Simba ilipoiadhiri Yanga

HIVI tutashinda kweli leo! Ni Meneja wa Simba, Innocent Njovu (kushoto) na Kocha Msaidizi, Amri Saidi walipokuwa wakijadiliana jambo kabla ya mechi kati yao na Yanga

TWENDE ukakabidhi kombe. Ndivyo inavyoelekea Rais wa Shirikisho la Soka Tanzania (TFF), Leodegar Tenga (kushoto) akimueleza Waziri wa Kazi, Ajira na Maendeleo ya Vijana, Profesa Juma Kapuya.

MASHABIKI wa Simba wakifuatilia kwa makini pambano kati yao na Yanga. Simba ilishinda mabao 4-3.

WACHEZAJI Shadrack Nsajigwa (kushoto) wa Yanga na Juma Jabu (kulia) wa Simba wakigombea mpira timu hizo zilipomenyana katika mechi ya ligi kuu ya Vodacom iliyochezwa kwenye Uwanja wa Taifa, Dar es Salaam.

MSHAMBULIAJI Mussa Hassan 'Mgosi' (kulia) akitafuta mbinu za kumtoka kiungo Athumani Idd 'Chuji' wa Yanga timu hizo zilipomenyana katika mechi ya ligi kuu ya Vodacom iliyochezwa kwenye Uwanja wa Taifa, Dar es Salaam.

WACHEZAJI wa Simba wakifurahia kombe walilokabidhiwa baada ya timu hiyo kuibamiza Yanga mabao 4-3 katika mechi ya ligi kuu ya Vodacom iliyochezwa kwenye Uwanja wa Taifa, Dar es Salaam.

WACHEZAJI wa Simba wakipongezana baada ya timu yao kuicharaza Yanga mabao 4-3 katika mechi ya ligi kuu ya soka ya Vodacom iliyochezwa kwenye Uwanja wa Taifa, Dar es Salaam
WACHEZAJI wa Simba wakiwa wamembeba kocha wao msaidizi, Amri Saidi baada ya timu hiyo kuichapa Yanga mabao 4-3 katika mechi ya ligi kuu ya Vodacom iliyochezwa kwenye Uwanja wa Taifa, Dar es Salaam.

Omotola akana kuwa na uhusiano na Jim Iyke

LAGOS, Nigeria

OMOTOLA Jalade ni mmoja wa waigizaji nyota na maarufu wa filamu nchini Nigeria. Baada ya kuwemo kwenye fani hiyo kwa zaidi ya miaka 13, bado nyota yake inang’ara, kama ambavyo sura yake imekuwa kivutia kikubwa kwa mashabiki wa fani hiyo.

Kila anaposhiriki kuigiza filamu yoyote, lazima iwe na mvuto. Uigizaji wake, umbile lake, sura yake ya kitoto na miondoko yake ni baadhi ya vitu vilivyomfanya awe kivutio kikubwa kwa mashabiki wa fani hiyo.

Omotola pia ni mwanamuziki. Kibao chake cha ‘Gba’, alichokirekodi miaka mitatu iliyopita kilishika chati za juu kwenye vituo vya radio na televisheni nchini Nigeria, kama ilivyokuwa kwa albamu yake ya kwanza, ambayo iliuzwa nakala nyingi kuliko za wanamuziki nyota wa nchi hiyo.

Mwigizaji huyo pia amekuwa akijihusisha na kazi mbalimbali za kujitolea. Pia ni balozi wa Umoja wa Mataifa katika masuala yanayohusu wakimbizi.

Akihojiwa na waandishi wa habari mjini Lagos hivi karibuni, Omotola alisema uamuzi wake wa kujitosa katika fani ya muziki hauna maana kwamba fani ya filamu hailipi.

“Sifanyikazi zangu kutokana na shinikizo la watu. Si kwa sababu watu wengine wanapiga muziki kama ninavyofanya mimi. Watu walio karibu na mimi watakueleza kwamba, sifanyi vitu kwa sababu watu wengine wanavifanya. Nilichogundua ni kwamba, baadhi ya watu wamekuwa wakipenda kufanya vitu vinavyofanana na nilivyovifanya. Inawezekana ni kwa sababu watu wamekuwa wakiniunga mkono,”alisema.

Omotola alisema muziki si kitu ambacho mtu anaweza kuamka na kusema anataka kukifanya. Alisema anapiga muziki kwa lengo la kueleza hisia zake. Alisema anafurahia kupiga muziki.

Hata hivyo, Omotola alisema anazipenda fani zote mbili kwa vile zinamwezesha kuwasilisha hisia zake kwa jamii. Alisema katika filamu, anaigiza kutokana na maelezo ya hadithi, lakini hadithi si yake. Lakini katika muziki, ni kitu anachopenda kukifanya, ni hadithi yake na anaandika nyimbo zake.

“Katika albamu yangu ijayo, nimeandika asilimia 50 ya nyimbo zilizomo ndani yake. Zingine,
nilihakikisha ni nyimbo ninazoweza kuelezea hadithi yangu, zikielezea hisia zangu,”alisema.

Omotola alisema ameamua kupiga zaidi muziki wa miondoko ya rock kwa sababu ni rahisi kuelezea hisia zake kuliko muziki wa miondoko ya R&B ambao ni wa taratibu zaidi.

“Nahisi kama hatua ifuatayo ya maisha yangu imeshaanza. Najiamini sasa. Siku zote nimekuwa
nikijiamini, lakini najiamini zaidi kwa sasa,”alisema.

“Kuna vitu ambavyo ningependa kuvizungumzia, lakini inaniwia vigumu kuelezea hisia zangu katika miondoko ya R&B,”aliongeza mwanadada huyo, ambaye ni mama wa watoto wane.

Omotola alisema haikuwa vigumu kwake kujitosa kwenye fani ya uigizaji filamu kwa sababu siku ya kwanza aliyofanyiwa majaribio, alifuzu na kupewa nafasi ya kuigiza.Alisema siku hiyo, alimsindikiza rafiki yake kwenda kufanya majaribio, lakini hakufaulu. Alisema wakati
wakitaka kuondoka, rafiki yake huyo alimtaka ajaribu bahati hiyo na kujikuta akifanikiwa.

Pamoja na kufaulu kwake, Omotola alisema familia yake haikuvutiwa na fani hiyo kutokana na
kuheshimika kanisani. Alisema mama yake hakumruhusu kirahisi kujitosa kwenye fani hiyo. Wakati huo, Omotola alikuwa na umri wa miaka 16.

“Mmoja wa majirani zetu ndiye aliyekwenda kwa mama na kumshawishi aniruhusu nijitose kwenye fani hiyo na kumuahidi atahakikisha hakuna kibaya kitakachonitokea,”alisema.

Omotola alisema msimamo wake kwa sasa ni kutocheza filamu holela kwa sababu inapotokea kuwa mbaya, mashabiki hawamtazami mtayarishaji, mhariri au muongozaji. Macho yao huwa kwa waigizaji.

Alisema hali hiyo ndiyo iliyomfanya awe mwangalifu na watayarishaji wa filamu na kujaribu kucheza zile ambazo kiwango chake ni cha juu. Alisema kama nzuri, hayuko tayari kuicheza.

“Wapo baadhi ya waigizaji wenzangu waliochukua uamuzi huo pia na naona fahari juu yao. Ni vigumu, lakini tunapaswa kufanya hivyo, kuongeza kiwango cha filamu zetu,”alisema.

Mwanadada huyo amekanusha madai kuwa, ana uhusiano wa kimapenzi na mwigizaji Jim Iyke na kwamba wamekuwa wakisafiri mara kwa mara nje ya nchi. Alisema tuhuma hizo hazina ukweli wowote.

Alisema binafsi hazipi uzito tuhuma za aina hiyo kwa sababu zimelenga kumwangusha kiusanii.
Alisema haelewi ni faida zipi wanazozipata watu wa aina hiyo.Lakini alikiri kuwa, tuhuma za ana hiyo zinawachafua kwa vile baadhi ya mashabiki huziamini.

Alisema inauma kuona mtu anafanyakazi kwa bidii, lakini mtu mwingine anatokea kusikojulikana na kutaka kumwangusha.

Omotola alikiri pia kuwa, ni kawaida ya wanaume kumtongoza kutokana na mwonekano wake, lakini mara wanapogundua yeye ni mtu wa aina gani, hushindwa kuendelea kufanya hivyo.

Mwigizaji huyo alisema kutingwa kwake na kazi hakumkoseshi nafasi ya kuwa pamoja na familia yake. Alisema yeye na mumewe wameifanya siku ya Jumapili kuwa maalumu kwa familia na kila mwaka wametenga siku maalumu za mapumziko, ambapo huzima simu zao na kutumia muda mwingi kuwa na watoto wao.

Alikiri pia kuwa, mafanikio yake kiusanii yamechangiwa kwa kiasi kikubwa na uamuzi wake wa kuolewa mapema. Alisema kwa wengine, ndoa ni kikwazo kikubwa kwao, lakini kwake ndoa ni uhuru.

“Mama yangu ananiunga mkono kwa kila ninachokifanya. Nina uhuru wa kufanya chochote
ninachochagua,”alisema.

Omotola ni mtoto wa kwanza katika familia ya watoto watatu. Alizaliwa Lagos. Baba yake anatoka katika Jimbo la Ondo wakati mama yake anatoka Abeokuta Jimbo la Ogun.Baba yake alikuwa meneja wa klabu ya Country Ikeja ya mjini Lagos wakati mama yake alikuwa
mfanyabiashara. Baba yake alifariki mwaka 1999 wakati Omotola alipokuwa akisoma shule ya
sekondari. Mama yake alifariki mwaka 2001.

