kuu hazitaruhusiwa kusajili wachezaji hadi zitakapowasilisha TFF ripoti zao za mapato na matumizi zilizokaguliwa (Audited accounts), hivyo klabu husika zijiandae kwa ripoti hizo za Januari hadi Desemba 2013.
Kuhusu tiketi za elektroniki, Rais Tenga amesema bado linafanyiwa kazi na CRDB ambayo ndiyo iliyoshinda tenda hiyo na liko katika hatua nzuri, kwani nia ya TFF na benki hiyo kuona kuwa linaanza haraka iwezekanavyo.

“Tiketi za elektroniki zimechelewa kuanza kwa sababu ambazo haziwezi kuzuilika, lakini CRDB imeshatengeneza miundombinu katika karibu viwanja vyote. Kulitokea uchelewaji katika kuleta printer (mashine za kuchapia), zilizokuja hazikuwa zenyewe. Kwa upande wa Uwanja wa Taifa, system (mfumo) iliyopo inatofautiana na ile ya CRDB. Hivyo sasa tunaangalia uwezekano wa zote mbili zitumike kwa pamoja, kwa sababu Uwanja wa Taifa una system yake tayari. Printer zimeshafika, tunataka ili suala lisitucheleweshe,” amesema.

WACHEZAJI 620 WATHIBITISHIWA USAJILI FDL
Kamati ya Sheria na Hadhi za Wachezaji ya Shirikisho la Mpira wa Miguu Tanzania (TFF) imethibitisha usajili wa wachezaji 620 kati ya 624 wa timu za Ligi Daraja la Kwanza (FDL) inayoanza kutimua vumbi kesho (Septemba 14 mwaka huu).

Wachezaji wanne ambao usajili wao umezuiwa mpaka watakapokamilisha taratibu ni Emmanuel Simwanza Namwando wa African Lyon, Godfrey Bonny Namumana (Lipuli FC), na Enyinna Darlington na Chika Keneth Chukwu wote wa Mwadui FC ya Shinyanga.

Darlington na Chukwu ambao wote ni Wanigeria wamezuiwa mpaka watakapowasilisha vibali vya kufanya kazi nchini kutoka Idara ya Uhamiaji wakati Namumana aliyekuwa akicheza nchini Nepal bado hajapata Hati ya Uhamisho wa Kimataifa (ITC).

Nayo African Lyon imetakiwa kufikia muafaka na AYOSA Academy ambayo Namwando anatoka juu ya usajili kabla ya kuanza kumtumia mchezaji huyo.

Klabu ambazo zimemaliza nafasi zote 30 usajili katika FDL ni Friends Rangers FC ya Dar es Salaam, na Stand United FC ya Shinyanga wakati iliyosajili wachezaji wachache zaidi ni Burkina Faso FC. Klabu hiyo ya Morogoro imesajili wachezaji 19 tu.

Vilevile Kamati hiyo vilevile imethibitisha usajili wa wachezaji wanane wa klabu za Ligi Kuu ya Vodacom (VPL) waliosajiliwa katika hatua ya pili ya usajili iliyoanza Agosti 14 hadi 30 mwaka huu.

Wachezaji hao ni Samir Ruhava na Amani Simba (Ashanti United), Robert Machucha na Said Ndutu (Yanga U20), Ayoub Masoud na Abdallah Selemani (Coastal Union U20), Ramadhan Kipalamoto (Simba U20) na Henry Joseph (Simba) ambaye tayari Hati yake Uhamisho wa Kimataifa (ITC) imeshawasili.

WAWILI WAOMBEWA ITC BONDENI, SAIDI MAULID RUKSA KUKIPIGA ASHANTI

Shirikisho la Mpira wa Miguu Tanzania (TFF) limetoa Hati ya Uhamisho wa Kimataifa (ITC) kwa Watanzania wawili kucheza mpira wa miguu nchini Afrika Kusini.

Wachezaji hao; Robert Kobelo na Mohamed Ibrahim wamepewa hati hizo baada ya kuombewa na Chama cha Mpira wa Miguu Afrika Kusini (SAFA) kama wachezaji wa ridhaa ili wajiunge na klabu ya Cacau United ambayo timu yake inacheza Ligi Daraja la Pili katika Wilaya ya Cacau.

Naye mchezaji Said Maulid aliyejiunga na Ashanti United akitokea nchini Angola msimu huu amepata ITC ambayo sasa inamwezesha kuchezea timu hiyo katika mechi za Ligi Kuu ya Vodacom (VPL) inayoingia mzunguko wake wa tatu keshokutwa (Septemba 14 mwaka huu).

MVELLA AJIONDOA KWENYE UCHAGUZI TFF
Mjumbe wa Kamati ya Utendaji ya Shirikisho la Mpira wa Miguu Tanzania (TFF), Eliud Mvella amejiondoa kwenye mchakato wa uchaguzi uliopangwa kufanyika Oktoba 27 mwaka huu.

