DIAMOND KUJENGA MSIKITI DAR

MSANII nyota wa muziki wa kizazi kipya nchini, Naseeb Abdul 'Diamond' ameeleza nia yake ya kutaka kujenga msikiti katika Jiji la Dar es Salaam.

Diamond alisema mjini Dar es Salaam wiki hii kuwa, kwa sasa anatafuta eneo zuri kwa ajili ya kujenga nyumba hiyo ya ibada.

Msanii huyo alisema amefikia uamuzi huo kwa lengo la kutekeleza imani yake katika dini ya kiislam, ambayo inawataka watu wenye uwezo kujitolea kujenga nyumba za ibada.

"Sijajua ni wapi nitakapojenga msikiti huo kwa sababu bado sijapata eneo. Hivyo kwa sasa natafuta eneo zuri linalofaa kwa shughuli hiyo,"alisema msanii huyo, ambaye amewahi kushinda tuzo kadhaa za muziki za Kilimanjaro.

Uamuzi huo wa Diamond umekuja siku chache baada ya kukaririwa hivi karibuni akisema kuwa, amemjengea nyumba mama yake yenye thamani ya sh. milioni 60.

Mbali na kumjengea nyumba mama yake, Diamond alisema pia kuwa, amenunua gari jipya, ambalo ameliagiza nchini Japan. Alisema gari hilo ni tofauti na Prado VX analotumia sasa.

Wakati huo huo, Diamond ameamua kufuta ziara yake ya maonyesho ya muziki nchini Ujerumani.

Diamond ameeleza kupitia blogu yake wiki hii kuwa, amefikia uamuzi huo kutokana na promota wa ziara hiyo kushindwa kutimiza mahitaji yake.

Aliyataja baadhi ya mahitaji hayo kuwa ni pamoja na kushindwa kulipa pesa za maonyesho yaliyotakiwa kufanyika Machi 9 na 15 mwaka huu mjini Stuttgart, Ujerumani na Rotterdam, Uholanzi.

"Mimi na timu yangu nzima ya Wasafi hatutahudhuria kwenye maonyesho hayo," alisisitiza.

Diamond alisema alikuwa akipata maswali mengi kutoka kwa mashabiki kuhusu ziara hiyo, lakini aliamua kukaa kimya kwa sababu hakuwa na uhakika na waandaaji.

STARA ALALAMIKIA UGUMU WA KUTENGENEZA FILAMU

MSANII nyota wa fani ya filamu nchini, Wastara Juma amesema utengenezaji wa filamu kwa sasa ni kazi ngumu kwa wasanii kuliko ilivyokuwa miaka ya nyuma.

Wastara, ambaye ni maarufu zaidi kwa jina la Stara alisema mjini Dar es Salaam mwishoni mwa wiki iliyopita kuwa, baadhi ya wasanii wameshaanza kukata tamaa kutokana na ugumu wa kazi hiyo.

Alisema watayarishaji wa filamu wamekuwa wakikaa muda mrefu kusotea kazi zao kutokana na wauzaji na wasambazaji kuzichelewesha bila ya sababu za msingi.

Stars alisema hali hiyo imesababisha filamu nyingi zinapoingia sokoni, kuonekana zimepitwa na wakati kwa sababu ya kuchelewa kuuzwa.

"Soko la filamu kwa sasa ni gumu kuliko ambavyo jamii inaliona. Ukiona kazi imetoka sokoni, ujue watu wametabika kwa kiwango kikubwa,"alisema.

Kutokana na ugumu wa kazi hiyo na pia mihangaiko ya kumuuguza na kumpoteza mumewe, Stara alisema ameamua kupumzika kwa muda kujihusisha na fani hiyo.

Stara alisema amefikia uamuzi huo kwa lengo la kuipumzisha na kuijenga upya akili yake kabla ya kujipanga upya.

Stara alifiwa na mumewe, Juma Kilowoko mwaka jana kutokana na ugonjwa wa kansa ya utumbo. Kilowoko, ambaye ni maarufu zaidi kwa jina la Sajuki, alikuwa mmoja wa wasanii wa bongo movie.

"Ninasafiri wiki ijayo kwenda Arabuni kwa ajili ya kupumzika. Nitakapokuwa mapumziko, nitaangalia nitoke vipi, yaani nifanyekazi kwa staili ipi,"alisema mwanamama huyo, ambaye ni mama wa mtoto mmoja, aliyezaa na Sajuki.

Stara alisema familia yake ndiyo iliyoamua aende huko kwa lengo la kujifariji baada ya matatizo yaliyomkuta.

Mwanamama huyo alikiri kuwa, yapo baadhi ya mambo, ambayo hawezi kuyasahau katika maisha yake kutokana na kifo cha Sajuki.

“Siku aliyoaga dunia, jana yake aliniomba nisiondoke na kumuacha peke yake, lakini kwa sababu zilizokuwa nje ya uwezo wangu, niliondoka. Naumia kwa kuwa ningejua atakufa, nisingeondoka,” alisema Stara.

Alilitaja jambo lingine kuwa ni ombi la Sajuki kumtaka watengeneze filamu ya mapenzi, inayofanana na mikasa mbalimbali iliyowahi kuwakuta katika maisha yao.

Alisema waliitunga filamu hiyo miaka miwili iliyopita na Sajuki aliomba acheze anakufa na kurudi tena duniani. "Nikilikumbuka hili naumia sana, siwezi kusahau maishani mwangu,"alisema.

Stara alisema pia kuwa, hawezi kuisahau siku, ambayo Sajuki alimuomba mjomba wake amletee gunia la mkaa, siku atakaporejea kutoka katika safari yake nchini Uganda.

“Tuliokuwepo tulimshangaa na kumuuliza kwa nini? Akasema huo mkaa una kazi yake, amletee tu. Cha kushangaza, mjomba wake aliuleta siku ambayo ni ya msiba wake,” alisema Stara.

Alilitaja tukio lingine, ambalo hawezi kulisahau katika maisha yake kuwa ni ombi la mumewe kutaka arekodi wimbo alioutunga kwa ajili ya kuwashukuru watanzania.

“Wimbo huo alisema utaitwa Nisameheni. Cha kushangaza, alipoanza kunishushia mistari, akaanza kuchanganya na mambo yasiyoeleweka, nikahisi ameanza kuchanganyikiwa. Nilimuita daktari wake na hata lile zoezi la kurekodi halikufanyika tena,” alisema mwanamama huyo.