DROGBA: Kiatu cha dhahabu hakina maana kuliko ubingwa wa England

LONDON, England
MSHAMBULIAJI Didier Drogba wa Chelsea amesema kumshinda Wayne Rooney wa Manchester United katika kinyang’anyiro cha ufungaji wa mabao hakutakuwa na maana kama watashindwa kutwaa taji la ligi kuu ya England.

Kauli hiyo ya Drogba imekuja siku chache baada ya kuifungia Chelsea bao la 30 msimu huu, kufuatia kufunga mabao mawili wiki iliyopita wakati Chelsea ilipoinyuka Portsmouth mabao 5-0 katika mechi ya ligi kuu ya England.

Mshambuliaji huyo wa kimataifa wa Ivory Coast anashika nafasi ya pili kwa kufunga mabao 24 katika ligi kuu ya England, akiwa nyuma ya kinara Rooney kwa tofauti ya mabao mawili.

Ushindi huo wa Chelsea pia uliiwezesha kuitimulia vumbi Manchester United katika kinyang’anyiro cha kuwania ubingwa wa ligi hiyo. Timu mbili hizo zinatofautiana kwa pointi moja.

Manchester United inaongoza ligi hiyo kwa kuwa na pointi 72 baada ya kucheza mechi 32, ikifuatiwa na Chelsea yenye pointi 71. Arsenal ni ya tatu kwa kuwa na pointi 68.

“Unajua nini, kama sintamaliza ligi nikiwa mfungaji bora, siwezi kujali kama tutakuwa tumetwaa
ubingwa,”alisema Drogba.

“Nilitwaa tuzo ya kiatu cha dhahabu mwaka 2007 na itakuwa furaha kubwa kwangi kama niitwaa tena, lakini kilicho bora hasa kwangu ni ubingwa wa ligi kuu,”aliongeza.

Drogba alisema ni jambo zuri kwa mchezaji kutwaa tuzo binafsi, lakini ni vizuri zaidi kutwaa tuzo ya pamoja na rafiki zake na wachezaji wenzako.

“Msimu huu umekuwa mrefu na mgumu. Utakuwa msimu mbovu kama nitaibuka mfungaji bora, lakini Chelsea haitatwaa ubingwa,”alisema.

Drogba, ambaye alitimiza umri wa miaka 32 mapema mwezi huu, hadi sasa ameifungia Chelsea mabao 124 katika misimu sita aliyokaa Stamford Bridge. Hakuna mchezaji mwingine wa kigeni katika historia ya Chelsea aliyeweza kufikisha rekodi hiyo.

Kwa sasa, Drogba amepania kufikisha mabao 33 kwa msimu ili kuiwezesha timu hiyo, inayofundishwa na Kocha Carlo Ancelotti iweze kutwaa taji hilo.

“Ukifikiria kwamba, siku hizi zipigi penalti, nilikosekana kwa mwezi mmoja wakati wa fainali za Kombe la Mataifa ya Afrika na sikucheza katika mechi za mwanzo za ligi ya mabingwa wa Ulaya, kufunga mabao 30 kunamaanisha huu ni msimu mzuri kwangu,”alisema.

“Nilitaka kuwaonyesha watu kwamba bado nipo kwa sababu yalisemwa mambo mengi kuhusu mimi mwaka jana na watu hawakuweza kugundua kwamba nilikuwa nasumbuliwa na maumivu ya mguu,”aliongeza.

Drogba alisema alichanganyikiwa kutokana na kucheza idadi ndogo ya mechi msimu huu, lakini kwa sasa anamshukuru Mungu kwamba yupo fiti na anafurahia kurudi uwanjani.

Hata hivyo, Drogba alisema hafurahii kuona Chelsea imetolewa katika michuano ya ligi ya mabingwa wa Ulaya, kufuatia kufungwa jumla ya mabao 3-2 na Inter Milan ya Italia.

Mshambuliaji huyo wa kimataifa wa Ivory Coast alisema mabadiliko makubwa yanahitajika katika wiki chache zijazo kama klabu hiyo inataka kutwaa tena taji hilo baada ya kulikosa kwa miaka minne.

“Tumekuwa tukishutumiwa sana hivi karibuni na nafikiri kwamba ni sahihi kwa sababu hatujacheza kwa kiwango chetu cha kawaida katika wiki chache zilizopita,”alisema.

“Kila timu ilikuwa na wakati mgumu msimu huu, lakini kwetu umekuja kwa wakati mbaya.Kama ingetokea hivyo mapema msimu huu, ingekuwa rahisi kwetu kujirekebisha. Lakini sasa
tunapaswa kupambana na hakuna muda wa kufikiri,”alisema.

“Tulikuwa na wakati mzuri kutokana na kuongoza ligi, lakini tumepoteza nafasi hiyo na sasa tunapaswa kuikimbiza Manchester United. Sasa tunapaswa kushinda michezo yetu yote kama tunataka kutwaa ubingwa,”aliongeza.

Hata hivyo, Drogba alisema binafsi anaamini Chelsea ina uwezo wa kutwaa taji la ligi hiyo msimu huu.Alisema Manchester United haikukata tama wakati walipokuwa nyuma ya Chelsea na kwamba hata baada ya kuifunga Arsenal mwezi uliopita, Kocha Mkuu wa timu hiyo, Arsene Wenger alisema bado wanayo nafasi ya kutwaa ubingwa.

Drogba alisema kauli hiyo ya Wenger ilikuwa sahihi kwa sababu japokuwa walichanganyikiwa wakati Manchester United ilipotwaa uongozi, lakini wanapaswa kujirekebisha na kuanza kushinda tena.

“Ni muhimu sana kwamba tuliishinda Aston Villa wiki iliyopita. Ulikuwa ushindi muhimu kwetu.Wiki ijayo tutakuwa ugenini kucheza na Manchester United na tunahitajika kwenda Old Trafford tukiwa na nafasi ya kuwapiku kwenye uongozi iwapo tutashinda,”alisema.

“Tunapaswa kuhakikisha kuwa, tofauti ya pointi kati yetu haiwi kubwa wikiendi hii, hivyo tunapaswa kufanya kila linalowezekana kushinda,”aliongeza.

Drogba aliumia tena mguu mwishoni mwa wiki iliyopita wakati alipokuwa akimtengenezea pasi Frank Lampard, aliyeifungia Chelsea bao la tano katika mechi dhidi ya Portsmouth, ukiwa ni ushindi wa pili mkubwa msimu huu.

Mshambuliaji huyo alishindwa kuichezea Chelsea mwishoni mwa wiki iliyopita, ilipoibanjua Aston Villa mabao 7-1, lakini ana uhakika mkubwa wa kuichezea dhidi ya Manchester United.

“Mguu wangu kwa sasa una maumivu kwa sababu beki (wa Portsmouth) alinikwatua, lakini nafikiri utapona.

“Ni vigumu kuwa fiti na katika shepu ya kawaida wakati unapocheza mechi nyingi. Tumekuwa na wachezaji wengi majeruhi kwa sasa, hasa wa safu ya ulinzi. Lakini bado naamini tunaweza kuwa na msimu mzuri,”alisema.

TMK Wanaume Halisi yatema wasanii saba

KUNDI la muziki wa kizazi kipya la TMK Wanaume Halisi limeamua kuwatema wasanii wake saba na kubaki na watano.

Kiongozi wa kundi hilo, Juma Kassim ‘Nature’ alisema mjini Dar es Salaam wiki hii kuwa, uamuzi wao huo umetokana na matakwa ya wadhamini wao wapya.

Nature alisema kundi hilo hivi karibuni limeingia mkatabawa udhamini na Kampuni ya DLC, ambayo inafanya biashara zake katika nchi za Tanzania na China.

Alisema kampuni hiyo itakuwa ikisimamia kazi zote za kundi hilo, ikiwa ni pamoja na kulitangaza ndani na nje ya nchi na kuliandalia maonyesho na matamasha ya muziki.

“Tulipata wakati mgumu sana katika kuchuja vichwa 12 vilivyomo ndani ya kundi ili kubaki na vitano, ambavyo ndivyo vitakavyofanyakazi na kampuni hiyo,”alisema Nature.

Mbali na yeye, alivitaja vichwa vingine vinne vilivyobaki kwenye kundi hilo kuwa ni Dolo, Baba Levo, JB wa Mabaga Fresh na KG Son.

Kundi la TMK Wanaume Halisi lilianzishwa mwaka jana baada ya baadhi ya wasanii wakiongozwa na Nature kujiengua katika kundi la TMK Wanaume Family.

Kundi hilo lilijipatia sifa na umaarufu baada ya kuibuka na albamu yake ya kwanza, inayoitwa ‘Tatu bila’. Hivi sasa kundi hilo lilikuwa likijiandaa kuipua albamu yake ya pili, itakayojulikana kwa jina la ‘Mnatakaje?’

Diamond alia traki yake kuvuja

MSANII nyota chipukizi wa muziki wa kizazi kipya, Diamond amevilalamikia baadhi ya vituo vya radio nchini kwa kupiga kibao chake kipya bila ridhaa yake.

Diamond alisema mjini Dar es Salaam wiki hii kuwa, alikuwa akijiandaa kuachia ‘traki’ yake hiyo hivi karibuni, lakini alishangaa kuisikia ikipigwa redioni kabla ya kuikabidhi kwenye vituo hivyo.

“Hiyo nyimbo bado sijaitoa kwenye kituo chochote cha radio, lakini nashangaa imeshaanza
kupigwa,”alilalamika msanii huyo.