Mvella amemwandikia barua Mwenyekiti wa Kamati ya Uchaguzi ya TFF, Hamidu Mbwezeleni akielezea uamuzi wake huo pamoja na mambo mengine umetokana na kile alichodai kuwa Kamati hiyo haikumtendea haki kwa kumwondoa.

Mbwezeleni amekiri kupokea barua hiyo, na kuongeza kuwa licha ya uamuzi huo wa Mvella aliyekuwa ameomba kuwania ujumbe wa Kamati ya Utendaji kupitia Kanda Namba Saba ya mikoa ya Iringa na Mbeya, bado suala lake litasikilizwa na Kamati ya Maadili ya TFF kwa ajili ya hatua zaidi.

Kamati ya Mbwezeleni ilimuondoa Mvella katika kinyang’anyiro hicho kwa kushindwa kuheshimu Kanuni za Uwajibikaji wa Pamoja (collective responsibility) baada ya kushiriki kufanya uamuzi ndani ya Kamati ya Utendaji ya TFF bila ya kutaka msimamo wake wa kupinga uwekwe kwenye muhtasari na baadaye kuupinga uamuzi huo akiwa kwenye uongozi wa mkoa.

FDL SASA KUPIGWA UWANJA WA KAWAWA
Mechi za nyumbani za timu ya Kanembwa JKT ya Kigoma iliyoko Ligi Daraja la Kwanza (FDL) sasa zitachezwa katika Uwanja wa Kawawa badala ya ule wa Lake Tanganyika.

Uamuzi wa kuhamishia mechi hizo Uwanja wa Kawawa ulioko Ujiji umetokana na Uwanja wa Lake Tanganyika kutumiwa na Serikali katika Operesheni Ondoa Wahamiaji Haramu inayoendelea nchini kwa sasa. Uwanja huo hivi sasa unatumika kuhifadhi wahamiaji hao.

Kanembwa JKT inaanzia nyumbani kwa kuikaribisha Polisi Tabora. Mechi hiyo itachezwa Jumamosi (Septemba 14 mwaka huu).

Boniface Wambura Mgoyo
Ofisa Habari
Shirikisho la Mpira wa Miguu Tanzania (TFF)

TEMEKE, MJINI MAGHARIBI KUCHEZA NUSU FAINALI

Temeke na Mjini Magharibi zinapambana kesho (Septemba 13 mwaka huu) katika mechi ya nusu fainali ya michuano ya Copa Coca-Cola kwa vijana wenye umri chini ya miaka 15 itakayofanyika Uwanja wa Kumbukumbu ya Karume, jijini Dar es Salaam.

Timu hizo zimetinga hatua hiyo baada ya kushinda mechi zao za robo fainali ya michuano hiyo zilizochezwa leo (Septemba 12 mwaka huu) asubuhi kwenye uwanja huo huo.

Wakati Temeke imetinga hatua hiyo baada ya kuilaza bao 1-0 Iringa lililofungwa dakika ya 18 na Ramadhan Mohamed, Mjini Magharibi imeing’oa Mtwara kwa ushindi wa bao 1-0.

Robo fainali nyingine zinachezwa leo (Septemba 12 mwaka huu) jioni kwa Kilimanjaro kuvaana na mabingwa watetezi Morogoro huku Arusha ikioneshana kazi na Ilala.

MSHINDI MISS TANZANIA 2013 KUPATA GARI NA MILIONI NANE

MSHINDI wa taji la Redd’s Miss Tanzania mwaka huu anatarajiwa kuondoka na gari dogo lenye thamani ya Sh milioni 15, huku akipewa kitita taslimu cha fedha cha Sh milioni 8.
Shindano hilo linatarajiwa kufanyika Septemba 21, mwaka huu katika ukumbi wa Mlimani City, huku kukiwa na burudani za kila aina kutoka kwa wasanii maarufu wa ndani pamoja na mwingine kutoka nje.

Akitangaza zawadi hizo jijini Dar es Salaam jana, Meneja wa kinywaji cha Redd’s Original, Victoria Kimaro alisema, wameamua kutangaza mapema zawadi hizo, ili kuleta morali kwa washiriki wote wa shindano hilo.

“Tunaamini shindano la mwaka huu litakuwa na ushindani mkubwa zaidi na zawadi hizi zitakidhi kwa kiasi kikubwa mahitaji ya warembo,” alisema Victoria. Shindano hilo litashirikisha warembo 30 kutoka sehemu mbalimbali hapa nchini.

Meneja wa kinywahji cha Redd’s Original Victoria Kimaro akitangaza zawadi za washindi wa shindano la Redd’s Miss Tz jijini Dar Es Salaam kwa waandishi wa habari,Katikati ni Hashim Lundenga na Bosco majaliwa wa kamati ya Miss Tanzania

Mbali na mshindi kutwaa zawadi hizo, mshindi wa pili atapata Sh milioni 6.2, mshindi wa tatu Sh milioni , mshindi wa nne Sh milioni 3, mshindi wa tano Sh milioni 2, mshindi wa sita hadi 15 atapata Sh milioni 1.2 na waliobaki watapata Sh 700,000 kila mmoja.