DRFA YATEUA KAMATI ZA KUIKWAMUA

Kamati ya Utendaji ya Chama Cha Mpira wa Miguu Mkoa wa Dar es Salaam kwa mamlaka iliyonayo imeteua kamati mbali mbali zitakazoshirikiana na Kamati ya Utendaji katika kukabiliana na changamoto mbali mbali za mpira wa miguu katika Mkoa wake ili kuweza kufikia malengo yake waliyojiwekea. Wafuatao ni watu na kamati mbali mbali walioteuliwa/zilizoteuliwa na Kamati ya Utendaji ya Chama Cha Soka Mkoa wa Dar es Salaam:

Bw. Joseph Kanakamfumo Mkurugenzi wa Ufundi
Bw. Saidi Pambalelo Afisa Tawala
Bw. Mohamedi Muharizo Afisa Habari
Bw. Hashim Abdallah Afisa Usalama

KAMATI YA FEDHA NA MIPANGO
1. Bw. Meba Ramadhani Mwenyekiti
2. Bw. Iddi Msonga Makamu Mwenyekiti
3. Bw. Ali Hassani
4. Bw. Ramadhani Kilemile
5. Bw. Isack Mazwile

KAMATI YA UFUNDI NA MASHINDANO
1. Bw. Kenny Mwaisabula Mwenyekiti
2. Bw. Shabani Mohamedi Makamu Mwenyekiti
3. Bw. Hugo Seseme
4. Bw. Daudi Kanuti
5. Bw. Kassim Mustapha
6. Bw. Abeid Mziba
7. Bw. Bakari Mtumwa

KAMATI YA MAENDELEO YA SOKA LA VIJANA NA WANAWAKE
1. Bw. Benny Kisaka Mwenyekiti
2. Bw. Muhsin Balhabou Makamu Mwenyekiti
3. Dr. Sesy Makafu
4. Bw. Emmanuel Kazimoto
5. Dr. Maneno Tamba
6. Bw. Edwin Mloka
7. Bw. Sande Mwanahewa
8. Bw. Richard Shayo

KAMATI YA WAAMUZI
1. Bw. Jovin Ndimbo Mwenyekiti
2. Bw. Sijali Mzeru Makamu Mwenyekiti
3. Bw. Saidi Mbwana
4. Bw. Benny Mtula
5. Bw. Abdallah Mitole

KAMATI YA NIDHAMU NA USULUHISHI
1. Mheshimiwa Roman Masumbuko Mwenyekiti
2. Bw. Fahadi Faraji Kayuga Makamu Mwenyekiti
3. Bw. Mohamedi Mpili
4. Bw. Peter Nkwera
5. Bw. Jimmy Mhango

KAMATI YA RUFAA
1. Mheshimiwa Salehe Njaa Mwenyekiti
2. Bw. Saidi Engo Makamu Mwenyekiti
3. Bw. Abasi Kuka
4. Bw. Yusuph Macho
5. Bw. Boi Risasi

Pia Kamati ya Utendaji ya Chama Cha Mpira wa Miguu Mkoa wa Dar es Salaam inapenda kuwafahamisha wanachama wake, wadau na mashabiki wa mpira wa miguu Tanzania dhamira yao ya kuendeleza mpira wa miguu katika Mkoa wa Dar es Salaam na Tanzania kwa ujumla.

Kwa kuanzia Chama cha Mpira wa Miguu Mkoa wa Dar es Salaam kipo kwenye mchakato wa kukamilisha DRFA Strategic Plan 2013 - 2016 (Mpango Mkakati Kazi) kwa kipindi cha miaka minne pamoja na kuboresha Financial Regulations zake ili kiweze kuwa na dira ya kuwahudumia wadau wake kwa ufanisi na uwazi zaidi. Lakini pia Kamati ya Utendaji imeona haja ya Chama Cha Mpira wa Miguu Mkoa wa Dar es Salaam kuwa na Website yake kwa ajili ya kuwapa habari wadau wake na Watanzania kwa ujumla.

Mwisho Kamati ya Utendaji ya Chama Cha Mpira wa Miguu Mkoa wa Dar es Salaam kinaomba ushirikiano na wadau wote wa mpira hususani Serikali, TFF, Vyama vya Mikoa, Walimu, Waamuzi, Madaktari, Vilabu, Makampuni na Waandishi wa habari na Vyombo vya habari katika kuendeleza mpira wa miguu katika mkoa wa Dar es Salaam na hatimaye mikoa yote ya Tanzania.

“Kwani Pamoja Tunaweza”

Ahsanteni,
Almasi Kasongo
Mwenyekiti wa Chama Cha Mpira wa Miguu Mkoa wa Dar es Salaam (DRFA)

DSTV YAMZAWADIA MSHINDI

Mshindi wa nne wa DStv Rewards Bwana Edward Hiza Mhina (katikati) akipotea hundi ya shilingi milioni tano (5,000,000/=). Kulia ni Meneja Uhusiano wa MultiChoice Tanzania, Barbara Kambogi na Meneja wa Fedha wa kampuni hiyo, Francis Senguji. DStv inatoa kila wiki Tshs 5,000,000 kwa wateja wake ambao watalipia malipo ya mwezi ya akaunti zao za DStv kabla ya kukatika.

YANGA, RUVU SHOOTING DIMBANI J'MOSI

Ligi Kuu ya Vodacom (VPL) kuwania ubingwa wa Tanzania Bara inaendelea Jumamosi (Machi 16, 2013) kwa mechi tatu zitakazochezwa katika miji ya Mwanza, Dar es Salaam na Manungu, Turiani mkoani Morogoro.

Toto Africans inayopigana kukwepa kurudi daraja la kwanza itakuwa mwenyeji wa Mgambo Shooting kutoka Tanga katika mechi itakayochezwa Uwanja wa CCM Kirumba.

Vinara wa ligi hiyo Yanga wataumana na Ruvu Shooting kwenye Uwanja wa Taifa wakati Uwanja wa Manungu utakuwa mwenyeji wa mechi ya Mtibwa Sugar na Coastal Union.

UCHAGUZI TAFCA KUFANYIKA MOROGORO
Uchaguzi wa viongozi wa Chama cha Makocha wa Mpira wa Miguu Tanzania (TAFCA) utafanyika Jumamosi (Machi 16 mwaka huu) mjini Dodoma ambapo wajumbe wanatakiwa kuripoti siku moja kabla ya uchaguzi.