Kwa mujibu wa Diamond, kibao chake hicho kinajulikana kwa jina la ‘Mbagala’.Alisema kutokana na traki hiyo kuvuja mapema, ameamua kuipiga upya, ikiwa ni pamoja na kujiandaa
kurekodi video yake.

“Kwa taarifa yao ni kwamba, video na audio ya wimbo huu sasa itakuwa tofauti na ile
iliyovuja,”alisema.

Katika hatua nyingine, msanii AT anatarajia kuipua albamu yake mpya hivi karibuni. Albamu hiyo itajulikana kwa jina la ‘Nipigie’.

AT alisema wiki hii kuwa, albamu yake hiyo itawashirikisha wakali kibao wa muziki huo, ambao
hakuwa tayari kutaja majina yao.

NAKAAYA: Siasa haitanikwamisha kimuziki

MSANII nyota wa muziki wa kizazi kipya, Nakaaya Sumari amesema uamuzi wake wa kujiingiza katika masuala ya siasa hauwezi kumfanya ashindwe kuendelea na kazi yake ya muziki.

Naakaya alisema hayo mwishoni mwa wiki iliyopita mjini Dar es Salaam, ikiwa ni siku chache baada ya kutangaza kujiunga na CHADEMA.Alisema uamuzi wake huo umelenga kuwahamasisha vijana kujitambua zaidi na pia kutetea haki zao za msingi na demokrasia kwa jumla.

Nakaaya amekuwa msanii wa kwanza wa muziki wa kizazi kipya nchini kujitosa katika masuala ya siasa. Wasanii wengi wa muziki huo wamekuwa wakivutiwa zaidi na CCM.

“Sina hofu kwamba kazi zangu zinaweza kushuka kiwango kutokana na uamuzi wangu wa kujiingiza kwenye siasa. Nina hakika nitaweza kuendesha shughuli za muziki na siasa bila kuwepo na athari yoyote,”alisema.

Alisema alikuwa na kiu ya kujiunga na chama cha siasa kwa muda mrefu na hatimaye ndoto zake hizo zimefanikiwa baada ya kujitosa CHADEMA.
“Napenda wasanii wenzangu na watanzania kwa ujumla waelewe kwamba, uamuzi wangu huu
umelenga kuwahamasisha vijana kujitambua na kutetea haki zao za msingi, hasa kwa demokrasia bila kununuliwa ama kushurutishwa na vyama,” alisema Nakaaya.
Kufuatia uamuzi wake huo, CHADEMA imemruhusu msanii huyo kugombea nafasi yoyote ya uongozi ndani ya chama hicho baada ya kutimiza masharti na taratibu muhimu.

DOGO INNO: Muziki utanikomboa

MAISHA ni safari ndefu kwa maana lazima mtu apite katika hatua mbalimbali hadi kufikia malengo aliyojiwekea.
Ni wachache, ambao hawakuvuka mito na kupanda milima au mabonde, lakini asilimia kubwa
wamepitia huko na kamwe hawasiti kusema ukweli, iwe wamefanikiwa au la.
Innocent Magawa a.k.a Dogo Inno ni miongoni mwa waliopita katika adha tofauti za maisha kwa
sababu ameyapigania kwa hali na mali hadi kufikia hatua alinayo sasa ya kukaribia kuzindua albamu yake ya kwanza baada ya kutumbukia katika muziki miaka kadhaa iliyopita.
Japokuwa Dogo Inno hajafanikiwa kuwa msanii mashuhuri katika muziki wa kizazi kipya, kwa hatua aliyofikia ni kubwa ikilinganishwa na alikotokea kama mwenyewe anavyobainisha: “Mimi ni yatima, ambaye sina baba wala mama, wazazi wangu walifariki kwa ugonjwa wa ukimwi mkoani Dodoma na baada ya wao kufa, mimi na wadogo zangu tuliteseka sana,” anasema Dogo Inno aliyezaliwa miaka 25.
Msanii huyo chipukizi alizaliwa kwenye kijiji cha Mundemu kilichopo jirani na wilaya ya Kondoa,
Dodoma, ambako mama yake mzazi alikuwa anafanya kazi ya uuguzi katika zahanati ya kijiji hicho na baadaye alihamishiwa hospitali ya mkoa.
“Darasa la kwanza hadi la saba nilisoma shule ya Mundemu na mwaka 2000 mama alipohamishiwa kikazi Dodoma Mjini, nilijiunga na shule ya Sekondari ya Central Dodoma na nikaishia kidato cha pili baada ya yeye kufariki dunia,” anaeleza Dogo Inno.
Amesema kufariki kwa mama yake kulimpa wakati mgumu yeye na wadogo zake na hivyo bibi yao kwa upande wa mama aliamua kuwachukua na kurudi nao kijijini Mvumi, ambako aliishi hadi mwaka 2004 aliporudi tena shule.
“Wakati tulipokuwa kijijini Mvumi, kuna shule inaitwa DCT ambayo mkuu wake alikuwa mzungu, ambaye alitangaza watoto yatima tukasome pale na mimi ikawa rahisi kuanza tena masomo, lakini kabla ya kufika kidato cha tatu, nikafukuzwa alipokuja mkuu mwingine wa shule,” anasema Dogo Inno.
Amefafanua kwamba, mkuu huyo alipofika shuleni alichunguza na kugundua kuna watoto wengine hawakuwa yatima ndipo akatembeza fagio kwa wanafunzi 20 na kubakisha nusu ya idadi hiyo, ambapo Dogo Inno naye aliondolewa licha ya kujitetea kuwa yeye ni yatima.
“Kweli mimi ni yatima kwani baada ya mama kufariki na baba naye alifuata siku chache na yeye
hakuwa anatulea, mama yangu alikuwa mwanamke wake wa nje na kila tulipokwenda kwa ndugu zake, (baba) walikuwa wanatukataa na kibaya mama alizaliwa peke yake,” anabainisha msanii huyo.
Wahenga wanasema shida kipimo cha akili kwani baada ya kufukuzwa shule, Dogo Inno alianza
kwenda kituo cha mabasi yaendayo mikoani, ambako alikuwa anabeba mizigo na kulipwa ujira mdogo, lakini baadaye aliajiriwa na Kampuni ya CRG inayomilikiwa na Wachina na kuwa anapaka rangi kwenye jengo la Bunge.
Amesema kupitia kazi hiyo, alipata pesa zilizomwezesha kuingia studio na kurekodi nyimbo
mbalimbali, ambapo hakuweza kutamba na hivyo mwaka 2008 akaamua akimbilie Dar es Salaam kwa nia ya kutafuta maisha zaidi.
“Nikiwa Dar es Salaam, niliteseka, sikuwa na pa kulala hadi dereva teksi mmoja akanichukua na
kunipeleka nyumbani kwake Mbezi Beach, ambako naishi hadi sasa,” anaeleza Inno.
Amesema baada ya kufanikiwa kupata ‘hifadhi’ kwa msamaria mwema huyo, aliamua kujikita kwenye muziki kwa kwenda katika matamasha ya wasanii wa bongo fleva na alibahatika kukutana na Rugemalila Mutahaba, ambaye ni miongoni mwa mabosi wa radio Clouds FM na kumuomba amsaidie kukuza kipaji chake.
Msaada aliotoa Ruge kwa Dogo Inno ni kumpeleka katika kundi analoliongoza la Tanzania House of Talents (THT), na hapo msanii huyo akaanza kucheza na kuimba na hadi sasa amefanikiwa kutunga nyimbo nane kwa ajili ya kutoa albamu yake binafsi.
Kwa mujibu wa msanii huyo, albamu hiyo inayoitwa ‘Yatima’ ina mkusanyiko wa nyimbo nane, ambazo 'Ni wewe’,‘Nakuita’,‘Dodoma’,‘Nimeathirika’, ‘Tunapari’, ‘Maisha mapambano’, ‘Vumilia’ na ‘Iko siku’.
Baadhi ya nyimbo hizo amerekodi katika studio za MJ Records, Mass Records na 41 Records, ambapo gharama zote zimelipwa na THT, kundi ambalo msanii huyo amesema ana mkataba nalo wa kufanya kazi na iwapo atafanikiwa, kuna asilimia atakayokatwa ili kufidia pesa hizo.
“Bado kuna vitu vidogo namalizia ndipo nitoe albamu yote, lakini sasa hivi wimbo wa ‘Tunapari’ ambao nimemshirikisha msanii Diamond umeanza kuchezwa katika vituo vya redio na Clouds FM ndiyo ilikuwa ya kwanza kuutambulisha,” anasema Dogo Inno.
Amesema kuwa haogopi ushindani uliopo katika muziki kwa sababu ana vipaji lukuki vya kuhimili vishindo. “Naweza kucheza filamu, kutunga hadithi, kuimba, kucheza na kila kitu,” anatamba Dogo Inno.
Msanii huyo ana imani kuwa atafanikiwa kupitia muziki na dhamira yake kubwa ni kupanga chumba ili aanze kujitegemea na kujiendeleza kimaisha kwa kutegemea sanaa. Alianza kuandaa albamu hiyo mwaka 2008 na sasa imekamilika.
Huyo ndiye Dogo Inno mwenye matarajio kibao ya kuchomoza kwenye fani ya muziki wa R&B na
kuwafunika wakali wanaotamba sasa kwenye bongo fleva.

FID Q: Ilinichukua mwaka kurekodi na Bi Kidude

MSANII Khalid Kubanda ‘Fid Q’ amesema ilimchukua mwaka mmoja kukamilisha kazi ya kurekodi wimbo wake mpya wa ‘Juhudi za wasiojiweza’.