“Thamani ya fedha taslimu itakuwa ni kiasi cha Sh milioni 46.1 na zawadi zote hizi watakabidhiwa warembo wa Redd’s Miss Tanzania siku inayofuata baada ya kufanyika kwa fainali hizo,” alisema Victoria.

Naye Mkurugenzi wa Kampuni ya Lino International Agency, Hashim Lundenga ambao ndio waandaaji aliwashukuru wadhamini na kusema wamefanya kazi kubwa zaidi katika kuyakuza mashindano hayo.

“Kwa mara nyingine tena tunapenda kuchukua nafasi hii kuwashukuru wadhamini wetu wakuu Redd’s Original na wadhamini wenza ambao kwa kweli wamefanya kazi kubwa sana kuhakikisha shindano la mwaka huu linakuwa zuri zaidi,” alisema Lundenga.

Taji la Redd’s Miss Tanzania kwa sasa linashikiliwa na Brigitte Alfred aliyelitwaa taji hilo mwaka jana na kukabidhiwa gari aina ya Noah pamoja na kitita cha Sh milioni 8.

Nafasi ya pili katika shindano hilo alikuwa Eugene Fabian kutoka Kanda ya Ziwa, Edda Sylvester aliyekuwa Miss Temeke akishika nafasi ya tatu, ya nne ikienda kwa mrembo kutoka Kinondoni, Magdalena Roy na nafasi ya tano ikienda Happyness Daniel kutoka Kanda ya Ziwa.

Shindano la Redd’s Miss Tanzania linadhaminiwa na Kampuni ya Bia Tanzania (TBL) kupitia kinywaji chake cha Redd’s Original, huku wadhamini wenza wakiwa Zanzi, Giraffe Hotel, Star TV, Nipashe, Uchumi Supermarket, Marie Stopes na Clouds FM

TEMEKE YAIZAMISHA RUKWA 5-1 COPA COCA COLA

Temeke imejiweka katika nafasi nzuri ya kucheza robo fainali ya michuano ya Copa Coca-Cola kwa vijana wenye umri chini ya miaka 15 baada ya leo (Septemba 10 mwaka huu) asubuhi kuizamisha Rukwa mabao 5-1.

Hadi mapumziko katika mechi hiyo ya kundi B hatua ya Fainali za Taifa iliyochezwa Uwanja wa Kumbukumbu ya Karume jijini Dar es Salaam, washindi walikuwa mbele kwa mabao 3-0.

Mabao ya washindi yalitiwa wavuni na Constantine Katepa aliyefunga dakika ya 28, Patrick Ambrose dakika ya 36 huku Hamisi Kajole akipiga mawili dakika ya 43 na 71. Bao la nne lilifungwa dakika ya 46 na Ramadhan Juma.

Rukwa ambayo kwa matokeo hayo imeshatolewa ilipata bao lake dakika ya 51 kupitia kwa Francisco Nkanga. Timu nyingine katika kundi hilo ni Geita na Ilala.

 Robo Fainali ya michuano hiyo itaanza keshokutwa (Septemba 12 mwaka huu). Kila kundi linatoa timu mbili kucheza hatua hiyo katika mashindano hayo yanayodhaminiwa na kampuni ya Coca-Cola.

LIGI YA FDL KUENDELEA JUMAMOSI

Timu za Kimondo SC ya Mbeya na Kurugenzi ya Mafinga zitatumia viwanja vya Mbozi na Mafinga kwa ajili ya mechi za Ligi Daraja la Kwanza (FDL) inayoanza Jumamosi (Septemba 14 mwaka huu).

Kimondo SC sasa itatumia Uwanja wa CCM Vwava ulioko wilayani Mbozi badala ya Uwanja wa Kumbukumbu ya Sokoine wa jijini Mbeya. Nayo Kurugenzi itatumia Uwanja wa Wambi ulioko Mafinga mkoani Iringa badala ya Uwanja wa Makambako ulioko mkoani Njombe.

Mechi za fungua dimba FDL msimu huu zitakuwa kati ya Burkina Faso na Polisi Morogoro kwenye Uwanja wa Jamhuri, mjini Morogoro, Mkamba Rangers na Lipuli ya Iringa kwenye Uwanja wa CCM Mkamba, Majimaji na Mlale JKT kwenye Uwanja wa Majimaji mjini Songea na Kimondo na Kurugenzi kwenye Uwanja wa CCM Vwawa katika mechi za kundi B.

Septemba 14 mwaka huu Tessema na Green Warriors zitaoneshana kazi Uwanja wa Karume, Dar es Salaam. Siku inayofuata (Septemba 15 mwaka huu) Transit Camp na Polisi Dar (Mabatini mjini Mlandizi) wakati mechi nyingine za kundi hilo la A zitakuwa kati ya Villa Squad na African Lyon (Karume) na Ndanda FC na Friends Rangers (Nangwanda Sijaona, Mtwara).