Wagombea waliopitishwa kuwania uongozi na Kamati ya Uchaguzi ya TAFCA chini ya uenyekiti wa Ramadhan Mambosasa ni Oscar Don Koroso (Mwenyekiti), Lister Manyara (Makamu Mwenyekiti) na Katibu (Michael Bundala).

Wengine ni Gabriel Gunda (Katibu Msaidizi), Mjumbe wa Mkutano Mkuu wa Shirikisho la Mpira wa Miguu Tanzania- TFF (Wilfred Kidao) wakati wagombea ujumbe wa Kamati ya Utendaji ni Jemedali Saidi, George Komba na Magoma Rugora.

KIM KUTAJA KIKOSI CHA KUIUA MOROCCO

Kocha Mkuu wa timu ya Taifa ya Tanzania (Taifa Stars), Kim Poulsen anatarajia kesho (Machi 13 mwaka huu) kutaja kikosi chake kitakachoivaa Morocco.

Mkutano huo wa Waandishi wa Habari utafanyika saa 5 asubuhi kwenye ofisi za Shirikisho la Mpira wa Miguu Tanzania (TFF). Taifa Stars inayodhaminiwa na Kilimanjaro Premium Lager itacheza na Morocco kwenye Uwanja wa Taifa, Dar es Salaam, Machi 24 mwaka huu.

MECHI YA SIMBA, COASTAL YAINGIZA MIL 37/-
Mechi ya Ligi Kuu ya Vodacom kati ya Simba na Coastal Union iliyochezwa juzi Uwanja wa Taifa, Dar es Salaam imeingiza sh. 36,820,000 kutoka na watazamaji 6,284.

Viingilio katika mechi hiyo namba 138 iliyomalizika kwa Simba kuibuka na ushindi wa mabao 2-1 vilikuwa sh. 5,000, sh. 8,000, sh. 15,000 na sh. 20,000 huku kila klabu ikipata mgawo wa sh. 8,265,752.45 wakati Kodi ya Ongezeko la Thamani (VAT) iliyolipwa ni sh. 5,616,610.17.

Mgawo mwingine wa mapato hayo ni asilimia 15 ya uwanja sh. 4,202,924.97, tiketi sh. 3,183,890, gharama za mechi sh. 2,521,754.98, Kamati ya Ligi sh. 2,521,754.98, Mfuko wa Maendeleo ya Mpira wa Miguu (FDF) sh. 1,260,877.49 na Chama cha Mpira wa Miguu Mkoa wa Dar es Salaam (DRFA) sh. 980,682.49.

Boniface Wambura
Ofisa Habari
Shirikisho la Mpira wa Miguu Tanzania (TFF)

TBL KUDHAMINI TENA BONANZA LA TASWA APRILI 6

KAMPUNI ya Bia Tanzania (TBL) itadhamini bonanza la vyombo mbalimbali vya habari litakalofanyika Aprili 6 mwaka huu viwanja vya Leaders Klabu, Dar es Salaam likiandaliwa na Chama cha Waandishi wa Habari za Michezo Tanzania (TASWA).

Akizungumza katika mkutano na wanahabari kutambulisha bonanza hilo Dar es Salaam jana, Ofisa Uhusiano wa TBL, Doris Malulu alisema huu ni mwaka wa tano mfululizo kwa kampuni yake kudhamini bonanza linaloandaliwa na TASWA na kwamba wamekuwa na matumaini makubwa na chama hicho ndiyo sababu wanakubali kushirikiana nacho kila mwaka.

Malulu alisema zaidi ya Sh. Milioni 50 zitatumika kwa ajili ya bonanza hilo na kusisitiza kuwa lengo la kampuni yake ni kuona linakuwa na mafanikio makubwa kuliko mengine yaliyopita.

“Wanahabari ni wadau wetu wakubwa, hivyo kupitia TASWA tunaona ni njia nzuri ya kutuunganisha na kukaa pamoja kutafakari masuala mbalimbali,” alisema Malulu.

Kwa upande wake Katibu Mkuu wa TASWA, Amir Mhando aliishukuru TBL kwa udhamini huo na kusema kuwa zaidi wa washiriki 1,500 wanatarajiwa kuhudhuria tamasha hilo linaloandaliwa na TASWA kila mwaka likijulikana kama Media Day Bonanza.

“Lengo la bonanza letu ni kuwaweka pamoja waandishi wote wa habari bila kujali ni wa siasa, michezo, uchumi, afya na mambo mengine pamoja na wafanyakazi wa vyombo mbalimbali vya habari, ili kubadilishana mawazo na kufurahi pamoja,” alisema.

Alieleza kuwa bonanza hilo litaambatana na michezo mbalimbali itakayohusisha vyombo vyote vitakavyoshiriki na pia kutakuwa na burudani ya muziki kutoka katika moja ya bendi kubwa za muziki wa dansi hapa nchini, ambayo itatangazwa siku zijazo.

Bonanza la mwaka jana lilifanyika ukumbi wa Msasani Beach Klabu, ambapo mgeni rasmi alikuwa Waziri wa Ushirikiano wa Afrika Mashariki, ambaye pia ni Mbunge wa Urambo Mashariki na aliyekuwa Spika wa Bunge la Tisa, Samuel Sitta.

Pamoja na mambo mengine, Sitta alikabidhi zawadi za vikombe na medali kwa washindi mbalimbali walioibuka siku hiyo, pia alipata fursa ya kuzungumza na washiriki zaidi ya 1,500 wa bonanza hilo.

SIPHO MAKHABANE KUTUMBUIZA TAMASHA LA PASAKA DAR

BAADA ya mwaka jana mwimbaji mahiri Rebecca Malope wa Afrika Kusini kutumbuiza kwenye Tamasha la Pasaka jijini Dar es Salaam, mwaka huu ni zamu yam kali mwingine kutoka nchini humo Sipho Makhabane.

Taarifa kwa vyombo vya habari iliyotolewa jana na Kamati ya Maandalizi ya tamasha hilo, ilieleza kuwa raia huyo wa Afrika Kusini amethibitisha atakuja kutumbuiza kwenye Tamasha la Pasaka Machi 31 mwaka huu Uwanja wa Taifa, Dar es Salaam.

“Ni mafanikio mengine kwa tamasha la mwaka huu, mwaka jana tulifanikiwa kumpata Malope, mwaka huu tumepiga hatua nyingine ya kumleta Sipho,” ilisema taarifa ya lisema Mwenyekiti wa kamati hiyo, Alex Msama.