Akizungumza mjini Dar es Salaam wiki hii, Fid Q alisema alichelewa kukamilisha kazi hiyo kutokana na mazingira magumu ya kumpata mkongwe wa taarab nchini, Fatuma binti Baraka ‘Bi Kidude’.

Fid Q alirekodi wimbo huo kwa kumshirikisha Bi Kidude, ambaye sauti yake imeufanya uwe wenye mvuto na mahadhi ya aina yake.

“Kikwazo kilikuwa Bi Kidude, ambaye kila nilipomfuata Zanzibar tulikuwa tukipishana,”alisema msanii huyo.

“Siku tuliyofanikiwa kufanyakazi hiyo, nilipanda ndege hadi Zanzibar, lakini pamoja na kufika mapema, nilifanikiwa kukutana naye nyakati za usiku,”aliongeza.

Fid Q alisema walirekodi wimbo huo nyakati za usiku katika studio za Jupiter zilizopo Zanzibar na kuikamilisha kwa siku moja.

“Pamoja na kukaa na Bi Kidude studio kwa saa kadhaa, kesho yake tulipokutana na kumsalimia,
alishindwa kunikumbuka. Akaniuliza wewe nani?” Alisema.

Msanii huyo alisema hakushangaa kuulizwa swali hilo na Bi Kidude kwa vile umri wake ni mkubwa na hana kumbukumbu nzuri. Bi Kidude anakadiriwa kuwa na umri wa zaidi ya miaka 100.

Kibao cha ‘Juhudi za wasiojiweza’ na vinginevyo vya msanii huyo vinapatikana katika albamu yake mpya, inayokwenda kwa jina la ‘Propaganda’.

Jokha Kassim aingia mitini Five Stars Modern Taarab

MWIMBAJI nyota wa muziki wa taarab nchini, Jokha Kassim ameamua kujiengua katika kundi la Five Stars Modern Taarab na kutulia nyumbani.

Jokha, mwimbaji mwenye sauti yenye mvuto, inayostarehesha na kuliwaza, amefikia uamuzi huo kwa kile alichodai kuwa, uongozi wa kundi hilo umeshindwa kumlipa madai yake.

Akihojiwa na kituo cha televisheni cha C2C mwishoni mwa wiki iliyopita, Jokha alisema hataendelea kuimba katika kikundi hicho iwapo madai yake hayatalipwa.

“Kwa sasa nimeamua kukaa nyumbani na kutulia, sitajihusisha na muziki wa taarab,”alisema mwimbaji huyo, mke wa zamani wa kiongozi wa kikundi cha Jahazi, Mzee Yusuf.

“Unajua mahali popote panapokuwa na wingi wa watu, hasa wanawake, huwa hapakosi kutokea
matatizo, ndiyo sababu nimeamua kujiweka kando kwa sasa,”aliongeza.

Mwimbaji huyo mwenye sura ya mvuto na tabasamu la kuliwaza alisema, imani yake kwa uongozi wa kundi hilo ndiyo iliyomponza kwa vile aliwaamini viongozi kwamba watatekeleza ahadi walizomuahidi.

“Imani zinatuponza, kutuchongea na kugeuka matatizo,”alisisitiza. “Msanii kama anaonekana
anafanyakazi, alipwe haki zake anazostahili.”

Hata hivyo, Jokha hakuwa tayari kutaja kiasi cha fedha, anachodai kwa uongozi wa kundi hilo kwa madai kuwa hiyo ni siri baina ya pande hizo mbili.

Lakini uchunguzi uliofanywa na Burudani umebaini kuwa, uamuzi wa Jokha kujiondoa kwenye kundi hilo umekuja baada ya msanii mwenzake nyota, Khadija Yusuf kulipwa fedha alizokuwa anadai kwa uongozi.

Kwa mujibu wa uchunguzi huo, Khadija alilipwa pesa zake muda mrefu uliopita, lakini Jokha amekuwa akipewa ahadi za ‘tutakulipa kesho, keshokutwa’.

“Mimi sina tatizo na wasanii wenzangu, tatizo lipo kwa viongozi. Ni aina ya matatizo, ambayo
yamekuwa yakitokea sana kwenye jamii tunazoishi,”alisema.

Mwimbaji huyo wa zamani wa kundi la Zanzibar Stars alisema, iwapo uongozi utamlipa madai yake, atakuwa tayari kurejea na kuendelea kufanya nalo maonyesho.

“Unajua msanii yeyote anayeipenda kazi yake, huifanya kwa mapenzi na moyo wake wote, lakini wakati mwingine utakuta hathaminiwi. Anajitahidi kubuni vitu vizuri, lakini anakatishwa tamaa,”alisema.

Jokha amewataka viongozi wa vikundi vya taarab nchini, kuwathamini wasanii wao na kutekeleza kwa vitendo ahadi wanazowaahidi badala ya kuwaacha ‘kwenye mataa’.

Alisema tabia ya aina hiyo inachangia kuwakatisha tamaa wasanii wa muziki huo na hatimaye
kusababisha vikundi vingi kufifia ama kutoweka kabisa katika ulimwengu wa taarab.

Mmoja wa viongozi wa Five Stars Modern Taarab, ambaye hakupenda jina lake litajwe gazetini, alikiri kuwa ni kweli Jokha anadai fedha alizoahidiwa, lakini hakuwa tayari kutaja kiasi cha fedha.

“Ni kweli anaudai uongozi na suala lake linashughulikiwa, hivyo tunatarajia ataendelea na maonyesho ya Five Stars kama kawaida,”alisema.

Jokha alianza kuimba taarab mwaka 2002 katika kundi la Zanzibar Stars Modern Taarab kabla ya kujiunga na East African Melody. Alijiunga na kundi la Five Stars Modern Taarab mwaka jana, akiwa mmoja wa waanzilishi wake.

Aliwahi kuolewa na Mzee Yusuf mwaka 2000 na kuzaa naye mtoto mmoja wa kiume, anayejulikana kwa jina la Yusuf. Kwa sasa, hana mume.

Uhuru SC yajitoa Kombe la NSSF

TIMU za soka na netiboli za Uhuru zimeamua kujitoa katika michuano ya mwaka huu ya Kombe la NSSF, inaotarajiwa kuanza Jumamosi kwenye viwanja vya Sigara, Chang’ombe, Dar es Salaam.
Katibu Mkuu wa Uhuru SC, Rashid Zahor alisema mjini Dar es Salaam jana kuwa, wamefikia uamuzi huo kutokana na mizengwe waliyofanyiwa na kamati ya mashindano hayo.Zahor alisema wameshangazwa na uamuzi wa kamati hiyo kuwazuia wachezaji wake tisa wa soka na sita wa netiboli kucheza michuano hiyo kwa madai kuwa sio waajiriwa.
Aliwataja wachezaji wa soka waliotiliwa shaka kuwa ni Tuzo Jackson, Ally Mohamed, Moni Lyambiko, Hamidu Shomari, Anthony Cyprian, Nassibu Hussein, Rashid Kazumba, Emmanuel Mushi na Brenda Damian.
Kwa upande wa netiboli, wachezaji waliotiliwa shaka ni Mariam Mkali, Sophia Ally, Salome Lazaro, Stella Charles, Sharifa Seif na Happy Aggrey.Alisema ni jambo la kushangaza kuona kuwa, kamati ndogo ya uhakiki imewaita wachezaji hao kuwa si waajiriwa wakati ilionyeshwa vielelezo vyote vya kuthibitisha ajira zao.“Ukimuondoa Mariam Mkali, ambaye ni mfanyakazi mpya aliyeajiriwa mwaka jana idara ya matangazo, wachezaji wengine wote wamekuwa wakiichezea Uhuru kwa miaka mitano sasa kwenye mashindano hayo, sasa iweje kamati iseme si waajiriwa,”alihoji..
“Hii ni mizengwe iliyoandaliwa mapema na wajumbe wa kamati ya mashindano kwa lengo la kuidhoofisha Uhuru ili isifanye vizuri, hasa baada ya kuwa imetwaa ubingwa mara mbili mfululizo,”alisema.“Vyombo vingi vya habari havifurahii mafanikio ya Uhuru, vinaiogopa, vilikuwa na hakika kwamba itatwaa tena ubingwa mwaka huu, ndiyo sababu viliandaa mizengwe mapema,”aliongeza.
Zahor alisema kuondolewa kwake kwenye nafasi ya katibu wa kamati hakukumshangaza kwa sababu ni zengwe lililoandaliwa mapema na Mwenyekiti wa kamati hiyo, Masoud Saanani kwa kuonekana angekuwa kikwazo kwa timu yake ya Business Times kutwaa ubingwa.Alisema mapendekezo ya kamati ya uhakiki kwamba aondolewe kwenye nafasi hiyo kutokana na kushindwa kusimamia vyema usajili wa timu yake hayana msingi kwa sababu yeye hayumo kwenye kamati ya usajili.
“Usajili wa wachezaji wa Uhuru kwa ajili ya mashindano mbalimbali umekuwa ukisimamiwa na manahodha wa timu zote mbili pamoja na wasaidizi wao. Mimi nahusika na masuala ya kiutawala ya timu, hivyo wamenitwisha tuhuma ambazo hazinihusu,”alisema.
Katibu huyo wa Uhuru alisema kazi ya ukatibu wa kamati alikuwa akiifanya kwa kujitolea zaidi na kwamba ilikuwa ikimbebesha lawama nyingi kila timu zilipoondolewa kwa makosa mbalimbali kwa kuonekana yeye ndiye aliyepitisha maamuzi hayo.
“Wakati mwingine kazi za kamati zilikuwa nyingi kiasi cha kunikosesha muda wa kufanyakazi za kampuni iliyoniajiri ilhali posho niliyokuwa nikilipwa ilikuwa ni sawa na za wajumbe wengine, ndiyo sababu nimesema ilikuwa kazi ya kujitolea zaidi,”alisema.
Zahor alisema wameandika barua rasmi kwa uongozi wa NSSF kwa ajili ya kulalamikia mizengwe waliyofanyiwa na pia kuomba warejeshewe sh. 100,000 walizolipa kwa ajili ya ada ya kiingilio.