Kundi C ni Polisi Mara na Polisi Dodoma (Uwanja wa Karume, Musoma), Kanembwa JKT na Polisi Tabora (Uwanja wa Lake Tanganyika, Kigoma), Stand United na Mwadui (Kambarage, Shinyanga) wakati Pamba na Toto Africans zitamenyana Uwanja wa CCM Kirumba jijini Mwanza.

HAKUNA TATIZO SIMBA, HALI SHWARI

“LEO, Jumapili, Septemba 8, 2013, magazeti na vyombo vingine vya habari vimeripoti taarifa kwamba hali ndani ya klabu ya Simba si shwari. Sababu zilizotolewa ni kutoingia kambini kwa baadhi ya wachezaji, ‘kutoweka’ kwa wachezaji waliokwenda nchini Uganda na ubaguzi wa wazi unaofanywa na kocha Abdallah Kibadeni na msaidizi wake Jamhuri Kihwelo (Julio).
Klabu ya Simba imesikitishwa sana na habari zote hizo. Hizi ni habari ambazo zimeandikwa kwa lengo la kuibua migogoro isiyokuwepo. Na hata pale ambapo waandishi wamepata fursa ya kupata maelezo kutoka kwa wahusika, bado wameandika taarifa za kuonyesha migogoro.

Simba inaomba kutoa ufafanuzi kuhusu masuala machache.

 Klabu ya Simba kwa sasa ina wachezaji 49. Kati ya hao, wachezaji 29 wako katika kikosi cha kwanza na 20 ni wa kikosi cha pili maarufu kwa jina la Simba B.

 Kutokana na uwezo mkubwa wanaouonyesha, baadhi ya wachezaji walio katika kikosi cha pili, wameweza kupata namba katika kikosi cha kwanza mfano akiwa Saidi Ndemla, ambaye juzi tu alifunga bao la kwanza kwenye mechi dhidi ya KMKM.

Asilimia kubwa ya wachezaji hao 49 walisafiri, kufanya mazoezi na kucheza mechi kwa takribani miezi miwili chini ya Kibadeni na Julio, wakati timu ikijiandaa na Ligi Kuu ya Tanzania.
Lakini sasa, benchi la ufundi limepata kikosi ambacho linadhani linaweza kufanya nacho kazi. Na haya ni maamuzi ya kiufundi.

Kuingia kambini katika mechi ya Ligi Kuu dhidi ya Mtibwa, benchi la ufundi limechagua wachezaji takribani 26.  Wachezaji 20 wameingia kambini jana na sita wengine (wanne walio katika timu ya Taifa Stars na wawili; Joseph Owino na Abel Dhaira- wenye ruhusa kwenda Uganda) watajiunga kuanzia kesho.

Ni kawaida kwa makocha kufanya mazoezi na idadi maalumu ya wachezaji inaowataka. Kwa mfano tu, Jose Mourinho wa Chelsea ya England, hupenda kufanya kazi na wachezaji 24 tu. Kibadeni ameamua kuwa na 26 tu.

Simba haiwezi kuingiza kambini wachezaji 49 kwa kipindi hiki ambapo mashindano yameanza. Kuna sababu kubwa mbili. Mosi, kiufundi, kwani mwalimu hawezi kufanya kazi na wachezaji wote hao kwani mechi zinahitaji maandalizi maalumu na uelewa wa kutosha wa kutosha wa wachezaji na mbinu zinazotumika.

Pili, kiuchumi, ni gharama kubwa sana kuingiza kambini wachezaji wote hao. Kwenye mechi moja, wachezaji 11 tu ndiyo wanaotumika. Watatu wanakuwa wa akiba. Hivyo, timu haihitaji wachezaji zaidi ya 14 kwa mechi moja. Ni wazi wachezaji hata 30 tu ni wengi sana katika mazingira haya.
Msimu uliopita, aliyekuwa Kocha Mkuu wa Simba, Patrick Liewig, aliamua kutumia wachezaji aliowataka kwenye mazoezi yake na uongozi ukamuunga mkono hata kama baadhi ya wapenzi na wanachama hawakumuunga mkono kwa vile wengi wa wachezaji waliokuwa wakiachwa walikuwa maarufu.

Ni sera ya uongozi wa Simba, chini ya Mwenyekiti, Mhe; Ismail Aden Rage, kwamba maamuzi yote ya benchi la ufundi yataheshimiwa na uongozi hautaingilia. Kama ambavyo haukumuingilia Liewig mwaka jana, uongozi pia hauna nia ya kuingilia maamuzi ya Kibadeni.

Tuhuma dhidi ya benchi la ufundi kwamba linaigawa timu hazina mashiko. Wachezaji waliofanya vizuri zaidi kwenye mazoezi na mechi za kirafiki chini ya Kibadeni ndiyo haohao wameingia kambini. Wale ambao hawajaingia kambini wataendelea na mazoezi na wataitwa kambini au kwenye mechi wakati Kibadeni atakapoona inafaa.