Kuthibitisha kushiriki tamasha hilo kwa msanii huyo kunafanya idadi ya wasanii kutoka nje ya Tanzania watakaokuja kutumbuiza hadi sasa kufikia wane.

Wasanii wengine wa nje ya Tanzania ambao tayari wamethibitisha kushiriki tamasha hili ni , Ephraim Sekeleti wa Zambia na Solomon Mukubwa raia wa Jamhuri ya Kidemokrasia ya Congo (DRC) anayeishi Kenya na kwaya ya Ambassadors of Christ ya Kigali Rwanda inayotamba na albamu ya Mtegemee Yesu. Wasanii wa Tanzania waliothibitisha hadi sasa ni Rose Muhando, Upendo Nkone na John Lissu.

“Ni msanii mwenye uwezo mkubwa na aliyejijengea jina, hivyo ujio wake ni jambo la kufurahia,” ilisema taarifa hiyo na kuongeza kuwa msanii huyo amekuwa akipata mafanikio katika muziki wa Injili karibu kila mwaka.

Baadhi ya nyimbo zake ni Moya Wami, Indonga, Akukhalwa, Over&Over, Nguy’zolo, Yizwa Nkosiseju, Hlalanami Nkosi Jesu, Yek’intokozo, Injabulo, Hlalanami Jesu, Makadunyiswe, Vuka Mphemlo, Mphefumlo na Moya Wami.

Wasanii wa Tanzania ambao watashiriki tamasha hilo mwaka huu ni Rose Muhando, John Lissu, Upendo Nkone, kwaya ya Kinondoni Revival na kundi la Glorious Celebration.

Tamasha la Pasaka litafanyika Dar es Salaam Machi 31 na litaendelea Aprili mosi kwenye Uwanja wa Sokoine Mbeya, wakati Aprili 3 ni Uwanja wa Samora Iringa na Aprili 6 Uwanja wa Jamhuri, Dodoma na siku inayofuata itakuwa Uwanja wa CCM Kirumba, Mwanza.

FIFA YATISHIA KUIFUNGIA TANZANIA

Shirikisho la Kimataifa la Vyama vya Mpira wa Miguu (FIFA) limesema litaifungia Tanzania iwapo itabainika kuwa Serikali imekuwa ikiingilia shughuli za Shirikisho la Mpira wa Miguu Tanzania (TFF).

FIFA imesema kumekuwa na shutuma kupitia taarifa mbalimbali za vyombo vya habari nchini kuwa Wizara ya Habari, Vijana, Utamaduni na Michezo imeonesha nia ya kuingilia uendeshaji wa TFF.

Kwa mujibu wa barua ya jana (Machi 10 mwaka huu) ya FIFA kwenda kwa Rais wa TFF, Leodegar Tenga, vyombo vya habari vimemkariri Waziri (Dk. Fenella Mukangara) kuwa Serikali imeiagiza TFF kutumia Katiba ya mwaka 2006 katika uchaguzi wakati tayari imeshafanyiwa marekebisho.

“Pia imeelezwa kuwa TFF imetakiwa kufanya Mkutano Mkuu pamoja na ule wa uchaguzi kwa tarehe ambazo zimepangwa na Serikali. Vilevile imeelezwa kuwa Serikali inakusudia kuunda Kamati ya Muda iwapo TFF haitatekeleza maagizo yake,” imesema sehemu ya barua hiyo iliyosainiwa na Katibu Mkuu wa FIFA, Jerome Valke.

FIFA imesema iwapo yaliyoripotiwa na vyombo vya habari yatathibitika kuwa kweli, maana yake huo ni uingiliaji wa wazi wa Serikali kwa shughuli za TFF.

“Tunapenda kuwakumbusha kuwa wanachama wote wa FIFA wanatakiwa kuendesha shughuli zao kwa uhuru bila kuingiliwa na mtu mwingine kama ilivyoelezwa katika ibara za 13 na 17 za Katiba ya FIFA.

“Hivyo kama maagizo hayo yanayodaiwa kutolewa na Serikali yatatekelezwa, suala hili litapelekwa katika mamlaka za juu za FIFA kwa hatua zaidi ikiwemo kuisimamisha Tanzania kama ambavyo inakuwa pale panapokuwa na uingiliaji wa Serikali,” imesema barua hiyo.

Barua hiyo ambayo nakala yake pia imetumwa Shirikisho la Mpira wa Miguu Afrika (CAF) imeelezea baadhi ya athari ambazo Tanzania itakumbana nazo endapo itasimamishwa ni timu za taifa pamoja na klabu kutoshiriki mechi za kimataifa kwa mujibu wa Ibara ya 14 ya Katiba ya FIFA.

Vilevile si TFF au wanachama wake na maofisa wengine watakaoweza kunufaika na programu za maendeleo, kozi au mafunzo yanayotolewa na FIFA na CAF.

“Madai ya uamuzi uliofanywa na Wizara ya Habari, Vijana, Utamaduni na Michezo ni ya kusikitisha kutokana na ukweli kuwa FIFA ilishatangaza itatuma ujumbe wake kuchunguza jinsi hali ilivyo kwa sasa na kutoa mapendekezo yake. Kutokana na hali hii, ujumbe wa FIFA uliokuwa uje kuchunguza (suala la uchaguzi) itabidi usubiri kwa vile ni muhimu kushughulikia tatizo hili kwanza.

“Katika mazingira haya tunaomba ueleze msimamo huu wa FIFA kwa mamlaka zinazohusika (Serikali) na athari ambazo mpira wa miguu wa Tanzania utakumbana nazo. Tunakushuru na tunatarajia utatufahamisha kila hatua inayoendelea katika suala hili,” imesema barua hiyo.

Boniface Wambura
Ofisa Habari
Shirikisho la Mpira wa Miguu Tanzania (TFF)

SIMBA YAWAFUTA MACHOZI MASHABIKI WAKE

SIMBA jana iliwafuta machozi mashabiki wake baada ya kuibuka na ushindi wa mabao 2-1 dhidi ya Coastal Union katika mechi ya ligi kuu ya Tanzania Bara iliyochezwa kwenye Uwanja wa Taifa, Dar es Salaam.

Kutokana na ushindi huo, Simba sasa imefikisha pointi 34 baada ya kucheza mechi 19, ikiwa nyuma ya Yanga yenye pointi 45 na Azam yenye pointi 37.