NDEGE YA ATC YAPATA AJALI

Ndege ya Shirika la Ndege Tanzania (ATC) aina ya Boing 737 ikiwa katika uwanja wa ndege wa
Mwanza baada ya kupata ajali ilipokuwa ikitua uwanjani hapo juzi kutoka Dar es Salaam, ikiwa na abiria 46.

JOTI ALIPOLAZWA MUHIMBILI

MSANII wa Orijino Komedi, Lucas Mhuvile 'Joti' aliyeumia shingo na kupata michubuko kadhaa
mikononi, wakati akiwa kazini hivi karibuni, akijuliwa hali na jamaa zake, wodini alikolazwa katika Taasisi ya Mifupa Muhimbili (MOI), Muhimbili, Dar es Salaam. Kuhusu hali yake msanii huyo alimwambia mpigapicha Wetu kwamba anaendelea vema.

MJUMBE wa Halmashauri Kuu ya Taifa (NEC) ya CCM, Nape Nnauye (kushoto) akimkabidhi sehemu ya msaada wa jozi moja ya jezi, Katibu wa CCM Tawi la Uhuru Publications Ltd (UPL), wachapishaji wa Magazeti ya Uhuru, Mzalendo na Burudani, Abubakar Muna jana, mjini Dar es Salaam, kwa ajili ya timu ya soka ya Uhuru FC inayojiandaa kushiriki michuano ya NSSF itakayoanza kutimua vumbi mwanzoni mwa mwezi ujao. Wapili kushoto ni Katibu wa Umoja wa Vijana wa CCM (UVCCM) tawi la UPL, Sophia Ashery na Nahodha Uhuru FC, Mussa Hassani

MECHI ZA STARS KOMBE LA AFRIKA 2012

Algeria vs Tanzania
Morocco vs Jamhuri ya Afrika ya Kati
Septemba 3, 4 au 5, 2010
Tanzania vs Morocco
Jamhuri ya Afrika ya Kati vs Algeria
Oktoba 8, 9 au 10, 2010
Algeria vs Morocco
Tanzania vs Jamhuri ya Afrika ya Kati
Machi 25, 26 au 27, 2011
Morocco vs Algeria
Jamhuri ya Afrika ya Kati vs Tanzania
Juni 3, 4 au 5, 2011
Tanzania vs Algeria
Jamhuri ya Afrika ya Kati vs Morocco
Septemba 2, 3 au 4, 2011
Morocco vs Tanzania
Algeria vs Jamhuri ya Afrika ya Kati
Oktoba 7, 8 au 9, 2011

Nigeria vinara wa kughushi umri wa wachezaji

LAGOS, NigeriaUMRI wa mchezaji Nwankwo Kanu wa Nigeria kwa sasa ni miaka 42 na ule wa Taribo West, ambaye alistaafu soka miaka miwili iliyopita, ni miaka 50.
Hayo ni baadhi tu ya maelezo yaliyotolewa na wamiliki mbalimbali wa mitandao ya kompyuta, maarufu kwa jina la ‘blogs’ nchini Nigeria.Baadhi ya mitandao hiyo imeeleza kuwa, umri unaotajwa kuwa ni wa Kanu ni miaka 33, lakini umri wake halisi ni miaka 42.Naye Obafemi Martins anatajwa kuwa na umri wa miaka 25, lakini umri wake halisi ni miaka 32 wakati
Jay-Jay Okocha alikuwa na miaka 10 zaidi ya umri uliokuwa ukitajwa kwenye hati yake ya kusafiria.

Ni nani anayetoa kauli hizo? Wananchi kadhaa wa Nigeria wametoa maelezo hayo kupitia kwenye ‘blogs’ maarufu nchini humo, walipokuwa wakielezea sababu za
kutolewa mapema kwa timu ya taifa ya nchi hiyo, ‘Super Eagles’, katika fainali za mwaka huu za Kombe la Mataifa ya Afrika zilizofanyika mwezi uliopita nchini Angola.Kushindwa kwa Nigeria kutwaa kombe hilo, siku zote kumekuwa kukichukuliwa kama tukio lisilo la
kawaida, lakini safari hii kumechukua sura mpya.Kocha wa zamani wa moja ya klabu kubwa za Nigeria, alilieleza gazeti la Guardian: “Kile kilichotokea Angola ni uthibitisho wa kile, ambacho kimekuwa kikitokea katika miaka ya hivi karibuni, ambapo wachezaji wengi wamekuwa wakidanganya umri wao wakati wa michuano hiyo. Wachezaji wengi umri wao huwa ni zaidi ya ule wanaoutaja na hii inasababisha iwe vigumu kwao kuhimili vishindo vya timu kama Zambia na Benin.”

Kutolewa mapema kwa Nigeria katika michuano hiyo pia kumezua mijadala mingi nchini humo, hasa ikizingatiwa kuwa imesalia miezi mitatu kabla ya kuanza kwa fainali za Kombe la Dunia, zitakazofanyika nchini Afrika Kusini.

“Vijana wetu ni wakubwa kiumri, hivyo tunalipa gharama za kudanganya umri wao,”alisema Ken Anugweje, daktari wa zamani wa Super Eagles na mjumbe wa bodi ya Chama cha Soka cha Nigeria (NFA).Tatizo la umri halisi kwa baadhi ya wachezaji wa Nigeria lilianza miaka 20 iliyopita. Shirikisho la Soka la Dunia (FIFA) liliifungia nchi hiyo kushiriki michuano yote ya kimataifa kwa miaka miwili baada ya kugundulika kuwa, tarehe za kuzaliwa za wachezaji wake watatu walioshiriki Michezo ya Olimpiki mwaka 1988, zilikuwa tofauti na zile zilizotumiwa na wachezaji hao katika michezo iliyopita.Mwaka uliofuata, mwanasoka nyota wa zamani wa dunia, Pele alibashiri kwamba, timu moja ya Afrika itaweza kutwaa Kombe la Dunia ndani ya kipindi cha miaka 15, baada ya kuiona timu ya Nigeria ya vijana wa chini ya miaka 17, ikitwaa kombe la dunia na na ile ya vijana wa chini ya miaka 20 kufuzu kucheza fainali za kombe hilo.

Lakini ukweli ni kwamba, timu ya vijana wa chini ya miaka 20 ya mwaka 1989, haikuwa na wachezaji wenye umri huo. Wengi walikuwa na umri mkubwa, akiwemo mchezaji aliyetumia jina la George Onmonya.

Kwa mujibu wa tovuti ya ‘nigeriavillagesquad.com’, wachezaji wengi walioichezea Nigeria katika mwaka huo hivi sasa wamestaafu na wengine wanaitwa babu.Nigeria ina hazina kubwa ya wachezaji wenye vipaji, ambao baadhi yao walishindwa kutimiza ndoto zao. Mfano wa wachezaji hao ni Phillip Osondu, ambaye alikuwa mchezaji bora katika fainali za kombe la dunia za vijana wa chini ya miaka 17 za mwaka 1987.

Lakini mara baada ya kunyakuliwa na klabu ya Anderlecht ya Ubelgiji, alijikuta akishindwa kutimiza ndoto zake na kuamua kufanya shughuli nyingine badala ya kucheza soka baada ya kutokea utata kuhusu umri wake halisi.Nyota huyo wa Nigeria katika fainali za kombe la dunia za mwaka 2001 kwa vijana wa chini ya miaka 17, pia aliweka rekodi ya kuwa mchezaji wa tatu mwenye umri mdogo kucheza fainali za wakubwa za kombe hilo wakati Nigeria ilipomenyana na England na kutoka nayo suluhu mwaka 2002.

“Rafiki yangu mmoja, ambaye aliwahi kucheza katika ligi ya Nigeria alinieleza kwamba, umri wake halisi wakati huo ulikuwa miaka 34, lakini kisoka alikuwa akijulikana ana umri wa miaka 21,” ameandika mchangiaji mmoja kwenye moja ya ‘blogs’ hizo.

“Leo hii unaweza kwenda kwenye ofisi yoyote ya Idara ya Uhamiaji Nigeria na kughushi fomu za
maombi ya hati ya kusafiria, ukabadili jina, mahali pa kuzaliwa, tarehe ya kuzaliwa na kulipa naira 7,000 au 10,000 badala ya kulipa naira 5,500 kwa hati ya kusafiria ya kimataifa na baada ya saa chache unakuwa umekamilisha taratibu zote,”aliongeza.

“Hii inamaanisha kwamba, unakuwa na hati mpya ya kusafiria, unakuwa mtu mpya, na kama ni
mwanasoka, unakuwa na umri mdogo kuliko umri wako halisi,”alisema.

Mfanyakazi wa zamani wa ubalozi wa Uingereza nchini Nigeria alilieleza gazeti la Observer kwamba, watu walipokuwa wakienda ubalozini na kumlalamikia kuhusu maombi yao kukataliwa, alikuwa akiwajibu: “Usizungumze na mimi kuhusu hilo, nimeshakufa.”

Alipoona majibu yake yanawashangaza watu hao, aliwaonyesha kwa kidole kwenye ukuta wa nyuma ya kiti chake, ambako alibandika cheti chake cha kifo, kilichoghushiwa na kununuliwa kwa bei nafuu kutoka kwa mfanyabiashara mmoja nchini humo.