Klabu ya Simba ingeomba vyombo vya habari viripoti matukio kwa ukweli wake na si kwa ajenda binafsi dhidi ya uongozi huu, benchi la ufundi au wachezaji fulani.

Kuandika habari kuhusu migogoro wakati ambapo haipo hakusaidii kukuza michezo yote. Migogoro ya kila siku imekuwa chanzo cha kuzorota kwa michezo hapa nchini. Ni vema kama vyombo vingeamua kuripoti kwa dhati kuhusu migogoro kama ipo lakini Simba SC hailewi ni kwa vipi vyombo vinashiriki katika kuleta machafuko ambayo hayapo.

Vyombo vya habari vina kazi kubwa tatu muhimu; Kuelimisha, Kuburudisha na Kufundisha… Kuleta migogoro si miongoni mwa dhima zake na tungeomba sana kwamba weledi utazamwe sana kwenye mambo haya.

Owino na Dhaira
Kuna vyombo vimeandika kwamba wachezaji hawa wametoweka kambini. Lakini gazeti moja limekwenda mbali na kufanya mahojiano na Kibadeni. Kocha akawaambia wachezaji hao waliaga na wamepewa ruhusa. Lakini gazeti hilohilo limeona inafaa kuandika wachezaji hao.

WAMETOWEKA !
Kutoweka gani huku ambako watu wanaaga na kupewa ruhusa?
Owino na Dhaira wana matatizo yao binafsi na waliomba ruhusa  wakapewa. Wote wanarejea wiki inayoanza kesho. Ni sera ya uongozi huu kujali hali za wachezaji na mahitaji yao. Na ndiyo maana tumeamua kumruhusu mchezaji wetu tegemeo, Shomari Kapombe, abaki Ufaransa bila ya klabu kupewa chochote, kwa vile mchezaji atanufaika sana na mkabata huo.

Na uongozi huu hautasita kuweka mbele maslahi na mahitaji ya wachezaji wake mbele. Habari hiyo pia ni uthibitisho mwingine kuhusu agenda ya siri dhidi ya SIMBA SC inayoendelea.
Itoshe tu kusema kwamba SIMBA SC ina imani kubwa sana na vyombo vya habari vya Tanzania ambavyo vimefanya kazi kubwa sana kuufikisha mchezo wa mpira wa miguu hapa ulipo hivi sasa. Uongozi wa Simba SC unaahidi kwamba utaendelea kutoa ushirikiano kwa vyombo vya habari kwa kadri itakavyowezekana,”.
“Imetolewa na Ezekiel Kamwaga,
Ofisa Habari Simba SC,”.

STARS YACHAPWA 2-0 NA GAMBIA

Taifa Stars imemaliza vibaya mechi za mchujo za Kombe la Dunia, Kanda ya Afrika baada ya kufungwa na Gambia huku Kocha Kim Poulsen akisema timu yake imefungwa mabao mepesi.

Wenyeji Gambia wameshinda mabao 2-0 katika mechi hiyo iliyochezwa leo (Septemba 7 mwaka huu) kwenye Uwanja wa Independence ulioko hapa jijini Banjul ukiwa ni ushindi wake wa kwanza katika kundi hilo la C ambapo imemaliza ikiwa ya mwisho ikiwa na pointi nne.

Akizungumza baada ya mechi hiyo, Kocha Poulsen amesema Gambia ilistahili kushinda kwa vile ilitengeneza nafasi nyingi kuliko timu yake, na kuongeza kuwa mabao iliyopata Gambia yalikuwa mepesi.

“Hatukutengeneza nafasi nyingi za kufunga, lakini tukaruhusu mabao mapesi. Nawapongeza Gambia kwani walistahili ushindi. Unapofanya makosa unaadhibiwa. Gambia ilikuwa timu nzuri leo, kwani ilitengeneza nafasi nyingi za kufunga, sisi tukatoa mabao mepesi,” amesema Kim.

Taifa Stars inayodhaminiwa na Kilimanjaro Premium Lager imemaliza katika nafasi ya tatu katika kundi hilo lililokuwa na timu nne ikiwa na pointi sita ilizozipata nyumbani kwa kuzifunga Morocco na Gambia.

Hata hivyo, Kim amesema sababu nyingine ya kutofanya vizuri ni kuwakosa wachezaji wanaocheza nje ya nchi na wengine wa kikosi cha kwanza ambao ni majeruhi.

Mabao yote ya Gambia katika mechi hiyo iliyochezeshwa na Munyemana Hudu kutoka Rwanda yalifungwa na nahodha wa timu hiyo Mustapha Jarjue.

Alifunga la kwanza dakika ya 44 na kupachika lingine dakika ya 51, mabao yaliyotokana na wachezaji wa Stars kutokuwa makini.