Katika mechi hiyo, Kocha Patrick Liewig wa Simba aliamua kuwapumzisha wachezaji wake nyota kadhaa na kuamua kuwachezesha chipukizi.

Baadhi ya wachezaji nguli waliowekwa benchi katika mechi hiyo ni Juma Kaseja, Haruna Moshi, Mwinyi Kazimoto, Felix Sunzu, Juma Nyoso na Amir Maftah.

Wachezaji chipukizi waliocheza mechi hiyo ni mabeki Miraji Adamu na Hassan Khatib, viungo Jonas Mkude, Rashid Ismail , Abdalla Seseme, Ramadhani Singano na Chanongo.

Iliwachukua Simba dakika 34 kuhesabu bao la kwanza lililofungwa na Mrisho Ngasa kabla ya kuongeza la pili dakika ya 44 lililofungwa na Haruna Chanongo.

Bao la kujifariji la Coastal Union lilifungwa na kiungo Razak Khalfan dakika ya 49 baada ya kupokea pasi kutoka kwa Ibrahim Twaha.

YANGA HAIKAMATIKI, YAITUNGUA TOTO AFRICAN 1-0

YANGA jana iliendeleza wimbi la ushindi katika michuano ya soka ya ligi kuu ya Tanzania Bara baada ya kuichapa Toto African bao 1-0 kwenye Uwanja wa Taifa, Dar es Salaam.

Ushindi huo uliiwezesha Yanga kujikita zaidi kileleni mwa ligi hiyo, ikiwa na pointi 45 baada ya kucheza mechi 19, ikifuatiwa na Azam yenye pointi 37.

Toto African ililianza pambano hilo kwa kasi na kufanya mashambulizi makali kwenye lango la Yanga, lakini wachezaji wake, Mussa Mussa, Mohamed Jingo na Chika Oluge walishindwa kuzitumia vyema nafasi walizopata kufunga mabao. Timu hizo zilikwenda mapumziko zikiwa suluhu.

Yanga ilizinduka dakika ya 48 na 53 wakati Hamisi Kiiza na Jerry Tegete walipoingia na mpira ndani ya 18, lakini mashuti yao hayakuweza kulenga lango.

Toto African ilipata pigo dakika ya 68 baada ya mchezaji wake Eric Mlilo kutolewa nje kwa kadi nyekundu na mwamuzi Andrew Shamba kutoka Pwani kwa kosa la kucheza rafu mbaya.

Bao pekee na la ushindi la Yanga lilifungwa na Nizar Khalfan dakika ya 70. Alifunga bao hilo baada ya kupokea pasi kutoka kwa Kiiza.

HABARI ZANZIBAR YAVULIWA UBINGWA KOMBE LA NSSF

Meneja Kiongozi wa Shirika la Taifa la Hifadhi ya Jamii (NSSF),  Eunice Chiume (kushoto) akikabidhi jezi kwa kiongozi wa klabu ya michezo ya Uhuru Media, Rashid Zahor wakati wa hafla ya makabidhiano ya vifaa vya michezo kwa timu zitakazoshiriki michuano ya Kombe la NSSF iliyofanyika jana makao makuu ya shirika hilo mjini Dar es Salaam. Wengine pichani ni katibu wa kamati ya mashindano hayo, Modest Msangi na mratibu, Juma Kintu. (Picha na Emmanuel Ndege).

MABINGWA watetezi wa michuano ya soka ya Kombe la NSSF, Habari Zanzibar jana walivuliwa ubingwa baada ya kupigwa mweleka wa mabao 3-0 na Changamoto.

Katika mechi hiyo ya ufunguzi iliyochezwa kwenye uwanja wa klabu ya Sigara, Chang'ombe, Dar es Salaam, Changamoto ilikwenda mapumziko ikiwa mbele kwa bao 1-0.

Bao la kwanza la Changamoto lilipachikwa wavuni na Ahmed Ganichaga dakika ya 20 kabla ya Hashim Kimbaga na Lutende Mwakalule kuongeza mengine mawili dakika ya 78 na 84.

Kutokana na kipigo hicho, Habari Zanzibar imetolewa katika michuano hiyo inayochezwa kwa mtindo wa mtoano wakati Changamoto imefuzu kucheza robo fainali.

Katika michuano ya netiboli, wenyeji NSSF walianza kwa kishindo na kutoa onyo kwa timu zingine baada ya kuicharaza Mlimani TV mabao 46-1.

Wafungaji wa mabao ya NSSF walikuwa Pili Singano, aliyefunga 22 na Sifa Katila aliyefunga mabao 24.

Akifungua michuano hiyo, Waziri wa Kazi na Ajira, Gaudencia Kabaka aliipongeza NSSF kwa kuwakutanisha wafanyakazi wa vyombo vya habari kupitia mashindano hayo.

Alisema mashindano hayo ni muhimu kwa vile yanajenga uhusiano mzuri kati ya vyombo vya habari na pia yanawaweka wafanyakazi wa vyombo hivyo katika afya nzuri.

Viongozi wengine waliohudhuria hafla ya ufunguzi wa michuano hiyo ni Mkurugenzi Mkuu wa NSSF, Dk. Ramadhani Dau na Meneja Kiongozi, Uhusiano wa shirika hilo, Eunice Chiume.

Michuano hiyo inaendelea tena leo wakati Free Media itakapomenyana na TSN kwenye uwanja wa Sigara kuanzia saa mbili asubuhi.

Kesho, IPP itashuka dimbani kumenyana na TBL kwenye uwanja wa Sigara wakati NSSF itamenyana na Redio Kheri kwenye uwanja wa DUCE.

Katika netiboli, TBC itamenyana na Sahara kuanzia saa 10 jioni kabla ya Uhuru Media kumenyana na Free Media kuanzia saa 11 jioni.

BINGWA KOMBE LA NSSF KUZOA MIL NNE, VUMBI KUANZA KUTIMKA KESHO

BINGWA wa mwaka huu wa michuano ya soka ya Kombe la NSSF katika mchezo wa soka atazawadiwa kitita cha sh. milioni nne.

Akitangaza zawadi hizo kwa waandishi wa habari mjini Dar es Salaam leo, Meneja Kiongozi, Idara ya UHusiano na Huduma kwa Wateja wa Shirika la Taifa la Hifadhi ya Jamii (NSSF), Eunice Chiume alisema mshindi wa pili atazawadiwa sh. milioni tatu wakati mshindi wa tatu atapata sh. milioni 1.5.