Tayari FIFA imeshatangaza kuwa, imepata chombo maalumu kwa ajili ya kupima umri wa wachezaji. Kabla ya fainali za kombe la dunia za vijana wa chini ya miaka 17 zilizofanyika mwaka jana nchini Nigeria, shirikisho hilo lilitangaza kuwa, wachezaji watafanyiwa vipimo hivyo ili kubaini umri wao alisi. Hivyo ndivyo ilivyokuwa.

Hatua hiyo ya FIFA ilizifanya nchi nyingi nazo kuamua kuwapima wachezaji wake kabla ya kushiriki kwenye michuano inayozingatia umri. Lakini matokeo ya vipimo hivyo hayajatangazwa.Kabla ya kuanza kwa fainali hizo, Nigeria iliwaengua wachezaji wake 15 wakati Ghana iliwaengua wachezaji 11 kati ya 18 walioiwezesha kutwaa ubingwa wa Afrika miezi michache iliyopita.Ripoti zimeeleza kuwa, uchunguzi uliofanywa katika fainali tatu za kombe la dunia za vijana wa chini ya miaka 17, umeonyesha kuwa, zaidi ya theluthi moja ya wachezaji walikuwa na umri mkubwa.

JK awapa somo wasanii wa Bongo

RAIS Jakaya Kikwete amewataka wasanii nchini kujithamini wao na kazi zao ili waweze kunufaika.
“Kilio chenu nimekisikia siku nyingi juu ya kunyonywa kwa mapato ya kazi yenu, najua mnavuja jasho, lakini hamfaidiki na matunda yake, naahidi kuendelea kulishughulikia jambo hili,” amesema.
Rais Kikwete alisema hayo mwishoni mwa wiki iliyopita kwenye viwanja vya Leaders, Kinondoni, Dar es Salaam wakati alipoungana na wasanii mbalimbali nchini katika tamasha la Zinduka, maalumu kwa ajili ya kutokomeza ugonjwa wa malaria.
Aliwatoa hofu wasanii na kuwapongeza kwa jinsi walivyoweza kujipanga na kufanya jambo la msingi la kuelimisha umma kuhusu ugonjwa huo.
“Ningependa mjue kuwa, mimi nyimbo na kazi zenu zote nazifuatilia, nyimbo za bongo fleva mimi ni msikilizaji mzuri sana. Zamani mimi nilikuwa nacheza Sikinde, Saboso na Rhumba, kwa nyimbo za bongo fleva ya sasa, mnanikosha sana, nawapa hongera,” alisema Rais Kikwete.
Aliwataka wasanii kujipanga na kutimiza malengo waliyojiwekea, ikiwa ni pamoja na kuitumia vyema mitambo mipya na ya kisasa ya studio, aliyowaletea.
“Kilio chenu cha studio ya kisasa mlichokuwa mnakitoa muda mrefu nimewatimizieni, mshindwe
wenyewe. Na kwa suala la kuibiwa kazi zenu na kuwafanya kukosa mapato, naahidi kulitokomeza kabisa hilo kwa kuunda kikosi maalumu cha kushugulikia kero zote,” alisema.
Alisema wasanii wa filamu na muziki, ndiyo wanaoongoza kwa kudhulumiwa kazi zao na kuwataka wasubiri neema inayokuja baada ya uamuzi wake wa kuunda kikosi kazi kwa ajili ya kazi za sanaa.
Alisema kikosi hicho kitakuwa chini ya wasanii wenyewe, Baraza la Sanaa la Taifa (BASATA), Mamlaka ya Mapato Tanzania (TRA), Chama cha Hakimili (COSOTA), Jeshi la Polisi na Wizara ya Habari, Utamaduni na Michezo. Alisema lengo la kikosi hicho ni kuhakikisha kero hizo zinatoweka kabisa nchini.
Katika Tamasha hilo, wasanii wa muziki wa kizazi kipya, wakiwemo Profesa Jay, Banana Zorro, Joe Makini, Rehema Chalamika ‘Ray C’, Chegge na mwanamuziki mkongwe kutoka Zanzibar, Kidude binti Baraka ‘Bi. Kidude’ walishiriki kutoa burudani kwa mashabiki.
Wasanii na wanamuziki hao wanatarajiwa kuzunguka nchi nzima ili kutoa ujumbe na kugawa neti
katika kampeni hiyo, inayojulikana kwa jina la ‘Zinduka’.

MWANA FA: Maisha Ulaya si mepezi

MSANII nyota wa muziki wa kizazi kipya nchini, Khamis Mwinjuma amesema maisha kwa waafrika katika nchi za Ulaya si mepesi au rahisi kama watu wengi wanavyofikiria.
Akihojiwa na kituo cha televisheni cha Channel 5 hivi karibuni, Khamis, maarufu kwa jina la Mwana Falsafa alisema, binafsi hawezi kuishi mahali popote zaidi ya Tanzania.
Mwana FA alisema picha za video na za sinema zinazoonyesha mandhari ya miji ya Ulaya, ndizo
zinazowazuzua vijana wengi wa Afrika, lakini maisha ya huko kwao ni magumu.
Alikuwa akijibu swali aliloulizwa na mtangazaji wa kituo hicho, Jimmy Kabwe, aliyetaka kujua kwa nini hakuamua kuzamia na kuishi Ulaya kama wanavyofanya vijana wengi wa kiafrika.
Mwana FA alirejea nchini mwanzoni mwa mwezi huu akitokea Uingereza, ambako alikwenda kwa masomo mwaka jana katika Chuo cha Coventry.
Alisema aliamua kwenda kusoma Uingereza badala ya kuendelea na masomo yake Tanzania kwa
sababu alikuwa akitafuta elimu iliyo bora zaidi kutokana na kile alichodai kwamba mazingira ya
masomo nchini humo ni mazuri.
“Mimi ni mwoga sana wa maisha ya baadaye, hivyo nimeamua kuanza maandalizi mapema, ndo
sababu niliamua kuweka kando muziki kwa mwaka mmoja ili kujiendeleza kimasomo,”alisema.
Akiwa huko, msanii huyo mkali wa mashairi yanayogusa hisia alisema, hakuacha kujihusisha na muziki moja kwa moja na kwamba alikuwa akitunga nyimbo mpya kila mwezi.
“Ninazo nyimbo 23 mpya, ambazo bado sijazirekodi. Bado navuta subira, sina haraka ya kuingia
studio. Natarajia kuanza kuzirekodi hivi karibuni,” alisema.
Mwana FA alisema amepania kutoka kimuziki kivingine akiwa na nguvu mpya kwa lengo la kuwapa mashabiki wake ladha mpya.
“Nataka nikitoka, iwe kivingine. Watu waone kweli huyu mtu alikuwa mpya,”alisema.
Mwana FA alianza kujipatia umaarufu kimuziki nchini mwaka 2002 alipoibuka na singo yake ya
kwanza, inayojulikana kwa jina la ‘Ingekuwa vipi’. Kibao hicho kilishika nafasi za juu kwenye chati za vibao bora katika vituo mbalimbali vya radio nchini.
Alianza kujihusisha na muziki tangu mwaka 1993 alipokuwa mwanafunzi wa darasa la saba katika shule ya Mdote ya Muheza, Tanga kwa kushiriki kwenye maonyesho ya jukwaani.
Msanii huyo na kaka yake walihamishiwa Tanga mwaka 1990, ambako walihitimu masomo ya elimu ya msingi katika shule hiyo.
Akiwa kidato cha pili, Mwana FA aliunda kundi la Black Skin kwa kushirikiana na wanafunzi wenzake, Robilus na Getheerics. Waliunda kundi hilo mwaka 1995 na lilidumu hadi mwaka 1997.
Mwana FA alishika nafasi ya tatu katika shindano la kumsaka mkali wa miondoko ya hip hop mkoani Tanga mwaka 1996. Alirejea Dar es Salaam mwaka 1998 na kujiunga na Taasisi ya Teknolojia (DIT), ambako alisoma kwa miezi minne.
Aliacha masomo katika chuo hicho na kujiunga na shule ya sekondari ya kiislamu ya Ununio kwa ajili masomo ya kidato cha tano na cha sita. Mara baada ya kumaliza masomo hayo mwaka 2000, ndipo alipojitosa zaidi katika fani ya muziki.
Alirekodi albamu yake ya kwanza mwaka 2002, inayojulikana kwa jina la ‘Mwanafalsafani’ kwa
udhamini wa studio ya Mawingu Records, iliyokuwa chini ya DJ Bonie Love.
Mwaka 2003, Mwana FA alinyakua tuzo ya msanii bora wa miondoko ya hip hop ya Kilimanjaro,
kufuatia kibao chake cha ‘Alikufa kwa ngoma’ kufanya vizuri.
Hadi sasa, Mwana FA amerekodi albamu tatu, ikiwemo ‘Unanitega’, ambayo ilishinda tuzo ya albamu bora ya hip hop katika tuzo za Kilimanjaro mwaka 2007.
Mwaka 2007, Mwana FA kwa kushirikiana na Ambwene Yesaya ‘AY’ walirekodi albamu ya pamoja inayojulikana kwa jina la ‘Habari ndio hiyo’. Mwaka jana, alishinda tuzo ya mtunzi bora wa nyimbo.

MKE WA JOHN TERRY ATAKA TALAKA

LONDON, England
BEKI na nahodha wa timu ya soka ya Taifa ya England, John Terry wiki hii alikumbwa na mapigo mawili mazito, likiwepo la mkewe, Toni Poole kutimkia Dubai akiwa na watoto wao wawili.