Katika mechi hiyo Stars iliwakilishwa na Juma Kaseja, Vincent Barnabas, Erasto Nyoni/David Luhende, Nadir Haroub, Henry Joseph, Frank Domayo, Haruni Chanongo, Amri Kiemba, Mrisho Ngasa, Simon Msuva na Khamis Mcha/Juma Liuzio.

Taifa Stars inaondoka Banjul kesho (Septemba 8 mwaka huu) saa 6 mchana kwa ndege ya Arik hadi Dakar, Senegal ambapo itaunganisha kwa ndege ya Kenya Airways kupitia Nairobi ambapo itawasili Uwanja wa Ndege wa Kimataifa wa Julius Nyerere (JNIA) keshokutwa (Septemba 9 mwaka huu) saa 8.05 mchana.

Boniface Wambura
Ofisa Habari
Shirikisho la Mpira wa Miguu Tanzania (TFF)
+2207362384 Banjul

YANGA YAFAFANUA UJIO WA NAGGI

Makamu Mwenyekiti wa Yanga, Clement Sanga

Patrick Naggi, mkenya aliyezua kizaazaa Yanga

Hatimaye uongozi wa Yanga umetangaza rasmi kumtambua Mkenya, Patrick Naggi, ambaye alijitambulishwa kwa wanachama wa klabu hiyo kwamba ni katibu mkuu mpya wa kuajiriwa.

Hata hivyo, Yanga imesema si kweli kwamba Naggi ni katibu mkuu mpya bali ni miongoni mwa watu watatu waliojitokeza kuomba nafasi hiyo.

Hayo yamesemwa na Makamu Mwenyekiti wa Yanga, Clement Sanga alipozungumza na waandishi wa habari mjini Dar es Salaam juzi kuhusu ujio wa Mkenya huyo.

Sanga alisema uongozi wa Yanga unamtambua Naggi, lakini si kama katibu mkuu mpya. Alisema kwa sasa klabu ipo kwenye mchakato wa kumpata katibu mkuu mpya, kazi ambayo inafanywa na kampuni moja ya Jijini Dar es Salaam.

Kiongozi huyo wa Yanga alisema, Naggi alikwenda makao makuu ya Yanga kutembelea mazingira na hakukuwa na ubaya kwake kufanya hivyo, lakini wanachama walitafsiri vibaya.

"Binafsi sioni kama alichokifanya Naggi kilikuwa kibaya. Yeye ni miongoni mwa watu kadhaa, ambao wamo kwenye mchakato wa kutaka ajira ya katibu mkuu, kutembelea mahali ambako huenda ukafanyakazi si vibaya,"alisema.

Sanga alisema kamati ya utendaji ya Yanga imetoa baraka ya kuboresha sekretarieti nzima, ikiwa ni pamoja na kuajiri katibu mkuu mpya kwa lengo zima la kujitegemea.

"Lengo letu ni kuwa na sekretarieti bora yenye watendaji wenye sifa na ari ya kuiendeleza Yanga. Kwa sababu hiuyo, tumeipa kazi kampuni moja ya Dar es Salaam, itusaidie kuwapata watendaji wenye sifa zinazokubalika,"alisema.

Sanga hakutaka kutaja jina la kampuni hiyo, lakini alisema itakapomaliza kaziyake, itawasilisha majina ili taratibu zingine zifuatwe kabla ya kumpata mwenye sifa na kupewa nafasi hiyo.

Amewataka wanachama na mashabiki wa klabu hiyo wawe watulivu katika kipindi hiki uongozi ukiendelea na taratibu za kumpata katibu mkuu mpya.

Alisema kwa sasa, kaimu katibu mkuu wa klabu hiyo, Lawrence Mwalusako ataendelea kushikilia wadhifa huo hadi katibu mkuu mpya atakapopatikana.

Alipoulizwa kuhusu katiba ya Yanga kutaka mfanyakazi wa klabu hiyo kuwa mwanachama, Sanga alisema dunia inabadilika na kwamba kuna uwezekano mkubwa wa kumhitaji mtendaji bora asiye mwanachama.

Hata hivyo, Sanga alisema iwapo Naggi atakidhi sifa za kushika nafasi hiyo, atapewa kadi ya uanachama wa Yanga.

"Wakati umefika watu waweze kubadilika kwa kuzingatia zaidi taaluma ya mtu. Tusipokuwa makini, tunaweza kukosa watendaji wazuri kwa kisingizio cha uanachama. Tutakuwa makini kuhakikisha kuwa, mamluki hawapati nafasi ya uongozi ndani ya Yanga,"alisisitiza.

STARS USO KWA USO NA GAMBIA LEO, KASEJA KUANZA LANGONI

Na Boniface Wambura, Banjul

Kikosi cha Taifa Stars kimewasili salama hapa Banjul, Gambia tayari kwa mechi ya mchujo ya Kombe la Dunia dhidi ya wenyeji itakayochezwa leo (Septemba 7 mwaka huu).