Eunice alisema kwa upande wa netiboli, bingwa atazawadiwa sh. milioni tatu, mshindi wa pili atapata sh.milioni mbili na wa tatu sh. milioni moja.

Alisema NSSF imeamua kutumia sh. milioni 13.6 kwa ajili ya zawadi za timu na wafungaji bora kwa lengo la kuongeza ushindani kwa timu shiriki.

Kwa mujibu wa Eunice, wafungaji bora wa michezo yote miwili watapata zawadi ya sh. 300,000 kila mmoja.

Eunice alisema michuano hiyo inatarajiwa kuanza kesho asubuhi kwa mechi kati ya mabingwa watetezi Habari Zanzibar na Changamoto katika soka wakati NSSF itamenyana na Mlimani TV katika netiboli.

Aliongeza kuwa, mgeni rasmi katika sherehe za ufunguzi wa michuano hiyo anatarajiwa kuwa Waziri wa Kazi na Ajira, Gaudencia Kabaka.

Michuano ya mwaka huu ni ya 10 kuandaliwa na kudhaminiwa na NSSF na ni maalumu kwa ajili ya vyombo vya habari. Michuano ya mwaka huu inatarajiwa kugharimu sh. milioni 120 na itazishirikisha timu 17 za soka na 15 za netiboli.

Timu zitakazoshiriki katika michuano ya mwaka huu ni wenyeji NSSF, IPP, TBC, Mwananchi, Uhuru Media, Business Times, Sahara Communications, Global Publishers, Free Media, Changamoto.

Timu zingine ni Mlimani TV, Tumaini Media, Redio Kheri, New Habari, TSN, Jambo Leo na Habari Zanzibar.

Mashindano haya yalianzishwa 2004 kwa lengo la kujenga uhusiano kati ya NSSF na vyombo vya habari, ikiwa ni wiki ya NSSF, inayosherehekewa Machi ya kila mwaka.

RHINO, KANEMBWA ZASAKA TIKETI VPL

KINDUMBWENDUMBWE cha Ligi Daraja la Kwanza (FDL) kinaendelea kesho (Machi 9 mwaka huu) katika makundi yote matatu, lakini macho na masikio ya washabiki wa mpira wa miguu yakiwa kwenye mechi za Rhino Rangers ya Tabora na Kanembwa JKT ya Kigoma.

Timu hizo ndizo ziko katika nafasi nzuri ya kupata tiketi ya kucheza Ligi Kuu ya Vodacom (VPL) msimu ujao kutoka kundi hilo la C. Tayari Mbeya City ya Mbeya na Ashanti United ya Dar es Salaam zimeshapata tiketi za kucheza VPL msimu ujao kutoka kundi A na B.

Rhino Rangers itaikaribisha Polisi Dodoma kwenye Uwanja wa Ali Hassan Mwinyi mjini Tabora, wakati Kanembwa JKT itakuwa mgeni wa Pamba kwenye Uwanja wa CCM Kirumba jijini Mwanza.

Mechi nyingine za kundi C ni Mwadui vs Polisi Tabora (Kambarage, Shinyanga), na Morani vs Polisi Mara (Kiteto, Manyara). Mechi za kundi A ni Majimaji vs JKT Mlale (Majimaji, Songea), Mkamba Rangers vs Mbeya City (Sokoine, Mbeya) na Polisi Iringa vs Burkina Faso (Samora, Iringa).

Mshikeshike ya kundi B ni Ndanda vs Ashanti United (Nangwanda Sijaona, Mtwara), Villa Squad vs Green Warriors (Karume, Dar es Salaam), Polisi Dar vs Transit Camp (Mabatini, Mlandizi) wakati Tessema na Moro United zitacheza Machi 10 mwaka huu Uwanja wa Karume, Dar es Salaam.

YANGA, TOTO AFRICAN DIMBANI KESHO DAR

MICHUANO ya Ligi Kuu ya Vodacom kuwania ubingwa wa Tanzania Bara inaendelea kesho (Machi 9 mwaka huu) kwa mechi mbili ambapo vinara Yanga watakuwa wenyeji wa Toto Africans kwenye Uwanja wa Taifa, Dar es Salaam.


Mwamuzi wa mechi hiyo namba 135 atakuwa Andrew Shamba kutoka Pwani akisaidiwa na Abdallah Mkomwa na Abdallah Rashid pia wote kutoka Pwani. Kamishna ni Salim Singano kutoka Tanga wakati Mtathmini wa waamuzi ni Alfred Lwiza.

Nayo Polisi Morogoro itakuwa mgeni wa Azam kwenye Uwanja wa Azam Complex ulioko Chamazi, Dar es Salaam. Azam katika mechi hiyo namba 136 na nyingine mbili zinazofuata itakuwa bila kocha wake Steward John Hall ambaye Kamati ya Ligi ya Shirikisho la Mpira wa Miguu Tanzania (TFF) imemfungia mechi tatu.

Charles Komba kutoka Dodoma ndiye atakayekuwa Kamishna wa mechi hiyo namba 136 itakayochezeshwa na mwamuzi Simon Mberwa kutoka mkoani Pwani.

Ligi hiyo itaendelea tena keshokutwa (Machi 10 mwaka huu) ambapo Uwanja wa Taifa, Dar es Salaam utashuhudia mechi kati ya Simba na Coastal Union ya Tanga. Waamuzi wa mechi hiyo ni Martin Saanya akisaidiwa na Jesse Erasmo na Vicent Mlabu wote kutoka Morogoro.

KAIJAGE KOCHA MPYA TWIGA STARS

ROGASIAN Kaijage ameteuliwa kuwa kocha mpya wa timu ya taifa ya mpira wa miguu ya wanawake, Twiga Stars baada ya kocha wa zamani, Charles Boniface Mkwasa kujiuzulu katikati ya mwaka jana.

Mkwasa, ambaye alikuwa nyota wa Yanga na Taifa Stars, alijiengua kufundisha timu hiyo aliyoiongoza kwa muda mrefu, baada ya Twiga Stars kuondolewa katika kinyang’anyiro cha kuwania tiketi ya kucheza fainali za Afrika kwa Wanawake (AWC) zilizofanyika nchini Equatorial Guinea.