Pigo lingine lililomkumba mchezaji huyo wa klabu ya Chelsea ya England ni tishio la mpenzi wake wa zamani, Vanessa Perroncel kuanika hadharani kila kitu kuhusu uhusiano wao wa kimapenzi na uja uzito alionao.
Toni ameamua kuondoka kwenye jumba lao lenye thamani ya pauni milioni nne, akiwaeleza rafiki zake kwamba anataka kutengana na Terry, kufuatia kubainika kwa uhusiano wa kimapenzi kati yake na Vanessa.
Vanessa ni mpenzi wa zamani wa mchezaji Wayne Bridge, aliyecheza pamoja na Terry katika kikosi cha Chelsea kabla ya kuhamia klabu ya Manchester City. Mwanadada huyo pia alikuwa rafiki wa karibu wa zamani wa Toni.
Mtu mmoja wa karibu na Toni alilieleza gazeti la Daily Mail la Uingereza kuwa, mama huyo wa watoto wawili aliamua kwenda Dubai mwishoni mwa wiki iliyopita.
Kwa mujibu wa mtu huyo, Toni alikwenda Dubai akiwa na watoto wake mapacha wawili aliozaa na Terry pamoja na wazazi wake wote wawili. Terry na Toni waliwahi kwenda fungate Arabuni mwaka 2007 baada ya kufunga ndoa.
Imeelezwa kuwa, Terry alifikia makubaliano na Vanessa waitoe mimba hiyo Jumatatu iliyopita baada ya mpenzi huyo wa zamani wa Bridge kupata uja uzito.
Msemaji wa Vanessa, Max Clifford alisema bosi wake huyo amechoshwa na taarifa zinazoripotiwa kuhusu uhusiano wake na Terry na kwamba sasa anataka kuanika ukweli hadharani.
Clifford ambaye alimtembelea Vanessa nyumbani kwake Jumatatu usiku alisema, mpenzi huyo wa zamani wa Bridge amepanga kuweka mambo hadharani baada ya kufikiria hatma ya mtoto wake wa kiume mwenye umri wa miaka minne.
Vanessa amezaa na Bridge mtoto mmoja wa kiume kabla ya kutengana na mchezaji huyo baada ya kuhamia klabu ya Manchester City.
“Amechanganyikiwa kutokana na kilichotokea,”alisema Clifford. “Amekuwa akijiuliza: ‘Nimefanya nini?’ Waandishi wa habari wanagonga mlango wa nyumba yangu mara kwa mara, watu wamekuwa wakikimbizana kuchukua picha zangu kila mahali ninapokwenda. Kamwe sikufikiria hili, sikupenda litokee na sikuwahi kuzungumza na mtu yeyote.”
Msemaji huyo alisema Vanessa amekuwa akijiuliza maswali mengi kuhusu tukio hilo, ikiwa ni pamoja na mustakabali wake iwapo ataamua kuzungumza na vyombo vya habari ama asipofanya hivyo. Baadhi ya wanasoka wa England wametaka Terry avuliwe unahodha wa timu ya taifa ama ajiuzulu kutokana na kukumbwa na kashfa hiyo ya aina yake.
Waziri wa Michezo wa Uingereza, Gerry Sutcliffe alisema wiki hii kuwa, atakiomba Chama cha Soka cha nchi hiyo kutoa ufafanuzi kuhusu tukio hilo.
Gerry alisema tuhuma zilizomkumba Terry zinaitia doa nafasi ya mchezaji huyo kama nahodha wa England. “Ndani ya uwanja, John Terry ni mchezaji wa aina yake na nahodha mzuri wa England, lakini kuwa nahodha wa England, unatakiwa kuwa na majukumu mapana kwa nchi na ni wazi kwamba, iwapo tuhuma hizi zitathibitika, itabidi kufikiria kuhusu nafasi yake kama nahodha wa England,” alisema.
Juhudi za Terry kuzima sakata hilo ziligonga mwamba mwishoni mwa wiki iliyopita baada ya Jaji wa Mahakama Kuu kutengua uamuzi wa kutaka habari hizo zisitangazwe kwenye vyombo vya habari.
Baadhi ya wachambuzi wa masuala ya soka wamesema, kitendo cha Terry kimekigawa kikosi cha England, baadhi ya wachezaji wakitaka avuliwe unahodha na kuondolewa kwenye timu.
Kuna imani kwa baadhi ya mashabiki kwamba, Terry amesababisha pigo kubwa kwa nafasi ya England kufanya vizuri katika fainali za mwaka huu za Kombe la Dunia, zinazotarajiwa kufanyika nchini Afrika Kusini.
Wakati Toni (28) alipoondoka na familia yake kwenda Dubai, aliwaeleza rafiki zake: “Amekuwa
akinifanyia matendo maovu kwa zaidi ya miaka kumi. Lakini sasa hakuna zaidi. Safari hii nitaomba talaka.”
Chanzo cha habari kilicho karibu na Terry kimesema, mchezaji huyo amekuwa akiendelea kukanusha kwa mkewe kwamba, hakuwa mwaminifu kwake.
Terry alianzisha uhusiano wa kimapenzi na Vanessa baada ya Bridge, waliyekuwa wakiishi katika eneo moja, kusajiliwa na Manchester City na kuhamia katika kitongoji cha Cheshire na kumuacha mpenzi wake huyo, ambaye ni mama wa mtoto wake akibaki kwenye nyumba yao ya zamani.
Vanessa aliripotiwa kupata uja uzito wiki chache baadaye na rafiki zake walisema taratibu za kuitoa zilipangwa na Terry na kufanyika kwenye kliniki moja binafsi Oktoba mwaka jana.
Vanessa aliripotiwa kufika kwenye kliniki hiyo kwa kupitia mlango wa nyuma na operesheni
ilicheleweshwa ili kumwezesha Terry kuishuhudia baada ya mazoezi na timu yake ya Chelsea.
Baada ya Toni kupata taarifa hizo, aliamua kumpigia simu Vanessa na kumshutumu kuhusu kitendo chake cha kujihusisha kimapenzi na mumewe.
“Kulikuwa na majibizano makali kati yao, lakini Vanessa alikanusha kuwa na uhusiano wa kimapenzi na Terry,” kilisema chanzo cha habari.
Chanzo kingine kilisema, Toni alimweleza Vanessa: “ Unajiita rafiki? Ni aina gani ya rafiki anayelala na waume wa rafiki zake?”
Terry analipa mshahara wa pauni 170,000 kwa wiki na thamani yake inakadiriwa kufika pauni milioni 25, akiwa pia na mikataba ya matangazo mbalimbali.
Iwapo maombi ya Toni kutaka talaka yatakubaliwa, atalipwa kitita kikubwa cha fedha kwa vile
anaruhusiwa kisheria kumiliki nusu ya utajiri wa mumewe.
Habari zaidi zimeeleza kuwa, Bridge aliwaeleza rafiki zake wiki hii kwamba, hataendelea kuichezea England iwapo Terry atabaki kuwa nahodha wa timu hiyo.
Wachezaji wenzake wengine wa timu hiyo wamemjia juu Terry wakimwelezea kuwa ni mtovu wa
adabu na kitendo chake hicho hakiwezi kusamehewa.
Mmoja wa wachezaji hao alisema, hawezi kutumia chumba kimoja cha kubadilishia mavazi na Terry wakati wachezaji wa Manchester City wameeleza wazi kumuunga mkono Bridge katika sakata hilo.
Nahodha msaidizi wa zamani wa England, Rio Ferdinand na kiungo, Frank Lampard wa Chelsea
walimpigia simu Bridge kumueleza kwamba wanamuunga mkono.
Kocha Mkuu wa England, Fabio Capello ameripotiwa kuwa, anataka kulitafutia ufumbuzi sakata hilo kabla ya upangaji wa ratiba ya michuano ya kuwania kufuzu kucheza fainali za Kombe la Ulaya za mwaka 2012. Ratiba ya michuano hiyo inatarajiwa kupangwa Jumapili mjini Warsaw, Poland.
Capello amemuomba mmoja wa wasaidizi wake, Franco baldini kukutana na Terry pamoja na Bridge na kujadiliana nao kuhusu suala hilo.
Lakini chanzo cha habari kutoka ndani ya Chama cha Soka cha England kimeeleza kuwa, huenda
Capello akafikia uamuzi wa kumvua unahodha Terry.
“Terry anahitaji kuvuliwa unahodha na kuondolewa kwenye kikosi cha England na hiyo itasaidia
kusafisha hali ya hewa,” kilisema chanzo hicho. “Hana tena nafasi ya kucheza katika fainali za Kombe la Dunia.”
Bridge na Terry hawakuwa tayari kuzungumzia sakata hilo wiki hii. Wachezaji hao wawili wanatarajiwa kukutana ana kwa ana Februari 27 mwaka huu wakati Chelsea itakapomenyana na Manchester City katika ligi kuu ya England.
Mbali na tukio hilo, Terry pia amekuwa akidaiwa kuwa na uhusiano wa kimapenzi na wanawake
wengine wanne. Wanawake hao ni Karina Clarke, Linsey Dawn McKenzie, Nicola Ulian na Lauren Pope.