Stars inayodhaminiwa na Kilimanjaro Premium Lager imewasili hapa juzi (Septemba 5 mwaka huu) saa 11 jioni ikitokea Dakar, Senegal ambapo ilichelewa kuunganisha ndege, hivyo kuamua kutumia usafiri wa barabara kwa vile ni karibu na baadaye kupanda kivuko kuingia Banjul badala ya kulala na kuchukua ndege nyingine siku inayofuata.

Wachezaji wako katika hali nzuri na jana jioni walifanya mazoezi ya mwisho kwenye Uwanja wa Independence ulioko Bakau ambao utatumika kwa mechi ya leo. Timu imefikia hoteli ya Seaview iliyoko kandokando ya Bahari ya Atlantic.

Mechi hiyo itaanza saa 10.30 jioni kwa saa za hapa ambapo nyumbani Tanzania itakuwa saa 1.30 usiku, na itachezeshwa na waamuzi kutoka Rwanda, Munyemana Hudu. Waamuzi wasaidizi ni Theogene Ndagijimana, Honore Simba na Issa Kagabo. Kamishna ni Andy Quamie kutoka Liberia.

Washabiki na vyombo vya habari vya hapa wanaizungumzia mechi hiyo ambayo ina umuhimu mkubwa kwa pande zote, huku Gambia ikiwa imeita wachezaji tisa wanaocheza barani Ulaya na Marekani.

Gambia ambayo imepata uongozi mpya wa Chama cha Mpira wa Miguu Gambia (GFA) imepania kuhakikisha haimalizi mechi za mchujo ikiwa na pointi moja tu.

Kwa upande wa Tanzania, Kocha Kim Poulsen amesema nia ni kuona Stars yenye pointi sita inamaliza katika nafasi ya pili nyuma ya Ivory Coast ambayo tayari imechukua tiketi pekee ya kucheza raundi ya mwisho kutoka kundi hili la C.

“Mechi hii ni muhimu kwetu kwa vile tunataka matokeo mazuri ugenini. Lakini kikubwa ni kuwa matokeo mazuri si tu yatatuweka katika nafasi ya kuwa wa pili, lakini vilevile yatatusaidia kuongeza pointi kwenye viwango vya ubora vya FIFA, na kikubwa zaidi hii ni sehemu ya maandalizi ya sisi kucheza Fainali za Afrika za 2015,” amesema Kim.

Stars inatarajiwa kupangwa hivi; Juma Kaseja, Vincent Barnabas, Erasto Nyoni, Nadir Haroub, Henry Joseph, Frank Domayo, Haruni Chanongo, Amri Kiemba, Mrisho Ngasa, Simon Msuva na Khamis Mcha.

Boniface Wambura
Ofisa Habari
Shirikisho la Mpira wa Miguu Tanzania (TFF)
+2207362384 Banjul

SIMBA YAICHEZESHA KWATA KMKM

HABARI NA ZAITUN KIBWANA, PICHA NA BIN ZUBEIRY BLOG
SIMBA SC imeendelea kung’ara katika michezo ya kirafiki baada ya jioni hii kuilaza timu ya Kikosi Maalum cha Kuzuia Magendo (KMKM) ya Zanzibar mabao 2-1 kwenye Uwanja wa Taifa, Dar es Salaam.

Mabao ya Simba katika mchezo huo ulioanza saa 11:05 jioni yalifungwa na beki Mrundi, Kaze Gilbet na kiungo mzalendo Said Ndemla.  Hadi mapumziko, tayari Wekundu wa Msimbazi walikuwa mbele kwa mabao 2-0.

Simba ilipata bao lake la kwanza dakika ya 28 baada ya Ndemla kupokea pasi ya Issa Rashid ‘Baba Ubaya’ upande wa kushoto na kuingia ndani akiwachambua mabeki kabla ya kumtungua na kipa wao, Mudathir Khamisi aliyevutika.
Simba ikapata bao la pili dakika ya 41 kwa shuti la moja kwa moja la mpira wa adhabu lililopigwa na beki Gilbert, kufuatia Ramadhani Chombo ‘Redondo’ kuchezewa rafu.
Pamoja na kufungwa mabao hayo ya kipindi cha kwanza, lakini KMKM iliyoongozwa na wachezaji wenye uzoefu na soka ya Bara, kiungo Abdi Kassim ‘Babbi’ aliyewahi kucheza Mtibwa Sugar, Yanga SC na Azam na Ally Ahmed ‘Shiboli’ aliyecheza Simba SC, Kagera Sugar na Coastal Union iliendelea kucheza vizuri.  
 
KMKM inayofundishwa na kipa wa zamani wa kimataifa wa Tanzania, Ally ‘Bush’ Bushiri ilipata bao lake dakika ya 54 kupitia kwa Iddi Kambi aliyewazidi ujanja mabeki wa Simba SC inayofundishwa na mshambuliaji wa zamani wa kimataifa wa Tanzania, Alhaj Abdallah Athumani Seif ‘King Kibaden’.