Twiga ilipata bao muhimu la ugenini jijini Addis Ababa ilipofungwa na wenyeji wao Ethiopia mabao 2-1, lakini ikiwa na matumaini ya kutumia vyema bao la ugenini ilijikuta ikilala bao 1-0 kwenye Uwanja wa Taifa katika mchezo wa marudiano na hivyo kukosa tiketi ya kurudi tena kwenye fainali hizo.

Kaijage ambaye kwa sasa anajihusisha na mradi wa vijana (grassroots) pamoja na programu nyingine za kukuza vipaji zilizo chini ya TFF, aliteuliwa na Kamati ya Ufundi ya TFF kufanya kazi hiyo na ameita kikosi cha Twiga Stars kwa mazoezi ya siku kumi kuanzia Machi 10 hadi 23 mwaka huu Uwanja wa Kumbukumbu ya Karume, Dar es Salaam.

Wachezaji walioitwa ni Amina Ally (Lord Barden), Asha Rashid (Mburahati Queens), Aziza Mwadini (Zanzibar), Esther Chabruma (Sayari), Esther Mayalla (TSC Academy), Etoe Mlenzi (JKT), Evelyn Sekikubo (Mbarahati Queens), Fatuma Bushiri (Simba Queens), Fatuma Mustafa (Sayari) na Fatuma Omari (Sayari).

Flora Kayanda (Tanzanite), Hamisa Athuman (Marsh Academy), Hellen Maduka (Bujora), Hellen Peter (JKT), Irene Ndibalema (TSC Academy), Maimuna Said (JKT), Mwajuma Abdallah (Tanzanite), Mwanaidi Tamba (Mburahati Queens), Mwanahamis Omari (Mburahati Queens) na Mwapewa Mtumwa (Sayari).

Nabila Ahmed (Marsh Academy), Nasiria Hashim (Zanzibar), Pulkeria Charaji (Sayari), Rukia Khamis (Sayari), Semeni Abeid (Tanzanite), Sharida Boniface (Makongo Sekondari), Sophia Mwasikili (Luleburgaz Gucu Spor, Uturuki), Theresa Yona (TSC Academy), Vumilia Maarifa (Evergreen) na Zena Khamis (Mburahati Queens).

TFF YATAKA KUKUTANA TENA NA DK. MUKANGARA

RAIS wa Shirikisho la Mpira wa Miguu Tanzania (TFF), Leodegar Tenga amemshukuru Waziri wa Habari, Vijana, Utamaduni na Michezo, Dk. Fenela Mukangara kwa kukubali ombi la Shirikisho la kutaka kukutana naye kwa mazungumzo na kumsihi asitishe hatua anazodhamiria kuchukua hadi hapo kikao hicho kitakapofanyika.

Waziri Mukangara ameiagiza TFF kuitisha Mkutano Mkuu wa marekebisho ya katiba ifikapo tarehe 15 Aprili 2013 na Mkutano Mkuu wa Uchaguzi ifikapo tarehe 25 Mei 2013 na kwamba tamko la TFF kutekeleza maagizo hayo liwe limetolewa katika muda wa siku tano zinazoishia Jumatatu (Machi 11, 2013).

Katika barua pepe ambayo amemuandikia Waziri ambaye kwa sasa yuko nje ya nchi, Rais Tenga ameeleza kuwa alikwenda ofisini kwake tarehe 7 Machi 2013 kujaribu kumuona lakini akaambiwa amesafiri, hivyo kuomba kukutana na Katibu Mkuu wa Wizara, ambaye pia hakuwepo ofisini na hatimaye akakutana na Naibu Katibu Mkuu.

Katika barua hiyo pepe, Rais Tenga ameeleza madhumuni ya kutaka kuonana na Waziri Mukangara kuwa ni kwanza “kukushukuru kwa kukubali kuonana na ujumbe wa TFF ulioongozwa na mjumbe wetu wa Kamati ya Utendaji, Bw. Alex Mgongolwa, akiongozana na Katibu Mkuu wa TFF, Bw. Angetile Osiah, jana tarehe 6 Machi 2013.

“Kukushukuru kwa kukubali kukutana nasi tena siku ya tarehe 19 Machi, kwa ajili ya mazungumzo juu ya maagizo yako.

“Kukuarifu kuwa nimepokea maagizo yako uliyoyatoa jana kupitia kwa Mjumbe wetu wa Kamati ya Utendaji na kwa njia ya barua; na

“Kwa heshima na taadhima, kukuomba usitishe hatua yoyote ile unayodhamiria kuchukua hadi hapo tutakapokutana na kupata maelezo yetu, TFF, juu ya maamuzi na maagizo uliyoyatoa.”

Tenga, ambaye ni mjumbe wa Kamati ya Utendaji ya Shirikisho la Mpira wa Miguu la Afrika (CAF) aliondoka jana (Machi 7 mwaka huu) kwenda Marrakech, Morocco kuhudhuria kikao cha kamati hiyo na pia Mkutano Mkuu wa CAF ambao umepangwa kufanyika Machi 10 mwaka huu ukihusisha pia ajenda ya uchaguzi wa rais.

SIMBA YAMEGUKA VIPANDE

KLABU ya Simba inaelekea kumeguka vipande vipande baada ya makamu mwenyekiti, Godfrey Nyange 'Kaburu' na mjumbe wa kamati ya utendaji na mwenyekiti wa kamati ya usajili, Zacharia Hanspope kutangaza kujiuzulu.

Katika taarifa yake kwa vyombo vya habari jana, Kaburu alisema amemuandikia barua Rage kumfahamisha kuhusu uamuzi wake huo.

Hata hivyo, Rage hakuweza kupatikana jana baada ya kuwepo na taarifa kwamba, amekwenda India kwa ajili ya kupatiwa matibabu ya mgongo.

Kaburu amekuwa kiongozi wa pili wa kamati ya utendaji ya Simba kutangaza kujiuzulu leo. Mapema asubuhi, Hanspope alitangaza kujiuzulu nyadhifa zote mbili kwa kile alichodai kutoridhishwa na mwenendo wa ndani ya klabu hiyo.

Hanspope alisema pia kuwa, licha ya kuwa kwenye uongozi wa Simba kwa zaidi ya miakia mitatu na kujitolea pesa zake, haoni mafanikio yoyote aliyoyatarajia.

JULIO AWATWISHA ZIGO VIONGOZI SIMBA

KOCHA Msaidizi wa timu ya soka ya Simba, Jamhuri Kihwelo 'Julio' amesema kutolewa kwao mapema katika michuano ya klabu bingwa Afrika kulitokana na maandalizi mabovu.