MATUKIO MBALIMBALI YA JOHN TERRY
Novemba 1999: Alikuwa na uhusiano wa kimapenzi kwa miezi mitano na mwanamitindo maarufu wa England, Jayne Connery (42). Wakati huo, Terry alidaiwa kwamba hakuwa na mke, lakini tayari alishamchumbia Toni.
Machi 2002: Msichana mrembo Nicola Ulian (27) alionekana akiingia kwenye hoteli ya Terry wakati Chelsea ilipocheza na Liverpool wakati wa uhusiano wao wa kimapenzi uliodumu kwa miezi mitano.
Septemba 2003: Terry alijihusisha kimapenzi na mwanamitindo Rebecca Ryan (18) wakati England ilipoweka kambi kwenye hoteli moja mjini Manchester kwa ajili ya michuano ya fainali za Ulaya za mwaka 2004. Binti huyo alidai kuwa, walifanya mapenzi mchana kutwa.
Januari 2004: Alionekana akimpiga busu hadharani mwanamitindo Linsey Dawn Mckenzie.
Juni 2004: Mpiga picha za ngono maarufu Karina Clarke (29), alidai kuwa, aliwahi kufanya mapenzi na Terry wakati mwanamitindo, Emma Kearney (31) alidai kuwa, mchezaji huyo alikuwa na kawaida ya kufanya ngono kwa fujo.
Novemba 2004: Alianzisha uhusiano wa kimapenzi uliodumu kwa miezi sita na mwanamitindo, Lauren Pope.
Aprili 2005: Lianne Johnson (21), alidai kuwa, alifanya ngono na Terry kwenye choo cha klabu moja ya usiku, japokuwa alikuwa amevunjika mguu na kutembelea magongo.
Septemba 2005: Alikuwa na uhusiano wa kimapenzi kwa miezi miwili na Shalimar Wimble (36). Terry alikuwa akitumia nyumba ya Wayne Bridge kufanya ngono na mwanamke huyo.
Novemba 2005: Jenny Barker (17) alisema alifanya onyesho la ngono kwa ajili ya Terry kwenye gari lake.
Januari 2006: Mwanamitindo Alicia Douvall alidai kuwa, alifanya ngono mara kadhaa na Terry wakati mkewe Toni alipokuwa mja mzito.
Septemba 2009: Alianzisha uhusiano wa kimapenzi na mpenzi wa zamani wa Wayne Bridge, Vanessa Perroncel.

ODINGA: Nilijitahidi kumpigia debe Mariga

NAIROBI, Kenya
WAZIRI Mkuu wa Kenya Raila Odinga amesisitiza kuwa, alifanya kila aliloweza kuhakikisha mwanasoka wa kimataifa wan chi hiyo, McDonald Mariga anapata kibali cha kufanyakazi nchini Uingereza.
Katika juhudi zake hizo, Odinga alisema alimpigia simu Waziri Mkuu wa Uingereza, Gordon Brown mara kadhaa ili kumshawishi mchezaji huyo apatiwe kibali hicho.
Mariga alikuwa akiwaniwa kwa udi na uvumba na klabu ya Manchester City, lakini ilishindwa kumsajili kutokana na kukosa kibali hicho.
Mchezaji huyo alikamilisha taratibu za kujiunga na Inter Milan ya Italia wiki iliyopita akitokea klabu ya Parma. Ametia saini mkataba wa kuichezea klabu hiyo kwa miaka minne.
“Ningependa kuwahakikishia mashabiki wa soka na Wakenya wote kwamba, kwa kushirikiana na balozi wetu nchini Uingereza, nilifanya kila nililoweza kumwezesha Mariga kujiunga na Manchester City,”alisema Odinga.
“Nilitumia karibu saa tatu kuzungumza kwa simu na ofisi ya Gordon Brown, ofisi ya utamaduni na michezo, wizara ya mambo ya ndani, rais wa FA, Lord Treisman na Mariga mwenyewe,”aliongeza.
Odinga alisema Mariga (22) aliweza kupata kibali hicho, lakini tayari msimu wa usajili wa dirisha dogo ulikuwa umeshafungwa.
Hii inamaanisha kwamba, Mariga anaweza kujiunga na klabu yoyote ya ligi kuu ya England katika msimu ujao wa usajili, unaotarajiwa kuanza Mei mwaka huu.
Iwapo angesajiliwa na Manchester City, angekuwa mchezaji wa kwanza kutoka ukanda wa Afrika
Mashariki kucheza soka ya kulipwa England.

MONALISA: Ndoto yangu ni kutengeneza filamu zangu

MWIGIZAJI nyota wa filamu nchini, Yvonne Cherry amesema moja ya matarajio yake makubwa ya baadaye ni kutengeneza filamu zake mwenyewe.
Yvonne, maarufu kwa jina la Monalisa alisema mjini Dar es Salaam wiki hii kuwa, anapenda
kutayarisha na kutengeneza filamu zake mwenyewe kwa lengo la kupiga hatua za juu zaidi katika fani hiyo.
Mwigizaji huyo, ambaye ni mama wa watoto wawili alisema, kwa sasa ana mkataba na Kampuni ya Escape, inayojihusisha na utengenezaji wa filamu na tamthilia, hivyo anashindwa kufanyakazi zake binafsi.
“Lakini mara mkataba wangu utakapomalizika, nimepanga kufanyakazi zangu binafsi
nilizokwishazianza. Siku zote ndoto zanguni kufanyakazi zangu mwenyewe,”alisema.
Monalisa alisema alishaanza kutengeneza filamu zinazojulikana kwa majina ya ‘Kaburi Moja’ na ‘Binti Mussa’, lakini alishindwa kuzimalizia kutokana na kukabiliwa na majukumu mengine.
Alisema mbali na kutengeneza filamu zake mwenyewe, pia atakuwa akishiriki kucheza filamu za watu wengine kwa makubaliano maalumu.
Hata hivyo, Monalisa alikiri kuwa, kazi ya utengenezaji filamu kwa wanawake ni ngumu kwa sababu wamekuwa wakidharauliwa na wafadhili wa fani hiyo.
“Ukiwa mtayarishaji filamu mwanamke unadharauliwa sana. Wafadhili wengi wanapenda kuwathamini watayarishaji filamu wanaume,”alisema.
Mwigizaji huyo mwenye sura yenye mvuto alisema, tangu alipoanza kujihusisha na fani hiyo miaka 12 iliyopita, hajawahi kukumbana na misukusuko mikubwa.
Alisema kutokumbana kwake na misukosuko huenda kulitokana na kuolewa kwake mapema na mmoja wa waongozaji filamu nyota nchini, George Tyson. Mumewe huyo ni raia wa Kenya.
Aliitaja filamu ya ‘Sabrina’ kuwa ndiyo pekee anayovutiwa nayo zaidi kati ya filamu alizozicheza na kwamba iliweza kumtambulisha na kumtangaza vyema katika soko la fani hiyo.
“Hii ni moja ya kazi nzuri zaidi nilizowahi kuzifanya. Lakini zipo filamu nyingine nilizozicheza vizuri kama vile ‘She is my Sister’ na ‘Binti Mussa’,” alisema.
Monalisa alianza kujihusisha na fani ya uigizaji tangu akiwa shule ya msingi, lakini alijitosa rasmi
kwenye fani hiyo wakati akiwa shule ya sekondari.
Alisema alivutiwa na fani hiyo kutokana na kuvutiwa na ushiriki wa mama yake, Natasha katika maigizo ya kwenye radio.
Ni wakati mama yake alipoitwa kwenye kikundi cha Mambo Hayo, kilichokuwa kikifanya maonyesho ya tamthilia kwenye kituo cha ITV, ndipo nyota ilipoanza kumuwakia.
“Wamiliki wa kikundi hicho walikuwa wanatafuta mwigizaji mwanamke na binti mwingine mdogo
mwenye kipaji. Niliitwa na kufanyiwa usaili, nikaonekana nafaa,”alisema.
Mara baada ya kujiunga na kikundi hicho, alikutana na waigizaji wengine nyota kama vile Richie,
Bishanga, Waridi na Aisha na tamthilia yake ya kwanza ilikuwa Nyota.
Hata hivyo, kundi hilo halikudumu kwa muda mrefu. Lilivunjika mwaka mmoja baadaye na kuzaliwa kwa makundi ya Nyota Ensemble na Nyota Academia.
Filamu ya kwanza ya Monalisa inajulikana kwa jina la ‘Girlfriende’, ambayo aliicheza akiwa muigizaji mkuu. Anakiri kuwa, filamu hiyo ndiyo iliyoleta mapinduzi makubwa katika fani hiyo nchini. Baadaye alicheza filamu za ‘Dilema’ na ‘Sabrina’, ambazo anakiri kwamba zilizidi kuwavutia vijana wengi kujitosa kwenye fani hiyo, ambayo baadhi yao imewaletea mafanikio makubwa kimaisha.
Monalisa anakiri kwamba fani ya filamu inalipa ikitumiwa vizuri na kwamba imemwezesha kuishi vyema, kupata vitu vizuri na kuwatunza watoto wake. Alisema anaichukulia fani hiyo kuwa ndiyo kazi yake inayomwendeshea maisha yake.
Anamshukuru mama yake mzazi, Natasha kuwa ndiye aliyechangia sehemu kubwa ya mafanikio yake kutokana na ushauri, ambao amekuwa akimpatia mara kwa mara.
“Kwa kweli nampenda sana mama yangu kiasi kwamba wakati mwingine huwa najisahau na
kumchukulia kama vile rafiki yangu,”alisema.
Vilevile anamshukuru mumewe, Tyson kwamba naye alichangia kwa kiasi kikubwa mafanikio yake kutokana na kuwa muongozaji katika fani hiyo. Pia aliwashukuru wasanii wenzake kwa kumpa ushirikiano wa hali na mali.
Kwa sasa, Monalisa anaishi kwa kujitegemea baada ya kutengana na mumewe. Burudani zake kubwa ni kulala kwa muda mrefu, kutazama vipindi vya ndani na nje vya televisheni na kupika.