Kikosi cha Simba SC kilikuwa; Andrew Ntalla, Haruna Shamte, Issa Rashid ‘Baba Ubaya’, Hassan Hatibu, Kaze Gilbert, Abdulhalim Humud, Twaha Ibrahim, Said Ndemla, Amisi Tambwe, Ramadhani Chombo ‘Redondo’/Betram Mombeki na Zahor Pazi.
KMKM; Mudathir Khamis, Kassim Nemshi, Faki Hamad, Iddi Mgeni, Khamis Ali, Ibrahim Khamis, Nassor Ali, Abdi Kassim ‘Babbi’, Ally Ahmed ‘Shiboli’, Mwinyi Ameir na Iddi Kambi. 

MKENYA AZUA BALAA YANGA

HALI si shwari ndani ya klabu ya Yanga baada ya Baraza la Wazee kutangaza kumtimua Katibu Mkuu mpya aliyeajiriwa kutoka Kenya.

Baraza hilo la wazee lilifikia uamuzi huo jana katika kikao chake kilichofanyika makao makuu ya klabu hiyo mitaa ya Twiga na Jangwani, Dar es Salaam.

Mkenya huyo, Patrick Naggi aliripoti makao makuu ya klabu hiyo juzi na kujitambulisha kuwa, ameajiriwa na Yanga katika nafasi ya katibu mkuu.

Hata hivyo, Naggi hakuwa tayari kumtaja kiongozi aliyemwajiri kwa vile ajira za viongozi hutolewa na kamati ya utendaji, ambayo haijawahi kukutana katika siku za hivi karibuni.

Akizungumza na waandishi wa habari mjini Dar es Salaam jana, Katibu wa Baraza la Wazee la Yanga, Ibrahim Akilimali alisema hawana taarifa ya kuondolewa kwa Kaimu Katibu Mkuu wa sasa, Lawrence Mwalusako.

Akilimali alisema kiutaratibu, iwapo yanafanyika mabadiliko ya uongozi ndani ya Yanga, lazima kamati ya utendaji ikutane na kutoa uamuzi.

Katibu huyo wa wazee wa Yanga alisema, baraza lake pamoja na viongozi wa matawi pia wanapaswa kujulishwa kuhusu jambo hilo, kitu ambacho hakikufanyika.

"Tulichogundua au tunachohisi ni kwamba huyu mkenya anayeitwa Patrick Naggi ni tapeli na tumemtaka aondoke kwenye klabu yetu kwa sababu hatumtaki,"alisema Akilimali.

Akisimulia ujio wa Mkenya huyo, Akilimali alisema alifika klabuni Jumanne iliyopita na kujitambulisha kwamba, yeye ni katibu mkuu mpya wa Yanga.

"Tulimuuliza nani aliyempa kazi hiyo, akashindwa kumtaja, tukaamua kumtimua ili aende kwa mtu aliyemleta nchini ampe nauli arudi kwao Kenya,"alisema.

"Sisi tunaendelea kumtambua Mwalusako kuwa ndiye kaimu katibu mkuu wa Yanga, hayo mabadiliko hayapo kwa sababu taratibu hazikufuatwa. Kunapokuwa na nafasi ya kazi, lazima tangazo litolewe kupitia kwenye vyombo vya habari na kamati ya utendaji ndiyo inayomuidhinisha,"aliongeza.

Akilimali alisema baraza lake linaendelea kufanya uchunguzi ili kubaini kiongozi aliyetaka kumwajiri Mkenya huyo kinyume cha taratibu kwa ajili ya kumchukulia hatua za kinidhamu.

Baadhi ya wanachama wa Yanga waliozungumza na Burudani juzi na jana makao makuu ya klabu hiyo walisema, wanahisi Mkenya huyo ameajiriwa na Mwenyekiti wao, Yusuf Manji.

Hata hivyo, Manji hakuweza kupatikana jana kwa vile yuko nje ya nchi kikazi. Makamu wake, Clement Sanga naye hakuweza kupatikana.

Kwa upande wake, Mwalusako alisema hatambui kuajiriwa kwa mtu mwingine kushika wadhifa wake kwa sababu hakupewa taarifa yoyote na viongozi wake.

Baadhi ya vyombo vya habari viliripoti jana kuwa, klabu ya Yanga imeamua kufanya mabadiliko katika sekretarieti yake kwa kumwondoa Mwalusako na kumwajiri Naggi.

Naggi aliwahi kuwa Ofisa Mtendaji Mkuu wa Shirikisho la Soka la Kenya (FKF) na Ofisa Mtendaji wa klabu ya Tusker.

Taarifa zaidi zimeeleza kuwa, Naggi aliwahi kufukwa kazi KFK kutokana na upotevu wa mipira 100.
Hata hivyo, Mkenya huyo aliwahi kulalamika kwamba mipira hiyo iliyotolewa na Shirikisho la Soka Afrika (CAF) haikuwa katika kiwango kinachostahili. Pia aliwahi kulalamika kwamba hakupewa nafasi ya kujieleza kutokana na kilichotokea.