Julio alisema mjini Dar es Salaam jana kuwa, uongozi wa Simba haukufanya maandalizi mazuri kwa ajili ya mechi hiyo kama walivyofanya wapinzani wao.

Simba ilirejea nchini juzi usiku, ikitokea Angola, ambako ilikwenda kurudiana na Recreativo Libolo na kupigwa mweleka wa mabao 4-0.

Kipigo hicho kiliifanya Simba itolewe kwa jumla ya mabao 5-0 baada ya kupigwa mweleka wa bao 1-0 na Libolo katika mechi ya awali iliyochezwa wiki mbili zilizopita kwenye Uwanja wa Taifa, Dar es Salaam.

Julio alisema wachezaji wa Libolo wanauchukulia mchezo wa soka kuwa ajira, tofauti na wanasoka wa Tanzania, ambao amedai kuwa, hawajui umuhimu wa mchezo huo kwao.

Alisema wachezaji wa Simba hawapaswi kulaumiwa kutokana na timu hiyo kuondolewa mapema. Alisema lawama hizo zinapaswa kuelekezwa kwa uongozi wa klabu hiyo.

"Mechi zetu na Libolo zilikuwa ngumu, lakini wachezaji walicheza vizuri na hakuna wa kumlaumu kwa vile walitimiza wajibu wao. Tungepeta maandalizi mazuri, nadhani tungefanya vizuri,"alisema kocha huyo, ambaye ni mchezaji wa zamani wa Simba.

Amewataka mashabiki wa Simba kuwa na subira kwa vile timu hiyo inajipanga vizuri ili iweze kumaliza michuano ya ligi kuu ya Tanzania Bara ikiwa nafasi ya pili.

Wakati huo huo, Mwenyekiti wa Baraza la Wazee la Simba, Hamisi Kilomoni amewataka wanachama wa klabu hiyo kutulia wakati uongozi ukipanga tarehe ya kufanyika kwa mkutano mkuu.

Kilomoni alisema mjini Dar es Salaam juzi kuwa, kwa vile uongozi umeshatamka kwamba utaitisha mkutano huo wakati wowote, wanachama wanapaswa kuwa na subira.

Alisema kwa sasa, uongozi wa Simba unasubiri ripoti ya Kocha Patrick Liewig kuhusu kutolewa mapema kwa timu hiyo katika michuano ya klabu bingwa Afrika kabla ya kupanga tarehe ya mkutano huo.

Simba ilirejea nchini juzi ikitokea Angola, ambako ilipigwa mweleka wa mabao 4-0 na Libolo na kutolewa katika michuano hiyo kwa kipigo cha jumla cha mabao 5-0.

"Nawaomba wanachama wenzangu wa Simba watulie, kama wanazo hoja zao wasubiri tarehe ya mkutano, siku hiyo watapata nafasi ya kutoa madukuduku yao, wasifanye fujo kwa vile Simba ni klabu ya kistarabu,"alisema.

TFF YAUFYATA KWA SERIKALI

HATIMAYE Shirikisho la Soka Tanzania (TFF) limekutana na Waziri wa Habari, Vijana, Utamaduni na Michezo, Dk.Fenella Mkangara na kujadiliana naye kuhusu mgogoro uliojitokeza katika uchaguzi mkuu wa chama hicho.

Kikao hicho kati ya uongozi wa juu wa TFF, ukiongozwa na Rais wake, Leodegar Tenga na Dk. Fenella kilifanyika kwenye ofisi za wizara hiyo mjini Dar es Salaam.

Mbali na Dk. Fenella, kikao hicho pia kilihudhuriwa na naibu wake, Amos Makalla, ambaye TFF ilikuwa haitaki ishiriki.

Akizungumza na Burudani mjini Dar es Salaam jana, Makalla alisema waliamua kikao hicho kifanyike jana badala ya leo kama TFF ilivyoomba kwa sababu Dk. Fenella alikuwa akijiandaa kwa safari.

Makalla alisema Dk. Fenella alitarajiwa kuondoka nchini jana kwenda nje ya nchi kikazi.

"Tuliamua kikao kifanyike leo (jana) kwa sababu ilikuwa muhimu waziri ahudhurie kabla ya safari yake,"alisema Makalla.

Naibu Waziri alisema katika kikao hicho, hoja mbalimbali zilijadiliwa na serikali imetoa mapendekezo kuhusu nini kifanyike ili kutatua mgogoro huo.

Hata hivyo, Makalla hakuwa tayari kutaja mapendekezo hayo na kumtaka mwandishi wa gazeti hili kuwasiliana na viongozi wa TFF ili wazungumzia jambo hilo.

Katibu Mkuu wa TFF, Angetile Osiah hakuweza kupatikana jana kuzungumzia mapendekezo hayo kwa vile hakuwa akipokea simu yake ya mkononi.

Ofisa Habari wa shirikisho hilo, Boniface Wambura alisema asingeweza kuzungumza lolote kwa vile alikuwa nje ya ofisi. Tenga hakupatikana kwa simu yake ya mkononi.

TFF iliomba kukutana na Dk. Fenella baada ya waziri huyo kuamuru mchakato wa uchaguzi mkuu wa shirikisho hilo uanze upya na kwa kutumia katiba ya 2006.

Dk. Fenella alitoa agizo hilo baada ya kubaini kuwa, mabadiliko ya katiba ya TFF ya 2012 yalifanywa kinyume na sheria ya Baraza la Michezo la Taifa (BMT) na hayakupata baraka za wajumbe wa mkutano mkuu wa shirikisho hilo.

Mgogoro huo uliibuka baada ya Kamati ya Rufani ya TFF kumwengua Jamal Malinzi kuwania nafasi ya urais kwa madai kuwa, hana uzoefu wa uongozi wa miaka mitano kama katiba inavyotaka.

Kufuatia uamuzi huo wa kamati ya rufani, Malinzi aliwasilisha malalamiko kwa Shirikisho la Soka la Dunia (FIFA) kupinga kuenguliwa kwake.

Tayari FIFA imeshaingilia kati mgogoro huo kwa kuahidi kuleta wajumbe wake kufanya uchunguzi kwa kukutana na pande zote zinazohusika kabla ya kutoa ushauri wa nini kifanyike. Ujumbe huo unatarajiwa kuwasili nchini katikati ya mwezi huu.